Hruaitu Weekly News Issue 159

Hruaitu
  Zarhtin Thuthang
  Issue 159
  25 December, 2007

  Zohfeltui’ Awkam

  Leitlun ah zoha hnatuan lawnglawng tuan zuam ringring um ke, rawl
ei lawnglawng paih teh an um kem?. Bible lawnglawng siar paih ih ca
dang siar paih lo lawlaw teh an um pei maw?. A si, mi zokhalin a
tikcu le can ih zir in hnatuan kan zuam ih, rawl ei le nuam tak in
thunuam rel kan duh caan a um. Cuvek thotho in Pathian thu lawng in –
in ciahneh can khal a um ve.

  Mi tampi in Pathian thu le leitlun thu hlatpi ah ret an tum, Bible
ca thianghlim le ca dang siar polh lo ding in an ral ring. Mihrek
khat in Pathian hnatuan nak thuthangca pawl ah Pathian thu le leitlun
thu duhduh siar thei ding in an ngan kawp. Ca siartu pawl in Leitlun
thu siar an tum lai ah Pathian thu an siar ngah cih.

  Leitlun kan dam sungah Pathian thu le Leitlun thu hi  hmunhnih ah
thenthiam a tul. Pathian thlarau in  kan taksa le thinlung a luah can
a um vekin kan taksa ih a tul mi kan tuan  can khal a um a tul fawn.
Taksa le thlarau cu hmun khat ten a um ko nan an duh dan a bang awk
lo. Pathian thlarau in a khat zet pa a si tiih kan ruah mi pa khal in
a thinheng in a au ciamco thei ih, a duh tawk in mi huat thu rel le
thu tha lo khal a tuah men thei. Cumicu a sungih um mi Pathian
thlarau ih tuah mi a si lo ti fiangten theih sak a tha. A Minung
sinak a suak ih, Thlarau mit in rak zoh tu pawl cun ngaithiam mai le
theihthiam mai ding a si.

  Cuticun a rei hlanah Pathian thu thawn khua a ruat sal tikah ” Aw!
ka va mawh ve, ka va tuah sual ve” tin Pathian hnenah ngaidam a dil
ko ding. Pathian in a ngaidam ko ahcun zoha ngaidam lo in um ke, um
man teh a thahnem cuang ding sawm. Taksa duhdan le thlarau duhdan
theithiam le thleidang thiamtu hrang ahcun Leitlun nun hman dan a
nuam zet ding.

                                          (Bezai)

                                      LAI NUNPHUNG

    By: Vanmember

                                      Ram dang kan thleng ve
                                      Santhar kan man ve
                                      Kan duai lo an ti
                                      Lai nunphung an hloh.

                                      Mipa…
                                      Sam sau deuh in zuah
                                      Sam sen sii an hnih
                                      Hnakhai te an khaih
                                      Zal fual nawn in awrh
                                      Unau hmel an palh
                                      Lai nunphung an hloh.

                                      Nunau…
                                      Bawngbi khuk tiang lo
                                      Kawrte hnawi hup lo
                                      Hni fen an rem lo
                                      Kedam sang an bunh
                                      Kutke tin an tial
                                      Innsang an hlum lo
                                      Nunau an bang lo
                                      Lai nunphung an hloh.

  Nupi Thathuam
                          By- Salai Vahui

  Nupi thathum khi ziangtluk in ngah a har!
  Ruby lungvar man khung hnak in man a nei deuh!
  Apasal in a rinsan zet ih ziangtik khalah apasal cu a zonzai lo
ding.
  A nun sung hmuahhmuah apasal parah thil tha a tuah ringring ih siat
nak tuah dah lo.
  A thil tuahmi hmuahhmuah ih man neihzia a thei.
  Apasal cu khawsung ah mizapi ih thei mi hotu a si.
  Fimkhur zet le awkaa nemte in a tong theu.
  Umlak ti nei lo in a innsang ih pawihai atawlrel ringring.
  A faale pawlin an thangthat ih,
  Apasal khal inalawm zet
  Apasalin,”Nunau tampi cu nupi tha an si cio nain,
  Nang hi a tha hlei ce na si,”ati.
  “Iangneih cu mi a buum thei ih Mawi nak khal aziamthei,”

  Athlum
  Zinglam thlizil ahran tik le,Khawfing a cah tiang ka um ding.
  Ka duh bik mi na mawi zia hi!
  Soi ding um loin na mawi hleice! Zoh khop thei lo ka thai nu ding.
  Na tang cung thierh mi tla in ka lung thinriil hmuah in alak.
  I duhnak in ka lung ngam ter, ka lung hnemtu le ka ham cia,
  I hnamnak cu sabit hnak in a thlum sawn.
  ka duh bik mi, na hmur khuaitizu hnak in a thlum;
  Maw saklam thli nang thang thlang aw;
  Maw thlanglam thli, ka hmuan hranaw;
  A sungah rim hmui khat ter aw;
  lung ka duh leengnu’n a hmuan pan seh

  Free Clinic

  Imbi ih an phuan vek Buddhist Tzu Chi clinic PuDu khal ah tuni 25
Nov ihsin an ong zo. Zarhpi ni 9AM- 12 PM, Nithmni 2PM-5PM tiang asi.
Alak in zoh awknak a si ih mi harsa pawl hrang hrimhrim ah an an tuah
mi a si. A feh duh pawl in a nhuai ih zuk zoh in a umnak a theih thei.

  Buddhist Tzu-Chi Free Clinic
  221-4Wisma LTS,JLN PUdu,55100KL

  Dr Faiz Damiah in thawi

  A veihnih nak Malaysia ihsin AKATA (boruak) ih kaitu ding pa Dr.
Faiz cu Damaih pawl in a rualpa ihthilri an lawn ruangah a rak
khamnak ah a kut ah hriamhma a pu. Deputy Prime Minister Datuk Seri
Najib Tun Razak le a nupi in IMC sizung ah an va veh. Deputy PM in
Dr. Faz ih a keh lam kut cu felfaizet le tlamtlingzet ten a um zo ko
nan a tuar mi hi a na zet ti thu a sim. Cui hlei ah a thi fawr suak
mi hi a tam zet a ti.

  Dr. Faz in AKATA kai ding ih a zuamnak pawl hrang ahcun  zumawknak
a neih thu le himi a hriamhma a ngah ruangah Space fehnak ding thulh
nak khawp a suah lo ding thu a sim. Dr. Zulkharnain in a si dan ah
nazi 4 sung kan operation ih tha ten a damnak ding ahcun thla 3 sung
a tul ding ti ah a sim. Tu ahcun a kutzung pawl cu an cang thei zo.

  Mawi Ropi

              Miss Malaysia Deborh Priya Henry (keh lam zuk) le Miss
South Korea Cho Eun-Ju in Tuluk ram ih Great Wall an va tlawng. Avei
57 nak Letlun mi mawi zuam awknak Sanya, Hainan ah an tel hnu ah himi
Great Wall ah an feh.

  Paris Hilton
  Paris hilton in Chinese thuamhnaw angkim “qipao” a hruh lai a si.
Designer Lu Kun in a mai Studio ah Shanghai khawpi a tuah mi a
si.Hilton in 2007 MTV style Gala puai ah laksawng a lak hnu ni 4 sung
China ah a va leng .- AFP

  Mike Tyson Thawng tlak

  Leitlun heavyweight Boxing champion a rak ngah dah tu Mike Tyson cu
tuizarh tlawng kai ni khat ni ah Nazi 24 sung thawng an thlak. kum 3
sung a um dan zoh le thlingthlak ringring ding a si. Ziangruangah
tile rit theih thil tham in mawtaw a mawng ruangah an kaih nak le
hitivekin court in a parah thu an rel sak a si.

  Mithatpa Ong

  July 5 ih Ying Ying kum 3 mi that tu Ong cu a thuhla zingzawi le
rel sal dingah High Court in a ti. Mr. Ong in a fala nu ih fanu te
Ying Ying kum 3 mi cu nun rawng tak in a that hnu ah a taksa pawl cu
hmun thum ah then in Plastik thawn a hlawn. A thuhla relfel theih a
si hrih lo.

  FALAM PAWLPI LAWMMAN NGAHTU PAWL
                          (2000-2007)

  I. 2000  Za Nei Sum Award

  (a)Calai Lawmman
  Ngahtu…Pu Than Bil Luai
  (`Sibawi Umlo Nakah’ Cabu ngantu)

  (b)Awnmawi Lawmman
  Ngahtu…Salai Sun Ceu
  (Hla phuah le Hla sak thiam)

  II. 2001 (Za Nei Sum Award)

  (a)Calai Lawmman
  Ngahtu…Pu Con Bil
  (Lai Bible Thuthlungthar Ngantu)

  (b)Awnmawi Lawmman
  Ngahtu…Salai T’uan Ling Thang
  (Hla phuah le Hla sak thiam)

  (c) Cathiam Lawmman…
  Ngahtu….Salai Khup Za Thang
  (Lami lakih Ph.D ngahtu)

  III. 2002 Za Nei Sum Award

  (a)Calai Lawmman
  Ngahtu…Pu Thang Hup
  (Tlangval Pawlih T’ong t’heumi’ Cabu ngantu)

  (b)Awnmawi Lawmman
  Ngahtu…Mai Far Men Par
  (Hla sak thiam)

  (c)Cathiam Lawmmam…
  Ngahtu….Mai Ngun Hnem
  (Computer Science Ph.D Ngahtu)

  IV. 2003  Za Nei Sum Award
  (a)Calai Lawmman
  Ngahtu…Pu No Than Kap
  (Quavadis Cabu ngantu)

  (b)Awnmawi Lawmman
  Ngahtu…Pu Lal Eng Lian
  (Hla phuah le hla sak thiam)
  (c) Mi cungcuang Lawmman
  Ngahtu…Zung Cer Mawi
  (Zuknung lem can thiam)

  V.2004FalamPawlpiAward

  (a) Calai Lawmman
  Ngahtu…Pu Van Kyi
  (Englist-Chin Dictionary Ngantu)

  (b)Awnmawi Lawmman
  Ngahtu…Salai Thuah Awng
  (Hla sak le Hla phuah thiam)

  (c) Mi Cungcuang Lawmman
  Ngahtu…Pu Zung Luai
  (Mi tlawmngai le Mi taima)

  VI. 2005 Falam Pawlpi Award

  (a)Calai Lawmman
  Ngahtu…Pu Thang Tin Sum
  (`Keimah Khawte Fa’ Cabu Ngantu)

  (b)Awnmawi Lawmman
  Ngahtu…Salai Bawi Vung
  (T’ingt’ang Tum Thiam)

  (c) Mi Cungcuang Lawmman
  Ngahtu…Salai Lal Ceu Luai
  (Kawlram Pumhuap Bawhlung Sit Thiam)

  VII. 2006 Falam Pawlpi Award

  (a) Calai Lawmman (
  Ngahtu…Pu Lal Tin Hre )
  ‘Nupi T’hat’hum’ Cabu Ngantu)

  (b)Awnmawi Lawmman
  Ngahtu…Salai Tawna
  (Hla phuah le Hla sak Thiam)

  (c) Mi Cungcuang Lawmman
  Ngahtu…Levi Sap Nei Thang
  (Bible Pawl Internet Website Ih Thuntu)

  VIII 2007 Falam Pawlpi Award

  (a)Calai Lawmman
  Ngahtu…Pu Sui Lian Mang
  (Ca Nganthiam)

  (b)Awnmawi Lawmman
  Ngahtu…Solomon Menrihai
  (Hla phuah le Hla sak Thiam)
  (c) Mi Cungcuang Lawmman
  Ngahtu…Daniel Mathan
  (Kawlram Pumhuap Camera Zuk Zuamawknak Ih 2nd Ngahtu)

  V.2004FalamPawlpiAward

  (a) Calai Lawmman
  Ngahtu…Pu Van Kyi
  (Englist-Chin Dictionary Ngantu)

  (b)Awnmawi Lawmman
  Ngahtu…Salai Thuah Awng
  (Hla sak le Hla phuah thiam)

  (c) Mi Cungcuang Lawmman
  Ngahtu…Pu Zung Luai
  (Mi tlawmngai le Mi taima)

  VI. 2005 Falam Pawlpi Award

  (a)Calai Lawmman
  Ngahtu…Pu Thang Tin Sum
  (`Keimah Khawte Fa’ Cabu Ngantu)

  (b)Awnmawi Lawmman
  Ngahtu…Salai Bawi Vung
  (T’ingt’ang Tum Thiam)

  (c) Mi Cungcuang Lawmman
  Ngahtu…Salai Lal Ceu Luai
  (Kawlram Pumhuap Bawhlung Sit Thiam)

  VII. 2006 Falam Pawlpi Award

  (a) Calai Lawmman (
  Ngahtu…Pu Lal Tin Hre )
  ‘Nupi T’hat’hum’ Cabu Ngantu)

  (b)Awnmawi Lawmman
  Ngahtu…Salai Tawna
  (Hla phuah le Hla sak Thiam)

  (c) Mi Cungcuang Lawmman
  Ngahtu…Levi Sap Nei Thang
  (Bible Pawl Internet Website Ih Thuntu)

  VIII 2007 Falam Pawlpi Award

  (a)Calai Lawmman
  Ngahtu…Pu Sui Lian Mang
  (Ca Nganthiam)

  (b)Awnmawi Lawmman
  Ngahtu…Solomon Menrihai
  (Hla phuah le Hla sak Thiam)
  (c) Mi Cungcuang Lawmman
  Ngahtu…Daniel Mathan
  (Kawlram Pumhuap Camera Zuk Zuamawknak Ih 2nd Ngahtu)

  Falam Pawpi Lawmman Thuhla Tawi
  Salai T’uan Ling Thang(Ygn)

  Falam Pawlpi Lawmman (FPAwards) hi kum tin Octoberthla thul ni ih
tuah t’heu mi `Lai Kumthar@Fanger’ ah mipi hmai-ah sunglawi zetin pek
t’heu mi Lawmman(Laksawng) a si.

  Kum tin Fanger a thlen tinten zo ha ngah ding ti ih kan Laimi mipi
ih an theih cak bikmi le mipi lakih titi ti tambiktu Lawmman a
si.Lawmman hi Fanger ni rori lawngah mipi hnenah puansuah a si ih thu
puangtu in a puan veten mipi cu an au an kio ih kut zabeng a ti tam
nasa.Hall pumpi cu zabeng in a khat thluh thei ringring. Kan Laimi
lakah Lawmman sangbik a si kan ti thei ih a sunglawi in a ropi bik
khal kan ti thei.
  Kan Laimi lakah a sunglawi hleice mi Lawmman a si ruangah zozo
khalin keimah pacangt’ha (or)nu tling ka si ve, a ti-aw tu cun ngah
an cak bikmi Lawmman
  a si. Fanger a ra zawhtu pakhat pa tla cun “Leilung tlun ramdang ih
an pek t’heu mi ‘Noble Prize’ teh ziang ce” ti ah a ti hngehnge sap
bai.Hiti vekih mah Laimi lakih mithiam hleice pawl sunlawihnak hna
kan thiam mi hi pengdang pawl khalin in daw-in in uar ngaingai.Nannih
  Falam pi cingcing “Pa bik can nan cang a si hi” in titu an tam.

  Curuangah a sunglawi mi Falam Pawlpi Lawmman (kan mi le sa lak
ihsin mithiam hleice pawl sunlawihnak hna) hi a kum a khua in
sunlawihnak Lawmman pe thei vivo dingin kan mah Falam mi pakhat ciar
in t’uanvo kan nei a si.Mah le titheinak zawn cio ah t’an la in t’uan
tlang cio uh si.

  “Tan rual cu cahnak a si”

  LUNGAWINAKIH KHATLAM AH

  Nitin Thlarau rawl
  1 Korin 13
  Duhdawtnak cu a nun a sia lo, amai’ zawn lawng a ruat lo, a thin a
tawi lo, cule tisualmi parah thin-ciin a nei lo. – 1 Kor 13:5

  Nupa tharte hnenah an faate hrang laksawng an ngah. An nupa in an
lung a awizet, curuangah a nu cun “Ka Lungawi” timi card cu a laak,
ca a ngan ih kuat dingin a ret. Vansiat ah cuih cate cu kuat ngah
suak loin an um. Lungawithu sim ding an hngilh tariai. Laksawng petu
cun a hngak ringring, thlen ti ni a um lo. Innsang pahnih lakkar ah
hmuh sual awknak a um, Ka lungawi ti hman thiam lo ti’n zoh-niamnak a
suak. Cuih “thank you card” kuat lonak in laksawng petu nunnak ah
ziang in siar lo, in upat lo tivek intuarnak a thlenter. Ttongkam
tampi lakah “Ka Lungawi” timi ttongfang pahnih te hi an thupizet.
Lungawithu sim ding a thupituk kan tilai ah a khatlam ah ziang a um
thei timi theih a ttul. Midang thil kan peek tikah an hnen ihsin
zianghman ruahsan saal lo ding, “Ka Lungawi” timi ttongkam thok
ihsin. Duhdawtnak taktak cun zianghman ngah saal ding a ruahsan dah
lo.
  Korin 13:4 ih simmi bangin duhdawtnak cu a thin a sau, mi zaangfah
a thiam, ih amai’ zawn lawng a ruat dah lo. Duhdawtnak cu thil
tipalhmi a ciing ringring lo – midang in “ka lungawi” ti sim an thiam
lomi tiang khal. Lungawinak ih khatlam ahcun Pathian in kan parih a
neihmi duhdawtnak vek a um.

  Telephone Kawh Dan Mawi

                By:Lainunmawi
              Mitampi ram leng kan thlen hnu  lawngah phone hmang
thei le biak thei dinhmun ah kan ding ve. Curuangah mai hman dah lo
mi le neih dah lo mi cu a hmandan le a biakdan kan thiam menmen ih a
mawi zawng ih tong ding le a tul nak ih hman  kan thiam lo.

  Telephone hi hman tangkai thei hrang ahcun a hlawknak a tampi.
Asinan  a hmang thiam lo/nuamnak men ih hmangtu hrang ahcun sun
zatlaknak ngaingai a si. Tul tuk lemlo ah hman a si ih paisa a cem
lak men. A thathnem le hnemlo lam hnakin tongkam mawi hmandan tarlan
kan tum deuh mi a si. Khawlam ih kan nu le pa,unau  kan biak tikah  a
tam deuh cu mi dang inn ah ko in a biaktu kan si ruangah  ralrin a
tul mi tete tarlang sehla.

  Nu le pa ko sak fial tikah:             Hello…Keimah Pa Mang ka
si. Malaysia ihsin. Zangfahten ka nu le pa in ko sak thei pei maw? Ka
nu le pa cu …..an si. Nazi …. ah ka lo biak sal ding. Ka lungawi
tuk. (Tivekin in mawiten zangfah dil/biak ding a si )

  Malaysia ahcun mi tampi hnatuan buai le Boss mithmai zoh ih hnatuan
kan si tikah duhduh in biak puppo mai ding a si lo.

  Hello.. Boss/ka rual, ka u…Pa Mang ka si. Na buai tuk maw? Biak a
ngah ko maw? lole nazi paziat ah ka lo biak sal ding..tivekin biak
awkah ngai a nuam.  Cun na hand phone number hmethmet in na  Hna ah
ngai cih mai lo in a ko ngah maw asilole mi dang thawn an biak awk
lai maw tivek zoh ta ding a si. Midang thawn an biak awk lai a sile
waiting tin a ngan ding. Biakinn le meeting thurelnak hmun ahcun phit
mai aw. Asi, kan Laimi pawl in zir ding tampi kan nei. Ziaza mawi hi
kan nun sung zir rero ding kan si.

  LCWF

  Pathian in LCF thlawsuah tampi in pek mi lakah NuBu hi hrelh theih
lo a si,an thupi ngaingai. 1996- 2004 tiangah Nu le nauhak an um hrih
lo. Tu ahcun kankhawmnak ah Nu pawl le nauhak pawl in kan khawmnak in
ti famkim cuang. LCWF pawl ih cazin an lak thei mi sungah Inn
sungsang ih um mi.. Family     72 , Nauhak mi 129   kan si. Hitivek
in member inn sungsang in a um mi kan tam vivo tikah lungawi um zet.
Cuvek thotho in harsatnak khal tampi kan tawng ve. Ei le in ah siseh
fale hrang tlawng kainak tivek in a phunphun a si. UN lam ihsin
bawmnak kan ngah fawn lo. Cutivek ih harsatnak kan tawn tikah NuBu
pawl in anmah le an ti thei tawkin an fanau hrangah Local mi/kawhhran
le an theih mi pawl hnenah thahnem ngai zet in bawmnak an hawl.
Kannih mipi khalin kan fanau hrangah le mi harsa kan u le nau pawl
hrangah zawnruah thiamnak thinlung kan neih a duh um zet. Tui kan
harsat caan hi Pathian zangfahnak in a rei lo ding. Duhdawt aw zet in
ziangkim kan tuannak ah Pathain hmin
sunlawinak si hramseh.Ahnuai zuk NuBu Acting song tuah lai.

  Hruaitu Hnen Cakuat

  Duhdawtmi Thuthang,
   Pu No Than Kap thawn interview nan tuahnak ka rak zohve ih ka
lungawi ngaingai. Mi ih an theiban lo mi thuthup pawimawh pawl nan
haisuak tinak asi ih kan Chinmi zate hrangah thil tha ngaingai asi. A
mah Pu No Than Kap tla pathian nih damsau caknak a pek dingih kan
miphun hrangah pathian nih atu hnakin a hmangsal ko ding. CNF boruak
nih hin Chin mi pawl thuanthu ( Pungpyin ) tampi in tan. Kan lamzin
in khaihlak tertu bik pakhat ah a cang zo.

  Mirang Tawng zir thei

     Tu ihsi thawkin KL ih kan Laimi pawl hrangah Mirang tawng zirh a
theih zo. Zir dan ding cu a veng then tete le a bur tete ih zirh tum
asi. Zir man hi man awlte ih zirh tum asi. A zir duh cun a hnuai ih a
zirhtu sayapa hnenah a rang lamin nan zingzawi thei ringring asi.
Hmin pe hmai sasa zirh hmai sak an si ding!

  Salai/Saya Kawl Lian
  Hp:016-3021254

  Falam Thuthang

  1)  Baibal Thianghlim

  Falam mi pawl ih kan hngakhlap zetmi Falam Baibal Thianghlim cu
Mar. 2007 ah FBA ah Bu  10,000 (thawnghra) a tleng, nan atu ah a cem
zo! Atu hi Bu 10000 namsal ding in FBA EC in thurelcahnak a nei. An
lei lo ding tluk ah kan ruat nan, tu ni tiangah a lei duh tu cu FBA
zung ah nitin  an ra. Pathian ih Thlasuahmi a si ti a lang riai.

  Malaysia ih um FCC  Pastor

  Malaysia ih um FCC Pastor Rev. Za Thelh Lo a um nawn lo ding
ruangah  Falam mi thenkhat kilkhawitu dingah Rev. Bawi Thian Thein
cu  2008 Feb. in feh ding a si.

  Bawhlungsit

  Laitlang pumpuluk Bawhlung sit zuamawknak thuthang  Hakha Vs
Falam,1-0, Falam Vs Tidem 2- 0, Hakha Vs Thantlang  4- 0,    Kawl
pawl cu kan rem lo ti a si nan, ziangduhnak a um si pei,  Hakha in
Mandalay ih Laimi ( 2 ), Laitong thiam lomi Kawl. ( 5 ) an sang tiah
thuthang kan ngah.

              FBC hohatnak in Falammyo Lehpannak Inn pi ah Fri 23 in
lehpannak a phun2 an tuah ih zarhkhat a rei ding, hmaizarh zarhter ah
zii-zawng-puai an tuah cih ding.

  ZBC, EC Meeting

  ZBC, EC meeting cu Nov. 21-22 (Wed.- Thu.) nihnih sung Falam ah an
tuah ih tluang te in an tthehsuak tiah thuthang kan ngah. An
hmuhtonmi cu: Chin mi pawl in Kawl ttong ttongthiam lawng si lo in Ca
in NGAN thiam rori a ttul, cun sim duhmi hi tawi famkim in sim thei
sehla,…. ti hi a si.

   ZTC, Principle Rev. DR. Do

              ZTC Principle  Dr. Do cu 50th Adniversary of   ATESIA
le ATESIA meeting kai dingah Singapore feh ding in Yn. ah timtuahnak
a nei rero, Sg. ah 26 a thleng ding.

  FBA Nubu VCD

              FBA Nubu in VCD part II an suah ih an zuar rero, a cem
zik te. Kawlram leng ih a ummi Chinmi pawl  khal in rak tanpi cio
dingah kan lo sawm. Ram leng ah an kuat  rero zo.

  Mual in liamsan

              Nov. 16 (Fri) 9:0  pm ah Mrs Maj. Al Tlir (Thawng Par
Nu/ Sayama Cherry Nu) le Pa Hrng Kyi (Lungkawh khua mi, Cinmual um)
in thlanmual in liam san. Tantami Unau le hrinhniang pawl, kan
riahsiat pi, Pathian ih hnemnak co dingah thlacam sak cio uh si.l
   ZTC in IP Star bun

   ZTC  in IP Star an bun rero lai ih reilo te ah an theh ding zum a
um. Yangon lam in a buntu (2) an ra. Kan Laimi hrangah ziangtluk
lungawi za so a si! Hmangthei cio ding zuam uhsi.

  Falam Town Hall ah

  FBA , NubuU hohatnak in Nov. 18 ( sun) 07 ah Town Hall ah Variety
Show an tuah, Tiket pakhat ah Ks. 2000/, 1000/, 500/  in an zuar.
Falam pawl “Puai” kan “Hal” zia a lang nasa. Hi vek caan khal ah zi-
siit (tthumdil) a um tho2. Jerusalem veng (hlan lai Video veng) pawl
in Nauhak Fashon show an suahpi ve ih culaifang te ih mipi pawl cun
Ala…Ala… an thiam tuk, ti rero a si.
  Hnattuantu pawl an bangzet  nan An hmuhmi (hlawkmi) cu $ 200/ a kim
lo! Cucu bangzet le mi mithmai zoh phah te in inn tin ih Tiket zuar
ih kan ttuan mi a si!

  Damiah Kai

  Zathlir ah Lungpi pa damiah vekih a umtu pa cu kan dung zarh ah
palik le ralkap in an kai ih tu cu Hakha ah an feh pi zo an ti.

  Thuthang thantu
  Salai Bawi Bawi
  (FBA/OPD)

  Laitlang ah ruah sur nasa

              Tui’ kum cu kum dang hnakin ruah a tam cuang nasa. Fur
a tlak tuan lawng silo in a ban khal a tlai a si hi. Tu tiang Lai
Tlang, Falam le Lai Rawn, Tahan sehvel ah ruah a sur rero lai ti thu
kan thei. Lai Tlang, Falam lam tla cu ruah sur lo khal sehla thla a
tang zo hrimhrim ih, ruah a sur betbet ruangah a daih dan

  tla cu [Falam khawsung mipawl dan takah] “a keu in mi a keu”, an ti.

  Khampat Khua ah

  Tui’ kum ruah cu Kalay Peng, Khampat Khua lam khalah a cen nasa ih,
tui’ hlan kum 10 sungah danglam zetin ti a lian thei ve. Khampat
Khawmi Pa Har Tin Lian [kum 37] cu tipi kapih antam hmuan a tuahnak
hmun ah zan a riak ih, 2007 October 08 ni, zan ahcun tilian cun amah
le a thlam thawn a fen hlo cih. Cu cun Khampat mino 300 lai cun ni 2
le zan 1 sung an hawl ciamco ih, a ni 2nk, zinglam 09:00 zg hrawng
ahcun a riahnak hmun ihsin peng 2 hrawng hlatnak hmun ah a ruang cu
an va hmu. Cuti’n mipi 500 rual le mawtaw 4 lai thawn zanlam 03:00 zn
hrawngah a ruak cu an vui liam ta, ti thu Khampat Khawupa hnen ihsin
thuthang kan ngah.

  Genting Highland feh ding

  2003 ihsin kum tinten LCF in X-Mas hmuahnak ah le thlarau thazang
ngahnak, thathar laknak  dingah Genting Highland feh ringring a si.
Tui kumkhal Mino pawl ih hoha nak in December ni 1 ni ah feh ding a
si lala. Genting Highland feh cu Laitlang tlung vek rori a si ih.
Laitlang na ngai a si ahcun feh tengteng aw.  “Malaysia thleng ve ih
Genting highland hmu lo cu” ti hokhaw a si. Feh phawt awla na sir awk
lem lo ding.

      Kawhran hmin in feh ding a si ruangah zianghman phan ding a um
lo. Pastor le upa khal an tel ding.

  Hruaitu Kum 4 kimnak Birthday
  Hruaitu kum 4 kimnak birthday cu hmaizarh November 30 ni a si.
Hruaitu birthday hrangah Cahram picang zet telh a si ding. Rak siar
tengteng aw. A lei tambik ih kan theih mi laksawng peknak a um ding.

  Hmaizarh ah aw!

xoxoxoxoxooxoxooxoxooxoxooxoxooxoxoxoxoxoxoxooxoxoxoxoooxoxoxoooooxoox
oxoxoxooxooxoxoxoxooooxoxooxoxooxoxooooooxoo

 

(Visited 56 times, 1 visits today)

Comments

comments

Comments

%d bloggers like this: