Hruaitu Weekly News Issue 164

Hruaitu
  Zarhtin thuthang
  Issue. 164

  Zohteltui’ Awkam
  Khum hlun thlahnak

  Rei lo te ah kumkhat cu a cem leh ta. Pathian in 2008 kumthar in
pek leh sal ding. Kumhlun thlahnak le kumthar  hmuahnak Biakinn ah
kan nei dingih 2008 sung kan nunnak tla Pathian hmai ah kan hlan
ding. Kan dung kum 2006 thlahnak le hmuahnak ah kan Pastor Rev. S Ni
Luai in thlacamnak in-in hruai ih Pathian hnen ih kan dil mi pawl
2007 sung ah a kim mi tampi hmuh theih a si.

              Kumhlun sungah kan duh lo cingin kan tuah sual mi pawl
tla a um a sile Pathian hmin in 2008 ahcun tuah nawn lodiangah Pathin
hnen kan hlan ding.Thlarau le kan taksa  ah nun tlamtling kan
hmuhsuah vivo theinak dingah thlacamnak thawn hmang ding ah le tuni
ihsin kan dil ding mi le kan tumtahmi pawl tla ruah cia a tul zo.

  Na Liam Cun

        By-Laizuun
            Na liam cun kei ka cawl ta ding
              Hla thei dah lo ding bangin na duhdawtnak kei ka rak
zum;
              Ka zum mi tla ka sual ka ti cuang lo ding.
              Ka lo duhnak tahtthim theih lo, ruat zia thiam lo,
              pum hlum duh in ka rak lo duh si.
              Theithiam lo ding lawm man cun na aa lo;
              Kei ka thei ko….

              Thei na cingten ka kham aw thei nawnlo.
              Ka lo zumnak le ka lo rinnak;
              ka lo duhnak pakhat te lawngah a si.
              Na hrangah tiih na aan ka, na nun zia;
              Kei ka pil ngah fawn,
              Na mit hmai ah kei ka tal buai zo.

              A luh dan ding cu in sim ih;
              A lam zin ah in lenpi nan,
              A suahnak ding lam in sim sal nawn lo.
              Na tel lo cu kei ka suak thiam lo;
              Ka ke ka kal thei nawn lo.
              Lam dang feh in ton salnak ding lam ko ti na thei;

              Ziangah tonsalnak ding lampi cu na lan hrim!
              Lam hmu lo dingin na mit a mal pang maw?
              O…Ka lo tawnglaiah na mit fang fimte in in zoh kha..
              Ka thinlung ah hminsin hmaisa bik a si ko.
              Hm..Lam dang feh na tum ah cun feh ko aw..
              Nang tel lo cun kei ka cawl ko ding!

              In ngai thiam aw…….
              Na liam cun kei ka cawl ta ding…

  Bhutto an that

  Pakistan ramih an Prime minister hlun cu,27th Dec. 2007 (Tlawngkai
nili) Pakistan  nazi 6 hrawng ahkhan  zo ih kutthlakbik tuar ti theih
lo in mual a liam. Hi nu hi Pakistan ram ih an pabik ih fanu a si.
Benazir Bhutto hi ram thatnak duhih hrilawknak hrang lamzin an zawh
lai fangih kut tuar ruang thi a si.

  Bhutto hi Opposition party (Ralkap hotulu Parvez Musharaf ih cozah
dotu) ih hotu asiih,  an ram zalennak sualsuaktu ih fanu a si fawn.
Hospital (Zato) ihsin a thi ti an phuan fel vete’n, a lam tang pawl
thinheng cun an sapa taal ciamco ih sizung le a kiangkap inn ih
thlalang le thil dangdang pawl an siahsuah ciamco. Hrekkhat an
thinnat tuk ruangah um ngaihnak theilo ih lei parih tal ciammam khal
an um. Muslim biaknak ih upa pawl cun mipi le sakhua hrangah nunnak a
pek (Martyr) tiah upatnak an pekih an pathian hmaiah Benazir ih
thlarau hrangah thlacamnak an tuah.
              A phumnak ding tikcu can ih an ruahman ni cu, 28th Dec.
2007 (tlawngkai ninga) nazi 1300(0800 GMT) hi a siih, an phumnak ding
hmun khal a pa Zulfikar Ali Bhutto kiangah a si ding. Bhutto hi
democracy ramuknak hrangih nunau Prime Minister an hril suah
hmaisakbik              a si.

  Aung San Suu Kyi

  Senator hminthang zet pahnih, Senate Minority Leader Mitch
McConnell le DianneFeinstein cun Kawlram thatnak hrang ih hnatuan
rero Aung San Suu Kyi cu Cingressional Gold Medal pek dingah an
lungkim.

  US House of Representative cun kan dung thla lam khal ah Kawlram
hrang remruatnak tha sawn an rak rel rero zo a si kha. Tuitum ih Suu
Kyi hrang an ruat sal khal hi Kawlram cozah in September thla ih ram
thatnak duhtu pawl nasa zet ih a rak do ruangah a si.

   Inn sungih kharkhum rero lai Suu Kyi hi Presidential Medal of
Freedom sunlawihnak cu kum 2000 ahkhan President Bill Clinton in a
rak pe zo

  Indonesia ah

  Indonesia ih Java hmun ah ruah a sur nasat ruangah leimin nasa zet
a thlengih, milai 80 lenglo cu an thih le nun theih lo in an hmu
theih hrih lo. Hi hmun ih um, milai tam zet cu an umnak inn pawl a
fen hloh sak theh ruangah an ma’i himnak hawl dingih sim an si.

   Hmailam canah thihnak nasa sawn a thlen vivo khal zum a si lai;
Indonesia ahhin tilik le leimin hi a tam zet ih, himi ruangah
hrekkhat cun an hramlak enkawlnak lam a him tawk lo a si an zum. Kan
dungih tilik thleng netabik ahkhan millai 220,000 cu a thih le nun
theih thei lo dingin an hlo ral. Tuitum ih ruahsur khal hin tilik
zikzik a thlen ih, mipi pawl cun an awm cancan tidai an daiih, an lu
parah an thilri suangin an feh a si tiah zuknung kan zoh ahcun kan
hmu thei ding.

  THEIHKAU  NAK  LE  RUAH  DING  TAM
  ( by  BiakChawn )

  1.         Leitlun ah vanzam accident ruang ih minung thih nak hnak
in nitin laak (donkey) par ih to ruangah accident ih thi an tam sawn.

  2.         Leitlun ah sawisel tam bik ‘sa’ cu vawksa asi ih,
sinan, sa ei ruang ih thih nak umter tu mal bik asi rero lai. Tulai
ih kan theih thei neta bik cu, kum 2005 ah Tuluk ram ah vawk hrisel
lo ei ruang ah mi 56 lai an thi ih, hi natnak hi vawk thisen ah an
hmu nan, a nat nak hman fiangte’i phuan a si hlan ah a thuhla rel
vivo a si nawn lo. Thihpi tam bik ‘sa’ cu Caw sa ( hihi CJD,
Creutzfeldt Jacob’s Disease ruang ah a si. ), Tuu ( Scrapie nat nak
ruang ah a si ), Ar le vate ( Birdflu natnak ruang ah a si ).

  3.         Leitlun ah Nobel Prize ngah si, an ram cozah ni thawng a
thlak fawn cu Daw Aung San Sukyi le Dr. Daniel Carleton Gajdusek an
si. Aung San Sukyi cu kan theih zo vek in polics ruangah a si ih, Dr.
Daniel cu kum 1987 ah an ram ah ramdang mi kum kim lo (kum 15 )
tlawng zir ding ih a hruai ruangah, 1997 ah kum khat le hrek ( thla
18 sung ) thawng thlak ding in Maryland court room cun thu a then. Hi
doctor hi kum 1976 ah Medicine ( sii ) lam ih a hnatuan that ruangah
Nobel prize a rak ngah. Papua New Guinea ramah 1957-1968 tiang
‘Kuru’ natnak le ‘sa hrisel lo ruang ih thluak nat nak kai awk
thei’ ( transmissible spongiform encephalopathy ) hmusuak tu le
tuanvo la tu a si.

  4.         Ozone siatsuah tu bik cu Chloroflorocarbon Gas   (
CFCS )  a si ih, cucu  vur tuahnak le eiding ret that nak (
refrigator ) ah hman bik a si. Pahnih nak ah Air conditioner a si ih,
hi hin monochlorodifloromethene gas a hmang. Hi vek gas hman tam nak

  san bik cu cawhnawih ( milk and milk products ) ret that nak ding
ah a si. Sa hel ret that tam bik cu Caw sa a si ih, curuangah leitlun
ah Caw sa le caw isin kan ngah mi ei le in tawl rel nak ding ih hman
CFCS         cu ozone 65%  siatsuah tu a si. Caw umlo sela teh ???

  5. Leitlun ram uk awk dan phunphun:

  a). Democracy : ‘Mipi rorel nak’ tinak a si. Ramsung ih vote
nei thei hmuahhmuah lak isin vote hmu tam bik cun ram uk nak a co.
Ram uk tu cu mipi hril an si.

  b). Republic : Politics lam mithiam pawl cun ‘Republic’ cu
‘democracy’ hnak in a huap kau deuh tiah an ti. Sinan, Hrekkhat
cun democracy ram tam bik cun hivek republic fehdan hi an fehpi sawn
tiah an zum. Republic ram cu ‘mipi in an aiawh in dan le uk nak
zohkiltu ding an hril ih, cui an hril mi cun tik cu caan neiin ram a
uk.

  c). Monarchy : Siangpahrang maw siangpahrangnu in ram a uk. Hivek
hi hlan lai ahcun uk awk dan tam bik a si nan, tulai san ahcun a tam
nawn lo,cuhlei ah a danglam vivo. Malaysia, Brunei, Thailand, England
etc pawl cun Siangpahrang ( King or Queen ) an nei. Monarchy phun 2 a
um. Absolute monarchy le constitutional monarchy a si. Tulai san ih
monarchy ram tam sawn cun political power an nei lo ih,sinan ram sung
ah uknak le dan lam ih buai nak a um pang cun ram that sal tiang
uknak an nei ih, cucu constitutional monarchy an si. Absolute
monarchy cun ram uktu dang tel lo in Siangpahrang uk nak thawn an um
lai. Tonga tikulh ram hi cuvek cun ram an uk. Monarchy cu cithlah in
uknak an co vivo.

  d). Aristocracy : Mifim le milian pawl in milian pawl an len
ruangih ram an uk theu dodalnak ah hivek ram uktu ( aristocrats )
pawl an si.

  Kum zabi 8-nak cem hlan tiang Eroup ram ah hivek uk nak hi a tam.
Sinan, anmah vek mifim le mithiam an tam vivo ruangah an thilri tampi
an sung. Hivek boruak an tawng hnu-ah Oligarchy in uknak an thleng.
Oligarchy uk awk nak isin Tyranny ih uk awk a awl zet.

  e). Oligarchy or Plutocracy : Milian lungrualza, mi tam lo in uk
nak  hna an tuan cu a si. Sinan, milian pohpoh le ram mipi pohpoh cu
an tel cuang lo, plitical right cu an nei thluh. Dan pawl tla uktu
member zat vekin tuah a si ih,cupawl cun anmai duhdan in economics le
thil dangdang an tawlrel. Monarchy thawn tla an feh dan a bangaw theu.

  6. Tyranny : Milian le tumtah nei hruaitu pawl in dan lo ih uk nak
an co mi cu a si. Hivek uk nak hi 500 BC isin hivek uk nak hi ram tha
lo le uknak tha lo zet ih ruah an si. Hivek uk nak hi Oligarchy ih
thleng a si sal theu.

  7. Dictatorship : Mi pkhat maw group khat in ram uknak an lak mi cu
a si. Dictators cun ‘dictator’ si lo in, democracy hruaitu ding
vek in an sal aw theu. Hitler, Mosoloni, Hirohito le kawlram hruaitu
vek an si. Hril an silo ih, mipakhat thuneih nak cun ram cu a duhduh
in a uk thei ih, mipi duhdan le ngaihdan a zoh lo.

  8. Satrapy : Ram kau zet pakhat sung ih ram fate pawl uk ding ih
ram uktu a phunphun thawn ram uk dan a si. Alexander The Great san
lai le Persia san lai isin a lar, ram kip isin tax an khawn.

  9. Theocracy : Ram uknak cu biak nak lam ih puithiam ( Priest or
Clergy ) in a fehpi nak cu a si. Iran ram ah 1979 ah ram uktu Shah cu
a hlawn ih, biak nak lam hotu ‘Ayatollah Khomeini’ cun uk nak a
lawng cih vek a si.
  10. Totalitarian : Political party pakhat ih ram uk duhdan, khauh
zet ih a fehpi mi cu a si. Cui party cun a thluntu pawl cun ramdang
suak lo ding le anmai duh mi vote ding in a forh rero. Tulai
democracy ram tampi politics ih doawk dan hi hivek hin an feh zik
theu.

  11. Parlimentary : Mipi aiawhtu in Parliment rorelnak in  ( Hlut-
daw ) hruai ih ram an uk cu a si. Ram uktu cun anmah hriltu party in
thu an neih sung cu thu an nei ringring ih, Party member pawl zum um
ding in an zuam awk.

  12. Anarchy : Anarchy cun ram uktu bik a nei lo. Hivek ukawk dan hi
ram buai deuh ah a um bik. Cozah an nei lo ih, uknak co ding in group
pakhat le pakhat cun uk nak le thuneih nak duh ruangah an do aw.
Taliban suah pek lai ih Afghanistan ram vek kha a si. Mipi in uktu
ding hril thei nak ding tik cu le caan hman nei thei lo in, group
tampi cun direct in thuneihnak an lawng aw ih, culai fang ih society
uk awk dan cu Anarchy an ti.

  13. Revolutionary : Cozah um cia hlawn ding le ram uktu pawl rung
neh thei ding tiang ih group pakhat thiltuah, cui group cu a fate maw
a tum zet thei, ram ukdan thleng thluh thei ding tiang ih thil rung
ti thei pawl ih uknak tawlrel dan le thuneih nak cu a si. Kan theih
thei lar bik cu ‘French Revolution’ kha a si.

  14. Capitalist/ Socialist/ Communist : Hi pawl hi cun ramsung
economy tawlrel dan vek in an dang lam. Capitalist ( e.g Russia ),
mipi in mahte business le thilri an nei ih, public hrang ding ahcun
cozah hnenah lei a tul.Socialist( e.g Norway )industries tam sawn an
zohkil ih mipi hrang tul mi an tuah, Communist ( e.g N.Korea and
Cuba ) business le in le lo hmuahhmuah an nei thluh, mipi hrang ah
thil an tawlrel.

  ChristmasLungawithu simnak

  By-Pate

  Canserh khawm lai ah tong let, projector ih hla rak kap le
powerpoint presentation pawlah caan ka rak hmang thluh ruangah keimah
bulpakin lungawi thu ka rak sim man lo ruangah tu ah lungawi thu
inntek dinhmun in ka sim duh.

  LCF, KL ih 2007 Khrismas puai cu 25th December 2007 (Tuesday) ni ah
Wisma FGA, Kuchai Bussiness Park, KL ah zinglam pa 10:00 AM ihsin
zaanlam 7:00 PM tiang hman a si. Tuikum Khrismas hmannak Biakinn cu
Malaysia Local Church ih tumbik le a a tthangso bik biakinn Full
Gospel Assembly Hall ah hman a si. Mi 1500 tlennak hall a si. An biak
inn ih hmanmi sound system khal hi Malaysia ram pumpuluk ih quality
tha bik a si ti a si.

  Khrimas puai ni ih LCF upa pawlih hruai kai daan le mipi an hoha
dan a ttha zet. An thinsau dan khal zohtthim tlak ngaingai

  a si. Mipi upa 700 hrawng le Sunday school nauhak 100 hrawng  tiang
Khrismas hmang thei dingih an tawlrel le an hohanak cu mangbangza fak
tlak ngaingai a si. Malaysia Khrismas puai ih Falam mi mipi tambik
record a lut ti a si.

  Ahleice in tui kum Khrismas puai hrangah ka hnattuannak office ih a
ra leng tu Rev. No Bual Hrang, Salai Thomas Pathuam le Johnson Lian
le hnenah ka lo upat zia thu ka rel duh. Khrismas ni ih bulpakih in
ttanpi zettu Pu Saw Pum le Pu Mang Hnin hnen khalah lungawi thu ka
sim duh. Rawl thlen tlai deuh nan tlamtling zet in atawlreltu  LCF
upa Pu Mang Tin Sawn, Pa Sang Nei Thang le Salai Cungte khal thinsau
zet in an tawlrel miparah ka lungawi.

  Ka miphun pawl Khrismas hmannak ding an nei lo kan bawm a tul ti ih
ka rak sim lai ihsin a cem ni tiang in tan la zetih in tanpitu ka
tuannak company ih Chairman James Wong le ka tuanpi office staff
rualpi pawl, Full Gospel Assembly ih Elder of Chairman Dr. Ong le
Mission Pastor Rev. Freak, Nauhak program le laksawng phunphun thawn
Khrismas sunloihtu Mrs Wong le FGA children ministries pawl, Laimi
pawl thazaang peknak le hla mawi a ra saksaktu UNHCR ih fala mawi
Aliance, Malaysia Pathian hla le radio hlasak hminthang George le
Tom, FGA Sound director Nick le Engineer pawl, Lighting director
Ganesh le engineer pawl parah lungawinak tampi ka neih thu ka tarlang
duh.

  Ahleice in Khrismas a hmangtu Laimi miphunpi parah miphun picang
kan si zia, picang zetin kan nun kan hmuh mi parah Malaysian pawl
lakah kan miphunpi ka uar zet.

   Merry Christmas and Happy New Year

  LCF ihsin  Lungawithu

              Khristmas kan hmannak ding hrangah Sumpai RM 5400.00
acem. Sumpai le a tul mihmuahhmuah in tawlrel saktu Pate parah
simcawk lo lungawinak kan nei. Pulpit lam ihsin tuanvo neitu pawl le
Mino music kaitu pawl par khal ah kan lungawi.

  Rawl ei ding tawlrelnakk ah Puai hman hmang man lo tu Pa Mang Tin
sawn Le Pa Sang Nei Thang, Rawl ei theh hnuah thil ziangkim ti thian
faitu mino hnatuantu pawl hmuahhmuah par khal ah lungawithu kan sim.

  Nauhak pawl leknak, thuzirnak le an nuam theinak dingah tuanvo in
lak saktu Christina nu, Mai Suite, Yacob Lalte le Biak Chawn par khal
lungawithu sim cawk lo kan nei.

   Committee, LCF

  Penang LCF) Christmas Hmandan

   Unau Zaten Pa pathian duhdawtnak zarah, Christmas Lungawi le ai
puangten nan hmangcio dingtin ruahsannak kan nei. Kannih LCF penang
lamkhal Pathian Duhdawtnak zarah Nuamzet in kan hmang..
      Rev.S Ni Luai tla cun, Vancung ram ka ngai..a tiphah rori si,
in ra hmangpi ih a parah lungawi thusimcawk lo kan nei.
  24 zan kha Suimilam 11.00pm in khawmnak kan nei ih 1.00am ah
khawmkan theh.
      Khawmtheh ih sin..( Social ) Nuamnak kan nei ih mipum 41 in zan
kan meng.25 Christmas sun ah Rev.S Ni Luai in thuthangtha sinnak in
nei ih Christmas hmangtu, Mipum  127 kan si. Kan LAI  daan…Voksa
Laisuan rori in Tukum Xmas kan hmangthei sal a si. LCF Penang ih
infehsan tu, Vana,Mangpi le Nagun Mang in Malay Rm.1600 USA ihsin
inrak kuat ih, Angki Special kan tuahthei ih, 25 sun ah zuarnak tla
kan nei…
  LCF Penang duhdawt tu Van a le, mangpi Ngunmang parkhal ah lungawi
thusim cawk lo kan nei..
  Lucky draw Special tla kan nei…A khawmtu mipum zaten laksawng
peknak tla kan nei…Suimilam 12.00pm ih sin Khawmkan thawk ih 4.30pm
ah Caan kan theh thei.Angki kan tuahmi hi Special rori a si
ko…Zunza le Zunkul (120) kantuah ih kan daih aw lo.

   LCF Penang in duhdawt ih, in vehvai ringring tu,Saya leh Upa pawl
tla kan Lungawi  langter nak ah Christmas Lungawinak laksawng Upat
nak ah kan pek hai. Pekmi pawl Saya Hrang tiam, Rev.S Ni Luai, Saya
Ngun Hre  Luai leh Pa Tha Nei Thuam , Vana Mangpi le Ngunmang USA um
mi Pawl an si.

   SaLai Cung Hnin
  LCFP Christmas( Leaders )

  Zualko

            Dec 28 zinglam 11 ah kan    Falam mi, Capoh (hnihsuah)
   sim thiam zet theu tu Sawi Tluang chu a umnak,Champhai kiang Ngur
ah PUMNA in,in tansan ta asi. Amah hi kan Falam mi pawl cun kan thei
cio ding ka zum,Rualpi kawm thiam zet le,hnihsuah sim thiam zet asi.

  Thuthantu
  Salai Pano

  LIAM KO AW….. KUM 2007

  By- Kawl Lian

  Pathianih lam hruai nakin kum 2007 cu kan hmang cem leh mai cu asi.
Hi kum sungah mihrekkhat mai tumtah nak a thleng thei a umawk vekin a
thleng theilo khal kan um ko ding. Harhdam nak lamih buai nak a
phunphun tawng le thil dangdang ah khal harsat nak a tawng kan um cio
ko ding.

  Lei tisa ih nung kansi cio ruangah Pathian duhlo zawngih ei le in
khal tam zet arak tuah kan um ko men thei. Mah bulpak hrang,mai inn
sungsang hrang,kohhran,kan miphun hrang ah mah tuah duh vekih kan
tuah theilo le kan tuan thei lo nak khal a um ko men thei.

  Tuah tumih timlam cia nak um fawn silo ih kan ral Satan pa ih thlem
nak zunih uai theutu khal kan um cio ko ding tiah ka ruat.
   Asile, a liam cia mi ni 365 sungah kanmah bulpak hrangah ret tha
in midang hrang ziang thiltha ha na tuah? Mi hrangih hnaihnawktu maw
nasi ih mi tibuai tu menha narak si? Mihek theutu maw nasi ih mi
relse theutu ha nasi? Kohhran pakhatih member pakhat dinhmun in na
kohhranpi u le nau pawl hrangah teh thla na cam sak theu dah maw? Na
kohhran hruaitu pawl hrang, Kohhranih missionary a thlah mi le na
Pastor hrangah teh vawiziat thlacam sak nak na nei thei?

  Pawlkawm pakhatah asilole Kohhran lamih hruaitu pakhat lakih tel
siin na tuanvo hngilh khawp le ngaih sak lo tuk vekin teh narak
khawsa pang dah maw? Hmin hmai ih Rev/Pastor hmuah ti lenglengsi mai
tuah dingmi awm tuah siloin thil dang , thil tul tuk lolo tla narak
tuah zelzel pang tla asi lo maw?Vun ruatsal cio sehla a tha lo ding
maw?

  Tuankhawm nak le rawngbawl khawm nak a phunphun vekah Pathian
hrang/khawtlang hrang hmuah ti lengleng theu si in mai hrang cangai
khawrh tum ringring theutu teh nasi pang maw? EC meeting rorel mi
vekih thlun duhlo, mai thu te ih mai duhduh rak tuah mai theutu teh
nasi pang maw?Na hmaika ah mi na bawm thei dingmi um fawn siin bawm
duh lo in lehlam na hawisan can teh arak um dah theu ko maw?

  Nupi pasal pawmlai nei keukeu cing siin a thupten fala/mi nu kawp
cing mi teh nasi pang maw? Mi paisa pek lehsal dingih na cawimi
sisiin na neih leh tik khalih rulh leh ding thei nawn lo vek
tiangtiang tla in maw na tal rero lai?Hitivekih thusuh awk dingmi hi
a cem lo ding.A tam tuk.Kan suhawk lo mi thil dang dang cu nangmahten
rak sutaw mai awla a tha.

  Aziang khal asile, zo kansi tla le mi tlam tling lo milai men kan
si cio hai timi hi kan theihfeng a tha zet ding. Tuahsual pang,
tuahhrimmi le rilh bah sual pang cu a um theu ko ding. Himi zawn te
hi kan hmuhthiam awkpi a tul zetin ka thei.Cuhnu ah Pathian fa nun
nak tlamtling nei zotu kansi timi khal hi theih ringring a tha. Tui
kumhlun 2007 thlathawk ihsi tui thla cem tiang mah le mah ah thil tha
lo kan rak tuah mi tam zet a um thei men. Asinan, cui thil tha lo kan
rak tuah theu mi pawl cu a kumhlun lala ahhin tanta uhsi. ‘Na buh
suanthar hlum thawte cu kheng se zet le bal tawp zetin na ei duh pei
maw?’  Ka zum lemlo.

  Kumhlunih mi a hua na, a mi hmu theilo na le mi parih na thincin mi
pawl hmuahhmuah kha na hrikthlak thluh a cu zo. Cubang pawl cu kan
ralpa Satan ih duh mi thil sunglawi hlir ansi ih hlawnthluh a cu tuk
thlang. 2007 sungih Bible siar lemlo le thlacam hna na thiam lemlo
khalle cubang pawl cu rak um hrih seh kumhlunah tanta thluh ko aw.

  Kuhva, ka sen zelzel vekih keu in mi kaiten le mi inn sung na ti
tawp theu mi pawl khal tanta a cu thlang kolo maw? Rual le pi pawl
thawi mah duh tawkih zu in hnu, zan simpipi ih mi na phone le na
thang theu mi pawl khal kha a tawk thlang kolo maw? Hnatuan paih cuca
silo in mi rawl dar mi le mi hnenih paisa dilna in maw na um tum
ringring lai? Silo, cucu thil thalo Pathian duhlo mi lakih tel asiih
na ban thei kalo duh sak. Cukhal hi kumhlun sungih na thenhloh ta a
tha ke. ‘Pathian ka zum, ka piangthar’ hmuah tisi in mah u le
nau ,mah miphun le ram hman duhdawt nak hna na thiamlo hiteh
kumhlunih tan tengteng a ci ko lo sawm?
  Paisa nei ti awfawnsi, mai Pastor a bawmhna hman thiamlo ih na um
cu thuhran rawlei vawikhat hman sawm nak cang na thiamlo khal hi nun
cihpi vivo a tha pei maw? Cun, kohhranih thawhhlawm pek nakah le kan
miphun hrangih cangvaih nak hrang a tulmi khawn tik vekah hmuah kut
hlawk thei theu lo nasi hiteh na duh tawk thlang ding lo maw?

  Hiti ih thazang lo pe rero tu keimah khal hi ka him thluk ce
cuanglo sokhaw. Keikhal nangmah vek men kasi ih tlinlo nak tampi nei
kasi ve ko. Asinan, nangmah thawn kutkai aw in a tui kumhlunah a
tullo mi karak tuah mi pohpoh cu hlawn viarviar ka tum ve ko ti kalo
sim lawlaw mai ke.

  A neta bikah zovek nasi tla le,khui tawk vekih na um khal le na
nuncan, na cangvaih nakin kan miphun le kan biak kan Pathian a
thangthat theiin a thangsiat thei asi ti thei ringring awla ka duh
zet. Cucu Laimi Pathian nung a zumtui tuah ding diktak asi.
  Len nak,hminthan nak,Upat nak le nunsau nak pawl a duhlo fa milai
kan um ka zum lo. Himi pawl na duh ngaingai asi le “Tangdawrte in
Bawipa tih zah” na zir a tul.

  Can sunglawi

  Piangte ( Za Thlir)

  Mi zan ah kir sal seh la ka ti tik ah kir sal theih a si lo. Thai
zingah si seh la ka ti khal ah thai zing cu ziang ka cang ding ti a
fiang hrih lo. Ka hrang leh na hrang ah caan tha cu a tu lai fang hi
a si. A liam cia, mi zaan cu mi zapi hrang ah liam ko seh. A ra
thleng lai ding mi thai zing cu Leilung tlun mi nung nung hmuah hmuah
in kan hngak lo. Sihmansehla a fiang mi tik cu caan a si lo.

  Ziang vek tikcu can khal ra thleng sehla a liam ve thotho ding.
Sihmansehla tikcu caan a thatnak vekih kan hmang thiam a si ahcun kan
hrangah caan a liam ti aum dah lo. Asinan tikcu le caan cu athatnak
vekih kan hmang thiam lo a si ahcun kan hrangah caan tha ti mi hi
Pathian in a hran in a tuah lo, hi ti ka ti tik ah mi hrek cu nan
mang a bang pang ding caan a hmang thiam lo tu pawl hrang lawng a si.
Caan a that nak vekih a hmang thiam tu pawl hrangah cun caan hmuah
hmuah hi can tha ih Pathian ih tuah cia mi an si. Kan mah ih a hman
hna thiam ding sawn kha kan tuan vo a si.

  Caan a sunlawih nak le athu pit zia, na pi ih ruah lo ahcun taimak
suah ih hnatuan a har ngai ngai. Na pi ih ruah ah cun caan in mi a
tai mak ter. Caan a sun lawi zia a hmu

  suak tu le lei tlun mi fimthiam pawl cun Minute pa khat sungte hman
a lakah an liam ter siang lo. Hna tuan an cawl caan khal ah to men lo
in ca siar in caan an hmang. Caan tha te ih a hman thiam hi kan raal
pa satan ih a huat bik mi aral a si. A thup te ih a bawh ringring tu
satan kha luh nak caan a pe loti ah ( C.Wilcox) in a rak ngan. Caan
hi san tlai lo ih ka hman ruangah a tu cu caan in kei mah san tlai lo
ah i hmang ve thlang ti ah (W.Shakespeare) in a rak ngan ve.

  Ziang hman lo ih caan ka rak hman mi hi hmailam a thleng lai mi
caan hrangah ral rin nak in pe tu caan tha bik mi a si. A tang lai mi
caan hi a tawk ko a si nan that hnem nak nei lo leh caan ziang san
tlai lo ih hman nak ding men ka hawl ahcun cu cu san tlai lo mi ral
rin nak a si ti ah (Ar Thur Bri Shaen) in a rak ngan. Cubangin kan
nih hrang khal ah a luan cia mi caan cu luan ko seh a tang lai mi
caan hi kan hrang ah caan tha bik an si. Caan a sun lawih nak a ngan
vi vo a si ah cun lei lung pi a cem ral hlan lo leh Ni le Thlapi,
Arsi an ral lai hlan lo caan a sunlawihzia a cem thei dah lo ding
ruangah hi vial in ka bang hrih ding. A siar tu nan za ti parah caan
a sun lawinak vek ih hmang thiam tu si dingah Pathian in lo thlaw
suah hram seh……………A men

  Thla kan cam tawk maw

  Piangte(USA)

  Jimmy Carter, USA ih president 39th nak rak ttuan dah pa cu, mi
piangthar ngaingai a si. Democratic party hi liberal deuh leh Pathian
theilo deuh in an hmu tlangpi nan, Carter cu Democrat party lakih
Pathian theibik president a rak si. President a ttuan veten
(interview) an tuah nakih an sut mi cu, “president na ttuan hnuah
nikhat ah vawi ziangzat thla na cam?” ti a si. A simmi cu
“President ka ttuan hnu cu duh vekin caan ka nei thei nawn lo ih ni
khatah vawi 24 lawng thla ka cam thei thlang” a ti ta riai.
President a ttuan hlanih a thlacam tam dan ding zia cu…..????

  Tutum cu Bible cangthlan tam deuhin ka rak ngan ding. Daniel 6:10,
3:16-18, Tirhthlah 8:22, Rom 12:12, 1Thesolon 5:17, Matthai 26:41,
Mark 11:25. Daniel 6:10 lawng ka rak ngan lang dingih Bibal bung cang
dang pawl cu, nangmah ten rak
  siar dingah ka lo dil.
   Danial 6:10Siangpahrang in a hmin a khen zo, tikha Daniel in a
theih tikah a inn ah a tlung. A inn tlunta khaan ahcun Jerusalem lam
hoi in sangkate an um. Cutawkah a tuah ringring ?heu vekin a ong awmi
sangkate pakhat kiangah cun a khuk a bil ih ni khat ah voithum
Pathian hnenah thla a cam.

  Daniel hi Pathian mihman zetmi (major profet) profet picang timi
pawl lakih pakhat a si ve. Daniel cu tlangval ttha, mirin um,Pathian
ttihzah zetmi a si. Babylon san tthat laiih, cathiam pakhat tla a si.
Daniel cu mifel le cathiam a si vekin, Darias timi ram uktu pa cun,
ramkulh 120 uk dingin mi pathum lakah a hril ve. Curuangah Daniel cun
ramkulh 40 parah thu neih nak a nei tinak si cu, a ropi nasa. Ramkulh
cuzat uk ding cun fim le thiam nasat a ttul nasa ding ti auh. Man
khal a man lo nasa ding. Asinan, nikhat ah a malbik vawithum cu,
sangkate ongin Jerusalem lam hawi in nitin thla a cam thei lai. Nan
le kei, ramkulh pakhat hman uk lomi in teh nikhat ah vawi ziangzat ha
thla kan cam?

  Daniel ih rualpi pathum, tlangval hmelttha Shadrak, Meshak, Abenego
pawl tla milem biak duh loin an um ih meidil sa ngaingai sungih an
thlakzikah ziang an ti..Meisa alh sungin in hum theitu Pathian a um a
si ahcun kan biakmi le kan rianmi kan Pathian lawnglawng a si ih amah
cun na cahnak huham sung khal in in hum ko ding.  In hum lo a va si
hmanah, siangpahrang bawipa, na khawzing pawl cu kan bia lo ding ih
na sui milem tuahmi hmai khalah kan kun lo ding, ti cu in theihsak
cia aw,” tiah an ti. An va ral ttha lawmman ve ti auh. Fala hrangah
cun, hi pawl vek thlangval hi si pasal dingih nan hril dingmi. Mi ral
ttha, huaisen ka timi cu hi te pathum vek hi an si. An biakmi le an
zummi zo a si, ziang a tuah thei ti an thei tuk si hi. Hi te pathumih
zumnak vek hi kan va ttul em. Mitam pi cu Pathian hi kan hrangah
hlawknak a um lo ah cun, kan biak ttha duh lo, kan phunzai theu.
Asinan hi te pathum cun, Pathian in in hum lo hmanah, Pathian cu kan
phatsan dahlo ding an ti si
kha. Nan le kei teh kan tingam ve kem?

  Veikhat cu South Korea ih Pathian hnattuan mihming thang kawhhran
member 700,000 lenglo neitu Dr. Yong Ki Cho ih (spelling ka sual
ding) fapa (food poisoning) rawl a ei sualih sizungah a thleng. Dr.
pawl in a ril pawl in an tuar loih, zinghman kan tuah thei nawn lo an
ti ih, a fapa te cu a thi ta riai. Cu veten, Dr. Cho cu zisung in
tlunlam ah a kaiih, khukbil in nasa zetin thla a cam ciamco. Thla a
cam laiah, setan cun, “Na fapa cu a thi zo, thla cam man a san
tlailo, Pathian hna ttuan pa na mualpho riai” tin a hniksak rero.
Asinan, Dr. Cho cu thla a cam rero thotho ih, a fapa te cu nasa zetin
a thil ei mi pawl a luak suak ttheh salih, arak nung sal. Himi a
thlacam sung hi nazi kar tam ngaingai sung a si an ti.A fapa in a sim
mi cu, “Ka pa ziangah thla na cam ee, kei cu Bawi zisu nih ka kut
in kaiih, Sui ih tuahmi khawlipi mawi ngaingai mi sung kan lut zik
fangah, Zisu in ‘na pa thlacam ka hnial theilo, va ttum hrih aw la,
neh hnuah ka lo ko sal leh ding’ in
ti” a ti.  Unau tusun ah nat nak na nei maw, cancer, TB, Hepatitis
tvp le mi rel hmang natnak, mi huatnak natnak, mi iksik natnak,
hurnat nak, duhham nak, sual tuah duh nak natnak tvp. Cu pawl cu kan
biak a nung Pathian in a dam tir ttheh thei. Zumtu thlacam nakin tih
theilo mi a nei lo.

  Zumtu nun ah thlacamnak neilo cun, umzia a neilo. Thlacam lo nun cu
tidai le dawm pe lomi antam hmuan thawn a bangaw. Thlacam nak nun um
lo cun, thlarau lamah a thangso aw theilo bakah, hnangam nak ngaingai
a um theilo. Bible tlawng ka kai laiah, nikhat ah a malbik nazi
pahnih sung tal Bible siar le thlacam in caan ka rak hman dah. Kha
laiih, ka nun hlimzia le ka thawveng dan kha ka ngai cuahco. Tu ah
cun zingtin Bible (Our Daily Bread) “Nitin thlarau rawl” siar le
khukbilih thlacam bak lo cu, ka ti thei tuk nawn lo. Hihngakin can
tam ka pe tum rero lai.  Asinan um men khalah ka thinlung ten thla cu
ka cam ringring. Sim duh sawn mi cu ca kan zir laimaw, mawtaw kan
mawn lai maw, hna kan ttuan lai maw khalah, kan thinlung ten thla kan
cam thei ringring a si. Kan Pathian hi a va ttha em, kan mah kan
siarem naknak in thlacam in kan biak thei. Pathian hming thangtthat
in um ko seh!  Nupi pasal nei, fate nei kan si ah cun kan nupi/pasal
fate parah kutsuang in thlacam sak uh
si. Thlacam kan ttul. 1 Thesolon 5:17 ah “Thlacam ringring uh” a
ti.

  A net nak ah…..
   @Khawlvelih lalbik a simi, (super power) neimi USA president hlun
Mr. Jimmy Carter cun nikhat ah vawi 24 thla a cam thei lai……
  @Profet Daniel, Babylon san tthat laiih prime minister tluk simi
cun, nikhat ah khuhbil in vawithum thla a cam….
  @Dr. Cho cun nazi kar tam zet sung thlacam nak in thihnak tur a
net……
  @Kan Bawipa Zisuh cu Gethsemani hmuan sungah thlanhri thisen suak
in thla a cam…

  Unau nang le kei tuni ah kan mai hrang, kan inn sungsang hrang, kan
fa le hrang, kan nupi/pasal hrang, kan rualpi hrang, kan ral pawl
hrang, kan kawhhran hrang, kan miphun hrang le kan ram hrangah vei
ziangzat mithli tlak, thlanhri tlak le lung kekkuai in thla kan cam?
Nikhat ah second, minute, nazi paziat sung thlacam nak ah kan can kan
hmang? Thla kan cam tawk maw?Pathian in a siartu zaten thlasuah in pe
hram
                          seh…

Comments

comments

Comments

%d bloggers like this: