ICA President Salai Ni Li Lian Interview

CT                   : A hmaisabik ah na hmin pumhlum le na thuanthu tawi in sim thei pei maw?

SNL : Ka hmin pum cu Ni Li Lian a si. Salai Ni Li Lian kan ti pei cu. Falam ih suak le thang lian ka si. 1988 ah Kawl ram in ka rak tlan ve. India ah kum 7, Australia ah kum 7, US ah kum 9 ka um thlang.

CT                   : 8888 Generation sungtel pakhat na si tin kan theiih Chin ram hrangah le Kawlram pumhuap nan cangvaih dahmi le cangvai reromi tawiten in hlawm thei pei maw?

SNL : Rangoon University ih tlawng ka kai lai ah Falam tlawngta palai in Chin Literature and Culture Committee ah ka rak tel theu. 8888 in Falam ah Students Union kan rak din hnu Peng dangih Chin tlawngta dang pawl Falam ah kan rak sawmih Chin Students Union tla kan rak din.

Ralkap pawlih uknak an lak hnu Mizoram, India ah tlawngta dang thawn kan rak tlanih Chin National Front (CNF) ah kan rak lut. CNF ah Cabinet Secretary pakhat tuanvo tiang ka rak kai. CNF ih ka um lai ah tlangparmi pawl ih rak dinmi National Democratic Front ah le, tlangparmi le Kawl pawl ih rak dinmi Democratic Alliance of Burma ah kan rak tel ve. Sunglam buainak ruangah CNF in 1992 ah ka rak cawl.Tufang cu Chin ram le Chin mi pawl hrang kan theih tawk zuam ve dingih kan dinmi Institute of Chin Affairs(ICA) ah Hotu tuanvo ka kai.

CT                   : Ziangtik kum ah USA na thlen ih ziangbik na tuah/tuan theu?

SNL: 2003 kum ah Australia ih ka hna tuannak company in San Diego, California, USA ih hna pakhat tuan dingin in rak thlah. Cumiin tutiang USA ah Software Engineer hna tuanin ka um ta. Ka tuannak cu telecommunications company pakhat a siih, tufang kan tuah bikmi cu android phones a si.

CT                   : Innsang nupi, faa nau pawl an hmin teh simsian a si maw?

SNL: Ka nupi Van Cin thawn 2003 kum ah kan nei aw. Fapa pahnih kan nei. Mang San Nilian (kum 7) le Lalsin Mawi Nilian (kum 5). Rualpi pawl cun Lai dan in San San pa ti ah in ko theu.

CT: Ramkhelh cangvaihnak lam ah nunnak tiang thap ngam in pumpetu pakhat dinhmun in tui Kawlram thlenghawnak hi ziangtin na thlir ve?

SNL: Kawlram tampi a thleng awk reromi cu ka lung a awi zet. Asina’n, democracy kan ngah zo ti phunin kan di a riam pang ding ti cu ka phaang zet. A thleng awk tulmi tampi a um lai. A hlei ce in kannih Chin mi le tlangparmi pawl hrangah tla cu tampi a thleng awk tulmi a um lai.

CT                   : Daw Aung San Suh Kyi hin mipi pawl ih kan duh thluahthlomi Democracy ram diktak lole Federation ukawnak ah in thlenpi thei pei maw?

SNL: Kawlram ih miphun dangdang (ethnic nationalities) pawl karlak rem-awksalnak (national reconciliation) tuah ding a tul zia le democracy ram diktak tuah ding a duh zia tu pekih a tongmi ka hmuh ruangah Aung San Suu Kyi in tlangparmi pawlih kan duhnak le thinlung in theihpi thlang a si hmang ti cu ka zum. Asina’n, a mah pakhat lawng cun in thlenpi thei lo ding. Mipi in kan zuam ve zet a tul ding.

CT                   : President Theih Sein tlun ih na hmuh dan? No U-turn tiih a au-pi rero mi tlunah ziangtin na ruat?

SNL: Kawlram thate ih thleng awk ding a duh cu a bang na’n, tlangparmi pawl parah ziang vek ruahnak a nei ka thei lo. Cun, a mah in duh taktak hman seh la, duhdan phundang a neitu an um pang a si le cu dunglam ih kirsal thei lo ti rori cu a theih lo ding.

CT                   : USA in kum reipi a kharhkhummi pursum leilawnnak (economic sanction eased) onn a si tikah ramsung mipi ziang kan bang pei?

SNL: Mipi hrangah malte tal cu a tha deuh ko ding. Asina’n, ei-ruk nak (corruption) a suak sinsin pang ding ti tla mi hrekih phanmi a si. Mi hrekkhat pawl kut sung lawngih sumdawnnak thupi pawl thleng thluh lo in, mipi hnenah a thleng thei ding a thupi zet ding. Kiangkap thil (environment) siatsuah tuk lo ih thansonak hna tuah thei dan ngaihtuah tla a tul ding.

Cun, Laitlang ih ummi pawlin, hmun dangih ummi pawl vekin thathnemnak an hmuh ve nak dingah cu Laitlang tla hmun dang vekin sumdawn theinak lamzin an on ve a tul ding. Tutiang cu ram dangmi pawl Laitlang ah duhvekin feh menmen hman an siang hrih lo tiin ka thei.

CT                   : Tubaite Institute of Chin Affairs (ICA) timi pawlkom thar din thu kan thei ziangvek pawlkom  a si? USA government theihpi zo timi thu tla kan thei ih ziangvek a si?

SNL: ICA cu Kawlram sung le ram lengih a ummi Chin mipi thuhla khaikhawmtu le peng khat le peng khat tih-awknak le huatawknak um lo ih rualremtei’ hna tuan tlang thei dingih a tawlrel rerotu pawlkom a si. US kumpi hnenin pawlkompi sinak registration le employer identification number (EIN) timi tla felfaite’n a ngah zo.

CT                   : Mipi hrekkhat in Anti-CNF tivek ruattu an um ih thil umtu dan in sim thei pei maw?

SNL: Chin pawlkom dang zo khal ICA in domi a nei lo. Chinram le Chin mipi thathnemnak ih a hna tuanpi ding ti’n a hmu sawn. Asina’n, cutiih hna tuan khawmnakah tih-awknak le tlawn-awknak um lo in, mutual respect ih hna tuan ding hi ICA in a ti thupi zet.

CT                   : ICA sungtel upa pawl hi zozo an si timi le ziangtivek background an nei timi mipi in thei an cak zet ih sim sian a si maw?

SNL: ICA ih kan hotu dang pawl cu tu hlanpiin kan Chinmi hrangah mah ti thei tawk rak zuam ringringtu pawl an si. Tu ih an umnak khua le ram cio ah hna-ngam le daite in an nufa le sungkhat pawl thawn um theimi an si lai ah tuvekin kan Chinmi hrang zuam duhnak an neihmi cu ka lung awi zet ih, a theitu dang pawl khalin, in lung awi pi ve cio ding tiin ka zum.

CT                   : ICA hmailam hmalak dan ding teh ziangvek a si pei, mipi tel duh pawl teh an tel thei dan a um pei maw?

SNL: Chinmi pawl kan ruahnak kan hmuh-awk thei ding le kan lung rual thei ding hi a thupi zet tiin kan ruat ruangah, Laitlang, Kawlram le ram dangdang ih a ummi kan Chinmi pawl kan biak rero laifang a si. Mi a tam thei tawp kan biak thei a si le hnatuan tlang dan khal a olsam deuh ding tiin kan zum. ICA ah sungtel sinak in siseh, tikcu, sumpai le ruahnak peknak in siseh, tel theih ringring a si.

CT                   : District thu ah Chin mi pawl in kan buaicelcel ih thil umtu dan ding in sim thei pei maw?

SNL: District um ciami thleng duhnak a um a si le tikcu rei deuh sung thin sau deuhin relkhawm nak um hmaisa ta seh la a tha zet ding. Vote thlak ih relcat lohli hnak in, lungkimtlaangnak (consensus) in relcat thei seh la a tha zet ding.

CT                   : Chin mi pawl lungrual teih ke kan kar theinak ding ah ziangsi a thu pi bik?

SNL: Peng khat le peng khat siseh, hnam khat le hnam khat siseh, neh-awk tumnak le uk-awk tumnak um lo in, pakhat le pakhat upat-awknak (mutual respect) thawn bangrep vekih kan zoh awk a si le kan lung a rual thei deuh dingih, kan duhdaw aw thei deuh ding tiin ka zum.

ICA Board Of Directors

ICA Board Of Directors

CT                   : Zomi-Tedim pawl in CNF a duh in an duh lo lawlaw si khawh Chin-Falam kan din hmun ? ICA in teh ziangtivek himi thuah hmalak tummi a um maw?

SNL : CNF cu Falam pacang tha pawlih rak dinmi a siih, tu ah kan unau Haka lam pawlin administration tuahin a feh reromi underground political party a si ko. Thil tha a tuahmi an um vekin, thil tha lo a tuah ngahmi khal an um ve. Duhtu an um dingih, duh lotu tla an um ve ding. Falam mi hrek khat CNF ih a teltu cu bulpak in an tel a siih an mah an thu a si ve ko. CNF parih thin natnak a neitu Falam mi tampi an um timi khal ka thei.

ICA khal Falam pengmi pawlin ziang peng ram hman thleidannak um lo in Chin mipi hrangih dinmi a si ko. Chinram le mipi hrangah Chinmi zate’n lung khat in ziang ti’n hna kan tuan tlang thei ding tiih a tawlrel rerotu Pawlkom a si. First step cu kan thok rero zo. Ziang vek political affiliation an nei khal a si le, Chinram le Chin mipi thawn pehparnak ah cun kan awthluk a danawk hmanah choir hlarem bangih aw mawi zetih hla kan sak thei ding hi ICA ih sunmang a si.

CT                   : CNF ceasefire tuah mihin Chin mipi thathnemnak lam maw, lungrual lo nak lam ah in feh pi?

SNL: Chin ram ah daihnak a thlengmi cu mipi hrangah thil tha a si. CNF ruangah si lo in, Chin mi pawl kan hmuh sual awknak le kan lung rual lo nak cu a um cia ve ko. Hmuh sual awk nak le lung rual lo nak a suak bet vivo lo nak dingah CNF in an mah duhtu lawngih thu lawng lakih fehpi si lo in, midangdangih ruahnak an lak thiam tla a tul ding. Mipi ron phah le lang-fiang (transparent) zet ih hna an tuan thiam tla a tul ding.

CT                   : Ramsung um Chin mi pawl ih kan tuanvo le ramleng um Chin mipawl ih kan tuanvo tumbik miangmo hi ziang a si?

Ni Lilian's Family

Ni Lilian's Family

SNL: Ram sung um pawl in ram dang le miphun dang pawlih um dan le hna tuan dan an thei mal deuh men ding. Ram leng um pawl in ram sung thil cangmi kan thei mal deuh men ding. Kan theihmi le kan cahnak kom ih, hna kan tuantlang thei ding a thupi zet.

CT                   : Chin mi pawl ih kan mamawh bikmi ziang  a si pei?

SNL: Lung rualnak le duhdawtnak.

CT                   : Chin mi pawl hnen ah thucah duhmi?

SNL: Tu in kan zuam thok a si le tui hnu ziang tluk rei ah si maw a rah kan hmu vivo ding. Tui hnu kum reipi hrang le kan fa le pawl san hrang tiang ruat in thinsau le taimak suah in kan zuam tlang pei uh ti ah ka lo sawm duh.

Cun, kan fim, kan thiam ti ruangah tuvekin hna kan tuan tummi si lo in, Pathian ih in pekmi kan theihnak le kan fimnak umsun tete hmangin kan tuah theimi kan zuam tummi a siih, lamzin a phunphunin in bawm cio hram dingah tla kan lo dil.

CT                   : A lo  pehtlaih duhtu hrangah pehtlaih thei dan ding a um pei maw?

SNL: ICA email chinaffairs@yahoo.com ah siseh, bulpak email: snilian@yahoo.com ah siseh, pehtlaihnak in nei cio dingah ka lo sawm. ICA website www.chinaffairs.org tla rak leng dingah ka lo sawm.

CT                   : Man lo zet cing khalin can in pekmi parah lungawinak simcawk lo kan nei a si.

SNL: Kei khal ka lung awi zet. Pathian in nan hna tuannak le thil nan tuahnak zing kimah thlawsuah lo pek vivo hram seh.

(Visited 222 times, 1 visits today)

Comments

comments

16 Comments

  1. Ttha tuk..ICA cak sinsin hram..Pathian in lamlo hruai hram seh!!!

  2. Sim felfai riai! ICA President cu Jeep driver tla a rak tuandah mawsi:)?
    Pathian lamhruainak in ICA cak vivo hramseh!

  3. ICA cak sin seh! Chinland Today tthangbet sin seh! Chinworld khal CNF pawl lawnglawng interview lo in Pawlkom dang tla interview tuah hna thiam ve seh…
    A Mawi Sinsin Ding Chin ram.

  4. No Than Kap says:

    Pu Ni in tawi famkim ten hmuhdan dik le tha zetzet a sim. A tha!

  5. David , U Nilian thuhla na rak sut ih lungawi tuk lawlaw.
    ICA caksin in kan miphun hrangah zuam sinsin sehlaw.

  6. ICA in a tumtah vekin lungrual nak suah pi hram seh law,,

  7. Thusuhnak le lehnak a feh tluang nasa.

  8. Thang Tin Sum says:

    San San pa, ( Ni Lian)

    Si rori. Lungrualnak le duhdawtnak kan ttul tuk.
    Healing process tuah in remdaihnak kan Chin ram ah lengter theitu si hram uh tiah thlaza ka lo cam sak.

    Pu Sum

  9. Henry vl Hmangaih says:

    Dunglam ihsin thlacamnak thawn le ti theinak phunkim thawn bawm vivo uh si

  10. Salai Kawl Lian says:

    U Nilian@ San San pa thawi hmai tawnawknak cu siar a manhla zet ual! Zohthimtlak zet asiih a nun lamtluan ihsin ram le miphun a duhdawt zia le cumi hrangih tui ni tiang khalih kekarih a can a pek theimi, neih sumpai tam zet liamih a tuan hruthro mi pawl hi IT santhar Chin mino pawlin the ziangtin ka saglet ve hai pei.

    Salai Tho Tho….na titha rohha….

  11. Pathian in thlawsuah seh

  12. Pathian hrang ah le kan mi phun hrang ah hruai tu tha si ding in thlaw suah rel cawk lo in lo pek hram seh.Amen

  13. 1988 – 1995 kar lak pawl i ti lungleng ter thluh, Salai Ni Lian Na rual Pa Sang ( U Khuang Lam ih Fa Pa) thu hla tla kan thei lo nak a rei. Na tumtah a tha tuk, ICA Pathian in lam a lo hruai sin hram seh law.

  14. Pu Ni Lian hmaitawn
    Siar a va manhla dupdo ve. ICA Chin mipi run hruai dupdo law.
    Thlacam ka lo campi.

  15. S. Ginzalian Ngaihte says:

    I’m very grateful to God for locating my long lost friend Sir NL (Lililian) after 20 years or so.I have been searching his whereabouts, and when I could not find him for a long search I even thought that he is no more with us in this world. I’m one of his colleagues in Hermon English School, Bungmual, Churachandpur, Manipur, India. I shall be very thankful to any one who could tell me his contact no. as well as his email Id.

    My Particulars:

    Name: S. Ginzalian Ngaihte
    New Lamka, Churachandpur-795128, Manipur, India.
    My Mobile No.+919862199007

  16. Pu Ni Li Lian na ngan tha tuk, siar a nuam vutvo na sa.ICA pawl nan cang vai nakah Pathian in lo um pi hram seh! Mipi lam in khal,lo bawm theinak lam a um le, kan tang vualvo lo kem.

Comments

%d bloggers like this: