In Kilveng

 

 

July 12

Nipi Ni

 

 

 

Siar:

Matthai 10:16-31

 

Curuangah nan thinphaang hlah uh, sunttam tampi hnakin nan man a khung sawn a si.    

– Matthai 10:31

 

Kumkhat Sung Baibal:

–   Saam 4-6

–   Tirhthlah 17:16-34

 

Nipi zing veikhat cu Biakinn ah, “Sunttam a kilveng” timi hla kan sak. Mi pakhat in paakzai ih sak ttheumi hla a si ruangah miburpi hlasaknak ih sak dah lemlomi hla a si.

 

Saknolh (Chorus) veikhatnak kan saklai ah ka rualpa pakhat cu sak thei nawn loin a ttap. Kan dung naite ih a hmuhtonmi thu thawn pehpar in ziangvek dinhmun kan thlen hman ah a poi lo; Pathian cun in hmu, in thei, in kilkhawi ti a theih ruangah a lungawinak mit-thli a si ti ka theithiam.

 

Jesuh in, “Paisa pia sen pakhat in sunttam pahnih nan lei thei a si lo maw? Asinan cuih sunttam pakhat hman cu nan Pa Pathian ih thu loin leilung ah a tla lo. Nannih sinsin cu nan samphang hman a siar ttheh a si. Curuangah nan thinphaang hlah uh. Sunttam tampi hnakin nan man a khung sawn a si (Matthai 10:29-31) a ti. Bawipa in a dungthluntu 12 pawl kha thuthangttha zirh ding, minaa damter ding le tettikhan dingin Israel tuu hlo pawl hnenih a thlah zik zawngah a simmi a si (c.6). Amah ruangah hremnak le thah tiang an tuar hmanah ttih lo dingin a sim hngai (cc. 22-26).

 

Kiang le kap thil umtu daan in kan ruahsannak hloter ttheu hmansehla, hih hla in thazaang thar kan ngah thei: “Ka lung a awi ruangah hla ka sak. Miluat ka si ruangah hla ka sak. Sunttam a kilveng, i kilveng ti ka thei.” Bawipa ih kilvennak hnuai ah himdam te’n kan um a si.

 

 

Pathian in sunttam vate ih tlak hman a hmuh ahcun,

Lily pangpar niam le saang khal a ceimawi;

Van tla pianzia a neihter,

A lo kilveng lo ding maw?

 

Pathian kut ah na phurrit na tthum ahcun,

na thinlung sungah hnangamnak a lo pe ding.

(Visited 30 times, 1 visits today)

Comments

comments

Comments

%d bloggers like this: