India Ramah Zumtu Hremnak Tuar


10155456_10152552855872454_513151002210857144_nTuikum August thla tir lam ih Khristian dokalhtu Hindu pawl ih Khristian an hremnak ah mi 38 lenglo cu an nunnak laksak an siih, mi 30,000 lenglo umnak hmun nei lo ih an um.

Biak inn ziang maw ti zat khal siatsuah a si. Cu tiih nasa zet ih ti duhdahnak cu a cozah ih a ralkap a thlah hnu lawngin daih lam a pan deuh.

Hi tivek ih zumtu ti duhdahnak a so sannak cu rehlam pan hmanseh nitin in zumtu pawl hrangah harsatnak lawnglawng a si. Inn ur kangsak, ralkap ih hrem that cu nitin in hmuh ding a um.

Khristian khua pawl ih an sim danah nitin ten Hindu sakhua ih letaw dingin in fial ringring an ti. Khristian dokalhtu pawl cun Inida ram hmun tin ah zumtu pawl harsatnak an pe. Kerela state, Bangalore le Mangalore khalah nasa zet in an tuar ve.

India ram ih mipi zatek 80 tluk cu Hindu va si hman hai khal sehla mipi 1.1 billion hin leilung tlun ih sakhuanak hmuahhmuah a kim. Phun hnam fate 2,000 lenglo tluk a um ding tiin zumnak a um. Khristian pawl in a hlei ce in harsatnak an tuar.

Khristian pawl hrem an tuar le harsatnak anpek mi hi a cem thei lo. Kan dung nai zarh ah India nitlaknak thlanglam Assam ram khal ah zumtu 50 lenglo thlah an tuar ih, Madhya Pradesh khalah mi 3 thah an tuar ve.

August 24 ih Khristian pawl harsatnak an tuar hnulam khal ih a hlei ce ih an tuarnak nak cu Orissa Kandhamal district a si. Hindu hruaitu Swami Laxmanaada Saraswati a thihnak thu ruangah a si.

Palik pawl cun thu fiangfelfai um lo in Maoist guerrillas pawl cu an puh. Asinan Hindu ralkap pawl cun Khristian pawl parah an thin hengnak cu tilang in, Khristian pawl ih din mi hngakttah pawl inn cu ursak in le Biak in pawl cu an ti siat sak hleiah Zumtu pawl ih dawr le inn pawl khal bal siatsak thluh an si. Mi 32 lenglo an thi ih, mi thawnghra lenglo cun umhmun nei lo in hram lak ah an relh.

Hi ti vekih harsat an tuar nak hmun Kandharmal khua hi Missionary pawl ih Hindu phun hnuaita/nauta (lower caste) pawl hnen ih Pathian hna an tuannak hmunpi pakhat a si. India zumtu zatek 2.5 tlun rak um dah theunak a siih Missionary pawl ih ttuannak ruangah 2001 kumpi siar kum ah zumtu zatek 20 lenglo tiang an karh.

Hindu ralkap pawl in Khristian pawl an donak san an rel ve nakah cun, Missionary ttuan pawl in mipi pawl cu nawhthuh pe in Hindu ihsin Khristian ih let ding an fial, India sakhuanak thluntu pawl in ruksak an ti. Nunphung le sakhuanak ih ramlaksak awnak a si ti khal cun an hruaitu Gaur Shankar Rath, Orissa state VHP ih zungsang ttuan cun a sim.

Inida hnam phunhnih Panas le Kandhas an zuamawknak hmun le an dodal awknak hmun khal a si. Panas pawl cu miphun nauta (Dalit) an siih thamthianglo (untouchable) tiih kawh mi pawl an si. Lehlamah Kandhas pawlkhal tlangpar miphun nauta (tribal) an si ve. Hi phunhnam pahnih pawl hin loram, hna, tlawng tivek tiangin an cuh aw theu. India a cozah in hivek ih miphun hnuaita veve an si ruangah an hrangah a hlei in hmun a pe theu.

A liamcia kum 20 in tui ni tiangah cun Kandhas miphun tamsawn pawl hi Hindu an si ih Panas pawl cu Khristian ih let aw tu an tam. Khristian ih a let awtu Pana pawl hi ziangkim ah hmun-covo tha zumtu hnenah khalah co thei ding dinhmun an si cuanglo nan an co thotho tiin Kandhas pawl cun a cozah hnenah an hek theu. Khristian pawl in hitivek ih an hek nak cu a dik lo a si tiin an ti ve.

Hindu kulmuk mi sawmnga(50) lenglo cun naam le hriamhrei dangdang keng in zumtu um tam deuhnak khua cu an Hindu pathian Ram hmin sal in Khristian inn le Biak inn pawl an siatsuah.

Ninghang tuartu (victim) tamsan ih ansim danah cun Ralkap bur Bajrang Dal pawl ih an hrem thu an sim. Bajrang Dal pawl hi India ram Hindu sakhuanak ih kulmuk zet, ramkheltu pawl Bharatiya Janata Party (BJP) ih kut hnuai ih um pawl an si. Hna kum ih Orissa hrilawk nak ah ziang tin a cang ding ti cu mipi ih ruah zet mi cu a si.

Hitivek ih hrem an tuar ruangah zumtu pawl cun auaw thanglo ten ramlakah thupthiar in Pathian an thangthat.

Biak innpawl cu khawmtu neilo, tthing riapri ten, meikangnak hma le siatbaknak hliam hma thawn a um.

Comments

comments

Tags:

Comments

%d bloggers like this: