Iran President Labanon A Tlawng

Iran President Labanon A Tlawng

Iran President, Mahmoud Ahmandinejad cun  Isreal hrangih mi hnawksak zet leh buainak tuahsuak ringringtu  Hezbollah Tapung pawlih umnak hmun Labanon ramcu ni 2 caam dingin a tlawngih mizan sunah Labanon ram khawpi Bairut a lutih, Iran President, a si hnuih Lebanon ram a tlawn hmaisa bik nak a si.

Isreal leh Hezbollah pawlhi  kum 2006 ah khan Isreal ralkap palwin Lebanon ramsungah luhkhum in an do aw ciamco ih khami ttumah Isreal ralkap 45  an thiih Hezbollah leh Lebanon minung 1,300 hrang an thiih Isreal ralkap palwin Lebanon ram khapwi Beirut ih Building Inn sawng thazetzet pawlkhal ,Bomb in an kapsiat thluhih, Cumi pawl dinsuahsal nakdingah Iran hin Lebanon ramhi paisa tamzet a bawm a si.

Iran President, Mahmoud Ahmadinejad in Lebanon ram a tlawnding ruangah Lebanon ram Cazah cun a rakhmuah dan dingleh a rak donson danding an timtuah nasa ih. Asinan himi laiah European ram lamtang pawlcun nasazet in an sawiselve. Iran President, in Lebanon ram a tlawn ruangah Isreal ramri ah Iran ralkap tamzet kuat a si tiah an simih, Isreal khalin himi  ruangih an ramri ih Iran ralkap an kuat ruangah a ralring zetve tiah an sim.a sinan Isrealo Defence Minisrty cun Isreal cu a ram kilim dingin a rinsan aw tawk a si  a ti.

Iran President, Mahmoud Ahmadinejad hin tuisun ah Lebanon ram President, Michel Suleiman leh Prime Minister, Saad Hariri a kawmih ziangthu an reltlang ticu himi ca nganlai tiangah theihfiang nak a um hrihlo. himi ih hleiah Iran President, hin Isreal leh Lebanon ram karlak ih buainak suakter tbik ramri ,tluanih khua pawlkhal a pal vivo dngih, Cumi ih hleiah Beirut khawpi ih Hezbollah pawlin Isreal an duhlo zia langter nakih lamzin an zawh ding khal a telpi ding tiah an sim.

Iran in Lebanon a Hum Him Tum

Iran President, Mahmoud Ahmadinejad cun Lebanon ram a tlawnnakah mizan sunah khan Lebanon ram khawpi Beirut ah Lebanon ram President, Michel Suleiman thawn an kawmaw ih, Iran President, Mahmoud Ahmadinejad cun Iran cun Lebanon ramcu ziangtik laikhalah a ttanpi ringring ding tiah a simih, a hleice in Isreal leh Isreal ih thurualpi rampawl hnen ihsin  Lebanon in hrasat nak leh buainak a tong a si ah cun Iran cun theihtawp suahin a bawm ding a si tiah a sim.

Iran President, Mahmoud Ahmedinejad in Lebanon ram a tlawn ruangah Lebanon thawi ralaw zet Isreal leh Lebanon karlak hi a sezet ding tiah a zumtu an tamzetih, Isreal leh Iran khal hua awzet an sim ruangah buainak a suak ding tiih zumtu khal an tamzet. Asinan US Secretary of State, Hillary Clinton cun ram pakhat hruaitu in Lebanon ram a tlawn ruangah Lebanon ramah harsat nakdang leh buainak dang a thlen a zumlo thu a sim.

Himi laiah Isreal cun Lebanon ramcu Iran in a dolh liamzik cuahco thlangih, Iran  in Lebanon ramsungih thu neihnak tamzet neih a duh ruangah paisa dollar Billion 1 lenglo a cemzo tiah an sim.

Afghanistan Ram Bomb Puak

Afghanistan ram thlanglam NATO  ralkap pawlih umnak hmunah Bomb a puakih NATO ralkap 3 an thi.International Security Assistance Force (Isaf) hotu pawlcun himi bomb cu ramdang tuahmi a silo ih Tapung pawlih tuahcawpmi a si tiah an simih, NATO ralkap thi pawlhi khuitawk rammi ansi ticu an simfiang duhlo nan Bomb puahnak kiangkap ih um NATO ralkap pawlhi US, Spain, Italy, leh Lithuania ram ralkap pawl an siih, curuangah hi ram 4 pawlih  ralkap an si ding tiah zumnak a um.

Afghanistan ram sungah hin Tapung pawlih kut tuarin tuithla sungah NATO rakap 30 an thizo ih, kum 2001 ih si Taliban pawlih thu neihnak an  hlawnthlak hnu ah  NATO ralkap 2,000 lenglo an thizo, cumi sungah 584 cu Tapung pawlih kut tuarin tuikum sungih thi an si. tu ah hin Afghansitan ram sungah NATO ralkap 1,40,000 an um lai.

Switzerland Leh Italy Karlak Tlangleng Lamzin

Switzerland ram khawpi pakhat Zurich leh Itlay ram khawpi pakhat Milan karlakih feh tlangding leitlun ih Leihnuai tlangleng lamzin saubik an laih micu an ttheh zikte ih lungto Metre 1 leh a hrek virh ding lawng an bak.

Hi tlangleng lamzin leilung sung Metre 2,000 thuk sungih vunglaih mihi Km 57 ih sau a siih, himi hrangah paisa dollar Billion 10 leh Million 300 an cemih Gotthard Rail Tunnel a si. Himi tlangleng lamzin hi an tuah ttheh a si ah cun nazi 1 ah Km 250 ih cakin tlangleng an tlan dingih, nikhat ah tlangleng 300 hrawng tlan theidingih ruahman a si.

Switzerland Transport Ministry cun hi tlangleng lamzin leitlunih tlangleng lamzin dangthawi tehkhin rualci silo Gotthard Rail Tunnel tlangleng lamzin ropi zet hi an thehsuak tikah cun leitlun in thil ropi pakhat a neibet tinak a si ding tiah an sim.

Himi tlangleng lamzin hi kum 2017 ah cun onfel tum a siih, Hi Gotthard Rail Tunnel hi Japan ram  tikulh pahnih Honshu leh Hokkaido karlak leihnuai tlangleng lamzin Km 53.8 ihsau Seikan Rail Tunnel an timileh England leh France karlak ih leihnuai tlangleng lamzin Km 50 ihsau Channel Tunnel an timi hnakin a sausawnih cu ruangah leitlunih  leihnuai tlangleng lamzin saubik a si ding.

US Vanzam in Missile in A Kap

Mizan zing khawvang zawngah Pakistan ram thlanglam North Waziristan ih Taliban leh Al-Qaida Tapung pawlih umnak hmunpi Camp cu US ralkap raldo nak Vanzam Pilot umlo Drone in Missile in voi 7 a kap ciamco ih minung 11 a kapthat.

Mithi pawlhi Taliban leh Al-QaidaTapung pawl hlir an siih, an lakah ramdang mi minung 3 an tel.US ralkap pawlhi tui naite hrawng ihsin tapung pawl kah nakah Pilot umlo Vanzam Drone hi an hmang uar sal ciamco ih,  himi Vanzam hmangih tui naite thlakhat sungah Tapung 140 lenglo an kapthat zo.Pakistan leh Afghanistan ramsungih Tapung pawlhi himi Vanzam hmangih US ralkap pawlin kum 2008 Augusta ihsin minung 2.000 zikte an kapthatzo.

Iran President, Thu Simmi Isreal in Ngaithlak Tlak Lo A Ti

Mizan sun ah khan  Iran President, Mahmoud Ahmedinejad cun Lebanon ram a tlawn nakah Lebanon leh Isreal ramri khua pakhat Bint Jbeil khua ih Hezbollah pawlih tonkawm awknak ah thu a simih, Iran President, Mahmoud Ahmadinejad cun Isreal ramcu a ziamral rero thlangih rei a daih nawnlo dingih leitlun pumpi theihah Juda mi pawlcu an ziamral rero timi an mah leh an mah hmufiang aw thiamin mi ram dangdang cuhbuai lo in leh buainak tuahsuak tumlo in an suahnak hmunleh ram hawlin kirsal mai haisehla  cucu an hrangtih thiltha bik lamzin umsun a si a ti.

Iran President, cun Bint Jbeil khua cu kumkhua in a ding hnget ringring dingih a sungih mipi um pawl hnenah Iran cu a ttang ringring ding a si  a ti. Bint Jbeil khua hi kum 2006 ih Isreal leh Hezbollah pawl an do awk ciamco nak hmunkha a siih, khami tumah  nasa zetin  Isreal Vanzam in Building leh thilri dangpawl a bomb siat thluh ih, tutiang Lebanon leh Isreal buainak suahtam biknak hmun a si.

Himi hnuah Iran President hin Isreal pawlin an kah ttheunak hmun Qana khua a fehsal in  kum 2006 ih Isreal pawlin an kahthat mi minung 1.300 pawlcu an thinlung ih an nun ringring laithu a simih, khami ttum ihsin Isreal cu dinhmun niamsawn ah leh leitlun ih huatmi ramah a rung ttumsuk vivo a ti.

Himi laiah Isreal Prime Minister, Banjamin Natanyahu cun  Iran Presidnet, ih thusim mihi a ngainep zetih, ralkhat hlapi ihsi uite bo tluak hmanih a ngailo thu a simih. Iran President cu zanmang tong at a nei ttheu a ti. Isreal Prime Minister, Banjamin Natanyahu cun Isreal dinhmun cu    mai duhdan ih reldanglam theih asilo ih,  a liamcia kum 62 1948 ihsin Isreal ram dingsuak a siih khami in a langfiang ter a si ati.

Iran President in hiti vekih  Lebanon  ram a tlawnih Isreal ramri tiang a fehih thuhla a duhtawkih a rel ciamco hi US cun a ngai thiamlo zetih Meddle East ih buainak suak tertu asi an phanthu an sim.

Himi hnuah Iran President hi a fehnak ramri khua pawl ihsin mizan sun zanlam ah Lebanon ram khawpi Beirut ah a kirsal ih , Lebanon ram President, Michel Suleiman thawi an komawk hnuah Iran ram panin a tlangsal zo ih, an khawpi Tehran ah   an ram Cozah upa mi pawimawh pawlin an rakhmuak.

(Visited 47 times, 1 visits today)

Comments

comments

Comments

%d bloggers like this: