Immigration Zung Hi Update A Ttul Tuk Thlang

15272216_942877105845899_1779011134140424873_oJesse Penn-Lewis Kip Ling

Hmatpungtin (NRC) tuah le Innthawng cazin tuah dingin Immigration Zung (Lah-wah-kah) ah nitinte mipi an tlar-aw thliangthliang. Ziangruangah?

System sanman lo tuk ruangah a si bik. Immigration hnattuan pawl cu an phar ve rero nan, computer system an hman lo tikah mi pakhat ta tuah ding menah sunvu hngah khalah cazin hawl hmu thei lo tivek a si.

NRC card thar thleng ding mipakhat ih ton mi vial vun rel sehla:
1. Ni khatnak ah application form kan va dil (ttong thiam lo le aan cing lo tla cun dil khawsuak thei lo khal an tor)
2. Ni hnihnak ah form fill-up le cazin hlun hawl a si. Hihi a hautak bik. Kan pu kan pa hmun tiang an mil-ton thluh a ttul ruangah cazin hlun cu mipakhat in a va hawl. Sangkate in kan hngak vialvial. Mipakhat cazin a hawl sung vial hi rei tak a si. Room fate sungah cazin zaten an peng thluh. Bizu sangpi pi ah an ret. Lei ri ihsin ceiling dai zik tiang an rem. Hrekkhat cazin cu an mawr miammiam. An vun kau ih tlek cih khal a tam. (Zuk ah zoh mai uh)
3. Ni khat kan hngak ngah lo, ni hnih kan hngak ngah hrih lo, “Thaizing ah ra sal uh” ti si ringring. (An hmuh lo cun buai pisirh si ko)
4. Kan hngak suak ih cazi hnenah va kir lala. A rak man remcang a si cun vantthat ti a si. Cazi a man tikah cazin hlun thawn milin form kan fill up.
5. Kutzung zaten kan nam. A ttul mi kan tuah.
6. Hmaizarh Monday ah ra aw ti a si. An pubik ih signature le kutzungpi nam ding a si bik.
7. An tiam mi ni ah kan va. An pu a rak man lo cun thaisun tipsun ti si ko.
8. Plastic an rak lawng ih zungpi kan nam. Paisa kan pe lala.

15230647_942877132512563_6591762184332714930_nA tlunih kan rel mi cu a tluang pawl tidan procedure si lai. Harsat kan ton bet ttheu mi a um hrih lai. Ahleice in Kawl si lo ramhrin miphun pawl hrangah-
– Kan hmin an rak ngan dan kha duhduh in an spelling tikah a bangaw thei nawn lo.
– In kawk in hro. (Pu Piangthula kha Kawl ttong in an ngan ih, Pya-thu-lah tivek hrawng si ko.) An hnatheih dan cio khan an rak ngan ve si ko. Mi tamsawn cu mai’ hmin hman Kawl ih ngan thiam kan si lo ttheu tikah buai a tam duh zet.
– Degree ngah rori hman an buai a si. Tlawng hmin ngandan le Immigration hmin ngandan kha malte spelling a rak pelhsolh cun degree an pe duh lo tivek a si. Ahleice in Engineering tlawngta pawl an buai nasa. Adik tak cun Education Department ih staff pawl le Immigration department ih staff pawl daithlan ruangah kanmah mipi in kan tuar riangri.

Computer System hlir hmang sehla hivek khal a zia nasa ding. Spelling a bangawk lo cun computer in a duh lo mai ding a si.

Mipi hi hnattuan ding nei lo tukih vaktawi men, sorsia vekih nihlawh ren lo takih va hngak rero kan si ce lo, Peng pakhat sungih mipi nihlawh hlo liangluang hi data tuah sehla ziangzat tak si pei maw? Rampum ah tla cun ziangtluk a tam ding.

Kan MP pawl le Tlangbawi pawl hin an helhkam ve hai seu. Mipi dinhmun in ka phut rori a si. Meeting le Tlangsuak palai ih vung feh men, TA,DA ngah le thlahlawh suah men a si mai lo. Mipi ih harsatnak taktak hi Tlangsuak Agenda ah an va bur ding a si. Bur thei ding cun lei-ri te ah an mit an men a ttul.

Immigration zung ih cazi zate khin an cabuai ah khin cahlap lawnglawng peng men loin Computer pakhat fingfing an hung ding a si. Network an pehaw thluh dingih an pubik khalin a cabuai ihsin a computer in zung sungih computer hmuahhmuah a pehtlaih thluh dingih, a ttheh fel hmaisa sa kha a rak zohfel in an print suak dingih, zungpi namnak khal digital system a si thei lo hmanah, print mi parah kan nam mai ding a si.

Zianghman thil har a um lo. Private Sizung le bulpak dawr hmanah an hman thei cun, kan khursungsuak thil mankhung hmuahhmuah nei thluhtu le mipi pek mi siah (ngunkhuai) hmuahhmuah dong thluhtu acozah cun a tuah thei lonak ding san ka thei lo.

Kan MP le Tlawngbawi pawl hi khawte nupinu pakhat ih a Hmatpungtin tuah thok ihsin a cem tiang va tel ve hnik hai seula ka va ti tak em!

 

(Visited 44 times, 1 visits today)

Comments

comments

Comments

%d bloggers like this: