Iraq PM Hlun That Ding

Iraq PM Hlun That Ding

Iraq ramih Saddam Hussein a lal laiih a mi rinsanzet mi le Saddam Hussein  kut hnuaiih, Deputy Prime Minister leh Foreign Minister, rak ttuantu Tariq Aziz kum 74 micu Iraq Suprem Court in thah dingin a thu a relcat sak. Hiti vekih thah dingih a parih thu tthennak a tuah naksan hi biaknak sakhua dangpawl siatsuahtu ah le sumdawng milian tampi  thattu ih puh a si ruangah thiamlo coter a si.

Tariq Aziz ih rualah midang pahnih  Saddam Hussein ih lal laiih mi pawimawhzet thotho Interiro Minister, hlun Sadoun Sahkir leh Saddam Hussein ih Private Secretary, rak ttuantu Abed Hamoud khal that dingin an thu relsak a si.

Saddam Hussein in kum 1980 leh 1990 kum karlak hrawngah khan Politics lamih a mah dodal theitu dingih a ruahmi pawlcu nuai cimit thluh a rak tumih, cumi sungah Shia Muslim pawlhi a dodal bikmi an raksi ih, cumi ih tlunah tui Iraq Prime Minister ttuanlai tu Nouri Al- Maliki ih telnak  Dawa Party khalhi a rak dozetmi a si.

Danglam zetin tui an thah dingmi Tariq Aziz hi Kristian a rak siih, kum 2003 April thla ih an kaih ihsin Ameroca ralkap pawlih kutah ret a si. Mitampi cun Kristian a si ruangah Tariq Aziz hin sualnak ngaingai a neilo ding tiih zumtu tamzet an umih cu ruangah thatlo dingih nawrtumtu pawlkom a dingsuak menthei tiah zumnak a um.

Misual in Germany Lawng An Kai

Somalia ram lawng rukhmang misual pawlin Kenya thawi an ramri Tipi thuanthum ah Germany ram thilri phurtu lawng an ruhlo. German ralkap thupuangtu in a sim nakah an ram thilri phurtu lawng Beluga Fortune hi United Arab Emirates ihsin South Africa panih feh a siih, Kenya ram saklam   Mombasa ihsi Peng 1,200 hrawngih hla ah  Somalia ram lawng rukhmang misual pawlin an rakkai ih an ruhlo a si tiah a sim.

Himi lawng sungih minung to pawlin hriamhma an tuar tileh mithi an um ticu a sim lo. Kandung zarhte ni khalah Mombasa ihsi Mahe panih feh Singapore lawng Oil phurtu MV York an timi cu Kenya tipi thuanthum kapah Somalia ram misual lawng rukhmang pawlin an rakkai ih an ruhlo zo, himi sungih to minung 17 khal tutiang an thih leh an dam theihnak umlo in an hlo lai.

Pakistan Bomb Puak

Pakistan ram Punjab Province  Pakpattan khua ih Sufi Muslim bawlpu pakhat Baba Farid ih thlan luhnak Gate ah Tapung misualih Bomb kammi puakah minung 6 an thiih, midang 15 in hriamhma an tuar. Palik pawlin an sim nakah hi Bomb kamtu pawlin an Bomb hi cawhnawi bawm sungah an retih  BabaFarid ih thlan luhnak ding Gata ah an retih an mah an tlan hnuah Bomb hi a puak tiah an sim.

Sufi Muslim pawlhi Muslim sakhua betu dang Shia leh Sunni pawl vekin an langsar tuk lemlo nan  Muslim Terrorist pawlhin an biaknak sakhua tidal tu ah puhin an tibuai siatsuah ringringih, Tui ttumih buainak khalah Sufi bawlpu pakhat Mufti Muneebur Rehman cun Pakistan ram Cozah hotu pawlcu an mai ramsung mipi himnak ruatlo in ramdang mi pawl ih hrangah hna an  tuansawn tiah an puh.

Hi Bomb puahtu hi ziangpawl hmanin an puahmi a si thu an simlo nan  Sufi Muslim pawlhi tuihlan ihsin Taliban pawlin an rak tibuai ih an rak siatsuah ringring rungah tui ttum Bomb puahtu khalhi Taliban pawl an si ding tiih zumnak a tumzet.

Tuithla tirte khalah Karachi khawpi ah  Sufi Muslim pawlih hmun thianghlim cu  Taliban pawlin meithal leh Bomb thawn an rak siimih minung 9 an rak thatzo. tuikum July thla khalah Lahore khawpi ih Sufi Muslim biakin cu Bomb ih puah a siih minung 40 an rak thizo.

(Visited 80 times, 1 visits today)

Comments

comments

Comments

%d bloggers like this: