Israel in West Bank Leh East Jerusalem Ah In Sak Bet A Tum

Pu Sum

Kandung zarh  ah khan  UN General Assembly cun Palestinian Authority President, Mahmoud Abbas ih dilnak vekin Palestinian cu UN member silo a ttul caanih ngaihdan thawhtheive tu dingah Palestinian pawlcu a pawmih, himi veten Israel Cozah cun East Jerusalem leh West Bank ih Juda pawlih umnakding In 3,000 sakbet nakding thu a puancih veruangah UN hotu pawlcu Israel Cozah thilti danah an lungawilo zet.

Hiti vekih Palestinian pawlthawi an karlak boruak buainak sosang suakthei ding thuhla Israel in a puanih ruangah UN General Secretary, Ban Ki-Moon cu a lungawilo zetih Israel Prime Minister, Banjamin Natanyahu ih thusuah micu tha a tilo thu leh pawi a tithu a simih, himi thu in Israel leh Palestinian karlak ih rualrem awknak um dingih UN in thu a tawlrel micu thil lamlo leh umzia neilo ah a cangter a si tiah asimih, UN in rualrem nak lamzin a hawlmi cu a ti sukuk tengteng ding a si tiah a sim.

Himi ih hleiah Israel Cozah cun Palestinian pawlin UN ih thu neihnak an dilmi UN in a pawmsak nak an duhlozia langter nakah leh Palestinian  Authority Hotu pawl parih an lungawilo nak langter nakah West Bank leh East Jerusalem ihsi  Juda pawl hnen ihsi Palestinian Authority hrangih Tax an lak theuni dollar Million 100 hrawngcu lakbet a tum nawnlo thu leh Palestinian Authority parih an pek tumlo thukhal an simcihve.

Himi thuhi Israel Cozah cun  Palestinian Authority in Israel ram ihsi Electric Power pesuaktu Company hnenih paisa an bakmi dollar Million 200 an pekduhlo ruangah asi tiah an tinan, a hlanah khan Israel Finance Minister, Yuval Steinitz in  Palestinian Authority hotu pawlin UN ih Palestinian in ramhrante nei dingih an dil tummi UN in a ello a si ah cun Tax an lakmi pawlhi an titawk dingthu a rak simzo ruangah  tui an Tax lakmi an titawp khalhi Palestinian  pawl ram dinhmun UN in sangsawnih a ret ruangih an lungawilo nak a langter nak a si dingah ruah a si.

Hiti vekih Israel Cozah in East Jerusalem leh West Bank in Juda pawlih umnak dingin In 3,000 sakbet a tum ruangah UN in Palestinian pawlhi ram dinhmun sangah khaisang khal seh la Palestinian pawlih hrangah cun ramhran dinsuah dingcu  thil huphurh umzet a si dingih, Isreal thiltum himi Palestinian hranag cun hnoksakzet thil a si dingah ruah a siih, Israel in an In sak tummi an manhlap zamrang sinsin tla ah cun Palestinian Authority President, Mahmoud Abbas  ih hrangah a luzin thlakzet dingah ruah a si.

Himi thuhin America Cozah  thinlung khal a tthongzetih, America hi UN  General Assembly Member 193 lakih Palestinian pawlin ram hrante an neih duhlotu ram 9 lakih tel a siih, US Secretary of State, Hillary Clinton cun  UN  General Assembly in Palestinian pawlih dinhmun hi khaisang deuh hman sehla Palestinian pawlin ram hrante an dinsuak ding tinak a silo in Palestinian Authority hotu pawlin ramhran te dinsuak dingih an dil nakcu US cun a pawmpilo tiah a simih, asinan Israel leh Palestinian pawlhi hmundang te veve ah um haiseh la rualrem awten umtlanghaiseh tihi US duhdan a si tiah a sim.

Israel in West Bank leh East Jerusalem ih Juda pawl hrangih umnak ding In sak an tumnak thuhi Israel Prime Minister, Banjamin Natanyahu leh Senior Minister, 8 pawlih relkhawm mi a siih, kum 1967 ihsin West Bank leh East Jerusalem ah hin Juda minung ziangmawzat an rak umzo ih , tuah hi West Bank leh Est Jerusalem ah Juda minung 5,00,000 hrawng an  um ih Palestinian pawlhi Million 2 leh 7,00,000 hrawng an umveih kum 1967 ah Israel in a la ih Palestinian pawlcun kanram tiah an sal ringring nan Israel in a suahsan duhlo timen lawng silo in a sawh hnget aw vivo lam a si.

Comments

comments

Comments

%d bloggers like this: