Israel In Hamas Hotu Kapthat

Surbung Tlang News
by : Pasum
January 3rd, 2008.
 
Israel In Hamas Hotu Kapthat
 
Israel vanzam in Gaza bial a kah lehsal ruangah Hamas hruaitu Nizar Rayan leh a fate 10 leh an inn hnen mi pahnih an thibet.  Hi pawlhi Jabaliya Refugee Camp ih um ansi ih.  Hiti vekih Hamas Speaker mipawi mawhzet kahthat asi ruangah Hamas pawl hrangah cun nasazet ih sun nak asi.   Zarhkhat sung Israel in Hamas pawl a kahnak ahhin Palistinian pawl minung 420 lenglo an thizo ih midang 2,100 lenglo’n hriamhma an tuar.  Israel raldo nak vanzam, lawng ralkap, Tank leh ralkap tampi cun missile thawn Gaza hi an kulh thluhzo ih.  Hamas pawl’n Rocket hmangih an kap sal ringring asilen Israel ralkap hi Gaza ah lut ding’n an timtuah aw thluhzo.  Himi cing’n Hamas pawl cun Rocket hmangih Israel an kah nakcu bansan an tum hrih cuanglo.
 
Israel Missile in a kahthat mi  Hamas hruaitu Nizar Rayan hi Hamas hruaitu lakih mihlun bik asiih. Kum 2004 hnu lamih Israel pawl’n Hamas hruaitu pawimawh an thah hmaisa bik mi asi.  Tui Israel leh Hamas pawlih do awknak hi ” Operation Cast Lead” ti ih hmin pek asi.  Hamas pawl khal’n Rocket hmangih Israel an kah ringring ve ruangah Israel mi 4 an thive ih mi 10 lenglo in hriamhma an puve.  UN leh ram dangdang pawl’n Israel cu sup aw ding in leh Ceasefire tuah dingin an nawr rero.  Asinan Israel cun tui kan dung naite ih Ceasefire  an titawp mi Hamas pawl’n tuahbet an duhnawnlo ruangah Israel cun Hamas pawlcu tidai vekih an nem hlan sungcu kahbet vivo an tumih  ceasefire tuahpi an duh nawnlo thu an sim.
 
Himi laiah Hamas hruaitu pakhat a sa himnak hawlih ramdangih relh laitu. Khaled Meshaal. cun  Israel ralkap pawl’n Gaza an luh cilh pang asi ah cun Israel ram cu thimkhawzing tikcu an hmang ding tiah a hrove. Hamas pawlcun Gaza cu Israel vanzam in kap rero khal sehla  Hamas pawlih hmun pawimawh leh Ralthuam hmunpi cu a him tiah an simbet.  UN cun Israel in Gaza ni 6 sung a kah ruangah mipi vangtlang thilsual tuahlo an thitam tukih minung 400 lenglo thimi sung ah 25% cu mipi huatthu rello an si ati.
 
US Presidnet Bush cun. Hi buainak hi Hamas pawl ruangih suakmi asiih  Hamas pawl’n Israel ummen an kah hmaisa rero ruangah Israel thinheng tuar aw theinawnlo in a kapletsal asi ati. Bush cun Hamas pawl’n ramdang ihsi ralthuam hriamnam lakluh an bansan lo ah cun  rualrem nak tuahding ih cabuai kil tlangding cu  thil harsazet asi tiah asimbet.  Israel cun Gaza cu a bomb rero laiih mizan khalah  Gaza thlanglam ih America tlawng inn pakhat a bomb siatsal ih mi pakhat athi. Israel cun Hamas pawlcu daitei um dingah asim ih asi nan Hamas pawl cun Rocket leh Mortar ih mizan tiangah Israel cu an kap rero lai…
 
Ethiopia  Ralkap In Somalia SuahSan Ding
 
Somalia ram ih lawng rukhmang mi sual pawlcu UN remti nakih do an si ruangah kumhlun December thla sungih sin an malzet thlang tiah International Maritime Bureau cun asim. Misual pawlhin kumhlun Decembar thla sungah Gulf of Aden kiangkap ah lawng tamzet ruk tum’n an bei nan  Lawng pahnih lawng an ru suak tiah Bureau cun asimbet.  Tui kartir khalah misual pawl’n Egypt leng leh Indian lawng Oil phur cu ruktum’n an kaizo nan Malaysia ralkap pawl’n Helicopter thawn an runsuaksal. Cun kumthar ni 1 ah khan Egypt lawng leilung dawmttha  Ton 6,000 phurcu an kai tiah Egypt Foreign Ministry cun a sim. an simbet nakah  Himi lawng rutu pawlhi minung 15 an siih ralthuam meithal thazetzet an kengih hi lawng leh a hna ttuantu minung 28 pawl cu an hrenglai asi tiah  Egypt Deputy Foreign Minister Ahmed Rizq cun asimbet.
 
Lawng ruk hmang misual pawlih umnak Gulf of Aden hrawng ah hin US, UK, Japan, Russia, German leh leitlun ram dangdang pawl’n humhim tu Navy ralkap leh raldo nak lawng an kuat rero ruangah  tuihlan vekin misual pawlhi an tamtuk nawnlo tiah an sim.  International Maritime Bureau (IMB) in a sim nakah  2008 sungah misual pawl’n lawng 42 an ruhlo ih cumi sungah  lawng 14 cu an hrenglai ih. Himi an hrenlai mi pawl sungah Saudia Arabia lawng Oil   $100 Million man phurtu Sirius Star khal a tanglai..
 
Himi laiah kumhnih sung Somalia ram rak kil humhim tu Ethiopia ram ralkap pawlcun Somalia ramhi an suahsan rero lai ih.  Ethiopia Prime Minister  Meles Zenawi, ih thupuangtu in a simnakah Ethiopia ralkap pawl’n Somalia ram an suahsan nakdingah  tikcu can rei deuh a awh a ttul ding tiah asim.  Ethiopia ralkap suakhmaisa pawlcun turck 30 hmangin Somalia khawpi Mogadishu cu an suahsan zo tiah a simbet.  Ethiopia ralkap pawl an suah zawngah zinkap ih bomb kammi a puakih ralkap pahnih an thi ih ralkap pawl thin hengin mipi an kah ciamco ruangah mi ziang mawzat an thi. 
 
Ethiopia ralkap pawlhi African Union ih thlahmi Uganda leh Buruni ralkap 3,400 in an thlak dingih an mah thlaktu ding ralkap pawl an luhthluh hnu lawngah Ethiopia ralkap pawlhin Somalia ram hi an suahsan thei fangding asi. Somalia ram sungah mipi Million 3 lenglo cu  harsa zet ei leh in tirawl neilo an si ih. Ram dang tlawmngai pawlih bawmnak ringih nungmi an si. A dang Million 1 hrawng cu Inn leh lo khal neilo an si. Somalia ram hi a buainak a reituk zo ruangah mipi vangtlang harsa zetin an umih. Somalia cozahin Baido bial lawng a uk theiih an ram thlanglam kausawn cu Mosolman Tapung pawlin an uk.  Himi ruangah 1991 ihsin cozah mumal umlo misual pawlih  thu neihnak an si ih. nikhat hnu nikhat sualnak hi a luar vivo ih tu ah cun leitlun ih misual lawngruk hmang tamnak bik hmun asi..
 
Cuba Ram Kum 50 Kim Nak Lawm
 
Cuba ram President Fidel Castro in Communist ram a dinsuah nak kum 50 a kimnak cu kumthar  January 1, 2009 ah khan Cuba mipi in an lawmih. Fidel Castro ih naupa tui an President Raul Castro cun kum 1951 January 1st, ih nehnak kanco ti an puansuahnak hmun ih sin thu asim.Raul Castro cun Cuba Communist ramcu kum 50 dang cakzetih a feh vivo leh a beisei thu asimih. Cumi dingah Cuba mipi cu theih tawp suahih ttangtlang dingah a cah. Raul Castro cun US tipi kapih sin KM 145 lawngte ih hlami Cuba Communist ramcu hnget khoh zetih a din ringring a ttul ati, Cuba Cozah siatsuah tumtu pawl lakih sin ralring dingah mipi pawlcu a cah, US  White House thupuangtu cun  Cuba mipi cun Communist ramsung ihsin an zalen nak ni hngakin an thlir ringring ati. Himi laiah Cuba ram Communist dintu Fidel Castro kum 82 micu a liamcia thla 18 ihsin mipi hmaiah a lang nawnlo ih Krisma leh kumthar thucah khal TV insin a sim nawnlo.
 
Australia In US Dil Nak A Pawm Lo
 
Australia cun Guantanamo Bay Detention Camp ih thawngtla pawl an ramih la dingih US in a dilnak cu a el thla fel asi tiah  Australia Deputy Prime Minister Julia Gillard cun asim. US ih dilnak an ell naksan hi  an ramsung himnak leh ramdangmi an ramih an luhbet lonak dingah an elnak asi.  Australia hin Guantannamo ih thawngtla pawl ladingih US in a dilnak a elsal vawi hnihnak asi. US in hi thlawng a thlakmi pawlhi an ram ih kuatsal an silen an ramah nasazet ih hrem leh thah dingtla na si ruangah  an ramah kuatsallo ih ramdang rak mikhual dingih a sawmnak asi, Himim Guantanamo Bay  Detention Camp ah hin thawngtla minung 255 an umih cumi sungah  60 cu US cozah in an sualnak a hlihsak zomi an si. Hi Guantanamo Bay Detention Camp hi Obama ih President dingih Compaign a neihlai ah khan President ih ka tling asilen hi thawng inhi kum hnih sungah ka kharding ti ih a tiamkam mi asi ruangah tu ah hin zamrangzet ih khar an tumnak asi. US cun tui kan dungkar khalah ram 100 hnenah hi thawngtla pawl rakla dingah dilnak aneizo. UK leh Portugal khalin European Union rampawl hnenah hi thawgtla pawlhi rak la dingah an ngenzo. Guantanamo Bay Detention Camp ih thawng Inn hi US ram hmeibal tertu bik leh leitlun ram dang pawlkhalin an sawisel mibik asiih  Obama cun a tiamkam awknak vekin  President asi ihsi kum hnih ah khar tumin theitawp a suah rero asi.
 
Sri Lanka Ralkap LTTE Khawpi Ah Lut
 
Sri Lanka Cozah ralkap pawlcun LTTE pawlih umnak khawpi Kilinochchi cu an lutzo tiah an simih kum 10 sungih Sri Lanka ralkap hi khawpi ih an luh vawikhat nak asi. Sri Lanka cozah ralkap pawlhi Tlangleng Station an thlengzo ih. Hi khawpi hi anla suak menthei tiah an sim. Asinan LTTE pawlkhalin nasa zetin an rakkap ve ih. Tu ah hin an kapaw rero laiih thil umdan thufiang sim theih asi hrihlo. Sri Lanka ralbawi pawlcun hi khawpi hi lamai dingin an relih asi nan LTTE pawlcun zianghman an sim velo.LTTE pawlin mizan sunih an simnakah Ralkap pawlin bomb an thlak nakah civil mi 5 an thibet ti lawng ansim.
 
Colombo ih BBC corr Roland Buerk in asim nakah  a liamcia thla 4 ihsin Sri Lanka ralkap pawlin hi khawpi hi an rak naih vivozo ih. Hi khawpi hi kum 10 sung LTTE kutsung ih rak umzo asi ruangah Sri Lanka ralkap pawlin an laksak thei asi ah cun LTTE pawl hrangah cun nasa zetih sun nak asi ding atiah asim. Mizan sunah hi khawpi pannak zin ih khaw pawmawhzet  Paranthan, ah ralkap pawlleh LTTE pawlhi nasa zetin an kapaw ciamco ih Cozah ralkap pawlin Fighter Jet leh Helicopter, Gunship, leh Pukpi, phunphun hmangin an kap ih LTTE pawlkhalin  nasazetin an rakkap veih LTTE minung 50 lenglo in an thih phah. cumi laiah LTTE lam ttang Website Tamilnet cun Sri Lanka ralkap khal tampi an thive tiah a tarlang..
 
Iraq Bomb Puak Mi 23 Thi Midang 110 Hriam Hma Pu
 
Mizan ah Iraq khawpi Baghdad thlanglam KM 20 ih hla Yusufya khua ah thihcilh Bomb a puakih minung 23 an thiih minung 110 in hriamhma an pu. Hi mithi leh hriamhma tuar pawlhi Sunnu Muslim Traibal hman hruaitu Sheikh Mohammed Abdullah Salih  inn-ih tawngkhawmaw pawl ansi ih.Himi hmunah thihcilh bomb paitu hin a bomb paimi a tipuak asi. Himi bialhi tuihlan ah cun Al Qaida pawlih rak umnak bik asiih 2007 ihsi khan mipi pawlthaw in an remaw thei nawnloih mipi pawl thawin an do aw ttheu. Iraq Interior Ministry cun Minung 30 an thi tiah asimih Police pawlcun 23 an thi atiah an simve.BBC cun hiti vek report bangaw lomi hi ram tampi ah a um thei mi asi ati..
 
Obama A Sang Bik
 
US President thar Obama cu tuithla ni 20 ah lakluh asi dingih kum 1981 hnu lamih US President thabik leh mipi rinsan bikmi asi. CNN/Opinion Research Corp Survey ihsi a lang danah  America mipi rinsan nak point zaa ah 76% hi Obama in a hmuih. Bill Clinton khan 67% a rakhmu. Bush cun 60% a hmuve..
 
 
 
Tikcucan hmangdik hramaw   nikhat sungah nazi 24 a umih  nazi 8 sung hna ttuan awla  nazi 6 sung it aw.  nazi 3 sung casiar/ zoh/ thuthang siaraw/ minute 15 sung tetal thlacamaw  tikcu lawnglak na nei tampi lai.

Comments

comments

Comments

%d bloggers like this: