I RAK RUAH DAH… KA RUALNU IN

I rak ruah dah… Ka rualnu in

By: Hniangsinpa

Mi hrekkhat le thufim hrekkhat ahcun, “Mipa le nunau cu rualpi awk ngaingai a theih lo” tiin an rak sim dah ko nan, ka sim duhmi ka rualnu thawn cun, cuvek lam zianghman a um lo. Harsatnak ah kan bawmaw ih, mangbang can khalah thu kan ruah aw ttheu.  Hmun dangdangih kan vun um hnu ah, veikhat cu kan tawngaw hruak ih, keimah khal ka thir dukdi!! Lakphak dawrah kan lut ih, Coffee khuat hnih veve hrawng kan in ngah hnu cun, kan ngaiawknak thu rel mi khal a cem thlang a si hi’ tiah kei cun, man vun pek ka tum ih, hmansehla a nih cun, “Mal ten, thu dang lo ruah ding ka nei lai, to hrih aw” tiah i ti. Kei khal ka to sal ih, thu cu i ruah cih ding hmang ka ti lai ah, tong lo in, cabuai hnuailam cu a bih ringring. “Ziang ha maw i ruah duh mi cu?” tiah ka hei ti. “Kan pa thawn kan then aw!!!” tiin I vun sawn ih, kei khal cun, an thenawknak san sut thiam lawn, “A va pawi so” tiah ka hei hnem ve.

“A san i sut lo nan, ka lo sim ding” tiin i vun ti. A pasal cu ka theih dah mi a si lo ih, ka hmuh dah mi khal a rak si lo. Can tawi te lawng kan nei nan, cui can cu ka rualnu hnemtheinak a si ding ahcun tiin, kei khal in am zet in ka hmang. A thok ihsin hitin i ruah.

“Tlawng kan pih hnu khan, khua ah ka tlung ih, cun ka nu le pai duhdan cun tlawng peh vivo kha a rak si ih, kei khal in ka el lem lo. Tlawng pih sung cu, in lam ah in leng ka nei hnuaihni theu ih, hmansehla cutiih thungai vun thlukpi ding ah ka ruat dah lo. Cuisin can a hung liam vivo ih, Engineer pakhat, buaih (Degree) ngah cun i leng tam in, thlun khal kan thlun aw tam a si ding, can a rei cun kan thlahaw thei nawn lo ih, kutsih ding cun kan lungkim nan, nu le pa cu zozo khalin kan sim hrih lo”.

“Zankhat cu, thlapi van hnuaiah kan pahnih in thunuam kan rel rero ih, kei cu a kiangih ka um tikah ka hna a ngam a si kei cu, a vorhlam liang ahcun ka zau ih, thu i ruah rero… ka hna a rak ngam sual a si ding, thu i ruah hmaisak pawl cu ka thei nan, a duhdan le duhmi, a huat zawng le a mai sinak pawl i sim rero lai ahcun, theilo in ka rak siing (sleep) ih, a thurel a cem hnu ah a si ding, ka hung tthang ih, in lam pan cun kan tlung ih, cui hnu reilo ah, kut khal cu kan sih cih”.

“Hmansehla, thla thum li hrawng kan neihawk hnu cun, kan remaw thei lo. Rawl ka suan khallen tha ten a ei duh lo ih, lenglam rawl a run tlun mi cu kei khalin tha ten ka rak eisak duh lo. Cun hnipuan ka rak leisak khallen a lung a awi thei lo, cuvek in kei khal cu thotho cu ka si. Ka duhdan a bangaw thei ngaingai lo. Ka hrangih hremhmun a si vek ih, a hrang khalah hremhmun a si ve ding tiah ka ruat ih, tha ten kan thenaw a si cu. Cumi lak ih thiamlo siih ka theihawknak bik cu, ‘A duhzawng i rak sim laiih ka rak siing kha a si’ tiah i ruah. Cui hnu reilo ah kan pan lamlam pan in kan tlung.

Ka rualnu ih i ruah mi ihsin ka sarsuah mi cu, “Kan Laimi, nunau tamsawn hin, an nunau sinak theiaw cing in, an pasal duhzawng si an tum zet ko: Hmansehla, an pasal thawn theihterawknak an neih hmaisak theu lo ruangih thenaw sal hi tam zet an si. Ram dang le phundang ka va rel in ka sim ngam lo. Kan Lai nunau cun, mipa hnuaiih kun ding an si an theiaw ko (Kun ti ruangih ziangtinkim ih kun ka tinak a si lo, nunau sinak theiaw mi ka rel duh sawn). Hmansehla, an pasal duhzawng an theihthiam theu lo ruangih thenawknak um mi hi cu pawi ka ti zet.

Ram leng kan thleng ih, kan theih dah mi khal si lo, kan sungkhat unau in, a tha an ti mi kha kan ko ih, kan nei theu. Cutikah, theihawk ngai hlan ih neiaw kan si ruangah, thenawknak lamzin sangka hi a ongaw ol zet theu. Nupa cu, ziangtinkim ih ruataw ding, tuam hlawmaw ding kan si nan, kan theihawk ngaingai lonak in, pakhat le pakhat karlak ah, theihthiamawknak a mal duh zet. Kan neiaw ta ceng cu, thenawk har kan ti fawn, nuthlawi pathlawi si kan zuam fawn lo ih, harsa ti cingcingin, kan in sang ahcun kan um. “In sang nuam cu Vanram naihbik a si” an timi thu cu, calai le zuknung hrang lawngah kan hrangah an cang theu.

Curuangah, ka sim duhmi cu, nu le pa si dingih kan tumtah awk ngaingai hlan ahhin, pakhat le pakhat theithiamaw dingih, zirawk nak can neih tum hramhram sehla, cumi cun nupa karlak ah ci nung, a hnget mi a kho ter dingih, in sungsang nuam, mi zohthim tlakah in suah ding tiah ka ruat. Ramleng ih kan um khalah, tulai sanah Phone awk a har lo, kan duhmi ziangtinkim rel ngah hnuah thuthluknak tuah ngam cio sehla cun nupa fek khoh zet kan din thei ding tiah ka ruat.

A hleice in, mipa hin ramleng kan thlen hnuih kawhawk kan hmang zet ih, a sual, a tha lo ti lam in ka rel lo. Nupi neih cu, kumkim hrang ahcun hiar um zet mi a si ko nan, thlakhlelh sual ruangih kan thenawk ding hnak in, kan phone bill ren lo in, tongka talin kan duhmi, kan duhzawng le zingtinkim simaw ngam sehla ti hi ka duhthusam a si. Nunau khal in ningzahnak cu hlip in, nehhnu ih insang nuam din lo hnakin tiah, tongkam khal suup lo ih rel ngam hi kan cu thlang in ka thei. Ziangtinkim kan simawk le kan ruahawk hnu ih kan neihawk ahcun, sungkaw siat lam hnakin, sungkaw nuam kan naih ding a si ti thinlung kan neih hi ka duhthusam a si.

(Visited 85 times, 1 visits today)

Comments

comments

4 Comments

  1. STTluanga Tuallawt says:

    Hi hi thupi zet ka ti ve. Siar a nuam zet, duh hnakin a mal lam ka khawp deuh lo. Hniangsinpa in hun khilai bet ding maw.

  2. Hniangsinpa,

    Na ti tha.
    Na thuruah a va tam awm ve.

    Nupi na neih ahcun na dai rupri men thei.

    Pathuam
    ======

  3. Siar man hla tuk aw… Thil thupi zet a si fawn…

  4. Thu tha tha in rak ngan sak nak par ah kan lung aw na sa. Amah bel te ca na ngan tik le famkim tawi deuh in in rak ngan sak thei ah cun kan lung aw zat ding upatnak lian pi thawn…..

Comments

%d bloggers like this: