In That Zik!

killing
By Bob Collins

Lettu: Lal Lian Zual

Palik ka si ih ka hna cu kum 14 lai ka `uan zo. In zirhdan a si hleiah ka hna`uan in a kentel mi a si ruangah ziangtik lai khalah ralringin ka um ringring. Mipi lungawi lo duhphawrh tivek tla hi buainak an tuahlonak dingah an dungin kan thlun `heu. Anmah khalin an tum cia si lem lo, ziangmaw titi ih buainak tuahih an ban `um tla a um ve hnuaihni. Mibeidawng thin-aithawkin senpi umnak ih buainak an tuah ciamco cang khal a um. Hivek can ih pawimawh emem cu vaivuan lo ih thindaite ih um a si. Kan vaivuan pang a si cun buainak tifel loin kan bet sawn ding tinak a si.

Kiltu Aiah Tuartu; Misual kutthlak tuar runtu ah ruataw in, ziangtik can khalah kiltu thinlungpu ih ka um laiah, zan khat cu kiltu aiah tuartu dinhmunah ka um ve ta tlat mai! Kiltu ih ruataw Pathian hrimhrim mamawhnak nei lo cun Pathian lo cu kiltu dang ka nei lo ti ka theifiang ve ta.

Ka ihnak khan ih thithlepih ka ihthah lai cu ka nupi `awng awn cun in `hang lualli. A `awng mi cu, “Ziang a cang, John?” ti men a si nan thinphang le mak tinak aw a tel ruangah ka harh lohli. Ka fapa kum 17 mi John cun, “Aw..si..” ti lo cu `awng dan ding a thei lo. Ka hun zoh cu ka ihnak khan pindan sangka ah John cu dingin a ra lang. Cuih zan cu a nau kum 15 mi thawn `halai khawm ah an khawmaw ve ruangah an ra tlun phahah an maw`aw in thil a su pang simaw ah ka ruat men.

Ka Meithal…
John cun a dunglam cu in kawhhmuh i, a dungah cun a nau Beau cu hmaituam mi pakhat hin a lu cu a meithal thawn a rak sawh cu ka hei hmu. Cuvek cu palik `awngkam cun, ‘inn ih luhhnawh suamawknak(home invasion robbery)’ kan timi cu a si. Suamhmang tawn ciocio ah cun thih `ihnungbik phun suamawknak kan tawng ti ka theifiang hngal. A thupten, kan theih lo laiah kan thil  ruk an tum lo ih kan um lai, kan mithmuh rori ah kan thil neihpawl lakih a `ul cun kanmah khal mi thah an hreh lo ti a fiang. TV le CVR tivek hleilo zianghman kan neih lo thu sim sehla an zum pei maw? Rak zum lo ta sehla ziangtin in tuah ding?

‘Ka meithal la thei hleuhhli sehla cun aw…’tiin thu ka ruat. Lak thei dan khal a um men thei. ‘Aih cuvek a ci lo. Keimah lawng ka si lo. Ka nupi fanaupawl in an thih phah thei’. Curuangah an ti mi pohpoh tuah cu a fimthlak bik ding. Hivek suamawknak ih thi le hriamhmapu an um `heunak san cu an suam mipawlin an rak do ve `heu ruangah a si ti ka thei zo. Curuangah an duh vekvek an tuah thei hi a dikbik ding.

Zial ah Bawk Aw; Hmaituam cingih ka fapa puakruk thawn sawhtu kiangah cun midang hmaituam tho hi a rawng lang leh ta. Theih tumih zoh an hua, thei vekih kan um pang cun an thingphang ih an duh hnakih hla an feh dingih in that mei thei a si. Curuangah fiang takih an hmel zoh lo vekih lang cu ka tumbik mi pakhat a si. Kan fapa pahnih le kannih nupa cu khan pakhatah cun in retkhawm ih a kim lo cu kan fanu kum 12 mi pindan dangih it Nicole lawng a si. An hmuh tikah ziang a cang ding? Insangih cuvek hawn tawn cun ka insangpawl hrangah cun ka thinphang nawn. Ziangmaw pang menah kan zate ih thi thei kan si si. Ziangkhal cang sehla Khrihah kilhim kan si zo ti ka theihnak cun ka thla a muangter nasa. Cucu ka hnemawknak um sun cu a si thlang mai.

Meithal kengtu sawn cu, “Zialah bawk aw” i ti hrukhro. Cutin phar le ihkhun karlak zialah cun ka hawn bawk zuarzi. Tlangval pawisa duh menmen in in suam lo, palik in misual kan tuah vek cekci in in tuah ruangah an vawi khat tinak a si lo ti a fiang. An thiam tuk. A meithal cu ka hawn hmu zuakzi ih Magnum .357 simaw .38 si vekin ka thei. Meithal `ihnung ngaingai a si. Ka bawkkhup lai cun misual kut le ke `awnnakih an hman `heu Tape- hnang (duct tape)dirh awn ka thei ta.  Meithal keng lo sawn cun ka kut dung lamih `awn le erhnak le ka ke erhkhawmnak ah a hmang. Ka hmur  a rawn erhpit hngal fawn.

Hivek an tuah sung hmuah cu an kut-rin a lang lonak dingah kutbun an bun `heh. An sulhnu an thup thiam hleiah an vaivuan miah lo. An nehsawh lawlaw.
kill

Meithal Awn Thupnak Lukham

Bawkkhup ih ka um hnu ah ka lu cu lukham thawn an rawn khuh thlang. Hi khal hi Training-nak ih kan zir cia mi kha a si. ‘Misualpawl hin an mi thah cu lukham an dam `heu, cucun meithal awn a thup hleiah thisen `ekdarh ding a kil’ tiih misual neh zawtnak dingih kan rak zir `heu cu keimah in kahnakah an hmang zik thlang. Lukham dang pakhat a thuah bet deuhdeuh sapbai!! Ka cang pang cun ka nupi fanaupawl in an tuar zik ruangah hngah mai lo cu ti theih dang ka nei lo.

‘Kun te hen” tiin Danice cu an hawn hro khurkho. Pakhat in a t`emt`awn lai cun pakhat in kapthat dingin in hro camcin. Danice an phuar hnu cun ka fapa pahnih khal an phuar ve ti an thawm in ka thei mai.
“ Mi ra leng ding an um maw?’ tiin in sut ih kei cun an um lo thu ka sim. Ka hmur an erhpit ruangah ka `awng an thei thei lo. Ka hmur cu an hawn phawih hnu cun kan thawmah khatlam ih it kan fanu Nicole cu a `hang dingin a rung lut pang ding ka phan ruangah dimte in, ‘An um lo’ ka hun ti.
“Khawiah na pawisa bawm”
A umnak ka sim.
“ Khawiah na sui `hi” tiin Danice cu an sut leh in.
“Pawhdawh tlun tabik ah”

“Hinah Nauhak”

A neitupawl cuti cang thei loi kan bawkkhup lai cun thinphang lo le muang ememin kan inn sungih thil mankhung pauhpauh cu uluk takin an hawl thlang. An duhtawk an ngah hnu ah, “ Na zunghruk ka phawih thei lo ahcun na kutzung thawn ka tan ding” ti thawm ka thei. Danice cun a hmur erhbeh `awng thei mumal lo thawn fiang lo takin , ‘Na dirh phah in merh aw” a hun ti hnuaihno.

Meithal kau awn ihsi cun meithal keng sawn cun a meithal cu kah mai theihin a ret ti ka thei. Reilote hnu ah, “Hinah nauhak pakhat a rak it ziar a si hi” tiih an be-aw ka thei. Nicole ih it cu an hei hmu ngah ti a fiang, ka `ih vek cekci in thil a cang thluh ti ka theih tikah ka mang a bang nasa.

Ka fanu cu an kawk hmaurhmo, “Bawk aw” tiin aw hrang takin thu an pe. ~apin a dodal dingih thil a pawi thluh pang ding ti ka phang nasa. “Bawpa vaivuan lo dingin bawm aw” tiah thla ka cam. Asinan vanneih thlak takin Nicole cun thu a awih mai a si ding thawm a um nawn lo. Thilerhnak tape hnang an hik awn ka vun theih cun kanmah vekin Nicole cu an phuar ti ka theih tikah ka thawpi ka suah hlunhlo lehlam sawn.

Thlacam Mai Lo Cu
Palik ka si ih ziangtik lai can khalah ka nun hi sual do ih neh dingin ka man ringring. Cuih ruahnak cun ka nunphung a uk ih ka hna`uan khalah nasa takin ka hlawhtlin phahin ka thei. Tui ‘umah hivek thil hi keimah rori parah a thleng thei ding ti ka ruatsuak dah lo. Police…ka ruatsuakaw ih hiti thil an hawl vivo cun ka palik tacik an haisuak tengteng ding! An hmuh pang cun misualpawl cun palik tihrimnak hrimhrim khalah kan insang parah ziangkhal tuah an duh ding…Palik nunphung ka rak zir dah mi ihsin ziangkim ka theithiam cia `heh. Sihmansehla ti thei zianghman ka nei lo. “ Bawipa  ti thei ka nei lo, in humhim aw” tiih thlacam mai cu ka ti thei umsun a si.

Pakhat ra lut awn thawm ka thei ih ka bank card le ka wallet (pawisa bawm) a run keng lut. Ka PIN number in sut ih ka sim. A theisual ih ka simsal., “Pawisa va laksuah kan tum ding ih na rel sual pang cun na thi si mai” in hei ti bet.

Khawiah ha na Meithal?
Pakhat cu a feh hluthli ih a reh reprep. In kiltu cun a meithal cu khat tawkin a kau awn leh t`hukt`ho t`heu. Ka sungtepawl t`ih phang au-awn ngai a nuam lo nasa. Cuih hnuah pakhat a ra lut ih ka kiangah ngawi khiaukhi in a din hnu ah, “…Palik na `annak kum ziangzat a ti zo?” i run ti cutci ta. Ka tacik (badge) an hmu tinak a si. Ka meithal an hawl tengteng. Ka meithal 40 Caliber Glock kha, an hmuh tikah cun ka meithal rori thawn in kap that a si mai. Ziangah maw? ka meithal cun ka insang zate-in in kapthat ding ih ka meithal cu ka kutah in humter ding. Cutin ka sungte cu ka kahthat hnu ah kleimah le keimah ka kapthat aw tivekin an langter thei  thlang. Ka t‘ihphan mi zate a thleng dik vivo thlang!!

“Na meithal khawiah..?” Ka zum vek cekci. Ziangtin ka tuah ding? Thuphan sim ningla cutin can malte tlaiter sehla teh? Si lo. Thungai lawng sim hi a dikbik ding.
“Thlalang sir…ka taikhap kiangah a si ka zum.”
“Thuphan na per ciangbal. Kannih khalin ka zum ih a rak um lo”

Ka Can a Cem Zik
Ka thei lo ngaingai. Ka hun ruatsal. Ka rak tisual ngai. A hlan ih trainging ka neih ihsin ka maw`aw hnuai ih ka ret ka lasuak hrih lo ti ka thei veten ka sim hngal. Pakhat cu a feh hngal ih reilote ah, “Hinah ka hmu” ti cingin a ra lutsal. Ka zum vekin a dik vivo si!! Cuih awthawm cu milai aw thawm ka theih netabik a a si men thei. Asinan in that hrih lo…!

~awng Thlamuan Thlak Lo
An duh vek an ngah hnu cun an hotupa cun, “Ka feh leuleu. Ka feh tik le kan feh hnu minit 10 ah palik na fawn dingih an ra lo runsuak mai ding” i ti ta mai. Ka nufapawl cu an thaw a suak huaihi. Asinan kannih palik hrangah cun thlamuan um lo nasa. ‘Hivek misual in in hnemnak hi zum lo ding. Buainak tuah loih hnangam takih in umter hnu ah mi thah an duh ruangah’ ti a si. Cutin ka can cem a nai ti ka zum hnget sinsin.

Curuangah cang ding cun tu hi cang tikcu cu a si. Pabik ka si ih hi insang hotu ka si ruangah anmah kilhim cu ka `uan vo hrimhrim a si. Kan zate in thih hngakin hinah dunglam kut t`emt`awn kan si si.

Bawipa na kutah
In that zik rori ih ka theih cun ka thin a hung pit uk-o. Ti thei mi ka nei lo. Pa-awkter ih do ve cu kan trainging-nak ah a `angkai lo ti kan rak zir thluh zo si. Beidawng tak cingin, “ Bawipa na ta kan si. Na kutah kan um. Na thu thu…” tih mai lo cu rel ding dang ka nei lo.

Inn hnuai lamah maw`aw retnakah thawm ka thei. Car nunter awn ka thei bet. A awn ihsi cun keimai maw‘aw awn rori a si. Keimai Van maw‘aw cu an ru ih an tlansuahpi rori ti a awn ihsin ka thei thei. Cuih hnu cu a reh khepkhep.

Ngam lo cing cun ka hun cang ih ,”Nan um kim maw?’ tiin ka hun phun siapsi. “Ka pa, kan um `heh ko” titu cu ka fapa John ih aw a si. “Cang hlah uh, an ra kirsal thei hokhaw” ti ka sim hai.

Insang Raltlan
Thawm dim emem cun ka hun to. In t`emnak ka hun phawih ih khua ka hawi vel cun suamhmangpawl cun in tlansan thluh zo ih ka theih ruangah ka hun ding. Kan inn ah cun ziang thang ha an kam ti kan theih lo ruangah zamrangten kan tlansuak ih kan inhnen Flewelling tei inn ah cun kan tlanlut hngal.  Cutawk ihsin palik kan fawn hngal.

Hmun ralmuangah cun ka thunei in lairel khal ka thiam leh zutzo nasa. Sikhalsehla dinhmun a hun siat taktak cun thuneitu ngaingai cu Pathian sawn a si ti ka theifiang thlang nasa. Curuangah ka thil thlirdan cu a thlengaw hngal verver a si.

Palik hnenih kan theihawkter hnu cun ka puzawn tei inn ah ka `hawnaw hngal. Kan inn cu a zate in misual kutneh (criminal scence) a si ruangah an zohhliah thluh ta a `ul thlang. Cuti an zingzawi thluh hnu cun misual cu kaih hngal dingah ka ruat. Asinan an kaih lohli thei lo ruangah nuam ka ti lo lehlam nasa.

Makzetih Kaih
Phone thawn mi ka biak laiah ka pizawn cun inn hmaiih palik Car ding a hun hmu ngelcel. Palik pakhat cun tlangval pakhat cu kaiin maw`aw sungah a tul lut lai ka hei hmu. Ka fale cun sangkate puanzar phen ihsin an hei zoh ih, “Khipa cu in suamtu lakih pakhat a si rori” a ti ta mai.

A mak nasa, in suamtu lakih pakhat cu ka pizawn tei inn hmaiah cun sualnak dangpi thawn an kaih lai cu ka hmu cu a si ta mai. Pakhat an kaih hnu cun an hun dawp ih reilote ah an zate cun an kai thluh ta mai.

A maknak emem pakhat cu thut`henak zungih feh t`ul loin anmahte an phuangaw ih an sualnak hrang dan vekih hremnak pek hngal an si. Phuangaw lo ta pang sehla in suam laiah khan an fimkhur tuk ruangah kutneh le zianghman kan inn ah khan hmuh theihin an tan fawn si lo, a buaithlak nasa ding. A tawizawngin hivek thil sual tuahnak le suamawknak hi leitlunah a tam nasa `heu. A zingzawitu ih t`an cang khal tampi ka nei ve. Tui t`umih kan tawn mi hi thil danglam le mak khal a si lem lo. Asinan zirlai namen lo in tan ta a si.

Suamhmang Zirhtu
Palik theihnak ihsi cu hipawl hi ka rak thei zo. A sangsang ten a ra cang ding mi rak zumdan ka tuah thei. Asinan a tuartu lam theihnak ihsin ka rak thei dah lo. Hi vek buainak hi ka neh thei le ka tifel theih maiah ka rak ruat `heu, asinan ka tifel thei remrem lo, palik si khalin umzia a um lo cang a rak um ti ka theisuak. Cuhnak hmanin pacang`ha tiaw ve si hin thlacam ti lo cu ti theih mi pakhat hman kan neih lo ni hi a rak thleng thei ti ka fiang tuk thlang.

Khaih suamhmangpawl khan in suam si hmang ka rak ti ih, asinan in rak suam lo. Thuneitubik hmang ka rak tiawk t`heu kha thuneitu ngaingai cu Amah a si ti kan theih theinak dingah in zirh dingin Pathian in khai suamhmangpawl kha a rak thlah sawn a rak si. Cuti rak si lo ta sehla hi thu ngan thei dingin ka dam nawn lo ding.

Hminsin; Senhri Megazine ih suah zomi a si#

 

(Visited 608 times, 1 visits today)

Comments

comments

Comments

%d bloggers like this: