India Ram Pi Hril Awk Nak Thawk

April 17th 2009
 
India Ram Pi Hril Awk Nak Thawk
 
India ram rorel nak Inn sangbik Lok Sabha Parliament Seat 543  sungin State hrekkhat ah hril awknak cu mizan cun April 16th ihsin neih asiih, Tui ttum Inidia ram Lok Sabha Parliament hril awknak hi vawi 5 ah Vote thlak asi dingih, a voikhat nak cu mizan sun April 16th, asi ih, a voi hnihnak ah April 23,  a voi thum nakah April 30, a voili nakah May 7th, Voi nga nakah May 13th, ah Vote thlak an si ding. May ni 16 ah vote siar asi ding. Tui ttum India ram hril awknak ah mipi vote thla theicu Million 715 an umih  Polling Centre 8,28804 ah vote thlak asiding.
 
Mizan sun April 16th ih Lok Sabha hril awknak tuah nak State leh Seat zat cu Kerala State Seat 20,  Chhattisgarh Seat 11,   Arunachal Pradesh Seat 2,   Mehalaya seat 2,  Andaman and Nicobar seat 1,  Lakshadweep seat 1,   Mizoram seat 1,  leh Nagaland seat 1. hipawl hin Lok Sabha hril awknak cu an thehzo.
 
Cun mizan sunih Hril awknak tuahve tu State dang pawl leh an seatzat.
Bihar State seat     40 ah seat 13 thehzo.
Uttar Pradesh seat 80 ah seat 16 thehzo.
Maharashtra Seat   48 ah seat 13  thehzo.
Andra Pradesh seat 42 ah seat 22 thahzo.
Jkarkhand Seat       14 ah seat   6   thahzo.
Orissa State  seat    21 ah seat 10 thehzo.
Assam State seat   14 ah seat    3    thehzo.
Manipru State Seat 2 ah seat     1 thehzo.
Jamu and Kashmir Seat 6 ah seat 1 thahzo.
 
Hi Lok Sabha hril awknak tuahzo mipawl seat 124 ah hin Candidate minung 1,175 an umih Nunau 122 an um. Tui India Lok Sabha 14 nak Parliament dinglai hi June 1st ah khin a can a cem ding ruangah, Tui ttum an hrilmi Lok Sabha a vawi 15 nak ih Vote hi May 16th ah siar asi dingih June 2nd ah Lok Sabha Parliament Cozah tharin India ram rorel nak Inn sang Parliament ah Cazah nak a tuah a ttul asi. Zo pawl leh ziang party an cak ding ticu May ni 16 lawngah a fiang dingih cumi hlan cu maizum thu menlo cu rel a theih hrihlo a si.
 
Canada Palik Pawlin Gang Misual Pawl Kai
 
Canada ramih Misual rual GANG Group Motorcycle tamzetzet thawi thlun aw ciamco theu pawl lakih  Gang Group, pakhat Hell”s Angel Group minung 156 cu  Palik pawlin an kaiih, Hi Gang misual pawl kai ngah dingin Canada Palik 1,200 rual cun Operation Shark hmin phuah in kum 3 sung nasazet ih an timtuah awkih an buaipi hnu ah tuhi an tumtah vekin an kai ngah thei fang asi.
 
Hi Hell”s Angel Gang Group pawlih mileh sa an rualpi dang minung ziang mawzat khal France leh Dominican Republic Palik pawl khalin an rakkai ve. Hi Gang Group pawlhi kum 1992 kum ihsin tutiang nasa zetih  rit theihthil zuar leh minung tampi thattu thubuai neipawlih ruah an si.  Himi pawlih hlei ah Gang Group dang Rock Machine Bike Gang an timi pawlkhal an tamzetih, Mipi hrangih mihnai hnawkzet an siih tlunah an mah leh an mah khal an do aw ringring ih Rawldawr leh Zu zuar nak hmuan pawlah Pistol in an kap that aw ringring Canada ramah hin an tamzet ih US khal ah an tamzet. Palik pawlin an simnak ah an mi kaih mi 156 sungah minung 111 cu himi Gang  Group pawl diktak an siih midang cu himi pawlih sin suakzo an si an ti.
 
Lawng Sungah Bomb Puak
 
Mizan sunah Afghanistan ram ihsi Australia ih vai tum pawlih lawng to mi sungah Bomb a puakih a lawngsungah minung 19 an thi ih midang ziang mawzat in hriamhma an tuar. Australia palik pawlin an simnak ah minung 49 to nak lawnghi Australia lawng ralkap pawlin Christmas Islan pan dingih an sim vekin  Christmas Islan ih Detention Centre an panlai ah an lawngsungah bomb hi a puak asi tiah an sim.
 
Hriamhma tuartu pawlhi Darwin Hospital ah ter an siih,  Australia Home Affair Minister Bob Debs cun himi pawlhi Christmas Islan Centre ih zohfel dingih fialmi pawl an siih a hmun an thlen hlanah vanduai nakhi an tawng asi ati. Bomb puah danleh ziang ruangah a puak zoin a tipuak tikhal theih fiang asi hrihlo ih Palik pawlin an zingzawi rero lai a si. Australia palik pawlin an simnak ah tuikum January thla insin Afghanistan minung Australia ih vaitum lawng 6 an kaizoih minung 250 khal an kaizo tiah an sim.
 
Russia In Chechnya Tapung pawl A Do nak Cawlh San Tum 
 
Russia ram thu hnuai ihsi Mahte rorel nak Independent sualsuak tumtu Chechnya ram tapung pawlcu Russia thawi kum 15 sung nasa zetih an do awk hnu ah, Russia National Anti-Terrorist Committee cun  Chechnya ih mipi vangtlang dinhmun a thatsal thei nak dingah  Chechnya Tapung pawl a do nakcu Tuizan zanlai fang ihsi cawlhsan dingin  Russia President Dmitry Medvedve cun thusuah nak a tuah.
 
Chechnya ram dinhmun cu an President thar Ramzan Kadyrov an Russia cozah a thlawp ruangah daih lam a pan vivo ih cu ruangah Do awknak cu Russia in  cawlhsan asi tiah an sim. Himi laiah Chechnya mipi lam tang tu pawlcun President thar Ramzan Kadyrov ih uk nak hnuaiah Chechnya mipi pawlih diknak leh covo cu nasa zetin a siatbal ih, Chechnya mipi pawllak ih Russia lamtang lo pawl hrangah cun himnak a um nawnlo tiah an sim.
 
Russia ram ihsi Independent sualtu tapung pawlhin buainak tumtuk cu an tuah nawnlo nan an ram Inn hnen  Dagestan leh Ingushetia thlengin Tapung pawlhi an um thluhlai, kum 2004 hnulan ah Russia ralkap pawlin Nasa zetih an do ciamco hnu ah cun Tapung pawlin thilti theimian nei nawnlo tiah Russia cozah lamcun an sim. Himi ruangah Russia President  Dmitry Medvedve in Do nawnlo dingih thu a suah nak asi.
(Visited 51 times, 1 visits today)

Comments

comments

Comments

%d bloggers like this: