I Seherh Duh Hlah (I)

I Seherh Duh Hlah (I)

By – Mai Dai Dim

Thlatang a si thlang vekin Falam khua cu a dai ngaingai. Colhni zing khawm pan minung cu an tongaw surhso. A sen, a dum, a raang, a eng(aihre) tiin rong phunphun in mi mit a la duhin zoh an mawi nasa. Mi khawpi dang bangin Mawtaw tongaw um lemlo’n ke thawn sungrual khawm dingin biakinn pantu a suk, a so, a phei tiin an si ruri. Falam ti mawi zettu ‘FBC’ biakinn hmai a sir ih Faizong khal a par ciaici thlang. Biakinn tualrawn ah minung cu a phuul in an phuul. Biakinn sangka ihsin kawhhran upa pawl cun Bulletin zem phahin mi an cibai rero. Biakinn sung cu nuam teten mi an khat vivo thlang.

‘SS(Sunday School)’ caan hmangtu ding pawl an rong lut. Cun, ‘Suak Thuan Hlarem’ pawl pakhat teten an rong lut. ‘Veng Hlarem’ to nakah ‘Victorious’ tlawngta pawl an tlawng uniform thawn an rong lut thlutthlo. ‘Church Choir’ pawl pakhat hnu pakhat solfa tonic thawn ngan fiahfiah mi hlarem file kengin an rong lut. Mipi a thawngteel biakinn khat ttheptthep in an to. Culai fangah music lam ttuanvo neitu ‘David Thang’ cun, keyboard ti riangroten “Ni sarih sung him tein” timi a rak tum phah rero. Cutin hlaremtu zaten an luh kim thluh hnuin hla hruaitu cun a kut tlunlam ihsin tanglamah a ttum terih an zaten an to thluh.

Khawm hramthok dingin khawm hruaitu cu a hong ding. Church Choir tonak ih to tu ‘Pa Hngak’ cun a von zoh cu!!!!!! A mit cu a hrangih thilmak  tuk a hmu ti theihtheih fahran in a hong kau puppi. Si, ‘Zukneng mit bang’ an ti ttheu vek mitmeng nei Suisui ih mitcun  nimthlakau bang a mitah a ron kap dukdi. A kiangih to ‘PaCin’ cu a kiu in a hei hngawngh ih, “Khui ka bulletin teh?” tiah a hei sut. Pacin cun, “Ziang na cang? Khih na file sungah a um na hmulo maw?” a rak ti. PaHngak cu zamrangten a bulletin a von zoh ih, “Hlarem – Victorious” ti a von hmu. A hmai a hong sa vutvo. Daak theitawk a daak. “Keimai’ Boihte” tiin amahte a ttong. Thlacam sung khalah miih hmuhlo dingin a kehlam hmaicu hlabu thawn a phenih Suisui cu a bih thup. Ziangtin khawmcaan kan hmang tikhal a thei nawn lo.

‘Duet (mi pahnih)’ hlasak nak caan a kimih, Suisui le Cercer cu hmailam ah an hong suak. Mipi cun dai ttheptthep in an ngai ih Suisui le Cercer cun aw-suah fiang ruahro in an hon sak. PaHngak cu Biakinn sungah thothe um sehla cu a pial riai lo ding ti theihin a cil hman dolh man lo khopin kaa ang ciauciau in hla cu a ngai. Khawm an ban veten PaHngak cu a tlan ciamcoih biakinn thlanglam ah a va feh. A hmuh duh zetmi Suisui cu an Saya Kyi thawn an rak biak aw rero lai a si. Laitah hni a fengih an tlawng fawm angki hru in kha lai ih a rak laar zetmi Model – Thet Moon Myint(tu cu acedamy a si zo) ih sam meh style three step an ti ttheu mi vek in a liang tiang a rong sawhaw mi a sam neemte cu Falam zilthli thiangte cun uilo takin a rak hranh zerzo. A zam serhso mi a sam, a hmailam ih rong tla cu a kut neemte thawn hon phial phahin karkhat hnu karkhat nuam teten a feh vivo. Boruak umtudaan zoh phahin PaHngak cun a hei naih vivo ve. “Suisui, tuini na hlasak cu na thiam lawlaw si” a va ti. Suisui cu dunglet a herih, “Aw…. Saya Hngak, hihi….. Keimah lawng ka saklo pi. Cercer thawn kan si ual” “Aw….. Hihi…. Nan hlasak ti ding sinan sokhaw. Ka mawh ngai.” tiin thiam awlo zetin a lu kheuh phahin a hon ti sal.

13 December 2003 kum a si. “Duhdawtmi nu le pa u le nau pawl, tuini ZTC fundfit ih nomnak phunkim kan tuahmi ah in ra telpi in tha in ra pek ding kan lo sawm”. Loud speaker thawn heh-le-chet an au. Thawm le ri cu tuarawk ttha loin ZTC ahcun a khat. Khatlam khatlam in an huuk celcel. PaHngak cu ‘Santa Claus’ a ttuan. A ttuanmi hi a lungkim lo tuk. “Ka boihte a rat khalle ka tong theilo ding. Cencerh lole Sabuti zuartu hrawng ka si sehla aww….” tiin a ruat rero. Falam khawsung mipi um zatih a tam sawn cu ZTC lam pan in an phei hluahhlo hai.

“Suisui, nang ziangmi ei dingin na timtuah?” Cercer cu ei le in lawnglawng ruatman ringring a si ruangah ziang kan ei ding ti ruatin a hei sut. Suisui cun, “Ashii….. Na ca kha zoh sawn aw. Saya Kyi nih in thlah taktak ih kan thleng hnu le kan zoh cop mai ding,” tiin a rak let. Cercer cun Suisui ih cabu a hei khup sakih, “Saya Kyi nih ka lo thlah ding in ti hnuhnu cu feh dingin ralring aw. Paisa ziangzat na nei?” Suisui cu ‘Paisa’ ti ttongfang a theihcun a mithmai a nau sualso cih. Phunhra a si ruangih ttentto teih boarder an ret mi a si. Duhtapoh ih paisa hmang thei a silo daan pawl cu amah lawngin a thei.

“Andrew PaHngak an timi khi ziangha a ttuan ke? Ei le in zuar a ciah ahcun a zuarmi rori ka ei ding. Leknak lamih a ttuan ahcun a kaihmi rori ziangzat cem khalin ka lek ding.” Mawmawi ih lungkim le diriam zetih ttong aw a theihin Cercer cu a ding vukvi ih, a khel khatlam le khatlam ah a kut suang tahratin le a lu in a kehlam liang ron dai zikte tiang ringh thle ngiaingai in, ti serso tei’ hni phah cun, “Huh!!!!! Phunhra telawng nan si lai. ZTC fundfit ah tha kan pe ding ti menmen ih feh tum loin mi pakhat hrangih feh nan tum cu ka va lo zangfak ve!” tin a hon ti. Mawmawi cu a thinheng tuk. I tihrim ti a thei keukeu. “Na ttong kha sup hnik aw! Nangmah teh ziang ce!” “Hih!! Ka sim mi cu a diklo maw? Andrew PaHngak in teh ziangtin a lo zoh pei? Mi hnoksak a lo ti hai ding. Mah thawn a mil lomi tivek ruat ruri hlah uh!” “Ni Cer! Daiten um men aw!” Cercer beng ding rori in Mawmawi cu a kut a hawi/khai zo. Asinan a rualnu Kimte in a rak dawn. A kut cu a rak kaihsak. “Mawmawi!” tiih Kimtei’ a kawh zawng le an khaan leader ih “Saya Kyi a ra!” ti aw a tongaw thlurthli. An zaten an dai ttheptthep sal.

“UHumm!!!!” An Saya Kyi cu a dang a hon thian ta ih a cil a dolh hnuah, “Khah, tu ihsin caan nan ngah. Hitawk ihsin pahnih pahnih ttuai in nan pok ding. Zaanlam tiang caan ka lo pe,” a von ti. An zaten an khir an khawt ciamco. An tlawng fawm cu an hru thluhih pahnih ttuai teten ZTC lam pan in an feh thlutthlo hai. OPD veng an va thlen cun thawmvang a ring nasa tuk. A tlir in an tlir ut-o. ZTC cu an va thleng. Khatlam ah, “Joy to the world” ti hla a thang. Khatlam ihsin, “Aw Bethlehem tlang ka thlen hlanlo” ti hla. Leknak phunkim, ei le in zuartu pawlin mi ban vek an rak thai zuatzo. Khatlam leh ahcun laam phunphun in an laam fawn. Huuk detdet le hnok celcel in an um. Suisui le Cercer khal cu pawl zohin an vak vivo ve.

“Hmmm…….. Hivek Santa Claus ttuan cu nuamlo tuk! Minung tampi in in zukpi nan, ka duhmi hmuah ka zukpi theilo!” tiin thanau zetin PaHngak cu a phun rero. Suisui cu ca zuam tukmi a si vekin thildang nuamnak ti vekah caan pek ciamco minung a si dahlo. A ca pakhat lawng a buaipi ringring. Tuisun ih ZTC Fundfit ahcun a mitin mi pakhat a hawl ve thlang. A hawl hmu theilo. Leknak phunkim le ei-in zuarnak tinkim ah a umlo. Ziangruangah a hawl tikhal a thei awlo. “Suisui, Sabuti kan ei pei” Cercer ih sawm vekin Sabuti cu an ei. An ei tthehin Cercer in, “Suisui, khitawk innkhaan ihsin mi an lut an suak culci. Kan va zoh ve pei,” “Aw. Feh kung uh,” tiin an va feh. An pahnih in an mit a hong kau puppi ih an zoh aw vukvi. Mawmawi le Kimte cun Santa Claus cu pom in an rak zukpi ciamco. Cercer cun, “Ka hmuh paihlo zawng tak si!” ti phahin Suisui ih kut a dirih suak dingin an ke an hei kar. Cu zawngah, “Ah!!!!” Suisui a au. Nauhak pate in a sangkio eimi a tlak terih Suisui ke parah a tla. Cumi a von kian tum zawngah a siti naal ah a tolh ih a to sutsi. “Auch!!!!!!” “Suisui!!” Santa Claus picu a ra tlanih Suisui cu a ra kai tho. Suisui le Cercer cun mangbang tukin an rak zoh. “Andrew Hngak ka si. Suisui, a na tuk maw?” tiin a von sut. Suisui cu lip neinei phahin, “Aw, Saya Hngak, a ngah ko. Na hna kha neh zetin va ttuan aw. I seherh duh hlah. Inn ah ka va cawl dingih a dam cih mai ding,” tiin a hon ti. Cercer in Suisui cu a hruai ih an feh. PaHngak cun tlang an liam tiang seherh zetin a hei zoh cuahco. Suisui ih ttongmi, “Na hna kha neh zetin ttuan aw. I seherh duh hlah,” timi cu a hna sungah khawk ruangro in a rong thang.

Naamte hriam zuahzo thawn ‘Memu’ (unau Halkha pawlin Falam rah an timi) a zelh tuahto mi Cercer cu Mit ttheplo rori in Suisui cun a zoh ringring. A Memu cu zungpi tia in a at ih hnakphek kanhmui le cite phomhmi sungah a von phim murmo. Memu khal lang nawnlo hnakphek hlirih khat cu a kaa sungah a hon san. Suisui cu thinphang tuk au-aw in, “Cercer! Khati roriin hnakphek ei ringring hlah! Pumnat na ngah taktak ding hokhaw” a hon ti. Cercer cun ti nuahno’n a hon ttongih, “Hnakphek lawng ka ei lo pi. A sungah a thawtuk mi memu a um na theilo maw? Cumi si ka ei san tak,” “Ha!! Nang thu lo sim cu mi leh salnak na thei ringring ih aiha…. Pumnat na ngah ding ka lo phansak tuk ngaingai hokhaw,” a ti thotho. Cercer cu Suisui ih simmi cu thupi ah khal ngai cuang lo’n, a thil ei mi cu leilungtlun thil ei ttha hmuahhmuah lakih ei thawbik si awm tak khin a keu suahsoih a ei ciamco. A cil a lem duahdo hnuah awki sanglo neemlo cun, “A ngaihin ka ngaih hai lo. An umdaan hi ka mitah a tlem in an tlem thlurthlo lo rori simai,” tiin ziang thu pehpar um lo roriin a hon ttong. Suisui cun mangbang nawn in, “Zo maw na ti tak?” “Zodang hawitur um? Khawsia tei pahnih kha ma le. Khai Santa Claus kha Andrew Hngak ti an theih ruangah si kha an va pom ciamco. Shiiii……” “Hahahaaaaa……..” Suisui cu ti huakho roriin a hong hni. Cercer cun, “Ziangah maw cu ti rori ih na hnih ciamco?” “Cercer, hihihi….. Nauhak aa rori na si ko. Mawmawi in a lo hremhrim rero a si kha. Tutiang na thinheng a reh thei hrihlo maw?” tiah a von sut. Cercer cu a vong ngui ta. Mawmawi le Cercer cu rualpi ttha zet an si. An duh aw in an kom ngaih aw zet. Ei tlang in tlang it tlang hi an rak si. Asinan kandung thlakhat rei ah dawrah thil an lei tlangih an thil leimi hmuahhmuah cu Cercer ih Vaidip sungah an san thluh. Ca zoh caan a kimih kiltu zohman an neihlo lai ah Cercer cu an thil leimi a phorh thluh ih khung parah a darh thluh. Pakhat hnu pakhat a san salih rinlopin Khaini buurkhat a tong. A mang a bang tuk. Zoih ta ti a thei theilo. Curuangah Mawmawi a hei sut. “Mawmawi, ziangah kan thil leimi lakah Khaini a tel thei?” Mawmawi cu a tonak ihsin zamrangten a ra tlan ih, “Khui, zamrangten in pek aw” tiin a dil. Cercer cun zo ih leimi tile zo si hmawm ti a theiduh hmaisa ruangah a pe duhlo. Mawmawi cun “I pe aw” tiin a dil rero nan a pek duh cuanglo ruangah Cercer ih kut cu a kai ih an longaw ciamco. Culai tak fangah an Saya Kyi a ra ih Mawmawi a kut a thlah zawng le Cercer khal a kut a thlah ve ih an Khaini buur cu zial parah a tla ih a bung thluh. Cutin mipi hmaiah thawi an tuar. Cercer cun, “Phunhrek ka kai thok ihsin phunkua tiangah tlawng saya Kyi ih thawi ka tong dahlo. A tu khal keimah ka sual ti le silo. Thildang ruangah si sehla rualpi ttha hrangah ka tuar ko ding. Asinan, Khaini ruangah tlawngta khazat hmai ih thawi ka tuar cu a duhin ka duh hrimhrim lo!” tiin Mawmawi parih a thinheng nak cu a dai ter theilo. Mawmawi in thil pakhat a tuahcun a phirsit zawng hlir ih rak tuah a duh. A ngaingai ahcun Mawmawi amah khal Khaini a hmawm ve lo. Mihrang a lei sakmi a si. Cutin simfiangnak nei cuang hleilo ih a um ruangah an pahnih cu raal vekah an cang. Cercer in i ngaihlo ti thei in Mawmawi le Cercer ih thinheng zawng tuah a rak paih tuk fawn. Cercer cu a thawpi a hon suah.

“Cercer, ziangthu maw cu ti lawmmam ih na ruah?” Suisui ih thusuhnak ruangah Cercer cu a hong fim dukdi ih, “Hehe…. Suisui, Andrew Hngak khi ziangtin na hmu? A lo duh ti ka theifiang. A lo ngaihsak daan kha. Kan dungkum ihsin a lo heerhot ringring si. Tucun nangmah khal i pheh hlah maw! ‘Saya nu’ tiin ka lo ko thlang ding. Tuikum degree a ngah ding khah!” “Cercer, ziang le ziangha na ruah ciamco! Tuizing ah nangmah rori in phunhra te lawng  kan si lai thu le mah thawn a mil lomi tivek ruat ruri lo dingin na sim ii…” “Heee…… Mawmawi ngelcel a si ruangah khatin ka ti men na. Hee….” “Ghee!!!!! Khah, cu vek ruah rero ai in Math kan ttuat sawn pei” “Aw, a ttha ngai ding. Aww…. Ka memu tla a rak dum thluh nangmah ka lo biak kual nak ah” tiin Cercer cu a memu a von la sal. Cercer cu Math a ti thei tuklo ruangah Suisui thawn an tuah tlang ringring ttheu.

Zaan nazi 11:00pm lawngah PaHngak cu inn a thleng. Kut ke a kholh thluh hnuin ihnak ah a zau. A mitthlam ah Suisui ih bah lai a rong lang. A ttongmi pawl a hnathlam ah a rong thang. A thawpi  a hon thawt hnu ah, “Suisui, Ka boihte, ziang na bang? Tu vek caanah na kiang naiah lo tuamhlawm tu si ka va duh em! Ka duhthusam hi ziang tikah a kim pei awww….” tiin a ruat rero. Itthat a tum rero nan a itthat theilo ruangah a Dairy ah ca a ngan. Pa Hngak cu mi tlaitluang zet a siih, mi awkam zaang zet khal a si. A virvat a ttha tukih thil tuahding an ti poh cun a tu rori tuah cih duh pawl a si. Tuikum hi a B.Th final year a si. Fala nei dahlo lawlaw a siih tucun ka cu ve thlang ti a ruah phah thawn, a nu le nau le in tu le tu “mo hual te hman kan nei thei fawnlo” an ti ringring mi khalin a hna a ti zing tuk thlang. Tucun, thinlung luahkhattu a nei ve thlang.

Zinglam rawl zawhcaan a kim in Suisui le Cercer cu kut kai aw in an feh. Biakinn pi thlang lamzin tonawknak pi an thlen in an dung ihsin thirleng in a rak lanih an hmai ah a cawl. “Aw Saya Hngak” tiin an pahnih in an hon ko thlurthloih an hni thluh. Thlatang khawsik a si tikah an ttong zawng le an kaa khu vutvo. Kerhlum hru in an tuam aw ttha nasa. Pa Hngak cun, “Suisui, ziang na bang na ke cu a naa tuk maw? Zaanteh ca nan zoh thei maw?” tiin a sut. Suisui cu Cercer a hei zoh ih Cercer in a mit a rak sinh ruapri. “Aw….. Ka ke cu zianghman a canglo. A ttha ko. Ca khal kan zoh thei phah ko. Nangmah teh na…..” “Aw, hi fehnak ding ka nei ih heh.” ti in Suisui ih ttong lai a phit ih palastic ih fun mi cu Suisui a pek. Suisui cu a mang a bang tuk ih a kut ih palastic a zoh thul, Pa Hngak a hei zoh thul. Cun, Cercer a hei zohsal. Pa Hngak cu hni siamsiam in, “Kan Tthawphat(Avogado) thar ka lo teh. Hihi…. Rak ei uh maw nan pahnih in. Ka feh ding. Sun ttha uh.” tiin a feh. Thawphat cu pumli a si ih Cercer pumhnih a pek. A tu ei theihcih ih hmin a si. Suisui cu a khawruah a har. “Ziangtin si pei Thawphat ka duh ti a theih ke aww….” tiin a ruat rero.

X’mass cu vengtin ah hlunghlai zetin an hmang cio. Mawmawi cu an khua a tlungih Kimte khalin a thlun ve. Cercer le Suisui cu  X’mass sun cekci lawng mi an pawlkom. Suisui cu tumtahnak sangpi a neih ruangah ca lawng rori a zoh. Kumthar cun tlawng an lut salih Mawmawi ih umdaan cu a danglam thlang. Nauhak te lai ihsin rak kom aw mi Cercer thawn raal si ding cu a ruat theilo. Khua ihsin a rak phurhmi Banhla pherh cu kengin Suisui kiangah a va to. “Suisui, nannih X’mass nan hmang nuam maw?” “Aw, nuam ve ko. Nannih teh? Ziangmi in sum? Nan khawrah in sum maw?” “Heee….. Sum ee. Hi” tiin Banhla Pherh le Fu ti pawl cu a pek. Cun, “Kumthar cun ziangtinkim a thar a ttul. Thinhengnak khal hlonhlo ding. Keicu zo par hmanah thincing neih ka duhlo,” tiin a hon ti. Suisui khal cun, “Si ee, thincing neih tivek a tthalo lawlaw. A tu thinheng a tu ttha lehsal kha kan Bawipa Jesuh khal ih a duhmi si. Kan pali nuam takin….” “Zo maw thincing nei?! Nan ti sanmi ka thei ko cuh! Suisui, khami Banhla pherh khal kha ei hlah. Ka duhlo.” Cercer cu a au luarlo. Suisui cun, “Ziangah maw Banhla pherh ei cu i dawn? Ka duh tukmi si ual. A la  Thaw daan hman ei hnik aw” tiin a kaa ah Banhla pherh san phahin  cercer cu a hei pek. Cercer cu thinheng mithmai thawn leng a va suak zik ih a ke in ca-ik pakhat a pal ngah. A von zoh ih a lengah zianghman nganmi a umlo. A von ong ih a von siar. Mawmawi ih ngaidam dilnak ca a si. Kandung lai ih Khaini kha Cercer ih naunu  in Mawmawi a lei termi a rak si thu a von theihcun Cercer cu a ning a zak tuk. Ti phiarphoten Mawmawi a hon zoh ih Mawmawi cun, “Nanau in ka U thei ter hrimhrim hlah in ti ruangah si. Amai’ hrangding khal a si ve lo.” “A tawk! Keimah si ka thin rang tuk ruangah si. Mawmawi i ngai thiam aw maw” Mawmawi cu a hni ih, “Kan pali um khawm vualvo ka ngai tuk ee…” tiin a hon ti. Cutin, duhdawtaw zetin an pali cu khua an sa sal.

“Suisui, a lo seherh zettu Santa pi khi zoh aw hi..” Mawmawi in zuk pawl a ron keng liailiai ih a hmuh rero hai. Cercer in, “Nannih pahnih hi ka lo ngaihlo tuk. kannih hmuah Santa hman kan zukpi ngahlo. Nanmah ruangah si,” a ti. “Khikhikhikhik!!” Mawmawi le Kimte cu ti khukkho’n an hong hni. Suisui le Cercer cun mit ttheplo in an zoh. Mawmawi cu a hong dingih, lip neinei in a kaa a tuah ih bungbukun in a ke a tham phah. Cun suisui ih aw thluk a hon cawngih, “Aw Saya Hngak, na hna kha neh zetin va ttuan aw. I seherh duh hlah”  a hon ti. “Hahaha….hahaha….

hiiiihiii” an zaten an hong hni vualvo. Suisui cu a ning zak tukah ziangdang ttong ding theilo in a ca a von kau ih, “camibuai a nai tuk zo. Hihi…haaa…tiih hnih men caan a si nawnlo.” a ttong ko nan, a thinlung te cun a hnih suak si a ningzak cem thawn khung parah kun in a cabu in a lu a khuh ta.
(Visited 161 times, 1 visits today)

Comments

comments

3 Comments

  1. Ohh…siar a va manhla ve…thinlung teih duh phah cingten

    I seherh duh hlah vun ti ngerngo hi cu..na thiam tuk Mai DaiDim.
    Zuam sinsin aw.

  2. Memu ti ka thei ih ka kam sur theh… ka mitthlam ah Falam a cuang ruang ro kan nauhak lai ka vung mang … na ngan thiam nasa

  3. Pingback: “I Seherh Duh Hlah” (II) : chinlandtoday.info

Comments

%d bloggers like this: