INDRA NOOYI: PEPSI COMPANY IH CEO


American rampi PEPSI company ih CEO ṭuantu India nunau Indra Nooyi ih thuhla tawi, a zuamnak le hminsintlak a ṭongfang pawl kan zoh tlang hnik pei.

Indra Nooyi cu India ram ihsin buaih pakhat a ngah hnuah phunsang tlawng ah fimthiamnak pehzom ih zir dingin paisa malte thawn American ram pan in a poksuak top mai. Fimthiamnak zir duh tuk ruangih a nun khawsakdan le hnaṭuannak ih a lungput tete pawl hi uar a um ngaingai.

Indra Nooyi cu harsatnak tampi pahtlang in American ram ah himdam ten a thleng. A saduhthah vekin phunsang tlawng ah fimthiamnak a zir ngah thei. Asinan bomnak a ngahmi paisa a mal tuk ruangah a daih aw thei lo. Curuangah zaan laifang ihsin khawvang tiang hna a ṭuan ih, sun caan ah tlawng a kai.

Phunsang tlawng ihsin master buaih a ngah tikah India ah tlungsal nawn lo in American ah hnaṭuan in a um. Hna a ṭuannak ah rinsan tlak le dingfel zet in a ṭuan. Cutin a netnak ah leitlun hminthang PEPSI company pakhat ah sinak niam zet dinhmun thawn hnaṭuan a thok. Indra Nooyi hi a zuamnak le a taimaknak ruangah American mi pawl hleih/lan in Pepsi company ih CEO a cang thei. Cun Pepsi tuahdan pawl tla a thleng danglam ṭheh ih, Pepsi khal tampi zuarkhong thei dingin a tuah thei.

HMINSIN TLAK A ṬONGKAM PAWL
(1) CEO pakhat ka si zo ruangah diriam zet ih um huahhi men ding ka si lo. Pehzom ih zingzoi ding tampi ka nei ih, ka zingzoi ringring. Thuṭha hlaṭha ruahsuak theinak dingah cabu tampi ka siar ringring.

(2) Zirhtu ṭha nei lo sehla hi dinhmun ah ka thleng thei dah lo ding. Kei cu zirhtu pawl ih an sermi zuklemte pakhat ka si. Zirhtu ṭha neih hi a thupi tuk lawlaw.

(3) Na company ṭhansoter na duh asile a hmaisabik ah na sinak sangter aw. Cutiih na tuah thei ahcun na company cu amahten a ṭhangso ve mai ding.

(4) Company ih boss pakhat ka sinain inn ka thlen tikah fanu pakhat, nupi pakhat, hringtu nu pakhat, mo pakhat ka si timi hi ziangtik hmanah ka hngilh dah lo.

(5) Mi ti fekfek hruaitu pakhat a si tin ka hnuaimi pawl in in rel. A si ko. Hna ka ṭuan tikah a ṭha thei bik si dingin keimah rori in ka zuam, cuvekin ka hnuaimi pawl khal a ṭha bik ih hna ṭuan dingin ka fial. Ka duhdawt ruangah ka fial. Nikhatkhat ah keimah vekin a sang bik dinhmun thlen ding ka duhsak ruangah a si.

(6) Ka theihfiang lomi thil hi ka hnuaimi pawl ih tuah dingah ziangtik hmanah ka fial dah lo.

(7) Zamrang zet in hnaṭuan ding. Kan ṭhelh a si hmanah a poi lo. Kan ṭhelhmi/palhmi par ihsin zir ngah tum in, ni dangah ṭhelh/palh nawn lo dingin ralrin ding.

(8) Sipuazi hnaṭuan ih bulhram pakhat cu in dawrtu pawl thawn naite ih um ding a si. An mizia, an duhmi thilri le thil an leidan pawl theifiang dingin zuam ding. An ṭulmi le duhmi kan neih ringring ahcun sumlut tampi kan nei thei ding.

(9) Company ih thil cangmi zianghman lo, ṭukṭak te khal ngaihsak hlehle ding a si. Cuti a si lo ahcun buainak tumpi a thleng leh thei.

(10) Hruaitu timi sullam hi simfiang a har nasa. Hruaitu ṭha timi simfiang ding tla cun a har sinsin. Na duhnak hmun poh ah feh dingih thluntu na neih a si ahcun hruaitu maktara na si zo tinak a si.

Credit: Bamaw Thein Phay
Lairawn Meifar
(189/500)

Comments

comments

Comments

%d bloggers like this: