Hruaitu weekly News Issue 157

Hruaitu Weekly News
  Issue 157

  4 November,2007

  Zofeltui` awkam

  Lai khawte ih ka suah ruangah mawsi cu ka thei lo, “Laimi” ti
lawnglawng in kan miphun ka rak thei. Asinan peng dang unau pawl
thawn kawlram khawlipi ah tlawng kan kai, ramdang ah hnatuan ding in
ka feh hnu ahcun Falam mi ah ka rak cang. Falam timi cu kan Laimi
pawl ih khawpi hmin  a si, kan miphun cu a si lo. Hmanseh kan khawpi
hmin hmangin “Falam mi na si maw in ti ahcun,  Si ee” ti a tul
thotho. El a theih nawn lo ding a bang.

  Falam hruaitu Mi tampi pawl in Falam mi cu lungrual ding in kan
sawm awknak ah hna kan tuan man theu lo an ti. Tuni tiang in a si
rero lai. Hmanseh a tlai hrih lo ih lungrual ten tuan tluk tu a um
lo. Sawm rero mi si tum lo in sawm phah tuan phah rero tu si kan zuam
ke uh.  Mipi 100% lungrual ding timi cu a cang thei lo ruangah mi tam
sawn lungrual mi cu tuansuah vivo ding a si ko.

  Santhar Falam  mi in kan tuan ding mi a tam tuk. Peng dang unau
pawl cun an miphun hrang hnatuannakah mi pakhat in thlatin US $250
hnak ih mal lo a pek ding ti tiangin an ti aw. An pe ngaingai. Kan
nih teh kan miphun hrangah, Falam mi/ Falam peng hnatuan nak ah ziang
mi ah kan tel ih kan thawh ve dah? Tuni ah Falam mi in mi kan hleih
thei le kan thanso nak dingah rel men can a si nawn lo. A tuan ih
tuan can a si zo. Pumpe aw ih hnatuan tu kan tul tuk.

  Daw Aung San Suu Kyi le Gambari

  Gambari a veihnihnak kawl ram a lut sal hnu ah Newyork  pan in a
feh. Singapure a thlen tikah kawlram a tlawnnak thuhla a sim. Aung
San Suu Kyi cu Ralkap a cozah pawl thawn kan rampi thatnak dingah
tuan tlang dingah a lung kim timi a sim. Himi hi kan dung september
thla ih rampi buainak a suah hnu  ih thuhla a ra suak vivo mi a si.
Suu Kyi cun hitivekin a taktak ih  hnatuan tlang theinak cu a rang
lam in SPDC (ralkap cozah) pawl in an ruat lohli dingah a zum thu
khal a sim.

  Kan dung september ih Labour Minister Aungkyi thawn an tawn awk
hlan ah a mai party (NLD) hotu Aung Shwee, Lwin, Nyunt Wai le Nyanwin
thawn khal in an tawng aw. Hitivekin ralkap pawl ih fial mi Aung Kyi
thawn tawng aw in le NLD party thawn tuan tlang ding in an tum nak
san cu Asean pawl khal in kawlram bawmnak an phit vivo ruangah a
si…Agencies

  Malaysia PM nupi hmuhdan

              Malaysia PM Abullah Badawi cu an party Umno assembly ah
a liam zo mi ih an kaihhruai awknak le hmailam party hrang Putra
World Trade Centre ah thusimnak a nei. Cumi cu an nu  Jeanne in a
pasal ih thusim mi azoh tik ah a lung ahmui zet. “Malaysia in
zalennak a rak ngah lai ah kum 4 fanga ka si ih ka theih mi cu tlawng
kan kai, lungrualnak, Umno,Barisan nasianal tivek lawng ka thei’ tuni
khal ah Malaysia mi ka si a ti aw tu pawl cun kan thei awk ko ding ti
ah a sim ve. Jeanne hi assembly a kainak ah a lungkim zet ih thil
fate tuktak men ah kabuai lo. Ka fehnak ding ka thei ih a tha bik in
hoha ding le hruai ding ka tum a ti. Kan dung naite ah thisen hlu tu
ah tla a tel ve. Jeanne kum 54 mi hi PM ih nupi a thih hnu ah a mah
bawmtu hrangah a th bik ding ti ah a neih mi a si.

  Benazir InnThawng Tla

              Pakistan palik pawl in Benazir Bhutto cu a mai ah
innthawng an thlak. Danthiam pawl (Lawyer ) le mipi sandahpiah pawl
cu an kai ih an hrem.  Pakistan ram ah mipi uknak Democracy si lo in
mi pakhat uknak a si. November 15 ah hril awknak tuang ding timi cu
Jan 16 ah an thawn sal. Benazir in a tikcu can tuah cia mi ah hril
awknak tuah a duh thu a sim. Benazir ih party Pakistan People ih a
cangvaitu minung 5,000 an kai zo tin an sim. Benazir ih inn kiangkap
ah mipi tampi an pung khaw. Benazir a inn ah thawng an thlanak san cu
rei lo te sung lawng a si dingih, a rei lo te nazi ah kan thlahsal ko
ding tiah asim. Hivekin kan khum nak san khal cu thihcilh bomb a puak
dingih a nunnak himnak ( security ) hrangah a si tin Deputy
Information Minister Azeem in a sim. Hitivek buainak lakah Banazir cu
kan rampi hi Iraq vek a cang ding ka duh lo ih i pakhat uknak si lo
in mipi uknak a si ding ka duh. Kan mipi hrangah thih khal ka tih lo
a ti.

  Umno Wanitachief Rafida

            Datuk Seri Rafida Aziz hi Umno nunau hotu le Malaysia ih
pursum leilawnnak ih vuanzi a si.A fehnak ih a hmuh tambik mipi pawl
cun an nunnak ah nun nuam deuh le hnget khoh le thanso an duh bik ti
a sim. Thu malte a simnak ah kan rampi a nei tu cu Malaysian mi
kansi. Kan zapin Malaysian kan si. Kan ram a thangso  asile kan zapin
kan thangso ih kan ram atlasia a sile kan zaten kan tlasia. Curuangah
keimaihlawknak leka chance hnakin Malay, Tulukle India mi farah pawl
bawm a thupi. Himi hi kan Malay pawl ih a thupi tuk mi Agenda a si a
ti. A kum 64 kimnak birthday ah PM , Deputy PM ,Jeanne le Umno mi
tampi an rak ra. Rafidah in a hnatuan nak dinhmun ah tuan peh vivo
thei dingin a ra suak tu pawl hnen ah support a duh thu hni siamsi
ten a sim.

  Yangon ah Fanger Puai

  :Pa Tuan

  Falam Pawlpi,Yangon hoha nakih tuahmi a vei (15) nak Lai kumthar
(Fanger) cu Pathian lam hruai nakin tluangten kan tuah thei.
  Kan simcia bangin kan ram a buai tuk ruangah tuah theilo zik tete
in kan um lawk.Midang Myone pawl tla cu zohman tutiang an tuah thei
lo.Kan nih Falam Pawlpi,Yangon hi cu kan pu le kan pa pawlih taimak
suahnak ruangah Acozah ah Regitered (No.1667)nei kan si ruangah kan
tuah thei nak pakhat a si.

  Cun Lai kumthar le Fanger thuhla hi mi tampi inruahnak le ngaihdan
group mail ah nan run ngan cio-ih theihnak a ti kau nasa.Kan nih
Yangon ih um Falam Pawlpi hi kan tuah pekte ah cun rawlei khawmnak in
kan tuah t’heu.Asinan 1988 kum ihsi thawkin Lai Sang le A-dai ei- in
nak,Lai Laam lam nak le Lai hla Stage show thawn puai kan hmang.Kan
tuah tikah a hmin hi meeting ah kan buai nasa lawk.Kan nih Falam cu
hrinhnam tete (11) thawn a dingmi kan si ih kan mai sungah
Fanger,Tho,Kut. ..etc ti vekin kan kawh dan a bnagawlocelcel.Cutikah
ziang khal le kan zate lungrual nakin”Lai Kumthar@Fanger” ti-in ti
sehla kan zaten kan lungrual bik ding kan ti ih “Lai Kumthar@Fanger”
ti-ih hmang dingin Kawmit’i in kan rel cat.Cumi ni ihsin tutiang kan
hmang lan vivo nak a si.
              Tui kum kan puai cu kum dang bangin Lai sang tuahnak
can kan nei lo ih “Plata le A-dai” thawn kan hmang. Laam khal kan zir
man lo tikah kan laam thei lo. Asinan Lai hla Stage show thawn rura
takin kan hmang.Laimi lakah Lai hla rori thawn puai tuahmi ah a ropi
bik a si ding ti in mipi in an sim celcel.

  LAKSAWNG PEKNAK

  I.Kan Pawlpi sung ihsin phunhra awng ‘D’ ngah pawl mi(7) lawmman
peknak kan nei.Tui kum cu 5D ngahtu mi(2)kan nei-ih kan t’hangso zet
ti’n kan lung a awizet.

  5D ngahtu pawl cu:-

  1.Henry Za lal Lian..Pu hrang Tin Thuan le Pi Sui Kip(thi) tei’
fapa
  2.Aye Mya Thu……..Saw Kyaw Thu le Pi Za T’ial tei’ fanu

  II.Pawlpi Lawmman(Falam Pawlpi Award)ngahtu

  Lawmman pek nak kan nei.Calai,Awnmawi le MicungcuangLawmman hi
pakhat ah Ks.50,000/- ciar kan pe. A ngahtu pawl tla cu:-

  1.Calai Lawmman Ngahtu..Pu Sui Lian Mang (Ca ngan thiam)

  2.Awnmawi Lawmman      Ngahtu…Solomon Menrihai (Hla phuah le hla
sak thiam)

  3.Micungcuang Lawmman Ngahtu…Daniel Mathan
  (Kawlram pumpi Camera lam Zuk zuamawknak ah 2nd ngahtu)

  4.Lai Radio tuantu Lawmman peknak… (Mai No Hrin Thluai le Pansy
T’a Mawi)

  5.Buannel thuthang ca Editor Sunlawih Capi peknak Ngahtu..Salai Lal
Din Thar

  III.Kum 75 kimzo upa pi le pu pawl minung 35 lawmmanpeknak kan
nei.T’aval pakhat ciar kan pe.

  V.Pawlpi E.C thar hrilnak le nemhnget thlacamnak kan
  nei.Thlacamtu: Rev.Run Cung Mang

  FLAM PAWLPI,YANGON
  (2007-2009) T’UANREL KAWMITI PAWL
  ———— ——— ——— –

  T’UANREL UPA
  ————
  1.Hotu  :            :Pu Nawl T’ho
  2.Hotu sangtu:  :Pu Pa Sang
  3.Sungt’uan:      :Pu Lal Hlun Eng
  4.Sungtuam bawm:  :Pu Hrang Tin Thuan
  5.Sumkiltu: :Pu Lian Cung Nung
  6.Sumkil sangtu:  :Pu Mang Kulh

  TLANGSUAK UPA
  ———— –
  1.Pu Khuang Lian
  2.Pu Lal Lian Sung
  3.Pu Hrang Tin Lal
  4.Pu Hmet Lian Thang
  5.Pu Sum Dun
  6.Pu Du Lawng
  7.Pu Mang Sum
  8.Pu Thang T’hio
  9.Pu Van Muang
  10.Pu Pak Lian
  11.Pu Ral Lian Sang
  12.Pu Seng Thang
  13.Pu Khawng Thang
  14.Pu Fung Lian Thang
  15.Pu San Zam
  16.Pu Ram Za Awi

  UNHCR in November 12-13 IOM thisen cek ding pawl

  UN ih contact thei lo mi an si ih a thei pawl in zamrang ten thu
rak than dingah kan lo sawm. ACR le CRC ah thuhla felfai suh ding a si

  1.Van cung Thang
  2.Biak Hlei Sung
  3.Mang Ceu
  4.Kap Hnin Thang
  5.Hrang Cung
  6.Bawi Hmun Thang
  7.Biak Hlei Hnem
  8.Biak Cing Sang
  9.Sui Luai Thang
  10.No Lian Hrang
  11.Thang Lian Ceu
  12.Saw Pum
  13.David Thang Lung
  (Bezai)

                  Duh Hril Ding Mi

    By: Vanmember
                          Na hmai kaa ah
            Hril ding pahnih
            Ret in a um…
            Pakhat hril aw:
            Thlawsuahnak le
            siatcamnak

            Pathian nung cu
            Thinlung zate`n
            Nunnak Za te`n
            Thazaang zate`n
            Duhdaw awla :
            Thlawsuah bawngmal
            Na dong ding.

            Pathian nung thu
            Thlun duh lo in
            Tihzah lo in
            Ziang siar lo in,
            Na um ahcun
            Siatcamnak
            na tong ding

  Falam Thuthang

                Salai PP
  1. Leitlum kumtar Ni: (01.X.07, Falam)
  A. October 1, 2007 ni zing lam nazi 8:00-9:00 tiang Falam peng sung
khuate hrangah Falam peng Thuthan zung(Pyian-Kyia- Yi) upa pawl ih
hohatnak in Mah-Yah-Kah zung ah cabu hlu pumkhawmnak an nei. Cu theh
ve te’n Falam pengbial (Distric) Hardam zung upa hohatnak in Ei-in
Thazaang neihnak (Aa-Haa-Rah) lam simnak an nei.

  B. Cun, Nazi 9:15-10:30 tiang kumtar sunlawihnak (Kum 80 tlun) an
nei ih Falam khua sung kum 80 mi 50 cekci an um sung ihsin mi 34
(Mipa 11, nunau 23) an ra thei. Thilri tete mi pakhat hrangah 6000/-
(Thawngruk) man hrawng ciar laksawng an pe. Pu Sum Mang in lungawi
thu a sim. Pumkhawm tiak ah siibawi pawlin sii a lak in an pe ih an
tuamhlawm hai.
  2. Leitlun Tlawng Saya Ni: (5.X.07, Falam)

              Falam Fimthiam Zung ih hohatnak in No. 1, Suakthuan
Tlawng (BEHS), Siah Luai hall ah zing nazi 10:00-12:00 tiang World
Teachers’ Day sunglawi zetin an tuah. Falam pengbial Fimthiam Zung
upa TEO, U Tial Tawn, Pengbial Uknak Zung Sungtuan, No.1 BEHS sayakyi
U Naih Aung pawl in upat sunlawihnak thucah an sim. Tlawng Saya hlun
pawl mi 21 pawl laksawng an pek hnu ah Pu Van Kyi in lungawi
thusimnak a nei saal. Pumkhawm theh hnu ah tlawngta pawlin laam a
phunphun hmuhnak an nei ih lakphak le sang thaw zet an ei khawm.
  3. Falam Khuanu Khuapa Kumcem Meeting le Hruaitu Thar:
  Falam khuanu khuapa kumcem meeting cu Oct 16, 07 ni zinglam nazi
10:00-2:00 pm tiang Kyiat-Khaing- Yi zung tlunta ah an nei ih hril-
awknak khal an tuah. Hruaitu thar pawl cu a hnuai lam vekin an si.

  2007-2008 FALAM KHUANU KHUAPA UPA PAWL

  I. Hruaitu Upa pawl(Patrons)
  1. Pu Van Kyi  5. Pu Za Thluai
  2. Pu Tial Luai 6. Pu Thla Tin Thang3. Pu Pek Thang 7. Pi Ohn Tin
4. Pu Lal Tai Thanga

  II. Hotu
  1. Hotu lu Pu Sailiancheua
  2. Hotu sang Pu Khuang Hnin
  3. Hotu sang Pu Suan Za Thang
  III. Sungtuan
  1. Sungtuan pi Pu Lai Ir
  2. Sungtuan bawm Pa Salai Vum Za Piang
  3. Sungtuan bawm Pu No Lian Sang

  6. Falam Thil man: (25.X.07, Falam)

  1. Fang dip 1 (a tha deuh) 20,000/- (A sia deuh pawl cu 18000/- le
17000/-)
  2. Siti cuai 1 4000/- (A sia deuh cuai 1….3,750)
  3. Arti pum 1 110/-
  4. Vok sa cuai 1 3400/-
  5. Sia sa cuai 1 3500/-
  6. Ar pum 1 (Cuai 1) 6500/
  7. Cini cuai 1 1000/-
  8. Cawhnawi dur 1 800/-
  9. Lakphak hai 1 200/-
  10. Sang pakhat 80/-
  11. Khuaitizuu lang 1 3000/-
  12. Lingmaw pum 1 100/- (A tum deuh pum 3… 500/- A luun thok thlang)
  13. Thawpat pum 1 100/- (A tum deuh pum 3… 500/- A luun thok thlang)
  14. Banhla thlar 1 200/-
  15. Hangbo pum 6 100/- (A luun nasa)
  16. Khasuan sen cuai 1 800/-
  17. Khasuan raang cuai 1 1800/
  18. Makphek pawng 1 (Hring) 200/- (A caar pg 1 ….. 300/-)
  19. Thiing cuai 1 500/-
  20. Aihre pg 1 200/-
  21. Laifaang pg 1 200/-
  22. Vainim deen cia pg 1 120/-
  23. Bete pg 1 120/-
  24. Sihmui pg1 200/-
  25. Maimu pg 1 150/-
  26. Behrum pg 1 250/-
  27. Pokpawr cuai 1 800/-
  28. Antam tom 3 100/-
  29. Anthur tom 4 100/-
  30. Purawng tom 1 50/-
  31. Petii tom 1 50/-
  32. Hlammai pm 1 400/-
  33. Ngapih tikal 10 150/-
  34. Dizil Kalan 1 5500/-
  35. Datsi kalan 1 5800/-
  36. Khaini bung 1 250/-
  37. Sahawk pum 3 200/-
  38. Tanphaya pum 10 100/-
  39. Zuureu Lg 1 400/-
  40. Myanmar RUM Lg1 1400/-41. Mandalay RUM Lg 1 2000/
  42. Myanmar beer Lg 1 1800/-
  43. OK Zuu Lg hrek 400/-

  Mopuai sawmnak:                    : Salai Do Lian (Doa ) le Mai Li
Hleih (Hleihte) tei thit umnak puai ah LCF unau kan zapiten sawm kan
si. Lungawi mi pawl lungawi pi cio uhsi.
  Ahmun :       : Sekan pawlkom inn (Loke Yeow)
  A caan :       : 4:00PM

  LCF Quater riak pawl:    :Malaysia ah Riahnak nei lo,hnatuan nei
lo,UN feh duh pawl le harsatnak dangdang a nei pawl hrangah LCF
Quarter ah riah a theih ringring.Asinan 12:00 PM hnu lam ah lut lo
hram dingah LCF Committe in dan a tuah.

  LCF Pastor khual tlawng ding :    :Rev. S Ni Luai cu LCF, Penang
ah  hmaizarhpi ni a hmang ding. Thlakhat vei khat a feh ringring.

  Mission Hnatuan Nak

  LCF cu 2003 ihsin kawlram ah Mission hnatuan nak kumtin ten neih
ringring asi. Himi hnatuan nak ah tuanvo lak tu Fellowship upa lak
ihsin hril a si. Tui kum 2007 ih tuanvo in lak sak tu hi Pa Mang Tin
Sawn a si. Hitivek in kan Missionary hnatuan tu thlazuk kan hnen
thleng thei dingin in tawlrel sak thei mi parah kan lungawi. Mission
kan thlah thok ihsin tu hi LCF in kan thlah mi pawl ih zuk kan hmuh
hmaisa bik a si. Mission hrangah sumpai pek ding mi kan kuat theh
hrih lo. Kan kuat ding mi kan theh thei nak ding khal ah mipi kan
zapten tang tlang uhsi.

  2007 ih kan Mission thlahnak hi  MCC ah a si ih, a tawlrel tu bik
cu Baptist (ZBC) an si. Himi missionary pahnih ih an hnatuannak hmun
cu Pakuku ah a si.Kumtin kan thlahnak kawhran a dangdang.

  Kawhhran / Fellowship pakhat a cak le cak lo tahnak ah Mission
hnatuannak khal a si ve. Mission hnatuannak ngaihven mi Fellowship si
khal hi zuam vivo a tha. LCF ihsin Mission hnatuannak ah a tuan tam
tu bik si dingah ruahnak, thazang neihsiah suah in Bawipa`i ram
hrangah tuan hram uhsi. Pathian hmin sunlawih in LCF in thlawsuah co
hramseh.

  (Nitin thlarau rawl)

  Khrih zoh aw
  Mipum.21:1-9
              Moses in nelrawn ah fung parih daar rul a thlai bangtuk
in Mi Fapa khal thlai a si ve ding; cuticun Amah a zumtu hmuahhmuah
cu kumkhua nunnak an ngah ding. – John 3:14-15
  KUMKHAT SUNG BAIBAL:
  ? Jeremiah 46-47
  ? Hebru 6
              1918 March ah, Albert Gitchell, Kansas, Fort Riley ih
rawlsuangtu cu tlangrai lunaa in a naa. Kum khat sungah leitlun
pumpuluk ah a karhzai, minung million 40 an thi. Hih natnak cu
leitlun huap ttihnungza natnak a si. Siibawi pakhat in a thanmi ah,
minaa pawl cu flu vek le pneumonia rohzet vekin a langih nazi kar
sungah thawpit in an thi a ti. Van`hatnak ah atu ahcun influenza cu a
suahpek tlukin a langtuk nawn lo. Asinan siibawi pawl cu thluakbuai
le a tuamhlawm daan ding thei dingah bawmtu nei loin an taang hrih
ko.
              Israel mi pawl tla nat siava tuar in an rak um dah,
asinan ziangruangah ti an thei ih Moses hnenah damter dingin an dil.
Annih pawl in Pathian ih pekmi manna sang tlunah lungawi loin an
phunzai. Cutikah Pathian in a thinheng in tur neimi rul pawl leilung
ah a thlah. Cule Moses hnenah daar rul tuah ding a fial. Zokhal cuih
daar rul a zohtu hmuahhmuah cu damnak an hmu ding a ti (Mipum. 21:1-
9). Kum zabu a rei hnu ah Jesuh in thinglamtah ih a thihnak
langternak a si a ti. “Mi Fapa khal thlai a si dingih Amah a zumtu cu
thi loin kumkhua nunnak an ngah ding a ti (John 3:14-15). Na thlarau
rundamtu ah Jesuh na ring zo maw?
  Kan Bawipa Amah rori in thihnak a laak zo,
  Camsiatnak thinglamtah parah;
  Zumnak in Amah a zohtu pawl cu,
  Kumkhua nunnak an ngah ding.
  ———— ——— ——— ——— ——— ——— –
  Tuni ah Khrih zoh aw, culole kumkhua na hlo ding.

  Laimi Le Thansonak

  No Bual Hrang (Rev)

  Laimi le Sakhaw lungput

  Laimi cin le dan tha nei kan si ti hi thuanthu pek mi ro sunglawi a
si. Insang nun, khawtlang nun, sakhuanak khal ah dan felfai nei mi
kan si. Kan pupa san ah lei doral an um kan ti ko nan, dan felfai
sung ih do aw an si. Carson Siangbawihte Lairam an thlen khal hi kan
cin le dan tha neih ruangah a si kan tih khal len a sual lo ding.
Carson te’i nupa hi kawlram an ra thlen pek ah Arawadi tiva hnuailam
kap le Zakhine ram Asho Chin hnenah Thuthangtha simnak an rak nei
hmaisa.

  Asho Chin pawl hi cin le dan tha nei, sakhaw mi an si ruangah
Thuthangtha awl ten an rak zum. Cuticun, 1890 hlan ah hin Asho Chin
lakah zumtu mi 230 leng lo an rak um zo ih, nikhat hman ah mitampi in
baptisma an co. Hivek milai hi Chin Hill-ah tampi an um ti thei in an
hung kai nak a si. Cuticun, 1899 kum ah Hakha an thleng. An nih hi
America Baptist Mission Society ih thlah mi an si ih, Missionary pawl
ram then dan ah Laimi hi Baptist mission ram, Mizoram sak lam hi
Presbyterian ram an rak si. An rawngbawlnak in 1904 ah Lairam kohhran
hmaisabik cu khawsak khua ah a ra ding. Kristian si nak in kan mit a
van ter, in thanso ter, in pumkhat ter. Cin le dan tha nei mi hnenah
Pathian thu tha a thlen tik ah a rem aw cuang. 1938 hlan ahcun Kalay
valley ah Mizoram ihsin hung vai pawl in Methodist 1925 ah an din ti
lo cu Laimi lakah kohhran dang a rak um lo. 1930 hrawng in Mizoram
ihsin Thuthangtha phuang tu pawl Tiau kam khua pawl le Hualngo, Sim
le Zahau ram pawl ah an thleng.
An rawngbawlnak ihsin khawvel mi tampi in sakhaw hlun tlansan in
Pathian an zum. Asinan, an nih pawl hi Presbyterian an si ruang ah
kan ram zumtu lakah feh dan zum dan a bang aw thei nawn lo. Tiau
tlang pawl rawngbawl nak le America Missionary pawl hmuhdan a bangaw
thei  lo.
   Cuticun, 1938 kum ah ICM, 1955 ah EFCM, 1956 ah PCM tin Lairam ah
kohhran a rung ding vivo. Cui tlun ah Chin Hill Baptist Association
khal Association pakhat ah um nawn lo in 1954 kum ah Association
pathum, Falam, Hakha, Tedim tin a then aw.
              Cui hnu 1970 hrawng ihsin Lairam ah pianthar nak
(revival) a thleng ih mi tampi pianthar kan hmu. Asinan, Kohhran
hruaitu hrekkhat in an pawm rem thei lo. Pianthar hrek khat khalin
kohhran hlun sung um harsa tihnak a karh vivo. Kohhran sung zum dan,
pawm dan bang awk lo nak in

  1975 hrawng ihsin  Lairam sung ah kohhran thar a rung ding vivo ih,
a tu ah Kawlram sung Yangon hman ah kohhran 194 kan um. Asinan, kan
then awk nak san thlir sal tikah pianthar nak ruangih then aw kan
bang nawn lo. Mipi hmuhdan ah mi kuthnuai um thei lo nak, hotu si duh
nak, cawm awk nak a bang thlang. Run khat ih um kan thaw thei nawn lo
ih, a pumpak zawng, a tuan tlang zawng ih rawngbawl nak hin Laimi a
suahsan cuahco thlang. Kohhran pakhat ih tamtuk um khawm harsa kan ti
ih, kan then aw. Zawng thinlung kan pu tuk deuh a bang. Kohhran hruai
awk nak tha ngainat nak a mal vivo ih, democracy tak ih hruai-awk kan
tlin tuk lo. Kiangkap veng hnen ngaihsak nak a mal vivo ih, tuan man
ngah lo ih mi bawm harsa kan ti thlang. Asinan, social Theology ngan
tu Reinhold Neibour cun, ” Pathian ram kan ti mi hi khawtlang, pumpak
le Pathian a kom-awk lawng ah a kim mi a si” a ti. Kan ni laimi pawl
hin Kristian nak hi mah bulpak le Pathian a peh-awk cun a tawk ti nak
in kan thinlung a
luahkhat tuk deuh hmang. Cun mipi nun ah, kan kristian hin kan
khawtlang nun, sumdawn nak, zung kai nak le kan nitin ei-in hlawk nak
ah hmun a co tuk nawn lo. Zamrang te ih len tum nak, mi zawn ruat lo
ih mahlawng hlawk tum nak hin kan thinlung a luahkhat tuk thlang.
              Curuangah tulai sumdawng lakah titi nuam lo theih ding
a um vivo ih, sumpai thawi mi hrang tuantu pawl lakah ngai nuam lo
thawmvang theih ding a um thlang. Mai hlawk nak a si ahcun midang
siat khal kan pawi ti tuk nawn lo ih, lennak hi pa-par sarih sar kan
tum thluh a bang. Veikhat cu Kalemyo Indaing Lay thawng-inn ah
sungkhat ka va veh. Ka unau hneah cun, “Hi Thawngin-ah Laimi ziang
zat nan um, cui sung ah nunau-mipa ziang zat tluk nan um pei? Ziang
bik nan tlak nak tam bik a si?” tin ka sut. I sim mi cu nunau mipa
200/300 hrawng kan um ih, Laimi a tam sawn kan si. Kan tlak dan tam
bik cu No.4 le meithal a si bik a ti. Laimi rukru thawngtla kan rak
um dah lo tuk hi lungawi za pakhat cu as i. Hi kan nau ih sim mi
ihsin laimi kan lungput a lang ter,len nak a si phawt cun ziang tuah
khal kan remti thei mai a bang. Sum hmuh nak rei daih pawl kan uar lo
ih, thinsau-ih hngah tul pawl hi mibang lo pawl tuah ding ah kan ruat
deuh hmang. Curuangah kan miphun thanso
ding cun kan sakhaw nun, khawtlang nun le ei-in hawl nak tiang in
kan thinlung put rem tul mi a um a si ahcun rem ngam kan cu.

  …………………………………………………………..
…………………………..

  Pitling Nun Thuthup

                               By:
Cikuairem

              Billy Sunday in, “Tuni Khristian sinak ih buainakbik cu
a hminmen khristian (average christrian) tamtuknak hi a si,” a ti.
Rick Warren cun, zumtu cu Khristian Maksak (Great Christian), thlarau
nun ah tthanglian pitling dingih athian innsang mi kan si. Thlarau
nun ih tthanglian pitling vingvo ding kan si. Thlarau nun tthanlennak
cu Oswald J. Smith in naute sinak thawn a tahtthim. Naute cu nikhat
hruangzingmi kan si,” a ti. Jesuh Khrih cu i Runtu le ka Bawipa iih
kan zum le kan cohlan veten Pnu nikhat a tthan bangin zumtu thlaraumi
pawl tla nikhat hnu nikhat tthanglian vingvo ding kan si ve.

  1.       Thlarau Rawl (Bible)

              Naute cu nung le thang dingah lo theih loin a nu ih
hnawiti nitin a in tengteng a ttul. Hnawiti in thei lo naute cu
nungdam le tthanglian loin a reihlan ah a thi tengteng ding. A hung
upat vingvo tikah rawl neem in cawm a ttul. Cuihsin rawl hak tla a ei
thei vingvo. Cuti’n damcak in pitling nun a nei ding. Cuvek in zumtu
tla thlarau nun ah tthanglian pitling dingin nitin thlarau rawl ei
ringring a ttul ve. Peter in, “Naute suakpek bangtuk si uh; thlarau
hnawiti duh uhla cuih hnawiti nan innak thawngin nan tthang dingih
rundam nan si ding,” in ti (1 Peter 2:2). Zumtu hrangih thlarau
hnawiti cu Pathian Ttongkam: Bible hi a si.

  Kan taksa nunnak hrangah nitin rawl ei loih kan um thei lo vekin ka
thlarau nunnak hrang khal ah Nitin Thlarau Rawl kan ttul.
Thuthangtha  simmi theih le ngai a ttul, Bible Ca siar ringring a
ttul, Thinlung le thluak sungah hminsin ringring a ttul. Bible le
Simfiangnak cabu pawl zirzoi a ttul. Nunram ih laaklut le nuncih thei
dingin sun-zaan in ruahthuk a ttul. Culawngah zumtu nitin Khristian
nun ah kan tthanglian thei ding. Profet Jeremiah in, “Ka hnenah na
`ttong ih na ttong kamkhat khal ka thei ttheh a si. Maw Cungnungbik
Bawipa Pathian, na hmin ih kawh mi ka si; na minung ka si ih
nattongkam in ka thinlung cu lungawinak le thinnomnak in a khatter” a
ti (Jer.15:16).

  2Pathian thaw Pawlkom (Prayer)

              Bible in “thlacam ringring uh,” in ti (1 Thes.5:17).
Jesuh in a dungthluntu pawl thlacam ringring dingin thu a cah (Luke
18:1ff). Thlacam hi Bible thiam pawl in thawthawt thawn an tahtthim.
Thawthaw loin kan um thei lo, thawthawt ding khop lo cun thinphaan a
um. Cuvekin zumtu khal thlacam nun nei lo cun thlarau nun ah cau le
thazaang mal in a um ding. Sualforhnak a doneh  thei lo dingih
thlarau nun dungtolh le tlusia in a um ding. Cuhrangah thlacam nun
neih cu a thupi ngaingai. David Yongi Cho cun, “thlacam tam huham
tam, thlacam mal huham mal, thlacam lo huham lo,” a ti.

  3. Thlaraulam Cangvaihnak (Exercise)

              Zumtu mi piangthar taktak cun a umnak hmuntin ah
kawhhran sungtel pitling a si ringring ding. Zumtu dang pawl
thawnpawlkomnak, biakkhawmnak, peeknak le hnattuancangvaihnak
pakhatkhat ah a tel ringring ding. Cumi cu a lungawinak le a thlarau
nun tthanlennak pitlinnak thuthup a si (Heb.10:25). Curtis Hutson
in, ‘kawhhran pakhatkhat ih rin-um sungtel sinak nei lo le mi
tirhfaak pawl Pathian mihman an si ka hmu dah lo’ a ti. Hiti’n
sawmnak a nei: Nikhat ih a hmaisabik nazi, zarhkhat ih a ni hmasabik
le na ngahmi thluasuah ih hmaisabik rah, (first fruit) cu Pathian
hrangah peek tengteng aw,” ti’n.

  4.Umtlannak Hmun (Atmosphere)

  Naute cu damcak ih a tthanlen theinak dingah a ihnak le a umtlannak
hmun a tthat a ttul. Naute cu a ciar, a saa, a daituk, a baalnak ah
umter awla hmakhatte ah a damlo mai ding. Saatuk lo le daituk loin
fingkhawi a ttul. A tleunak, thli `ha ngahnak hmun ih ret a ttul.
Culawngah tthate’n a dam dingih a tthanglian vingvo ding.

  Cuvekin zumtu tla kan telnak kawhhran, kan pawlkommi rualpi a thupi
ngaingai. Bible in, “Mi ttha lo pawl ih ruahnak a saang loih, Misual
lamzin a thlun lotu le Pathian a hmuhsuamtu pawl lakih a tel lotu cu
mi thluasuak a si,” a ti (Saam 1:1). Thlarau nun tthansonak
dawnkhamtu le sualforhnak sungih mi piltertu rualpi cu kom lo ding a
si.

  Zuu in hmang thawn na pawlkom asile zuu in an lo sawm ding. Mih
thusia relpaih pawl na kom asile mi soisel na cak ve ding. Kawhhran
pakhat ah tel cingin Pawl dangdang ih khawm duado le Pawlkom tinkim
ih palhhrolh awk hmangtu palap vaivuan si loin dinhmun fekfel le
zumnak hngetkhoh nei in mai’ kawhhran ah rin-umnak nei ding.
  Zumtu unau: na nunnak tthate’n cekfel aw. Na zumnak tthate’n
hliakhlai hnik. Na sulhnu tthate’n vun cuan saal hnik. Jesuh Khrih ah
nuntharnak taktak na nei zo maw? Kumkhua nunnak neitu na sinak ah na
thla a ngam aktak maw? Thlarau nun damcak le huham nei dingin thlarau
rawl Bible siar ringringtu na si maw? Zing-sun-zaan Pathian hnen
catbaang loin thlacamnak neitu na si maw? Nangmah le titheitawk tein
thuthangtha karhzainak, kawhhran tthansonak ah hnattuantu na si maw?
Leitlun taksa hiarnak taansan theitu, zumtu rualpi thawn lawng kom aw
in rin-umnak thawn Khrih ih tetti ttha na si maw?

  Pathian cun, A Thu sungih umtu, Thlacam nun neitu, Khrih hrang
cangvai ringringtu, le Rin-umnak neitu si ding in duhsak. Mipi hmaika
le Pathian hmaika ah mit-hmai ttha ngah ih a thanglianmi
duhnung “Pitling Nun” neitu si zuam cio uhsi!

Hmaizarh ah Dr. No Than Kap interview tuah mi a suak ding. Rak siar
ciau uh.

Comments

comments

Comments

%d bloggers like this: