Iraq Ram Ih US Ralkap

Iraq ram ralkap hotu Lt, General, Babaker Zebari cun Iraq ramih US ralkap pawl kum 2011 ih laksuah thluh dingih ruahman nak ummi cu, tikcu caan reideuh um bet dingih ruahman nak tuahsal dingih a duh thu a sim.General, Babaker Zebari cun Iraq ram dinhmun zoh tikah kilhim naklam Iraq ralkap pawl kutsungih ret thluh dingcu thil cangthei a si hrihlo ih, Iraq ralkap pawlin rinsan tlakzetih Iraq ram an kilhim theinak dingcu tuihnu lam kum 10 hrawngtal a ttul lai ding tiah a simih,thil umdan zoh rero tikah hnakum ihsi tlacun buainak hi tuihlan hnakih a sosan a zumthu khal a sim.
 
Reltheu zo vekin US Cozah cun Iraq ramih an ralkap pawlcu kum 2011 sungah an zatei laksuah thluh a tumthu a rak simtheu ih, tu ah hin Iraq ramah US ralkap 64.000 an umlai ih, himi pawl sungah ralkap ziangmaw zatcu tuikum sungah a lasuak a tumih a tanglaimi ralkap 50.000 cu hnakum 2011 kumcem hlanih laksuah thluh a tum.
 
Himi thuhi mi tampi cun a tthalo tiah an raksim ringringih, Saddam Hussein ih rorel laiih, an Foreign Minister, Tarik Aziz khalin  Iraq ramcu US ralkap pawlin an suahsan a si ah cun  cinghnia kutsungih ret tavek a si ding tiah a sim. Himi laiah US President, Obama cun Iraq ramin a mahte Cozah hnegtkhoh a din theiih, lamzin tinkim ih tthanso nak lamzin a zawh thei nak dingah US ralkap pawlcu laksuah thluh an si ding tiah a simve.
 
Pakistan Tilian Thu Peh

Relzo vekin Paksitan ram tilian ruangih mithi cu 1.600 an kimzo ih midang tamzet an thih leh nun an dinhmun theihnak umlo in an hlolai ih, minung thawng tamzetin an Inn leh lo an suahsan, Himi ruangah United Nations cun Pakistan ram tilian tuarih harsat nak tuar minung Million 14 pawl hrangah bawmnak paisa  dollar Million 459 a ttulih himi bawmnak thawhkhawm dingin ram tinkim hnenah bawmnak a dil.
 
US cun Pakistan ram tilian tuar harsa pawl bawmnak dingah dollar Million 55 thawh a tumthu a puang zoih, himi hnu ah dollar Million 16.2 cu UN  Refugee Agency leh International Red Cross hrangih pek a tumthu a sim.
 
US Defence Secretary, Robert Gates in a sim nakah US Aircraft Carrier lawngpi cun Helicopter 19 phurin Pakistan ram a panih  Karachi khawpi tipi thuamthum kapih lawng colh nak hmunpi a thlengzo ih,US ralkap Helicopter hmangin tilian ih tarta hak minung 2,382 cu hmunhim lamah thiarsuak an sizo ih, bawmnak thilri tamzet khal kuat an sizo tiah mizan sunah a sim. UK Cozah khalin Pakistan ramih tilian tuartru mipi harsa pawl runnak leh bawmnak hna ttuan dingin Vanzam pali a thlah dingthu a simve.
 
Himi laiah Pakistan ramsungih Taliban pawlcun thusuah nak an tuahih, hiti vekih Tilian nasazet an tuar nakcu Muslim biaknak sakhua kalhki zawngih hna ttuan ram uktu an neih ruangah Pathian in hremnak a pekmi a si thu an simih, Pakistan ram mipi pawlcu ram dang bawmnak lalo dingin  theihter nak a suah.

(Visited 77 times, 1 visits today)

Comments

comments

Comments

%d bloggers like this: