“I Seherh Duh Hlah” (II)

“I Seherh Duh Hlah” (II)

A Part (I) A hnuai ah…

I Seherh Duh Hlah (I)

By – Mai Dai Dim

January thla cun Falam cu khawsik timen si nawn loin thli a hrang herher thlang ih a daihdaan a dang cuang. ‘Biang note’ ti ding si thiamlo’n fala biangkhal a hram hruahhro thei. Leiphut a tam fawnih thlihraang thawn kut ke a khing duh nasa. Hni von fen khalle taksa ah a kop cutcoih feh a rem thei hrimhrim lo. “Kanu, tu tikcu fangah nunau pawlin ziangha kut ke le hmai hnih an hman duh bik?”. PaHngak cun dawr khaar ding timtuah ih dawrhmai thil thlaimi pawl a luh rero mi a nu cu a von sut. Unau hmuahhmuah nunau hlir a nei nan a unau pawlih hmai hnih hmanmi khal ngaihsak dahlo tu PaHngak ih thusuhnak “aw” a theih veten dunglet a herih mak tituk in a fapa cu a zoh. “Kafa, zaanlam a si zo. Dawr hman ka khaar tum thlangih thawhhmu manglam in i ra bia cu na silo ti aw?” tin a hon sut. PaHngak cu ti zuamzo’n a hni ih, “Kanu, na fapa a fimhring keukeu hokhaw. A thusuhmi na lehsak ding hngakin a ding”. Cu veten a nu cun Pahngak ih kutin a hruai ih dawr sungah a luhpi. Pahngak cu a mang a bang tuk. Dawr khaan sungih tohkham ah a to terih a fapa ih mitmu rori ah fiang takih a zoh hnu ah, “A Hngak, ziangtik hmanah nanu i bum dahlo ti aw. Tukhal i bum tum hlah. Zo hrangah nunau hmaihnih pawl cu na hai? Ka lo dawnlo lawlaw. Zo si pei ka ‘Mo hual’ ti theih ka duh tuk” tin a ti. Pahngak cu a tonak ihsin a dingih a bop kheuh phahin counter lamah a va feh ih, “Ka thusuhmi i sim hmaisa aw. A caan kim le ka lo sim leh ding. Tucu a tuantuk lai”, tin a hon let.

Pahngak cu phunhra a ttheh kumah apa in a rak thihsan ih anu le a unau pawl zoh dingin mizo ram ah kulii a rak hlawh rero dah. Kalay ah ‘Math major’ thawn a lengih phii in phunsang tlawng a rak ttheh hnuih ZTC ih kai a si. Curuangah a kum a nauhak nawnlo nasa. Anu le a unau pawlin fala nei dingin an tlirhnawh ringring. Ziangtikah ‘Mo’ kan nei ve pei tiah an ti ringring. Amah hi fapa pakhat a si. U nu pakhat le nau nu pahnih a nei. Anuih dawr cu innsung hmanmi thilri, ceiawknak phunphun  le ei-kaa pawl an si. Pahngak cu a cazohnak cabuai ah sathau far vangin ca a siar. “Na it hrihlo maw A Hngak?” “Aw kanu, na it thlang ding maw? Mangtha maw”. Pahngak cun zaandang an tiawk daan kelten anu cu mang tha a pek. Anu cu Pahngak ih kiang tohkham ah a vong to ih Pahngak cu sir herin a nu a hei zoh. “Kanu, na it zik sihmang ka lo ti?” “Aw, ka ihhlan ah malte lo biak ta ka duh,” “Aw, thusuh duh na nei maw kanu?” tin a hon ti. Anu cun cabuai parah hmaihnih le kut ke hnih pawl buurkhat hnu buurkhat a hon suah. Pahngak cun a mit kau puppi in anu cu a zoh ih, “Kanu, hi…hi…himi..” a awsuah khal a hak ttut tto thluh. Anu cun a lu a sutih duhnung mithmai thawn hni siamsiam in, “Si, na nau le pahnih rori in an hmangih an hmarngaih zetmi a si. Tufang Falam boruak thawn hihi an hmang tambik. Tulai fangah ka dawr khalah hipawl hi si in lei cio,” tin a sim. Pahngak cu a lungawi tuk ah anu cu a pom hlukhli ih, “Kanu, ka lo duh bik ko ee…” a von ti.

“Caanlawng kan nei ti. Tuihnu reilo ah in kharhkhum(kye-chuk) thlang ding fawnih dawr kan vak ta pei uh,” Mawmawi cun a rualpi pawl a sawm hai. Suisui cu ca a zoh rero lai thotho. Cercer in, “Poilo, anih cu a tumtahmi a sang phah fawnih um ko seh. Kanmah te kan vak ding,” a tiih an pathum cu an feh. Suisui cu a nauhakte lai ihsin ‘Ingineer line’ ngah thei ding hi a saduhthat ringring mi a si. Suisui pa cu cozah zungbawi pai’ mawtaw mawng a siih an harsa zet ttheu. Anu in ‘Me’ a zuat ih Falam ihsin penghnih hlatnak ah lo a tuah. Cozah inn fiakte kekawk ah an um. Cumi hrimhrim in Suisui cu zuamnak a pek. “Keimai’ design suaimi rori in inn ka sak ding. ‘Inn’ timi cu sungkua nuam le hlim ih lennak hmun, thunuam relin le sunmang tintian neihnak a si. ‘Kan inn’ ti ding neihlo hi cu thinnat um tuk. Inn ka nei tengteng ding!” timi hi a ruahmi bik cu a si. A thluak khal a ttha ih ca khal a zuam nasa. An tlawngah 1st lole 2nd nak a si ringring ttheu.

Zaanlam rawlzawh a cu cuahco nan a rualpi pawl an rak thleng cuanglo ruangah amahte tlung dingin a pok. Ziangtik lai khalih Cercer thawn fehtlang ringring a tu amah lawng a si tikah thil pakhat kimlo le hngilhmi nei vekin a thei aw. Biakiin pi thlang PCO zawn a thlen in “Suisui” tiih kawh aw a thei. A vong her ih, “Aw, Nu Thluai, ziang in poi maw?” “Hi, ZTC ih Andrew an timi in pek in fial” tin pacel packed cu a rak pek. Suisui cu mangbang phah ningzak phahin lungawi thu a sim ih a feh sal. Inn a hong thlen veten a zoh. A thil hmuhmi cu mak a tituk. Hmaihnih ah Vitamin E, body lotion ti pawl a hman dahlo mi an si. Cun, card pakhat a hmu ih a von siar. “Happy New Year!!!!” tiin cafang tumpin a ngan aw. X’mass le Kumthar kha khawkip ah Gospel team an feh ruangih tulawngih a pek thu pawl a ngan cih. Suisui cu khua a ruat. “Ziangruangah si pei kei ngelcel hi in thlun rero? Amah khuktthi teh an umlo maw? Kei ka tlawngkai tummi le Ingineer a si fawn. Hihi thungaithlak in i kom tum a bang sikhawh!” tiin a ruat buai. Phunhra ka phithlan cu mithmai khal ka pe cuanglo ding. Kumthar laksawng hrang lungawi thu ka sim dingih a tawk ko tiin a ruat.

11 March 2004, phunhra phi ding tlawngta pawl cu a phuul in an phuul nohno. A thlahtu thawn a phitu ding thawn No(1)&(2) BEHS le Bualrawn tlawngah minung cu an khat. Biakinn tinkim ah nubu pawl rawl-ul thlacam in an um. Pahngak khal nubu pawl lakah thlacam a rak tel ve. Thungaithlak in Suisui hrangah thla a rak cam ve. Cutin nitin biakinn ah a caan a rak hmang. 14 sun zarhte ni cu ZTC pawl degree an lak/pek ni a si. Biakinn pi cu minung an khat nasa. Pahngak cu a Uu ‘Rih Khawdar’ ih pasal neitu khal a rong tlung. A nau le pahnih khal Yangon ihsin an hong tlungih a degree lak cu an sunloihpi nasa. Cun, a nu in lungawi thusimnak puai khal a tuahsak bet. Phunhra camibuai cu an von ttheh taktak thlang. Suisui tei rualvahza cu thlah-awknak ah Falam ihsin pengnga a hlatnak ‘Lailun lungkua’ ih feh dingin an relcat. Anmah pali le an rualpi mipa Bawite le Cungpi khal an sawm cih. Cutin Lailun lungkua umnak lam pan in an feh hai.

Nisa lakih lamhla fehding an si ruangah an zaten bawngbisau an hru ih hmaidong lukhum an khum thluh.  Mawmawi in, “Tucun phunhra timi kan phi ngah vuarvi zo ih ziangha ruah ding taang ih nan ruah?” tiin thusuhnak a hon tuah. Kimte in, “Tlangval neih a cu thlang kolo dingsawm?” a tiih “Hahaaa….” an zaten an hong hni vualvo. “Asile nannih nunau pawl nan pasal dingah zovek nan duh? Nanmah thawn kum bangaw maw asilole upa sawn maw nauta sawn? Upa asile kumziat tluk upa nan duh?” Bawite in a hon sut hai. Mawmawi le Kimte in, “mah thawn khuktthi hi a ttha ve ko. Mahhnak nauta cu silo sehla,” an hon ti. “Suisui teh?” tin a von sut ih, “Hmm…. Mahhnak upa lawlaw ma le,”
“Upa lawlaw ee? Cucu a kaih ciah ding si. Haaa…” Cercer in a rak tthettholh mi a si. Bawite le Cungpi cu theithiam lo takin, “Cercer, ziang maw na sim duhsan?” an hon ti. Suisui cu a ttong a peh ih, “Ka pasal dingih ka duhthusam ka sim le  cu, keimah hnakih kumli tlun upa mi a si ding. Kumnga kumruk upa mi khal a poi lo. Cu ai tam cu si siri lo sehla” “Awhawk!!! Hawk!!!! Hawk!!!!” an kiangnai thlanglam deuh ihsin tidai lole thil ei ih thal uk-O “aw” an thei. An her aw thluh hai. Suisui ih ttong aw thei ih a rak thaltu ‘Andrew Hngak’ le a rualpi ZTC tlawngta minung pa sarih cu an von hmu. An thurel thawtuk ah ziangtik lai ah Lailun an thleng tihman an thei manlo. An thil hmuhmi ruangah an zaten ttongding theilo’n an ding thluangthli hai.

Pahngak cu a hong dingih, “Naulepawl, thlah-awknak nantuah zik maw si? Kannih khal hi rualpipawl hi Mindat ih tlung ding an siih kan ra nuam aw ta. Hmunkhat ah tuah tlang kunguh,” a hon ti. Suisui cu um ngaihnak a theilo. A rualpi dang pawlin an lungkim thluh fawnih lungkim velo a cang fawnlo. Cutin sunvu ten hmunkhat ah an nuam tlang. Pahngak ih rualpi tthabik Pacin cu zarhte sun kutsihnak thawn nupi nei ding a si. A rualpi dang pawlin Pacin tthehcun Pahngak si ding. Na hmin ih zulh ih hngaktu na si ringring pangcun aww….tiin an capoh rero hai. Pahngak cu Suisui a hei zohta ih, “Kumziat ka hngah khalle poi ka tilo. Hngaktu ihsin hngahman nei ka si dinghrang thlacam in bawm sawn uh,” a von ti hai. Zaanlam a si thlang cun tlun tim an tuah cio. “Ee, khinah sunhlu le biangkok kan vong lo ta pei uh,” kutzung khih terter in Cercer cun a ti hai. Cercer ih zung khihnak zawn an zoh ih an lu an sut hmuthmo. Mipa pawl a kung parah an kai ih nunau pawlin tangin an rak bawh. Bawite in Sunhlu kung cu a hnin ciamcoih tiva hrekte ah an ttil thluh. Suisui cu sunhlu sar dingin tiva hrekte ah a vong ttum. Thingrop pakhat a palhrual ih a vong riil. A ke zawnah ‘rul haa’ hring thlengthleng a ra zuarzo cu a hmulo. A hong taal buai rero. Cercer cu Suisui a rilh hmuin vong bawm tum in a suk hnohno. “Suisui” tiin ko phahin a von zoh ih a hmuhmi thil ruangah “Auu!!!!!!!! Rul!!!!!” naa takin a hong au suak. Suisui cu a ke a hon khai zawngah ti zukzi in khuaihen vekih hentu nei in a thei aw. Cun, hit cuaico in a theisal. A ke a von zoh, “Ai Kanu!!!!!!!!” tiih a au aw cu an umnak kuam sung a khawk ruangro. Amah cu a lung a mitih a tlu ruairo. A aw thawm cu a thuahthuah in….

Thingkung par ihsin ziangtin ka ttum ti khal thei awlo in Pahngak cu a zuang a phar. An zaten Suisui cu an vong fuuk. Kimte in, “Rul ih cuk khi a tur zaizan lo dingih kham a ttul” “Ziangtin maw kan kham ding” pahngak cun zamrang takin a hon sut. “Puansia in a ke rul ih cuknak tlun cekcivin kan ttem ding. Fek takih ttem a ttul  Puansia nei kan um maw?” tiin an buai. Cungpi in, “Puansia cu ka neilo puanttha lawng ka nei” “Mi thih le nun lakah kan taal buai ti lakih capoh vek rak thlak ruri hlah!” ti phahin Pahngak cun a sunghruk ‘banian’ (sut-kye) cu a thlek duardi ih Suisui ke cu fek takin a von ttawn. Cun a zaang parah a pawkih cutin an feh hai. Mawmawi in, “Bawite le Cungpi, nannih rak tlan uhla Zamual khua ihsin falam  ah Thangkolh hon phone uh. Bike thawn in rong hmuak seh.” “Aw. Cutin a ttha ding” tin hmakhatte ah an tlan vurvo cih.

Pahngak cu bangh khal a theilo. A thinlung luahkhattu nu a zaang parah a pawk ngahmi cu a lungkim tuk. Thu a ruat ih tuizing Suisui ih ttongmi a von ruat dukdi. “Kei ka pasal dingih ka thuduhsam ka sim asile cu keimah hnakih kumli tlun upami. Kumnga kumruk khal poilo. Cu ai upa cu silo sehla” ti ttongfang cun a thin a phangter. Pahngak cu Suisui hnakin kumriat upa mi a si. “Ka Boihte, tu tik tu can fala ka rak nei dahlo. Nangmah lawng rori hi ka duhmi na si. Hitin na kiangnai ih umtu si ringring ding ka duhthusam a si. Phunsang tlawng na kai ding khal ka lo hngak ding. Hngahman nei dingin thla ka cam,” tiin thu a ruat rero. Suisui cu a lungtur rang dupdo. A umnak a von zoh aw  ih Pahngak ih zaang parah a rak si. Ziangtin ka um ding ti a thei aw nawnlo. I tthum dingin ka dil pei maw tiin a ruat. A canglo ka feh thei zik silo ih thutam ka hlawh sawn ding a tiih Pahngak ih hngawng cu fekten a von pom ih a zaang parah a vong bek. Pahngak cu Suisui ih lungtur ngai phahin le a cangvaih daan ruat in lungkim takin a hni hiamhiam. Zamual ihsin Thangkolh in Bike thawn a hon phurih Vankau tlangih Zato innpi  an hong thleng.

Suisui cu a mit a hon mengih, Mawmawi, Cercer le Kimte cu thin nuamlo tak mithmai thawn   ihkhun tlangah  an ding thliangthliang cu a hon hmu. “Ziangah khavek mithmai thawn in ra leng? A rei hlanah ka dam cih ding si. Mizaan hman sii bawipa in a tur a zaizan loin nan rak phit thiam ih a dam lohli ding in ti kha nan thei ttheh ko si. Khatin mikhual bangin ding hlah uh. Khih to uh,” tiin hni phahin a ti. Zohman ziangtin kan ttong ding ti theilo in pakhat le pakhat an zoh aw hai. Suisui cun an mithmai umdaan zoh in, “Ziangah thusim duhmi in nei maw? Sim ko uh” tiin a dil hai. Netnak cun Mawmawi in, “Suisui, thaizing ihsin kei le Kimte cu Aizawl pan in kan feh ding. Aizawl ah Thiamtah kan hong zir ding. Ka Nute in in ron cah,” a hon ti. Suisui cu Cercer lam a hoi ih Cercer khalle ngamlo tak cingin, “Mandalay ah nau kil dingin kapu in i hon cah” a ti ve. Suisui cu a hong ding zikih an zaten “Suisui! Dinghlah aw” tiin Suisui ih ihkhun parah an va to thluh. Suisui cun a zoh hai ih, “Si ee, nauhak kan si nawnlo. Zo cio phunhra ttheh cun mah le hna cio ah an tthen aw daan si. Tthen awknak cu ton salnak ih hramthok hokhaw a si sawn. Ziangtik Falam nan rak tlung salding timi lawng in sim uh.” Mawmawi in, “Kannih cu phunhra kan ong asile cu kan rak tlunglo mai thei. Phunhra kan sung le cu kan rak kai sal ding.” “Phunhra nan ong le cu ziangah nan rak tlunglo ding? Khui ah maw tlawng nan peh tum ii?” tiin a sut. Mawmawi le Kimte cu an zoh aw ih, “Delhi ah kan lan mai thei” an hon ti. Cercer in, “keicu tthaal tlawngpit sung lawng si ka um ding. Ka hong tlung sal lohli ding” a ti ve. Suisui cun, “Si ee, keikhal ka dam in hnattuan ding ka hawl ve ding si. In seherh hlah uh. Damten kan tongaw leh ding,” tiin hnemaw phahin a ti.

Zinglam 7:00am cun Chin-Tawng-Tan ‘Car gate’ ah mi an khat thluh. Suisui cu an sangkaa hramah to in khua a cuan. Thuuk zetih thuruat phahin tlangzim ihsin ‘Ni’ a hong suak lai cu a zoh. “Buhrum!!!!” an inn hmaiah Bike a hong cawl ih a thuruah lai a hong thir dukdi. Thangkolh cun, Suisui cu naute cawi in a hong cawi ih Bike parah a to ter. Chin-Tawng-Tan car gate an vong thlen in Cercer cu mawtaw sangkaa ah a ke khat cu a hon pal zo. Thil pakhat seherh zetmi nei bangin dunglet a herih Thangkolh a hei hmu dukdi. Zamrangten a va pan ih, Suisui cu a va pom. Mawtaw sungih a to zo Mawmawi le Kimte khal an ra suak salih mithli haal ttiamttiam in an ding thluh. Mawtaw mawngtu pa cun “Pitpit!!!!” ring takin a hon pe. Suisui cu an pom thluh ih, “Sui, in ngai thiam aw maw,” an ti. Suisui cun, “Khah, nanmah lawng si an lo hngah. Va feh uh. Dam le tluangten kan tongaw sal ding. In seherh hrimhrim hlah uh maw. Thangkolh a um ko si. Feh uh! Feh Uh!!!” tiin ttah aw thawn a tul in a tul hai. Cercer tei pathum cu dunglet her phah rero cing le mitthli hnul phahin Mawtaw sung cu an lut. Suisui hrangah cun tuar a har fualfo! A neihmi thil hmuahhmuah sungral thluh vekin a thei aw. An liamnak tlang cuan in a mitthli cu vanruah ti bang suurin a rong dok thlohthlo.

Tthaal tlawngpit cun Falam cu a tthing riahriah. Mi vak sukso tongaw khal um hlah. Ti kiauhko in mi vak an um fangfang. Suisui cu kianghrol thawn a vak sukso ttheu. Anu le nau le pawl lo an feh ih anih innlam ah hna a rak ttuan. Taisir zetin an innsang ih ttulmi ziangkim a tuah. An ‘Me inn’ a ttha tuklo cu rem in sobul thawn a khenh rero. “Suisui, ziang na tuah?” aw pakhat a thei. Zoih aw a si ti khal a thei. A thil tuahlai a bangih, “Me inn ka rem” ti phahin a tlunah a hong kai. Innsung ah cun an lutih, “Saya Hngak, ziang thupoi na nei maw?” ti phahin tidai khuatkhat cabuai parah a von ret. Pahngak cun, “Nei hranlo ee. Ka ra lo leng ta men,” tiin phuhrung aw nawn mithmai thawn a hon ti. Suisui cu aw saunawn thawn, “Aw…” ti phahin a lu a sut hmuthmo. Pahngak cu a to khal remlo. Suisui a duhnak thu umpi men nawn loin “Ka lo duh” timi ttongfang rori thawn a hna ri ih sim a duh. Asinan a tak le a ram ah a sim ngam fawnlo. Caanheu rero in tomen rem silo in a lungtur le hruan aw dukdo. A thlanhripi khal a ciap thluh thang. A awm zawn Angki cu a kut thawn thing phahin a sem aw rero. Suisui cun a zoh ringring ih, “Saya Hngak, a sa na ti tuk maw?” tiin a sut. Pahngak cu Suisui lam a her aw vukvi ih, “Aw, ziangah hi tluk a sa ka theilo. Ka tlung cu thlang hi. Rawlsuan na ttul silo maw Suisui?” a von ti. Suisui khal cu phehlo ten, “Aw.” a rak ti ve mai. “Sile neta caan ka neih le ka ra lo leng sal ding maw” tiin a suak cih.

“Duhdawtnak timi hi a va mak ve! Ziangah a cuih ‘Ka lo duh’ ti rori cu ka sim ngamlo aww?!” tiin amah le mah ttihhrut ti aw takin pahngak cu lamzin tluan a phun bukbo. Hmaizarh cun Falam ihsin peng 17 a hlatnak hmunih Pastor ttuan dingin a feh a cu thlang. Suisui hnenih ‘Ka Lo Duh’ ti sim tengteng dingin a zuam aw rero. Zaanlam khawmaw(unau hmelpalh) hrawng a si. Suisui khal cu a ke a dam ngah thlang ruangah Biakinn lam a rak pan ve. Biakinn hmai ah Suisui le Pahngak cu an tongaw cutci. “Suisui!” “Saya Hngak!” an kawh awknak aw a tongaw thlurthli. An pahnih in an hni. Pahngak cu a thinlungten, “Aw, ka thlacam Pathian in i sang a  si hi. Tuizan cu a sim duhmi ka sim taktak thlang ding” tiin a ruat rero. Cutin Biakinn sungih thlacam dingin an lut tlang. An suaksal ih Suisui cu inn tluncih tum in a ke a kar zo. Pahngak in, “Suisui, caan na nei maw?” tiin a hei sut. Suisui cu a kekar a cawl dukdi ih, “Aw, nei ko ee,” tiin a hei sawn. Biakinn hmai ahcun an dingih Pahngak cun, “Suisui, karual Pacin tei nupa hi ziangtin an tongaw ti na thei maw?” tiin a sut. Suisui cu a lu thing phahin, “Theilo,” a rak ti. “Himi biakinn ah si an tonawk hmaisabik” “Ziangtin maw?” Pahngak cu a dindaan a remh ih ZTC  Tlawnglam  Electric vang sersi cu hei zoh phahin, “Aw…. A hmaisabik an mit le mit a ton-awknak cu hitawk a si ih neta ah an ron thei aw vivoih tucun innsang khat an din zo,” tin a sim. Suisui cun Pahngak ih umdaan cu mit ttheplo in a zoh ringring. Pahngak cu a ttong a peh ih, “Mituih ka thlacam mi tla hitawk ih ka tonmi nu thawn innsangkhat in dinter hram aw tiin ka dil. Ka rualpa pakhat in “Biakinn ih rinlo piih danglam nawn ih tongaw cu Pathian samhrisih an si” tiin i rak sim dah. Si taktak dingin thla ka cam,” tiin sim phahin Suisui lam a hei her. Suisui cu ningzak phah nawn in awsuah dim thekthoten, “Aw…..” tiin a lu a sut. Pahngak cun, “Cunu cu zo a si ti theih na duhlo maw Suisui?” a hei ti. Zamrang zetin, “Aw, duh ee. Zo si cunu cu?” a hon ti lohli. Pahngak cu thinlung nawp aw ciamciam a herih Suisui ih mitmu rori ah zoh tahrat in, “Cunu cu maw, ka thinlung hmuahhmuah luahkhat thluhtu le “kaduatboihte” ti ih ka…”  “Uu Suisui, Papa le Nini nih an lo poi. Rak tlung zaangzaang aw” thaw sam helhel in a naupa piangte ih aw cun Pahngak ih ttong cu a ron botcat. Suisui cu a her vukvi ih, “Kapa a rak tlung maw? Nini cu ziang a rak tuah ve?” tiin a nau cu a hei sut. A nau Piangte cun, “Rak tlung awla na thei ding,” a ti san. Suisui cu Pahngak lam a her salih, “Saya Hngak, Kapa le a nau Kani an rak tlung a ti. Ka feh ttul” tiin hmaisong zetin a ti. Pahngak khal cun, “Aw..aw…. Feh aw. A ngah ko. Feh aw….” Suisui cu anau thawn kutkai aw in zamrangten an fehliam cih. Pahngak cun, “Kasim duhmi  simthluh ta man loih,” tiin thinlungten haheuh zet cingin tlang an liamtiang a hei zoh miarmo.

(Visited 77 times, 1 visits today)

Comments

comments

2 Comments

  1. jennyrunneipar says:

    hi tlukin ca ngan thiam le tha kan lo neih hi lungawi um tuk . zuam sinsin aw maw…lungawi…

  2. Thiam lawlaw. Ka lung a rak kuai
    a dang tla

Comments

%d bloggers like this: