Hruaitu Weekly News Issue 163

  Hruaitu Weekly News
  Issue 163
  23 December 2007

Zohfeltui’ Awkam

Christmas Ni Sunglawi

  Laimi pawl in kan puai sunglawi bik cu Christmas a si ko. Kan
nauhak lai ihsin XMas puai ahcun a nuam awk lo kan um dah lo. Kan
upat hnu khal ah harsatnak phunkim kan tawng ko nan, himi ni khua
ahcun nuam zet in puai kan hmang theu sawn.

  Tui kum XMas khal ah kan kiangkap ah thinnuam lo nak a phunphun kan
thei.  Asinan Chrismas ni ahcun nuamtak in kan phurrit nak hmuahhmuah
tanta in Pathian thangthat uhsi.

  Christmas hmannak ding ah a tul mi ei le in ding, fehnak ding Bus
man tiang in Pate pu  le an kawhhran pawl in in tum sak ding ruangah
minung a tam theitawkin feh ding a si ko. Nauhak upa kan zaten feh
cio uhsi. KL khawsung thotho a si. Kan biakinn ihsin minit 10-15 ah
thlen theihnak hmun a si. Mipum 600 – 1,000  karlak kan si thei
dingih zum a si.

  A Ni                                -25 December 2007
  Khawm can                  – 2:00 PM- 5.00 PM
  Bus feh can.               -10AM-11 AM (Biakinn ihsin Bus feh ding)
  Ahmun                          -Full Gospel Assembly KuaLa Lumpur
                                         Lot 689-A,Taman Goodwood
                                          Jalan Kuchai Lama. Ph. 012
9081 901 (Pate)

  Mr. Lee in S.Korea ah

    Lee Myung-bak cun S.Korea rampum hrilawknak ah nehnak a co
Conservative GNP Party ihsi candidate a si mi Mr.Lee hi 50% hnakih
tam sawn vote hmu zo ih a sangtu in 26% a hmu.Hrilawknak ih a tlingtu
in kum 5 term rak tuan zo tu President Roh Moo-hyun ai an  awh ding.
Official in thuhla phuan a si hrih lo nan Mr.Lee a tling dingih zum a
si.
              Tuhlan Hyundai group excutive rak tuan dah tu Mr.Lee

  in televised news conference an tuah nakah, “Korea mipi pawlin
sawisel ding um lo khawpin in support. Mipi pawl hrangah hnuaidawr
zetin hna ka tuan dingih mipi pawlih saduhthah dan vekin pursum
leilawnnak ka humhim ding” tiah a sim. Dong-young cun tui tum
hrilawknak ih a tlin lo thu pom in, ” tui ni mipi pawlih thutluknak
cu ka lungkimpi a si” tiah a sim. President ih hril mi Lee Myung-bak
hin ram tha tei` a hoha ding ka beisei, tiah a sim bet.

  Tlangleng a let

  Pakistan ramih Tlangleng pakhat cu kandung ni 18.12.07  zanlaifang
ahkhan lamzin  zawhsual ih a tluk ruangah milai 56 in thihpi phah in
120 hnakin tamsawn in hliamha an tuarphah a si.
  Khaan 12 a um mi, Karachi le Lahore karlak zanvar te a tlan rero
tu  Tlangleng hi SindhProvince, Mehraabpur khawpi kiangih cangsual a
si. Khaan thenkhat pawl cu tidai sungah pil in a then cu a sawprawp
theh.

              Muslim pawlih Eid al-Adha puai laifang a si ruangah a
tu vekih milai tamzet Tlangleng parihan hnawhkhat awknak saa si ih,
himi ruangah thi le hliam an tam phah nak khal a si. Tlangleng
cangsualnak hmun hi Karachi ihsi nitlaknak lam Km.400 hrawngah a si .

  Pakistan ram Sindh province ah milai 130 hnakih tamsawn cu Kandung
2005 kumah Tlangleng cangsualnak ruangin an rak thi dah ih, cumi cu
kum 15 sung an ram Tlangleng cangsual nak ruangih vanduainak an ton
natsat bik tum a si.

  Penang ah Lainu

              Penang state sungah, kan LAINU harsatnak a tawng…
  DAWT THA SUNG – kum- 16 thla 5 A Pa Hmin ZUNG LAL SANG  VOM KUA
Kawlram A Um Nak: KALAYWAH Penang state  2 DEC 2007 ah a thleng A kai
tu pawl hi kawl ram sungih a um mi:n Misual : YAKHAI (or) MON Kan
thei fiang lo!!!  A Pu le pawlin: 10 DEC 2007 NAZI 1: 50 PM ah RM
1500 in, Mai Dawt Tha Sung cu  Him dam ten an tlen suak ngah…Ram
lengah mah pum cawm nak hawlin harsa zetin mi kut hnuai ah hna kan
tuan cio…

  M’sia ram sungah Pawlkom a phunphun a um. Penang state sungah LAIMI
hmuahhmuah khawm nak:Lai Christian Fellowship Biakinn a um

  Danny Tiamte  012 487 2407
  Cung Cung       016 400 3625

  Mi 31 mi thi
              UN aiawh ih thuphuangtu Paulo Sergio Pinheiro cun
September le October thla ih kawlram sung sandah piahnak ahkhan
minung 31 hrawng in nunnak an liamih, minung 4000 hrawng cu
thawngthlak an si tiah a sim.Paulo hin Kawlram cozahin mithi zat
fiang le dik ih an sim duh lo ruangah zohfelsaknak tuah an si ding
tiah a sim bet.

  Chin Love Chin Foundation

  Kan Chinmi kil him tudingah le  WE ARE ONE IN CHIN  timi motto
hmangin kan Chinmi kil kim than sohnak tuah ding tumtah nak tumpi
thawn CHIN LOVE CHIN FOUNDATION

  WWW.Chinworld.info

   Tucun, nitin Lai tong roriin thuthang na siar thei thlang ding.
  Culawng hman a si lo, kan mai Lai tong rori ih website um hmaisabik
a si… rak ong awla, a hlawknak vun tep ve hnik aw… na siiraw lo
ding. A rei hlanah thuthang khal a ngaiih ngai theih in a suak cing
fawn ding. Cahram le Biazai, Awnmawi, Bulpak hmaitonak, zuk le a
dangdang… a dangdang ih feh rero le thuthang hawl rero a tul nawn
lo. Nangmai hrang a si… rak zoh aw…

  Zualko
  Pi Sui Can

  Pi Sui Can (Rev . No Chum nupi ) [ Gospel for Asia ] Bilbe tlawng
neitu cun 15 th December 2007 zanlam Nazi 6 :00 P.M ah Yangoon an mai
Inn ah , mual in liam san a si.

    A tanta mi apasal Rev . No Chum le a fapa , suahpi unau sungkhat
dang pawl hnen ah, minung ih pekthei lo mi hnangamnak Pathian in run
pe in , run umpi hram seh law. Thlacam nak thawn bawm cio uh sih.

  Thuthantu
  Kap Thio. U.S.A

  Pu Ngun Thawng Din Fapa
            Falam peng Ral Lawn khawsuak,Aizawl BawngKawn ih um Pu
Ngun Thawng Din fapa te Lal Rem Ruat Kum (1) cu 18.Dec.07 4:30 Pm ah
Neumonia in in thih san ih 19.Dec. 2007 12:00 Noon ah vui liam a si.
  Hringtu nu le pa le a u le 4 le sungkhat unau hrangah thlacam sak
cio uh sih.

  Pa Lal Biak Lian
              Pa Lal Biak Lian kum 35 ( Zonuam khua) cun 20 December,
2007 ah Lung lei, Mizoram Civil Hospital ah in thihsan.
  Thuthantu
  N Tawk Kap

  Laimi thihhlohnak rapthlak
            Malaysia lam pan in kan Laimi pawl Kawh Tawng ihsin
Ranawng karlakah an to mi  Lawng a let. Mi 99 tomi lakah mi 45 an thi
ih, mi 44 cu an run suak thei. Ziangruangah Lawng a let ti cu
fiangten theih a si hrih lo nan Nga kai Lawngpi thawn an taih awk a
si ti ih ruah a si.

  Ziangruangah tile Milai phurtu lawngfate hi dan lo ih hnatuan an
sivekin meisa vang an si lo raungah an pah ngah awk pang a si in an
thei. An Lawng cu hmakhat ten tipi thuanthum sungah pil lohli lo in a
um tikah Ngakai pawl Lawngpi sungah a kai man pawl cu an luat tin
thuhla dawn a si.Himi kan Laimi pawl hi a tlangpi thuin Malaysai
ihsin an nufa an cahmi pawl an tam bik ti a si. Tuni (Tlawngkai
ninga) ni tiang Laimi Agent pawl in an

  mah le an rak thlah mi pawl cazin in zingzawi a sile a hnuailam
vekin mithi an si.

  Khua                           Mithi
  01. Sialam                  2
  02. Lungler                4
  03. Mara (pential )   2
  04. Lulpilung                        3
  05. Tedim                  3
  06. Hniar Lawn         3
  07. Nga Lang             2
  08. Hakha Khawthar            3
  09. Vomkua               3
  10. Tlang Khua         1
  11. Ti Phul                 3
  12. Van Zang             1
  13. Hriphi                  3
  14. Hakhalay             2
  15. Leitak                  2
  16. KyaInn                2
  17. Sakta                    1
  18. Khua theihlo       3
  19. Kyita (Kalaymyo) 1
  20. Falam mi             1

  Thuhla a netabik ih a faing bik mi ti ih ruah mi cu a si. Hmailam
ah thuhla fiangfel vivo in than awk kan tum ding.

            Theihkaunak le Ruah ding tam

    ( By   BiakChawn )

  1.         Malaysia ram cun 2007 cu Visit Malaysia Year ah a phuang
nan, leitlun ah ramdang mi mikhual ( tourist ) nei tam bik 18 nak
lawng a si. Tourist tam sawn cu Europe ram, Australia, USA, UK, New
Zealand, Canada lamah vacation an hmang. Asia ram sung ah hman 7 nak
lawng a si ih, tourist nei tam bik cu Thailand a si. Malaysia sung ah
tourist feh tam nak bik cu Penang a si ih, Genting cu 9-nak a si.

  2.         London khawpi ahcun mi tam sawn hrang ah toilet um nak
nai bik theih thei nak ding ah cell phone hmang tu hrangah `satlev
service’ tuah asi; toilet feh duhtu cun ca a kuat ding ih,toilet
umnak nai bik cu an rak kuat cih ding. London khawpi sung minung tam
nak lamzin hminthang zet Westminster Street ah hman kum khat ah zun
ti 10,000 gallon ( 40,000 liters ) hrawng mi phunkip thawh mi tifai a
tul theu.

  3.         US ram sung hmun tamsawn ahcun thawng in sung lam cangan
le thawngtla pawl umnak pawl cu pink colour-in a thleng vivo. Pink
colour ( sen dang ) hin minung thinlung a neh ih, displine a tuah tha
thei tiah mithiam pawl cun an zum. Tu hlan ah Vanzam ih khualtlawng
theu cu 80% vanzam an ri theu ih, hiti vek harsat nak hi vanzam
sunglam colour ruangah a si ti an hmusuak. Vanzam sunglam colour
aihre (yellow) hmuahhmuah cu an vawn thleng hnu ah mangbangza-in
vanzam ri an mal deuhdeuh ti a si.

  4.         Leiltlun daihnak duh ruangah International Atomic Energy
Agency ( IAEA ) cun Neuclear bomb hi mal deuhdeuh ding in hna a

  tuan rero. 2007 sungah USA cun hivek energy tuahnak ding ih timtuah
cia Uranium 1,800 tones le Russia cun 1,200 tones hrawng cu thildang
hrang ah hman ding in an tan. Neuclear bomb pakhat tuahnak ding ah
Uranium 3 tones ( 3,000 kgs ) hrawng hman a si ih, leitlun ah USA,
Russia, France, England, China, India, Pakistan le North Korea cun an
nei ih, Israel a thup te-ih nei thei ram a si. Leitlun ah Uranium
thir, hriamnam ih tuah thei ding ih tawlrel cia 8,000 tones a um lai
tiah IAEA cun a zum.

  5.         Leitlun harhdam nak ih tawlrel tu bik World Health
Organization cun `mipa hnak in nuanu cun thil cin tha lo (bad habit)
an nei tam sawn ih, kuak ci ei, naw-alh hlo ei, kut le ke tin ei, sam
ei etc an hmang. Hihi iron tlaksam ruangah a si ih, nunau taksa cun
mipa hnak in iron an hai tam sawn a si. Zinc um tamnak vitamin thawn
an cin tha lo cu tidam thei a si tiah ca a suah. Hi thu hi kan dung
ih London fala pumsung isin minung sam 10 pounds ( 4.5 kgs hrawng )
an laksuah thu thawn pehpar ih suah a si ih, hi nu hin kum 10 a ti
isin a sam ei a cing thawk.

  6.         Leitlun ah AIDS ruang ih thih nak cu a karh vivo. Kum
2007 sung ah minung 21,00,000 cun an thihpi zo ih, nauhak 3,80,000 an
tel. AIDS natnak nei (damlai) 3,30,00,000 hrawng an um lai ih, tui
kum sung ah a nei thar 20,50,000 an si. South East Asia ram ah mi
40,00,000 hrawng an um ih, tuikum sung ah 3,40,000 cun annei thar.
Leitlun nauhak 20,00,000 hrawng in hi natnak hi an nei lai ih,
natnak 87% cu nunau mipat hman nak isin ngahtu an si. Leitlun ah
nauhak kum kim lo ( 18 hnuailam ) nunau mipat nak lam ih hmang awk
nak (Child Porn) nasa bik cu Philippine ram a si ih, cui theh ah
Thailand, a pathum nak ah Kawlram a si.

  7.         Kristmas, Bawi Jesu suah ni ih kan hman theu hi, a hlan
ahcun Israel ram ih Bawiipa’i suah thla sung vek ih hman a rak si.
Cucu Israel calendar ah thla sarih nak Tishri (Ethanim), kan ni
September le October hrawng a si. Cui thla cu a hlan ahcun Rome
calendar ih December ( Latin tong in Deca=pahra; December= thla hra
nak ) a si. Sinan, Pope Gregory VI cun a san lai ah Calendar a tuah
sal tik ah December cu thla 12 nak ah a ret ih, cucu Israel ram ahcun
ruah le rial tlak tikcu ah a cang, tukhal tu pawl khawleng ah an riak
nawn lo. Sinan, tui hlan December cu thla 10 nak a si ruangah tu ni
tiang December 25 cu Kistmas ni-ah kan hmang.

  8.         Leitlun ah thah ding ih thu thensak awk nak a tam vivo.
Kum  2007 kum ah mi 12,500 cu thah ding ih thu then sak a si ih, 1996
mi 4,272 an um. Tuluk ram sung ah hivek thuthen nak hi a tam bik ih
1996 kum ah mi 3,050; 2004 kum ah mi 3556; 2007 ah 6,300 an si.
Leitlun ah milai zuar awk nak (human traficking) cu a nasa bik ih,
pahnih nak cu ritnak sii le hriam nam ( Drugs and Arms traficking ) a
si. Minung zuar awk nak ah nunau nauhak an tam bik.

  9.         Minung pakhat ciau in kum khat sung ah kan seh vel
boruak isin Radiation ( ni zung or eng zung ) 2.1 millisievert hrawng
kan tuar ih, cucu hrek khat hrang ahcun vun nat nak a ngah thei.
Sinan, damlo hrang ah vawikhat X’ray zuk awk nak ruangah 0.1 isin 0.3
millisievert tiang radiation tuar thei a si ih, minung thluak le ruh
sung `thlik’, lung (heart) le kaileng (kidney) sung zoh nak `Computed
Tomography’ le `Computerised Axial Tomograph’ pawl cu vawikhat hman
ruang ah 2.5 isin 4.0 millisievert tiang radiation ngah thei a si.
Hivek radiation ruangah zum lo pi in Cancer nat nak le thisen, vun
nat nak tihnung zet ngah thei a si ruang ah, X’ray le CAT zuk ding
damlo cun doctor hnenah a san sut fiang ta ding a si.

  Christmas Taktak  (Nitin Thlarau rawl)

  Siar:
  Luka 2:25-35
  Hih naute cu Israel mi lakah mi tampi tluknak ding le mipi
tungdingtu dingah Pathian ih hrilmi  a si. Amah hi mi  tampi in
Pathian hnenih a rami hmuhsaknak maksak  a si ding.            – Luke
2:34
  Kan Kawhhran ih Advent biakkhawmnak buletin nganmi in Christmas
tuah daan ruah saalnak i peek:

  * “A cang theitawk in, Christmas cu, a si taktak lomi mawizet ih
ceimawi duhnak hrial uhsi! Khrih cu a si taktak leitlun ah a ra, A
hrangah a khaan um lomi khuapi sung sualnak nei lo pawl thattu, Herod
ih siangpahrang ttuannak ram ah a suak.

  * “Leitlun harnak kham sak dingah si loin, tuar theinak thazaang le
raltthatnak pe dingah a ra. Nunnak ih raaldonak sungin cawi suak
dingah a si lo, daihnak pe dingah a ra. Amah ih daihnak thawn, do
awknak sungin thinphaang loin kan um theinak ding le, a kekkuaimi
leilung damter ding le daihnak peek dingah a ra.

     Mary le Joseph in naute Jesuh cu Bawipa hnenih an ratpi tikah
Simeon in, “Zoh aw, Israel mi lakah mi tampi tluknak dingah le mi
tampi tungdingtu ah Pathian ih hrilmi a si. Amah hi mi tampi in an
engtai mi le an thinlung sungih thuthup an neihmi langtertu ah a cang
ding (Luke 2:34-35) a ti.

     Khrismas cu a ngaingai ihsin pialnak a si lo, a sungah lut ih
daihnak Siangpahrang thawn feh khi a si.Riahsiat natnak ihsin; in
kham sak dingah,

  Khrih a ra lo;Hmanseh A daihnak neitu cun,Buainak sungin an tthang
ding.Jesuh cu tleunak peek ding ah a ra, a himdammi leilung ah..

                      Biakinn sung kan thlen tikah

                By-Salai Pa Mang

  1          Biakinn sungih hnihsuahnak ding um hnai loih hnih hmang
tuk hi mi cangkang lo ka si ti theih awk a tha. Ahleice in ahmailam
ih tuanvo neitu pawl in ralrin a tha.
  2.         Khawmban tiang veikhat tal to khiokhi dah lo cu
mizaran       hnuai ih ret deuh an si theu.
  3.         Ziangtik khal ih hmailam to duh dah lo nu / pa cu amah
le mah a thlaniam aw rero tinak a si.
  4.         Lu kun ngernger ih thuthangthasim ngaitu cu a hrek hman
a thei lo men thei.

  5.         Tuanvo neitu um cingih tuansak/tuahsak rero khal mi
mualphoh vekah a cang.
  6.         Cankaitu tuan ih thuthiamtuk, tong mawi hman tum tuk
khal a tul in a mawi tuk cuang lemlo.
  7.         Can kaitu in thuthangtha simtu a kawh tikah “kan rat san
bik mi” ti tongkam hman a tul lemlo. Felfaiten kaih a tha sawn.
  8.         Zapi thlacam rual can ih a netabik felfaiten tuahsehla
ti ih kan ti theu mi khal a tul lem lo, a felfai lo pang asilen
cankaitu ih tuanvo a si sawn.

  9.         Angki kalar nei lo  hru ih mipi hmai ih din cu a mawi lo
zet.
  10        Thlungdar tumtu pawl in mipi hlasak hman thei theilo
khawp in an tum khal a mawi tuk lemlo.
  11.       Pathian biak lai ih phone phit duh lo pawl hi Pathian bia
ngaingai an si pei maw? Ruah ding a tam nasa.
  12.       Bannak  Hla number cu zat ti loin, bannak lam kan pan
ding ih thangthatnak hla number cuzat kan sak ding ti ah a  mawi deuh
ngaingai.

  NB//    Atlun lam ih ka ngan mi hi keimah ih ka hmuh dan a si.
Mizokhal in kan dam sung zir ding le zir duhnak kan neih a sile
thansonak lamzin kan pan a si.

  Milai pawl hnenah remnak thleng seh!

  By- Zawlhlawm

  Luka 2:14 ” A sang bik van ah khin Pathian cu thangthat siko seh; A
duhdawtmi minng pawl umnak Leilungah hin remnak leng ko seh” tiah an
ti. Himi hla ihsin kan zir ding mi tarlang sehla.

  Leitlun in ziangmi a poimawh bik kan ti asi ahcun Remnak a si. Ram
khat le ram khat remawk lo nak ruangah leitlun a siat theh thei,
rampi le rampi an rem awk lo cun leitlun mi pawl an thinphang theh ih
aremtertu ding an hawl ciamco theu. Cutivek thotho in hnam le hnam an
rem awk lo ahcun a thangso lo mi hnam ah an cang vivo mai. Inn
sungsang khal rem awk lo nak a um a si ahcun innsang nuam lo lawng si
lo in kan thangso thei lo ih hlei ah Pathian thlawsuah khal a dawn
taktak theih lo.

  Rem awk lo nak hi khuitawk ihsin a rak suak tin a hrampi kan zawt a
sile Eden hmuan ihsin a rak si. Cutawk ihsin Pathian le minung,
minung le minung, minung le a thil tuah mi saram phunkim parah

  aremawknak a rak um nawn lo. Asinan Bawi Jesuh a suah zan ih Tuu
khal pawl hnen ih Vancung mi
  pawl in an hlasak mi ahcun Leitlun milai pawl hnenah remnak ding
hrangah naute a suak timi a fiang tuk. Tuu khal pawl hnenah sak a si
nan Leitlun mipi hmuahhmuah hrangah faknak hla a si. Jesuh suahnak
ding hrangah ziangtin an rak timtuah aw timi mithiam pawl ih zinzawi
dan malten zoh hnik uhsi. BC 600-700 vel ih a suah ding thu an rak
phuan tikah an rak timtuah aw nasa maw? Jesuh suahnak ding hrangah
khawlaili ah Khualbuk inn tumpi an sak. An zum vek in a suak lohli lo
tikah an inn sak mi cu aram (luahtu um lo in  a um riamriam mi) mai.
Cutikah Milian pakhat in a lei ih mipum siarnak ih mikhual pawl
thlennak ding ah a tuah tha. Betlehem khua cumi inn pi pan cun mi
tampi in an inn khan pawl cu an sang cupco. Jesuh suahnak ding
hrangih a n ret mi khan cu an tuah dan pawl nuam hmel tak a si.
Khualbuk ih khan an tuah mi pawl a cem hnuah Jesuh suahnak ding
hrangih an ret mi khal ralbawi pakhat in a dang khan pawl hnakin a
man tam in a rak lak. Cuti ih an khan a cem ciah
zawngah Joseph le Mary cun khan san ding an sut nan a um nawn lo
ruangah Caw inn lam ah a riah theih ve thu sim in a feh ter. Cumi zan
ahcun Tuu khal pawl in milianpa hnenah tuizan ah na inn ah rundamtu a
suak, cibaibuk kan duh tin an rawn thang. Cutikah milianpa cun a ruat
rero hnuah netabik ih rak thlengtu, a rak khir mi naupai te nupa kha
an si dingtin caw inn lam an hei zoh. Meisa vang an hmu ih rundamtu
naute cu an hmu. Leitlun misual pawl rundamtu rori cu sumpai ka duh
tuknak ruangah ka rak hnar ngah tin tapphah cing in  cibai a buk. Mi
tampi in Xmas kan hman dan hi zoh kir sal sehla, sumpai hawlnak
remcang ih a hmangtu khal an um ih, nuamnak hawl in a rak um tu khal
kan tam thei zet. Unau nangteh ziangtin X Mas hman na tum Jalan Alor
hrawngih  dawr tuah pawl bawmtu  na si sual pang pei maw?

  Biaknak dang le Kristian kan damglamnak pawl
  1.Biaknak dangah cun Minung in Pathian a hawl. Kristian ahcun
Pathian in minung a hawl
  2.Biaknak dangah cun Minung ihsin Pathian ah can tumKristian ahcu
Pathian ihsin Minung ah cang
  3.Biaknak dangah cun  Pathian hrangah minung thi Kristian ahcun
Minung hrangah Pathian thi
  4.Biaknakdangahcun Thianghlim a tum Kristian ahcun            A ti
thianghlim zo.

              Kristian pawl kan danglamnak emem cu Eden hmuan ih
bawhsiatnak ruangah Pathian cu minung pawl; thawn remnak tuah dingah
minungah a rak cang. Himi tikcu can cu Christmas ni asi. X-mas ahcun
ral do awk rero lai hman an cawl theu an ti kha. Mah le neih mi lak
ih a sunglawi bik in laksawng  pek awk can a si. Cuang pawl hnakih a
sung lawi bik cu Pathian in a fapa neihsn in pek. Curuangah Pathian
le minung, minung le minung, minung le ramsa pawl lakah remnak um
dingah laksawng lakin thupi,ropi bik in pek mi thei ringring in
pakhat le pakhat duhdawt le remten kan um a tul. Kan mahhnakih a
neilo mi harsa pawl hnenah Xmas can ah kan neih mi sumsaw thilri  pek
ding zuam cio uhsi. A duhdawtmi “Leitlun Milai pawl hnenah remnak
thleng hramseh”.

Comments

comments

Comments

%d bloggers like this: