Hruaitu Weekly News 169

Hruaitu
  weekly News
  Issue 169
  3 Feb,2008

  Zohfeltui’ awkam

            Remcan lonak le buaibai, man lo nak phunkip lak ihsin
tuini ah hruaitu thuthang mipi siar thei ding in mipi kut ah kan rak
thlen. In lei saktu, in siar sak tu le ruahnak thatha in pe tu,calai
duhdawt tu le LCF hruaitu upa pawl le kan saya tei pawl parah kan
lungawi. Thathnemnak pakhat tal a um ding ti ruahsan nak thawn..

  Hruaitu Maksak
  -Cikuairem

  Thuhmaihruai:
            “Hruai (lead), hruaitu (leader), le hruai awknak
(leadership) timi pawl hi innsang pakhat ihsin thok, Kawhhran le
Pawlkom tthansonak hrangah lo theih lo ih ttulmi a si. Kum zabu 20
hnulam le 21 thoklam ihsin thok Pawlkom asilole mibur
(community/society) pakhat kaihruai awknak ah “Uktu
(Ruler/Administrator)” timi ttongfang hnakin “Tawlreltu asilole
Hohatu (Manager or Leader)” timi hi an hmang uarsawn. Curuangah,
kannih Laimi pawl tla sanman tum in, innsang ah siseh, kawhhran le
khuatlang nun ah siseh thuneih duhtuk le mipi pawl mai’ hlawknak
hrangah a sor le a uk ih uk tum tteutteu loin Pawlkom tthansonak
dingah le hmailam suangtuahmi pawl hlawhtlin theinak
dingah “Tawlreltu (Manager)” asilole mipi lungtho dingin “Kaihruaitu
(Leader)” si ding a thupi.
  Hruaitu Phun 4:
  Kaihhruai daan si loin, kaihruaitu ih hnattuan tlingtlaknak lampang
sawn thlir in hruaitu sinak phun 4 in kan tthen thei.

  1. A Hmin men Hruaitu [Mediocre Leader]:

              Vansiatnak ah, himi vek hruaitu hi tusan ahhin an
tambik. Pupa san ihsin khua le ram (village/city/nation) asilole,
company, biaknak ah pu le pa ih tokham kha tesinfa sungin pakhatkhat
in sinak, thiamnak, le thiltitheinak ih tlin lo pi’n thuneihnak
(authority/power) kai ttengtteng ih hruaitu dinhmun latu pawl an si.
Anmahlam ah timlaamnak zianghman an neih lo ruangah an hruaimi mipi a
kilkip tthansonak dingah sunmang (vision) nei cuca loin ttuanvo an
laak tikah rampi siatralnak tiang a thleng (Thufim 29:18).
  2.  Hruaitu ttha [Good Leader]:
              Innsang pabik le nubik, kawhhran pastor asilole
president/secretary, company Chief Excutive Officer [CEO] le Ram uktu
President or Prime Minister cu a hruaimi mipi kha lungawi thanuam le
a kilkip tthangso dingin a tawlrel thei. Innsangmi asilole kawhhran
sungtel mipi in an ttihzah, an upat ih mit-hmai ttha ngahtu hruaitu
ttha a si. Fimthiamnak, dingfelnak, thiltitheinak le
taimaknak,…tivek tlinnak a neih famkim ruangah a hnattuan a
hlawhtling. Miphun le khuatlang ih kan ttulmi hruaitu a si.

  3. Hruaitu tthabik [The Best Leader]:   Pacang ttha le nupinu ttha
tampi lakah mi cuangce, laangsar le zohtthim tlak ih umtu innsang
hruaitu a si. Cuvek thotho in Kawhhran pi cinghritu, Tuukhal ttha
tampi lakah mi tangdor, mi thinsau, mi fekfel, thlacam nun nei le
thlaraumi pawl cu hruaitu ttha timi ih tlunlam ah a cehlei
(significance) ih mikip ih ttihzah le upat sunloih co baantu a si.
Tuni khua tthangso, kawhhran picang le ram cangkang tampi pawl ih
hlawhtlinnak thuthup zingzoi tikah zateek tampi cu an hruaitu pawl ih
tlintlaknak ruangbik ah a si.

  4. Hruaitu Maksak [The Great Leader]:
            Hruaitu ttha le Hruaitu Thabik timi hnakin dot khat
kaideuh in a um hrihmi cu kan thulu: “Hruaitu Maksak” timi hi a si.
Maksak: [great hi maksak/nasa ti ih leh (translate) ah a diksawn, a
sullam a sawhsawn in ka hmu – Ropi (Lushai/Mizo ih ‘ropui’ le siceng
si lo) ti ih leh (translate) hnakin kan Lai (Falam/Laizo)  ttong
diktak a sisawn ti’n ka ruat.] Himi vek hruaitu cu: a hmin men
hruaitu thaw cun lei le van tluk in an dang aw. Hruaitu ttha sinak in
hlawhtlinnak a suahpi thei ih Hruaitu tthabik sinak in midang hnakin
hleicetnak le sunlawinak a suahpi. Asinan cumi hmuahhmuah
hnakin “Hruaitu Maksak” cu a sunmang, a suangtuahmi le lungthlitum
saduhthah a neihmi mipi thei fiang ko a sim thiam ih ttuanpi le mipi
in an lungkimpi thluh. A hmuitinmi hlawhtling thei dingin ttuan suak
dingah a thu ngai dingin a ciah-neh (influence) thei. Hnek cop si
loin mipi pawl anmah te lungtho in nasatak ih pumpeek le cangvaih
duhnak thinlung a neihter (inspired) thei. A nai, a hla,
dung-hmai/keh-vorh – zapi huap in a hmu thei thluh (panoramic vision
a nei) ih thil ttha a suahpi. Tuni kawhhran le khuatlang nun ih kan
ttulsambikmi a si.

  Thunetnak:

  Hruaitu pakhat cun ziangvek pianzia in hruaitu a cang ih, hruaitu
dinhmun a thleng a si khalle a hmin men hruaitu si loin hruaitu ttha
a si a ttul. Si thei dingin zirzoi ding le zuam ttentto ding a ttul.
Mifim pawl in “Hruaitu cu amahte hung cangmi a si lo, zirnak le
zuamnak ih cang mi a si,” [Leaders are not born, but Made] an ti.
Curuangah Hruaitu tthabik si zuam cio ding le cumi ah lungkim tawk
mai loin Casiar le zirzoinak nei in hnattuan taimak ding a si.
Kilkhawimi le hruaimi ram le miphun duhdawt zawnruattu a si a ttul.
Mipi ih taksa-thinlung-thlarau tthansonak dingah khuaruat thei mifim
cathiam le nuncan ziaza dingfel ih mifekfel si a thupi. Mipi thinlung
le khuaruah daan muvanlai vekin a zapi huap ih hmu theitu le an
ttulnak ih zirin bawm theitu, thil ttha simzirh thiamtu, le lamzin
dik ih fehpi theitu si a ttul. Cumi pawl a zapi huap in a saangbik ih
ttuan suak theitu cu kan zate ih kan ttulmi “Hruaitu Maksak” cu a si.

  Suu Kyi le a Party pawl

  Innthawng sungih khuahkhirh a si mi Pi Aung San Suu Kyi cu ralkap
thuneitu pawlin tuini 30.1.08 ah a party member hotu pawl thawn
acozah khual-inn (State guest house) ih  ton awk an sian sak thu, an
party member pakhat in a sim.

   Asinan, kandung kum 2003 ihsi innthawng ih an thlak ve mi NLD
party ih no.2 nak U Tin Oo cu hi ton awk nak ah tel an sian sak ve
lo. Suu Kyi hin an party president U Aung Shwe telin  member dang 7
pawl a tong hai. Pi Suu Kyi hin NLD party hotu pawl hnenah, “ralkap
thuneitu pawlin an karlak palai dingih an thlah mi Aung Kyi thawn an
ton awk nakah a lung a kim tawk lo thu a sim. A lungkim tawk lo nak
san bik khal ticucan bitiam a umlo ruangah a siih, ralkap pawlin
tikcucan an dir sau vivo asile ram hrangah siatnak a thleng deuhdeuh
ding. Tlangpar mi pawl tel loin Kawlram politic rel fel khal a theih
lo, curuangah tlangpar mi, NLD le ralkap pawl kan zaten tongaw khawm
ih rel tlang a tul,”

  . Pi Suu Kyi le NLD party hotu pawl hi  minute 90 sung thurel tlang
nak an nei.Hiti lai ah blogger hminthang zet Nay Phone Latt, NLD
lamtang cu member dang pakhat thawn mani sunah Yangon internet café
ih an tolai cu ralkap pawlih an kaih thu U Nyan Win in a sim bet.

  Suharto a thi

            Indonesia President hlun Suharto cu januar 4 ni ihsin a
kaileng natnak nak ruangah sizung ah a um ih 27 January ah a thi. Kum
86 a ti.Indonesia ram kum 30 lenglo a hruai.Sibawi 12 hnak ih tamin
nasazet in an tuam hlawm rero nan a nunnak in a daih nawn
lo.Philippine President,  Malaysia MP le Singapore Pm pawl in upatnak
capi an kuat.

  2008 American Miss

  Miss America 2008 a co ngahtu Kirsten Haglund kum 19 mi  cu an hril
ngah mi a si. Sumpai US$ 50,000 (RM 162,000) an pek hlei ah a duhduh
nak hmun ah khual tlawng theinak khal an pe.

  EVAN LAL ENG LIAN THAWI KAWMAWK NAK

  Tulai ih kan miphun lakih Pathian ih mi hman zet pakhat asi mi
Evan. Lal Eng Lian cun LCF,Malaysia Kawhhran ah ni 24.01.08 ihsin
03.02.08 tiangin Crusade a nei. Sun lam 12.00-3.30pm ah Pathian thu
zirh nak neih ringring asiih zan khawmah sermon nak a nei thung. Sun
lamih Thu zir hi mi 40 hnuai an kiam dah lo ih zan lamah ve thung cun
mi 15   0 hrawnghrang hi an si tlang pi. LCF Kawhhran in zarhtin a
suah mi”HRUAITU” in amah kawm nak Pastor Quater, Jalan Alor ah a
hnuailam vekin a nei asi.Jalan timi cu Lamzin ti nak asi.

  1.Suahpi unau ziang hmuah na nei?
     Suahpi unau 8 kansi ih tu ah cun a nungdam 7 lawng kan si.

  2.Na kum,na inn sang nu ih hmin le fa neih zat?
     Kum 44 kasi ih ka inn sang nu ih hmin cu Nu Ngam Nei Tial asi.
Fa kan nei lo.Ka duhdawt zetih anih khalin i duhdawt zet.

  3.Krih ih nunthar na neih kum?
    1983

  4.Ziangtikin Pathian rawngbawl hna narak thawk?
    Ka pianthar hnu cun mai ei hawlih hnatuan phahin Pathian
thuthangtha ka tlangau pi cih ko.

  5.Asile ziangtik kumin na takpum le na can hmuahhmuah Pathian
hnatuan nakih narak pekawk thei?
    1987 ihsi thawkin.

  6.Ziangti vek takih Pathian hna rak tuan thawk ha nasi?
     Zepthu loten losim mai sehla. Ka pianthar veten ka Nu le Pa in
Pathian rawngbawl dingin Pathian hnenah inrak ap zo. Cuhnu lamah
lawng Pathian in ka thinlungah khal hna a run tuan vivo ih a hnatuan
duh nak taktak i neihterih ka damsung tuan dingin ka apaw thei asi.

  7.Khui hmun le khua in Crusade tuah narak thawk?
  Falam khawpi.

  8.Na rawngbawl nakah ziangha har na ti bik?
  Sinfen le sumpai neih loh can hi har ka ti bik.

  9.Na lungawi bik can teh?
  Pathian thuthangtha ka simih miin Bawi Jesuh hi an Bawi le Rundamtu
ih an pawm ka hmuh hi ka lung a awi bik ko.

  10.Thuthangtha na simih Pathian in nangmah hmangih pianthar nak
arak co hmaisa biktu zo asi?
  Mai Siang Tial. A tu cu New Delhi lamah a um zo.

  11.Pathian thuthangtha na sim nak ihsi hung piangtharih nangmah
vekih Pathian hnatuan thei teh an um ve hai ko maw?
  Pathian zarah um ve ko.

  12.Ziang Kawhhran ah member na lut?
  Revival Baptist Church of Myanmar(RBCM)

  13.Tuihlan a liam cia canah teh evangelist dinhmun hlirin maw rawng
narak bawl?
  Silo.Tahan,Aung Thitsar(Kalay) le LCF Aizawl ah Pastor dinhmunin
kum 12 karak tuan ve dah zo.

  14.LCF Malaysia ziangti ih ra bikha nasi?
      Ka mi le sa pawl Pathian thu thangtha sim asi bik ko.Hitawk
kara thlen thei nak dingin Salai Vante(Sungtuan LCF Aizawl)le Salai
Sang Sang(Yangon) pawl ih tawlrel le bawm nakih ra thleng thei kasi.
An parah tla ka lung a awi zet.

   15.Hmin/Pawlkawm dang deuh phunih rawngbawl nak teh na nei maw?
  Aw nei ve ko. Ni 2Jan. 2007 ni ah rawngbawlpi 5 hantuan khawm nak
ding tin “Revival Evangelistic Team(RET)” tin kan din thawk ve. Ka
rawngbawlpi pawl tla cu Saya Lal Tai Lo, Saya Thawng Dam, Saya Ngun
Nei Mang le Saya Lal Hram Piang tla ansi. Kan hmailamih kan rawngbawl
nak hrang ke pen vivo nakah tin June thla ah khin Pathian hnenih rawl
ul thlacam nak neih thei kan tum.

  16.Himi RET ih nan tumtah mi teh ziang bik asi?
      Miin insawm lo nak hmun khalih Pathian thu thangtha sim vivo
asi.

  17.Na hlaphuahmi tha le mawi zet zet kan sak ringring fawnih
Awnmawi lamah ziang tik ihsi rak lut ha nasi?
  Ka pianthar hlanah cun duhdawt nak hla lam karak phuah ve ko nan
ziang hun rel ding tlak ka nei lo ah a cang. Asinan, ka pianthar hnu
lamah Pathian hla ka phuah thawkih keimah khalin sakin thepphel(tape
cassette)suah thei mi tla ka nei ve.

  18.Asingai. Thepphel(Tepkhui)ziang hmuah lai na suah thei zo?
  Khui 7 a tling ve zo ko.

   19.Na Tepphel suah hmaisa bik?
  Ka rual Van Lal Sak thawn “Kross lawng ka tluang khawn nak” timi cu
1987 kumah kanrak suah thawk ve.Sum le pai khal amah ka rualpa VL Sak
in tlawmngai ih a thawh mi asi. A pekawk nak hi lungawi um ka ti zet.

  20.Tuihnu lamah teh thepphel lam suah thei vivo na tum maw?
  Rawngbawlpi hrekkhat cun suahsak thei an zuamawk thu insim ko ih
ziang asi tla le anmah pawl parah a thumaw sawn ke.
  VCD suah thei ding tiangin tla thazang in petu an umih lungawiza
ngaingai asi.

  21.Pathian thangthat hlamawi fing zianghmuah tluk na phuah thei zo?
  Fing 205 Pathian in in phuahter ve zo.

  22.Calai lamin teh rawngbawl nak na nei thei ve maw?
  Aw a hminte cun nei ve thei e. SENHRI mekazin le thuthangca
dangdangah tla ka theitawkten Pathian thu ka ngan ve theu ko.

  23.Nangmahih ngan mi cabu tivek teh tuahsuak theimi na nei maw?
  Nei hrihlo. Asinan, “Ziangruangah piangthar kan tlu theu” timi cabu
cu ka ngan theh zo ih Dr Sui Lian Mang in tuikum sungah  in suah sak
thei a tum ko.

  24.Na rawnbawl dan hi kanmah Falam mi le sa sungah lawng maw si bik?
  Silo. Lusei le Halkha unau pawl hnenah tla Thuthangtha simin
rawngbawl nak ka nei thei ko.

  25.Kan Falam mi Khristian pawl na hmuh dan tlangpi teh?
  Pathianthu kan duhin kan thei konan a nunpi lamah ka tlasam deuh
lai hrihin ka hmu. Pathian hnenih thil pek lamah khal tan kan lak
deuh vivo a tullai in ka thei.

  26.Thu tampi kanlo suhmi kim zettei in let sak thei ruangah na
parah kan lung a awi zet. Pathian in a hmanrua hriam zetah lo hmang
vivo hram seh law…
  Keikhal ka lung awi zet. Hitivekih LCF Malaysia(Kuala Lumpur)
Kawhhran in Pathian thuthangtha zirhawk nak le tlangau pi thei nak
dingih lungawitei inrak cohlan nak par khalah kalung a awi zet.

  THEIHKAUH NAK  LE  RUAH DING  TAM
                                      ( by – Biak Chawn )

  1.         Sihte ( ant ) cun amah hnak ih a let 50 ih rit a cawi
thei, a let 30 ih rit a dir thei. Tuur ( toxin ) ruang ih a thih
ahcun vorh lam delh in a thi. Sinan, a san an thei hrilh lo.
  2.         Phengphehlep ( butterfly ) in thil rim le thawt nak cu a
ke-in a thei ( tep ).

  3.         Ostrich hi leitlun vate phun ahcun a tum bik, a zam thei
lo, a tlan cak bik. A thluak hnak in a mit mu a tum sawn. ( nangteh
na thluak maw na mit mu tum sawn?! )
  4.         Starfish hi tipi thuan thum ih thilnung hmuahhmuah ah
upa bik pawl a si ding tiah scientist pawl cun an zum. Nga ( fish )
phunkhat si in, arsi vek pian a nei. Thluak a nei lo . ( milai thluak
neilo hi ka theih mi an um )
  5.         Cumkheng ( turtle ) hi a tawlam ah khal thaw-thawtnak a
nei. A tawlam ihsin tla boruak a hip-lutsuak ti nak a si. ( milai tla
zing pit ah mai ihkhum ciau ah tawlam in thaw thawt a awl zet

  6.         Leitlun ih thilnung hmuahmuah ah `milai le dolphin’ (
nga phunkhat ) cu nuamtawlnak men khal ih nunau mipat nak ( sex for
pleasure ) hmang an si.

  7.           Nunau 85% hin angki hnuailam ( brassier ) size dik lo
an hru. Leitlun pumpi ih nunau 9% cun `duh-nung-zet’ in an thei aw,
43% cun pianpi mawinak ( natural ) nei an ti aw, 24% cun se tuk lo-
tha tuk lo ( average ) tin an thei aw, 8% cu nunau awk ter tuk (
feminine ) an si i, 7% cun zoh nuam an ti aw ih, 7% cu `mawi’ ti aw
an si. 2% lawng in sexy an ti aw. Nunau te-te!!

  8.         Tidai kan in theu ` mineral water’ le drinking water hin
thuhla tampi a nei. Siartu hrang ih thathnem nak  ding ah tawi famkim
deuh in, hitin vawn hrilkhawm sela,
  1)        Mineral tidai ahcun element phun sarih; Sodium,
Potassium, Calcium, Magnesium, Chloride, Sulfate, Hydrogen carbonate
pawl an tel. Mineral tidai cun `Total Dissolved solid’ ( TDS ) a nei
ih, cucu a par ih kan ngan element pawl khi 250 ppb ( parts per
billion ) an tel thluh len cui tidai cu `PH.7′ ( tidai thianghlim )
tin kan ko. Drinking water pohpoh hi mineral water an si lo ih,
mineral water pohpoh khal PH.7 an tling lo. PH.6.5 le PH. 6.9 tla cu
Malaysia ah tampi an um. Tidai molecules H2O particle 10,00,00,000 ah
element dang 250 cu PH.7 a si.

  2)        Mineral water cu phun hnih a um thei. Natural le Ionised
an si. Natural mineral water cu leihnuai isin ngah mi an si vek in
leihnuai ih mineral le carbonic acid bakah element phun tampi a pai
ih, cucu minung  harhdam nak hrang ah a tangkai zet. Natural mineral
water ngah thei lo nak hmun ah, tidai thianghlim cu minute reilo te
sung electric power thawn cui tidai cu mineral um ding ih tuah an si.
Sodium, Potassium, Calcium le Magnesium than nak cu Cation ( +Ve ) a
si ih, Chloride, Sulfate le Hydrogen Carbonate than nak cu Anions ( –
Ve ) ti a si. Hivek ih tuah mineral water pawl cu, a ret nak bottle
sin a siat ahcun lei lo ding.
  3)        Tidai thianghlim, leihnuai isin a lenglam ra suak, a sung
ih mineral um dan simfiang tul lo pawl cu Spring water tin tla an ko.
Tidai hrekkhat ahcun trace element an rawi. Minung taksa hrang ih
tangkai ding `inorganic compound’ ( iron, zinc, iodine le fluoride )
an rawi theu.

  4)        Leitlun harhdamnak tuanvo neitu WHO ( World Health
Organization ) pawl cun tidai thianghlim sam ruangah minute 15 ah
  nauhak pakhat thihnak a thleng ringring an ti.
  5)        Kum 1999 isin Italy ram cu kumtin ( kum 1 sung ) mineral
tidai thianghlim ( bottle ) hmang tam bik ram an si i, milai pakhat
ni 184 – 200 liters an hmang. Pahnih nak cu Thailand 77 – 94; pathum
nak  Indonesia 32 – 40; pali nak Malaysia 12 – 20; panga nak China 9 –
14; South Africa cun 3 – 7 liters an hmang.

  6)         Steel ( thir ) tonne khat ( 1000 kg ) tuah nak ding ah
tidai 1,50,000 liters hman a si ih, mawtaw ( car ) pakhat tuahnak
ding ah 4,00,000 liters hman a si. Thuthangca tonne khat hrang ah
7,50,000 liters hman a si.
  7)        Leitlun natural tidai 3% lawng cu minung hrang ih
thianghlim ( fresh ) a si ih, sinan cui tidai thianghlim tam sawn cu
minung thlen ban lo nak ah an um ih, 1% lawng milai co thei in an um.
Kum 2025 hnu lam ahcun tidai thianghlim har  ruangah leitlun milai
then thum ih then hnih ( two-thirds ) cun har nak tumpi an tawng thei
tiah UN cun zum nak a nei.
  8)        Malaysia sung ah tidai in ding tuahnak ( bottling )
company 16 hrawng an um ih, an tuahmi brands cu 150 hrawng a um.

  9.         Malaysia ram ah thilsual tuahnak case ( A-Hmuh )
aphunphun kum 2005 ah 1,57,459; 2006 ah  1,98,622; 2007 ah 2,00,000
hrawng a um ih, thah awk nak ( murder ) 604; in sung luh le siatsuah
( attacking house ) 27,313; nunau mipat sualpi awk nak (rape) cu kum
2006 hnak in 2007 ah 125% rori in a tam.

  10.      USA ahcun kum tin mi 22,000 hrawng cu lung ( heart ) lung
natnak in, hlu sak tu an um lo ruang ah an thi. Tuluk ram cu leitlun
ah minung taksa peng fir sak ( mitthi zo taksa- lung, mit, kaileng
etc ) tam nak bik a si i, hivek thil thalo tuah nak ah hin doctor
pawl tla a thup ten an tel. A hleice-in Tuluk senior doctor pawl cun
mipi rinhlelh ( suspect ) an hlawh zet. Jan. 16th ah Dr. Wu Tianxi cu
nunau kum kim lo 20 sualpi nak le milai taksa firnak ruang ah thi
ding ih thu thensak ( death penalty ) a si.

  11.       Sai ar ( turkey ) sa ei ruangah ih-hmu ih ruah awk nak le
science thawn pehpar mi, tulai British Medical Journal ih lar
deuhdeuh, Indiana University School of Medicine ih Dr. Rachel Vreeman
le Dr. Aaron Carroll te’i thil hmuhsuah an ngandan cu : Sai ar, arsa
le caw sa pawl cun tryptophan ( amino acid ) an neih dan a bangaw
thluh ih, ih-hmu nak an si lo nan, vawksa le cheese ahcun tryptophan
a tam deuh.
              Nikhatah tidai no 8 in ding ti a si, sinan, kan ei le
in hmuahhmuah ih tidai ( liquid ) tel thawn sim duh mi an si. Milai
cun kan thluak 10% kan hmang ti a sinan, thil kan zir laiah kan
thluak sung ih cell pakhat hman it that le hnatuan lo an um lo. Thih
hnu-ah sam le tin ( hair and nails ) a thang ti a si theu, hihi vun a
ro ih, a tawm ruangah a si sawn. Hmun thim deuh ih ca siar cu mit a
siatter ti a sinan, mit a kham ruangah khaw hmuh a fiang lo thei ko
nan, rei a siat phah thei lo.

  Mifim pawl tongkam le Thufim

  1.         Ka nun sungah zinglam caan in awn saktu le zanlam caan
in kharsaktu cu thlacam nak a si. ( Praying is the key of every
morning and the bolt of every night in my life )- Mahattma Gandhi.

  2.         Tha sinsin  dingih tuah kan zuam lo asi ahcun, thil tha
ka neih cia hman hi an tha rei thei lo. ( We don’t remain good if we
don’t always strive to make it become better ) – Gottfried Keller,
writer ( 1819 – 1890 )

  3.           Miphun duhdawtnak cu umhar zet ih thiltha tuah le
lungawinak le buai nak mitthli neitu a si. ( Every good work is done
in solitude, tears of both joy and turmoil all belong to patriotism.)
  Hans Habe ( political activist )

  4.         Cahnah pakhat tla mi pahnih an zawn awk cun a zang deuh.
( Even a sheet of paper is lighter when two men carry it ) – Korean
Proverb

  5.         Ni sarih sung khawm lo cu micak lo ih in tuahtu a si. (
Seven days without church make me One weak )  – Simtu theih lo (
Anonymous )

  6.         Thil tisual  dah riai lotu cun a ngaingai in thil
zianghman a tuah dah lo. ( One who makes no mistake usually does not
do anything ) – Cicello

  7.         Midang umdan ih na duh lo mi cun nangmah rak lo tuah tha
hram seh. ( What you dislike in another take care to correct in
yourself ). – Thomas Sprat, Historian (1635-1713)

  8.         A umdan ih lungkim lo tu cu a thangso ding ih, Amai dik
nak tla theifiang lotu cun thil tampi zir ding a nei lai. ( Who is
not satisfied with himself will grow; who is not so sure of his own
correctness will learn many things ) – Palestinian proverb

  9.         A sungtu si phang hlah. Vei ziangzat na tluk ti lam hnak
in vei ziangzat na tho sal thei ti mi kha a thupi sawn. ( Don’t be
afraid of failing. It doesn’t matter how many times you fall down.
All that matter is how many times you keep getting up.) – Marian
Wright Edelman, Lawyer, Founder of hte Children’s Defense Fund.

  10.       Thil sunglawi um sawn hrang ding a si ahcun thil tha khal
tan siang mai aw. ( Don’t be afraid to give up the good to go for the
great ) – Kenny Rogers, country singer.

  ( NB.  Mirang ca le Laica ih tongkam hmandan bangaw le remcang thei
bik ih lehlin a si ih, a fiang lo le palhnak um thei a si ruangah
mirang ca tla ngan tel a si – ngantu )

    NA  IN SUNG  AH  NA  LUNG AWI  DAH  MAW ?

  -Salai Ngun Lian Luai

  1.         Na in sung ah nangmah le nangmah kha,
              A lu bik ih na um duh len,
              Nanngmah kha tangdawr ten um hmaisa aw la,
              Upat nak na co ding.

              Mah le mah ngaisang aw mi na si len.
              Mi hnihsan na tawng ding.
              Tong ngiau nei mi na si len,
              Mi rethei le mi zangfah um ka si ti kha thei aw in,
              Hma lak tum aw.

              “Pathian, Pathian” ti ih, kaa ih sal ringring si ih,
              Nun ih hmuh ding le zoh thim ding um lo na si pang maw?
              Ralring te’n maw….
              Mi par ih tha dengdeng si,
              In sang ih `me  hleu hleu’ mi minung cu thi tlak a si.

              Nun mawi le nun thianghlim te ih na cawm len,
              Na in sung sang a nuam ding.

  2.                     NU  TUAN VO

              Na fa hniang te pawl kha,
              An lu tlun ah na kut nem ten hngat in,
              Na Pathian hnenah na hlan ding.

              Na fa le te cu,
              Na duhdawtnak  aw nem te in,
              In sang ih na tlan len dan le,
              An par ih na um tu dan te in,
              Na duhdawtnak cu lang ter aw.
              Ankaa sia hmang in fa le  nun na sim lo ding,
              Ankaa nem te ih nun sim mi fa cu,
              A puitlin tik ah upat mi a si tengteng ding.

               HRUAITU Vrs HOTU

    -Salai Kawl Lian

  Hruaitu pakhat dinhmunih a din rero tu le a ding lai tu ding
hrangah kan duh maw duhlo maw asi khalle thil tul zet asiih ruangah
zawi hmai hman zah duh tuk lemlo ih ka nganmi asiih a zo bul ce ka
tisan nak pakhat khal a tel lo asi ti a siartu pawl khalin inrak
theihthiampi ka duh zet fawn asi.

  Khawtlangah le Kawhhranah a tlangpi thu in kan thlir hnik pei.
Mihrekkhatin hotu si cak zet tla kan um lai ah a hrekkhat ve thung
cun hruaitu si kan duh. Hi pawl hi cu leitlun cem tiangih um ding asi
ti khal theihcia a tha. Milai thinlung put cu a sia le a tha cawhrawi
aw ruiri ringring asi theu ko. Asile hotu timi le hruaitu timi in
ziang lamdan nakha a neih ti kan hun hrilhfiang tum ta hnik pei.Hotu
cu mipi hril lo mi asiih,mahte thu ih mai thiam dandan thu le hla
hmangih rual le pi ci le hnam pawl sawm khawmih thlantlin mi an si
duh tlangpi in ka thei. Himi vek hotu thinlung pu ih mipi in hun
hruai tikah harsat nak hi a ra luihlo ti sehla a sual tampi lo ke. A
hnuai ih a tuanpi pawl lak ihsi thawkin thu neih tum nak lawnglawngin
a thinlung a luah khatih cutivek lungput a neihmi in amah kha a hruai
vivo tikah a tawpah alamih tang pakhat hman khal an um duh nawn lo
theu. Hmuh theih tisa le tak ruangpi tuanpi tu hrekkhat pawl cu a
hnuai ah um rero hman khal sisehla
thinlung takte thawnih hun tuanpi hruthro duh nak an nei nawn lo
theu. Cutin a hoha sung tikcu le canah hminthat nak lam ai in hmin
siat nakin a run tuam velih  ziang cuca khal tuan suah ngaingai mi a
nei thei theu lo. Mipi pawlin a parah an lung a awi tuk lemlo vek
ciahin amah le amah khal a thin heng na in a khat theu. Khitivek hotu
khi kan khua le tlangah hmuh ding a um theu ih kan thansoh ding
tlukin kan thansoh thei lo nak theu khal cu asi. Khitivek hotu cu
neinung ansile an neih nak suangin mipi hruai vutvo theih mai dingah
an neih pang theu ih asi lozia can a liam hnulamah an hmu aw fiang
theu. Neihnun nak hi fim nak mawsi tin a fehpit pang theu ih a dik lo
zia cu a dunglamin mipi zirsang le hmuhtawn rak nei cia zo pawlin an
hnihsan rero men asi.

  Hruaitu timi cu tuanvo a neih nak Pawlkawm asilole Kawhhran mipi
pawlin tlawmngai dingih an thlantlin mi lehlam zawngin Pathian thlan
mi kan ti khal le a sual lemlo ke. Hitivek hruaitu cun vision(hmailam
hnatuan dan ding hrangih rak hmuh lawk cia nak)tha zet a nei ih cumi
cu a tuanpi pawl hnenah a phaulang thiamih a tuanpi pawl thawn
lungrualten  an hun tuan tlang taktakah cun hlawhtlin nak a um
tengteng theu. Thu neih ciamco a tum lo ih mah le mah tangdawr zetin
taima ten hmai tawngin a tuan tu bikah a um theu. Amai hrihruaipi
lawng thurawn duh tawk lo in amah ai ih upa le zirsangsi, tawn le
hmuh mi rak ngah zet pawl hnenah thurawn a la ringring paih theu.
Amai thu lawngin rorel a tum mai theu lo ih a hnuai ih a tuanpi pawl
lungkim nak a la ta theu. Amah le amah ah rin um nakin a khatih a
tuanpi lawng hman silo in mipi zate hmai ah rin um zetih tuantu asi
theu.Pathian le amai karlakah a rin um zetih nunau le sumpai ah khal
a rin um zet theu. A tumtah mi thleng tengteng
dingih a tuan rero lai ah mihrekkhat a sun mang rak hmuban ve lo
pawlin rak sawisel theu hman khal sehla cu pawl ih thurel tak pawl cu
a hna phitih hmu lo vek te in khal a um thiam theu. Innsang nei zo
asi khal le a nupi/pasal in amah a tihzah thiamin a upat thiam zet. A
tuanvo ah thu rak neih ve ciamco a tum tuk lemlo. Thurawn tha lawngte
a rak pe ve theu ko.

  Rorel sungah lawng huaisen zetih rorel ciamco cing mi asi lo ih
asinan a rorel mi vekin a takih tuan suaktu asi theu sawn. A ai ih
nauhak deuh pawl khal hi nel zet le upat hna thiam zetin a kawm
paihih nonal zuanzang pawl tuanvo pek danah khal a buai dah lemlo.
Iksik nak a nei lo ih keimahin ei thluh keng tilam aiin keimahin tuan
thluh lawlaw keng tilam a fehpit tlangpi theu. Hiti ka ti tikah tuan
ding um pohpoh pawl cu a tuanpi pawl sem hna a thiam theulo ka ti nak
asi hrimhrim lo. Tuan ding vek a um tikah a tuantu bik si duh nak
thinlung a nei ka ti duh nak asi sawn. Mipi lakih thehlarawk lam hi a
uar zawng asi lo ih ziangha ka tuan suak thei ke ti mi lam sawn hi a
lung do theutu asi bik. Mipi in a tuan suak mi an hmuh hi a hiar zet
mi asiih mipi in “Na ti tha zet” tivekih an hun lawm can vekah khal
kei lawng kasi lo, kanzate tuan suah mi asi sawn tin tawngkam mawi
zetih rak let hna a thiam theu. Miih thil tisual mi hi a hmu thei zet
theu nan a mawhthluk nak lamah a
thinlung a fehran ter lem tuk dah lo.

  Hruaitu timi hi a thupi zetih Pathian ih a hril mi khal kan Bible
sungah hmuh thei mi kan nei ko. Pathian ih a theihpit mi hruaitu si a
pawimawh zet tin ka ruat. Kawhhran lawng silo a khawtlang lam khal
asi khalle hruaitu pitling pakhat si dingah cun Pathian a tihzah
zettu le a berawn ringringtu asi a thupi zet ding. Pathiahn ih duhdan
ih mipi a kaih hruai ding hi thupi bik asi. Leitlun dan tukih hruai
awk hi thil atthlak asiih arah hmuh ding a um vekah khal PAthian hmin
a sunlawih lemlo theu. Hruaitu ptling pakhat dinhmunih hung ding leh
tu ding cun  member dinhmun ih a din lai ihsin tangdawr nun a nei mi
asi a tul. Culawng asilo, a hruaitu a zohsang thiam in a tul nak
nakih bawm hna khal a theithiam theu. Hruaittu dinhmun nih a din nawn
lo hnulamah khal a thu le hla lam zawng talih thazang pek thiam mi
asi ringring lai ih thurawn pek thiam mi ah a cang lanta theu. Keimah
ka tuan nawn lo pamih ziang vek an can khal le a pawilo timi thinlung
put a nei dah kel lo. A bawm
thei nak kilkipih rak bawm ve ringring dingin thinlung pitling zet a
nei.

  Leitlun thu le hla lam khal thei dingin casiar lamah khal a taima
zet mi asiih san thawi milin IT (Information technology)lamah khal a
lutcilh thei ve tu pakhat asi tla a tul phah thlang.Santhar hruaitu
pitling si dingah cun computer khal thamthiam a tul zet ding tiah ka
ruat. Talent(mi aiih thiam hleice) a dawnlo zawng lam khal a dokalh
dahlo ih tha pek dawn a thiam sawn riangri theu.Amah le amah hi a ret
sang dingawk tluk aiih retawk san a tum dah kello. Mi lawm a thiamih
mi tha pek dan a thiam zet theu.Thurel sawnlo ding le thinlungih pai
khiaukhi ding tivek khal a thiam zet. A rak tisual pang mi le ati
pang mi a um vekah khal ningzak lote ih ngaithiam dil a hreh dah
lo.

  TLANGVAL  LE  FALA  THUHLA  THEIH TUL

  – Biak Chawn
  ( kan dung zarh ta peh )

              Fala ( nunau ) cun a duhzawng tlangval OR mipa umdan
ding ih a duhzawng cu hitin a tlangaupi ih, cucu a saduhthah  tlangpi
cu a si. A hmaisa bik ah, 1) Mawi ( iang nei, hmel piang zet ), 2)
sumpai lam ih hlawhtling, 3)thu ngai peih le mi duat peih, 4) pumrua
dik, 5) chei awk dan thiam, 6) thil tha hril thiam, 7) ruah nak tha
nei, 8) fim le romantic zet ding, 9) amai fala tla porh thiam
phahphah tu, 10) fala dang zoh cing lo.
              Mipa kum 32 tlun lam an si ahcun, 1) zoh nuam ( a bik
takin a sam umdan ), 2) tohkham ih in hruaitu OR sangka ( mawtaw
sangka tla ) in awn sak theu, 3) leng lam ih rawl ei nak ding ah
sumpai sam lo, 4) tong lam hnak in thu ngai peih sawn, 5) hnihsuak um
thu pakhat ka sim lai ah inrak hnitsak theitu, 6) thilri ken ding le
bazar thil tla
  insawng ih inken sak ringring thei, 7) neck tie pahnih khat tal
nei, 8) ka rawlsuan thaw ti zel thei tu, 9) birthday le thildang puai
ding hngilh lo thei tu, 10) zarh khat ah voi khat tal in fawr suahpi
thei tu.
              Mipa kum 42 tlun lam an si ahcun, 1) hmel se tuk lo (
cal sam neilo tla pawilo ), 2) in hmuak peih ringring tu, 3) ka tong
pohpoh `aw’ in tih sak thei tu, 4) hnihsuak tla insim peih tu, 5) in
sung thilri thar tla thleng thei tu, 6) a pum khuh thei ringring
angki (kawr) hru thei sela, 7) khahmul le hmuihmul tla met ringring,
8) hnatuan buai nak rel lo ih ka duh tik len lenglam ah rawlei ding
ih insuahpi thei tu.
              Mipa kum 52 tlun lam an si ahcun, 1) sam tla met ih,
hna le hnar hmul tla met theu, 2) mi lak ih lu le kutke hiat aw dah
lo, 3) in lenglam ka to lai ih in rak ih thah san dah lo tu, 4)
hnihsuak capoh
  thu a kel le akel lawnglawng in sim tu si lo, 5) mawza ( socks )
a              bangaw hruk ngah ringring, 6) under-wear fai zet hruk
theu, 7) a mai hming le thildang pawimawh hngilh ringring lem lo, 8)
ek in sin nak ( toilet cover ) sinsal theu, 9) tangka lam le holiday
nak ding lamah tuanvo la thiam.

  Mipa kum 62 tlun lam an si ahcun, 1) nauhak pawl ning lo le tih lo
tu, 2) tidai bual nak ( bathroom ) um nak thei tu, 3) tangka pai
menmen ding tampi hai lem nawn lo, 4) zan ih nak ah  hngawk ring tuk
lem lo, 5) a hnih san le a thinheng san tla thei fiang tu, 6) amah te
ding, to, feh sukso thei, 7) angki thuamkim thawn um ringring thei,
8) ei ding nem lam deuh OR ka duhzawng in eipi thei tu, 9) a Ha ( ha
lem ) a ret nak thei ringring tu, 10) toilet tuah rimse lo tu, 11)
zarhte le zarhpi ni tla thei ve ringring thei tu.

  Mipa kum 72 tlun lam an si ahcun, 1)  mahte thaw thei (
breathing ),  2)  mahte ek in lam feh thei.
  Ziangtin mipa lam in an ruat pei ti lam ruat ban lo in, nunau cun a
duh dandan in mipa parah thuneih a tum cia ti cu a theih thei ko nan,
nunau cun mipa hnak in nupi pasal lam thu ruah nak an nei hmaisa sawn
ti a si ruangah a duhdan cu law-law-se duhpi ding ti a si. Nunau
nurse hnatuan le mipa ralkap tuan hrangah nupi pasal hawl can a mal
zet tin kan thei theu. Sinan, Malaysia ahcun ralkap pawl hnak ih fala
hawl ding nei lo tlangval kan tam hmel.
              Mipa lam cun mipa si nak cu a hum ringring. Amai dik lo
nak rori tla a duh zet mi nunau kiang ahcun dik tuk in a simfiang aw
thiam. Sinan, mipa par ih nunau lungkim lo nak hmuahhmuah cu a zaten
mipa lam mawh a si thluh lo ti kan theih a tul. Mipa cun nunau
theihpi tul tuk lem lo thu thup tampi an nei theu. A tlangpi in
hmaizarh lam ah kan ngan sal pei. ( .. peh lai ding…… )

Hruaitu Editors

Biak Chawn
Kawl Lian

Calai komiti

Johnson Liante
Obet Cungte
Biak Chawn
Kawl Lian

Advisor

Rev. Run Cung Mang
Tha Nei Thuam

Comments

comments

Comments

%d bloggers like this: