India In Minung 3 That Ding

6th August, 2009
 
Pacific Tipi Ah Lawng A Pil
 
Pacific tipi thuanthum ih tikulh pakhat Tonga ih um pawlih to mi lawngcu mizan ah a pilih minung 32 cu  an dinhmun theihlo in an hlo lai. Hi Lawngah hin a hnatuan tu pawl siartello in khualtlawng minung 86 an to ih  tikulh ihsi Km 87 hrawngah hi lawnghi a pil a si. Hi Lawngpil ih minung pawl runsuak dingin  New Zealand Search and Rescue Coordination Centre leh Royal New Zealand Airforce pawl kuatcih an si.
 
Hi Lanwgpil ihsin minung 53 cu nungdamin an runsuakih ruang 1 an lasuak bet, Hi Lanwg ih to nungdam ih an runhsuak mi  Siosa Laveka cun  nungdam pawlhi mipi deuh hlir an si tiah a simih lawng parih Emergency lawng an retmi 9 sungah  7 cu mipi an to khat tiah a sim. Hi lawnghi ziangruang bikah a pil ti theih fiangnak a um hrihlo.
 
China In Mi 2 That
 
China Supreme Court in  Sumpai thu ih dan tuahmi pahbal leh khaw tlang leh ram hrangih thilsual tuahtu thiamlo a coter mi minung 2 Du Yimin leh  Si Chaxian cu  tuisun ah an that. Du Yimin hi nunau a siih,  ram lei leh zuar nak thuhla ah  dollar Million 102 leh 5,00,000 hrawng a i ru tiah an sim.
 
Si Chaxian hi  minung 300 hrawng hnen ihsin sumpai tipun tam dingih tiamkam in  dollar Million  24 hrawng mi paisa a laksak tiah an sim. China hi ram dang hnakin mithah hmangbik ram a siih kandung thla ah khan an ram Vice President, in that awknak cu timal vivo a tumthu a rak simzo nan thilsual tumpi deuh tuahtu cu an that rero lai a si.
 
India In Minung 3 That Ding
 
 
Kum 2003 August ni 25 ih Mumbai khawpi ih  Bomb tipuak tu minung 3 Hanif Sayad kum 46 leh a nupi Fehmida Sayad kum 43 mi leh  Arshat Ansari kum 32 micu kandung zarh ah khan  Mumbai ih  Prevention Of Terrorism Act (POTA) Court cun  thiamlo a coter hnuah  tuisun ah thi dingin  thu a relcat sakih  India ramah nupa thi dingih Court in thurelcat saknak a neih hmaisa bik mi an si.
 
POTA Court cun hite pathum hi  ramphiar ruk mithat leh mithat tum  thu ah thiamlo a coter ih  cumi ih tlunah danlo ih puakthei thil hmang Explosives Act Explosive Substan ces to Public Property Act,    tansan in thiamlo an coter ih an thuhla hi kum 6 sung ngaituah sak a si.
 
 
POTA Special Judge MP Puranik cun  hite pathum hi kum 2003 August ni 25 ah khan Mumbai ih  Gateway Of India leh Zeneri Bazaar ih Bomb an tim puakah khan  minung 53 an thiih midang 100 lenglo in hriamhma  tuar tiah a puang. cui hlei ah hite pathum hin  kum 2002 December thla ah khan Mumbai khawhnar ih Bomb kamtu leh  Kum 2003 July thla ih  Ghatkopar ih Bomb puakih minung 2 an thihnak khalah  mawhphurtu bik an si tiah a sim.
 
Swine Flu Nat Nak
 
World Health Organization (WHO) cun leitlun pumpi ih Swine Flu natnak ruangih thizat cu minung 1,154 an kimzo tiah a sim. WHO cun himi natnak cu ram 168 ah a darhzo ih, leitlun ih himi natnaktuartu minung cu 1,62, 380 an kimzo ih midang hmuhsuak hrihlo mi khal an umlai dingih a zum thu a tarlang. Swine Flu natnak ruangih mithi tambik nak ram cu  America khawmualpi pawl an siih,  65 cu Asia thlanglam leh  39 cu  Western Pacific lammi pawl an siih, Europe khalah himi natnak ruangah minung 41 an thizo tiah WHO cun a tarlang.
 
Afghanistan Bomb Puak
 
Tuisun ah Afghanistan ram thlanglam Garmsir District ih  lamzin kiangih Bomb puakah minung 21 an thiih midang 5 hrawngin hriamhma an tuar. Hi vanduainak tongtu pawlhi Mo lawm dingih feh an si ih, Helmand Province ih Palik bawi Assadullah Sherzad  cun  hi mithi pawl lakah a tamsawn cu nunau leh nauhak an si tiah a sim.
 
Hi mithi pawlhi Tractor leh mawtaw dangih feh an siih, hi Bomb puahnak hmun hrawnghi Tapung pawlin ramdang leh ramsung ralkap pawl anbawh theunak a siih hmun ralmuanglo zet asi tiah Cozah thunei tu pawlcun an sim. Himi ih hleiah mizan sunah an ram saklam  Nangarhar Province ah lamzin kapih Bomb puakah Civil minung 6 an thi, hi mithi pawlhi khaw tlang hruaitu deuh hlir an siih  Cozah Upa tongding ih khawpi sungih tlawngding pawl an si.
 
 
Tikaw Pi Ah Bus A Tla
 
Mizan ah Pakistan ram saklam ih Indus tikawpi ah  Bus a tla ih minung 34 cu an dinhmun leh an thuhla theihlo in an hlo lai. Hi Bus cangsual nakhmun hi an ram khawpi Islambad ihsi Km 550 ih hla Skardu bial Malopa Randu khau ah a si ih Bus ih to mitam sawncu ralkap  khuan ih tlung pawl an si.Himi hmun ah runhsuah nak hnatuan tu pawlkhal kuatcih an si nan tidai fawn a tamtuk ruangah  tuisun tiangah cun minung leh ruang laksuah theimi an nei hrihlo.
 
Hi Bus hi Mushabroom Transport Company ta a siih, Mizan sunah khan Rawalpindi a suahsan ih  a suahding tikcu cankhal nikhua a siatih lamzin a thatlo ruangah  nazi 10 ti khawtlai a si tiah  Company thupuangtu Airam Shah cun a sim. Rawapindi ihsin Skardu hi nazi 22 sunghrawng tlan a siih a tlaknak hmun hi Skardu ihsi nazi 4 sung tlanhrawng Malopa khua ah a si. Pakistan ramhi lamzin a siatih tlunah  mawtaw to an tet theitukih Mawtaw tla leh cangsual a tam zet theu tiah an sim.
 
(Visited 53 times, 1 visits today)

Comments

comments

Comments

%d bloggers like this: