HT- 45, Oct 5, 2004

Hruaitu Thuthang

Vol 45

EDITORIAL

Zuu le Laimi

Zankhat cu Maluri Church ah kan va khawm ve ih, kawhhran duhsaknak in Pathian thuthangttha tla phuannak can ttha ka ngah. Hlim tlang zet ih kan khawm ttheh hnuah, KL khawpi laili ih kan LCF biakinn kiang Maha rawl dawr ah rualpi pahnih thawn rawl ei ding cun kan va lut.

Tawkfang kan to ih rawl kan ei rero lai ah cun, kan kiang kap ih kan Laimi unau pawl cu an ttawng a ring deuhdeuh ih an thawmvang a thang deuhdeuh. Ziang an cang tiih kan vawn zoh cu, “ Zuu an ri” a rak si. Zuu cun an lung a ti puam ih, khawkhat rinsan mi ka si ve, kei mah tawkah cumi khami ka thiam hokhaw tiah sangsawn le thiam sawn si cuh aw ih an rak buai ciamco kan vawn hmu cu “ Zu in Laimi in bum neh zia” vawn hmuh cun thin cu a na a si.

Zuu hi Leilung tlun ram tinkim ah a um ko. Asinan, miphun tthangso pawl cun harhdamnak le cawlh ( relax) nak ah an hmang. “Alcohol is poison for Chin people” tiih Mirang pawl ih an rak ti cu a hman a silo maw ka ti? Ka rual nang teh ziangtin na hmu?????

Editor : : Richard K. Emmanuel

Join Editor : : Steven Ttha Tin Kham

Asuah tu: : LCF Calai Committee, Malaysia.

Austria hrilawnak ding hrang

Kan hmai October 9 ih Australia President hrilawknak ding hrang dinglai John Howard le tohkham a cuh tu ding Mark Latham cun tlin tumin campaign an tuah nasa. Latham cun Howard hin suah a man thlang vek in kei khal in kan rampi hruai ka man thlang, ka tling teng teng ding tiah a mah ttantu mipi 5000 paw hmaiih a campaign nakah a phuang suak. Latham cun an rampi tuahtthat tttul a hmuh tam zia thu phuangin tuah tthat thluh a tum thu tla a than bet.

Bush maw Kerry

Tulaifang hi American mipi million tampi hmaiah Bush le Kerry cun hmai tawngaw rori in ram kaih hruai dan thuhla elawknak an neih laifang a si. Kan dung tlawng kai nihnih ni tiang kha cun Bush duhtu ( a hnuai zuk ) cu Kerry duhtu hnakin 48% in an tam lai. American mipi pawl cun Kerry cu an ram sumdawnnak lam ih hruai thei sawn dingih an hmuh lai ah, Bush cu Iraq le Muslim ral pawl lak ih mipi humhim theitu le hruai theitu a si tin an hmu.

India Hlasak thiam a thi

Bombay khawpi ih India fala mawi le hlasak thiam hminthang Shobha Gurtu cu kan dung zarhah a thiih. A thih hin kum 78 a so zo. Gurtu hiun India zohnuam flim tampi ah tel in hla tla a sak ttheu. Gurtu hi Bombay sizungpi ah zarhhnih sung a ih hnuah a thi tin Press Trus of India cun thu an suah a si.

Ttawng tenau 14 rori an thi rero

Thai ramah common Thai ttawng an uar deuh deuh ruangah ttawng tenau, tui hlan ih an rak hman mi pawl 14 hrawng cun thih lam an pan thu Thai thuthangca pakhat in a suah. Tuah hin Thai ram ah ttawng tenau ( dialects ) 60 lai a um hrih. Cozah cun an ttawng tenau pawl khal hlo ral menlo dingih kilkhawi ttha dingin miphun tenau pawl tla cu a fawrh a si. Ttawng hlo rero pawl lak ih pakhat “ Chong” timi tla cu an ram pumpi ah milai 500 hrawng lawng in an hmang thlang a si.

Singapore ah Bus parkhuh neilo

Singapore ah, Duck store company cun khawpi sung hman ding Bus parkhuh neilo pawl an tuah ih, Hotel tum deuh deuh, hun hming lang deuh, China Town, Little India le Kampung Glam pawl tla hi bud hin a paltlang ih, zing 10.00am ihsin 4.00pm tiang awna si.

UNO zung hmaiah Kawlram ukawknak duhlo pawl cun….

Kawl ram thubuai hmuhhmuah hi UN in napi ih ttuanvo la dingah le International dan vek ih lairelsak dingin ram dangdang ih UN zung hmaiah fehkhawmin Kawlram ukawkdan duhlo tu pawl fehkhawmin an duhlohnak an duh loh zia an lan ter.

Kan dung September 21 ah New York khawpi ih tuahmi International meeting-pi khel in, Yangon UNDP zung hmaiah Politics ruang ih thawng reipi a rak tla dah tu pa in kan ram cozah a duhlohnak a lanter ih ralkap pawl in an kai hngal. American ih um kawlram mi 7 khal in hi International meeting-pi an tuahnak innpi hmaiah UN in kawlram hrang nasazet ih nan tawlrel hlan cu ti le rawl kan eilo ding tiah, ni thum sung rori ei in lo in an um.

Yangon ih kan ram cozah duhlohnak lanter tu U Ung Tan, 58, hin politic thuhla tampi ca in a suah zo ruangah tui ttum an kaih ni khalah phunzailo ten a thlun tiah U Kyaw Kuu in a phuang. Kawlram ralkap cozah ih an kaih mi Democracy ttantu mi pali cu kan dung zarh ah thawng kum 7 ciau tla ding in an thuhla court in an rel fel.Tuittum ih ti le rawl hman ei duhlo ih nunnak pe tu pawl hi Leitlun ram tinkip ih kan rammi pawl ( 350 ) rori in an ngaisannak ca an kuat a si.

U Win Aung a hna in cawlh ter

Kawl ram, ram dang Vuan Kyi U Win Aung le cozah Vuan Kyi pahnih cu ralkap cozah cun kan dung 18 niah an hna kaih lai ihsin an cawlh ter. Kawlram cozah, ralkap council Secretary( I ) Soe Win ih hmin tthut nak thawn an phuan mi thuhla pariat lakah, ramdang Vuan Kyi U Win Aung, Saih Pieu Yee lam Vuan Kyi Neiu Ttin le lamzin lam ih Vuan Kyi Hlah Myin Shew te pawl cu an hna ihsin ban ter an si thu phuan suah a si.

Ramdang Vuan Kyi bawmtu U Khyin maung Win tla ban ter cih a si. Hruaitu thar an hril mi pawl cu ramdang Vuan Kyi ah Buu Chuk Nian Win, Tamah Wayamah Vuan Kyi ah Buu Chuk Kyi Zaw Myint, Sum dwnnak lam Vuan Kyi ah Ttin Naing Teing pawl tla an si.

Kan ram, ram dang Vuan Kyi Win Aung cun, tui ni kawlram cozah din hmun ah hin Prime Minister Khin Nuint hi thupi bik le ttihnung bik a si thu, a rei hlan ah kawl ram hruaitu lu pawl hin an nun humhim nak hrangah ram dang ih an tlan suah a ttul ding thu pawl tla a phuang a si. Tui ttum ah phuahlam khal ziang hman tuah lo in Win Aung an cawl ter ih ralkap sungkua ah tohkham an rawn pe tawp mai hin kan ram uktu pawl hin mawi le mawilo an ruat lo ti a fiang ter zet. Kan hmai October 8 niah Vietnam ah Asian meeting- pi tuah a si ding. Cunah Win Aung hi tel seh la Asian ram pawl cun kan lungkimpi thluh ko ding tiah Thai thuthangca pakhat cun a phuang.

Thlipi in Florida a nuai

Thlipi nazet, Hurricane Jeanne cun kan dung tlawngkai ninga ah US state pakhat a simi Florida cu a nuai ciam co. Hi thlipi hin inn tamnawn cu a siat bal ter thluh ih tlunah milai 2,000,000 hrawng cun Electricity hman ding neilo ah atuah a si. Hi tlipi ruangah hin milai 6 cu an thi zo ih, Associated press in a tarlan danah County khua ih nauhak kum 15 mi cu thingkung ih nen thah a si.

Hi Janne tiih kawhmi thlipi ruangah hin Haiti ramah milai 1,500 laiin an nun an hloh phah thlang ih, Florida lam tiangin milai a buai ter rero laia si.

Al-Qaeda hruaitu kap that

Pakistan cozah cun an ram sung h al -Qaeda hruaitu lu bik ih an theih mi Amjad Farooqi cu kan dung zarh ah Security pawl in an kap that tiah thu an than. Hi pa hi kan dung ih President Musharraf that tum ttum khal ah huaihawt tubik a si.

Farooqui hi Pakistan sim lam, Sindh Sindh province ih Nawabshah ah kah that a siih, Pakistan ram sung ih al-Qaeda cangvaihnak hmuahhmuah hi a mah thawn pehtlaihawknak nei thluh ih theih a siih hleiah President thah tumnak khal ah ttum hnih rori tel ve ih puh a si. Pakistan Information minister Sheikh Rashid cun Amjad Farooqi thah thu hi thudik a si thu phuang in, al-Qaeda cangvaihnak ih an rinhleh mi pa hnih khal an kaih cih thu a phuang bet.

Bush leh Kerry el aw ( debate ) dingin

November thla ih US President hrilawknak umding hrang tlin teng teng tum ih campaign tuah rero tu Demoratic candidate John Kerry le republic party President George W. Bush cun ninga niah Coral Gables, Florida ih el awknak ( debate ) an neih dingmi hrang nasazet in timtuahnak an nei. President Bush cun Texsas state ih a ranch ah fehin a timtuah laiah, Kerry khal Wisconsin Madision khawpi kiang ih hmun nuam tuk ah timtuahaw dingin a feh ve.

Bush cun a ranch ih conference area dinsannak area ( podium ) an tuahmi ah zarhte ni ni ah tiamtuah nak thu nazi pahnih sung a rel ih, Sunday niah nazi pahnih sung a rel la la. Hi mi ni ah in adviser Mark Mckinnon cun moderator hnattuan in Senator Judd Gregg cun John Kerry ih lem a cang a si.

Tuittum Bush le Kerry ih elawknak ding hi President hrilawknak hrang ih pawimawhbik can ih ruah a siih, ningani ih an elawknak ding hi debate sawng thum ih a sawng khatnak lawng a si lai. Kerry hin kan dung Sunday niah a el pi ding Bush cu nasazet in a rel sia ih, Iraq ah US ralkap thi an tam sinsin ih, Iraq ram ah hlawhtlinnak kan nei a ti pawl hi thuphan thluh a si a ti. Kerry cun Bush hi tum tthelh, Binladen thah tum in Iraq a do ciamco. Iraq hi Binladen ih hmun pibik ti theihnak a um dahlo tiah Bush cu a relsia rero a si. Zo si leitlun pabik US President tohkham luah tu ding ti cu mi hmuahhmuah ih theih cakzetmi a si ko.

Kerry in ral dolo ah Bush a puh

US president hrilnak dingih Bush rawn khing tu ding John Kerry cun, September 11,2001 hnu ih America ral tumbik cu Osma bin Laden a siih, asinan President Bush cun Osma do loin Iraq lamlam a do sawn tiah Bush cu a dem.

John Kerry cun kan dung Philadelphia ah thu relnak a neiih, nasazet in al-Qaeda pawl a do tum dan sawng sarih rori in a timtuahawk thu a phuang. Bush ih dodan tthatlo ruangah Osma cu a tlansuah phah a si a ti bet. Asinan White HousePress Secretary Scott McClellan cun Kerry hin President Bush ih dung thlun in a timtuahaw a si a ti.

Bangladesh tilian in khaw 80 nuaisia

India ram ihsin Bangladesh ih tidai luang lut pawl a tam tuk ruangah Bangladesh simlam cu tidai a lian ciamco ih, inn 80 hrawng cu a cim pil rero lai. Bangladesh thuneitu pawl cun lamzin, an hang rah hang hnah le an tikhur hmuah hmuah pawl tla tidai hnuaiih an um thluh ruangah tidai inn ding khal an har thu an phuang.

Ram rethei zet, Bangladesh ah kandung July le August karlak ih ti lian kha kumruk sungih tilian nasabik a siih an ram hrekkhat deuhthaw cu a cim pil ttheh a si. Milai 766 in an thih phah ih, 3,000,000 hrawng cun hna neilo le harsa zet in an umphah bet. UN cun bawmnak peding in an tawlrel lai.

Confucius suah ni lawm

Kan dung tlawngkai nihnih niah Confucius ih suah cam kimnak a vei 2,255th nak cu sunglawi zet h lawm a si. A suahkehnak khui ah Tuluk ram simlam Qufu, Sadong province ah ram dngdang ihsin mikual pawl le ram sungmi 3,000 pawl cun lamnak a phunphun le zuamawknak phunphun tuah in Conficius an sunlawihnak cu an lanter a si. Hi birthday hi Malaysia, South Korea le USA ram ih si Confucius ih zirhnak ngaisang pawl cun an telpi a si. Confucius/ Kong Fuzi hi Tuluk philosopher le cathiam hminthang bik pakhat a siih, 551BC – 479BC hrawngih rak nung a si.

Lukham mankhung

Japan company pakhat cun nunau hrang lukham mankhung, US$ 80 ( RM 304 ) man cu a tuah suak leh zo. Hi lukham hi mipa kut lem lu neilo ih tuah a siih, Japan nunau 1,000 hnakih tam cun an lei zo a si. HJunko Suzuki,34 mi cun mipa kut kai phah ih ihcu, ihthah khal a nuam cuang a ti.

Michael Jackson ih faphir ka vawn???

Los Angeles ih zoh nuam fala ( Actress ) pakhat cun Michael Jackson ih faphir ka vawn tiah kan dung zarh tlawngkai nili niah leitlun theih ding rori in a phuang aw. Sholeh Bocchelli,35, cun a faphir vawnmi cu ttha ten hrin a duh ko nan, sibawi hrekkhat cun a harhdamnak thawn a milawklo ruangah hmet tla dingin an fawrh. Hi puhnak thuhla ah hin, Michael Jackson cun a fa an silo zia a phuangve ih, an rawn pian tikah DNA test ka tuah dingih, Leitlun in ka fa an silo ticu nan thei lai ding tiah Sun thuthang ca palai pawl cu a sim ve.

Iraq Motor Bomb puah ah milai 41 thi

Kan dung September 30,2004 ni ah Iraq ram khawpibik Bagdad ah thihhnawh bomb a puak ih, milai 41 rori an thi hngal ih, 139 cun kut ke bul in hliam nazet an tuar. Mi thi pawl lakih 34 hi nauhak hlir an siih, American ralkap pawl ih thanthling ( sweet ) zemmi an sarkhawm laifang ah hi bomb hi puak a si. US ralkap pawl khal hliam tuar an um.

Alicia Key Malaysia ah Concert tuah

Grammy laksawng dawng tu America fala Alicia Key cun kan dung tlawngkai ninga zanah KL khawpi sungih Stadium Negara ah concert a tuah. Tuittum ih R&B concert ahhin keys, 23, nute hin a album pahnih “ the dairy of Alicia Keys le Song in A minor”, timi hla sung ta pawl a sak. Ticket cu RM.80, RM 120, RM.280, RM. 380 pawl tla ih zuarsuaha si.

White Knight Vanzam thar a suak leh zo

Calefornia ih Mirang pacang cun Private Vanzam mawi tuk a tuah suak leh ta. White Knight tiih kawhmi hi vanzam tuahsuaktu, le pilot ttuan hngaltu Michael Melvill hin US$ 10million lenglo a ngah thei, vansang tourism pawl cun an beiseipi zet. Hi vanzam hi tipithuanthum ihsin km 100 laiih sangah a zam thei.

Gaza ah 26 kap that

Kan dung tlawngkai nili niah Gaza ih Palestine le Israel pawl kahawknak ruangah milai 26 rori an thi. Judah miphun pawl in Sukkot timi Tabernacles puai an thawk laifang a siih, himi puai ih rasuak khawm pawl cu Israel meithal hmang tu hrekkhat cun an rak kap a si. Middle East ah daihnak khaw eng ziangtik ah a lang ding ti cu hngahhlap um zet a si.

Thailand ah Bird flu donak

Kan dung zarh ah Thai Prime Minister cun ni 30 sung rampi in Arpul hri do dingah a phuang ih, milai million tel rori in theihtawp suahin hna ttuan an thawk ciamco. An ram sung hmun tin ah feh in Ar pawl tla hrik an pai le pailo an check a si. Hi natnak ruangah hin Thai mipi pawl le Vietnam mi 20 rori an thi zo.

HIV veitu pawl in Cambodia Hotel bal an tum

Cambnodia ih Hotel pakhat cun kan dung tlawngkai nili niah HIV natnak vei pawl in siatsuah an tum thu ca an pek ruangah, palik in nasazet in an kil khawi. Hi HIV veitu pawl hin, hi Hotel hi an Leitlun nunnak ti tawi tu hrampi bik ah puhin lungrual ih tthiah darh thluh an tum a si.

Japan ram ah Typhoon thlipi

Kan dung tlawngkai nili niah Typhoon thli pi cun Japan ram a hrut ciamco ih milai 20 rori an thi ih 70 hrawng cu cincang theih ding hman um hrihlo in an hlo bet. Thlipi lawng silo in ruahpi vanawn le tilian, leilung cim pawl in Japan ram cu nasa zet in a siatsuah a si.

UN Secretary dingah Mr. Surakiart

Thailand ramdang Vuankyi Suarakiart, 43,( a hnuai zuk ) cun 2006 ih UN Secretary hrilnak ding hrang campaign nasazet in a tuah ih, South East asia ram pawl cun 100% rori in an lungkim pi. Asinan, Asia ram hmuahhmuah neh ding cun saunawn ke karh a ttul lai tiah Surakiart cun hni siamsi ten a phuangaw.

UN Secretary ttuanlai Kofi Annan hi term hnih a ttuan hnu, kan hmai dec 31, 2006 ahkhin a term a cem ding. Thai Prime Minister Thanksin khal in Saurakiart hi UN secretary dingih kan vawrhsuah dingmi a si ih, asinan tling ding cun Asian pawl in in lungkimpi a ttul a si a ti.

Theih Kauhnak lam

( General Knowledges )

Coca-cola company cu

AC Nielsen, Leilung tlun sum dawnnak lam thuha zingzawitu goup pawl ih hmuhdan cun Coca-cola company hin 2002 kumah $ 19 billion man rori an khawng ih, bevreage ( alchol tello ) copany ah cun paisa lalut ambik khal an si. Coca-cola company hin Atanlanta, Georgia ,USA ah headquarters an nei.

Thuamhnaw khawng tthabik company

Levi Strauss & Co. ( USA ) hi leitlun thuamhnaw zuar khawng tthabik an siih, Levi ti hmin in leitlun ram 100 ah dawrpi 3,000 lai an awng. November 2002 tiangah $ 4.1 billion an ngah.

Leitlun Poems hminthangbik pawl

1992-98, kum ruk sung ah poem larbik le tthabik ih leitlun mipi 50,000 in an hril mi pawl cu : Dylan ih nganmi Good Night, Wiliam Blake ih nganmi The Tyger, Allan Poe ih nganmi The Raven, Robert Frost ih nganmi Snowy Evining, Lewis Carroll ih nganmi Jabberwocky, Elizabeth ih nganmi How do I Love thee, Emily Dickinson ih nganmi Slant of Light, William Shakespeare ih nganmi Shall I compare you a Summer’s day pawl tla hi an si.

Tuanthu hmin thangbik pawl

A ngan tu Cabu hmin Kum

1. Jefferey Middlesex 2003

2. Richard Russo Empire Fall 2002

3. Michael Chabon Amazing Adventure 2001

4. Jhumpa Lhiri Interpreter 2000

5. Michael Cunningham The Hours 1999

6. Philip Roth American Pastoral 1998

7. Steven Millhauser American Deramer 1997

8. Richard Ford Independence day 1996

9. Carol Shields The Stone Diaries 1995

10. E. Annie Proulx The Shipping News 1994

Cabu zuarkhawng tambik pawl

Cabu, Ngantu, kum Zuarkhawng zat

1. The Bible, c. 1451-55 6,000,000,000

2. The Work of Mao Tse-tung, 1966. 900,000,00

3. The Lord of the Rings, J.R.

Tolkien, 1954-55 100,000,000

4. American Spelling Book

Noah Webster, 1783 100,000,000

5. The Guiness Book of record,1955 92,000,000

6. World Almanic,1868 73,5000,000

7. The McGufey Readers, William

Holmes McGuffey,1836 60,000,000

8. In His Steos: What would Jesus do?

Rev. Charles Monroe Sheldon,1896 30,000,00

CiTuh rah Att

Leitlun milai hmuahhmuah hin kan tuhrah cu a sia a ttha in kan att ttheu. Ahleice in milai pawl hin kan tuahmi cekci vekin kan att sal. Thil ttha tuah tu cun tthatnak a hmu sal dingih, thil sual tuah tu cun a sual man a phur ding.

Khuahlan lai ihsin kan pi le pu pawl in thuhla an rak neih mi cu Serang ( Sia ) in Serang a vawn ih sa hrang cun sahrang a vawn an rak ti. Cuvek tho tho in thing khal a kung a tthat cun a rah a ttha. Hi pawl hmuahhmuah ih sawh duhmi cu, thil bul pawimawh zia hi a si. Kawl pawl thufim khalin a hram thawk a tthat cun a neta lam cu a ttha cia a si an rak ti ve kha. Curuangah thil pakhat khat kan tuah hlan ah a bul kan ttan dan hi a pawimawh zet a si. Mai tuahmi cekci vekih at leh ding kan si ruangah kan nitin nun ah ralrin a va pawimawh tak em.

Kan Bible kan zoh sal ah cun mai ci tuhrah at sal hi tam nawn hmuh ding kan nei. Jacob cun thlawsuah dawn duh ruangah a pa bum ih a dam sung hmuahhmuah thin har in a um, cui tlunah a mah kha a fa le rori ih bum a tawng a si. Siangpahrang David khal in Uria ih nupi cu zawi theih lo in a rak sualpi nan, a thup te ih rak hmu tu Pathian cun khaw eng ah, mi hmuahhmuah ih hmuh dingah a rak phuang suak sal a si. Cuvekin Hamman khal in Mordekai khai thah nak ding dawng sawmnga ih sang a tuah ih, a mai tuah mi rori ah cun a mah cu khai thah sawn a si.

VL. Bawithang

Thuthan

10 September, 2004 ih can hmangtu ding pawl

Can kaitu                     Pa Fung Mang

Thuthangttha simtu       Saya Joseph Ngun Lian

Zapi hrang thlacam     Salai Tha Tin Mang

Solo                           Salai Thangpi &

Salai Biak Mang

Bible zoh lo siar         Salai Hmun Li Luai

Thawhhlawm ap thlacam          Nu Zing Fam

Hlarem                                     Mino pawl

Pianist                                      Salai Biak Hre

Kan dungzarh thawn pehpar in

Khawmcan              Khawmtu                   Thawhhlawm

Mithar                        5

Zarhpi zing                150                             223

Zarhpi zanlam ( mino)50                               72.20

Zarhpi zan              34                                  28

Zarhte zan              34                                 41.50

Zarhpi zing thlacam 24 –

Zarhte zan ( Maluri thawhhlawm)                 133

LCYF khawmnak

19 September 04 ihsin mino pawl in zarhpi zanlam tinten nazi 3:00 pm ah khawmawknak neih a si zo ruangah in rak khawm pi ciau dingah kan lo sawm.

LCF NA DAM MAW?

“Sayapa kan Putra jaya lam ih kan hnattuan a cem zik thlang fawn ih KL lam ah um hmun khuar ih Pathian thangtthat khawm awknak tla nei sehla a ttha lo maw?” tin kawhhran upa pakhat in a ttawng tikah “ Ttha tuk pan teh ziangtik ihsin kan tawk le a ttha pei?” “ October ni 5 zarh hmaisa bik in kan thawk le a ttha ko ding.”

Aw, ziang a sikhal le kan duh simaw, duh lo si maw KL ih kan khawmnak kum khat cu a rak kim ta riai. A thawk nak ahcun Pa Uk le Pa Thuam tei inn sannak ah khawm awknak thawk a rak si. Mipum 60 lenglo an rak suak thei. Cumi zingah zapi ten rawl ei khawmnak kan nei ih kan nuam in kan hlim tlang nasa. Cuticun khawmawknak ahcun mipum cu tamlam kan pan vivo ih kan tlem nawn lo ruangah Biakinn a hran ten kan sangih 4 January 2004 ah Biakinn ah khawm awk nak kan nei thei.

Tu tik hlan kan dinhmun kha vawn thlir ta duak sehla, Putra ramlak Buk ihsin hna kan ttuan ih ram lak thotho ah Pathian biaknak Biakinn khal kan rak nei. Kan nuam awk ih kan lungrual, Pathian hnattuannak khal ah phur zet in kan mah le ti thei tawk hna kan ttuan. A hlan Putra ah hmun khat te ih a rak um khawm tu pawl, tu ni ahcun hmun dangdangah hna kan ttuan ko nan Kuala lumpur khawlipi ah hmun khat ten kan khawm mi hi a sunglawi zet mi Pathian thlawsuah a si. A hlan ih KL khawsung fehdan thiam lo mi kha tuni ahcun kan duhduh nak ah vakin kan hrawh kual thei zo, kan unau um feh nak thei lo pawl kai hraui in le bawm thei tu kan si zo.

Asinan cutivek men in miphun pakhat tthansonak ah a tawk maimai lo. Kan hlawmkhawmnak LCF teh hi a dam cak maw? Natnak a nei pang maw? Miphun dang kan unau lak ah teh a cal hngal tawk maw? Ttha ten naiten kan zoh hnik kei uh. Tthimnak ah kan LCF tiin kan uar le milak ah khawmawknak Biak in kan nei, kan mai ttawng ten Pathian kan thang tthat thei , ti ih miphundang lakah kan suan ve mi kan LCF hi a dam cak ngaingai maw? A ttuan ding mi le a tuah dingmi pawl teh tlamtling ten a ttuan thei maw? Thizik ten na ko nan, pacang tin mi lakah a tuar thei tawp suah in a ttang ttentto tla a si pang kei.

LCF ih rak khawm ve ringring mi LCF sungtel miphun pakhat si ve tho ih mai pum natnak tla thei lo in kan um pang sual kei! LCF a dam lo a sile Pathian hnenah thla napin cam a tttul, a dam ko a sile cu nasa zet in hna a ttuan dingmi a ttuan suak theinak dingah ttanlak a ttul ding. LCF na dam ko lo maw? Ziang na bang? “Ttunghmun menmen cu santhar nonawn uar zawng a si lo.” Kan Miphun hmai ah LCF ti mi a um mi in hmai hruaitu si vivo hramseh.

Pa Thuam

Hnih hi Sii Tthabik a si

( Laughter the Best Madezine )

Christmas zan ah an ti si lawm!!

Tivar khua ah tlangval suanvawr pakhat cu Christmas ttanzan December 24 zan ih hruh ding hrang rori ah Tahan feh in Buut kedam mawi zerzer a lei. An khua a vawng thlen cun tidai a khawlh ih zanriah a ei. Cu ttheh cun a duh emem mi a fala nu khawm sawm ih khawm ding a si mai.

A fala nu sawm ding cun a buut kedam hruh dingah vawn zoh khaw, vawrhlam veve a rak si riai. Tahan ah va kir in va thleng sal ding tile a tlai tuk zo fawn, fala khawm sawm ngah lo in an inn ah a to hmiarhmiar an ti. A fala nu cu a mang a bang zet keicu!!

Kawl pawl cu an fel tuk

Hmunttha khua tlangval lak ih an rinsan mi pakhat cu Mandalay le Mizo ram lam hlehka in khual a tlawng ringing. Khua a tlun tikah an khaw pawl in a khual tlawn nak ih a hmuh tawn mi ngai dingah a hnen anra leng vialvial ttheu.

“Vei …Kawl pawl cu kan nih Laimi pawl ih tluk ding rual an rak si lo lawlaw , an fel dan, an fel dan cu : an ekinn khal ah inding tidai an ret ttheptthi, kei le phei cun ka tihal tukih halriam ah tiin khuatkhat cu ka in ta hngehnge” a ti cuteh. hi..hi..hi..

Salai M

“Hruaitu news” hi Online http://www.ycld.org

khal ah siar theih ringring a si.

Xoxxo Damten kan tawngawk leh ke aw! ! xoxoxoxoxoxoxooxoxooxooxoxxxoxo

Comments

comments

Comments

%d bloggers like this: