I Seherh Duh Hlah (III)

I Seherh Duh Hlah (III)

By – Mai Dai Dim

“Ziang tin ee?! Keimah hi maw Khua ah Nini hnenah ka va um ding?!”, Suisui mit phaw kelkel in a au hlukhli. A Nu a zoh thuul, a Pa a zoh thuul, a Ni a zoh lala. An zaten an lu an sut thluh. A Pa in, “Ka fanu Suisui, na Pa kei hi khua le ram hrang zianghman tuah theimi ka neilo i ngai thiam aw. A tu na Ni ih a timi cu nangmah hrang khalah hmuhtonnak na ngah dingih tthathnemnak khal a um ding. Khuahrang hna ttuan si tho si in nangmah khal theihkauhnak na nei ding. Ziang khal sisehla na Ni hnenah kan Khua ah va um ko aw maw,” tiin a lem phah si’n forhfialnak a nei phah. A Ni khal a rak ttong ve ih, “A ziang! Mikip in, “Suisui cu Ca a thiam tuk. Phunhra a ong tikah ‘D’ paziat ha tel ke?” tiih an lo thlir leengleeng mi na si kha. Na thiammi te kan khua nauhak pawl na rak hlawm ve lo cun a ngahlo lawlaw. Ca thiam man neitu si dingin i rak thlun tengteng ding!” tiin a rak ti ve.

Suisui cu khua a ruatih hihlan a liamcia kum (7) ih thil cangmi a mitthlam ah an rong lang sal. A Pai’ nu a pi damlo cu khua rori ih a ruak vui ding a duh ruangah an khua ah an rak tlunpi. Cumi lai ah Suisui cu Kum(9) nauhak te a rak si. An Khua hi a Pai’ suahnak khua a siih a pa Kum(12) a si tiang an rak umnak a si. Suisui cu a kum(9) lai ih a pi thih zikte lawngah an khua a thleng. An khua cu khawlak ih Vok thlah khua an si. Suisui cu a um a rem thei hrimhrim lo. Vok a ttih lawng silo’n Vok Ek lakih rawl ei ringring khi har a ti tuk. Ni khat cu an khua nauhak pawl thawn ‘Thlauhre’ hmindum an ei khawm vualvo. Cu tiih Thlauhre an ei ttheh ah an zaten anmai’ inn ciar pan dingin an pok. An Thlauhre pilh buar ei dingin Vok a rualrual in an ra. Suisui cu Vokrual a hmuh veten a Thlauhre kenmi a thlakih a tlan. Vok laa-te pakhat in Suisui ih thlauhre hlon ih tlan a hmuh tikah amah lehpi ah a ruah ih Suisui cu a va dawi ciamco. A dungih Vok ra tlan a hmuh cun taw le lu khal theilo’n “Kanu!!!! Kanu!!!!!” tiin au phahin a cak thei bik patawp in a tlan sinsin. Rinlopi ah Vok-ek a pal ih a ke a zoh. A ningsin tuk lawmmam. A lip siasia! A hnar a phit ih dunglet a her. Vok laa-te cu “Ngeek!!! Hawk hawk hawk!!” ti phahin Suisui cu a rak naih deuhdeuh. Ziangdang ruah ding theilo’n a ke ih Vok-ek khal poisa nawn loin a tlan sal. Asinan a ningsinnak thawn a tlandaan a kepal a thlemnak ah a bah. Bokkhup rori in a bah ih a kutin Vok-ek a nam ngah velvo! Cutiih a can hnu nihnih nakah a pi cun mual a liamsan ih cuihnu hrimhrim an khua a tlung nawnlo. A mitthlam ah Vok-ek hlir a rong cuangih a Awk rong tok tuk khaw tukverhte ah a vong Awkk ciamco. A nu le cun mangbang tukin an zoh. “Ziang ei sualmi na nei maw? Na damlo maw Suisui?” tiin thinphang tukin an sut. Asinan ziangdang ih damlo si loih fih le ningsin Awktok men a si ruangah a ttha cih sal mai.

“A Hngak, ziangah tutiang kan mo hual cu in hmuh hrihlo? Hmaizarh maimai hi na hnattuannak ding hmun na feh thlang ding fawn. Ka thinlung tei’ ka saduhthah ringring mi cu, hnattuan dingih na feh tikah ‘innsang nu thawn’ timi um ding asinan kei ih saduhthah cu kim thiam hrimhrim hlah. Asinan i tongter ta hrimhrim awla ka va duh nan ha aw..” tiin Pahngak ih nu cun a thinlung saduhthah pawl phuangsuak phahin a ti. Pahngak cu a cabu pawl tthaten a rem rero lai a cawlih a nui’ lam hoi in, “Kanu, a tikcu a kim le na hmu leh tuk ding. Pakhatte ka lo sim ding. Anih cu a nauhak tuk. Tuikum phunhra a phi lawng si lai,” a von ti cun a nui’ mit a hong kau puppi! Ttong dingin a kaa a ang zuakzo nan a ttongsuak theilo. A thinlung ten, “Tuikum phunhra a phi lawng si lai ti cu phunsang tlawng a kai khal a hngak tum tinak maw? Aiaiai!!!!” tiin a ttaang dom in tidai hmun a va pan. A thaw a pit thluh. Mo nei cing  dingih a ruah awklai  ih kumthum maw kumli hon hngak hrih ding cu a ruah har tuk. Tibeel sungih tidai a von suakih a dawk khutkho. Cun a haa le haa rial ttuahtto’n, “Zo tak ha maw ka fapa ih thinlung la thluhtu?!” tiin amahte a phun hmukhmo. A fapa ih lungduh lengnu hmuh cu a hiar tuk lawmmam!

Suisui cu a hnipuan pawl saraang dip ah a san ttheh ih cutin an khua lam pan in a Ni thawn an feh. Mawtaw thlen lonak ke thawn rori feh ngauhngo a si. Ni a sa fawn har a ti fualfo. Lamzin kapih Sunhlu ei phahin lamlak tidai hringhrim an hon in taktak cu Suisui  ih thinlung ruahnak a danglam thluh thei. Suisui cun thinghreu kianghrol hmang tahrat ih a kianghrol vawkih feh rero a Ni cu a zoh ih a thinlung sungah thusuhnak tampi a rong um. A sup aw thei nawn loih a Ni cu a hon sut taktak. “Nini, ziangah Kalay myo rori ah tlawng sayama na ttuanih Home tuition khalah an lo ko rero. Ke thawn ziangtik hmanah na vaak dahlo. Cutawk/khatawk ka feh duh na ti cun a lo phurtu bolo! Cu tluk rori lakah mawtaw thlenlonak hi khawte rori ah tlawng saya ttuan ngah tengteng dingin na dil?” tiin a hon sut. A Ni cu cuih thusuhnak a theihin a kianghrol cu lei parah a sawh cutci ih a kut kehlam in a kehlam kheel a dom ih an hmai ih tlang cu a zoh. Cun Suisui lam ah a herih, “Duhdawtnak timi ih sullam na thei maw?” tiin a hei sut. Suisui cu a thir dukdi. Sim lohli ding theilo’n a ngui lawk. A Ni cu ti thutthiin a hong hni. “Na sim theilo silo maw? Napa le kei hi kan Khua kan suahsannak a rei tuk zo. Asinan kan suul phumnak khua cu hngilh ti a um dahlo lawng si loin duhdawt loin kan um theilo. “Duhdawtnak cu tuahnak in lang seh” tiin Bible sungah a um si. Ka kaa in khua le ram ka duhdawt ti ih ka sim rero hnakin keimah mipum rori in kan khua hrangih ka pek thei umsun pe dingin thu ka botcat ruangah si,” tiin a hon let. Suisui cu a Ni ih ttongmi cu fangkhat hnu fangkhat in a hminsin. A Ni ih lungput khal a upat tuk fawn.

Falam ihsin zingpit 6:30am in an pok ih zaanlam 4:00pm lawngah an khua an thleng thei. Suisui cu lamhla feh dahlo tiah a cawlhnom tukih an ‘donsau'(mileng khaan tiih kawhmi) ah cun a kual ih a itthat cih. Zinglam khawfing a cat ti cun “Re!!!!!! Rere!!!!!!” an hmuansak kawlthei kungin le hmuanthlamg Hai kung pawlin Thengre an ai hluahhlo. Nauhak awn-au le Thengre ai cun Suisui cu a fimharh ter. A puan a hon hlip ih a hong tho cu  tapthlang ah Kawlhra halhtak khu vutvo a von hmu. A mit a nuai. A Ni rori hivek ih a nuncan cu a zum theilo. “Khah, na hmai va phiah awla thawhhlam kan ei ding,” tiin a Ni cun a hon auh. “Thawhhlam ei thluhin ziang maw kan ti ding? Ttuan ding a um maw? Tuisun cu ka cawl duh hrih aa..” tiin Suisui cun a Ni cu thu sutphah siin a bangh tuk thu a sim phah. A Ni cu Kawlhra a kaa sungih ta a sa tuk “hawkhaa!!” ti phahin, “Aw, Nauhak pawl mirang ca le Kanan(math) na zirh dingmi na tawlrel ding. Kankhua tlawngta nauhak pawl cathiam le mibang ah kan tuah thluh ding. Cun “Tualleng tlawng”(Mucuu) khal kan phuan ding. Tui zarhpi ah Pastor thar a thleng dingih amah thawn kutkai in tualleng tlawng ah Pathian thu le hla khal kan zirh ding. Cumi cu kan khua hrangih ka sun mang pawl an si. Cun, khawlak ih Vok thlahlo dingin inntin ah Vokinn sak dingin kan sim ding,” tiin Suisui a hruainak san pawl a simfiang. Suisui cu a thawpi a thaw. A liang parah thilrit tuk tthum aw in a ruat.

Zarhte ni cu Biakinn ah an huuk celcel. Vokthau an thatih Pastor hlun thlah le thar hmuak an ceem ih an khawpawh in puai an hmang. A rawl ei puai taktak cu zarhpi zing le zaan ih ei ding an si. Zarhte cu Sa thahsun a si. An Pastor thar cu Nubu le nauhak rualin an khawsuah tlang tiang an va hmuak. Suisui cu khuihman vaklo in nauhak pawl Grama a simdaan ding pawl a tawlrel. Tualleng tlawng hrang hla pawl a khawl. Leknak tuahpi daan ding tiang a pol. An Pastor thar hmuahmi cu a ra thleng taktak. Nubu pawlin a inn khal an thianfai sak verver ih ziangkim an khua dinhmun ih tlintawk in an tawlrel sak thluh. A tak a von kholh ih lamziin a ra fehnak a kedam(boot) le a ngalzeel(sock) cu ni satnak bat ah a pho. Inn sungah a hnipuan thlengaw in a sam tuahdaan pawl a von rem thluh hnu in Nu Ho pawlih an timtuah cia Kinlan parih rawlhmeh phunkim rim cun a hnar ah an rong virh aw ciamco. Kawhhran upa pawl le an Pastor hlun khal kim ttheptthep in an to. “Saya pa, hinah to aw,” tiin fala note ‘Parte’ cun tonak a khih hmuh. A vong to ih hmunkhat thlacam tlangnak an neih hnuah rawl ei an thok cio. Hmeh pawl a zohah ei thaw a ti hmel tuktuk hai. A kut cun buh cu a von bar ve. Voksa ril sungih laifang tlor thunmi cun a mit a la bikih a hei dawh ve. Ei dingin a kaa ih a hon san zikzawng ciah ah a saril cu a pakan parah a tla tupti! A kaa sung rawl khatpi cu kaa ang ciauciau in a mit cun hmun pakhat a zoh ringring. Midang hmuahhmuah mangbang tukin a mit zohnak zawn an hei zoh ve hai. ‘Caarhlet’ ihsin a hei hmuhban mi a kedam le ngalzeel phomi par rori ah Vokpi cun renlo takin ek a rak thawh a si. An nubu Chairman a simi Parte nu cu zamrangten a va tlanih a kut hawi phahin, “Hei..Chit!!! A cuih Vok hlothlau! Tluahtlo rero ah! Ttakk!!” tiin Vok cu a va dawi. An Saya pa ih kedam cu a sawpsak sal. “Saya pa, faiten ka lo sawpsak zo,” tiin thawveng takin a ra sim.

Zaan khawmnak ah Suisui cu dung tuklo Hmai tuklo fangah a to. Khawm an von thokih hramthok hla an sakin Suisui cu “Saya Hngak!!” tiin mangbang tuk au-aw thawn a hon sal. A kiangih to Parte cun, “Khami a laifang ih ding pa khi si a tu kan Pastor thar cu. Tlangval a silai an ti,” tiin Suisui ih hna phuurah a hon sim. Suisui cu a mit khumsuk in a meng. A khawruahnak le a thinlung cu a tawivak rero. A Ni ih ttongmi, “Pastor thar thawn kutkai in kan ttuan tlang ding” ti a hna sungah a thuahthuah in an rong thang. A lungawi maw awilo ti khal theihthiam awklo in a um. Thuthangtha simnak a si thlangih Pahngak cu a hong ding. Suisui hrangah a tu a veikhatnak Pahngak ih thusim a ngainak a si. “Nun Thianghlimnak” timi thulu thawn a von sermon. Pathian thu ih nun thianghlimnak le tisa ih nun thianghlimnak tiin a sermon. Khawlak ih Vok thlahlo ding lampang in a thu a fehpi nasa. Khawm bang a tlunlam cu “Kan Pastor thar cu thlen zaan ihsi rori hivek ih mi bo tla cu! Vok cu kan senlai ihsin kan rak thlahmi a sisi. UNDP ho ih Red Cross (ciat-chi-ni) pawl lala bangin” tin an phun hmurhmo.

Suisui cu a Ni thawn nauhak ca an zirh rero. Sun ah nauhak nipi tlawng zirnak inn ah tualleng tlawng pawl ca an zirh. Pahngak cu nauhak pawl thawi lek luailo mi Suisui a zoh ah lungkim tak le hngangam tak thinlung thawn a hni rero. Suisui ih Ni in thu umdaan ziangkim a sim fel thluh ih Suisui thawn hmunkhat ih hnattuan tlang ding cu a phuur tuk. Tualleng tlawng pawl cu a,b,c le Kawlca alphabet pawl le number siardaan pawl an zirh. Bible caang tawite nitin an zirh ih hla tawite mirang le kawl hla pawl an zirh. Lehpannak a phunphun an neihpi. Cutin nikhat hnu nikhat caan an hmang vivo. “Tuisun cu Saya pa in leknak in hoha ding,” tiin Suisui cu a au lurlo. Pahngak ih ho in leknak cu an von tuah. An zaten kut bengin hla an sakih Pahngak in “pathum kop!” tiih a au le mi pathum an kopaw ih “pali” tiih a au le pali an kop aw. Cumi kop neilo tu cawh tiin le amah ih mi hruai tiin leknak an tuah. A hmaisabik ah Pahngak in a hruai. Kut bengin hla an sakih “pathum kop!” a tiih pathum in an kop aw hai. “Panga kop!” a tiih an hnattuan ziangkim bawmtu Parte kop a neilo. Parte cu hmailam ah an dirsuak ih Laam pakhat an cawh hnuah a mai’ hruai ding a si. An ti kelten kut bengin hla an sak salih, “Pahnih kop!” tiin a hong au. Pahnih pahnih in an kop aw hai. Rinlopin Pahngak le Suisui cu an rak pom aw cutci. Suisui cu nuamnaiten a pom betmi pai’ ttaang sung ihsin a hong phuak aw ih a lu vantau in a hon zoh. Lungtur rang dutdo’n Pahngak cun suk zohin a ron zoh ve. Camkhatte sung an khawruahnak le an minung a tthen aw lawk. An lung a hong fim dukdi ih an thlah aw zaangzaang. Suisui cu ningzak tuk mithmai thawn a sam cuul phahin ziang ka tuah ding ti theilo’n a her aw cuaco. Pahngak khalle thilsual tuahtu men bang phuhrung aw zet mithmai thawn a um ve.

Zaan ttim Ar hman an khuang duahdo thlang. Suisui cu a itthat thei hrimhrim lo. Sun ih thilcang pawl cu a mitthlam ah an rong cuang ciamco. A lungtur cu “Duk!! Duk!!!! Duk!!!” ti rorin a tur. A hong tho ih tidai a hong in. Tukverhte in thlapi eng a cuan. Zaan thlapa cu eng pempem. Arsi pawl khal fiang tukin an lang phengpheng. A Ni ih a rak suh dahmi, “Duhdawtnak timi ih a san na thei maw?” timi a hnathlam ah a rong thang. Khua a ruat. A lung a hnok deuhdeuh. Vantau iak-iak in thlapi cu a zoh ih, “Maw Thlapa, na hnenah ka thuthup ka lo sim ding. Tuizan ihsin khami pa ih thu ruatlo in ka um theilo. Cumi.cu ka duh tinak maw? Nang talin i theihpi hram aw. A thu ka ruah tinten ka lungtur tuar awk a tthalo. Hiti zin cun ka lungkhal a ttil leh ngaingai ding ka phang,” tiin thlapi cu a sim. Tthal khal a si tho. Pahngak cu a thawsa ah itthat theilo’n sir le sir a her rero. Rinlopiih an pom awk lai, Suisui ih ningzak mithmai umdaan pawl a mitthlam ah an rong lang ciamco. A thawsa a tuarlo. A hong tho ih tidai a hong in. A lengah thlapi eng pempem a hei hmu. Vantau in thlapi cu a zoh ve ih, “Ka tuarnak hmuah i theihpi tu nang sihram!” tiin a ti ve.

“Saya pa le Sayama Suisui, tuisun cu kot ih ‘Ai Thang Vel’ peipawk kan vong vawk ding maw!” tiin Esther cun a sawm hai. Pahngak cun theithiam lo takin, “Ai Thang Vel Peipawk ee?! Cucu ziang saw a san?” tiin a hon sut. Suisui cu a hni thutthi. Suisui cun Esther cu a zoh ih, “Khami kha tutiang a um lai maw?” tiin a sut. Esther cu a lu a sut. Cazir an ttheh in an khawhnaar ih kot timi ah an vong feh. Tiva hrek pakhat tupi ti ding tlak deuhlo nan Tuthing pipi umnak hnuai ah Caw le Sia hruainak ih hmanmi hrihrual tum viaiviai thawi thlaimi peipawk(mirang in ‘Swing’ an ti) cu an vong hmu. A hmu dahlo hrangah cun ttihnung tuksumza a si. Suisui cu kumkua a si ih khua a tlun ttum ah a rak hmu dah. “Ziangah maw Ai Thang Vel peipawk tiih an kawhnak” tiin Pahngak cun Suisui cu a sut. Zamrang takin Suisui cun, “Thuanthu Roling cabu na siar dah maw?” tiin a hon sut. “Siar dah ee” “Khami sungih ‘Simthli Hran Thang le Ai Thang Vel’ Thuanthu na ciing lai maw?” “Ciing vek a bang” “Khami ih ‘Ainu’ a simi vancung fala Ai Thang Vel ih peipawk vawknak an ti cucu siko ual” tiin hni phahin a hon ti. Pahngak cu Suisui a hei naih deuhdeuh ih, “Cuti asile Ai Thang Vel cu Vancung fala an ti ih Simthli Hran Thang cu tui kan umnak khua a si tinak maw?” tiin a hei sut. Suisui cun, “A ziang ka theih lehlam! Culai ah keicu thlilak hmanah ka rak um hrihlo pi” tiin hni phah in a ti san. Pahngak cu Suisui ih thulehdaan vutvo le umdaan zoh phahin phuhrung aw nawn in a bop a kheuh hruanhroih, “Aw…. Singai. Keikhal kanui’ pumsung hmanah ka um hrihlo ding a bang. Ee, cuti asile himi tupi cu Simthli Hran Thang ih Lo a si ding ka zum,” tiin hni ziamziam in a hon ti. “Hahaha….. Si kan ti men pei” “Hahaha….” “Hahahaaa…” tiin an pahnih in an hni tlang. Reilote sung an daih hnuah rinlopin Pahngak cun Suisui cu an lu le lu dai aw zikte in a hei naih. Suisui cu mit tthep fohfo’n “Ziang si?” ti phahin a ke karkhat dung a sip. Pahngak cu thil pakhat ruatsuak si awm takin a mit a hong vaam humhi ih, “Cuti asile hi khua ahhin Nun Fuu teh nan nei lawlaw lo maw?” tiin a hon sut. “Nun Fuu ee?!”  “Si ee. Simthli Hran Thang a thih ttumih Ai Thang Vel in Nun Fuu a phuut ti a um kha” “Ghee!!! Kha tla cu Vahui in
“Simthli Hran Thang thi aw khaw,
Ai Thang Vel in thi rongral seh an ti ee…
Hui teng.. Hui teng…” tiih a hong kawh hnuih Van Cung ihsin Ai Thang Vel ih a ron ken cihmi Fuu a si kha” “Haaa…. A hla tiangin na sak thiam. Na va mak ve! Asile Nun Fuu titak cu Vancung ah a um tinak ti” “Tulai thuthang ttha sim pawlin tahtthimnak ah an hmang ttheu na theilo maw? Hla Hmanah an phuah kha” “Ziangtin maw?” “Vancung ih mi Nun Fuu, kan sungah phuut a si zo ti hla a um kha. Fapa Zisuh khrih cu kan hrangih Nun Fuu” “Alaa!! Suisui, thuthang tha sim na va thiam awm ve. Tu cu mino caan ah thuthang tha sim lo thiah dingin ka fial tengteng hai ding” “Na Mang ah” an pahnih an nuam awknak ah nauhak pawl khal an zoh hngilh.

Nauhak pawl cu pakhat hnu pakhat peipawk an vawk hai. An kiang ihsin Suisui le Pahngak cu an rak au kio ciamco. Hrihrual kai in an to ih a dang nauhak rualcun an thutha suahin an tuul. An kut an von thlahcun an au vualvo hai. Hrihrual a vawk tucu tiva khatlam raal a va thleng. A ra kirsal ah nauhak pawlcun an rak dirih an nawpawk hnuah an tuul sal. Pahngak cu a tu a veikhat hmuhnak a si tikah nauhak an tlak sual pang ding phangin a au a kio. Peipawk vawktu nauhak pawl cu ‘Ai Thang Vel’ ih ttong cawngin, “Peipawk ka ron vawk, ka taw umpung suak ee! Ka taw cangcel suak ee!” tiin an au phah huahho. Himdamtei’ an ra kirsal a hmuh in Pahngak cu a thawpi a suah hlunhlo. Nauhak pawlcun lo theihlo ih peipawk vawk dingah Pahngak cu an fial. “Ka tuah dah” ti ding neih hrimhrim a duh ve thawn a lungkim. Suisui cu Pahngak hmai ah a va ding hlukhli ih, “Ka tlalo ding tiin thu i kam ta aw” tiin a kut zungte tung terter in a va ti. Pahngak cu a mangbang aanhai ciacia in a um. Suisui cun, ” Nangcu na tumtuk bet hlei ah nauhak lai hmanih hivek vawk dahlo na di fawn. Ka tlalo ding tin thu i kam ta aw. Himmm,,” tiin a hei naih. Pahngak khal cun “Aw. Ka tlalo ding tiin thu ka lo kam” tiin hni phahin a kut zungte cun Suisui ih kut zungte cu a von kalh. Nauhak pawlin an tuul neh thei loih Suisui in a tuul bawm ve. “1,2,3 khah!!!” anti an au ciamco. Pahngak cu naa takin hrihrual cu a pombet. Tlak a phan tuknak ah a ttang nasa tukih a thlanhripi khal a ciap thluh. Khatlam ah cun nuam a ti tuk fawn.

Thaisun cu an khawpawh in Nga Hruu burh ding a si ih thinghram an lai rere. Parte nu cun, “Saya pa, heh hi, nahrangah thinghram Parte pa in a lo laih ceem. Nga Hruuburh ih mipa thinghram kenlo cu daan a silo. Cun suncaw khal kanmah kan lo ken ceem ding. Zianghman timlam aw hlah maw” tiin thinghram(Hruu) kualkhat pe phahin a ti. “Aw,Parte nu, nannih sung cingcing kahrang ziangkim in ngaihsak ringring tu. Bawipa’n thlawsuah malza lo sawm hramseh law! Ka lungawi tuk” tiin thlawsuah a pek. Pahngak cu Nga Hruuburh tivek khal a thei dahlo. Pa Tuan hla ih “Kankhua Ka Ngai” timi VCD zuknung sung ta lawng a hmu dah. Parte nu cu Suisui tei inn ah a vong pial phah. “Saya nu, thaisun cu nan pok tum maw?” “Ai… Parte nu, kei hi tarlam pan in ziangtin maw hawklak hnen ka tel ding? Suisui hi nga Hruuburh ti khal a thei dah loih in hei kaihhruai sak aw zangfahten” “A kei teh nupi nu in tel ding ka siaklo. Parte tei pafa rual an pok ke. Parte a um ding si. Suisui cu Parte thawn an um tlang ding. Suncaw khal kanmah kan rak tuangtim ding hokhaw.” “Ai, Parte nu, suncaw cu keimah ka ken ding. Kanhrangah na zonzai rero’n,” “Aih, amahte a ken le zohman ttawm ngamlo’n a va paaklaak ciamco sawn ding. Kanmah kan ceem ding,” “Ee, cu hniahno lungawi tuk aw. Pathian in lo thlawsuah hram seh!” tiin parte nu cu an inn a tlung.

Zinglam Nazi 8:00am cun an ku aw celcel. Kuai tum na  si ruri in khawsuah lam an pan cio. Suisui cu a Ni in, “Kannih cu thinghram le kan nei fawnlo. Kutlawng rori ih lo fehter ding cu ka sia rem hlah. Himi hei keng aw” tiin ‘Raptting’ le ‘Vutcaam’ rawi palastic ih funmi a pek. Suisui cun a Ni ih pekmi cu a zoh timen khal silo’n a bih in a bih. “Nini, hi cu ziangtin maw ka ti ding?” “Aw….. A hmun nan thlen tik le Hotu pawl in “‘Vutcaam’ le ‘Raptting’ keng nan um maw???” tiin an au dingih cumi tik le na pe hai ding. Thil umdaan cu Parte in a lo sim copcop mai ding” tiin a sim. “U Suisui, na man zo maw? Mi cu khawsuah an thleng zo hokhaw,” an inn hmai in Parte a rong au. “Aw. Ka man. Tu ka ra.” tiin khawsuah lam pan in an feh. Parte in Suisui cu cawllo rori in thu a sim phah vivo. Parte cu Tleirawl Thlolsam te a si. Asinan mifim le tangdor ih mi tlawmngai thei ngaingai a si. Khawsuah cu an vong thleng. An nga hruuburhnak ding hmun cu an khua ihsin pengthum a hlatnak Ti Va ah a si. Minung an kim in Pastor pa in thlacamnak a nei ih hmunkhatten khawsuah ihsin an pok tlang vualvo.

Tiva pi an vong thlen in ti kapah an thilri pawl an taan thluh ih a khatlam raal tlang pawngah an hong so. Hotu upa hrekkhat cu ti dawltu hmunhnih in an tthen aw. Mino tlangval cakvak deuh pawlin lei an ceek. Leisen an ceekih mipi in Buri dip thawn an thiar ih ti dawlmi tili sungah an buur hai. Parte le Suisui cu Buri in leilung an zawn aw. Pahngak in “Parte, keimah ka thiar ding. Nang cu va cawl aw” tiin el theihlo in Parte ih kut cu a va phial ih Suisui thawn an zawn aw. “Raptting eih!!! Vutcaam eih!!! Dat-khe eih!!!!” tiin an au ruangro. Suisui cu khatlam khatlam ih huuk celcel thawmvang lakah ‘Khuate hla’ an sam ah a ruah ih a umhmun ah nuam ti tukin a hni hmukhmo. “U Suisui, khui na raptting teh?” Parte ih thusuhnak aw a theihin Suisui cu, “Raptting…. Raptting….” tiin a phun hnukhno. “Kha Sayama nu in a lo kenmi kha” “Aw…. Nini ih i pekmi thil fuun kha maw? In dil maw tu?” parte cu zianghman theilo Suisui ih umdaan a zohah supaw theilo’n a hong hni hruthri. Tili an dawlmi sungah leilung leisen, raptting, vutcaam le Dat-khe sia an sutparh ih cupawl cu nawi ttheitthei in an rawicawk.

Suncaw ei dingin an au salih Suisui cu a mangbang tuk. “Ziangah kan rong fehnak tlang tluan zinkap ah suncaw kan taan silo maw?” tiin parte cu a sut. “Aw…. Khami cu tlunglam hrangah si. Cun rawlngai a silo. Fuu le banhla a si. Tu suncaw kan ei tthehin hruu kan vuak ding” tiin parte cun tthaten a sim. Suncaw ei dingin an von kiil khawm. Nitinten tualleng nauhak pawlthawn suncaw an ei ah Pahngak le Suisui cu hmaiton in an ei tlang ringring. Asinan tuisun ih an suncaw ei tlang cu danglam takin an thei aw. ‘Hnahcang hnah'(Banhla hnah) thawn rawl fuun mi pakhat cu Parte tei pafa li le Pahngak le Suisui minung paruk in darhai ti um lo kut tongaw sursoih ei a si. An rawl kenmi cu Buhsen(Laifaang) le Buhraang(kawlfaang) kalh ih suanmi, cun Khasuan sen le Kawlhang(Bawnthur) le Arti kio tlangmi le Sapherh thuhmuk pawl an si. Parte pa cu Lai pacang ttha rawl baar roriin a zakhat in rawl a tthuam ih vantau vuangvo’n a hon baar. Parte ih nau le pahnih Lalte le Thangte khal thaw ti  hmel takin an ei hmuaihmo ve. Parte pa cun, “Khah Saya pa le Suisui, ei auhla maw. Hmaisong ding um hlah khaw” tiin kaa-puu thlekthlek ih rawl ei phah cun Sapherh cu a tthep(phel) ih Pahngak le Suisui cu a pek fingfing. Parte cu Suisui a zoh thuul, Pahngak a zoh thuul, hmaisong tuk mithmai thawn a um an hmuh tikah rawl von baar ve dingin an kut an von suah. Rawl parah cun an kut a tongaw dukdi lala. Zamrangten Suisui cu a kut a sup sal. “Sorry!!!” “Sorry!!” an von ti aw tlang. Suisui cu a ningzak thawn phuahlam hawl phahin, “Ka ti haal” a hon ti. Parte pa cun a rawl ei lai a aw khal fiang tuk lemlo cun, “Aw, khai ti kan dawlnak hon lan awla ti fim hong in aw” tiin a kut khih phahin a sim.

Rawl an khawh felin “Nan hruu suah uh law!!!!! Hruu kan vuak thlang ding eih!!!!!!!” tiin an au ruangro sal. Parte le Suisui cu Hruu an hruan aw. Pahngak le Parte ih nau Lalte cu an Hruu an thuah ih an hruan aw ve. An thinghram vuak awn cun raalkhat tiang a thanh baan. “Tlut-tlet!!! Tlut-tlet!!!” tiin hruu an hruan aw hai. Suisui le Pahngak cu nuam an ti tuk. Tawkfang cun, “Thla uh law!!!!!!” an ti an au sal ih phuul luailo’n thianghram cu ti sungah an thlak. An ti dawlmi an phong ve ih nawi tthuittho in a rong luang. Kuakfawp pawl cu tikap ah to in kuak an hliik vohvo ta. “Dap uh si law!!!!!” tiin an au sal lala. Parte in “U Suisui, lungdaap lakah nga tumdeuh an relh thei tak hokhaw. Nga tumdeuh kaih na duh le lungdaap lak dap aw maw” tiin a sim.

Kutza zungza in ti sung cu an dap cio. Mi hrek cu an ngabawn pawng ttheltthi zo. Suisui khal cu a thiam tawkten a dap ve hnumhno. Lungpi hnuai ti thuuknak ah a va dap ih thil pakhat a thamngah. “In bawm uh!!! In bawm uh!!!” tiin a au ciamco. Pahngak cu zamrangten Suisui pakhat khat cangah ruatin tidai sungah cun a va tlan sumso. “Suisui!!! Suisui!!!” tiin thinphang tuk au aw thawn a va ko. Parte pa khal zamrangten a ra tlan ve. Suisui cu mi pakhat parih thinheng tukih sual aw ciamco vek rori in thil buan ciamco mi a nei. “Suisui, ngarul a si kha. Ralring aw! A zaang ruh in a lo hriat pang kei!!” parte pa cu a hong au luarlo. Cu zawngah “Aiyaa!!!!” ti au aw an thei ngaingai. An va thleng cu Suisui ih kut a rak thii thliakthliak zo. Parte pa cun spirit a rak keng ngelcel ih cutin an tuam lohli. Lungpi cu an karh ih ngarul cu an hawl. Lungpi a hong tthawn awkin “Khi…khi…khi…” tiin Pahngak cu a au zualzo. Parte pa cu kai cak le zam ttha tuk a si vekin a thiirfei thawn “Putup!!” tiin a rak vuak ih ngarul cu a thi. Suisui cu a buan lai ahcun buan ta deudeu in a thihhnu riangri ah a ttih tuk a zoh ngamlo. An ngarul kaihmi cu kut Ngeel hnakin tum deuh Baan can ih sau ti viaiviai a si. Parte pa in a ngabawm ah a san ih inn an thlen hnuih tthen aw dingin an um. Suisui cu a kut a hliam ruangah tidai tham ngam nawnlo’n tidai sungah a feh tuahto men. A thinlungten, “Ka sansung ih ka rel ning theilo dingmi thuanthu pakhat ka nei. Hlanlai Sahraang kap an sim teh ziang ce! Ngarul kha tiatia a um tihman ka rak thei dahlo.” ti ruatin a hni hmekhmo. Zaanlam inn an hong thlen in veng le hnen pawl khalin a cuih ngarul tumtuk lawmmam cu an ra zoh vialvial. Cu hnuah Parte pa in a sa a can ih Suisui le Pahngak ih covo a zem.

June thla a kim in Parte cu   phunriat kai dingin tlawngluh cu tiin falam feh a tum. Suisui cu a ngarul pherh caar mi cu a sungkua pawl hrangah parte hnen in a kuat hai. Falam ah cun Theidum le Haidum lei cop ttul ringring asinan an khua ah cun ei cawk loin a um. Suisui cu nitin rawl ngai hman ei loin thingthei rah hmin lawnglawng a ei. July thla a hong kim cun phunhra ong le sung a suak ding ti thu a thang thlang. Suisui cu falam feh a tum. A sungkua pawl khal a ngai tuk thlang. A Ni cun, “Nan Saya Kyi ih Fresher Welcome a tuah  tiang Falam ah um khuan ka lo pe ding. Cu thluh veten na ra kir sal ding” tiin a cah. Suisui cu ong le sung hman thei hrihlo mi cu tiih a Ni ih thucah cu a hnih lamlam tla a suak. Zarhte zing nisuak in an khua ihsim falam lam pan in an pok. Parte nu khal a fanu Parte veh phah thawn falam a feh ve. “Thaizing phunhra sung le ong kan thei thlang ding”, tiin thin phu dukdo phah cing cun Suisui le Parte nu cu an ke feh karkhat hnu karkhat falam an naih vivo thlang.

(Visited 120 times, 1 visits today)

Comments

comments

7 Comments

  1. Pipi Na ngan thiam tuk. Ka rak lungleng thei. Thiam lawlaw. Peh vivo aw. A sungmuril ka pur vivo. Siar khawm lo deuhdeuh.

    Thiamtuk

  2. Daidim,na tiam tuk ti mi in a daih lo,Ka mittlam ah mak tuk in vok
    Ek lak ih a bah lai a um..thiam na sa..siar le a nuam tuk.

  3. Siar a nuam tuk a peh siar ding ka hngak hlap tuk… kan nauhak lai hru sut kan rak feh dah lai ka mang ruangro mitthlam ah an cuang sal rori… thiak tuk

  4. Leen Hling Par says:

    Mai Dai Dim.part IV ka rak thir,hmmm an hrusut ah ka thinlung cu a tel ve si,na thiam na ca siar a nuan

  5. A sau tuk.
    Tlangval caan ngah deuh pawl lawngin an siar paih ding ka zum.
    Tawi tete thlah theu sehla a tha.

  6. A sauzet nan siar a nuam zet fawn.

Comments

%d bloggers like this: