Innsangpa

11377123_442696875912687_6235258579798640782_n

Riakmawva bang ka vahvaihnak ram ihsin nufa anka ka biakson lonak kum khat a kim dengmang. An thi maw an nung ti khal Pathian lawngin a thei ding! Cuti ka ti tikah vak hawngkawng men ka si lo, innsang hrang hna hram tuan dingih feh ka si nan, ‘thahnemngai ih pamsin tong’ ka si ee!

Innsang din timi hi deuthlam suan luklak tlukin a olsamzia lo. Innsangpa bik si tla hi khoi maw caan ahcun, “Ka paih nawn lo” ti pang a olte. In-ei le sinfen zalh a tul, fanau tlawngthlah an tul, sumhnar tha neih lo phei cun khuntaw sirh ih ‘huiha’ rero a si ko. Cubetah agenda ih tel lo, cornat a theraw duh zet fawn!

Culai lakah nufa in le mi an rinsan roh! A hleicein fa le tla cun hawipi thawi an tawhawk caanah ‘ka pa ka sim kei, a lo vel ding’ tiin zualkawh an hmang. Mit la deuh an hmuh ipiangin, “Papa, khimi in leih aw” tiah mi an ngen, Sialkiringcin Pa neiah an ngaiaw zung-um! Phu le phu lo an ruat ban ve lo. Cang thei sehla maw, leilungpi hman hi an kutzaphakte takte ih humter ka nuam nan!

Khatlamah innsangpa si manhla ka ti zetmi cu ziangvekih Pa se bik sihmanningla ka tuansuahsunmi parah nufaza lungsaktei’ an nom thei hi a si. Inn tha, lo tha le sumpai duhlawng ih celek thei, mi Pa ah an buai ve lo. Keimah ah an nun pumhlum an thumaw. Hihi a si cek ding, innsang dam khawsuah theinak thuthup le hnukpi!

Kei cu lothlo ih eihawl, fate pathum ih Pa ka si. Hmanseh lothlo in nufa ka cawm thei lo. Malmakah pam nain ka pawltla theu, cam kan man dah lo hi a si bik. Cule paisa cawicop in Shwelee le Mizoram hlehka in sum ka dawng ve. Leiba uksak lo, Mizo pawl vangah a netnakah keimah lehlam leiba zariat thawn ka hrantang! Cumi rulhnakah tiin len vukvi theinak, an sim Phakant ah ka feh. Cu khal be lo thotho. Money si loin Malaria sawn inn ka tlunh. Cuvek le cuvekih tikcu a heu sungah inn lam a rak tlabau deuhdeuh!

A tawpah venghnen pawl ramdang ihsin paisa an kuatawk supso daw ve in Malaysia ka feh ve. ‘Farah khaw ong tong lo’ an rel bang Malay khalah buainak hlir! Rampi in lukhawng siar ih an hawlmi ‘Wanted Man’ hluanin cop le copah kaih ka tuar. Thawng ihsi suah hnu khalah hna nei loin uilakfa men bang pacang tiaw ve cu rualpi hnen rawlthing dil le riahnak hawl ah nitung ka rau!

Ka zuam nawn thlurthlo lo! Thla nei sehla vanva bang zuanhloh ka duh. Kan luangpi hnuaiah lungdaitei’ cawlh ka duh. Hmanseh ka innsang in in cohlang thei ihtur maw! Nupi fanau hman cawm thei lo, vaithang hloh ih hlo, kei hi zovek milai fa in so, pomrem thei nawn ding! A si, ka nufa in sangka in on lo khal sehla ka dem siang lo. An mawh hrimhrim lo, ka tuah rethei tuk ngai.

Ka nun sulhnu dunglet hoi in ka thirsal. Mifim, cathiam ka si lo nan tlintawkten khawtlang le kawhhran ah ka hmangaw ve. Zukhmawm siseh paisa khelh siseh nomtawlnak hrimhrim ka tokthai dah kel lo. Milaw zet cu ka si lo nan mizangzel ka si lo, taima zetin hna ka tuan ko. Hmanseh ka khawzing a nauta ha, ka tuahmi kipah hlawhtlin ti ka nei dah lo. Pathian in nupi fanau i pe nan thlawsuah i pe tel lo, si pei maw? Kan innsang parih Khuanui’ lairel hi theihthiam a har!

I lainattu pawlih sumpai zulkhawmmi in tlun tim ka tuah. Ka tlun ding thu khal nu bik ka sim ngam lo. Malay ka suahsan hnuah kan nu i phone-sak dingin ka rualpa ka cah ta men! Sa pel hlawhsam pacang bang ningzak hmel durpi in Lailungrawn ka pan. Thin le ham kaiaw lo’n!

Zarhteni simlam a si. Thinphu dupdo in kan khawsuah hauhnar ka thleng. Cunah cunah… Beisei ngam lo, ka nufa in in rak hmuak! Manglam hmang maw ka tiih ka mit ka nuai. A si lo, fimhring rori a si! In rawp tuk hai, in pom thul, in cul thul. Pacan sup paih lo’n ka tap, annih khal!

A zan ah innsang khawmnak kan nei. Nu bikin Baibal a siar theh hnu an nufaza in ka lu ah kut suang in ‘Pa’ in neih zo ruangah Pathian hnenah lungawithu an sim. A si, lei rosum hnakin nufa hrangah Keimah ka sunglawi sawn. Cuvekin innsang hrambunnak khal hmuhtheih thilri ah si loin hmuhtheih lo duhdawtnak sawnah a sizia ka sarsuak cih. ‘Bang’ siar lo, zianghman ka sum thei lo nan, nauhak pawl cu an lungawi tuk thotho, ‘ka pa, ka pa’ ti hman coaw loin in vaan, in lehpi, a nuam lawlaw. Kan te bik kum 4 mi in aw-pai ciapcote’n, ‘papa khualtlawn ka lo awih nawn lo’ i ti tla cu zovek pacang hmanin an tuar thei lo ding!

Culai takah kan lailak kum 7 nute in an nufaza thuthup a phuansuah pang! “Papa, thaisun Father’s Day ih lo pek ding, Nunu in ziangmawtete a rak lo leih,” tiin. Cumi cu rel lo dingin a nu in a cah hai nan! Aw! thaisun zarhpini, Pa’h Ni (Father’s Day) a si ngai ual! Maw Bawipa, santlai lo zet sihmanningla Pa’h Ni ih i sunlawihtu ding ka phu lo nufa i pek ruangah ka lungawi. Cun, Nang khal kan innsang ih PA na si vekin kan nunnak ni a tlak hlanlo kan lo sunlawih theinak dingah thlarau cahnak thawn in thuam hram aw!

Cutin ralpi, boruak siava le santisuar ih an sawihnin thei lomi tunghmun innsang nuam ihsin thaizing Father’s Day thlen ding hngakhlap zetin…

Bet: Thuan Bil Fahniang tiih Innsangpa timi ngantu hi Pa Van Khaw Piang asiih tufangte New Delhi, India ih khawsa a si.

(Visited 80 times, 1 visits today)

Comments

comments

Comments

%d bloggers like this: