I Seherh Duh Hlah (VI)

  I Seherh Duh Hlah (VI)

Cazohnak Kinlan parah cabu ti detdet ih retin Pahngak cu, “Ziangah ha maw tuletu ka ti a haal cingcing,” tiin a kaa in ttong phahin a ihkhun lu ih tidai duur cu a hei la. Tidai a rak cem ruangah tidai la dingin rawl-einak hmun coka lam pan in a feh. An cazohnak khaan le coka karlak ah lehnak tualrawn pakhat a um. Cuih tualrawn a vong thlen cun Electric meisa vaang maimai silo’n Van par ihsin a rong tle pempem mi thlapi vaang a rak si. A lu tlun a hon zoh cun Thlathuul cekci a si ti a hon hmu. A um hmunah ding cercer in vantau ciauciau in thlapi cu a zoh cuahco. Thlapi vaang cu danglam tukin a hmu. “Tuizaan ih thlapi vang cu a va danglam ve! Hi thlapi umdaan cu ka hnenih sim duhmi nei a bang. Ziang tak ha maw a si ke awww!!!” tiin khua a ruat. A mitthlam ah Suisui tei khua ih a caan hmandaan pawl pakhat hnu pakhat an rong lang cupco. Suisui thawn an tthenawk zikte zaan ih thlapi vaang tangih an umtudaan pawl a von mitthlam. A hmaisabik Suisui ih “Uu” tiih a kawh lai fangte, cuih aw thlam cu a hna ah a rong thang. Thinlung hahdam zetin a hong hni ih thlapi cu a zoh ringring lai thotho. “Cu lawmmam ih thlapi zoh phah ih hni siamsiam thei cu ziang ha a ruah ke aww..” a kiang ihsin Ceupi cun Pahngakih zohmi thlapi zoh phahin a rak ti. Pahngak cu a umdaan rem cuang hleilo’n a din kelteih dingin, “Thlapi vaang hi ka hrangah hngilh theilo mi thil tampi a um. Tutik tucan Yangon a um ih tulawng si hivek ih thlapi vaang ka hmuh. Hlanlai ih ka thuanthu pawl i von mangter” tiin a hei sawn. Ceupi cu a hni ih, “Hehe…. Rualpa, a san umlo mi kha ruat ciamco duh hlah. Ra aw, ei ttha ka nei” “Ziang ei ttha maw na neih?” “Laitlang rah” “Laitlang rah ee?” “Aw. Memu khi laitlang tlawngkai lai mi a ngaiter nasa ti aw” “Kei memu ka uar lo hokhaw” “Na uar lo khalle thlapi vaang tangih san um loih hnih cuauci hnak ai-in a ttha sawn lo ding sawm” “San um loin ka hni lo hokhaw. Nang hi maw….” “A san um lo. Na caan heu in ruat ciamco nawn hlah. Zoh hnik..” “Ziang maw ka zoh ding?” “Aww…. Kan dungih CARD group pawlih Pathian hla VCD an suah lai ih hlasak le lemcangtu nu ‘Ngunte’ timi nu kha na thei maw?” “LBC ih hlasak ttheu kha maw?” “Aw” “Ziangah maw cunu cu” “Ziang tlukin na thuhla a zingzoi ti na thei maw? Na umdaan ziangkim a lo thlingthla ih….” “Nangmai’ daan in a san umlo mi thu i ra sim hlah” “A san a um. A hmaisabik nan rak tonawkdaan kha von ruat hnik” “Cumi thu ih a san um tiih ruah i fial cun Thlapi vaang tangih ka thuhla hman a san tam deuh ding. Khah, zianghman i ra sim nawn hlah. Nunau hrongdang men bangin na Memu cu va ei aw” “Aaa sshh!!!”. Pahngak cu Ceupi ih sam cuul sumso phahih Shiik fualfo cu hnihsuak tukin a zoh hnuah cokaa lam khal feh nawnlo’n inn tlun a hong kai.

Suisui cu thabang le riahsia lungkuai mithmai thawn feh khal feh tthittha theilo’n ti hnuaphno cun A sawng a va thleng. Suite cun inn tangin a rak hngak ringring. Suisui ih lam fehdaan a hmuh veten a va tlan ih, “Suisui, ziang na cang? Thai tip maimai Camibuai kan phi thlang ding. Ziangah tuvek tiangtiang a lengah na um? Zo thawn caan nan hmang?” tiin thusuhnak tampi a va tuah. Suisui cu a tha a hon la ttenttoih, “Inn tlun kan kai ding” tiin tlu zik cuapco phahin a hon ti. An khaansung an thlen in a Thawng cu Suite a pek. Suite cu mitmu pawng hrelhrel thluh in cuih Thawng a zoh thuul, Suisui a zoh thuul. Ziangtin ttong ding ti khal a thei lohli lo. “Himi… Himi Thawng….. Thawng cu ziangah hitin a cang? Hi Thawng sungih ka beu ding hman na siang dahlo “Nangih beunak ding a silo!” i ti ringring kha! Ziang…. Ziangtin…” tiin hak cuakco phahin a hon sut. Suisui cu tidai a von in hnuah, “Suite, himi hi Uu thawn kan karlak ah thil tthalo a thleng ding ti hmuhsaknak a si pei maw?” “Haa!!!! Hmuhsaknak ee?! Kawl pawl lawngin ‘Nimik Soe’ ti an uar tuk na! Cu vek cu si lo ding ee” “A silo. Himi Thawng ka urhsun tukmi ngelcel! Cu betah a hmaisabik a hnen ihsin duhsan nei zetih thil ka ngahmi a si fawn”, “Suisui, hla tukin thu hi ruat duh hlah. Ziangtin saw hitiih a can thiam i sim hnik”, Suisui cun thicang mi ziangkim a sim hnu ah, khawsung a va feh ih Thilsia tuahnak hmunthum rori a va pan nan “A thar na lei le na hlawksawn ding” an rak ti thluh thu khal a sim bet. Suite cu Suisui ih ttong ngai in a lu a rak sut hmuthmo. Cun, “Asile, tutik tucan himi Thawng na kai ih ziangvek cekci a si ti khal na thei thluh. Na ‘Uu’ cu sim duh hlah awla a thar kan hawl sal pei cu” “A cang thei pei maw?” “Cang thei ee. Na sim cun a thin naa tuk dingih khami Thawng vek cekci kan hawl ding” tiin Suite cun ruahnak a pek. Suisui khal cutin a lung a kim ve. “Ee, Suisui, tuisun cakuat na dong. Yangon ih Cetzung pakhat ihsin a si” “Si maw? Ziangmi Cetzung?” “Khi, na lukham parah ka ret”. Suisui cu cakuat a von siar cu a mang a bang tuk! A zum khal a zum theilo. “Hihlan ih tlawng rak kai pawlah hivek ka thei dahlo” tiin a ruat buai rero nan a thinlung hrekkhat cu lungawinak in a khat.

Tlawnginn hmai tualrawn ah Pahngak le Ceupi cu Table Tenis an lek vutvo. Ceupi cun, “Rak zoh aw maw! Tuisun cu ka lo neh hrimhrim ding!” tiin a cal parih thlan hnul phahin a hon ti. Pahngak cu ti ziamziam ih hni phahin, “Haha…. Ra law ra law! Zo ha nehaw ding? Khah!” tiin thatho takih hon sawn phahin Tenis cu a hon thawi. An thlan hripi ciap thlekthlek tiang an lek. “Ko Andrew ye, phone lar de. Boihte deh” an tlawnginn kiangih phone dawr kiltu Kala nu cun a hon ko. Pahngak cu cuih aw a theih veten a thil thawilai a cawl dukdi ih, “Boihte?!” tiih a kaa in sal phahin phone dawrlam pan in a va tlan turto. “Hello…. Boihte”, “Uu,…..” “Haaa!!!!! Kamang a silo ti. Boihte rori in phone i ron ko” “Na mang si ding na duh nan maw?” “Ka mang si sehla ka tthang huam nawn lo ding” “Aw…. Sile tthang duh hlah aw maw. Khatin itthat hlunhli ko!” “Aih, boih, ka va lo ngai lawmmam ve! Na dam ti aw” “Ka dam ruangah phone ka lo ko. Tuhi Tahan ah ka um. Thaizing Mandalay kan feh dingih cutin Yangon ka ra ding ti ka ron lo sim ta” “Na thungai maw boih?” “Thungai lo cu ka lo sim ding maw?” “Haa… Ka va lungawi ve! Ziang na rak tuah ding?” “Aww….. Cetzung pakhat in zingzoinak nei dingin in ko ih thlakhat zikte ka rak um ding” “Si maw? Cucu khuitawk ah na thleng ding?” “Cercer ih nute hnenah ka thleng ding. Sile maw..” “Um hrih boih, Car gate in ka ra lo hmuak ding. Ziangtik cekci na rak thleng ding?” “A poi lo. Ka thleng tik ah ka lo sim dingih ka thlen inn ah ra sawn aw” “Na thlen lai rori lo hmuak ka duh nan si. Si ee, nangmah ih rem ti dandan si ko.” “Kha, tuihnu nihnih ah kan tongaw ding maw Uu” “Awle. Ka rak lo hngak nasa ka Boihte”. Phone an thlak veten Pahngak cu zum aw thei loin a biang a bengaw ciamco ta. A va tlan turtoih “Ceupi! Ceupi! I rak thong ta hnik!” “Ziang na cang saw?” “I thongaw ka lo ti!” “Phup!!!” Ceupi cun ziangruangah ti thei cuang si loin Pahngak ih Cal padar ah a hei thong. Pahngak cu a cal dom phahin, “Kamang a silo. Kamang a silo!!” tiih au phahin khaan sung a vong lut.

Yangon Mawtaw colhnak hmunpi ahcun minung cu a phuulin an phuul luailo. Vate ai men bangih awn-au hluahhlo lakah Suisui cu a lung a hnok thluh. A thilri dip thawn khawdang tangih a hoi rero laiah, “Hey….. My Queen” tiih aw hlim takih khawh aw a thei. A hei zoh cuh! “Hmmm!!!!!!! Hipa hnen ihsin ka luat theilo taktak ding maw si aww” ti ruatin a thawpi a thaw. “Ziangah saw nang cu hitawk lamlam ih na um?” tiin Suisui cun a hei sut. Van Nei Lian cu hni serser phahin, “Na thlennak tinkim ka thleng ding ka lo ti cia kha” ti phahin Suisui ih thilri cu a lakih Mawtaw fate pakhat sungah a hei ret. Suisui cu a mang a bang sinsin. A dinnak hmun ahcun a ding cuahco lai. “Khatin maw na din ringring ding? Ra hen,” tiin Van Nei Lian cun Suisui cu a hei auh ih Suisui khal hril dingdang neilo tiin paihlo cingten a ke cu a hei kar. Mawtaw sung an luhngah in a mawngtu pa cun a fehpi hai. Van Nei Lian cu nuam aw tukin a hni hiamhiam. Suisui a zoh phah, mawtaw thlalang ihsin lenglam a cuan phah. Suisui cu mawtaw sangka tlangah a kiu ret tahratin a kut zaphahin a cal dom phahin khua a ruat. Thil umdaan hi a theithiam lo tuk! Kawhnak ca sungah lamziin man ziangkim zungih tumsak thluh ding ti a si. Yangon a thlen tikah zung hnattuan pawlih hmuah ding ti a si fawn. A tuih a thiltonmi thawn a von khaikhin ih thilcangmi hi mak a ti in a tuk lehlam a sum! “Hipa hin…… Hipa hin….. Aiii….. A cang theilo! A cang theilo!” tiin a lu a thing ciamco.  A thuruahmi cun a lung a ti buai sinsin. A zaang a rong ttim suarso! Van Nei Lian ih mithmai umdaan pawl a hei zoh. A rak sim dahmi, “Kanu hi Shan le Tuluk kahpia a si ih kanui’ lam ihsin Cetzung le Companny nei Yangon ah an um teptep” timi a von mang suak. Cu veten, “Van Nei Lian!” tiin naa takin a hong au. Mawtaw mawngpa a thir dukdi ih an mawtaw tomi cu “pudut!” tiin a nolaw dutdi! Van Nei Lian cu zianghman poisa lo takin Suisui a hei zoh ih, “My Queen hi cu aww….. Na thinsup hnik ee. Lamziin laifang ah tla in rilhpi ding hokhaw” tiin neem takin a hei ti. Suisui cu mawtaw mawngpa ih mit phaw kelkel ih a ron zoh ruangah phuhrung aw tuk mithmai thawn “Sorry” ti lawngin a hei sawnsal. Tawkfang an fehin, “Ziangmi tumtahnak thawn i ko ti ka theilo nan na thuthu in ka um dingah cun ruat hrimhrim hlah maw! Ka thlen duhnak hmun ah ka thleng ding. Cumi cu i kham theilo!” tiin aw rum nawnin Suisui cun a hon ti sal. A thuduhsam vekin Cercer ih Nute(a nuih nau) hnenah a va thleng. “Cawl huahhi hrih awla hmaizarh tlawngkai nikhat ihsin Hmawbi ah kan lo hruai ding” tiin Van Nei Lian cun a von ti. Suisui cu zianghman ttong loin a to sutsi. Van Nei Lian cun Suisui ih bangh mithmai a zohin a zaang vek a fak siih biak tam ding khal ngam nawn loin a fehsan.

Zaanlam kau a si in Suisui cu a thilri pawl a phorh thluh ih Pahngak hrang hrimhrim ih a phurhmi ‘Turbung’ a von hmuh in, “Nu Sung, Bazar kan feh pei cu. Voksa ka lei duh” tiin a hei ti. Nu Sung cun Suisui ih ‘Tubung hnah’ zoh phahin, “Suisui, keimahten ka va lei thei. Rak cawl huahhi aw. Fanu rong tlawng tete keimah ka lo do ding. Nang Turbung in sum sisi”. “A silo. Nu sung nangih do ding ci a silo” “Ziangah maw?” “Ka banglo hokhaw. Kan feh tlang ding maw” tiin el theihlo roriin a ti ruangah Nu Sung khal a lungkim ve. Bazar an feh phah ah Suisui cun Pahngak a hei phone. Suisui cu zanriah timlam in a sa detdet.

Pahngak cu hlawptlo tak le thatho takin thlalang hmai ah a bih aw rero. A hnipuan hruk dingmi a ihkhun parah a ret liailiai. Ceupi cu thlalang hmai ih heraw rero Pahngak a zoh ah a khawruah a har. Ihkhun parih a hnipuan retmi pawl a zoh sinsin cun ziang a tuahtum ti a thei mai. “Hey! Cu tluk lawmmam cu thlalang tla a kuai pang ding ka phang” tiin tihrim hnih ih hni surso phahin a von ti. Pahngak cu a ra her aw ih, “Ceupi, khuimi thawn ka mil deuh i zoh hnik!” tiin a kerte hruk dingmi cu thlirin a hei sut. Ceupi cu a hnihsuak tuk lawmmam ih, “Na mawhlo! Keikhal ka rak si dah ko. A khui pohkhal na mil ttheh” a rak ti. Pahngak cu nuam aw hiamhiam in huihuuk hurho phahin an tlawng kulhnak lenglam cu a hei pan. Ceupi cun Pahngak ih hlimnak mithmai zohih a hlimnak ttawmpi lam loin a thinlungten tuarnak te a rak nei. Cuih tuarnak te cu zohman theihter a duhloih si hram hlahseh ti thinlung sawn nei in thla a cam sak. Bus parah cun Suisui ih ttongfang pawl ruatin a hni phah vivo. “Uu, na duh tuk dingmi rawl ka lo suansak. No( ). 5floor……….street ah zanriah ei dingin ra tengteng aw maw”. A kiangkap minung pawlin ziangtin an hmu ti khal ruat nawn loin a mahte hlim in a hlim.

“kiling…..ling. .ling…” Nu Sung cu an inn hri dirh thawm a theihin a vong tlan ih inn tangah mipa pakhat a von hmu. “Suisui, na milai pa a si maw rong zoh hnik” tiin a hon auh. Suisui cu hnakphek phom in a sa hiamhiam. Kampar ih a tihaang suanmi hong phuul luailo cu a kut thawn a sin hon ong khaw a sa tukih “Klunggggg!!!!!” tiin a beelsin cu a tla. Nu Sung cu Suisui a ra suak dahlo awloksong in coka ah a hong lutsal. Suisui ih umdaan a zohih a hnihsuak tuk lawmmam! “Hmmm!!! Ka fanu, na duhmi pa hrangah hitluk na zuam in na teimak ka hmuhin ‘duhdawtnak’ timi hi mak ka ti sinsin” “Hehee…. Nu Sung, nunau cu maw rawlsuan kan thiam rori a thupi si. Nunau hi ‘hrongdang'(ei-kaa duhtuk) an ti ttheu nan a taktak ahcun mipa si hrongdang sawn” “Si tuk lawlaw lo maw ee. Hlanlai ah tla le nupi an rak hawlah an hnakphek phom daan sisi an rak zoh. Kanmah laimi lawng khal silo. Tuluk pawl khal nupi an hawlah rawlsuan thiam rori si an hril. Curuangah annih hlanlai san ahcun duhdawtnak timi rak thupit loin an rawlsuan sawn an rak thupit hon si” “Nu Sung, ziangah saw Tuluk pawl ih thuhla lamlam an nupi hawldaan lamlam na theih?” “Aih, inntang ah mipa pakhat a ding. Na milai a si maw va zoh aw” “Cu ti maw? Aw…” tiin Suisui cu zamrang takin a vong tlan turto.

“Ummm!!!!!! Nan inn rim cu a va hmui lawmmam em!” tiin Pahngak cun mitsing ih a hnaar in thilrim hnuuk phahin a hon ti. Nu Sung cu mileeng khaanah a va suakih Pahngak a hmuhcun a lungawi tuk ti cu a mithmai ah a lang cih. “Aiaiai……. Suisui hi tuizing rori a rong thlengmi cawl khal cawl duhlo roriin rawlsuan ah a phawkhai aw ciamco hokhaw. Hibang nupi fel na neih ding cu aa…” “Nu Sung!” Suisui cun a mit a hei sin. Pahngak in, “Si rori Nu Sung, curuangah panteh amah rori ka hngahnak san. Heee….. Ka hmin hi hngak a si ruangah reituk i hngakter tum sisi hi” “Hahaaa” “Haaahaa” tiin an hong hni hluarhlo. “Khah le, rawl ei tim kan tuah kei cu” tiin Nu Sung in a von sawm hai ih rawl ei dingin Kinlan an hon hung. Kinlan parih hmeh pawl a zohin Pahngak cu a lunghmui tuk! Vaksa le Turbung laisuan ih suankop, hnakphek le Thing kawlhaang phom, behrum le Ai thiing kio, meteki hnah bawl tipawl an von hung liailiai. “Boihte, hipawl hmuahhmuah hi nangmai’ suan maw an si?” “Ih…” Nu Sung in, “A ziang! Ka bawm teh duh hrimhrim a siaklo! Amahte rori a suang”  tiin a rak sawn lohli. Pahngak cu a lungawi daan ziangtin sim thiam ding silo. A mithmai cu eng hemhem in, “Wooaaaw!!! Nupi felte rori si ka neih ding” tiin a za  bengin Suisui cu a hei melh.

Zaanriah an von khawhin a lengah thlithiang hawp phah kung tiin an suak. ‘Kannaa’ timi tiva kapah an va feh ih tikap ih tohkham ahcun an to. Thli a vir phah ih um nuam tawktak a si. Tikap cekci cu mei a thim hmuphmi ih kawlpawl thil ei ding zuar pawlih mei vanmi lawng a tle. Tiva raalkhat lam cu tle serser in zoh a mawi nasa. Cuih tikap ahcun Pahngak le Suisui cu an lungtur ngai aw phahin an to thliangthli. Pahngak cun, “Boihte, ka va lo ngai lawmmam ve! Nangteh in ngai ve maw?” tiin Suisui ih mitmu rori ah zohin a von sut. Suisui cu a lu a sut ih, “Uu…” tiin hnoh takin Pahngak ih liang parah a lu a hei ret. Pahngak cun duat takin Suisui ih lu cu a zuut sak ziahzo. Tawkfang an to in Pahngak cu a ttongsal ih, “Ka boihte, keicun vei tampi ‘Ka Lo Duh’ tiin ka lo sim ringring nan nangcun veikhat te hman in sim hrihlo. In sim thlang lo ding maw?” tiin a von sut sal. Suisui cun ol tluang takin, “Ka lo duh le duhlo cu na thei ko si. Ka lo duhlo sehla hitluk tiangtiang thil ka tuah ding maw? Kaa ih sim tengteng a ttul na ti lai maw?” tiin a hon sut bet. “Ttul ee, na kaa rori ih “Uu, Ka Lo Duh” i von ti ding lai ka hngakhlap tuk” “Ka thinlung cu na thei ko si. Sim ttul lo” “Aw, na ti theilo mi thil zianghman tuah tengteng dingin ka lo hnek dahlo ding ka lo ti zo kha. Ka hna phuurte rori ih i sim dingni ka hngak cuahco hrih ko ding. Rei tuk cu i hngakter hlah aw maw”, “Immm….. Uu, ka tlung zik ahcun ka lo biakta man lo tla a si thei. Na thinheng hlah aw maw” “Si ee. Ka lo theithiam tuk hokhaw ka boihte” tiin ti phahin Suisui ih lu parih sam cu duat takin a von hnam. “Uu, mikeu an um. Kan tlung ding” “Aw singai, tlung kunguh. Sun na bang bang thawn rawl thawtak le i suansak bet. Boih, na rawlsuan mi nitin ei ding ka va duh ve” “Hihi…. Thungai maw?” “Thungai ee. Tu zoh hnik aw. Ka pum hi “savun kuai thiamhlah!” an ti ttheu ruangah a tuhi a kuailo maimai. Na hmeh phom thawtdaan hrimhrim kha awww….” “Awle, ka lo suansak tuk ding maw. Khah, tu cu kan tlung ding” “Aw” tiin an kut kai awin tlun inn lam an pan.

“Nu Sung, zangfahten thaisun rori ah Mawtaw toca ngah thei dingin i bawm aw”. Suisui cu a timtuah phahin Nu Sung cu a dil. Cuih aw a theihin Nu Sung cu a cangan lai cafung a thlak dukdi ih Suisui lam hoi in, “Ziangah? Ziangvek ruahnak saw na neih? Tlawngkai nikhat sun Hmawbi na feh ding kha” “Nu Sung, na theilo. Mi pakhat in thang i kam mi si. Curuangah a rang thei bikin ka tlung ttul. I bawm theilo ding a sikhalle ka tlung ding ka ti hnuhnu cu ka tlung simai!” “Aiha….. Nang le Cercer tlukih lungruh minung kelteh aww…..” tiin Nu Sung cu a cal a dom. Zing khua a vang maw vanglo tiah Van Nei Lian cu a ra thleng ngaingai. Suisui cun tthaten a rak biakih neel zetin an kom aw. “My Queen, khuitawk ha feh na duh? Na duhnak hmun poh kan lo hruai ding” tiin awkam zaang takin a sut. Suisui cu a hni ih, “A poilo. Nu Sungih hnattuannak ah ka hei thlun ta ding” “Ziangah maw?” “Ka zoh duh. A hnattuannak ih thil umdaan pawl theih tla ka duh” “Aw…. Cuti asile cu na thu si ko” tiin hnek nawnlo’n Van Nei Lian cu daiten a um. Van Nei Lian a tlun veten Suisui cu a dip a la ih cutin Tlangleng colhnak hmunpi lam a hei pan. Van Nei Lian cu Suisui ih umdaan a von mitthlam salih “Aa….. A si hrihlo! Hinu hi pakhat khat a tuah ko ding” tiin ttong phahin Inlia Kaanbawng ihsin Nu Sung umnak lam pan in a feh kirsal. A zum vek cekci in Suisui cu a rak um nawnlo. Nu Sung khal a um fawnlo. A thinheng tukah lamzin kapih ‘tidai thlum'(a Aye) duursia cu a tha neihhmuah thawn a sit hlunghlo!

Thlakhat zikte Yangon ih um ding timi nithum nak ih Falam hong thlengsal cu Suisui Nu le Pa cu an mangbang tuk! Asinan khatlam ah an lungawi tuk lala. A pa in, “Suisui, na hong tlun lohli cu thil remcang tak a si” “Kapa, ziangtu maw remcang?” “Aww….. Na colh von suah ta awla neta ah thu kan rel tlang ke” tiin a von let. Zaan a kim in Suisui le a nu le pa cu hmunkhat ah to in thu an rel tlang. “Ziangtin ee?! Ka duhlo! Tlawng ka ttheh ta tengteng ding!” tiin Suisui cu a hong au hlukhli. A pa cun, “Suisui, na Uu Thangte in khatawk ih tlawng pehbet dingin a lo ti si” “Asi khalle ka duh cuanglo!” tiin a tonak ihsin a hong ding. Cu zawng cekci ah an sangka ah mi pahnih an rong lut. Tthuma ih amah ra tongtu tei pahnih an si. “Untie!” tiin a hon ko. Thil umdaan theithiam lo takin Suisui cun a zoh thlun vivo hai. Cun, “Untie, kan dung in ra tong kha himi ding ruahsannak thawn maw in ra ton?” tiin a hon sut. Annih khalin an lu an rak sut. “Suisui, na nauhak tetlai ihsin ka fanu vek rori in ka rak lo zoh. Cun, na Uu Thangte khalin a lo duh taktak ih na thu lawnglawng hla bang in sakhnawh. Curuangah khalam ih na tlawngkai pehzawm thei dingin zamrangten na feh a ttul sawn” tiin Nupi nu cun a hon sim. Suisui cu reilote sung a vong ngui hnuah, “Ka ruat ta ding” tilawng a hon ttong.

Zaanvar khua a ruat. A itthat theilo. Ziangruangah a Nu le Pa in hitluk kum no takih ramdang pasal nei dingin an kuat tum timi a ruatsuak theilo. A ruat deuhdeuh a theilo deuhdeuh. Zing khua a van veten Suisui cu a tim a tuah ih, “Khua ah Nini hnen ka va tlung ding” tiin a poksuak. An khua a va thlengih danglam tukin a va hmu. Biakinn kimvel le Tlawnginn kimvel ahcun pangpar phunkim an khat. An khua laifang ih thingkung pawl khal an rak tumtuk man. Asinan a hrang ahcun nehnang tthing lawnglawng a si thlang. Tualleng tlawng a hong haalih zirhtu saya pawl cu an rak dang ttheh thlang. Ai Thang Vel peipawk a vong zohih a tthing riahriah fawn. Pastor inn a hon zohih a thinlung le a hnathlam ahcun, “Percel in ramdang ah” tilawng a si thlang. Khuitawk a fehnak kipah a mitthli tlatertu hmun le ram lawngin a hmu thlang. “Nini, ziangruang bikah ti na thei ve maw?” tiin papi cawng puan thawn tuamaw tthenttheng a Ni cu a hei sut. A Ni cun Suisui tui kumhnihnak tlawng a kai hi leiba thawn roriih an kaih thu a sim. Cun Thangte thawn pumkhat si dingih Thangte Ni (Untie) thawn hihlan kum reipi ihsin an rak lungkim cia thupawl a sim thluh. A netabik ah, “Fanu te, na nu le pa le na Ni kei in tlawng kan lo ret thei nawn tumlo. A lengih phi dingin cun kan lo tlin thei ko. Asinan a tuih na tlawngkai mi cu kan lo tlin thei nawnlo rori a si ko. Keimah ka rak santlailo tuk si maw kafa!” tiin ttapsuur in a hon ti. Suisui cu a thluak a buai sinsin. “Ka duhmi maw ka sunmang ka hrilsawn ding?” tiin a ruatbuai.

An khua thlakhat a va um hnuah thuthluknak fumfe tuahin falam ah a kirsal. An sungza khal Suisui ih thu bawhcatnak an theihin an lungawi tuk cio. Suisui cun, “Zohman theihter ka duh hrihlo. Falam ah pasal um loih puai tuah khal ka duhlo. Curuangah Bangkok ih kutsihnak nei dingin nan lungkim asile ka feh ding” tiin thu a suah. Thangte khalcun cuih thu cu a lungkim ve. Cutin Yangon ah Passport tuah dingin an suk thla. Yangon a thlen veten Email a ongih a hmuh dukdi mi cu! “Mopuai Sawmnak” ti thu a si. A rualnu Mawmawi hnen in a si. Van tthatah Mawmawi khal mail a rak to veih Gtalk thawn an biakaw. Mawmawi cun Delhi ih Pasal a neih ding thu, a pasal ding cu a rei hlanih Australia feh ding a si thu pawl kimcangten a sim thluh. Cucun Suisui cu a dinhmun ah a lungawi ve tuk thlang. “Mawimawi, Kimte teh?” tiin a hon sutih “Anih a nuih naupa in Norway in a rak ko ih a feh cing mai thei” tiin Mawmawi cun a ron let. Suisui cu a thatho deuhdeuh. Cutin Passport zungah an von fehih a ttulmi thil ziangkim an tuah fel thluh. Thangte thawn an biakawk tinten tlawngkai a peh taktak ding le pehlo ding thu lawnglawng a sut. Thangte cun a peh taktak dingtiin thukamnak a rak tuah ringring.

Yangon a umnak zarhkhat a si thlangcun a thinlung in Pahngak lawnglawng a hlam thlang. A ngai duahdo in a thei aw. Khua a hong vang Pahngak ton lawnglawng a caak. Pahngak hnenih ziangthu hman a simlo hi a rem ti thiam nawnlo. Zaan a it nan itthat ti a nei theilo. Pahngak a ngai tuk nakah rawl ei hman a paih nawnlo. Tuizaan cu thu thuuk takin a ruat. “Ziang a sikhalle, ka tuar thei nawnlo rori simai. “Uu, a tu rori ah kut kan sih ding” tiin ka va dil ding!” tiin thu a ruatcat. Can tawk can ti thinlung a nei thlang.

Biakinn sung cu mipi an khat ttheptthep! Fala pahnih cun Sathau far an vangih Pahngak le a rualpi cu ti niahno ten Biakinn sung cu an vong lut. Pahngak cu lungtur rang dukdo phahin a ding. Mopuan raang ziarziar thawn Suisui cu a mawidaan zoh khop theihlo cu a paih kut kaiin Biakinn sung a rong lut thlang. Zaithiam pawlin zaihla thawn an rak awi. Biakinn hmailam donsin an thlenin A pa cun Suisui ih kut cu Pastor paih kutah a ap. Pastor pa cun a von kai ih Pahngak ih kut thawn a von kom. Cu hnuah Pahngak cun Suisui ih mopuan lukhuh ong dingin a kut a hon suah. Suisui cu a ke karkhat dungah siipin a lu a thing ciamco. Rinlopin a her vukvi ih biakinn lenglam ah a tlansuak. Pahngak cu, “Suisui!!!!! Suisui!!!!” tiin a hong au cuh! A kiangih it Ceupi cu a tthang dikdi! “Ziang na cang? Mangsia na man maw si?” “Aw… Zianghman silo, it sal aw” tiin a hei ti. Caanher a von zoh ih zinglam 5:00am a rak si. “Khawvang zawngih mang cu a dik duh tak an ti. Thaihlung mang si pang pei maw?!!!” tiin khua a ruat. Phone dawr le khuitawk hman an ong hrih fawnlo!

Tuisun cu  ‘Shanram’ saklam ih um ‘Phekhung’ kiangih khawte pakhat ah Camping nei dingin a rualpa ‘Saisinnaw’ in a rak sawmmi cu feh taktak ding ni a si. Cuih khua cu inn khi 100 ttha an um ih zumtu khristian hi inn hra lawng an si. Cumi hmunih rawngbawl dingin a hleice ih kawhnak a rak donnak hi thlakhat lai a rei zo. A thilken ding ziangtinkim a tuah thluh hnuah phonedawr lam pan in a feh. Tthuma ah phone a ko. Khalam ihsin an rak sawndaan a theihin a mangbang tuk! “Cuvek hmin nei hitawk ah a um lo!” ti lawnglawng a si thlang. “Ziangah Suisui hi tlawng a kailo taktak maw si aww??” tiin a ruat buai. Falam a phone nan line a tthalo ih a ko ngah thei fawnlo. Cutin Mawtaw colhnak hmunpi an feh a cut duahdo tiang zohman a be ngah theilo. “Ka boihte hi ziang a cang sipei??” tiih bangheek zet cingin a khualtlawn cu a ke a von kar ttan. A rualpi minung pahnih thawn an tlawnginn kulhnak leng an hon lan ih Bus no. (45) par an hong lut zawng cekci ah Suisui cu Taxi thawn an tlawnginn kulhsung a vong lut.

Zarhthum hnu ah Pahngak cu Yangon a  thlengsal. Tlawng a pit zo ruangah Khawsung ih an sungkhat tei hnenah a um. Ceupi cu thlan sa bekbek in a ra ih, “Aw! Pahngak, nan rawngbawl cu nan tluang maw?” “Aw, nanmai’ thlacam saknak zarah Pathian thlarau Thianghlim cangvaihnak kan dong nasa. A hlim khal kan hlim. Khrihah unau thar tete khal kam tong hokhaw” “Aw.. Cucu a lungawi um zet si. Ee, thudang ah tuhi na man maw?” “Aw. Ziangah maw?” an mit piah awin inntang an ttum. Ceupi cun Pahngak le an feh hnu reilote ih Suisui a rat thu le a ratnak san pawl a sim thluh. Cu hnu ah mizan rori ah a ra salih “himi ca i tan” tiin cakuat pakhat cu Pahngak ih kut ah a von pek. Cakuat sung ahcun,

“1 April 2007, 12:00pm”

ti cekci lawng a ngan aw. Pahngak cu cuih ca a siar thluhin a lungthin hmuahhmuah parhzam thluhin a thei aw. A thihri hmuahhmuah an rong hit cuaico! A ttang pitin thawthat dinghman neilo khopin a thaw a sam. A awm khal ttheltthel in a ttang a cum! “Ka Boihte!!!!!!!” tiin thawsuak in a hong au.

Ca sungih nganmi ni, tikcu caan cekci ah Pahngak cu ‘Kaanaa’ tiva lam panin afeh. Tikap a thlen zik cun a tha a tthia thluh! A ke khal a khai thei nawnlo! A mi hmuhmi cun a tha hmuahhmuah a ron lak thluh. Cutin feh khal feh thei nawnlo khopih a tha a tthia ciamco ruangah ziinkap dawr ah a to. Suisui cu a ngelih Nazi a von zoh. 1:00pm a ti cuahco thlang cun a dipte sungih cakuat pakhatte a von suah ih zaankhat zaan ih an totlangnak tohkham parah a von ret. A mitin khawkip ramkip ah mi pakhat hawl phahin a her aw rero nan zohman a hmuhlo cun seherh zetmi nei ti theihtheih fahran in nuamnaiten a ke cu a hon khai. Ti tthiahttho ten a von feh. Pahngak cu cuih ca a va la ih a von siar.

“Uu,

Ka kaa rori ih ka sim dingmi na hngah ringring mi ttongfang lo sim dingin caan tampi a hmangheu zo. Vei tampi na hnen ka ra. Asinan cuih ttongfang te lo simtu dingih ruah ka rak silo a si bik ding. Ziang ti ttha. Ka thinlung thlalang na si.

Boihte”

Pahngak cu a lung a rong mit cuico! A tha khal a tthia deuhdeuh. A ttang domin tohkham parah a vong to cutci! A mit khal a rau thluhin a thei aw. Caan tawkfang hnuah a ding hlukhli ih Suisui ke fehnak lam thlun in a va tlan ciamco. Suisui cu Taxi sung a lut hlavaang in a hei cu. Zamrangten a hei dawi ih hmun pakhat ah a cawl dukdi. Pahngak cu lungawi tukin a hni. Suisui ih Thilri pawl hnuahhmuah  Taxi sungah an ron san thluh. Thangte ih Ni le Rang khal Taxi sung an lut. Suisui cu Taxi sangkaa a von ong zik zawng cekci ah Pahngakin a kut a hei kai ih, “Boihte!” tiin a von ko. Suisui cu a her aw ih Pahngak ih umdaan a zoh ah a thinlai muril a sun tuk! Zianghman ttong loin an zoh aw cuahco. “Suisui, kan tlai tuk ding kha aw. 3:00pm Vanzam sikha. Zamrang aw!” tiin mawtaw sungin A Ni cun a hon auh. Pahngak cun a hei naih ih a kutah ca pakhat a pek hnuah, “I Seherh Duh Hlah Maw Ka boihte. Feh ko aw.” tiin a hna phuurte ah a von sim. Suisui cu Kham theih loih rong luang a biangki no parih mitthli dai kiahko cu a kutin a hon hnulih, “Sa…. Sa….. Saya Hngak, in ra thlah ih ka lungawi maw” tiin a hon ti.

Vanzam sung an thlen in Suisui cu Cakuat a von siar.

“Boihte,

Kan cung Mangbawi hnenah ka dillo a silo. Ka dil rero cingin nang le kei lungkhat par tlantlang ding rem in rak ruatlo hnu cu ziang kan ti ttha. Na sunmang cu na sunmang a si. Mi tampi ih rinsan le suanvawr mi si dingin zuam hram aw. Hlan kan pipu pawlih “Kei ih fapa neih le pulhtlung” an timi cu kahrangah cun, “Kei ih fala neih le percel tlung!” tiin hlabang ka ron sak ko ding. Thinnuam ten va feh aw. Bawipai’ malsawm sunglawi fanau cawiin thlawsuah hmu hram aw tiin thla za ka lo camsak.

A netabik ih ka lo cah duhmi cu “I Seherh Duh Hlah” timi ttongkam a si. Nangcun thlahnih khat hrangah “I Seherh Duh Hlah” timi ttongfang na hmang. Asinan Kei cun hilei kan sankhat nunsung hrang,I Seherh loin feh ko aw tiin ka lo cah.

Damten…..

Na Uu,
Andrew Hngak.”

Cakuat a von siar ttheh zawngah cun a cahnah hmuahhmuah cu a mitthli ah a rak zupral thluh. A ttang dom in mitthli thawn, “Uu, ka thinlung cu ka bum thei lo lawlaw nan…” tiin….

Pahngak cu Inlia Kanbawng  tikap ih a din rero laiah “Ruii!!!!!!” a lu tlunah Vanzam a rong zuang dumdo! A vantau in a hon zohih, “Boihte!!!!! Suisui!!!!! I Seherh loin thinnuamten va feh aw maw!!!!” tiin a aw neihhmuah suahin a kut pahnih in a kaa hupin a au. A au a au rualin a kur a kur vivoih tikap ahcun a khuk a von bilh sutsi. Lungkuai thinlung parhzam thluhin a ttang a domih, “Feh ko aw…. Feh ko aw….” ti phah rero in…….

By – Mai Dai Dim

Hminsin: :Himi “I Seherh Duh Hlah” timi thulu thawn rori nunthuleng ngansuak dingih a thu bungrua i petu ‘Salai Tittaw’ le ka nunthuleng a thok ihsin a cemtiang i rak siarsaktu CT lengtu nan zate parah Sim cawklo lungawinak ka nei a si ti ka sim duh. Ka lungawi.

(Visited 87 times, 1 visits today)

Comments

comments

One Comment

  1. A thok ih sin a cemtiang ka rak siar ringring… a cemnet nak ka vun siar cu awww… I seherh duh hlah ti rori si ko ka tuar lo nasa a cang rero mi tla si..a thatuk hmailam ah tla zuam sinsin aw

Comments

%d bloggers like this: