Iksik Hlah

July 9
Tlawngkai Nikhat

Iksik Hlah

Bible Siar Ding: Saam 37:1-22

Mi ttha lo an um ruangah donhar in um hlah.
Sualnak a tuahtu pawl khal va daw hlah.
– Saam 37:1

Nikhat hnu nikhat kan umnak leilungpi ahhin sualnak le tthat lonak hi kham theih loin a karhzai deuhdeuh a bang. Thil ttha lo a tuahtu pawl in hlawknak an ngah. A fatebik in sim sehla, thilsual an tuahmi parah hrem le thutthennak tong loin an hrial thei. Culai ah kannih zumtu pawl cu Pathian thuthlun in kan um ih A daan pawl sungah kan thup aw. A caancaan ahcun Pathian Thu vekin a nung duh lotu pawl in lennak le hlawhtlinnak an ngahmi hmuh tikah iksik lo le daw loih um ding hi a har rori cu a si.

Saam Hla ngantu David Siangpahrang in mi ttha lo pawl caan tawite sung lian le nunnuam ih an ummi zoh a har zia a thei fiang nasa. Annih pawl hi thilsual tuahnak ah an hlawkzet a bang nain ni nikhat nini ahcun thutthennak an tong lai ding ti a thei. David in Pathian ih minung pawl cun kan Bawipa Pathian ih kumkhua a hmunmi daan ah tthum aw ringring dingin thazaang peknak a nei. Pathian in Amah kha a hmaisabik ah re ih a rinsantu pawl thluasuah bawngmal sawm a duh ih anmai’ tisa hiarnak kha an pathian ih a tuahtu pawl cu thu a tthen lai ding a si.

Thiiksiazetmi kan Pathian cu kan hrangah humhimnak tthabik a si. Kannih pawl hi Amah hnenih kan pumpek awknak parah thiiksia mi si dingih a hrante ih kawhmi khal kan si. El Qanna Pathian neitu cu midang pawl ih hlawhtlinnak ah va iksik le va daw rero a ttul lo, ziangahtile annih pawl ih lennak cu caan tawite sung daih lawng a si ko. Pathian in a minung pawl cu thil tthabik in a thluasuah ringring a si.

El Qanna, midang iksik lo dingin i bawm aw. Ka hrangih a tthabik i tuahsakmi cu midang ih tuahmi hnakin a nasa sawn ruangah lungawithu ka lo sim.

Zo si ka iksik dingih ziangruangah so cupa cu ka nahsuah rero ding? Ka mi iksaknak thu ah El Qanna Pathian in ziangti’n a sim?

@ Ava Pennington

(Visited 31 times, 1 visits today)

Comments

comments

Comments

%d bloggers like this: