Inn

first.time.homebuyer2

Siang Lian Uk (Kianghrol)

Zan khat cu ri caci deuh in a ra tlung. Sangka a ong ih inn sung lut phah in a nupi a ko. Sawnsaltu a nei lo.

Kedam phelh ding ih a vung kun zawng ah, kedam retnak parah cahnah pakhat a hmu. A vun la ih a zoh tikah tthenawknak ca a si. A ruahnak a hung hnok.

A nupi in hivek hi a tuah taktak ding ah a rak ruat lo. Tui hlan khal ah tuvek in an to aw ttheu ko. A thinheng ih a biak paih lo can simaw, a nu le pai’ hnenih malte sung a va tlun lawk can simaw, tivek lawng a si. Lehhnu ahcun amah kelte’n an rung ttha khawm sal leh mai.

Asinan tui ttum cu a ti taktak thlang ti a theihtheih. An fanu te hrangih zohkhentu lairelnak (meeting) a kai man lo thu, can a neih lo thu a rel ruangah a nupi a thin a heng ih, “Nisuah ihsin nitlak tiang, sunvu rori’n hnattuan ah na buai. Kannih nufa le kan inn hiteh na ruahnak ah na ret tel maw? Hivek nun hi ka duh nawn lo. Kan tthen aw ding,” a ti. Asinan hivek cu ziang pipa hman a thleng cuang lo ding, hnattuan hnakih thupi a um lo, hnattuan ngaihsak hi innsang ngaihsak a si ko tiah a rak ruat.

A tuah mi pawl an sual lo tiah a zum. Tu ahcun inn pi kawlawng rialrial sungah a ding cuarci. Nupi a um lo mi inn cu inn ti ih kawh theih hman a si mumal lo ti a vun tep ngah.

A hlawhtlinnak ttawmpitu ding nupi a um lo ahcun a hlawhtlinnak pawl khal sullam an nei lo vekin a thei.

A thaisun ah a nu le pai’ inn ah a tlung ve. A nu le pa in an rak hmuh tikah mangbang zet in an rak sut.

“Na hnattuan tamtam thawn inn ra tlun can na nei thei lai maw pate? Pakhatkhat na cang mawsi? Nute Nu thawn nan to aw maw?”

Cat lo ih thu an suh ciamco lai ahcun a mithmai a hit miammiam thluh. Himi khal hi a nu le pai’ inn ih a tlun can a mal ruangah a si ko ding. Inn ih a ra tlun cu a nu le pa an lungawi zet. Amai’ hrangah a pa cu rawlhmeh lei ding in a suak. A nu cu amah titi pi ding in a um. A nu in a ei ding ah mipe kan a va la.

An to rei hlan ah a nu tei’ inn ih phone a ra awn. Phone sungih a pai’ aw cu a thei ban.

“Nupi, na hrangah khuaizu ka tuah ih tukvirh tlang ah ka ret ta kha. Tu ah in awla a tawk ciah ding. A daih hlan ah in aw maw.”

A pa in phone a thlak tikah a nu cun khuaizu cu hmawm khat a vun hmawm.

Phone a ra awn lala. A pa ih phone thotho. “Nupi, tidai man kan pek a ttul thlang ka zum. Vun zoh duak hnik aw, cahnah ken ka hngilh i. Cahnah nambat kha i rak sim ta aw. Ka fehnak zin a si kherkher ih ka vun pe phah ding.”

Phone an thlak hnu ah a nu cun hni siamsi phah in, “Na pa hi a hnattuan a tam tuk. Inn ihsi malte sung a suah men hman ah vei hra lai i rak phone ttheu. A thlahlawh pawl hi Pehtlaihnak Zung hrangah a pe si hmang ti pangnak a si,” a ti.

A nui’ ttong lai ah a pai’ phone a ra lut lala. A pa cun aipuang zet in, “Nupi, nga-cin kha na duh ti aw? Tuini cu bazar ah nga-cin tharhlam zetzet ka hmu. Ka run lei tlung ding ih ka lo suansak ding,” a ti.

Minute kul sung ah a pai’ phone cu a rung lut leuhleuh. A pa in a phone leuhleuh nan a nu cu hngirtteu hmel khal a pu lo. A nu cu amah thawn titi tlang vek an si nan, a taktak ahcun a pa thawn an be aw tam sawn.

A netnak ahcun a sup aw thei lo ih lungkim lo zet in, “Papa hi ziang a cang thlang? A rei vivo ih a mumal lo deuhdeuh si lo maw Nunu? Taktak ahcun, thuhla tthenkhat tla cu phone hman a ttul lo. Inn thlen hnu ih rel khal a ngah ko si si,” a ti.

Cutikah a nu cun hni phah in hitin a sim: “Cuti a si lo pate, na Papa ih thinlung thutakzia hi ziangtin na theithiam thei ding! Papa cun a thinlung kha inn ih a tanta ruangah, a thinlung ih innlam lawnglawng a um ruangah a run phone leuhleuh mi a si. A ruangpum cu a lenglam ah a um nan, a thinlung kha inn ah a tanta ih, innlam lawnglawng a ruat ruangah, innlam ah thupi hlapi um hran lo khal sehla a run phone rero mi a si. Ttulhai zat paisa kensuah ding inn ih kan ret thei ahcun a tawk zo tiah ruat hlah aw. Inn hi paisa retnak hmun a si lo. Inn cu thinlung retnak sawn a si. Inn ih na thinlung na ret lawng ah duhdawtnak le lungawinak hi inn ah an um ringring thei ding. Na theithiam maw, pate?”

A nui’ lainatnak thuk zet mitmeng hnuai ahcun a hung fimharh dukdi. Hnattuan a neih tam lai ah innlam a phone dah lo ti a vun mangsuak.

A phone lo lawng hman si lo in, a nupi ih a rak phone khal ah manhlap zet in phone a thlak vukvi ttheu. A tlunlam upa le hnattuanpi pawl thawn in le ei ih an nomawk lai ah, inn ih meisa tleu pakhat cu a ra tlun lai hlanlo, zanttim tiang ih, a tleu ttheu thu a vun mangsuak.

A nupi ih umhar lunglennak, amah hngak ih a tuar mi tontuarnak pawl a rak ruat dah lo. Kum ruk a si zo mi a fanu te in ramsa hmuan fehpi ding, lehnak hmun fehpi ding in vei tampi a dil nan, thu lawng a tiamkam ih a tiamkam mi a pelhsolhter ringring thu a vun mangsuak.

Himi pawl hi a hnattuan a tam tuk ngaingai ruangah maw? Asilole, innlam ih a thinlung a tanta lo ruangah sawn?

Cumi zan ah a nupi ih nu le pai’ inn ah feh in a nupi a va hruai. Ka lo thlun thei lo a rak ti tikah manhlap zet in a simfiang ciamco.

“Tui hlan vekin ka um nawn lo ding. Ka lo ngaihthah nawn lo ding. Innlam khal ka ngaihthah nawn lo ding. Ka hawl mi paisa ka lo ap ih, inn ihsin a ttul mi paisa kensuah ding a um ahcun na nuam aw ding tiah ka rak ruat pang. “Duhdawtnak” ka hlohter ngah hrih lo ih a tawk deuh lai. Tui hnu ahcun ka thinlung le ka ruahnak hi inn ah ka ret thlang ding. Ka thinlung khal ah inn ka ret ding. In thlun kir aw maw.”

A nupi cun zianghman a sawn lo. Asinan a ttang sungah nuamte’n a lut ih pom phah in a ttap ciamco.

Inn timi cu thinlung retnak hmun a si. Duhdawtnak le lainatnak khawlkhawmnak hmun a si. Hnattuan neih tam tuk timi hi puhmawh taktak a tling lo. Inn ah thinlung a um, duhdawtnak a um ih, ngaiawknak le halawknak a um ahcun lungawi aipuannak pawl cu cem ti nei lo in an pung vivo ding.

Hram: http://www.duwenzhang.com/…/aiqingwenz…/20111020/204044.html

Comments

comments

Comments

%d bloggers like this: