Huham thawn I Thuam

January 2
Tlawngkai Nikhat

Huham thawn I Thuam

Curuangah u le nau pawl, nanmah lakah Thlarau Thianghlim le fimnak in a khatmi mi pasarih hril uhla anmah pawl cu hih thuhla tawlreltu ah kan ret ding. – Tirh. 6:3

Bible Siar Ding: Tirh. 6:1-10

Kawhhran rak din tirlai caan ah dungthluntu pawl cu ttuanvo tampi in a rak nenzet. Sungtel pawl ih nitin nuntu khuasak daan ih an ttulsammi cu tuahsak cawk a rak si lo, ih mi tampi in an nuhmei pawl nan zoh ttha lo ti’n dungthluntu pawl parah mawhthluk phah in an phunciar ruri. Curuangah dungthluntu pawl cu tokhawm thurelnak an nei ih cuih nuhmei pawl zohkhentu dingah an lak ihsin “Thlarau Thianghlim le fimnak thawn a khatmi” mi pasarih hril ih ttuanvo pe dingin thuhrisahcatnak an tuah. Ziangvek vanlam khurkhua ruah theinak so a si. Ziangbanguk hnattuan tebik khal a va si ah, fimthiamnak ttul ciamco lomi thazaang ih ttuan dingmi a si hmanah, Pathian innsang riantu ding cu “Thlarau Thianghlim thawn a khatmi” a si rori a ttul.

Kawhhran hnattuan kan ti tikah nitin ih tuah ringring dingmi thil terek te tiangin Pathian hrangah thianghlimzet ih ttuan le tham a ttul, ziangahtile kawhhran cu Thlarau Thianghlim ih neihmi le ukmi a si ruangah a si. Duhdawtmi zumtu unau, Pathian cu Amah hrangih hnattuantu dingih mi a hril tikah hnattuan hrekkhat hrang ahcun a thupi lemlo ruangah malte deuh lawngin hriah a thih ti a um cuang lo.

Kawhhran hnattuantu ding hrimhrim cu ziangvekte a si khalle huham thawn a thuam awk rori a ttul ih Pathian in ziangtik caan khalah a hnattuantu ding cu an parah a duhnak famkim ih ttuantu an si theinak dingah huham a burh a ttul. Thlarau Thianghlim thawn khah nun kan ti tikah a cawl dah lomi nunnak sim duhmi a si. Duhnung lozet, ningzahnak le thihnak Cross ihsin hram kan thok a ttul ih cuih thihnak cun thawhsaalnak nun ah in thlenh ding. Cule Thlarau Thianghlim in kan khat dingih cuticun sunlawinak in sunlawinak ah kan feh vingvo ding a si (2 Korin 3:18).

Thlarau Thianghlim thawn baptism kan co kan timi ih sullam cu, sunglam thlaru nun ah catbaang loin nun thianghlimnak le huham thiltitheinak thawn a tthangso ringringmi a si timi hi hngilh hrimhrim lo ding. Minung in tidai a kai (tide) tikah an thei ih a ttum saal tik khalah an thei. Ziangtluk in so Kawhhran in vanlam hriakthihnak cu a ttul. Pathian ih umpinak le huham cahnak thawn a khahter le a thuamnak cu hih khawvel leilungmi pawl in an mit in an hmuh in an theithiam tengteng a ttul.

Kan nitin hnattuannak ah Pathian lung kan tong asile thil fate parih kan rin-um ruangah thil tumpi kiltu ah Pathian in in tuah ding (Matt. 25:21).

@ Smith Wigglesworth

Comments

comments

Comments

%d bloggers like this: