I Seherh Duh Hlah (V)

I Seherh Duh Hlah (V)

 

Chinland Today ih Nunthuleng a pehzawm ih ngantu Mai Mai Dai Dim ih ngan rero laimi I Seherh Duh Hlah (V) cu siar theih in a um sal. Pehzawm ih rak siar theutupawl hnenah lungawinak tampi kan nei.

____________________

Suisui cu a dinnak hmun ah thingbul men bang canglo rori ih a dinnak hi ziangtluk a rei ti khal a theilo. “Suisui! Ziangah khatin na ding rero? Ruah a sur hi na theilo maw???!”. Suite cun thinphang au-aw thawn Suisui cu a ko. Cumi lawngin Suisui cu a lung a hong fimih khawdang a hon tang. Ruahpi a rak sur thlurthlo! A bag sungih Thawng la dingin a kutin a von dap. Cun, a kut ih Pangpar sen hlerhli tomkhat cu a von hmu. A thin a hong so ciamcoih, “Nangmah ruangah si! Nangmah ruangah si!” tiin cuih pangpar cu leilung parah a vuak parh thluh. Suite cun kamkhat hman ttongloin daite’n a rak zoh ringring. Pangpar ih a par cu an thlong thluh. A kung khal a khiah seksek hnu in mitkem le huatnak ih khat mithmai thawn a vuak parh thluh zomi pangpar ttek zelzel cu a met riairiai. A haacang rial ttuahtto phahin, “Nangmah vek mi thinlung tthalo lawmmam ka rak lo ton hi cu awww! Mi vansia rori ah ka ruat aw! Asinan ka lamziin ziangtluk i kham a sikhalle suahnak ong ka hawl thotho ding! Rak zoh aw!” tiin cuih pangpar cu a camriam suahso! “Suisui, khua a thim ngaingai thlang hi. Na ciap thluh zo. Ra aw!” tiin Suite cun Suisui ih ban in a hon dirih a tlun pi.

Tahan Bazar kiangkap ih mi awn-aw thawm cu Pahngak ih hna sung ahcun, “My Queen! My Queen!” ti hlir in a thang. Ruahpi suur lakah Thawng khum loih lamziin parih  feh rero Pahngak cu ‘mi aa’ men bangin a hmur phun supso’n “My Queen. My Queen” tiin a sal phah vivo. “Andrew!!!!!!” a hna rii rori ah na takih kawh aw a theihin a thir dukdi! A sir a von zoh cu, ZTC B.Th 1st year a kai lai ih M.Div rak kai tupa  ‘Filip’ timi pa a rak si. Pahngak cu a kut thawn a hna kua phit phahin Filip cu a zoh ih, “Ziangah? Ziangtin?” tiin a von sut. Filip cun, “Cuih thusuhnak cu keimai’ suh ding rori a si. Ziangah ruahsuur lakah Thawng khum loin na vaak? Vei nga tiang ka lo ko ih na thei fawn lo! Ziang thu lawmmam saw na ruah?” tiin a hon let. Pahngak cu a ningzak ah a hmai a hon cuul cu ruah ti a rak ciap thliakthliak zo. Ningzah hnih in a von hnihsan ih, “Hihii….. Zianghman ruat lo ee. Khui na feh tum?” “Aw…. Thaizing Mandalay ka feh zikih Mawtaw toca (ticket)ka va lei ta.” “Ee, keikhal ka feh ve ding si. Ziang Mawtaw ha na thlun tum?” “Tthun Ttauh” “Kan bang aw” “Hahaaa..” “Haaahaa…” tiin hni phahin an kut tum in an thawngaw.

Zaan ttim a ti cuahco thlang nan itthat theilo’n Pahngak cu a sir le sir a her rero. “A Hngak, na fala nuih thuhla hi awm mawi tawk cu a thei hokhaw. Tthaten ruatsal hnik aw. Suisui thawn innsang din taktak na tum maw? Kei na nu cun na nupi ding cu nangmah hnattuan bawm in na kiangnai ih a um ringring theitu ding lawng si sehla ka lo duhsak” “Kanu, Suisui khal kan neihawk cun ka kiangah a um thotho ding si. Ziangah maw na thinhar in na ruah ciamco?” “Kafa, Suisui hi amah ka zoh nakin a thinlung umdaan ding cu ka sim thei” “Ziangtin maw?” “Ka zohnak ah anih cu a mai’ thu rori duh pawl a si ding. Ziangti dangih thinlung siava a nei ka ti duhnak sisawn loin a tumtahmi hlawhtling ko rori zuam ttentto duh a si ding. Cun, tui’ a tlawngkaimi hi ruat awla, kumthum a kai hnuah Kumhnih Qualified a pehbet locun hna ttuan a ngah thei ding fawnlo. Tuihnu kum nga sung rori na hngak cuahco hrih ding maw?” “Ka hmin rori ih Pahngak a sisi. Heeehee…” “Thungai thu hokhaw ka rel. Ka fapa, si ee, na hngak thei tiin kan ti mai ding. Asile nan neihawk hnu ah anih cu a hnattuan ah a buai ciamco dingih innsung sang a ngaihsak lo le teh?” “Cuvek minung a si zik lo. Kanu, na thinhar in ruat ciamco duh hlah. Suisui cu mifel te hokhaw a si ding” “Nan neihawk hnuih nan buai ciamco ding ai-cun ngunngaih takih ruah a ttha tiah hokhaw” tiih a feh hlanteih a nu thawi an thurel le a nuih ttong aw kam pawl a hnathlam ah an rong thang ciamco sal. “Kanui’ ti vekin lungkhat par tlantlang theilo ding hrimhrim teh kan si pang pei maw???” tiin amah le amah a sut aw hnukhno. A lu a hon cuul ih, “Aa…. Si lamlam hlah! Ka boihte ih mithmai umdaan kha!” tiin an tthen awk hlan teih an umdaan a von mitthlam sal hnuah, “Si! Ka boihte cu kahrang a rinum ko si. Thaizing ka feh hlanah tthaten ka hei biak ta ding. A suahcam rori ah a thin ka har ter ka va tthalo ve!” tiin a mahte’n thiamlo a coh aw ciamco.

“Suisui, heh hi Sii ei aw. Mizaan ruah na tuarnak ah dai na ngah si kha!” tiin Suite cun Sii mum le tidai a von pek. Suisui cu a taksa vetvet in a hahthiau ciamco. A khuh khalle a khuh hrumhro. Sii a hon ei thluhin a cabu pawl cu a von tuahih tlawng feh a tum. “Suisui, hitluk na damlo cingin tlawng na kai tum lai thotho maw? Khuan ka lo dilsak ding. Um ko aw,” “Tho theilo ka silo hnuhnu cu ka feh ko ding”  tiin a feh thotho. Sun tlawng ttumah Suisui cu zianghman a ei paihlo. A cal dom in a to ngiaungi. “My Queen, ziang na cang? Na damlo maw?” tiin Van Nei Lian cun Suisui ih cal cu a von tham. Suisui cu a thin a hong so hluahhlo. A tha neih hmuah suahin a hon met ruairoih, “Si! Ka dam lo! Ka mithmuh ih na um sung cu ka dam dahlo ding. Curuangah ka dam ding na duh ngaingai asile ka hmin khal i ko nawn hlah!” tiin awkaa hro takin a hon sawn. Kamkhat hman ttong loin nuam teten Van Nei Lian cu dung a sip vivo. Zaanlam a sawng an thlen in Suisui le Suite cu an mit kau pempem in an zoh aw. Ei ttha phunkim le Sii le Vai pawl cawhnawi duur tipawl khat ttheptthep in mileeng khaan ah a rak um. Zoih hnen in ti cu suhdang ttul loin an thei cih. Suisui cu zianghman ttong loin ihkhun parah a hong sepaw tupti! “Suite, na duh le ei awla na ei duhlo le hlon thluh aw. Khapa kha lengai tla a cam sehla zoha thei?” “Suisui, na thuruah hi a maklo tuk! Lengai tivek cu a hmang ziklo” “Ka duhlo rengreng. Nangmah na duhduh in tuah aw. A thuhla ka theih hlanin na rak thei zo. Ziangvek mipa a si tikhal na thei thluh. A thang sungah ka tla pangding ka phang!” tiin Suisui cu puan lu khuhin a it cih.

“Suisui phone a ra” tiin an sawng kiltu nu cun a von ko. A lu rit bialbial in a thei aw. A hong tho ih a tlu zik cupco! Suite in, “Suisui, ralringten aw! Khui keimah ka va lo kaihsak ding” tiin Suite cu a va tlan. Suite cu a vong lut salih, “Suisui, Pahngak ka si a ti. Khui ka lo hruai ding nuamten” tiin Suisui ih ban cun a hruai ih phone umnak ah a hei fehpi. “Hello…..”  aw tthia hngurhngo phahin Suisui cu a ttong. A taksa le sa hethet. A khur derdo phah rero si. A mit khal a meng ttha theilo. “Hello…. Boihte, na damlo tuk maw? Na aw cu a va thir ve!” “Uu, in ngaithiam aw maw…. Na rinhlelh dingin ka um hi in ngaithiam aw. Uu….. Na ruahvek a si…lo..” thawthawt hman har takin ttan la ttentto phahih ttong a si zia Pahngak cun a theithiam. “Ka boihte, na tha umlo tuk kha. Ka lo rinhlelh lo ka lo ti zo si. Zianghman khawruah harin um hlah maw. Tuhi Yangon ka thleng zo. Tahan ihsin ka lo phone nan na umlo ruangah si. Thaisun cun tlawng ka lut ve thlang ding. Boihte, tthaten kilkhawi aw aw maw. Na kiangnai ah ka um theilo hi i ngai thiam hram. Boih, ka lo duhdawt tuk hokhaw. Nahrang thlacamnak in ka lo bawm ringring.” “U……u…..” “Awih, ziangsaw na sim duh lai boih? Na bang tuk kha. Neta le kan biak aw sal ding maw” “Aw…. Uu….” “khup!” tiin khatlam in phone a thlak cih. Suisui cu a to hmunah a lu thla hngualhngo’n a bawk. “Suisui! Suisui!” tiin Suite cun a va pom ih a tuamhlawm lohli.

“Andrew, ziang thu ha maw cuti rori ih na ruah nguaigo ihh??” tiin Ceupi cun  an Tlawnginn hmai thingkung pi tangah ke thluang setset ih to tahratin khawruahnak thuuk zet thawi khua a cuan rerotu Pahngak cu a von sut. Pahngak cu a kut pahnih thawn a hmai a hon cuul ih a mit tthep fohfo phahin a hon hnihsan. “Hehe….. Ziangdang ciamco cu ruat hlah ee. Ziangah hitawk na ra? Ziang in poi maw?” “Aw…. Ka Uu le Malaysia   feh tum in an rong thlennak a rei thlang. Tu kha feh ding taktak an si thlang ruangah Ramsa zuatnak hmun kan feh duh in ti ih in ra thlun ve aw tiah” “Ziangah maw kei lamlam?” “Nauhak lekpi na paih zet silo maw?” “Hihi…. Paih ve ee. Um hrih aw. Ziangtin malaysia cu an feh tum?” “Aw…… An pa in a rak ko. Na thei ko si. Tulai cu ee…. Sungrual rual in Malaysia ah an vai hluahhlo hi teh. Ka Uu cun fa pali a nei ih an ciapliap phah fawn.” “Umm……. Si ko. Ka lo thlun ko ding. Nauhak ka lehpi lonak khal a rei tuk thlang” “Awle. Lungawi maw. Thaisun 11:00am hrawngin kan feh ding aw.” “Awle. Ngah tuk!”

Zaanlam khua a maw serso zo. Insien MIT bus colhnak ihsin MIT tlawnginn kulhsung lam pan in Pahngak le Ceupi cu an vong lut. “Woooaa!!!!! Tuisun cu nangmai’ zarah ka nuam aw nasa si Ceupi!” Pahngak cu Ceupi ih liang kuah phahin thinlung ruahnak hmauahhmuah zaangkhai takin a hon ttong. Ceupi cun, “Keimah sawn ka lungawi tuk. Ka tulepawl khal an nuam aw nasa kha. Nangmah um man rori si. Nauhak nuam zawngih tuah na thiam ngah si.” “Heee….. Ka falanu ruangah si” “Si maw? Ee, nang hi na fala thu khal i sim dahlo. Na falanu cu tlawng saya maw a si?” “Lamlam! GTI tlawng a kai lai” “Haaa!!!! Ziangtin a si thei?” “Ziangah maw a si theilo ding?” “Andrew, thungai maw na sim? Engineer a kaimi fala na nei. Na nupi ding rori ah na duhmi a si maw?” “Si ee. Tlawng a ttheh hnu ah kan nei aw ding” “A va cang theilo ve!” “Ziangah maw a can theilonak?” “Umm!!!! Ruat hnik! Tlawng a ttheh dingih cozah hnattuan a lut ding. Innsung sang hnakin a hnattuan tla thupi sawn ih a ret cun na cem! Nau ek tianghman nangmai’ na thleng ringring a ttul ding” “Ka fanu le fapa ih ek cu ka thleng mai kei cu. Ziangsaw har?” “Hm!!! Cu tluk tiang hman na ruah cun va hngak rero ko aw. Tu kum ziatnak saw a kai?” “Kumhnihnak. Tuihnu kumli le kan nei aw ding” “Tuihnu kumli??? Belo na si ko! Kan tlawng sungah fala tthattha an tawr! Na hnattuan a lo bawm niakno tu ding tawr le sengin an lo mitmei rero titeh na thei maw? Nunau hrimhrim a zohin na zoh lo hi an mangbang tuk hokhaw. Mipa tlangval lai ahcun malte  tal zei deuh a ttul hokhaw” “Ka duhmi hrang lawngah ka zei ding” “Ziang a sikhalle Fala ka lo hawlsak thotho ko ding. Mah thawn a mil lomi fala na hngah nakah Nupi lo tla’n na caar pang ding!” ti phahin Ceupi cu an sawng sungah a vong tlan lut. “Hey!!! Ziangtin ee na ttong??? Rak cawl hnik! Ka caar lo nasa ding hokhaw aw” tiin a kutzung khih terter phahin Pahngak cun Ceupi cu a von hual vivoih an tlawng mipa sawng sung an vong thleng.

“Awww!!!! Hmaizarh cun tlawng kan pit thlang ding. Ka duh tuk aw!!! Hiiiiii…”. Suisui cu nauhak aa bangin a tur hluthlo ciamco. Suite cu Suisui umdaan zoh in a lu a thing ih, “Kei ka theithiam lo!” tiin a hon ti. Suisui cu ihkhun parah a vong to ih, “Ziang maw na theihthiam lomi?” “Ziangah hitlukin na thinlung hi a hmun? Ka lo mangbang zetmi pakhat cu, Van Nei Lian hi misia a silo. A hlan ahcun fala hi leknak ah a rak hmang ko ee. Asinan nang a lo ton hnu hi a nuncan ziaza a thlengdaan pawl na hmu ttheh ko. Hitluk tlawnginn ah nitin kan hmu aw sikhawh! A parah zianghman tuarnak(feeling) na neilo rori maw?” “Umm….. Rualpi vekin ka neel zet thlang. Asinan…..” “Suisui, thungaite’n ka lo sim asile cu maw, Pahngak hnakin Van Nei Lian hi ka lo duhsak sawn. Ziangah ti aw” “Ziangah maw?” “Van Nei Lian thawn cun nan tlawngkai nan line a bangaw. Cun nangmah hnakin a upa tuk fawnlo. Pahngak thawn cun nan fehdaan ding hi ruah a ttul nawn ding. Innsung sangkhat ih nan hon um tlang taktak cun nang na thinlung rekrek le na hnattuanmi parih hlawhtlin le ttuanvo nehtu si ringring na duh fawn. “Pastor nupi ih cutin khatin” ti na hlawh ringring men thei hokhaw. Asinan himi cu keimai’ ruahnak men. Na nunsung ih na koppi ding cu kei in ka lo hrilsak theilo!” tiin Suite cu a dingih rawl ei naklam pan in  a feh. Suisui cu ihkhun parah a bokkhup in, “Hmmm!!!!! Van Nei Lian ih sim mi le Suite ih simmi a bang aw cekci! Ziangtin ka tuah thlang ding? Himmm….cek!” tiin a thawpi thaw in a hmur a pir ter suihso!

“Suisui mileeng na nei” ti aw a theih cun Suisui cu mangbang nawn in a va suak. Mileeng khaan ahcun nunau pakhat le mipa pakhat a va hmu. Hiti ih zohnak men in mi siattha an si hmello nasa. An thuamawkdaan le an mithmai umdaan in mi neinung an sizia a lang. Suisui cu a kehlam kutin a sam tham phahin malte kun deuh le hmaizah upatnak mithmai pante thawn, “Ihh, Suisui ka si. keimah maw in poi?” tiin a von sut. Kum 40 tlukih upa nunau nu cu a hong ding hlukhli ih, “Aww…… Ka Suisui, nangmah hmuh ding hi a sun a zaan ih ka ruahmi. Netabik ahcun ka lo tong ngah maw!” ti phahin a va pom. Suisui cu a mang a bang sinsin. “Ka Suisui?!” tiin a kaa in a hon ttongsuak. Nunau nu cun Suisui ih biang cu a kuthnih in a zuutsak. Fanu hlo tongsal bangin Suisui ih mithmai cu khop thei loih zoh phahin a cuul sak rero. Mipa pa cun, “Lakphak dawrah kan feh pei cu” tiin a rak sawm. An zaten lungkim in an suk. Lakphak dawr ahcun an to hai ih ei ding tinkim an von cah. Suisui cu ‘I-cia-kui’ pakhat a lakih a laifang in a khiak hnu ah a phiir awmi a von tthensal. Nunau nu cun, “Umm….. Na thil ei ziaza cu na thleng hrih cuanglo ti aw” tiin hni siamsiam phahin a ti lala cun Suisui cu a mangbang sinsin. Suisui cu a thil ei mi a ret ih a dang a von thian hnu ah, “Um hrih hnik uh, zangfahten zo nan si ti in sim lohli hram uh. Nannih in le in thei tukih kei ka lo thei fawnlo. Ka ning a zak lam” tiin a hon sut. Nunau nu cu a tonak ihsin khatlam ih thingkung hei zoh phahin a mitthlam ahcun tuihlan kum 12 rei ih thilcangmi pawl an vong cuang. Cuih a mitthlam ih cuangmi pawl cu a kaa khalin a ttongsuak. “Suisui cu kum sarih nauhak te a si. Thangte hi kum hleinga tleirawl thlawlsam te a si. Suisui Ni tlawng sayama in Thangte cu ca a zirh ringring. Cutin ca an zir lai ah Suisui cu an kiangte ah Thangte ih Colourfull pencil hmuahhmuah darh thluhin zuk a rak suai. Cumi a zuk suaimi cu amah Thangte le Suisui ih hmel a si. Cuih zuk cu Thangte in a lakih a ihkhun lu ah a ben. “Thangte Ni, zangfahten Suisui hi ka lo tan sung ding. Tlawngah meeting ka ttul ih ka tlai deuh sapbai” Suisui Ni cun Thangte tei kotka in a von auh. Thangte Ni khal cun, “Aw… A ngah tuk.” tiin va suak tahratin Suisui cu a va hruai. Suisui cu innsung a lut vivoih Thangte ih ihkhun lu ih zuk tarmi a vong hmu. Cule veten “keimai’ ta! Keimai’ ta!” tiin au phahin ihkhun par a hong kai ttohtto. Thangte cu zamrangten a vong lut ih, “Na ta silo! Na suai maimai mi! A cahnah le pencil hmuahhmuah keimai’ ta na hman!” “Silo! Keimai’ ta si! I pe aw! Untie!!!! Untie!! Uu Thangte nih ka ta a ti. Keimai’ ta si! Ihihih!!!” tiin ttap phahin a au ciamco! Thangte cu tlangval zikte thinlung vakvai fang a si fawn. Suisui cu Thangtei’ ihkhun parah a ke sai lutlo phahin a ttap. Thangte Ni cu Cokaa ihsin, “Thangte, nang tlangval. Nanau ttapter hlah. Ziangvek asikhalle anih cu nauhak a sisi. Nang tlangval” tiin a vong au tualto. Thangte cun Suisui ih kut a von kai ih a biang parih mitthli cu a kut zungpi thawn a hnulsak hnu ah, “Nanau, kei a neitu nang a suaitu na si. Curuangah kan pahnih ta a si. Himi zuk cu keimah ka nei dingih nahrang zuk mawite ka lo suaisak ding na duh maw?” “Umm!!!! Ziangmi zuk maw in suaisak ding?” tiin Suisui cu a mitthli hon hnul phahin Thangte a hon sut.”Nangmah na duhduh ka lo suaisak ding” “Inn tumpi neih ka duh. Ttaihinn tumpi in suaisak aw” “Nanau, kumkhua in Uu Thangte ih Nanau ka si ringring ding tiin thu in kam ta aw” “Aw. Ka lo kam. Nangmah tla Suisui ih Uu si ringring aw maw. Thukam!” tiin a kut zungte a hon tung. Thangte khalcun a zungte a von suah ve ih hni siamsiam in an zungte le zungte cu an von kalh. Cu pawl hmuahhmuah a theihin Thangte Ni cu a umhmun ah a rak hni thektho.”

Nunau nui’ ttong a cem veten  Suisui cu a hong dingih, “Untie!!!” tiin a va pom. An pahnih in lungawi tukih mitthli lamlam tla phahin an pomaw. Suisui cun, “Uu Thangte teh tu khui a um? Ziangah tulawng kan tongawk sal?” tiin manhlap takin a hon sut. Nunau nu cun, “Khami na Ni hnen ihsin Falam na tlun hnu kannih cu Aizawl ah kan hong tthawn. Thangte cu tlawng peh vivo dingin Delhi ah a feh ih tu lehlam ahcun Norway a thleng zo”. “Norway ee?!” “Aw. Norway ah a um. Tuhi in ron ko ih feh ding kan si thlang” “Si maw? Cu ruangah maw lo theihlo rori ih in ra hawl?” “Aw. Kan lo tong ngah cu kan hna ngam tuk lawmmam!” “Hihihii…. Keimah sawn in ra hawl ih ka lungawi tuk” tiin an biak awk rero lai ah mipa pa cun, “A tlai thlang hi. Hmaizarh camibuai nan phi ding silo maw Suisui? Kan lo hnaihnok rei deuh hi…” tiin a rak ti. Suisui khal a tonak ihsin a dingih, “Ka lungawi tuk maw Untie!” ” Si ee. Kanmah sawn kan lungawi. Kan feh cih ding maw. Kan tongaw sal leh ding” “Awle” tiin an kut zapaw in an tthen aw. Suisui cu dunglet herin an umnak lam panin a feh. Ruahhmai a rong tla suangso lala. A bag sungih Thawng a von la ih feh phahin Thawng cu a hon pharh. Rinlopin  “Pit!!!!! Pit!!!!!” ti aw a theihin a lu a hon tungih mawtaw pakhat in a rak ttaih zikte a si. Zamrangten a kekar dung a sipih leilung parah a tlu sutsi! A Thawng kaihmi cu a rak thlah tariai! “No!!!!! Ka duhlo! A si theilo!!!” tiin au phahin mawtaw lamziin pi parih a Thawng soprop thluh cu a hong sar. A mitthli cu vanruah ti bang a suur in an dok thlurthlo! A Thawng mawtaw ih nen soprop zo tak cu duat takin a ttaang sungah a pom ih, a mitthlam ahcun tlawngkai ding a feh zik zawngte ih an khua zaan thlapi vang tangih Pahngak thawi an tikcu caan hmandaan pawl an vong cuang ciamco. “Nisa caanah nahrang hnemdai si in ruahsuur caanih nahrang beunak si kaduh. Curuangah nisa caan le  ruahsuur caan khalih na ttulmi ka lo pek” tiih Pahngak ih rak ttong dahmi pawl cu  a hnathlam ah an thang ruangro. A ttaang sungih Thawng cu duhdawt, zangfah lainatnak ih khat mithmai thawn a von zoh hnu ah a ttaang sungah fek zetin a von pom betih, “Uu, a cang theilo! Uu, ziangtin ka um nawn ding???? Uu!!!!” tiin a aw neih hmuah suahin mitthli van rialruah thawn a tonak hmun ahcun a  au ruangro…..

By – Mai Dai Dim

(Visited 122 times, 1 visits today)

Comments

comments

2 Comments

  1. A peh run ngan lohli aw. A siar nuam tuk.

  2. Siar nuam lawlaw.. Thiam tuk

Comments

%d bloggers like this: