Israel Le Hamas Thu Lawrkhawm

Gaza Ihsin A Rami Rocket Pawl

Atufang Israel le Hamas karlak ih doawknak hi leitlunpi ih buaipi le ruahharpi bikmi pakhat a si ve. Khat le khat an doawknak hi a sosang nasa ih, Israel raldonak vanzam le tidai ralkap pawlin Gaza ah lut in an dolet. Hamas pawlin a hmaisa ah Israel thlanglam ih um mipi pawl cu rocket in an kap ciamco. A poi ve zetmi cu Hamas pawlih rocket hi a hmunhma nei loin duhduh nak hmun ah an tla. Ṭha te-ih controlmi a si lo. Cucing cun a cuih rocket pawl cu ṭih a nung zet. Kan dung Tlawngkai Nihnihni,12.11.12, zinglam ah khan Israel ram Kiryat Malachi khua ih inn pakhat cu rocket in a ngah ih mi pathum an thi. Cumi vek thilcangmi pawl cun rocket pawlih ṭihnunzia a langter.

Curuangah Israel khawte, khawpi le khawlipi pawl cu cumi rocket pawlih kapngah pang ding ṭih in an um. A hleice in Tel Aviv khawpi hi Hamas pawl cun an tumbik. Mipi thawng tampi ih himnak hrangah Israel acozah cun a buai ngaingai.

Rocket Pawl Jerusalem Lam An Hoi Thlang

Hamas ralkap pawl cun the holy city tiih kawhmi Jerusalem lam hoi in, Gaza ihsin an rocket pawl an kap thok thlang. Hamas ralkap pawl cun Israel ih an parliament innpi kapsiat dingah an tum rero thu an sim. Asinan a cuih rocket cu Jerusalem khawlipi sungah tla loin lenglam ah a tla.

Hi thubuai ruangah Tlawngkai Nithumni, 14.11.12, ihsin ṭhokin Palestine mi 20 le Israel mi 3 an  thi zo. Palestine hruaitu pawlin a thitu mi 20 lakah a malbik nauhak pa 5 a tel tiin an sim.

Ziangtluk In An Saitsuah Aw Theu

A ngaingai ahcun Israel le Hamas karlak ih doawknak hi a rei zo. Atu ah an ṭhoksal lala mi men a si. A netabik 2008 le 2009 sungah Palestine mi 1400 olten thihhloh an tong. Gaza cu a siat nasatuk. Cumi hnu cun Israel le Hamas karlak boruak cu a ṭha deuh. Asinan Gaza ihsin Israel ah tuikum sung vial ah rocket in vei 750 an kap zo. A kaptu pawl hi Hamas pawlih controlmi cu a tamsawn an si nan hrekkhat cu Hamas pawlih theihpi lomi an si. Hrekkhat cu Hamas ralkap hlun pawl an si ih, hrekkhat cu ralkap lutpek  pawl an si. Vei tampi cu Israel lam kapdan an zirnak ih an kapsinmi an si. Hrekkhat lala cu Hamas lo phuaihdang pawl an si. A phuaih tete an tamtuk. Cuvek phuaih lakih pakhat cu Jaysh sl-Islam an si. Jaysh sl-Islam phuaih cun kan dung August 8 ah rocket thawn an kap ih Egypt ralkap 16, Sinai ah, an thi dah.

Egypt Acozah In A Ngaihsak Ve

Egypt President Mohamed Morsy in naa-tak in a ṭong. Israel ih um Palestine palai pawl cu kawhsal ding Arab League le U.N. pawlah relsak dingin dil dingah a sim duh. Cun an Prime Minister khal Gaza ah vehvai dingah a fial. Asinan cuvek men cun Gaza le Sinai ih buainak cu a reh thei lo men ding. Cule Egypt cun sipuazi, economiclam, bawm ding cu pakhatnak ah a ret.

Atufang ah Leitlunpi huap Harsaluan Sumpai (International Monetary Fund) thawngin $ 4 billion cu America ih bawmnak in an hmang thei.  Egypt in cuvek cun Palestine pawl a ngaihsak lai-ah Hamas cu kom dingah a duhtuk lem lo. Egypt cun a ṭha deuhmi dinhmun an nei theinak ding a duhsak. Egypt cun Hamas cu jihadis timi Muslim si ruangih Christian dotu pawl cu kil le control dingin a fial a tul.  Culawng ah Gaza cu hi hnakin a ong-aw dingih Turkey, Qatar le U.S. vek ram pawlih nasa zetih bawmnak cu an ngah ding. Cun Hamas cu Israel ram ih sinak kha lungkim in, upat in le hnemhnget in um dingah a fial a tul. Cuvek a si lo sung poh cu Middle East ah lungawinak le daihnak a um thei lo ding.

Comments

comments

Comments

%d bloggers like this: