Indianapolis ah Chin zate huap Lehpannak

Justin Thang

Indianapolis |11 June, 2009 

DSC04054[1]USA ram, Indiana state ih khualipi Indianapolis ih um chinmi 4000 (thawngli) zik um nak khua ah Chinmi zate huap in saphawsirh (footbol) zuam awknak neih a si. Indianapolis cu USA ih Chin mi pawl um tam nak bik hmun khal a si.  

Chin Christian Mino Pawlkom “Indiana Chin Youth Christian Fellowship” (ICYCF) ih hohatnak in kawhhran tinkim Bawhlungsit zuamawknak (Soccer/ Football) cu 3,May,2009 ihsin neih thawk a si.  (Zuk – FCCI)

Indianapolis ih Chin te le fa pawl hmuahhmuah lungrualnak tha sinsin nei thei nak ding ruahsannak tum pi thawn tuah mi lehpannak a si. Group pathum ah tthen a si. 

Group A Group B Group C
1.ZCFI ( Tidem) 1.FCCI (Falam) 1.CAC (Hakha,Thlantlang)
2.CCC  (Hakha) 2.ICBC ( Hakha) 2.LCC (Matu)
3.BCI  (Falam) 3.ZCC  (Zophei) 3.CEBC(Hakha,Thlantlang)
4.NAMCC (Matu)  4.IMCF (Mizo)   

 Kan dung zarhpi ni June 7 ni ah Quarter final lehnak neih a si. FCCI (Falam Christian Church Of Indianapolis) le ICBC (Indiana Chin Baptist Church) in zuamawknak an neih ih FCCI pawl cun goal 3 – 2 in an neh ih Cakbik zuamawk theinak dinhmun tiang an thleng zo.  

FCCI ihsi a lektu pakhat cun kan dinnak kum khat fangte lawng a sinan Pathian lam hruainak in kan lungrualnak leh kan zuamnak thawn Indianapolis ih Laimi kawhrhan tumbik pawl kan neh thei ti in a lungawi thu a sim. 

FCCI hi an dinnak kum khawt hrawng lawng siin member 100 tlukhrawng khawmawknak hmun  a si. ICBC – Rev. Dr. Hre Kio dinmi Church pawl hi kan Laimi church tumbik member 900 lenglo umnak a si. 

Hi lehpannak cu Chinmi unaunak hnget khoh sinsin ding ruahsannak thawi tuah mi a si. 

June 14 ni ah FCCI (Falam Christian Church Of Indianapolis) vs CEBC (Chin Evangilical Baptist Church) pawl in cakbik (champion) zuamawknak an nei ding. May 3 ni ihsin zarhte nitin te lehnak hi neih ttheu a siih, mipi ziang maw tizat in nuam le hlunghlai zet in hman tlang khawm theu a si. 

Lehpannak hman lai le lehlai pawl zoh duh tu hrangah www.falamchristianchurch.net ah zuknung (video) clip zoh theih a si.

(Visited 73 times, 1 visits today)

Comments

comments

2 Comments

  1. Salai Van Za Bik says:

    Chinlandtoday ,

    Nan thawngthanhmi a ttha ngai . Amah belte ICBC hi Hakha holh hmangmi long kan si lo . Mindat , Kanplet , Hakha-Thantlang , Zophei , Zotung , Senthang , Lautu , Mara , Falam .ect..umnak asi . Chin miphun unau tlin biknak Bu asi kan ti cun kan palh tuk lai lo dah . Cu ca’h ICBC ( Hakha ) ti lo in ICBC ti long in ttial ah ai rem bik asi rua tiah kei hmuh ning asi . CEBC zong Matu , Hakha – Thantlang peng chungmi khua tlinnak le Hakha peng chung khua tlin nawn in an umnak Khrihfa Bu an si ve ( keimah ka theih khawh ning ah ) . Cu ca’h CEBC ti long nan ttial ah a theimi hrang ahcun ai rem bik tiin ka ruah . Palhnak um sual si cun rak ka ngaithiam uh .
    Lungthiang tein ,
    Salai Van Za Bik
    Indy .

  2. Salai Van Za Bik,

    Na ruahnak na run ngan ruangah tampi ka lungawi ! Himi thuthang pek tu hi kei mah Justin Thang ka si. ICBC (Hakha) tiah ka ngan nak hi ti hrim nak ih ka ngan mi a si lo lawlaw ! In thei thiam sak hram aw. Indianapolis ah hi na thei vek in Chin Kawhhran 12 lai kan um. Curuangah leitlun hmunkip ih a um mi kan unau zate ih theih thei ding in ICBC (Hakha) tiah ka ngan nak a si. A tam bik cu Hakha an si ko lo maw si? Curuangah in thei thiam hram aw. Neta lam ah cu a thiang thei bik ih ngan ka rak zuam ding. Ruahnak in pek nak par ah tam pi ka lungawi. In theithiam ding khal zaangfah ka lo dil.

    Lungawi,
    Justin Thang,
    Indianapolis,USA.
    cell :(317)402-5364.

Comments

%d bloggers like this: