Israel Le Arab Doawknak (Six-Day War) Le Thilthleng Mallai

imagesTHUHMAIHRUAI : Hi thu hi mi tamtak in thuanthu vekin kan thei ih, Israel le Arab pawl ni 6 sung an do-aw ti cu kan thei tlang theh ding. Curuangah, mi thiampawl le mifim pawl in thuhla tha si tiih an rak ngan mi cu, kannih khal in theihkauhnak ah thei ve sehla a tha ding ti ruahnak thawn, Internet par ih an retmi pawl zohkhawm in ka run ngan ve. (Mizo ih nganmi ka zohtam cuang)

Israel pawl hi, Pathian hrilmi hnam ti kan thei cio ko. An vahvaihnak ram le an umnak hmunkip ah, ngaihlotu le dodaltu hi an tong thei ringring theu. Asinan, ziangtizawng in simaw Pathian ih runhimnak hi an co thei ringring theu. Kum zabi 19 nak a rung thlen cun, leitlun ralpi tla a rung suak ih, Judah mi tamtak cu thahin an rak um. Harsatnak tamtak karlak ah 1948 ah Independent ngah in anmahte ukawknak an run ngah ve thlang. Israel pawl in Independent an ngahnak ding ah hin, UN cun thurelsaknak nei in Palestine ram cu ram hnih ah a then ih, cumi lungawilo le duhlotu Arab tangkhawm pawl le Israel cun doawknak an nei ih, cumi cu The War of Independence tiin an ko ih, Arabic tong cun AL Naqba tiin an ko ve. Cui doawknak ah cun, Israel cun nehnak a co ruangah, Arab tangkhawm pawl cu an thin a na zet ih, hmuntin le ramtin ah an darh theh hai. Cuti ih an darh theh hnu ah cun, Arab thangkhawm pawl cun, Israel tlun ah phuleisam / phuba lak ding lawnglawng hi an duhthusam asi ih, ziangtik ah, ziangtin phuba kan la ding ti cu an relkhawm bik theumi a rung si.

PLO AN CANGVAI : Arab tangkhawm pawl cuti ih an sun ruang ih thinheng le thinna cun ziangtin Israel kan nuai cimit ding timi ruahkhawmnak annei ringring ih, cumi an ruahnak ah cun Palestine Liberation Organization ( PLO ) timi cu, Egypt President Gamal Abdel Nasser hmangin an dinsuak. Cutawk ah cun Ahmad Shukeirei cu an hotu ah ruatin anih in a hruai hai. Egypt President cun, Israel pawl an nehnak dingah ti ruahsannak thawn Soviet ram hruaitu pawl thawn thureltlangnak an nei ih, cutawk ihsin ralthuam tamtak khal an ngah thei. Cutin, 1948 kum ih ral an nehlonak cu thei ringringin, Israel pawl parah phuba la ding in 1967 kum tir lam ah cun doawknak an timtuah thlang. Nasser cun Soviet pawl lawng rinsan lo in, Syria President Hafez al-Assad le Jordan hruaitu Hussain khal a lamtang dingah a sawm ih, cutin man hiarhiar in Israel tlun ih phuba la ding cun an tim an tuah.

ISRAEL KHAL A RALRING : Arab tangkhawm pawlin Israel do an tum ti cu Israel khalin a theih ve ruangah ralring zetin khua arak cuan ve ringring. Cutin Israel ram hruaitu hlun David Ben Gurion run  thlengtu, Labour Party ih an hruaitu thar, Prime Minister Levi Eshkol cun, 1967 May thla ah cun, an ram mipi hnen ah Radio ihsin “ Raldo a tul ding” tiin asim hai. Cutin ralkap lam ih mithiam zet Moshe Dayan cu Defence Minister ding hrangah a hril hngal ih, anih in ralkap pawl a hruai hai. Egypt President Nasser khalin, doawknak cu a taktak in a thleng thlang ding ti a theihfiang ruangah, May 16 ni ah, 1956 ih British-France-Israel pawl ih an rak lakmi hmun Suez Canal ih UN ralkap pawl cu an umnak hmun ihsin tlan dingin asim hai. May 22 ni ah cun, Israel pawlin lawng thawn khual an tlawnnak ih an hmanmi Strait of Titan le The Red Sea saklam pawl khal cu an kharsak thluh ih, cutawk ah ralkap tingkhat, doawknak motor 1000 leh doawknak tanks 1000 an ret hngal ih, May thla cem hrawng cun, “ Arab ram tangkhawm pawlin doawknak kan man ta” tiin an ausuak durdo thlang.

SIX-DAY WAR CU : 1967, June 5 ah Ni 6 doawknak cu an thok thlang ih, Israel lam cu cangvai hmaisa in, Egypt Airfield cu bomb in an puahsiat theh ih, cumi thluh cun an lawng cawlhnak hmunpawl cu an kap siat vivo. Saklam ihsin Egypt ih an sawmmi Jordan ralkap pawl le Golan Heights timi hmun ih umhmunkhuartu  Syria ralkap pawl le Israel ralkap pawl cun thiamtakin an kap vivo. Reilote ah Palsestine ramsung ih Gaza Strip le West Bank hmun pawl cu an la thei hngal thlang. Syria ramri ih Golan Heights, East Jerusalem le Sinai Peninsula hmun pawl khal an la vivo ih, an vanzam tumnak le lawng cawlhnak hmunpawl an tisiat sak thluh ruangah, June 10 ah cun Arab tangkhawm cu an sung ruairo thlang. Six Day War cu – 1967 June 5,6,7,8,9,10 pawl an si.

DOAWKNAK RUANGAH :  Ni reilote sungih Israel in Arab tangkhawm pawl a neh cu leitlun mipi cun mak an ti ih, Israel CIA pawl ih cangvaihnak le an raldodan ( strategy ) pawl cu mak an ti ih, culai hrawng ih leitlun titi thawbik cu asi. Israel in Sinai Peninsula a lakmi cu, 1979 ah remnak thu ( Israel – Egypt Peace Treat ) an tuah ruangah Israel cun Egypt hnen ah an pe sal. West Bank lawngte cu Israel ralkap pawl kuthnuai ah a um lanta. Doawknak an theh hnu ah cun, kum 19 sung lai Judah pawl kut ih thleng thei nawnlo, Judah pawl ih khawpi thianghlim Jerusalem cu Israel kutah a thleng sal ih, an hnam thuanthu ih hmun thupi zet West Bank khal an kut ah a um ngah thlang. Cutin Israel ram cun Mipi Ukawknak (Civilian Law) cu an tuah hngal ih, Golan Heights le East Jerusalem ih um Arab pawlin, Israel rammi sinak (citizenship) an dil tik khal ah, awlaiten an pe hngal theu mai.

AN THUHLA AH UN LUT VE, ISRAEL IN MAK TI LO : Israel in Civilian Law a tuah ruangah UN Security Council cun Israel ram cu a mawhthluk zet. UN Cun, Golan Heights le East Jerusalem hmun cu , zohman ih um theihlonak hmun (null and void) tiin a ret. Israel le Arab pawl karlak ah remnak a um vivo theinak dingah, UN Security Council cun dan hrampi 242 cu “ Land for Peace” tiin an tuah ih, Israel pawlin danlo ih an luahmi ram pawl ihsin suahsan dingin UN Security Council cun Israel hnenah a ngen nan, tuini tiang cu Israel in UN dan zawmlo in cutawk hmun ah cun an um rero thotho.

WEST BANK : Doawknak a thlen veten, Israel cozah Labour Party cun West Bank ah tanhmun khuar hngal dingin an ti hngal. West Bank hi 1948 ah khan Jordan kut ah pek asi nan, Britain lawngin a lungkimpi ruangah PLO kutah hlan leh asi hngal. West Bank ih umpawl hi Arab, Palestine le 1948 kum ih Arab-Israel doawknak ih raltlan ( refugee ) pawl an si hai. 1967 ih niruk doawknak theh hnu ah cun West Bank cu Israel ralkap pawl kuthnuai ah retsal asi ih 1993 tiang Israel ralkap pawl kuthnuai ah a um. PLO in Israel hnen ih a dil vekin, Palestine mi umnak hmun pawl cu Palestine Authority (PA) hnuai ah pekin a umsal. Cumi hnu ah, Israel le Palestine pawl an doawk ringring theu ruangah cun, West Bank ah Israel le Palestine pawl karlak ah hruang sangzet thawn tuah asi.

GAZA STRIP : Gaza Strip cu Egypt thawn an ramri kiangte ih um asi ih, 1948 ihsin 1967 tiang Egypt kuthnuai ah a um. 1967 ihsin 2005 tiang kha Israel kuthnuai ah a um ih, 2005 ihsin Israel cun Israel’s Unilateral Disengagement Plan dan a tuah hnu ah cun Gaza ih ummi pawl cu Israel ralkap pawl cun an thawn theh ih, Gaza Airspace le lawng cawlhnak hmun pawl lawngte cu Israel kuthnuai ah a umlai. Gaza ramri thuhla ah, Israel, European Unions ( EU ), Palestine Authority ( PA ) le Egypt pawl cun remawknak an rak tuah ih, cumi hnu ah cun EU cun a zoh ringring thlang.

ARAB RAM PAWL IH RUAHDAN :  Kum 2006 ah khan, hi an buainak ramri pawl cu Hamas Movement pawlin an run lak ruangah ramri thuhla ah buainak nasaten asuak sal ih, Israel le EU cun Hamas pawl ih cangvaihnak cu an duhlo ruangah, cutawk hrawng ih um Palsetine refugee pawl hnen ih bomnak EU in Israel hmangih an pekmi pawl cu Israel cun an pe nawnlo. Cumi ruangah Arab tangkhawm pawl khal an thin a thosal ih, Khartoum Arab timi thureltlangnak an nei sal ih, cutawk ah Israel thawn remnak tuah nawnlo dingin thutitluknak an tuah hngal ih, an thurel mi hrekkhat pawl tla cu :

1 ) Israel ram dinsuahnak lungkimpi lo.

2 ) Israel thawn remnak tuah nawnlo ding.

3 ) Israel thawn biakawk lo ding

timi pawl an si.

ISRAEL HMAILAM : Israel pabik dinhmun rak ding dahtu David Ben Gurion cun, “ Israel cun Arab leilung ah ram a neih ruangah, Arab pawl hnen ih ram zaten pek thluh asilo ah cun Israel le Arab buainak cu a reh nawnlo ding” tiin a rak tongsuak dah. Cuvekin, a hnu ih Israel Prime Minister run tuan tumtu Ariel Sharon, Ehud Barak le Ahud Olmert pawl khalin hi buainak hi an pumpelh theilo ding thu a rak aupi dah zo. Israel hin ralnehnak thawn an ram hi a dinsuak mi asi nan, Arab pawl thawn an buainak cun rehlam cu a pan thei cuanglo ding tihi leitlun mipi hmuhcia mi thil pakhat cu asi ve.

Bible thuanthu ihsin kan zoh asi khalle, Israel le Palestine ramhnih buainak hi reh ti a nei lo ih, ral aw le thataw ringring ram hnih ansi. Tuini tiang khal ih UN in a buaipi mi le remnak tuahsak a duhmi ramhnih pawl ih buainak hin rehlam a pan thei cuang ngaingai lo. Ziangruangah hi ram hnih hi tuini tiang remaw theilo in an um timi hi mithiam tampi in an hawl rero nan, ziangruangah timi lehnak ngaingai an hmusuak thei lo ( Bible sung ngaingai an zohlo ruang khal ah asi men thei ). An hmuhsuahmi cu, tuihlan kum 40 hrawng ih an buainak ruangah asi titian lawng an hmu ban thei. Israel ram ihsin Noble Peace Price rak ngahtu Elie Wiesel khal in, “ Israel leh Palestine hin ram kan nei / dinsuak veve ih, lungrualtak ih kan umtlang lo ah cun kan ramhnih karlak ah remnak taktak a umtheilo ding” tiin a cabu sung ah a rak ngan ve dah asi.

BIBLE VEKIN : Thutiam Fa Isak le thutiam fa silo Ismael tei pahnih cu, Abraham ah pa hmunkhat si khal sehla, inn ihsin dawisuah mi Ismael cun a ral ringring ding ti cu Bible ih langmi asi ve.

Comments

comments

Comments

%d bloggers like this: