Iran Nuclear A Lang Deuhdeuh

 

International Atomic Energy Agency (IAEA) pawlin  Fordo ih um Iran ih leihnuai nuclear cetzung ah nuclear hriamhrei hrangih a thupi bikmi uranium sersuahnak le thianfai cu ṭhat sinsin a si theinak dingah tiin a veihnihnak serṭhatsalnak tuah dingin an ready zo tiin UN nuclear zohthlatu pawlin Tlawngkai Ningani, 16.11.12, ah an sim.

IAEA report vek a si ahcun Iran leihnuai nuclear cetzung Fordo ah centrifuge timi nuclear hriamhrei tuahnak ding cet phunkhat hi 2,784 a um zo ih, a rei hlanah a lethnih ih tam 700 in 1,400 cu an tuah thei cing ding ti a si. Curuangah Iran in nuclear hriamhrei a tuah duh tiin  Nitlaknaklam pawlin an rinhlel deuhdeuh. Tehran acozah (Iran acozah) cun nuclear kan tuahmi hi daihnak hrang liolio, daihnak lawnglawng a suahpi ko ding, a si tiin a el ve rero.

Tukum ahhin Iran ih nuclear uranium a sersuah ciammammi thawn pehpar in Iran le P5+1 tiih kawhmi (US, UK, France, China, Russia le Germany ram pawl cu tonkhawm in thureltlangnak an nei. Cucun malte thatnak lam a pan phah.

Fordo nuclear cetzung hi Qom khawpi kiang, ralkap umnak, tlangtluan tampi pawl sungah a thup te-in a um. Atu ahcun uranium sersuah thianfainak hi 90% hrawng cu ṭheh ih zum a si. IAEA cun Iran in nuclear sersuah thianfai zomi 233 kg cu an nei thlang ding ti a si. Tukum August ihsin 43 kg an nei cia zo. Tukum kumthok lamah khan Atomic Energy Organisation of Iran (AEOI) in uranium thianfainak 20% cu an ṭhehsuak ih centrifuge 96 kg an hmang.

IAEA in an theihpi lo pi’n Iran cun nuclear tuahnak dingah nuclear fuel (mawtaw ih diesel vek) pawl cu Bushehr ah an ṭhawn tiin reportnak ah a telh. Bushehr khal nuclear tuahnak hmun a si ve. Cun Parchin timi ralkap pawl umnak hmun pakhat leh ah nuclear hriamhrei thawn a pehparmi zingzoinak cu a um tiin zum a si. Cucu Iran in a si lo ti’n a el thotho. Parchin ah nuclear thawn a pehparmi pakhat hman a um lo ti’n a el.

IAEA cun report ah Iran in IAEA thawn tuantlangnak a nei lo tiin le, a netnak ah Iran in nuclear a tuah rero mi le Iran ih nuclear thilri zate hi daihnak suahpi duhnak thawn a si tiin kan relngam lo tiin a sim. IAEA in tuiṭum ih Iran nuclear thawn pehpar ih report a pekmi hi cahmai 13 a um.

Comments

comments

Comments

%d bloggers like this: