HT Issue 80

HRUAITU zarhtin thuthang hi Malaysia um  kan Falam mi lakah Falam
t.ong ih kan “Regular Magazines?neihsun a si vekin; zo ciau khal in
kan upat thiam ih a lungawium zet.  Pathian lamhruainak in a Vol 80th
nak tiang kan rawn thleng thei hi a lungawium hleice.. A rak suah pek
ah cun beidongnak lungpi tiang hman a rak tawng, soiselnak le
dokalhnak phunphun khal a rak tawng ko nan, a rak tawlrel thawktu,
LCF hruaitu upa pawl ih lungput; Malaysia ah LCF a din sung cu nung
ding ih rak tawlrelmi a sivek in; Laimi inkhaisan a duhtu Pathian,
Calai a duhdawt ruang ih ?Bible?tiang in petu kan Pathian  cun ?
HRUAITU?hi  a thih hloh a sianglo.
Kan thuthangca hin tui sun ni tiang ih kan Laimi lak ah ni tleu
engmawi a rawn hmu ve hi, upat a tlakmi LCF upa pawl, tlawmngainak
thinlung thawn a khatmi LCF mino pawl; ca ngantu le siar tu, sumpai
cem rero khal ui sianglo ten rak lei tu pawl; ziangtluk harnak  tawn
lai khal i duhsaknak tumpi thawn a nunthei nak ding
lamzin sialfai t.heutu kan zate t.anrualnak rahsuak a si. Kan Pathian
in sunparnak co hram seh.
Duhdawt mi unau , HRUAITU thuthangca hi kan siar thluh le zangfahten
kan ret.ha hramhram pei uh. Calai ih hmual neih zia kan theih fiang
deuh deuh tikah kan Lai t.ong rori ih thuthangca hi kan zohsal duh
caan a thleng lai ding. A cangthei le, khua ih kan nu le kan pa, kan
unau pawl tiang hman a bu rori hin kuat thei t.heu sehla, ziangtluk
hmual a nei ding.
HRUAITU hi  a tlamtlinlonak tampi a um ding, asinan a t.hat sinsin
danding theitu le, a tlamtlin nakding theitu, kan Lai calai thanso
nak ding theitu pawl….kan zohawk men cun a thanso ding vekin a
thang theilo ding. Curuangah, Pathian ih fimthiamnak in pekmi hi kan
miphun, kan milaipi pawl hrangah kan hlawm ve ciau hram pei uh. Kan
miphun theihank lam le thil ziangkim ih mi kan bang ve theinak ding
hrang, na thinlung sungih na khawlmi pawl kha, ?ca rori in rawn ngan
aw?na ngan vekvek in kan rak lo suahsak ding.
Hruaitu a nunkhua sau hram seh!!!
Bible dikzia le Ni neta ih thil thlengding..
            By : Ela
Kan Bible hi Pathian thu a sinak cu ( Internal evidence ) ti ih
kawhmi, a sungthu ah a mahte a nemhngetaw. Cupawl lak ah Prophets
pawl ih thu rak phuan lawkmi; a thlengkim vivo ih, ni neta ih thil
thleng ding an rak phuan lawk pawl khal a kim vivo thlang. Cupawl cu
kan Pathian thu diknak langtertu le ni neta ih tlangleng kan sinak
lantertu an si. A hnuailam vek hin mallai kan zoh tlang pei uh.
Kan Bible hin milai pawl um tu dan ding hi a rak simcia thluh ti na
thei maw? Israel pawl hmun khat ah hruai kahwm an si hnu ah caan a
cem dan ding thu hi. Krih ratsal caan a naizo kan ti tikah, tuhlan
ihsin an sim t.heumi a siko, ti tla a awlte. Leitlun pum ah redio le
TV in siseh Magazine in siseh, caan a nai thlang thu hi simtu tampi
kan nei.  Billy Graham, Hal Lindsey, Ray Brubaker,John Hagee, Zola
Levitt, Jack Van Impe, Peter Lalonade, Tim La Haye le mi hminthang
hrekkhat pawl in a hleice in; ni neta ih thil thleng ding thu hi in
sim t.heu.
Bible theithiam pawl hrangah cun ziang dang hman ih sim fiang ciamco
a t.ullo bang in; mahle mah a uaraw tuk tu, mai hmakhua lawng ruat
pawl, Leitlun thilri lawng lawng duh pawl le Pathian hnakin milai
pawl ih thangt.hatnak men hawl pawl hrang ah cun; ziangti zawng khal
ih simfiang theih an si lo. ( Dan 12 : 4, 10; Mtt 24 : 37, 39 siar
aw).
Ruat hnik aw. 4000 A.D. ih a cang lai dingmi pawl khi na ruahnak in
na phuang cia thei maw? Kawhhran hi ziangveka si ding ih, ziang ram
le ziangram so hmunkhat ah t.ang khawm ding? Kan Bible cun a rak
phuang cia thluh. Vei 11 lawng silo in vei za tampi a simcia mi pawl
an thleng kim vivo. Cucu Peter nih a theih fiangtuk ruangah Bible hi
Pathian thu rori a si tiah a rak ngan.
( 2 Peter 1 : 20, 21 ).
Kan Bible hi Pathian thu a sinak le  ni neta ih kan um thlang thu
lanternak cu:
1. Judah miphun pawl Leitlun ramkip ah an darhsarh t.heh ding; ni
neta ah hnampi an si lai ding. ( Iss 66 : 8, Mic 5 : 3, Ezek 38 : 8).
Hi Pathian thu hi kum 2500 lai a rei hnu, May 14, 1948 kum ah a rak
thleng kim zo.
Israel hi 721 B.C hrawng ah rak siatsuah a si ih, Judah hi kum 135
hnu ah siatsuah a rak si. Miphun 14 rori in Israel ram hi an rak
luah. Asinan Pathian thu cun Israel miphun cu ka tungding sal ding a
ti. Tu ah Israel pawl cun an ram rori ah hruai khawm an si nak khi ?
ni neta?ah kan um ti fiangter tu a si. Tribulation, armagedon le Krih
ih ratsalnak cu kan naih deuhdeuh ti khal a fiang ter.
Bible in, “milai pawl cun hivek caan hminsinnak hi an zumlo ding?a
rak timi cu a hman vivo. Tulai minung pawl cun Noah sanlai ih tilik
hman kha kan zum nawnlo, Pathian thu khalkan ngaihsak nawnlo.
2.  Israel miphun pawl hmunkhat ah hruaikhawm sal an si ding. (
Isaiah 66 : 8) ).  November 29, 1947 kum ah U.N. General Assembly cun
Palestine ah Judah pawl ram dint.hat sal ding thu an rak pompi. May
14, 1948, zanlam nazi 4 : 00pm  ah anmahte ih an ding thlang thu an
phuang ih, Luatnak cazual, Hebrew t.ong ih nganmi, 1930 kum ah
British pawl in an rak ngansakmi  cu mipi hmaiah an siarsuak ih
Israel cun Independence an rak phuang. A thaizing May 15 ihsin
Egyptian, Syrian, Lebanese, Jordan le Iraqi pawl cun Israel cu an do
cih.
3. Israel cu an ram ah ka hruaikir sal ding ( Ezekiel 38 : 8 ) cu May
14, 1948 ah a rak thleng kim ih, Israel ram miphun 14 lai ih rak
luahnak hmun ah cun Israel pawl cu ramkip ihsin an kirsal ciamco.
4. Israel  cun Jerusalem an co sal ding thu ( Joel 2 : 32; Isa 28 :
14; Ezek 22 : 19 ). 1967 kum ah hi Bible thu hi a rak thlengkim
cekci.  . Ni neta ih Kawhhran pawl cu hlumlo dailo ih an um ding
thu , mitcaw, rethei le tak lawng ih zumtu pawl um ding thu(
Revelation 3 : 14 – 22 ) hi; tulai zumtu a tiaw pawl lak ah a
thlengkim cekci. Tulai thuthangt.ha phuangtu tampi cun Pathian thu
hnak in Leitlun thuanthu an rel tam sawn thlang, an members pawl ngai
thei zawng lawng ih thusim tu tampi an um thlang. Pathian inn khalah
Bible keng paih nawnlo khawp ih Leitlun lam ih tlan kan tamtuk zo.
6. Bible in ni neta ih thil thlengding 50 lenglo in sim. Cu pawl lak
ah malten vawn tarlang sehla :
A.  Zumnak an tlansan dingih thil t.halo an tuah ding ( I Timo 4 : 1).
B. Mipi pawl in ni neta ih thil thleng ding pawl an hnihsuak men ding
ih an zumlo ding ( 2 Peter 3 : 3, 4 : 1 ).
C. Mah le mah lawng an duhdawtaw ding. ( 2 Tim 3 : 1,2).Mai hrang
lawng lawng ah kan tuah kan t.uan?
D. Nu le pa’i thu an awilo ding. ( 2 Tim 3 : 1,2.)
E. Zianghmanlo ah an lungawi ding( 2 tim 3 : 1,2.)
F. Hurnak a karh ding ( Lk 17 : 28, 30;        Gen 19 : 5, Rome 1 :
24, 26, 27).
H.  Pathian hnak in nawmcennak an duh deuh ding (2 tim 3 : 1,2,4).
Foot bawll zoh, Picnic feh le it hiahho maw kan paih deuh Biakinn ih
feh? America ah cun, ?In God we trust?timi cafang rori hman capo
sainak ahan hmang zo.
I. Rittheih thil hman a luar ding ( Rev 9 : 21). Ziangtluk in so kan
san ah hi thil pawlhi an thlenkim??? Ni neta ih um kan sinak cu a
fiang ko lo maw?
A liam ciami kum 50 hrawng ah; kan pipu pawl cun  an inn sangka hman
kharlo in zan an it t.heu. Tulai kan san teh?
7. Leitlun siat ter thei ralt.huam a um ding thu ( Mk 13 : 20; Rev
6 : 8; Rev 9 : 18; 12). Hi thu hi thal le fei pawl hman lai caan ih
rak nganmi a sinan, tui ni ah cun a kim ceci zo a silo maw? Russia le
USA ( 2004 ih zohnak ) ih neihmi Nuclear pawl komkhawm hin Leitlun
milai hmuahmuah nunnak cu vutcam ah vei 6 hnak ih tam a cang ter thei.
8 . Thuthangtha hi Leitlun pum ah phuandarh a si ding thu ( Mk 13 :
10 ). Hi thu hi ca print-nak set hman a rak um hlanah nganmi a si
nan, tuini ahcun, thuthangtha hi Leitlun hmun kip ah siar theih a si
ih,  le Redio khal ih ngai theih in a um.
9.  Ni neta ih Israel cu an ram ih hruaikhawm an si tik ah; Israel
thlang lam ram ah ralkap power cakzet ram a um ding timi cu, tuini ih
Russia hi an si. ( Ezekiel 38 : 2 – 4,8,15, 16 ).
  10. Israel ram saklam ah 200million ralkap nei ram a ding ding timi
hi kum 2000 lai liamcia ah ziangtin Bible in a rak sim thei? Tuini ah
China cun hizat ralkap hi a neih ruangah a hngawng a tum zet.
11. Roman Empire hlun ah Economic khat ih dingkhawm ram pawl din suah
ding. ( Dan 2 : 44 ). Tuini ih European Economic Community ( EEC )
pawl khi, an members ram pawl in paisa pakhat lawng hman ding an ti
mi khi…kan Pathian thu thleng kim tertu a si.
A par ih kan nganmi pawl lawng hman hin Pathian thu hi thuphan le
phuahcawp men a silo thu, ni neta ah tulai zumtu pawl hi kan um zo
thu fiangten a lang ter. Unau Leitlun nawmnak sual kulhpi sung ah a
tanglai mi na si hman ah, na sual sir in Pathian hnen pan loli aw.
Mtt 16 : 26 ih kan hmuh vek in Lennak le hminthannak, Leitlun pum
hman nei hmanla kan thlarau a thih cun ziang hlawknak so kan hmuh
ding?
Mithiang lawr hlan ih a thleng dingmi thil kan Pathian thu in
insimmi pawl hi nikhat hnu nikhat an thlengkim cuahco ih, caan t.ha
hi a liam zutzo a si ko. Zohman hlohral duhlo ih rundam kan si
theinak ding ah zangfahnak caan t.ha Pathian in inawnsak lai ah hin,
unau na muang sual pang ding? Krih in na hrang a tuarnak hi upat lam
le thih zawng ih lungawi thu sim nuapno men in a tawk lo? Krih hrang
kan caan t.ha, kan fimthiamnak, kan thinlung le cahnak hmuahhmuah hi
hmang ciau thlang uh si.
Sorce : The Encycolopedia of Bible Prophecy.
Thiang lawr le Tribulation
Russia le Arabs ram hrekkhat pawl in Israel an do ding ih, U.S.A.
in Israel a bawm pei maw? Do ding.
*  Leitlun milai 1/4 hi kan thi thluh pei maw? Thithluh ding.
*  Ramram ti umlo ih sumdawnnak caan kan tawng pei maw?Tawng ding.
*  Natnak tihnung..AIDS tivek a karh sinsin pei maw? Karh sinsin ding.
RAPTURE ti cu lan Lai tawng cun ?thiang lawr?ti a si bik ko.
Thianglawnr timi cu, ?Leilungtlun ih Krih zumtu, an rah rori ih
langsuak theu hmuahhmuah pawl caan khat te ah  Krih hen ih lakso ih
um ding?thu simnak a si. Thianglawr hi harnak caan ( tribulation)
timi a ra thlen hlante ah a si ding thu kan Bible in a phuang cia.
Thianglawr ih tel ding pawl khal Bible cun malte lawng an si ding a
ti. Bible cun zumtu pawl vanih lakso kan si ding thu a rak sim cia (
I Cor 15 : 51,52, I Thess 4 : 16, 17 )
Cutik ah cun dilo..salo ih um pawl hmuahmuah le Pathian thuthangtha
zumdulo pawl, Pathian thu thlun duhlo pawl cu Leiah tanta an si ding
ih Tribulation caan rapthlak cu an tawng ding.
TRIBULATIONtimi hi Leitlun milai thuanthu ih siatnak tihnungbik le
rapthlakbik a si ding. Thianglawr theh veten Antichrist ti ih kawhmi
Sualnak pa a ra pawt ding ih European Economic Community ( EEC ) cu a
rawn control ding.
Cui Antichrist cu dikzet le felzet vek in a lang ding ih; Israel le
ram dnag pawl lak ah ral a suak ter ding.  Cucu Tribulation thawknak
ding a si. Tribulation hi kum 7 ding a sinan Bawipa in 3 1/2 lawng ah
a tawi ter ding.( Mk 13 : 20, Rome 9 : 23 ). Ziangtik kum le nithla
ah so hi thil hi a thlen ding ti lawngte Bible in a sim lo.
Huatawknak, thathawknak, rukruknak le hurnak sual tinkim khal karh
ter a si ding.
Hi harnak caan sungah hin Russia, Iran le ram hrekkhat pawl cun
Israel an do ding ih USA cu Israel lam ih ding in a rawn tho ve ding.
Tingkung hmun thum then hmun khat cu a kang theh ding, tipi thuanthum
thentum then khat cu thisen ah a cang ding; Tipi sung ih rannung
thenthum thenkhat khal an thi ding. Lawngpi thenthum then khat khal a
siat thluh ding ih tidai thenthum then khat cu tur ah a cang theh
ding.Tamnak le natnak hri phunphun a karh ciamco ding ih, linghnin
khal a hnin ciamco ding.
Cui harnak phunkip le ralpi lak ih thilo; luat mi pawl cun Judh
miphun 144,000 pawl thuthangtha simnak thawng in Jesuh rundam tu Bawi
ih pom theinak caan tha an nei sal ding. Culai ah cun Prophet hmanlo
le Krih vek ih rawng khal tampi an um sal ding. Tulai ih zirhnak
diklo pawl khal hi a rawng suaksal ciamco ding. Cun Jerusalem Temple
khal hi sak that sal a si ding.
tribulation theh hnu kum thum ah  Antichrist ( sakawlh ) a lu ah
thihpitlak  ralthuam ruang ih hma a putmi cu a damsal ding ih a ra
suak sal ding. A mah le mah cu Pathian tiah a phuangaw ding ih
Jerusalem Temple ah a um ding. Temple ih raithawinak pawl tla tawp
ter theh an si ding. Prophet lem pawl thawn thilmak tampi an tuah
ding ih, Jerusalem biakinn rori ah Antichrist ih zuk ( Image; not
picture ) cu temple hmai ah tarsuah a si ding. Cumi zuk hmai ih kun
duhlo le bia duhlo pawl cu an lu tansak an si ding.
Hi caan ah hin Israel mi ( Pathain ih hrilcia) pawl cu, Judah
piangthar pawl cun an nun himnak hrangah an tlan hlo ding ih, Pathian
in an hrang ih a hmun remruatcia ah a thup hai ding. Ticun, Leitlun
milai hmuahmuah in antichrist cu cibai an buk ding ih…harnak
tribulation khal a pehaw vivo ding.
antichrist mithianghlim pawl doin ralpi a phuang ding ih, Leitlun
mipi pawl cu an doaw ciamco ding. Cui caan ahcun atichrist ih number
( 666 ) cu an cal ah simaw, an vawrhlam baan ah simaw ngan duhlotu
pohpoh cun khawi hmanah thil zuar le thil lei a ngahlo ding.
Culai fangah Pathian zawlnei pahnih an ra lang ding ih, pakhat cu
Elijah a si. Ni 1260 sung awng an bawl ding. Mipi pawl cu antichrist
bia lo ding in an forh ding ih, Antichrist a bietu pawl hrang ah sual
ngaidamnak a um nawnlo thu an tlangau ding. Hi Pathian milai pahnih
hin Leilung ah hremnak phunphun suah ter theinak power le Van ihsin
ruah surlo ding in van rori hman khar theinak power an nei. Cutikah
rannung maksak pipi le varngen pawl thawn milai an hrem ding. Milai
pawl cun thih duh ah thihnak an hawl ding ih an hmulo ding. Tipi pawl
thisen ah an cang ding ih, linghnin le natnak hri pawl an karh bet
ciamco ding. Khaw saklam ihsin ralkap 200million rori Israel do ding
in an ra pok ding ih Euphrates tipi an kan ding. Ni 1260 sung ah cun
Leilung tlun milai then thum then hnih hnak ih tam thah an si ding.
Cun,Pathian zawlnei pahnih cu thah an si ding. Mipi pawl cu an hlim
zet ding nan, nithum le hrek cekci  ah thihnak ihsin an thosal ding
ih milai pawl mithmuh rori ah van ah lakso an si ding. A hmutu pawl
hmuahhmuah cu tihnak in an khat ding. Cutikah milai pawl cun  ?Lungpi
in nen that aw,  a thinhengnak cu a thawkzo ih zo si tuar thei ding?
an ti ding ( Rev 6 : 16, 17 ).
Israel thuanthu lawng ah hin thianglawr le Tribulation ih thil umtu
danding hi kan Bible in 365 rori a sim ih,  nitin te hi thu pawl hi a
thleng kim vivo thlang. Ni neta ih thil thleng ding pawlhi kan Bible
in vei 10,000 lenglo a rak sim cia.  Tuisun ni ih kan mit hmuh rori
ah Pathian thu cun a diknak a rawn phuang vivo a silo maw? Duhdawtmi
unau kan Pathian tawng ding in teh kan ralring hai maw? America le
Australia feh ding lawng ah maw kan caan tha  le ruahnak kan liam ter
ih kan nunnak tiang liam ngam ih hna kan tuan???.
Note :Rapture le Tribulation theh ah hin kum 1000 daihnak Jesuh ih a
rawng din lai ding thu le Armagedon ralpi pawl tla ?HRUAITU?ah   rawn
tarlan vivo kan tum ding.

Zumnak le Tuahnak
       Pa Ngun ( Maluri )
U le nau pawl..mi pakhat khat in zumnak ka nei ti hmansehla; a
tuahnak a lanlo ah cun ziangso a t.hathnem? Kristian u le nau lak ah
mipa siseh, nunau siseh hnipuan a tlasam mi, eibar ding a neilo mi um
bang sehla; cupawl hnenah Pathian in lo thlawsuah hram seh. Hlum te
in um uhla puar te in rawl ei uh tiah nan ti ih an nunnak ih an tulmi
nan pek silo ah cun ziang so t.hahnem? Zumnak cu cubangtuk cu a si.
Tuahnak a tello ah cun zumnak thi a si.
Sikhalsehla mi hrekkhat in mi pakhat in zumnak an nei ih a dang
pakhat in tuahnak a nei an ti ding. Kan thu lehnak in, tuahnak in ka
zumnak ka hmuh ding ti hi a si. Pathian pakhat lawng a um ti nan zum
a si lo maw? Cuti nan zum cu a t.hazet. Sikhalsehla, khuavang pawl
khalin Pathian pakhat lawng a um ti an zum ve. Asinan an t.ih ih an
khur thlohthlo. Mi aa pawl tuahnak umlo zumnak cu thuphan a si ti ka
lo hmuh nan duh maw? Ziangahtile, kan pu Abraham cu Pathianthawn
rualremnak a co. a fapa Isacc biaktheng par ah Pathian hnen thawinak
hrang ah a pek ih, cui a tuahnak thawngin rualremnak a co a si lo
maw? Cucu nan theilo maw?
Zumnak le tuahnak an feh tlang. A tuahnak ruangah a zumnak a famkim
a si. Cule ca thianghlim cun, ?araham in Pathian a zum ih, cumi a
zumnak thawngin Pathian cun miding ah a co  Hiti a si ruangah minung
cu a zumnak ruangah silo in a tuahnak thawng in Pathian thawn
rualrenmnak a co ti kan thei a si.
Hlawhhlang nunau Rahab thuhla khalah cuvek thotho a si. Israel  pawl
thlingthlatu thaten a zoh hnu ah zindang in an tlansuak nak dingah a
bawm. Cubangtuk in a tuah ruangah Pathian thawn rualremnak a co a si.
Cuti a si ruangah taksa ruangpi cu Thlarau lo cun thi a si bang tuk
in, zumnak khal tuahnak lo cun a thi ve a si.  Himi ca ngantu hin,
hitin a zummi le a tuahmi hmang thei ding ih, a zuam rero mi thu a
si. Kum 12,13 ka si lai ih kan khua, kan kawhhran mino pawl in kum
khat sung thu sirhsanmi thu tlangpi a si. Ka u le pawl cu kawhhran
hrang le khawsung thansonak ding ti in mai hnat hman t.uan thiamlo
khawp in kawhhran hrang le khaw hrang ah teimak suah in hna an t.uan,
ram sungah zawnzai zet le harsa zet in an tuan nan an ra tlun tik ah
thinheng le riahsia in inn an tlung ti hi ka hmu dahlo.
An hnat.uanmi thu pawl in sim tik ah ka mitthli hi kang thei dinglo
khawp in a tla. A lak ah pumpek ih hnatuan ding hi ka duh ngaingai,
sihmansehla kan kum kan hnat.uan theinak hi a pitling hrihlo ruangah,
an hnen ih va telve ding cu ka u le pawl in insiang hrihlo.
Note :Hmaizarh ah peh sal ding

Khui lamah so na um?
Pathian mit cu hmun kip ah a um. Thatnak kan tuah ah siseh siatnak
kan tuah ah siseh inzoh ringring a si. ( Thufim 15 : 3 )
                                                              Rev. S.
Ni Luai

Khui lam ah so na um? timi t.ongfang hi duhdawtnak aw a si. Nauhakte;
sia le t.ha thei hrihlo, mah te khal feh theilo; rawl rei thilo cu
kan mit hmuhnak sungah kan kil ringring. Kan mit ih kan hmuh nawnlo,
an aw kan theihthei nawnlo cun; ?Khui lam ah so na um?ti’n thinphang
zet ih kan kawhnak t.ongfang a si. Adam kha sual ih a tluk ve ten
Pathian in khui lam ah so na um tiah a ko ( Sem 3 : 9 ).
Ningzahnak
Ningzahnak kan timi hi Leilung minung lam in cun hmelsia, farah,
tong thiamlo, mibanglo, mi santlailo pawl hmuhhmuah hi ningzah thil
lamah kan ruat. Pathian lam tahnak thawn kan tah ah cun ningzah thil
cu sual tuah hi a si. Adam cu a tak lawng ih a um lai ahkhan zingzak
in a um dahlo. Sual ih a tluk ve ten ningzak in a um. Pathian in
thingrah ei hlah uh ka timi na ei maw si? tiah a sut. Adam cun ka
hrang ih na tuahmi nunau in thingrah cu i pe ih ka ei a si a ti.
Milai cu Adam ih hrin kan si a fiangnak cu sualnak kan tuah ih kan
tluksiat tikah midang mawhphurh kan pek theu. Adam khalin ka hrang ih
in pekmi nunau nu in eiaw i ti ruangah ka ei a ti. A mai sualnak cu
Adam cun a hmulo. Mai sualnak hmu theilo hi Adam ih fa, piangthar
hrihlo nun a si.
Sual kan timi cu mi dang in tuah ding in inlem ruangah sualnak ka
tuah a si ti khal le sual thotho. Upadi Law ah mi firmi thil na ei ih
na lak ve a si le firnak ah na tel lo khal le mifir na si tho tho.
Curuangah kan nun sung ah hin Pathian hmai ah ningzak thil sual
akntanta pei uh. Pathian duhdawtnak hruk thlang uh si.
Pathianduhdawtnak
Pathian in a mai hmuihmel keng in a tuahmi milai Adam le a nupi cu
mi lak ih an um kha a hmuh tikah tuu phaw angki fualpi a thit sak iha
hruk ter. ( Sem 3 : 21 ). Himi hi Bawi Jesuh ih rundamnak in
hmuhsakmi a si. Nitin kan nun ah ningzak thil zu inn, thil fir, nupa
sualnak, kuak, sahdah, thin tawi, mi puarthau, uarawk hi ningzak thil
an si. Himi sualnak hmuahmuiah hi Bawi Jesuh rundamnak in i khuh
thehzo ti thei cu mifim cu a si ko. Curuangah duhdawttu aw cun khui
lam ah so na um? tiah Pathian fa le hi Pathian in a mit in in zoh
ring ring.
A mit hman theplo in in zoh ring ring tu Pathian hnen ah kirsal uh
si. Noah in  tidai a kang le kang lo theih nak ding ah ahmaisabik ah
tlangak a thlah; a ra kirsal nawnlo. Thuro a thlah sal; thuro cu a
kirsal thiam, tlangak cu miaa a si. Thuro cu mifim hmuhsaknak a si.
Siatnak kan tuah ah siseh felnak kan tuah ah siseh, Pathian in inzoh
ringring. Mifim cu ralring te in an um ih thatlonak kha an hrial.
Asinan mi aa cu ralrinnak neilo in zamrang tukin an tuah t.heu (
Thufim 14 : 16 ).Duhdawt tu thinlung nei in ralringten nung uh si.
Thil t.ha tuah cu san thawngkhat tiang Pthian in thlawsuah malsawmnak
a pe. Sualnak tuah cu san thum tiang dan a tat.
Curuangah ningzak thil tuah cu tanta ih hlawh theh in Pathian
rundamnak hruk ring irng uh si. Kawl ram ah U pohsah timi Profiser a
rak um. Kum 50 a si hrawng ah a thluak a hmanlo ih hnipuan a hruk duh
nawnlo. A taklawng in a um. A tlawngta pawl in an zang a fak tuk ih
hni puan an hruk ter theu. Asinan, thluak hmanlo kan ti fam cun
zingzak a theilo ih hnipuan cu a hlawn cingcing. Cuvek in Pathian
rundamnak angki fualpi kan hruk hnu ih ningzak thil sualnak tuah sal
cu U pohsah vek ningzak thei nawnlo miaa kan si pang ding. Adam le a
nupi in Pathian thitsakmi Savun angki fual hi an hlawnlo.
Ziangruangah ningzak thil khuh tu a si ti an thei ih an hruk
ringring. Cuvekin Bawi Jesuh ih in rundamnak hi hruk ringring uhsi.
Ralring, Writing mi aa pawl kiang ah umhlah. Nangmah lo zirh ding
zianghman an neilo ( Thufim 14 : 7 ) Pathian in malsawm hram seh.

Tuluk le Myanmar ramri ah rittheih thil 10,050 grams kai
Kan dung zarpi ni ah Tuluk ramri ( Yunnan Province ) ah Myanmar
ihsin Tukuk ih an phurh luhmi rittheih thil 10,050grams rori Tuluk
ramri duty pawl nih an kai nagh.
Duty pawl cun checking an tuah rero laifang ah hi rittheih thil keng
tu pa hi carton pakhat keng in a tlan suak man. 1990 kum ihsin Tuluk
hin ram hnenum pawl hnenah rittheih thil cinnak hmun ah thildang buh
le Jung tivek cindan a rak zirh.
Yangon Thil man
Alu..cuaikhat – ks 350
Cawsa – ks 1,200
Voksa – ks 2,000
Arsa -ks 2,800
Khasuan rang: cuaikhat -ks 1,500
Khasuan sen – ks 700
Fangfai dipkhat – ks 7,600
Siti ( saungsi ) ks 1,700
Arti ( pumkhat ) ks 55
Copi ( hlumkhat 250 )
Pe ( cuaikhat ) ks 900

Myanmar fala mipa ah cang riai !!!
Kawlram khal hi kan rak awl velo; thilmak taktak tla a suak phahphah
ko hih. Aung Myay Thar Yar ih um Thin Sandar, arsa zuar ih pum cawm
nu cun mipa si a duh tuk ih…kum le khua cumi lawngte cu a ruat
theu. Kan dung thla ah; a ruah vek ngaingai in mipa zahmawh a rawng
cerh ih, a pawhte khal fate ah an cang thluh. A mah hi kum 21 lawng a
si lai.
Mipa hmin an pe ih ?Than Sein?tiah an ko. ?June 21, thlabial zing
laifang a si ih; ka thil cu a mah kel vek a si nawnlo, ka pawhte
khal  an fate thluh. Mak ka ti tuknak ah ka nu le pa kha hmuh rori?
tiah Than Sein hin a sim. Mipi tampi  cu Than Sein zoh ding in an pok
luihlo. Sizungpi ah thil cang thei ngaingai  a si le silo checking an
tuah zo ih, a result lawngte a suak hrihlo. Hlaing Thar Yar township
hotu pakat cun Than Sein hi nunau ih suak cu a si ko tiah a birt
certificate rori a keng rero.
Than Sein hi Yangon khawsung ihsin 19kilometers ( Peng 12 ) a
hlatnak, Aung Myay Thar Yar ih um a si ih; cu tawk purang ah cun
nitin te milai 400 hrawng hin va tawng ding le an kut rori ih va tham
ding in an feh t.heu. A siibawi nu Aye Sanda Khaing cun; “a
mipathilri hi a nunau thilri tlunte ih ( clitoris ) sir ihsin a rawng
cerh”a ti.  Kawlram ralkap cozah TV lam hnatuan pawl khalin Interview
an tuah zo nan, siannak an ngah tik ah rampum ih thehdarh a si ding.
Tan Sein cun nupi le fanau ka neih hlan ah Phungki ah ka lut ta
ding, Purang ih ka feh tin ten ka thihhnu ah milai ih ka cang sal
theinak ding hrang tla ka cam theu a ti.

Suu Kyi England ah kuat ding dil!!!
Junta Cozah thawn a pehparawmi Kawlram nunau pawlkom cun Aung San
Suu Kyi cu ram sung ih buainak suah tertu a si tiah puhin England ah
kuat ding in cozah hnenah kan dung July 13; nazi 18 : 50 ah an dil.
Suu Kyi NLD hruaitu hi 2003 May thla ihsin tuini tiang a mai inn ah
kaih in a um ih, asinan ziang cases hmanin khin a si hrihlo.
Aye Theint Theint Tun, Myanmar women’s affairs Federation palai cun ?
Daw Suu Kyi hi ziangtik hman ah suah a si hrimhrim lo ding?tiah
Myanma Ahlin nitin thuthang a sim. ?Daw Suu Kyi hi a mai inn ih kan
kaih ringring le Mirang ram pawl in an siaherh tuk ih suah an dil
leuh leuh. Curuangah England ah kuat lohli sehla..ramsung ah buainak
a umlo ding ih; cui mirang pawl thinlung khal a dam ding; Suu Kyi hin
Myanmar a ra tlun ihsin tuini tinang ram hrang ziang thatnak hman a
tuah lo?a ti bet.Suu Kyi hin 1988 kum ih a nu’i damlo zoh dingih
Myanmar a tlung kha tuini tiang ram a suahsan thei nawnlo.
Hi Myanmar nuanu pawlkom hin kan dung July 3 kha ?Nunau ni?tiah vuah
in Tanintharyi Division ah puai an tuah  a si. Hi nunau pawlkom hin
ram pumpi ah members 1.5million nei in an phuangaw.Trial of strength
in Myanmar
Khin Nyunt an that peimaw?
Khin Nyunt, Myanmar ralkap bawi hminthang zet rak si dah cu a thuhla
rel rero a si ih…a nunsung hmuahhmuah cu a cawlh a tul men ding
tiah Bangkok thuthangca ngantu Larry Jagan cun a phuang.
Myanmar kum 17 sung rori hurai let rero tu ralkap cozah cun Khin ih
thuhla hi case 8 an suah ih; eiruk le rampi zuarthlai pawl tla an
tel. Khin Nyunt an kaihnak san hi  Myanmar ih General thuneibik
pahnih Than Shwe le Maung Aye tei thuneih cuhawknak ruang khalah a
tel. Myanmar dan thiam hrekkhat pawl cun Khyin Nyunt hin ?death
penalty?a ngah an zum lai ah hrekkhat cun ramkhat in Inteligences
lubik rori cu thi lo in thwnginn ah reipi a um zumtu khal an
um. “Ziangruanghahtile, Khin Nyunt hi thil thei tamtukmi a sinak
lawng silo in Leitlun pum ah theitu a ngah ve tuk ruang ah ralkap
cozah  hin an that men lo ding?tiah, Soe Myint cun a ti.
Khin Nyunt hi August 2003 ah Myanmar Prime Minister si ding in a
sinak kaiter a si ih; cuveten democracy pek danding lamzin 7 khal a
phuang cih. Cupawl lak ah cun zalen le fair tak ih hrilawk sal nak
ding le ukawknak lam khal an tel. Asinan Khin Nyunt le Than Shwe hin
dan thar tuahnak ding ih rampi convention ah Aung San Suu Kyi le NLD
party pawl tel siang le tel sianglo thu ah an lungrual thei nawnlo.
Cumi thubuai ihsin thawkin Than Shwe cun a netabik ah Khin le a
Intilegences pawl cu a kai pet theh a si. Inteligences rual 50 hnak
ih tam pawl cu kum 100 thawng tla ding in an thuhla khal relsak hngal
an si. Foreign Minister  hlun Win Aung khal kaih a si ve
ih..sumdawnnak lam ruangah a thuhla hi a reihlan ah an rel zum a si.
Lung khur cim ah 8 thi
Kan dung zarh ah Mongshu ih lungkhur pathum rori a cim ih lunglai 8
an thi; nunau 12 lai cu an hawl hmu hrihlo. Hi lungkhur cim hin
building hrekkhat khal a siat ter. Myanmar lunghmun hi Leitlun ah
hmin lang tham a si ih, ahleice in Rubie lung hin hmin a nei zet. “Mi
pariat ruak cu kan hmu zo ih 12 hrang kan hawl rero; hliam tuar khal
an um hnuai hni?tiah Deputy Mines Minister Myint Thein cun Associated
Press  July 12 ah a sim.
Mongshu ( maingsu ) ih lung khur pawl hi 300 – 400feet ( 90 –
120meters ) ih thuk an si tlangpi ih t.hih a nung in cangvaih khal a
har zet. Cumi vawncim cun mi thi zat khal hi an karh kan zum tiah,
lung hmun ih hnat.uan pawl cun an phuang.
Mongshu hi lunglam ih llianzet khawpi a si ih..Yangon ihsin 600
kilometers ( peng 380 ) ih hla a si. Cui lung pawl cu kan ram ralkap
cozah khalin an lianpinak bik pakhat an si.
Indonesia ah Myanmar Ambassador thar
State Peace and Development Council Chirman cun U Khin Zaw Win cu
Indonesia- Myanma palai ( Ambassador ) si ding in kan dung July 14 ah
a ruat.
U Nay Win in Queen Elizabeth hnen ah rinumnak ca pe
Kan dung July 1 ah U Nay Win, Myanmar- United Kingdom le Ireland
palai ( Ambassador ) cun; Buckingham Siangpahrang innpi  ah a bawinu
Queen Elizabeth II  cu  rinumnak ca ( credentials ) a pe. Hivek ca hi
ambassador pawl cun an va rianmi tei ram hnen ah, kan rapi aiawh in
nan hrangah ka rinum a si ti lang ternak a si ih, Ambassador tamsawn
cun an tuah t.heumi khal a si.

Pu Edward Thawng Hmung hmaiton thusuhnak

Hruaitu :Nan inn sungsan dinhmun in sim thei kem?
Thawng Hmung: Ka suahnak khua cu Lumbang a si ih ka pa cu Captain Lal
Vum a si. Ka nupi hmin cu Anne Thawnghmung, fapa 4 le fanu 3 kan nei.
Tufa 9 kan nei ih a rei hlanah 12 an kim thei ding. Kan hmin sawng tu
cu Lal Sui a siih Lal Sui pa tin in ko.
H   : Na pa cu kan Laimi captain ngah hmaisa bik pawl a si ding ti
aw ?
TH   : A si ko ding, A number cu BC 4047 a si. Kanren ral 1950 lai
ah bomb in a rak ngah ih a dam lo nak in kumhnih hnuah mual in liam
san. Ka pa in in thihsan tik ah midang pawl ih hmuhsuam khal tampi ka
tawng.
H      :  Na pa hngilh lo nak ah ziangmi na tuah sak?
TH : Ka pa hngilh lo nak ah ti in Lal Vum Children Home, Lumbang khua
ah ka tuah. Nauhak mi harsa 20 kan  zoh.
H   : Falam na um lai ah ziangmi na tuan?
TH    : Falam ka um lai ah leknak hotu ( Aa Kaa Hmu ) ka tuan.
H    :  Ziangmi bik ah hminthannak na rakngah dah?
TH    : 1964 kum ah Yangon Division ah lungsok pakhatnak ka rak ngah.
1980 kum ah Panama ah pakhatnak ka ngah leh ih Garmany ah kum khat
sung leknak a hleice in lung sok lam zir le practice tuah dingin  ka
feh.
H    : Ziangtik ah USA na thleng, Laimi a thleng hmaisa bik lakah na
tel ko lo maw?
TH    : Cung Pathian lam hruai nak in 1980 ah kan sungkua in kan
thleng. Kan theln lai ih rak um pawl cu Lal Aung , Dr. Thla Khar le
Dr. Nei Sang tei pawl lawng an rak um.
H    : USA na thlen tirah ziangmi na tuan?
TH   : Cetcung (Factory) ah ka tuan. Nazi pakhat ah $ 5 kan ngah. Cun
kan Biakinn khal ah a tul mimi inn kiangkap hrampi thianfai ti vek
pawl khal kan tuan,
H  Tulai ah ziangmi hna na tuan theu?
TH    ; Guam ihsin Refugee in kan unau tampi an rak thleng ih a tu le
tu hnatuan hawl sak rero an tul ruangah Lutheran Social Services ah
ka tuan. Bawi Khrih ah duhdawtnak thawn mi harsa pawl bawmnak hna ka
tuan ka tile ka sual tam lo ding.
H     : Cu lo dang  nan sungkua in tuan mi nan nei lai maw?
TH     : Ka fapa Lal Sui in Bsc dgree a ngah tikah Top – hit video
dawr kan tuah. 1991 ah Suidawr kan tuah ih Pathian in thlawsuah tampi
in pek ih Pathian hmin ka thangthat a si.
H    : Nan um nak ah ziangmi Biaknak lam ah nan khawm awk theu?
TH    : Ahlan ahcun First Baptist Church ah kan um ih Deacon ah in
hril.  Tucu kan lam mi kan tam vivo ih Burma Christian Fellowship tin
kan ding.
H    : Nan Fellowship kaihhruainak ah harsatnak nan tong dah maw?
TH   : Buainak fa tete kan tong ko. Asinan a hleice in hruaitu/hotu
pawl in harsat tuar le teimak a tul, mi dang an tuan zuam lo mi khal
tuah a tul can a um.
H     : Tuii tum ih nan ratnak hi zo ih sponsor nak ih ra nan si?
HT    : CCUSA ( Chin Community of USA ) in vanzamleng fehnak man cu
in tumsak. Cu lo dang cu kan mahten kan tum awk theh.
H   : Malaysia ih um Laimi ( Falam) pawl hi ziangtin in hmu?
TH   : Ka duhhnak in nan thinlung a then awk deuh.
H   : Kan Fellowship ih kan kaihhruai awknak ah Prays & Worship kan
tuah ih cunah cun Kawl hla, Laihla le mirang hlan kan sak ziangtin na
hmu?
TH    : A tha, zianghla poh khal Pathian thangthatnakah sak theh ding
a si ko. A mah lawngte mipi tam deuh ih duhnak zoh phah cing in nan
hruai awk a tha bik.
H    : Lai Christian Fellowship hrangah le Kan Lami zapi hrangah
thucah duh mi?
TH     : Kan Biaknak ( Kawhhran) a bang awk lo ahcun unau rori hman
kan rem awk thei lo. Biaknak , mai kawhhran uar tuk lo ding,
Fellowship nak a thupi bik, a tha bik. Thildang ah nan lungrual lo
hman ah Fellowship nak ahcun Pathian hmin in lungrual vialvo ten nan
um ding ka duh.

H    : Hiti vek in zan tlai hnu ah tik cu can tampi in pek thei
ruangah kan lungawi.
TH    : Kei khal ka lungawi.
  Interviwe By :
   Salai Sen Hngilh Piang & Pathuam

London bomb puak kha
Kan dung zarh tlawngkai nili ni ah London khawpi ih bomb puak kha
Pakistan ihsin British ih vai Muslim mi 4 ih tuahmi a si thu theih
fing a si zo. Home Secretary Charles Clarke cun hi Muslim pali Hasib
Hussein, 19, Shehzad Tanweer, 22, le an rualpi pahnih, Leed ih khawsa
pawl  cun hi thihcilh bomb hi  an puah a si a ti. Hi bomb puak ah hin
milai 52 an thi ih 700 laiin hliamhma an tuar. Hi tei pali hin an
nunnak cu pathian hrangah hlan in London khawpi leihnuai tlangleng
zin ah hmun thum le Bus parah pakhat bomb puahter in an thihhnawh
riai.British ih Muslim pawlkom hi; tuitum thihcilh bomb puahnak ah
hin an dungah ding ih theih an si ih Osma thawn pehtlaihawknak an nei
tiah Daily Mail cun a phuang.
Philippine President Arroyo a hnukdawkaw pei paw?
Philippine ram cu tulai fang hi an president hlawn tum in an buai
vutvo laifang a si. Kan dung kum ih rampi president hrilnak ah Mrs
Gloria Arroyo ( president tuanlai ) cun vote a ruk ruangah a tlingsal
a si ti an thei suak ih, mipi thawng tampi cun a tohkham ihsi a rang
thei tawp ih tum dingin an tur luihlo a si. Kan dung tlawngkai nithum
July 13 ni kha Manila khwpi laili ah Arroyo duhlotu mipi 30,000 rori
an suakkhawm ih poster phunphun thawn lamzin an zawh ciamco.
Arroyo hin kan dung zarh ah a cabinet members hrekkhat pawl a banter
t.heh hai ih,cabinet thar pawl thawn a ding. Mipi turnak men cun a
president sinak cu a suahsan men hrih hmello a si.
Tlangleng cangsual ah 150 thi 1,000 hliam tuar
July 13, tlawngkai nithum ni ah Pakistan passengers khat thepthep ih
phur tlangleng pathum rori an pahaw ciamco ih milai 150 an thi rori.
1,000 khal hliam an tuar.
Tlangleng lam ih hnat.uan pawl in an simdan ah..tlangleng lamzin
pialawknak laifang hrawng ah tlangleng pakhat mawngtu cun Signal kha
a siarsual pang ih..a silo lam ah a pial pang a si an ti.
“Hi thil thleng hi Pakistan ah kim 15 sung ih thihnak rapthlakbik a
si ih mithi sungkhat unau pawl hmuahhmuah kan lo tuarpi zet a si?tiah
President Mussaraf cun a phuang. An accident laifang ah hin; hi
tlangleng pawl hi nazi pakhat ah 120km ih cak in an tlan.  “Mithi
ruak cu an peng khawm liailiai ih, pa in fa le an hawl nunau in an
pasal an hawl.. tap le kiau phah in kan hawlaw celcel a si ko?tiah
tlangleng ih to nu pakhat cun a sim.London ah bom an puah ih milai 50
an thi…an ram ah Pathian nih siatnak a thlengter ih milai 150 ( a
let hnih ) rori an thi a silo maw?
Robots pawl World Cup 2050 hrang timtuah
Kan dung tlawngkai nihnih ni ah Osaka  lamah Leitlun ram  31 ihsin
Robot uite pawl an kengkhawm ih; 2050 ih Robots world cup hrang ding
bawhlung an sit ciammam.
Hi setzuk world cup hi Researchers pawl ih huathawtnak le  Japan
cozah ih bawmnak thawn tuah a si ding ih, tuitum khalah hin ram 31
ihsin Robots 333 rori an suahpi  khawm thei a si. Milai world cup vek
rori in le FIFA dan vek rori in an lek ve ding. Kan hmai kum ah cun
German khawpi Bremen ah zuamawknak an nei sal ding.
Australia in Afghanistan ah ralkap thlahbet ding
Australia cun Afghanistan ah cozah dinglai bawm dingin ralkap a kuat
bet tum thu official in kan dung  lawngkai nihnih ni ah a phuang. Kan
hmai September thla ah Comando pawl le vanzam lam ralkap pawl 150 lai
kuatbet a tum a si. Australia hi US le Nato pawl thawn naizet ih hna
tuan theumi ram a si.2001 kum ah US in Afghanistan a do laiah
Australia hi ralkap 1,000 in a rak bawm zo ih, 2002 cemzawngah 150 cu
a hruaikir sal. Tuitum hi an hrilawk a nai ih Taliban pawl an
cangvaih a luar ciamco sal. Nato khal in ralkap 2000 lai an kuat bet
ding. Hriamnam Pasarih( Seven Swords )
Director Tsui Hark ih thuanthu nganmi Seven Swords cu  Tuluk ram ah
tuah rero lai a si ih, tui thla cemzawng ah Malaysia Cinima khal ah
zoh theih a si ding. Hi film ah hin Hong Kong Martial Art actor
Donnie Yen le South Korea accress Kim So Yeun ( a sir zuk ) tei
pahnih hin a hleice in an cangvai ding. ?Tuluk Martial Art Kungfu
tamsawn cun pi pu pawl  an thiamzia le an cakzia lawng kan lanter
theu ih; tuitum ih kan film ah cun thiam ding in ziangtluk caan le
thazang an cem; ziang tluk in so an rak tum timi pawl tam deuh in kan
lang ter?tiah, hi film thuanthu ngantu Tsui cun a sim.
Seed of Chucky
Hi thlahrang film hi tulaifang ah Berjaya Time Squaires Cinima hall
le Malaysia Cinima hall dangdang ah zoh thei a si. Hi film ih cangvai
tambik Jennifer Tilly hin; Las Vegas ih tuahmi Holly Wood nuanu hrang
laksawng special kan dung zarh ah a dawng. Jeniffer cun ka tlangval
pa’i hnen ihsin thlahrng film can dan a tambik cu ka zir a ti. A
zohman RM 8 lawng a si.
London : 2012 Olympic
2012 Olympic cu British capital London khawpi ih tuah ding in
Olympic comittee meeting cun July 7 ah thu an tilu fel zo.  1948 kum
ihsin tu hi an veikhat dawnnak a sivekin London mipi pawl cu an
lungawi tuk nakah an au an kiau. Mosco, New York le Madrid hnu ah
London duhtu vote 45-50 in an neh.

Cakuat
To,
LCF hruaitu pawl,
  LCF huraitu upa pawl ih an relcatmi RM 50 pekding ti thu hi ziang
thu bik ah so a si? Kan Laimi siat tawngtu hrang sawn a si? LCF
members si ding ah RM 50 pek tengteng a t.ul tinak a si maw? RM 50
peklo ah teh khawm sian a si maw?
Sut tu : Salai Khumte le a rualpi.
To,
Salai Khumte le unau pawl,
   A lungawi um zet. Tuihlan ahcun siat kan tawn caan ah Kawhhran sum
ih tuamhlawmawk a si t.heu. Kawhhran ih kan tlin nawnlo ruangah
hitivek ih sumbur a rawng suahnak a si.RM 50 burding kantimi khal hi
kumkhat hrang lawng a si ih thihhloh tawn caan ah RM 50 a burtu pawl,
boss ih tuamhlawmlo mi  cu Kawhhran in a tulmi hmuahhmuah tuanvo kan
la. Himi RM 50 hi kawhhran members luhnak cazin khalah kan hmang cih.
RM 50 peklo ruangah khawm theihlo tinak lawngte a umlo. Laimi
Fellowship le biakinn hmuahhmuah ah zovek milai khal khawm theihlo ti
hi kan thei dahlo. Kan Pathian biak cu RM 50, 100 le $ 1,000 khal in
a kham theimi a silo.
( Hihnak ih theih fiang nan duh le )
     David Thang, 012-6822231
      LCF Secretary
Calai hrang a hlu
Malaysia LCF nubu lam ih  kan rinsan zetmi Mai Nu Bawih ( Maluri )
cun kan calai hrang ah RM 50 a rawn hlu. LCF calai Comittee hmin in
lungawi thu kan tarlang duh ih, Thinlung a zohtu kan Pathian tu nih a
let tampi in malza sawm hram seh tiah thlaza kan campi.
Nau thar kan nei
Malaysia LCF kawhhran upa Cuanga tei innsang cun Pathian thlawsuah
fapa te an nei ih Kawhhran cun kan lungawipi zet a si ti kan langter
duh. Upa cuanga hi LCF thatnak ding le t.hansonak ding hrangah cun a
neih sumsaw le thazang khal uilo ih in suahsak ringring tu a si ih,
kan dung thla khalah Calai lam ih kan hai zetmi Camera tla a rawn
hlu. Pathian in an fapa te parah siseh…. a nu le pa parah siseh
thlawsuah malza rawn sawm in rawn kilveng vivo hram seh tiah thlaza
kan can cam sak. Malaysia LCF unau pawl lakah cun  Sayamah Rang Rang
tei sung ( Klang ) le Upa Cuanga tei sung hi fapa thlawsuah dawng
hmaisabik an si. Kawhhran members pawl khalin phone in simaw kan
lungawinak langter ciau uh si. (Contact: 012-3124839 Cuanga  )
Thlengthar kan nei
Malaysia thleng kan Laimi lak ah calai lam ih lamzin in khihhmuh tu
le in kaihruai tubik Salai Sen Hngil Piang cu damten kan hnen a ra
thleng sal tikah LCF cun kan hna a ngam in kan calai hrang khalah
tampi hna in tuan sak lai ding khal kan beisei zet.
Piang hi kan Hruaitu zarhtin thuthang in rak tawlrel suak sak tu a
si ih; a hnatuan rahsuak cu tuini tiangin a par kan lawm ih Pathian
tu nih malsawm vivo hramseh. A mah hi tlangval note a si  ih, pomlai
neilo hrang ah rualpi thazet khal a si thei men…a khualtlawnnak lam
le experiences pawl khal Interview a ra suak lai ding.
Kan khuallian pawl thucah
Kan siangbawi Dr Hre Kio le Pu Thawm Hmung cun Malaysia Flam mipi
pawl in ra vehvai ih; ahleicein LCF cun an parah lungawinak kan
tarlang duh. An caam sung ah zan hman it mumal manlo le bang hniang
hniang in Klang, Putrajaya le Malaysia ih kan Falam mi umnak hmun kip
ah in vehvaih nak parah Pathian tu nih thlawsuah malza rawn sawm hram
seh.
Thu in cahbikmi cu, ?Falam unau pawl kak hniaihniai ih hnatuan lo
ding le, tlinlonak relsia aw men lo ih, bawmaw derdo ten  hmailam ih
ke karh ding? timi a si.

London Khawpi
British capital London hi Leitlun tong bangawlo hman tambiknak
khawpi pakhat a si. Hi khawpi ah hin tong bangawlo 300 lai an hmang.
Hi khawpi ah hin a rammi 12million hrawng an um ih kum tin 26million
hrawng ramdang mi  vehtu an nei theu. Thame tipi in  hi khawpi hi sak
le thlang tiin a laifang ah a then.
British ram pumpi ah hin mipum 57.59million an um. Official tong cu
English a si ih paisa cu Pound an hmang. British ram ih an thil tuah
suakmi hmin nei deuh pawl cu:
Toilet Flush ( 1775 )
Computer ( 1822 )
Hrampi atnak khawl ( 1830 )
Chrismas Cards ( 1843 )
Hnawm hipnak khawl ( Vacuum cleaner ) 1901
Table Tennis 1880
London khawpi ih biaknak pawl cu:
Christian : 4,176,175
Muslim :    607,977
Hindu :     291,977
Jewish :    149,789
Sikh :     104,230
Buddist :      54,297
Nepnawi :      36,558
Biaknak ngaihsak tuklo : 621,366
Sakhua neilo : 1,130,616
London ih milai um pawl cu:
Mi ngo : 5,103,203
    ( British, Irish, le a dang )
Asian :   866,693
    ( Indian, Pakistani, Bangladeshi, a dang )
Mi dum :  782,849
   ( Caribbean, African )
Mi ngo le midum rawi : 226,111
Chinese  : 193,235
London khawpi ih milai um zat zate kom cu 7,172,091 ( 2001 census )
an si.
source : Office for National Statistics

Comments

comments

Comments

%d bloggers like this: