HT-46, Oct 13, 2004

Hruaitu zarhtin thuthang

A vei 46 nak

Editorial

Bawipa tel lo cun

Kan leilungpi hi vawn thlir ve hnik uh! Ukawknak, Saannak, thuneihnak, hmin thannak le len zuamawknak in a khat ttheh zo tihi nauhakbik khal in fiang ten kan hmu thei. Asinan, lenglam ih a lang dan lawng silo a zung le sungthu khal kan hmuh tel a ttul.

US, leilungpi ih zohbikmi ram khi an hminthannak phenah Pathian hmel fiang ten a lang. US President ttuan ding cun Bible thawn rampi kaihruai dingin mipi le Pathian hmaiah tiamkamawknak an tuah ttheu. Kan nih Laimi pawl khal Leitlun ram tinkim ah vakvai in darhttheh hman sehla, Laimi in duhdawtu “ Bawipa” hi hngilh siang hlah uh si.

Pathian thlawsuah a simi fimthiamnak, lennak le thlawsuah a phunphun thawn kan mai ram te ah Lai ram thar, ram ttha sawn kan din sal thei nak ding “ Bawipa lawng rinsan ih” beidawng lo ten kut kai aw in ttuan tlang ttentto uhsi. “ Bawipa, na duhdawt mi fale pawl hi kan mai ram te ah, zattial kut nem kaiaw ih kan lentlan sal thei nakding lam in rawn hruai in khua rawn vang ter sal hram aw”….

Editor : : Richard K. Emmanuel

Join Editor : : Steven Tha Tin Kham

Suahtu : : LCF Calai Comittee, Malaysia

American Hlawhhlang cu

Mexico ih tlangval pakhat cun kan dung tlawngkai nili zanah hlawhhlang inn ah lutin US$ 20 ( RM 76 ) a pek hnu, hlawhhlang nu cu a ihpi theilo ruangah thinheng tuarlo cun namte in vei 77 rori a dawt.

Hi kum 26 tlangval note hin, “ hi hlawhhlang hin sii ka rit hi a phuang pang ding ti phang ah le paisa pe cing khal ih ka ihpi theilo ruangah hi thil hi tuah ka si a ti”.

Australia ih nauhak kum kimlo lakah

Kan dung baite ah Australia ih mi firfiak hrekkhat pawl cun nauhak kum kimlo pawl lakah sex zohnuam phunphun hmang in rawngbawlnak ttan an la ciamco ih, kum kimlo pawl thawng tel in an siat phah zo ti’n Police in thu an than.

Himi thu thawn pehparaw in nasazet ih hma laknak neih a siih, rinhlelh mi 100 lenglo khal kaih an si zo. Tui hnu 500 hrawng khal himi thu thawn pehparaw in kaih theih dinhmunah an ding ih, kan dung zarh lawngah hman pacang pali rori in an thil sual tuahmi ruangah an mah te an thataw zo a si. US ihsin nauhak kum kim lo lakih sex umdan zohfeltu pawlkawm pakhat cun leitlun pum nauhak 95,000 rori cu hruaihloh in an um zo tiah thu an than bet. Hi pawl a tamsawn ih cangvaih dan cu, Internet ih zuk tthalo suah in a si.

Thuthan

( 17 September, 2004 ) ih can hmangtu ding pawl

Can kaitu Salai Dar Lian Mang

Thuthangttha simtu Salai Thi Sen Man

Zapi hrang thlacam Pa Nah Mang

Solo Salai David Thang &

Salai Bawi Hre

Bible zoh lo siar Salai Biak Hre

Thawhhlawm ap thlacam Mai Cia Sui

Hlarem Mino pawl

Pianist Salai Ram Hma Ngaih

Kan dungzarh thawn pehpar in

Khawmcan Khawmtu Thawhhlawm

Mithar 2

Zarhpi zing 146 233

Zarhpi zanlam ( mino) 52 61

Zarhpi zan 40 38.10

Zarhte zan 34 41.50

Zarhpi zing thlacam 48 –

Bawipai zanriah thawhhlawm 125.70

Mahatma Ghandi suahcam lawmnak

India daihnak ( peace ) apostle Mahatma Ghandi ih suahcam 135th nak cu kan dung 2 October, 2004 niah sunglawi zet ih tuah a si. Ghandi hi daihnak thawn leitlun mipi pawl hmunkhat teih fehtlan duhtu, hruaitu a si ko nan, 1948 kumah Hindu mi firfiak hrkkhat pawl kut ih kah thah a si. Tuittum ih birthday lawmnak ahhin Ghandi ih cabu hminthang “ Ghandi’s prisoner, The life of Ghandi’s son”, pawl tla tam zet an zuarkhawng bet.

Muslim fala lukawng cu

French ram ih dan thar an tuah vekin kum 15 mi Muslim cu an class sungah lutuam thawn cazir an sianlo ruangah thinhengnak lanter in a lu a ziat kawng rori. Lu khuh ih tlawngkai hnak cun lu kawng ih tlawngkai cu French dan thar cun a rem ti sawn.

London ah naute nun sauter ding dil

London ih naute suakpek Wyatt timi nute cu a nuin thla ruk lawng paiin a hringih, a suah pek ihsin khaw hmu theilo le zianghman theilo in a um ih hleiah lung lam natnak a nei bet lai. Hi naute hi a suah pek ihsin tuini tiang siizung a suahsan thei hrihlo, vei thum rori thaw thawk ding neilo in a um nan, siibawi pawl in Oxygen thawn an run sal ih, a dam khawsuah thei an zumlo ruangah siibawi pawl in bawm an tum nawnlo thu thutthennak(court )ah an thlen. Asinan, naute nu le pa cun siibawi pawl in theitawp suah sak sal ding in an fanu nun saunak hrang court ah an dil ve.

US president hlun cun

1977-1981 kum ih US rampi rak hruaitu, President ( post ) Jimmy Carter cun kan dung zarh tlawngkai ningani, a kum 80th kimnak niah “ kei cu leitlun thil thawn pehparin thlak hleh tukmi ka nei nawnlo, nuam nai ten ke ka kar thlang ding” tiah Good Morning America Televison pawl ih Interview nak ah a phuangaw. Jimmy hi leitlun human right hrang nasazet ih hna a rak ttuan tu President khal a si.

PM Blair ih inn thar ( $ 3.6million RM.24million )

British Prime Minnister Tony Blair i inn thar ( a hmuah kulh zuk ) lei mi thu hlaah, an ram mipi hrekkhat cun hi tluk tangka tam hi khawilam in a nei ticu an buaipi zet. Asinan Blair cun hi square pi hi kan sung kua ro thil ding umsun a si ruangah, loan la in ka lei a si a ti. British hin hmai kum May thla ah rampi hrilawknak an nei dingih, a tam sawn cun Blair hi a tlin sal an zum. Blair hi 1997 kumah PM hna ttuan ding ih hril a rak siih, term khat tal cu peh leh a tum lai.

US cyber chief a cawl

United State top computer-security cun kum khat lenglo a ttuan hnuah a hna a cawlhsan tiah US home land security Department cun an phuang. President Bush ih kaihhruainak hin online security lam a ngaihsak loh deuh ruangah Yoran hin beidawng ih suahsan a si tiah an phuang bet.

Nagaland bomb puak ah milai 28 thi

Kan dung tlawngkai ninga niah Mizoram kiang ih Nagaland ah bom hmunhnih rori ah a puak ih milai 28 an thih ngal ih hleiah 87 in hliam na zet an tuar tiah doordarshan Televison cun thu a than. Nagaland ah hin 1950 kum ihsin ram le uknak cuhaw group hnih ah an rak tthenaw ve. Asinan, 1997 kum ih meithal puah lo ding thu reltlannak an neih ihsin tui ttum hi milai an thih hmaisaknak bik ttum a si. Tuittum bomb puak hi zawi group ruangaih puak a si ti cu fiang ten theih a si lo.

Iraq ah mithi pung

Kan dung zarh ah Iraq ih Muslim US uknak duhlo pawl cu an cangvai ciamco ih, asinan an mah lehlam nasazet in an tuar. Kan dung zarh lawng hmanah mi 100 lenglo an thi. Sii zungah ruak 80 lai an thlen zo nan, miruak hrekkhat cu zinkap ah an ril thler thler lai. US hin vanzam le leilam ralkap pawl hmang in a cangvai ve a si.

Indon President Megawati a tla ta riai

Kan dung tlawngkai nihnih niah Indonesia president Megawati cun an ram hruaitu dingih a tlin nawnlo thu a phuangaw ih, “mipi tamsawn in nan hrilmi hi kan ram hrangih tthabik a si ko” tiah mitthli thawn a tohkham cu a suahsan riai. Tuittum hi Indonesia ramah mipi ih President an veikhat hrilnak a siih, votes pawl tla siarnawn sal thluh a si hnuah US ih reipi tlawng rakkai dah tu Susilo Bambang cun nehnak a co ngah ta. Tui thla ni 20 ahkhin President thar cun rampi kaihhruai hna a thawk thlang ding.

US President George W. Bush khal in, Susilo a rawng tling hi a lungawipi zet ih, “ leitlun ih Muslim tambiknak ram Indonesia hi, an prsident thar thawn kut kaiaw in kan feh tlang thei ding” tiah Jakarta ih US Embassy ihsin thu a than ve. President thar cun mipi hmai rori ah a tlinlonak a phuanawk ruangah Megawati cu a upat thu tarlang in, “ kan rampi hrilawknak thusuak ( result ) pawm tlang dingin mipi hmuah hmuah in sawm a si”, a ti.

Tui ttum ah hin Indonesia mipi 210million rori cun an duhbik mi an hril ih, an hrilmi Susilo hi Indonesia President paruknak a si. Megawati cun “ kan ram sung ah tui ttum hi President le Vice President direct rori ih kan hril nak hmai sabik ttum khal a siih, mipi tamsawn ih duh hrilmi hi kan ram hrang ih tthabik khal a si”, tiah hnitaw thlurthlo phah in mipi pawl cu an kut a kai hai a si.

Mai Zahmawh tan tu cu…?

Romania ram ih kum upa lam deuh pa cun ar hngawng ah neih in a mai zahmawh rori nam thawn a tan sual pang ih, vansiat ah an uico rilrawng tuk cun a rak ei man ngalcel bet, tiah Rompres News Agency cun kan dung tlawngkai nikhat niah a phuang.

Constantin Mocanu, 64, Galati khau kiang ih um pa cun zanlaiah a ar inn ih ar raak tam deuh pawl that dingin nam thawn a pawk. Cui ar cu a to hnawh ih, “ ka thawh hmu thawn arhngawng le ka zahmawh khal ka thei fiang nawnlo ih, arhngawng tanin ka zahmawh cu ka rak tan ngah pang a si tiah a phuangaw.

Noble laksawng peknak cu

American mi David J.Gross,H.David Politzer le Frank Wilczeck tei pathum cun Physics lam Noble 4004 cu kan dung tlawngkai nikhat niah an ngah riai. Hi tei pathum science thiamnak hin leilung pi hrang ih tthading le ttulmi tampi a suahpi a si tiah Royal Swedish Science Acadamy cun an phuang a si.

California Universiity, Santabarbara tlawng, California Insitute of Techonology ih zirsuak hi mirang pathum hin an theory cu kan dung 1973 ihsin an rak hmusuak zo a si. Hi tei pathum hi leitlun Physic ah cun Theory pawimawh bik hmu suak tu khal an si

al-Qaeda le Saddam in pehtlaihawknak an nei ngaingai maw?

Defence Secretary Rumsfeld cun Saddam Hussein le Osma-ih al-Qaeda pawl hin pehtlahawknak ngai ngai an neih thu ziang hman fiang te ih hmuh ding a umlo tiah kan dung zarh ah a phuang.

Aburpi ih thih theinak ( wepon of mass distruction) khal tutiang kan hmu lo tiah a phuang bet. Rumfeld cun CIA Director ( kan dung ih hna suahsan pa ) George Tenant khan al-Qaeda le Saddam in pehtlaiawknak an nei tiih report a pek ruangah Iraq ram ih siatnak thleng a si thu le hi thil pawl hi an rak hmuh thiamlo ( misunderstood ) men tla a si thei thu a phuang bet.

Britain pacang, mipa nauhak 1000 lenglo sualpi tupa an kai ngah

London ih sumdawng milian William Goah cun mipa nauhak 1000 lenglo a rak ihpi zo thu theih suah a siih, damsung thawnginn tla dingah Court cun a thuhla an rel fel hngal.

Hi pa hin kumkhat sung lawng hmanah mi 142 a sualpi ih, phuang darh lo dingin paisa, sweet, le thil dang dang in a lem ttheu. Cun hi milian pa hin a company ah nauhak hna ttuan tu tam sinsin in a lak bet vivo ih, nauhak pakhat a hnen ih an hruai thei cun $ 50 ( RM. 340 ) mipakhat hruai manah a pe hai ttheu.

Geat wall tuahtthat tum

Tuluk cozah cun an ram kulhpi “ Great Wall” cu tuah tthat sal thluh a tum. A mawi thei tawp ih a tuah tthat ih hleiah Kilometer, peng le meter tiang ih tah thluh in, tourist pawl khal ih zoh vutvo mi kulh si sal dingin tuah tthat sal an tum a si. Hi kulh pi hi an ram rethei deuh pawl cun kan dung laiah tthiat bal in leirawhcan pawl tla ei hawlnakah an hmang. Hi kulhpi hi an ram suanawknak bik le hmai hngalnakbik pakhat khal a si.

Hong Kong ah Internet hmangsual tam

Hong Kong tleirawl pawl cun Internet sungih sin an theih dahlo mi pawl thawn thu tiamaw ta hrat in sex ram tiang thleng an tam tuk thlang ruangah, rampi nauhak kilveng tu pawl cun kan dung tlawngkai nihnih ni ah mipi pawl cu warning an pe.

Nauhak sualpi nak lam tawlrel tu pawl ih thu than dan cun, nauhak 55% cun Internet sung ih sin rualpi an hawlaw, 40% cun milai rori in an tawngaw. 6.9% cun an In ternet rualpi pawl thawn sex tiang an hmang. Hong Kong nauhak pawl hin nikhat ah nazi 12 sung rori Internet ah an can an hmang ttheu tiah cui zingzawitu pawl cun an phuang bet. A tthalo zawng ih Internet hmang tu pawl ruangah hin Hong Kong nauhak tampi cun kum kimlo ih sex hmang tu an tam sin sin ih, rampi khal in a buaipi thlang a si.

Australia hrilawknakah

Tui Sunday niah hin Australia cun hrilawknak an nei dingih, mipi ngaidan lakkhawm netabik ah cun Howard ih Liberal party hi an cak deuh. The Sydny Morning Heralds thuthang ca ih a phuan dan cun Liberal party hin Labor party hi 39% – 46% rori in an neh a si. Howard rawn khing tu Latham khal in theih tawp suah in, Howard hin cawl a man thlang vekin keikhal in kan rampi hruai ka man thlang a si a ti ve.

Khual tlawng

October 8, 2004 ah Hainoi, Vietnam ih tuahmi ASIA- EU meeting ih nihnih sung kaidingih timtuah phah in Frence President Jacques cun Singapore le tuluk pawl tla a pal ta ih, sumdawnnak lam khal tampi rel tlannak an nei. Singapore Prime Minister khal kan dung zarh ah Malaysia ah a tlawng ih, Malaysia PM Abdula thawn thu reltlannak an nei. Kan hmai zarh a khin kawlram ralkap council president Tan Shwe khal India a tlawng ding.

Leitlun bawhlung sit tthabik hrilnak ah..

2004 leitlun bawhlung sit tthabik ( player of the year ) hrilnak ah Brazil ihsin Ronaldo, Roberto Carlos, Cafu, Kaka, Adriano le Ronaldinho pawl tla FIFA cun an hril a si.

Meeting sawmnak

Malaysia ih um refugee dil zo tu pawl le dil duhnak thinlung a nei tu pawl le kan miphun duhdawt tu hmuahhmuah cun a hnuailam ih hmun le tikcu ah rak kai tengteng dingah kan lo sawm.

A tikcu 17 October

A can zanlam nazi 5 ( Mino khawm ttheh)

A hmun Pa Uk le David tei inn

Himi thuhla thawn pehpar aw in suhduh mi le theih duh mi nan nei a sile salai Salomon Lal ci Luai 012 2026 790 ah rak sut dingah le rak thei tir dingah kan lo sawm.

Theih kauh nak lam

TV Advertising man khungbik

Leitlun TV faknak ( advertisement ) mankhungbik

cu 2002 kumih Pepsi-coca faknak kha a si. Hi faknak ah hin Pop Star hminthang Britney Spear in lem a cang ih US$ 8.1million rori an cem a si. Leitlun ih TV faknak rak suahnak hmaisabik cu June 27, 1941 kumah NBC’s WNBT zung New York, United State. Cun TV faknak agency hmaisabik cu Jame White’s ih agency a siih, London khawpi, UK ah 1800 ah an rak din thawk.

Jean bawngbi tumbik cu

Leitlun jeans bawngbi tumbik le saubik cu Levi Strauss company ih tuah mi a siih, 94ft. ( 28.6m ) ih sau a si. 62ft ( 18.8m ) ih tum a siih, leitlun Jens bawngbi tumbik ih phuan suah a si. cui bawngbi cu 546lb. ( 246.3kg ) ih rit a siih, a zipper lawng hman 13ft ( 3.96-m ) ih sau a si.

Kedam sangbik

Leitlun ih kedam sangbik an timi cu 11in ih sang a siih, a kearti cu 16in rori a si. A sen le a dum ih tuahmi a siih, bun khatah us$ 1,092 rori a man a si. Hi kedam hi London ih savun tuahnak dawr pawl ih tuahmi a si.

Hnih hi sii ttha bik

Haikhawl pai saduhthah

Khi… ramhnuai liam kawn kiangah khin “ High Call” timi khua a rak um. Cutawk khua ihsin tlangval pakhat cu Malaysia ( forienge ) ah a pawk ve a si hmang. A rual pa cun a saduhthah a rak sut. E… keicu, lottery $200million hrawng ngah sehla cu, Malaysia LCF biak inn ah hin fangfai dip 10 ka hlu ding ih, Pastor le Calai lam hna ttuannak ah $ 100million cu ka hlu hngal ding. Cu ttheh cun, Kalemyo St. Marry tlawng innpi hmai, Yuh kuhva dawr ih kuhva tthuk 10 hrawng vawn lei tthet tthet, Dagon dawr ih Hero Cycle thar, a tuamnak hman phelhlo ih mawn hngal, cun, ka sen nawn ih Parte tawng ding in “ High Call” lam pan hi ka saduh thah le Malaysia ka rat san cu a si bik ko a ti, an ti cu teh.

LCF fala saduhthah

Malaysia LCF fala pakhat cun a rual nu hnenah a saduh thah a rak ruah rero. Keicu, tlangval kuak fawplo, zuu inlo, kuhva, sii le rit theih thil reng reng hua, fala khal bia hniai hniai lo, khawlak khal vak suak dah lo ka duh a ti. LCF tlangval pakhat in a rak theingah ngelcel ih, ka rual na duhmi cu tlangval a si uallo, TV a si ual a ti, an ti.

Ela

“Hruaitu news” hi Online http://www.ycld.org

khal ah siar theih ringring a si.

Comments

comments

Comments

%d bloggers like this: