I Seherh Duh Hlah (IV)

I Seherh Duh Hlah (IV)

 

Fuurpi ruahtam laifang a si vekin Meiro pit cetcet thawi tuam aw thluhmi Falam khua cu hlavang ihsin hmuh a theihlo. Suisui le Parte nu cu khawsung an lut ngah thlang. Hmunbur minung lawng hmuh a theih. Tipuan sin ih kotka ih ra Suisui a hmuh veten Piangte cu a aw neih hmuahhmuah suahin, “Nunu!!!!! Nunu!!!!!” tiin a  vong au. A nu cu thinphang tuk mithmai thawn, “Ziangtin na ti saw?!” ti phahin sangka a va suak. “Uu Suisui!!” Piangte cu a va tlanih a Uu cu a va pom. A nu khal a va tlan ve ih Suisui ih thil phurhmi cu a va cawisak lohli. Thlathum sung hmu awlo cu an rak ngai aw tuk man. Suisui ih tikholhnak dingah tisa an awm hlurhlo. Cokaa ah thunuam relin caan an hmang. Zaan a kim cun “Thaizing cun…” ti ruahnak thawn thin phu dutdo phahin Suisui cu ihnak lam a pan.

“Suisui Nu!! Suisui Nu!!” kotka ihsi au aw a theihin Suisui cu a mit a hon nuai ih khua a rak vang deldel zo. Ni suahnak tlanghram cu mizan ih ruahsur lo bangin  a rak vaam hemhem. An inn sungah thawmvang zianghman a theihlo ruangah a nu le nau le pawl zohman an umlo ti thei in a hong tho. “Suisui nu! Nan um lo maw si?” ti ih au-aw cu a thang rero lai. Sangkaa a hon ong ih, “Aw! Pitit nu, kanu a um lo. Biakinn a feh si ding ka zum. Ziang na poi nan?” “Ai….. Suisui Khua ah na um silo maw? Ziangtik na rak tlung?” “Mizaan ah. Kanu cu a rak tlung cing ko ding. Innsung ah rak leng aw” “Ee, na nu cu ka ko men. Tu ka tlun phah lamzin tluanah an rel ka thei ih ka rak lo zoh phah men.” “Pitit nu, ziangmi maw an rel na thei?” “Aw…. Suisui 2D thawn a ong an ti ih” “Ziangtin ee?! Suisui timi cu keimah maw?” “Suisui dang an um maw?” “Ka thei ve lo pi”. Suisui cu a thin a khir dukdi! A hmai khal a sa vetvet thluh. A hmai a dom thuul, a sam tluang thliahthli cu bua ko a cuul thuul. An inn sungah a her kual rero. “Thungai si pei maw? Suisui ti duh kawh hmin nei dang an um pei maw?” ti ruatin a din khal rem lo. A to khal rem lo. An mi leng khaan le Cokaa cu a kahtlang rero. A netnak ah cun amah rori ih vong zoh dingin thuthluknak a tuah. “Van Sui Kim” ti hmin a von hmu. A khung number a von zoh. Amah a rak si taktak. A pang a hei zoh bet. ‘Thiam hleice’ tinak ah, “Mathematics, Chemistry” tiin a um. A mithmai cu a tle hemhem. Hi hlei lo ih lungawi teh! Tlun inn ziinah  a khawruah cu patpar tlun ih zammi bang zaang viarviar in, a van tau in a kut pahnih cu thlacam ding bang a ttang zawnah a bom in ti niahnoten a feh. “Suisui!!!!!” ring takih kawh aw a thei. A khawruah hmuah hlo thluhin a hei zoh. “Cercer!!!!” “Suisui!!!” an pom aw. An aw cun falam khawsung hmuah a khuh thluh ti theihin a thang. “Cercer!” “Suisui!” tiin ko aw phahin an biang le biang te an dom aw sak. An pom aw sal. An lungawinak cu mikip ih theihpi khal an duh. Cercer khal 1D thawn a ong ve. ‘Biology’ thiam hleice in a ong. Suisui tei innsang le Cercer tei innsang cu an bing le bel kho le kheng tiang khalin an lungawinak an theihpi ve.

Zarhhnih a rei hnu ah an tlawng Saya Kyi in Fresher Welcome a tuah ih tlawngta hlun pawl tongaw khawm in an nuam tlang hai. Suisui cu an khua ah hlawhleng ih hnattuan dingin feh tim a tuah sal. Tui a feh ding cu a hlan hnakin a phur a zaang cuang. A hmaisabik ah Pahngak hmuh ding a thinlung cih. Zarhhnih te a tonglo mi hi reituk tonglo ah a ruat aw zo. A phunhra on thu theihter hmaisabik a duhmi khal Pahngak a rak si. “Kanu, thaizing in khua ka tlung cih ding” a von ti cun a nu cu a mithmai a nuam tuk lemlo. Suisui umdaan a zohhin a mang khal a bang tuk. Hmaisa feh dingih an ti lai ah a paihlo daan le a tuih a phuur daan hi cu mangbang lo awk khal a ttha lo. “Na ra tengteng ding. Khua na tlung thei hrihlo!” ti phahin Cercer cun Suisui ih kut ah ‘Card’ pakhat a von pek. Suisui cun Card a zoh ih “Mopuai Sawmnak” ti a von hmu. A von zoh hliah ih, “Salai Cung Lian & Mai Dawt Sung ih tthit umnak” ti a rak si. Suisui cu a mit a hong kau puppi! Mangbang tukih awsuah thawn, “Cercer, U Dawt….. U Dawt…” tiin aw hak ttuttto phahin a hon sut. Cercer cu a lu a sut. “Ziangah?! Ziangtin a si thei? Cung Lian cu Malaysia ah si lo maw a um? Ziangtin U Dawt thawn an nei aw thei? Cercer, in sim hnik aw! Hivek ka va thei dahlo ve!” tiin Suisui cun thusuhnak tampi a hon tuah. Cercer cu a dinnak ihsin Carhlet lam ah nuamten a ke a hei kar ih a thawpi veikhat a thawt hnu ah, “Hmm….. Si ee, kei khal a thok ah cun ka duhlo tuk. Asinan ka nu le pa in an fial tukih amah Uu Dawt khalin poi a ti lo tak hnu cu an nei aw si ko,” “Mopa um lo ih mopuai hman tivek ka thei dah kel lo!” “Ai….. Kanmah Falam ah a um hrihlo men na. Halkha lam tla cu thei aw dahlo rori hman a nei aw an tampi zo si” “Va si khalsehla U Dawt cu Mawipi thawn an duh aw silo maw?” “Hey! ‘Mawipi’ ti hmin sal hrimhrim hlah! Kanu le in an duhlo lawlaw khah!” Suisui cu a ca donmi a zoh thuul, Cercer a zoh thuul, awloksong in a um. Mopa um lo ih mopuai tuah ti a rak thei dah hrimhrim lo.

Falam Lamziin tinkim tonawknak thlangih zuudawr ihsin hawr cuihcoih ra suak a kut ah zuu palang keng phahin lamziin pi hmanih tlemlo khop ih feh ‘Mawipi’ a hmuhin Pahngak cu a mangbang tuk. “Mawipi! Mawipi!” tiin ko phahin a va naih. Mawipi cun peng neinei in a hon zoh ih, “Aww……. Pahngak maw??? Hihihi…… Nang na theilo. Si ee, na nuam aw ko ding. Feh ko aw. Feh ko aw maw…. Shhhhh!!!!” tiin aw dah hluahhlo le a ttong hman fiang hnai lo cun a hon biak. Pahngak cu a mang a bang sinsin. “Pit pit!!!!!!!” Mawtaw pakhat in Mawipi cu a ron ttaih zikte. Pahngak cun Mawipi a va pom lohli ih an pahnih in ziin kapah an riil. Mawipi ih zuu palang kenmi cu a parh kuai thluh. “Aa….shh!!!!!! Hlothlau!!! Na hmel hman sihlah!!! Ka zuu i kuan aw!!” tiin mawtaw dung dawi zik kuiko cun bungbukun in a hong au. Pahngak cu a hong tho ih Mawipi cu a va dir. “I tham hlah! I kai hlah! Zo hman in in duhlo! Duh vekin an um awter! Duhdawttu ngaingai khal ka nei lo! Nang khal ka kiangah um hlah! Ka ning na sin! Phuiii!!!!!” Mawipi cu a ttong fang ngai har fahran in a aw dah tluaitlo cun a ciil a phui fualfo! Pahngak cun thinsauten Mawipi cu a khawr vivo. A tluk ding phangah a kut zaa bawng phahin a dungten a kan phah. Netnak ah Mawipi cu a feh thei nawnlo ih lamziin kapah a it. Pahngak cun a pawk ih inn ah a tlun pi. A hnipuan pawl a thleng sak rero lai ah Mawipi cu a ttong aa rero. “Dawtte, ka lo duhdawt tuk timi cu na thei ko. In duhdawt ve ti khal ka thei. Asinan….. Asinan….. Nangcu ka thinlung sungah ka lo phuum mai ding. I seherh lo ten feh ko aw. Ramdang ihsi paisa na ron kuat caan talah nahrang ttangkai mi ka rak si ko ding. Feh ko aw. Feh……ko….aw” ti phahin a lu thla hngualhngo’n a itthat cih. Pahngak cu a mangbang sinsin. Mawipi ih mit ihsin mitthli a rong luang kiarko a hmu. Ziang a cang ti theilo in a rualpa Mawipi hrang thin naa takih tuarpi phah cun a zoh cuahco. Inn  tlun ziin ah cun a thil tonmi ruatin a feh vivo. “Mawipi hi ziang a cang si pei aww???? Hi vekin zuu a in dahlo nan sikhawh. Zuu cu a in phah phah ka thei ko nan hi tlukin a rii dah lo. A ttongmi pawl, a ttongfang pawl, a mitthli tiang a tla. “Dawtte,” “Dawtte” ti hmin a sal fawn” tiin Pahngak cu a ruat kurhko. A thuruah thuuk tuk nakah khui ka thleng ti hman a thei aw lo.

“Saya Hngak!” Suisui ih aw a theih in a lung a hong fim dukdi. A umnak a von zoh aw ih Suisui tei inn kotka a rak si. Suisui cun, “Ziang thu lawmmam saw na ruah?” tiin a rak sut. Pahngak cu ziangtin ka um ding ti thei loin a lu a kheuh ih, “Aw… Zianghman ruat lo ee,” tiin a hon let lohli mai. “Ziangtik ah maw Falam na rat?” “Tuisun ah. Aw… Meeting kan nei zik ih ka ra tlung duak,” “Aw…. Inn sungah rong leng aw” “Suisui, na thuam awkdaan cu a va danglam ve! Mopuai hmangmi na bang ual” kerte raang suur le kedam sang bun in a sam tomdaan khal le danglam takih thuamaw Suisui cu mit ttheplo ih zoh phahin a hon ti. “Ala! Na va thei ve. Si ee, Cercer ih Uu pasal a nei ii” “Cercer ih Uu ee?! Zo a Uu?” “Uu Dawt panteh. Ziangah na va lau hmel ve!” “Aw….. Lau ciamco lo ee” tiin a let nan a thuruahnak cu mitunai ih Mawipi ih ttong pawl pakhat teten a von ruat. Suisui ih sawmnak vekin innsung cu an lut. Suisui cun suahduur thawn tidai a rak keng ih mileng khaan ih to Pahngak hmai ih ret phahin, “A mak na ti ve lo maw?” tiin a hon ti. Pahngak cu theithiam lo takin a vantau in Suisui cu a zoh. Suisui cu Pahngak kiangah a vong to ih, “Pasal um loih kutsih ti tu ka veikhat theihnak” tiin a von ti. Pahngak cu a mang a bang sinsin. “Pasal um loih kutsih ee? Na sim duhmi cu Cercer ih Uu Dawt maw?” Suisui cu a lu a sut. Thu umdaan pawl hmuahhmuah a sim thluhin Pahngak cu rinlopin a ding hlukhli! “Suisui, na phunhra on ka lo lungawi pi tuk. Thiam hleice in na ong bet. Na tumtahmi thleng suak dingin Bawipa’n lam lo hruai vivo seh. Ka feh ta ding,” tiin a suak cih.

Zinglam khua a vanng riahriah zo. Mawipi cu a mit a hon meng ih a sir a her. A kiangah Pahngak a it a hmuhin a mang a bang tuk. A mit a nuai rero ih Pahngak a si a fiang. “Aa…….” tiin hahham vuangvo’n a ka a hon ang. A lu a naa hluahhlo in a thei aw. Mizaan ih a umdaan a von ruat. Cumi lawngin ziangtin inn a thleng ti a thei fiang. Pahngak khal a hong tthang ve. Mawipi cun, “Sorry maw Pahngak. Ka lo ti buai tuk. In ngaidam aw” tiin ngaidam a dil. Pahngak cu a hni ih, “A nang le kei ah ngaidam tivek dil ttul lo pi. Ttang ttentto aw maw Mawipi. Nahrang Ni eng mawi a suak leh ding hokhaw,” tiin a hnem rero. Mawipi cun Pahngak in a thuhla ziangtin a thei ti a theilo nan a theih zo hnuhnu tiin a sim tlang thluh lawlaw. “Si ko ee, kei cu ka tlinglo. A nomawknak ding a si ahcun ka thlah ko ding. A paisa kuatmi siarsak tu talah ka ttang kai ko ding” tiin zaang khai takin a ttong huahho mai. Mawipi cu Falam Myanmar Economic Bank ih hnattuan a si. Pahngak cun Mawipi ih tuarnak theihpi zetin, “Rual, ka ti zo vekin na tha suahin ttang ttentto ko aw. Nahrang ni eng a suak leh ding” tiin a liang ah kuah phahin a von hnem sal.

Suisui le Pahngak cu Suisui tei khua lam pan in an feh. Lamziin tluanah zodang umlo’n an pahnih lawng rori an si. Thuzung thuza an rel tlang. Pahngak cun, “Suisui, nang tu phunhra na ong zo sikhawh ziangha kai na tum?” tiin a sut. Suisui khal cun rang takin, “GTI ka kai ding. Ka nauhak tet lai ihsin GTI kai thei ding hi ka saduhthah a si cia. Pathian zarah 2D thawn ka ongih ka kai thei ko ding tiin ka ruat” tiin a hon let lohli. “Umm…. GTI rori maw na duh? A ttha tuk. A ttha lawlaw. Na tumtahmi hlen suak dingin na dung ihsin thlacamnak thawn ka lo ttanpi ringring ding hokhaw” “Aw, ka lungawi tuk maw Saya Hngak”. Pahngak cu Suisui a duhnak a na sinsin. A duhdawtnak thu hi sim a duh tuk nan Suisui in a cohlang theilo cun an hla aw ding a phang fawn. Tlawngkai peh dingih a feh hlan cu hmunkhat ih hna an ttuan tlang ding a duh fawn. ‘Ka Lo Duh’ ti a sim ruangih Khua a um paih nawnlo ding a phang fawnih sim lo mai ttha in a ruat. Cutin an khua cu an va thleng sal. Suisui ih Ni cun lungawi ten a rak hmuak. “Saya pa, zangfahten Suisui hi mirang ttong i zirh sak hram aw tiin ka lo dil. Tlawng a peh tikih harsa tuk lo dingin. Falam ah a um sehla Tuition a kai ko ding. A tu cu hitawk ah hlawhleng in hna a ttuan tikah…..” Suisui ih Ni cun Pahngak hnenah zangfah a dil. Pahngak khal cu a lungkim ve. A hmaisabik ca an zirh awk cu an pahnih in an um a rem lo. Pahngak cu a aw khal a tthia thluh. A thlan hripi a paih. “Ummm!!!!!! A va ol lo ve!” tiin a ruat. Suisui khalin Pahngak ih umdaan le tuarnak theithiam takin, “Tualleng tlawngta zoh in i zoh awla, kei khalin ka phunhra saya zoh in ka lo zoh ding. Nang cu ka saya taktak na sisi” tiin a ti hnu in Pahngak khal a thinlung ruahnak pawl a von thleng ih nauhak te ca zirh bangin a von zirh. “Tuini cu ziangmi lesson kan zir ding?” a von ti ih Suisui cun, “Saya pa Nangmah i zirhmi pohphoh kha ka zir ding simai” a rak ti ve. Thlahnih sung caan an hman tlang hnu in Suisui cu Falam ah a kir sal. Tlawngkainak ding form pawl a tuahih falam ihsin major a hngak.

“Suisui, nang cu na tumtahmi rori na kai ngah ding ti,” Cercer cun dawr thilri pawl simsial phahin a ti. “Nangteh ziangmi na kai tum Cercer?” “Umm….. Ee! Suisui, tu kha NTS kai dingah paisa thawn lem si nawn loin Mark in an la thlang hokhaw. Ka mark in a tlin ve siih Nurse ka kai ding tiin ka um. Vankau tlang thlivir lakah NTS tlawngah ka kai ding” “Simaw? A va ttha ve ti. Nang cu na kut a neem si ih mi naa khalin an lo hmarngai nasa ding. Kai aw. Tuikum ahcun ngah hrihlo silo maw?” “Aw, tuikum in an thokih tuikum ong mi cu a ngah hrihlo. Hmaikum in ka kai ding,” “Asile NTS na kai hlan kumkhat sung rori ziang na tuah ding?” “Umm…. Mirang ttong le Computer ka zir ding. Nang GTI na kai dingih kei khal Kalay ah Computer ka rak zir ve ding,” “Aw…. Cuti asile cu ka nuam aw tuk thlang. Heee…”  Suisui cu a Major a tla taktak thlangih thlahnak tuah dingin an khua a va tlung. Tualleng tlawng zirhtu ah an khua ih phunhra ong pakhat an la ih Pahngak thawn an zirh. Tualleng tlawngta pawl suncaw a suansak ih leknak a phunphun a tuahpi. An khua cu Pastor Andrew Hngak le Suisui ih Ni Tlawng Sayama Kyi ih au-aw lawng tawk loin anmah rori in Vokinn tiang an saksak nak thawngin khawsung Vok thlah zohman an um nawnlo. Suisui cu an khua thlenghawkdaan a hmuhhin a Ni khal a upat sinsin. Saya Hngak hnen khalah lungawi thu a sim.

Thlatang a thok thlangih khawsik caan a si thlang. Zaan thlapa khal eng pempi in van tlunah a vang. Pahngak le Suisui cu Zautlang hngauhsan in ‘Thuro’ nupa bang zaute ah an to thliangthli. “Suisui, tlawng na kai taktak thlang ding ti” “immm…..” “Suisui…” aw tthia phah ih kawhnak aw a si. “Awih…” tiin ti phahin Suisui cu  Pahngak lam a va hoi. An mit le mit cu thlapi vangih tletnak hnuai ah tle keuki ten a tong aw dukdi. An thawthawt cu rang dukdo. Suisui cu a mit a tthep fohfo. Pahngak cun Suisui ih mitmu cu mit ttheplo rori in a zoh. “Ziangmi in sim duh Saya Hngak?” “Suisui, Ka duat Boihte….” “Himmm…..” Suisui cu cuih ‘kawh aw’ a theih in a lung a tur dukdo. A taksa khal a rong sa vutvo thei. Tiral thluh zik vekin a thei aw. Ttong ngaihnak khal a theilo. A ciil a dolh khutkhi ih a lu a kun. Pahngak cu Suisui ih theihlo dingten a thawpi a thaw ih thawdang a lak hnu ah, “Ka Lo Duh” tiin dimten a von sim. A aw cu a dim tak nan Suisui ih hna ihsin a sung muril tiang thang takin a fang ruahro. A taksa khal a hnin thluh thei. A lungtur cu a hruan in an hruan aw. Um hnailo a ciil cu tu le tu a dolhnawn rero. Pahngak cu a ttong a peh ih, “Ka thinlung sungih hmun na luahnak hi a rei tuk zo. Ka duat, tlawng na ttheh tiang lo hngak dingin ka timtuah aw cia. Curuangah tu rori ah i duhnak thu sim ve dingin ka lo dil lo. Asinan ka lo duh tuk timi hi thei ringring aw. Ka lo hngak ringring ding hokhaw ka boihte”. Suisui cu a ringh a hon tungih Pahngak ih mitmeng fiangten a hon zoh. Pahngak cun duhnung mithmai pan tak thawn a rak zoh. Zianghman ttong loin Suisui cun a zoh ringring. A thinlung cun sim ve hi a caak tuk. Cutin a zoh rero laiah a taksa cu Pahngak ih ttaanghlum sungah a rak thleng. Pahngak cun duat takin a pom ih Suisui khal cu taalsuah tum lam loin Pahngak ih ttaang sungah cun a bek hlenhli. Pahngak cun, “Boihte, tlawng na kainak khalah felten um ringring aw maw. Tlawng na ttheh tiang rinum takin ka rak lo hngak ding hokhaw. Pakhatte ka lo dil duh. In tuahsak thei pei maw?” Suisui cu a ringh a hon tung salih, “Ziang maw in dil duh?” tiin a hon sut. “Saya Hngak ti siloin ‘Uu’ tiin veikhatte tal in ko aw. Na hnen ihsin ‘Uu’ ti ih kawh aw theih hi ka hngak hlap bikmi a si” Suisui cu a lu a kun sal. Caan tawkfang a rei hnu ah Pahngak cu a dingih, “Poilo Suisui, na tuah theilo mi thil zianghman lo theihlo in ka lo tuahter dahlo ding. Ka thin a rak rang tuk sual si hi. I ngaithiam aw. Khah, thaizing Falam feh ding na si kha. A tlai thlang si. Tlawngkai ih Asawng na um khal le nangmah le nangmah zoh ttha aw aw maw. Cun, himi hi keimah ih ka lo thlun ringring theilo ai-ah nisa caanih nahrang hnemdai si in ruahsur caanih nahrang beunak si hramseh!” ti phahin Caku mawite thawn tuammi thil pakhat a von pe. “Ziangmi si himi cu? “Nisa khal ih na ttulmi le ruahsur khalih na ttulmi thil. Khah ka tlung ding. Take good care ok,” ti phahin a ke a hon kar. Suisui cu a din hmunah caang lo khai lo in a ding ziarziar. Pahngak  tual laifang a thlen in Suisui cu rinlopin a her hlukhli ih, “Kan tongaw sal ding maw Uu” a hon ti. Cuih aw a theih in Pahngak cu a ke feh a cawl dukdi! Ka ruah tuknak ah ka theih palh si pang pei maw ti ruatin dunglet a her. A thlang zawn zaute parah dingin hni siamsiam ih a ron zohtu Suisui cu a hon hmu. “Boihte, mituih na ttongmi ciah kha hon ttong sal hnik. Ka theih palh si pang maw?” “Na thei palh lo. Asinan ka sim sal lo ding. See you next year my dear teacher” tiin ti phahin zamrangten inn sungah a vong tlan lut. Suisui sangka a khar tiang Pahngak cun tual ihsin a von zoh ringring. Innsung a thlen veten Pahngak ih pekmi cu a zoh ih a senpaal(pink) rong a simi ‘Ni Thawng (Umbrella)’ a rak si. Lungkim tukih hni phahin  rang vutvo le thatho zetin Pahngak cu van par  thlapi zoh phahin tlun inn pan in a feh vivo.

‘2004-2005 cazir kum GTI Tthuma’ ah Suisui cu ca zir a thok thlang. Rualpi zohman a nei hrihlo ih har a ti zet. Asawng ah a um. Asawng ih um midang pawl cu tu le tu phone ko tu an nei nan Suisui cu phone ko tu ti khal a nei dahlo. A room mate cu ‘Suite’ tiin an ko ve. “Sui le sui kan tongaw” tiin an nuam aw zet. Suisui cu ‘Civil Major’ a si. Falam ihsin GTI kai a tlawng kaipi cia hi an um lemlo. A um sun khal le Tahan ihsin a lang ih ra kai an si thluh ih asawng ah rualpi ttha taktak a neilo. Suite cu a rak ttha tukih a nuam aw deuh lam. Tlawng an luhnak khal thla a rak liam ve thlang. Tlawnginn kimvel zohin Suisui le Suite cu an tawi vak rero. An hmai ah “Bhrumm!!!!!” tiin Bike a ra cawl. An pahnih in an  va her lohli ih bike par ahcun tlangval pakhat taksa rong ngo humhi, tisa khen bunbi a sam tuahdaan khal le thiang verver cu an hei hmu. Cu pa cun Suisui cu hni sersi phahin a mit khatlam a rak sin(a melh) hnu ah bike thawn a liam hlo sal. “Cuvek minung cu!” tiin Suisui cu a phun hmukhmo. “Khipa khi….. Khipa khi….” tiin thu pakhat von ruahmi nei bang a cal dom phahin Suite cu a ttong. Suisui cun, “Khipa cu ziangtin maw?” tiin a hei sut. “Aw… A anih cu ‘EP Major’ in tuikum final year a si. A hmin kha ziang an ti si ta????? Suisui, na theilo ngai rori maw? Himi tlawng ah cun khipa theilo an um lo. Ziangah nang na rak theilo?” “Tlawng kan luhnak a rei hrihlo ruangah khal a si. Cun, kanmah Civil major sung minung hman an zaten simhlah! A hrek hman ka thei hrih hailo. Ziangah maw EP major lamlam ka va theih ding? Ka theih ttul tukmi a silo vekin i theih ka ttul lem veloih si ko ding. Heee…..” tiin hni phahin a sawn.

Fresher Welcome an von tuah thlang. Suisui cu laitah hnisuur le kerte fawm aw in a hru. A sam a liang ron luan fangte ding thliahthli in a thlah. A ruangrai le paa therthi in duhnungza zet a si. Programme dang an ttheh thlangih tu cu ‘King’ le ‘Queen’ hril caan a si thlang. Civil Major ihsin Suisui cun Queen a ngah. Mikip ih mit cu Suisui parah a fu thluh. Cun an tlawng zate huapin an von hrilih King ngahtu ‘Salai Van Nei Lian!’ an von ti cun “Woooo!!!!!!!” mipi au-aw cu thuum hnunhno in a thang. Suisui khal cu ti lawmmam ih mipi au cu a mang bang tukin a von zoh ve. “Hinnn….!!!” Thinlau nawn ih awsuah thawn Suisui cu a mit a hong kau puppi! Kan dung zarh ih Bike par ihsin a mit khatlam rak sin tu pa kha a rak si. Khaisun ahcun bike to phah a si ruangah a san le niam a hmu theilo. Tu cu a ruangrai fiang tukin a hmu ngah. Kan Chin mipa zaran hnakih uak deuh 6’1″ tlukih sang a si. A sang timen si loin a tisa a rak khat phah thawn zoh a mawi in a tuak nasa. Veikhat fala a melh mi cu an riil tupto ti theih tlukih an tlawngih hmin thang a si.

An tlawng hmai Canteen ah Suisui le Suite cu rawl an ei. Paisa pe dingin Suisui cu waiter a ko. “Ama, nan eimi man cu pek a si zo” tin tlangval pa cun a sim. Suisui le Suite cu mangbang tukin an zoh aw. “Zonih a lo pek?” tiin an hon sut ih tlangval pa cu khatlam ah a lu herin a hei zoh. Tlangval pai’ mit zohnak zawn cu Suisui in a hei zoh ih ‘Van Nei Lian’ cun hni sersi mithmai thawn a mit a rak sin hnu ah dawr ihsin a suaksal. Suisui cu zamrangten a va tlan ih, “Hey!! Van Nei Lian, rak ding ta!” tiin a hei auh. Van Nei Lian cu ding duh cuanglo’n a feh thotho. Suisui cun a hei dawi ih, “Ding aw ka ti! Ka ttong na theilo maw?!” tiin ring takin a va au. Van Nei Lian cu a rak dingih dunglet a rak her. Suisui cun, “Heh! Hi vekin ka ttulo mi thil tuah hlah aw. Ka duh lo. Pek ding ka neihlo le ka ei lo ding. Pek ding ka neih ruangah ka ei mi si” ti phahin paisa a pek. Van Nei Lian cu hnihsuak hnai lo mitihrim hnih in a hni ih, “Duhdawtnak thawn thinlung thiangten ka lo peksak mi si,” ti phahin a ke hmailam ah a hei kar ih Suisui ih hna phuurte a lu va kun tahratin, “Thinlung thiangten i rak cohlang ko aw maw My Queen” a hei ti hnuin a feh. Suisui cu mi aa men bangin, “My Queen?!” tiin a hon ttongsuak. ” Hey! Ziangtin ee i kawh?!” tiin a hei auh nan Van Nei Lian cun ngaihsak loin a fehliam san. Suisui cu khawdang a tangih mikip in an rak zoh ttiamttiam mi a si kha a von hmu. A thin hi a so in a so hluahhlo. “Hipa hin leknak ah i hmang tum maw si? Rak zoh seh!” tiin a haacang rial ttuahtto phah cun tlawng khaansung a vong lut ve. An khaan minung pawl cu Suisui zoh phahin thuthup an sim aw culci. Fala hrekkhat cun thiiknak mitmeng thawn an zoh.

Chin Natianal Day a kim ih Falam ai-awh ih Miss si dingah Suisui cu hril tlin a rak si lala. “Hahaha!!!!!!! Zoh hnik uh! Ka mi thlan hi a dik ko lo sawm!” uar awknak ih khat ttongkam thawn Van Nei Lian cun hni phahin a rualpi pawl cu a ti hai. A rualpa Sangte in, “Taa Nge(Van Nei Lian cu a nauhak te lai ihsin Taa Nge tiin an ko ringring), baang thlang hnik aw. ‘Van Sui Kim’ timi nu cu midang thawn an bang awlo ding in ka hmu,” “Cucu si lawm ka duh mi. Zoh hnik uh! Tuihnu thlakhat ahcun ka milai a si tengteng ding!” Mit cang takin an dinnak hmai thingkung zoh phain aw rum tak thawn Van Nei Lian cun a rualpi pawl cu a sim.

“Suisui, mi leng na nei”, Suite ih kawhnak aw a theih in Suisui cu a mang bang tuk. A va suakih mi leng khaan ih to Van Nei Lian cu a va hmu. “Ziangmi thupoi na nei? Zarhte si fawn ih tlawngkai ttul fawnlo” tiin a dinhmun in a hei sut. Van Nei Lian cun, “Tlangval pakhat in Fala a leng ah thupoi um fialfial in maw a leng ding?” a rak ti ve. Suisui cun a rem in a rem thei hrimhrim lo. A mitmeng le a cang vaihdaan ihsin “Himi tlawngih kai tlawngta hmuahhmuah cu ka kut in ka huum thluh thei tin le, ka duhmi ka ngahnak ahcun ziangvek tuah khal ka poi tilo!” ti thinlung ruahnak nei a si zia fiang tukin a thei. Tu khal cu lo theihlo in khawsung vak dingin a sawm. Suisui cun a thlun duhlo. Asinan “Aw” a ti hlansung tlunglo ding rori ih a um ruangah Suite in le a forhfial tuk thawn a hei thlun. Van Nei Lian cu Kalaymyo ih Electronic item dawr nei Milian fapa pahnih lakih fapa nauta deuh a si vekin a duh tawkin paisa cu tidai hman in a hmang hluahhlo mai. Anu cu Shan le Tuluk kahpia a si. Suisui hrangah nunau hmanmi ttukttak samkilhte tiangin a leih sak. “Van Nei Lian, napa in thlanhri putih a hawlmi paisa hi tlawngkainak hrang lawng siloih hivek ttukttak leinak ah hmang rero hlah aw. Hiti vek hi ka ttulmi khal a silo! Ka la lo ding” ti ih a khirh caan a tampi. Cuvek caanah Van Nei Lian cun, “Na duhlo le cu kei ka ttul ve lo. Khui!” tiin hnawm bawmah a hlon hluahhlo mai ttheu. Cuti vekih a nungcang hrimhrim hi Suisui cun a ttih sinsin. “Tuikum hrang a paziatnak ka si?” tiin hni lo riai in Suisui cun a sut. Van Nei Lian cu hni phahin a lu a kheuh ih, “A pakhatnak. Cun a cemnak khal na si ding” “Tuikum hrang lawng maw?” “Kumkhua hrangah” “Haa! Baang thlang aw. Kei hi tuikum hrang a pakhatnak ti khalin i siar hlah aw. Nangmah vek kumkhat sungih fala pa nga lai thlengmi minung hrangih kutzung khiakih siarmi lakih tel ve ka duhlo. Tuihnu ka umnak asawng khal ra nawn hlah! Keicu mi pakhat hrangah ka thinlung hmuahhmuah ka pe zo. Zuangzang va si ka duhlo!” “Vate zuanglai zo hman in ka ta an ti theilo” “Asinan, khai Vate kha tlunnak ding ‘Bu’ a nei ko” “Cuih bu a thlen hlanah an sai thla ttheu” “Cuih bu a thlen hlansung a zuang ko ding. Kei ka thinlung cu a fate tukih mi pahnih an tlemlo. Pakhat hrang lawng a si” “Thinlung  hnakin mipum a thupi sawn kahrangah!”. Suisui cu ttong ngaihnak a thei nawnlo. Reilote sung a ngui ta. Cun, “Aw, na ruah daan in khan ruat mai. Ka feh ding!” tiin a ding hlukhli ih a feh cih. Van Nei Lian cu amah le mah mak a ti aw tuk. “Hitluk ih mihngal fala ka kom dahlo. Cu cingin ziangah ka thlun paihin a ttulmi tuahsak ka duh hrih lai?” ti ruatin dawr sungin Suisui liam tiang a hei cuan.

Zaan thlapa cu fiang riahriah in a vang. Pahngak cu a khaan tukverhte ihsin khua a cuan. “Umm……. Suisui tel lo ih ka caan hmannak ni khal a rei nguahngo thlang”, tiin a dairy cabu cu a von kau. Suisui a feh ni ihsin a caan hmandaan hmuahhmuah ti thletthlet in a ngan khum. Tuizaan khal ngankhum a tum ih cafung a von la. “Suisui, na thei lai maw? Tualleng tlawng nauhak pawl thawn kan lekih kan rak pomawk duhdi lai kha. Na lungtur awn kha ka thei lai. Khai zaan ih thlapi vang le tuizaan ih thlapi vandaan cu an va bang aw lawmmam ve! Nang na umnak ah teh thlapi a vang ve maw? Thlapi par talah kan mit tongaw thei sehla ka va duh em! Suisui, nitinten nahrang thlacam ka bang dahlo hokhaw. Tuini cu nauhak pawlthawn ‘Ai Thang Vel’ Peipawk kan vong vawk ih ka lo ngai a luar sinsin. Tumruhnak thawn tlawng ttheh tiang kai aw maw. Nahrang rin um zetin ka lo hngak ringring ding”, tiin cakuat ngan in a ngan ciamco.

Khaan sungah Suisui le Suite cu Ca an zoh rero. “Suisui, tuini na suahcam silo maw?” Suite ih aw a theihin Suisui cu a von ruatih, “Aw…… Keimah hman in ka thei nawnlo. Haaa…. Ziang kan tuah pei?” “Ra aw. Dawr ah rawl ka lo do ding” “Ai, poilo ee.” “Na timtuah aw. Kan feh ding”. Suisui cu “Ka lungawi maw Suite” ti phahin a tim a vong tuah. Leng suak dingin sangkaa an von ong ih cu zawng cekci ah an Sawng kiltu nu thawn an tongaw dukdi. “Ziang na poi?” tiin an von sut. Mi leng khaan an va thlengih, “Haa!!!! Saya Hngak!” Lungawi tuk mithmai thawn Suisui cu ‘Aw’ hlim takin a au. ‘Tthuma’ ih a khaw lainak bik rawl dawrah an feh. “Happy Birthday!!!” tiin Pahngak cun pacel pack pakhat a pek. Suisui cu a lungawi tuk. An rawl ei nak kiangte ihsin Van Nei lian cun a zoh thup ringring. Suisui ih mithmai pan tei’ hnih aw le a hlim daan a hmuhin a thin a heng ciamco! A tonak ihsin mit cang tak le rum takin Pahngak cu a met riairiai. Suisui le Pahngak cu zodang hman ngai loin hnoh aw takin tikcu caan an hmang. Tahan kir sal dingin Bus colhnak lam panin an feh. “Uu, ziangah hican na rak ra?” tiin Suisui cun a hon sut. Pahngak cun, “Boihte, nangmah lawng phunsang tlawng na kai ih ka lo thiik tuk ruangah tlawng ka peh sal tum. Hehee…” “Ghee!! Nang tla cu Pastor hman na si zo. Ziang tlawng maw na peh ding? Khuitawk ah?” “Aw…. Bible tlawng thotho. Yangon Insein ih MIT tlawngah” “Aw…..” “Phone in ka lo biak ringring ding maw. Tlawng na ttheh le tlawng ka ttheh bangaw dingin” “Awle”. Bus colhnak cu an va thlengih, “Ka mithmuh ihsin na von hlat ding ka lo sianglo” ti aw phahin an mit le mit zoh aw keuki te’n an ding ringring. Pahngak cun duat takin Suisui cu a kuah ih a kutin Suisui ih lu le sam cu a zuut sak rero.

“Happy Birthday My Queen!” ti ‘aw’ thawn rualaw in sen hlerhli ten ‘hlingnei par’ hlir tom mi (Hundred roses) cu Suisui ih kut parah a ra thleng. An pahnih in ‘Aw’ a ratnak lam cu an hon zoh. Ti serser ih hni phahin Van Nei Lian cun a rak zoh. Cun, “Suahcam Lungawinak na hnen thleng seh!” tiin a ttong sal hnuah Bike par cuangin a liam hlo. Suisui cun, “Hey! Van Nei Lian!” tiin a hei auh nan a liam man. Pahngak cu a thisen a so hluthlo. A hmai khal a hong sen ttuamtto. A kaa in, “My Queen!?” tiin a sal phah. Asinan Suisui ih hmuh ding siangloin hramhram ten thindai zuamin ttan a hon la. Bus a ra thlengih Pahngak cu a ke a hon khai. “Uu…..” tiin Suisui cun ttah aw thawn aw tthia derdo phahin a hon ko. Pahngak cu dunglet a her ih a kut pahnih in Suisui liang parah cun a suan hnuah a thawpi a hon thaw ih, “Kaduat Boihte, ka lo rinsan vekin kahrang rinum hram aw. Ziangtik hmanah lo rinhlelh ka tum lo,” tiin a von ti. “Uu, phundang ah ruat hlah aw maw. Anih cu mi tihrim a paih tuk…” Pahngak cu ttah suak zetih khal en-en mi a awm cu neem ter dingin ttan hon la ttentto le a haa tlunlam in a hmur tanglam khuh pil ih keu tahratin a thawpi veikhat a thawt sal hnuah, “Boih ka lo duh tuk tihi thei ringring aw maw. ka feh ding. Take care!” tiin Bus sung a hong lut cih. Suisui cu a taksa khal a hit cuaico thluhin a thei aw. A dinnak hmunah caanglo khailo’n  Bus liam tiang  dingin a hei zoh cuahco. Bus sungah awm cum uk-au phahin a ttah a sup tuknak ih thawthawt dinghman nei nawnlo khopih  thawpi heh le bang law la phahin, “Ka duat, lo rinhlelhtu si hi ka va duhlo ve! Cu lak lai ih ka mithmuh rori ih kha ti vek cu aww….. Ka lo duh tuknak hi kamawh teh a si pang maw?” ti phah rero in Pahngak cu Tahan lam panin…………

By – Mai Dai Dim

(Visited 103 times, 1 visits today)

Comments

comments

One Comment

  1. Hmmmm……DaiDim na thiam tuk lawmam.
    Ka lungtur hi Ka ngaingam lo,a peh siar ding
    Ka hngakhlap tuk..mi thinlung na tihnin thei si hi’!
    Thiam tuk rori.zuamsin aw.lungawi

Comments

%d bloggers like this: