Inn lam cakuat ( Piangte hrang)

A nu le pa in  Piangte cu ca an kuat

 

 

Dear, Piangte

 

 

Kan ngai zetmi Piangte, Pathian zarah na dam ti kan thei ih kan lungawi tuk. Kan Bawpa Pathian hmin kan thangthat. Cun, kan dungih sumpai in kuatmi khal kan rak hmu zo. Hivek fapa kan lo nei hi kan lungawi tuk. Cun nangmah tla na damlo pang ding maw, ralringten um aw. Rawl tla thaten ei aw la, na hriselnak thaten enkawl tha aw.

Na kiangah le kan um fawn lo, kan lo ruat tuk so khaw. Inn cawmtubik na si kha. Cun maw Piangte kan lo sim theu bang in, Kawlram cu a nini in thil man a kai ih paisa hi a har thei tuk. Sumpai lo dil khal nuam kan ti nawnlo. Kan sung le kan rual zet fawn. Ziang asikhalle kan um daan na theih theh cia si.

Cun kan lo cah theumi Pathian tihzah ding kha maw…ram dang, ram nuamah na umih na ralrin a tul. Kan lo cah ring ring kha maw…a hleice in na nu ih a lo cah theumi, mi pa cu a hleice in fala ah nan ralrin a tul. Fala hi duhtuk ding an si lo. Pathian in na nupi ding cu a caan te ah a lo pe leh ding. Kan khua khal ah fala fel ngaingai an tampi ko… cuangcu kan cah leh ding.

Cun a pahnihnak ahcun sumpai thu ah, ralring ten sumpai hmang aw. Na nu le pa kan tarzo. Kan tuansuak thei nawnlo. Na hna tuan le na paisa kuat ring in kan um ti na theih a tul. Sumpai hi hmannak ding le hmanlonak ding a um ih hmanlonak dingih rak hman sual tla a um pang theu curuangah ralringten sumpai hmang aw tin na nu thawn kan lo cah sal.

Na nau le in le, nitin ziangtikah u Piangte in paisai in kuatsal ding an ti ringring fawn. Cun apathumnak ahcun zu le sa. Piangte nang cu na nauhak lai ihsin zu le sa lamah na thianghlim tukih a lungawi um tuk. Zu le sa lam ahcun na fel ti kan thei ih hna a ngam. Asinan ralrin tluktu a um lo pi.

Na pa ih a lo sim theumi na manglai maw “Minung hin famkimlonak zawnte le tlaksamnak zawnte kan nei” a ti mi kha.?! Nang cu mi dang bangin na sual dahlo kha. Ngainak thu ahcun kan lo ngai thei tuk, na zuk tete pawl kan zoh tla le cu kan tap phah phah, asinan kan harsat tuk si maw…

Cun, kan inn kiang ih na thingkung phunmi pawl tla kha an thang zet. Na nau le pawl khal in an lo ngai thei tuk. Kan nau tabik Mente tla cun U U ngaituk zo a ti rero theu. Tuikum Christmas vek ah tla cun na ra tlung tum pei cu ti aw….sumpai na rem caan le tiah so khaw…Cun nupi lam cu na no lai in kan thei. Nupi cu ralringten na nu le pa duhzawngte kan lo thih sak ding so khaw. Ralringten nupi cu neih ding, a tui kan khua ih na rualpi, nupi nei pawl khi zoh awla, ziangtluk an harsa, na theimai ding, cun nupi sual nei ngah pawl khi ziangtin an um timi cu kan sim tul loin na thei ko.

Cun, Piangte zantin ten na hrang rori ah thlacamnak kan nei so khaw. Na hna tuannak le na ca zirnak khal ah rinum takten um aw. Tuini tiang na nu le hmin na ti se hrihlo. Kan kawhhran ih mino pawl tla tlanghna an tuan caan ah an lo hlam theu. An lo ngai thei zet.

Na rualpi Sang Sang le Tluangte pawl cu a caan le kan inn ah tingtang tum in an ra theu nan na um nawn silo an to rei dahlo…Piangte ra tlung cing pei maw tin an lo sut theu. Kan thin a thar theu…Kan duat Piangte hi maw, harsatnak ruangah maw, mai runinn hman hlum thiamlo in sukso a tawi vak rero kan lo ti.

Na rualpi pawl cu kan kawtka ah an vak sukso theu ….Piangte cuvek pawlih nun daw hlah aw…ni khat ni ni ahcun maw…kan khawpi bawmtu ah na cang sawn sing si…”Har hmaisak le nuam neta” timi thufim na mang ding kan duh.

  • Cun nikhat ah nazi paziat hna na tuan…?
  • Thlakhat ah paisa ziangzat na ngah thei …?

Hi kan lo suhmi fiangten in rak sim leh aw la.

Na nu le pa le Email kan thiam silo, na nau le pawl le tlawng an kai theh fawn si. A tu, hi cakuat hi na rualpa Hngakte mail ID an ti maw…cumi in kan rak kuat ding in kan rak fial….Hngakte hi kan parah a tha tuk ke…in hmasawng hlah uh in ti ringring…Na nu le pa cu cathiamlo tiah zianghman kan theilo so khaw.

Na nau Hnemte le Aate tla Christmas poket money na kuatmi kan rak pe ih an lungawi tete cu e! Kawl ram cu sumpai hi  lakluhnak ding a um lo. Hman lam le a ol fawn si, buai thlak tuk.

A tu tla hi Malaysia ah fala tlangval an feh celce so khaw…cun refugee nan ti maw…ziang a si ti khal kan thei lo a tihnung vek tla in an sim fawn aw…cucu, khavek Refugee dil dingin an feh an ti….Na rual Liante tla kha a nu le pa in Malaysia ah an fehter tum ta….Khamte le a rualpi pawl cu an feh zo so khaw….

 

Piangte……kan lo ngai tuk so khaw…

Thla kan lo camsak

 

Ca a lo kuattu

Na nu le pa

Lairawn

 

 

 

 

Comments

comments

Comments

%d bloggers like this: