Innsang Athupitzia

INNSANG ATHUPITZIA

(Home Sweet Home)

Dr. Timothy Sui Lian Mang

Leilung tlunih “pawl” ding hmaisa bik cu “Innsang” hi a si. Eden hmuan ih din a rak si. Pathian thiltum hi innsang hmang ih sullam nei zet milai sersiam hi si in a lang. Bible kan zoh tikah, “Pathian in mi kip cu innsang ah a telter vivo, “ (Sam 68:6) tin kan hmu. Pathian in mikip hi innsang ih tel tengteng dingin in ti ruangah innsang lenglam ih ceng dingin zohman a sersiam lo ih, innsang ih ceng dingin mi kip hi sersiam kan rak si.

Innsang a thupitzia

Milai hi ramsa bang khin innsang bul nei loin rak um ta hnik nungna, ziangtin kan um pei? Innsang duhdawtawknak a um lo ding ruangah kan thataw thluh ding. Kan dam lo tikah kilkhawiaw hleicetu kan nei lo ding ih, dam lo deuh pawl tla cun rawl khal kan hawl paih lo ding, hawlsaktu le kan nei cuang fawn lo ding ih, atu hnakin alet ziangmawzat in kan thi tam tengteng ding. Hringtu nu cu nei cio khal nungla, bulta pa kan nei lo ding ih, lakfa hlir kan si ding. In hringtu kan nu khal cun in ngaihsak thei lo ding ih, mahte ih nung thei lo cu kan vanduai zet ding.

Innsang hi leitlun ukawkdan a fel theinak dingih Pathian ih in rak dinsak mi a si. Ramsa cu an nu in a hring hai ih, rei lo te ah an nu in a fehsan hai men, anmah te in khua an sa thei mai. Milai cu cutivekin Pathian in in rak sersiam ve lo. Mahte ih kan um thei hlanah kan innsang rinsan in kum ziangmawzat si maw kan um ta a tul. Cui sungah kan pitlin tikih kan mizia ding kan khawlkhawm ih, innsang hi kan zirnak tlawng hmaisa bik dingah Pathian in in khua a rak khang.

Innsang in Khawtlang a Hngawngzia

Innsang nun cu khawtlang nun ah a langsuak. Mai innsang cio ih kan khawlkhawm mi cu khawtlang ah kan phawrsuak. Kan khawtlang nun a bawrhhlawh a si ah cun, hi hlan ah kan innsang nun a bawrhhlawh tinak a si. Innsang tha kan din hmaisak lo ah cun khawtlang tha kan din thei lo ding.

Kenneth Chaffin in, “Khawtlang sualnak kan ti hi innsang ah hrilhhram a bun ti thei loin tuahthat kan tum a si ah cun, kan hlawhsam ding,“ tiah a ti. Hi thu hin khawtlang hrangih innsang athupitzia a langfiangter zet. Thuthlung Hlun san lai khalah misual bik an zingzawi tikah innsang kip ah an dap theu, innsang ihsin an zingzawisuak theu. Curuangah khawtlang sualnak kan ti mi hi amah te in a ding lo ih, innsang sualnak cu khawtlang ah a run phawrsuakaw hi a si sawn.

Innsang a hlutzia

Kannih Laimi hi huau huau ih um duh kan si ih, innsang lengah nawmnak  kan hawl theu. A bur ih um nuam ti hnam kan si ih, thawm le vang nei in, ring zet zet ih hnihtlang thluahthlo nuam ti kan si. Kan innsang cu hotel vekin zanriah le thaithawh einak, ihnak fang men ih hmang tla kan tampi a bang. Lai lam nupa khal tul lem lo ah an lensanaw ih, mai kawppi hnakih mi dang kawppi kawm nuam ti sawn tla kan um. Mai innsang ah cun tawng mal zet si in, mai innsang leng lam va thlen ih tawng tam zet tla kan um. A linglet in kan nung deuh a si lo maw!!

Howard Paine cun a innsang suahsan in French ram Paris khawpi ah a va um. Ni khat cu zan lamah Varanda ihsin Paris khawpi sungih mipi tamzia le vakkual supso cu a thlir. Mak a ti tuk, tam hi a ti tuk, asinan tawkfang ah cun  khaih mipi kha an hlo thluh. Khaih mipi tam ngaingai kha khuiah an um theh si pei? tiin a ruat ih, a ruahsuah mi cu anmai inn cio ah an tin a si hi tiin a ruatsuak. Cui si cun innsang athupitzia,a hlutzia a theisuak tariai. New York khawpi lenglam deuh Long Island ih an inn fate, kum kua lai a suahsan mi hlutzia a vun theisuak. Inn sungah a lut ih, leilung tlunih innsang hla hminthang zet a phuahsuak tariai –

To thee I’ll return over burdened with care,
The hearts dearest face;
Will smile on me there,
No more from that cottage again will I roam;
Be it ever so humble,
There’s no place like hom.
Home, home, sweet home,
There is no place like home.”

Paine in hi innsang hla ropi zet hi a phuahsuak lawng si loin, nawmnak le hlimnak hawlih innsang a suahsan cu hlimnak le nawmnak taktak a hmuh theinak dingah innsang ih a kirsal a tulzia, athupitzia a theingah. Cutikah thinlung tangdawr zetin, “Ka tlansan leh nawn lo ding,” tiin mitthli thawn an inn lamah a kirsal. “Mai inn tluktu hmun dang um hlah e” (There is no place like home) a tiriai. A dik rori a si.

Bible sungih fapa tlanhlo pa khal kha a innsang a suahsan. A netnak ah cun vawk caw kiangah a va hmusuakaw a si kha! Anetnak ah cun mitthli thawn lungsir in a inn lamah a tlungkir leh a si kha maw!!! Hi fapa tlanhlo hin sungkaw hlutzia cu a theifiang rori ding.

Rihli tlang cabawm ta lak mi a si.

(Visited 132 times, 1 visits today)

Comments

comments

One Comment

  1. Mai innsang tluk ih nuam hmundang um lo timi hla te ka sak tinte ka mitthli a tlak ve theu .. mai inn tluk tu khui hman ah a um lo

Comments

%d bloggers like this: