Innsang Nun Pehtlaihawknak Ih Bulpak Tuanvo

INSANG NUN PEHTLAIHAWKNAK IH BULPAK TUANVO

Rev. Ring Lian Thang

 

Kan leitlun nun a nawm le nawm lo cu kan insang nun ah a thumaw deuhbik. Leitlun nun ka ning, leitlun hi a nuam lo tuk aw, kan ti tikah kan insang nun ih kan hmuhtawn mi mangbang harsatnak ruangah tla a si thei. Curuangah mah le insang nuntu-umtlandan zoh salin remthat tul rem tum cio sehla.

1. Insang Sullam Reldan Phun Dangdang:

(a)  Insang cu pehtlaihawknak hngetbik nei, a burih umkhawmnak hmun, mipitling si dingih serawknak hmun a si. (Ira Reiss)

(b)  Insang cu thisen ih pehtlaihaw (asilole) Dan in a fial (phut) mi sungih tumtahnak hmunkhat, tirawl hawlnak le nauhak kilkhawinak ih tumtahnak hmunkhat nei a si. (Andrian Wilson)

(c)  Insang cu inn khat ih um nupa le an fate lungrualtei’ an umnak hmun a si. (Peter Murdock)

(d) Insang cu Cozah hmaisabik a si. (August Comte)

2. Insang Phun Dangdang:

(a)  Kauhter Insang (Extended Family): Insang pakhat ihsi thlah sawng, san thum tiang unau sungkhat insang vekih relnak a si.

(b)  Insang Laimu (Neuclear Family):

Nu le pa, an fate thawi inn khat ih umkhawm relnak a si. Leitlun mi tamsawn in insang kan ti mi hi a sibik.

(c)  Insang Pumkhat (Conjunal Family):

Nunau le mipa an thitawk cun fate an neih lo khalle insang an si ti relnak.

(d) Pa Thuneihnak Insang

(Patriachal Family):

Nupi fanau le insang thil hmuahhmuah, Pa ih thuneihnak hnuaiah a um. Fate in a hnam an tawm. Nupi in a hmin a tawm. Bible Thukam Hlun sungah cun Pa in a fate, a hnenum a zuar thei ih an thihnak ding tiang a rel thei. (Thut. 11:34-40, Pui. 18:21, Seem. 21:18).

(e)  Nu Thuneihnak Insang

(Matriachal Family):

Pasal le fate cu Nu ih ta tluk an si. Nui’ hnam fate in an tawm. Mipa cu nunau inn ah an um. Khasi, Garo Menang, Kabau Malay hnam le Arab phunnau-pawl lakah hivek insang an um.

(f)  Fa Thuneihnak Insang

(Faratriachal Family):

Hivek insang ah cun Fapa upabik kut ah thuneihnak a um thluh. Upabik inn a tlei lole a thi asile a unau dang hnenah thuneihnak a pe ta. Leitlun ah hivek insang a tam lo. India Kerala State ih Nayar hnam cu fapa upabik thuneihnak nei insang an si

(g)  Bulpak Zalennak Insang

(Atomistic Family):

Insang bulpak tin ih thuneihnak insang a si. Nupi pasal khal nu le pa rawn hran loih mai’ thuih neih a theih. An neihawk cun insang khat ah um loin inn an tlei lohli.

(h)  Thuneihnak tawmaw Insang

(Egalitarian Family):

Hi insang ah cun insang sungtel tin in thuneihnak an tawmaw. Nu le pa cu insang hohatu an si nan, Nu hnakin Pa ih thuneihnak a sangdeuh. 1972 ah USA Congress-pawl cun bangranawknak dan an tuah ih 1975 ah cun Ramkulh (State) 35 ah cui dan hmangin insang le ram thuneihnak tawmaw zawngin an hruaiaw.

(i)   Thisen Pehzawmawknak Insang (Consanguine Family):

Nunau le mipa neihawknak hnakih thisen pehtlaihawknak thupitter insang a si. Pa le fa, nu le fa, unau duhdawt-awknak le thisen ih pehtlaihawknak, hrin khat sinak an ngai thupi.

3. Insang Nupa Nun Pehtlaihawknak

Rev. Dr. Kenneth Chaf in, “Insang ih thil thleng a sia le a tha, ziang hmuahhmuah hi nupa pehtlaihawknak ihsi suak a si. Insang ih nupa pehtlaihawknak ih zirin leitlun ah zovek minung an suak vivo ding ti a rellang cia,” a ti. Hihin nupa nun ziangtluk a thupi ti a langfiangter zet. Nupa pehtlaihawknak tha dingin thil thupi tam zet a um ding nan mithiam hrekkhat cun a tlangpiin 5 in an then theu.

(i)   Biakpawhawk (Communication)

(ii)  Thil phunkim tawmawk le zemawk (Sharing)

(iii) ~uantlangnak (Co-operation)

(iv) Pawisatawk le Ngaihsakawk         (Mutuality or Reciprocity)

(v)  Nunau-mipatnak diriamterawk (Sexual Satisfaction)

Himi panga sungah rualpi tha le midang hnenih relpuan harsadeuh, harsatnak langhnganih bawmawk harsa nunau-mipatnak hi nupa pehtlaihawknak ih thil thupi zet a si. Mi hrekkhat in thil rel mawi lo, Biaknak le Pathian thu thawi relrem mawi lo vekin an ruat theu ih a pawi zet. Thlarau Thianghlim nun thawi pehtlaihaw, Paul khal in a ngai thupi zet mi a si (I Kor. 7:5). Rel ding tampi lakah malte rel lang sehla.

4    Nunau-mipatnak Hman Can ih Thil Thupi:

(1)     Thatho aipuang dingih tawngpiawk ih hramthawh.

(2)     Pawlawknak hmun thiangte timtuah.

(3)     Sinfen hahio-um zawng hruk (rawng sen, rawng aire, hnipuan pa).

(4)     Hiar le duh can theihthiampiawk (a tlangpiin nunau in zing lam an duh).

(5)     Hmannak hmun a dangdang ih thawn.

(6)     Taksa zutmetawk tawn.

(7)     Pawlawk laifang ih tawng tam lo.

(8)     Harhdamnak theihthiampiawk ih diriamterawkdan hawl.

(9)     Lungkim diriam ding tiang cangvaihpiawk.

(10)   Pawlawk theh hnu khalih ngaihsakawk.

Nunau-mipatnak lam zirtu Dr. Reed Moskowitz cun mi tam zet ih kan tuar mi luna, phurhsamna le kham, thatho lo rit cengceng ih kan um theu hi nupa diriam zetih pawlawknak in a damter thei a ti. Thinlung ruahnak lam zir mithiam Alexander Lowen khalin mina a tuamhlawm mi nunau lungphu tha lo 100 sungah 65, mipa 131 sungah 89 cu nupa pawlawknak ih lungawi diriamnak an ngah lo ruangah a si a ti. Nunau thi neih hlanih kawngna, ruhna, hngawngruh khamih a tha dircaiaw theu khal diriam zetih nupa pawlawknak in a damter thei ti a si. USA, Sanfrancisco ih nupa pawlawknak lam ngunngaih zetih an zirnak khalah mi 37500 ihsi an zirnak ah nunau-mipatnak diriamtei’ hmangpawl cu an thin a sau ih, mennaloih midang thupuh (mawhnak hawl) an duh lo ti a si. Curuangah hivek lam ih mithiam Roger Falge cun, “Nunau-mipatnak lungawi tlamtlingtei’ hmannak cun a hmangtu in thilthabik veve an phawrhsuak a si,” a ti. Ihhmuhtertu sii hrekkhat Alplrap, Zolax, Diazepam, Chlorodiazepoxide, thinharnak le thinlung bang sawng theitu sii hrekkhatpawl, thisen thang, pumpi na sii Cimetidine, Ranitin le Ultac pawl, Luna sii Propranolol pawl in Nunau-mipat hiarnak a malter thei ruangah a tul ngaingai lo ahcun ei lo a tha.

5.   Theihthiampiawknak le Thlarau Thianghlim Bawmnak:

Dr. Mascarenhus cun, “Mi kip kan bangawklonak in nupa pehtlaihawknak a tise mai lo, kan danglamnak kan theihthiampi-awklonak ruangah a si,” a ti. Curuangah nupa nun cu theihthiampiawknak a si. Ruthbel Graham khalin, “Nupa nun cu ngaithiamawk tawn nun a si,” a ti. Nupa nun pehtlaihawknak hnget ding cun Pathian hnenih  thlacamnak thawi nun khal a tul. Sarah Prerrpont Edwards ih pasal Jonathan Edward cun, “Ka nupi thawi pumkhatawknak menmen si loin hitluk pumkhatawknak tha hi Pathian Thlarau Thianghlim umpinak a si ti ka zum,” a ti.

6.   Insang Pehtlaihawknak ih Bulpak ~uanvo:

(a) Pai’ tuanvo – Nupi, Fate parah:

Insang hohatubik a si. A nupi parah duhdawt zawnruahnak a nei ding. Pabik cun insang in le ei, nuntu-khawsakdan ding khua a khan thiam a tul. A nupi le a fate parah a duhnak le a duhlonak a langter ngam a tul. A nupi le a fate lungput le duhnak khal a theihthiam a tul. Amai’ duhnak lawng Pa in a lalter tuk tikah a nupi, fate cu insang thawngtla ah an cang pang thei. A khat lamah nupi le fate diklonak pawmpi maitu si loin dingfeltei’ hruaitu ding a si khal a theih a tul fawn. Fate cu Pathian laksawng sunglawi an si ih duhtawkih hro le kawk men ding si loin Pathian duhdan ih kilkhawitu ding a si ti a theih a tul. Judah-pawl cun fate fungfek thawn hroin nun an sim can a um nan, Mirang (English)-pawl cun a tlangpi thuin tawngkam nemin fate nun an sim. Pasal cu Nupi ih lu a si vekin lubik cu insang pumpi pitlin thansonak ding lamzin hruaitu a si ih Pathian duhdan ih insang hruaitu ding a si. Pa cun fate ih nupi-pasal ding khal anmah rawn ih a khawkhanpi a tul.

(b) Nui’ tuanvo – Pasal, Fate parah:

Pa cu insang hohatu sikhalsehla insang kilkhawitubik cu nu a si. Curuangah Nu cun insang ih a tuanvo ziangtluk a thupi ti a theih a tul zet. Insang Nu in insang kilkhawi/finkhawi a tuanvo a si ti a theihfeng lo tikah insang fingkhawitu si loin insang sumpai le fate tekdarhtertu ah a cang thei. Nupi cun pasal sunlawih le upat a thiam dingih fate taksa, thlarau ih an pitlin theinak ding lamzin khihhmuhin a kilkhawi ding a si. Napoleon cun, “Insang nubik lawtnak le taimaknak inn ah cun pabik santlai lo deuh a si hmanah fate rintlak le sunlawihtlak an suak nan, nu santlai lo insang ah cun misunglawi le upattlak fa an suak dah lo,” a ti. Nui’ tuanvo ah fate nupi-pasal neih ding anmah rawn ih khawkhanpi a tel ti theih a tha.

(c) Fate tuanvo – Nu le Pa ih parah:

Fate ih nu le pa tihzah upat le sunlawih hi leitlun nunphung a si. Biaknak tinkim in an ruah thupi zet mi khal a si. Fate tuanvo tumbik cu nu le pa ih duhnak thlun le upat tihzah a si. Nu le pa upat, sunlawih, tihzah thiamtu cu an lei nun ah lamtluang sultluangih malsawm an dawn thu Biaknak (Sakhaw) dangdang in an rellang. Khristian Bible sung khalah fate ih nu le pa upat tihzah a thupitdan tampi a lang.

Isak in a pai’ thu el loin a pai’ duh mi nupi ah a nei. Jacob in a nui’ thu cu el loin a nu in tuah dingih a ti mi a tuah mai ih, malsawm dawnnak ah a hmang. Josef in a pai’ thu a thlun ih a unaupawl ih zuar a tuar ko nan, Pathian in mal a sawm ih a pa le a unaupawl bawmtu ah a cang sal. Nu le pa ziang siar loih nautat zawkzettu cu harsatnak an tawn ding thu khal Bible ah a lang (Thuf. 30:17). Nu le pa a sunlawihtu cu an san a sau ding thu khal a lang (Efe. 6:1-3).

7. Tlangkawmnak:

Insang nun ih lungawitlang ding cun tuanvo theihthiampiawk, mai’ tuanvo theihfiang, thurawnawk, Pathian tihzah upatnak thawn tanlaktlang hi a si bik ti sehla a sual tam lo ding.

Hsn: 3nk FCFS Mekazin, Jan 2010.

(Visited 112 times, 1 visits today)

Comments

comments

Comments

%d bloggers like this: