Iran Thu Lawrkhawm

Tehran In Kan Himnak A Siatter Ti’n Bahrain Minister In Sim

Bahrain’s Foreign Minister Shaikh Khalid bin Ahmed Al Khalifa in kan dung Zarhteni, 8.12.12, ah Manama Dialogue meetingnak Ritz-Carlton Bahrain Hotel and Spa hmunah, “Iran in nuclear a tuahnak ihsin a cawlbang a ṭul a si. Ziangahtile nuclear a tuahmi in kan ram le kan kiangkap ih himnak security cu a siatter a si,” tiin a sim.

Cutawk meetingnak ah GCC rampawl (GCC/AGCC rampawl lakah Bahrain, Kuwait, Oman, Qatar, Saudi Arabia le UAE tiin ram 6 an tel) khal an tel ruangah, Al Khalifa in Tehran hi kanmah GCC ram pawl hrang khalah a ṭihnung ti zawngin a sim duhsan a si tiin cutawk ih Gulf Daily  thuthang in a sim.

“Iran in nuclear tuah hrih dingin a tum rero mi hi kan GCC ram pawlih pursumleilawnnak lamzin, pehtlaihawknak daanhram le himdaihnak kan neih ciami pawl, le thu kan neinak pawl cu a siatter ih a hninter a si. Ahmed Al Khalifa in Bahrain cun remdaihnak, himdaihnak hrangah anmahten a tuah thei thu a sim ih, ramleng kiangkap thawn a pehparmi himdaihnak ahcun Bahrain in amahte lawng a tuah thei lo ih kiangkap ram pawl thawn hmunkhat ih  ṭuantlang a tum thu khal a simbet.

Iran In N Korea Hnenah Rocket A Pe

Iran rammi missile lamih mithiam phuaihkhat cu N Korea ramah a feh ih, leitlun pumpi ih duhlomi N Korea ih rocket kapsuah theinak dingah technical thiamnak pawl cu an bawm hai tiin mani Tlawngkai Nikhatni, 10.12.12, ah Seoul khawlipi ih um S Korea acozah ih Chosun Ilbo thuthangca in a sim.

Cumi Iran missile mithiam pawl cu Pyongyang, N Korea in kan dung April thla ih rocket an kapsuah thei lo hnu ah a sawmsalmi pawl an si. Kan dung baite N Korea in rocket an kapsuah laiah an kapnak hmunih um mawtaw pakhat sungah Iran missile mithiam sangzet pawl an to khal an hmu. Hihi N Korea le Iran karlak ah ziangtluk in pehtlaiawknak thuk an nei ti langtertu a si. Ziangahtile N Korea ih missile an neihdan hi 1980 hnuah zoh sehla Iran thawn an thiamdan an bang-aw zet a si.

Atu Dec thla thlatir ahkhan Japan ih Kyodo thuthang ah kan dung Oct thla ihsin thokin N Korea ramsung ah Iran mithiam pawl cu hmunluah in missile le nuclear thu ah, le rampi kilhimnak system pawlah an ramhnih in an hlawm-aw rero a si tiin a sim. North Korea le Iran an ramhnih hin leitlunpi in ruahdan thawn kalh in nuclear cu an tuah rero. Leitlunpi cun nuclear an tuahmi pawl cawl ding le US le ramdang dangdang an dodalnak pawl cu cawl dingin a duhsak.

Iran In A Veithumnak Missile Kapsin

Mani Tlawngkai Nikhatni, 10.12.12, ah Iran in hmunhlapi kapnak Shahab-3 missile pawl cu an kapsin. Hi hmunhla kapnak Shahab-3 missile pawl an neinak san cu an ral tumbik Israel an kapnak dingah a si.

Hivek missile an kapsinnak hi UN le nitlaknak ram pawlih nuclear zohfeltu pawlin Islamic republic, Iran, a pahnihnak uranium serthainfainak cu a tuah rero zo ti’n an sim ṭhehhnu ah a si.

Iran rampi ralkap Guards pawlin kan dung Zarhpini, 9.12.12, ahkhan missile siar cawk lo cu an kapsuak. Iran ih Mirang ca ih suahmi rampi thuthangca le TV channel pawlah Shahab-3 missile nelrawn ah an kapsin rero mi cu an tarlang. Iran ih himi missile hriamhrei pawl hi kilometer 1,300 ihsin 2,000 tiang a kap ban. Hitluk hla a kap banmi cun Israel, Arab ram tampi le Turkey telin Europe ram tampi a kap thei.

Iran Guards ralkap ṭuanvoneitu lamin a simdan ahcun a nai kapnak missile, a lailakfang kapnak missile le a hla kapnak missile tiin a phunphun an nei ih cu pawl hmuahhmuah cu raltho tik caan ih a remcang naknak ih hman ding a si.

A lailakfang kapnak Shahab-1 le Shahab-2 missile pawlin kilometres 300 ihsin 700 tiang felfai zetin a kapsiat thei tiin vantlun raldonak hotubik Hossein Salami in a sim. Ahlan ih an kapsinmi a nai kapnak missile pawl cu phunthum in ṭhen a siih, Tondar-69, Fateh-110 le Zelzal pawl an si. An phunthum in solid fuel power nasa zet an nei ih, kilometer 100 ihsin 400 tiang a kap ban a si.

Comments

comments

Comments

%d bloggers like this: