Institute of Chin Affairs (ICA) meeting USA ah tuah ding

11750667_10155791501245035_3287192583844232624_n

ICA din tum ta..

– Van Tuah Piang

Institute of Chin Affairs (ICA) cun 2012 kum ihsin thok in ramsung ramleng ah miphun le khua le ram hrang kum thum sung hnatuannak a neih rero hnu ah tu a ra dingmi July 17 ihsin 19 tiang USA ah meeting tuahnak nei dingin tumtahnak a nei.

Kum 2012 hnu ah ICA hmin in avoikhatnak tonkhawmnak ding a si mi hi meeting cu USA ih Indianapolis ah tuah ding a si ih Europe, USA, Canada le Kawlram lam ihsin palai pawl siseh, USA ih Chin Pawlpi, kawhhran le pawlkom dangdang ihsin hotu le palai pawl khal siseh an tel thei ding tin thu don a si.

Kawlram pi hi zalennak lamzin par ah a feh vivo ih, hivek caan ah ICA hin ziangti zawngin Laimi le Lairam hrangah thuk sin le kau sin in hna kan tuan thei dingih hma kan la thei ding ti pawl hi hi meeting ah relkhawm ding a si.

Himi hlei ah, Laimi pawl karlak ih tuihlan thilcangmi pawl thlirsalnak siseh, Laimi pawl lak ah remdaihnak le rualremnak (Chin national peace and reconciliation) thu ah ziangvek pawl kan tuah thei dingmi a um ti pawl siseh relkhawmnak nei ding khal a si.

Ahleice in July 18 zaan ah a liamcia caan ih Chin National Front (CNF) le Falam mi pawl karlak ih thu umdaan le hmailam kekar daan ding pawl khal fiangfai deuh le fumfe deuh ih relkhawm ding a si.

Curuangah July 18 zaan ah tui tum meeting ih a hranten sawmmi pawl lawng si lo in himi relkhawm dingmi thulu rel le theih a duh ve tu Indianapolis ih um Falam mi zozo khal sawm a si.

ICA cun Laimi ramkhel (Chin politics) thuhla ah mipi lam ah tangin pehzom ih hna tuan vivo ding le mipi khal in thazang napin suah in tan an la cio ding ti ruahsannak a nei.

ICA hotu pawl sungah a tam sawn cu 1988 Kawlram pumhuap tlawngta cangvaihnak ih rek tel dahtu le CNF/CNA cangvaihnak khal ih rak tel dahtu pawl an si ih ram le miphun thu ah duhsaknak thawn tan a la rero tu pawl an si.

ICA hi 2012 kum, May thla ah USA ah dinsuahmi a si ih tu lai fangih hotu pawl sungah a tanglam pawl hi an tel – Salai Ni Lian, Pa Thawm Hlei Mang, Pa Hram Nei Luai, Pa Van Tuah Piang, Pa Hrang Vung Mang, Pa San Hlei Thang, Pa Thanei Luai Taithio, Salai Tuan Ling Thang, Henry Lairam Vapual le Salai Lal Ram Cuan.

Tui tum ICA meeting ih thurelkhawmnak ah tel a duh le ICA hnatuannak tam deuh theih a duh bet tu cun ICA hotu pawl sung ihsin pakhatkhat hnen ah pehtlaihnak tuah a theih ih ICA email: <chinaffairs@yahoogroups.com> khal ah thusuhnak tuah theih a si.

Institute of Chin Affairs (ICA)
15 July 2015

Comments

comments

Comments

%d bloggers like this: