Hruaitu Weekly News 162

Hruaitu
  Weekly News
  16 Decemer 2007
  Issue 162

  Zohfeltui’ Awkam

            1997 kum ah MalaKa, Malaysia  thawnginn ah thla 6 sung ka
rak tlak. Culai ahcun thawngtla rei pawl tak ka rak si ve. Christmas
can  a rak nai vingvo ih Lai khawte lam ih Xmas nuamtak ih kan hman
dan pawl kan rel khawm. Kan rualpa pakhat cu tong thei nawn lo in
hmundang ah in fehsan. A lung a leng tuk ih a nufa a ruat tuk fawn,
ariah a sia. A hnuk ul asi bik ko.

  Ruah a sur dutdo ih ruah cen thlurthlo ahcun Ninu khoi ah a um ti
cu sim lo, Ni a um le um lo hman kan thei nawn lo. Asinan Pathian
thiltuah Ninu cun a suah nak zawnten a hong suak sal. Kan saduhthat
vekin a cang thei lo tikah um ngaihnak thei lo in kan talpawl rero
nan Pathian in kan hrang a remruat ni a thlen lawngah a famkim ter
theu. Cumi can ahcun kan lungawinak ni bang a tlang sal theu.

  Kan dung kum lam ih X-Mas kan hmandan, kan rualpi pawl ram dang
hmundang ah an thleng. Mihrek khat cu thinpit mangbang ,vansang in
thawnginn ah a um tu khal an tampi. Inn lam ih kn nupa le sungkhat
unau pawl ten ziangtin an hmang pei?  Lungawi pawl hrangah lungawipi
in le harsat a tawng mi pawl hrangah tuarpi thiam a tul zet.
Ziangtinha kan turpi ding..Leitlun hmunkip ih um mi pawl hlat awk zet
vekin kan thei nan hmun khat te ah in hmutu Pathian a um. In zohdan,
in hmuhdan a bang awk theh. A mai hnenah THLACAMNAK in kan bawm awk
thei.

          (Bezai)

                               Diilnak

           Nu leh pa
           Nun in sim, in zirh uh
           Nun sim lo mi fa cu an aa

           Kawk in sual in hawl hlah uh
           Kawk tuk mi fa cu an ngong

           Nu leh pa
           A sual nak na hmu mi fa cu
           Duh a va nung lo ve

           Nun na sim lo mi fa cu
           Zang a fak tuk lo maw

           Thlasuah co hlah hman ning la
           In zem ve uh cungzingnui thlasuah
           Nu leh pa

                                                  Veelhleithiam

  Malaysia Convention Centre

  Malaysia Convention Centre lakah a thar, thabik le mawibik cu
Putajaya ah a um. Kula Lumpur ihsin KM 25 a hlatnak ah a si. Kuala
lumpur international Airport ihsin KM20 lawng a hlat. A kimvel Metres
125,000 a kau ih mi 3,000  tlem Hall a um. (A sir zuk)

  Eiruknak ruangh thawng tla

              Indonesia ihsin Malaysia ah Ambassador rak tuantu Hadi
cu eiruknak ruangah thawng kum 3 a tlak ding. Cumi hleiah RM 2.7 mil
a kuan bet ding.Jarkata ih eiruknak dotu pawlkom in an check nak vek
a sile Malaysia ih hnatuantu Indonesia pawl in an passpot a cemhnu an
nunter sa(renew ) tikah aRM 20 lak ding mi ah RM 40 tivek in a rak
dil. 1999-2003 tiang Malaysia Ambassy ah a rak tuan mi a si.

  Hindraf Hotu pawl an kai

  Malaysia ih um India pawl in an mah leh covo (rights) ngahnak
dingah Hindu Rights Action Force (Hindraf) timi pawlkom an tuah. Kan
dung naite ih duhlangternak  (sandahpiah) an neih mi rauangah an hotu
upa pawl mi 5 an kaih sak. Palik bawi Inspector Genarel  Musa ih sim
dan cun hi pawl ih cangvaih dan hi Dan section 8 (1) vekin kaih an
si. Himi pawl kaihnak dingah PM Badawi khal in a sign a si. Kum 2
sung thawng tla ding an si.

  1)P. Uthayakumar kum 46
  Hindraf pawl ih an thurawn upa a si. PRIM party in an advisor a si
thotho. Deputy Prime Minister hlun Anwar bawmtu khal a si.

  2) M Mahonaran kum 46
  An advisor a si.  DAP ih chairman khal a rak tuan dah.
  3) V. Ganabatirau kum 34
  An advisor a si.

  4) R. Kengadharan kum 40
  An advisor, cui hlei ah an hotubik Kumar ih ca pawl website ah ret
tu a si.
  5) K. Vasantha kum 34
  Hindraf ah a cangvaitu bik a si.

  Sai hrangah But tuah

  Dr. Sonja Luz in Sai/vui hrangah but a tuah sak. Sai pahnih cu Mr.
Tun le Jamilah in but an hruh ter lai zuk a si. Himi but an tuahnak
san cu an feh tikah an ke a nat theu ruangah a si .

  Tikhal ( Vur) parah Vanzam

  A veikhatnak Vanzam A319 passanger jet cu Tikhal parah a cawl.
Australia ihsin KM 70 hrawng hlatnak Antarctica tipi thuanthumah
research tuahnak ding station an ong.  Himi vanzam ih a phur mi pawl
cu research tuah tu ding pawl lawng an si. Himi hmun cu tourist pawl
fehnak ding ah ruahmannak an nei hrih lo ih scientists pawl le
research tuahtu pawl lawng feh ding a si. Hitivekin tikcu caan a
thleng danglamnak hi tulai mi fimthiam pawl in an buaipi rero lai mi
thupi cang pakhat a si.

  Nauhak pawl nuam zet

  ACTS pawl ih hohanak le bawmnak in nauhak 1,500 leng lo in
Christmas thla ah nuam zet hla an sak ih rawl ei khawmnak le leknak
phunkip an tuah.

  Hitivekin nauhak pawl hrangah special rorin puai an tuahnak ruangah
nauhak pawl thinlung ah thin hnangam lungawinak a um ih nu le pa pawl
khal in a lungawi thu an sim. An tuahnak hmun cu Jinjang ah a si.

  Nau thar

              Ni 10.12.2007(Monday) , zanlam nazi 3:50 pm ah  Salai
Bawi Vum tei nupa cun Oslo, Norway sizungpi ah Pathian thlawsuah fapa
te an nei zo a si. A nu Nuam Nuam le naute dam le lungawi tei sizung
ihsi an suah lohli theinak dingah thlacamnak thawn bawm cio hram uhsi.

  Salai PaVum hi

  Pavum hi LCF, Malaysia a rak thawk pek ihsin arak teltu le upa
tuantu a si. Pathian thu a duh ngaingai ih kan rinsan zet mi a si.
Hnatuan nei lo pawl hnatuan hawlsaktu le miharsa pawl bawmtu  asi.
2006  ah nupi Mai NuamNuam a nei. 2007 kum February ah Norway ah in
fehsan.

  Asia ram a sangbik Jesuh Zuk

  Asia ram ih a sangbik Jesuh lem an tar mi cu Indonnesia ram
Kristian khawpi pakhat a simi Manado ah a si. 30 Metre a sang.
Asangnak tlang par ah an tar ih Jesuh in a ban a phar lai zuk a si. A
ban pharnak tiang in tah a sile 32 M a sang.

  Bukit Bintang ah

  Bukit Bintang BN le MCA hotu Dr. Lee Chong in Biaknak lam pastor
pawl hnen ah Christmas thingkung tuahdan le X Mas hmandan ding thuhla
a ruah hai. Lowyat Plaza hmai ah Mas tree 7.6 m ih sang an phun.

  Cun Kuala Lumpur Baptist church khal ah Chrismas choir hla sak awn
thawmvang a um. Cun hmuntin ah carol hlasak aw thei ding khal a um.
Hitivekin Chrismas tikcu can kan hman ih lamzin le hmuntin ah Mas
tree a um mi pawl an hmuh tikah Tourist pawl in Malaysia cu buainak
um lo ramdai nuam a si tin an hmu ding tin Mr. Lee cun a si. Asir
kehlam bik zuk hi Falam mi mitampi ih kan theih mi Rev. Bobby Lam a
si.

  Thiangfai lo mi rawl dawr

  Ampang kiangkap ih rawl dawl neitu mi 9 hnenah thianfainak tuah
dingin an sim. Malaysia Harhdamnak lam zung Hulu Langat ihsin a ra mi
pawl in an check tikah an rawl suannak le hanghnah hangrah retnak
pawl a fai tawk lo thu an hmu. Zarhhnih sungah ziangkim felfaiten
tuah dingah orde an suah.

  Diana Danielle
  Diana in Air mata series ah zuknung lemcangtunu a tuan. Asinan amah
simdan ah hlasak lam a uar ruangah hlasaknak can tha a hawl ringring.

  Diana hi Mirang le Malay kahpia a sih ih Houston ah a suak. Kum 16
lawng a si lai ih hmai kum ah SPM a phi ding. A thuhla tam deuh theih
duh hrangah www.mstar.com.my ah zoh theih a si. ( Asir zuk)

  Theihkaunak le Ruahding tam

  ( by BiakChawn )

  1.         Kum 2008 Olympic game cu Tuluk ramah tuah ding a si
ruangah himi ruahsan nak thawn kum 2000 isin Tuluk pawl cun an fate
hmin `Aoyun'( Tuluki tong in Olympic ) tin an rak sak ih, minung 4000
hrawngin hivek hmin hi an nei zo. Cuhlei ah `Beijing Huan Ying Ni’ (
Beijing Welcomes You ) ti thu thawn pehpar awk in `Bei Bei (mi 880),
Jing Jing(mi 1240), Huan Huan (mi 1063), Ying Ying (mi 624), le Ni Ni
( mi 642) tiah Beijing khawpi sung nauhak hmin an phuah zo.

  2.         Leitlun ralpi veihnih nak san lai ih Japan ralkap pakhat
Kawlram ih um cun, kum 1943 ah Japan ram ih a rualpi pakhat hnenah
postcard a kuat ih, cui a postcard cu kum 64 ati hnu-ah a kuatnak pa
cun a rak ngah. Hi postcard hi an ram a thlen hlan ah US ralkap pawl
cun Japan thawn do aw-in, US ralkap pakhat hnen ah a um ih, a thih
tiang Arizona ih an in ah a ret tha. A fapa cun a kil sak ih, Hawaii
lam a thawn nakah a nupi puanthit zirhtu hnen ihsin postcard cu a
neitu ding hnen ah,Nagasaki ah kuat a si.

  3.         Tuluk ram mi putar kum 106 le pitar kum 81 mi cun,
damsung ih nupa siding in mipi hmai-ah thitnak puai an tuah. Hite
nupa hi kum 1999 ah an rak tawng aw. Tulai san ah nupa ih tuah-aw
tlai bik an si.

  4.         Belgium ram hi Leitlun ah tong neitam bik an si nak cu,
an ram sungah an mai tong lawng si lo in, Dutch tong, French tong le
German tong an hmang thei thluh ve. Leitlun ralpi pahnih nak ah
Belgium ram cu ral do awk nak hmunpi bik a si ih, Poland ram cu
minung thih tam nak bik ram a si.

  5.         Pepi ( 2278 BC ), Egypt siangpahrang cu leitlun history
ah ram uk rei bik ih theih a si. Apa a thih kum ah kum 6 lawng a si
ih, kum 94 sung ram a uk.
              Louis XIV ( 1643-1715 ), France siangpahrang cu kum 72
sung siangpahrang a si ih, Europe ram history ah ram uk rei bik a si.
              Queen Victoria ( 1819-1901 ), England ram
siangpahrangnu cu British history ah siangpahrang sinak tuan rei bik
a si.

  Bhumibol Adulyadej ( kum 79 ) hi Thailand singpahrang tuantu a si
ih, kum 1946 isin a thawk. 2007 hi kum 61 siangpahrang a tuan nak a
si ih, tulai san ih tuan rei bik ( dam lai ) a si.
              Elizabeth II (1926- ??) hin kum 55 sung siangpahrangnu
si nak a tuan zo ih, kum 2007 ah a pasal neih dimond jubilee ( 1947-
2007) puai a tuah. British history ah pasal nei rei bik a si.

  6.         Kum 1999 November ni 23 ih suak, Irish le Singaporean (
Valentine Cawley le Syahidah Osman )tei fapa, kum 7 a si ihsin
University ih tlawngkai duh cih Ainan Celeste Cawley cu tulai sanah
science ( Chemistry ) lam ih mangbangza a si. A suah ihsin zarh 2-nak
ah a tong suak ih, “tidai” tiah a tong suak. Thla 2 ih upa a si lai
ah nazi a zoh ih, a nu hnatuan tlun caan a thei ti a si.

  Thla 4 nak ah a vak thei ih, thla 6 nak ah a feh thei. Kum 7 a si
hnu-ah cahlap 460 um nak Chemistry lam cabu cu zankhat ah a siar
thluh ih, a thupi deuh2 a cing thluh. Nauhak dang vek in tlawng niam
ihsin a kai peih lo ih, tulai hi Material Sciences, Nanyang
Technological University, Singapore-ah tlawngkai ding in exam sin ter
ding a si.

   2007 CHRISTMAS HMANDAN DING

  A hmun
            Pathian in 2007 Christmas can hmang thei dingin lam in
hruai ih a lungawi um. Tui kum X-Mas cu kan biakinn ah kan mipi kan
tlem lo ding ruangah hmundang feh in hmang dingah Upa pawl in an
relcat. Cumi thuhla tawlrel dingah Rev. No Bual Hrang, Pathuam le
Johnson Van Lal Lian cu Kuchai Lama ah an feh. LCF Advisor sapte ih
nau Andrew Pate le James Wong thawn an tawngaw. Cutin an hnenah hman
a remcan thu an rak sim.

  Sumpai

  9 December 2007 ah Pate le Mr Wong in Upa pawl meetingnak ah thuhla
rel fel theh zo a si. Kuchai Lama hi KL kan Biakinn ihsin Texi to
ahcun a tambik RM-10 a cem ding. Asinan kan zaten Bus thawn pawksuak
ding kan si. Christmas ruaithehnak (rawl) ding hrangah RM 3,000.00 cu
Mr. Wong (Pate pu) in in tum sak ding. Bus man  RM 2,400.00 cu an
kawhhran in in pek sak ding. Anzate parah lungawinak sim cawk lo kan
nei. Pathian hi kan parah a tha. Kan nih mipi cu a feh ding lawng
tuanvo kan nei.

  Mipum

  2003 kum ah LCF kan zaten Ramsa hmuan (Zoo Negara ) ah kan rak
hmang . Mi 250 kan rak kim theiih a tikcu le can ih zir in kan rak
tam nasa. Tuikum cu Pathian in damten lam in hruai dingih mi 600 –

            1,000 karlak kan si ding ti zum a um. Ziangah tile
zarhtin khawm awktu  350 – 400 kan si ih tlun ah Christmas cu mi kan
tam ringring. Kuchai Lama kinagkap khal ah kan Falam mi Biakinn ih
rak khawm thei dah lo mi tampi an um. Tuitum ih X-Mas kan hmandan
ding kan zoh a sile minung tam theitawp in hmang ding kan si ruangah
mah lawng in feh mai lo in rualpi sawm cio uhsi. Zumtu X-mas hman a
duh ko nan rualpi nei lem lo, sumapai harsa deuh tivek simaw an um
thei men. Cupawl hmuahhmuah rak hruaii uh. LCF in welcome a si. Amah
lawngte kan biaknak, kan zumnak thawn a mil awk lo in zuri sabah
tivek cu um lo hram dingah zangfah kan lo dil cia.

  Fehdan ding

              25 December 2007 zing AM 10-11 karlak caan ah kan
Biakinn (JLN Bukit Bintang) ihsin feh ding a si. Atikcu khel in a rak
thleng lo tu pawl cu mahten feh ding a si. ziangahtile Bus feh can
ding relfel cia le Booking cia a si zo. Khawhla deuh ihsin a feh duh
le riak duh hrangah 24 December zan ihsin Kuchai Lama le  LCF Quater
ah riah theih a si. Mahte a fehtu le lamzin sut duh pawl hrangah a
hnuailam contact nak ah nan rak sut thei.

  Pate 017- 4294887, 012- 9081901

  Christmas Cibai buknak

              Yangon khuapi ihsin ka suahsemmnak le ka suul phumnak
Lairam: Laizo-Zalai khuate berek ah ka hung tlungta. Sunghno ka nu le
suah seempi sungkhat unau pawl ka hung tongtaa.

  Pathian Hnattuan sunglawi ka hramthwhnak Falam Baptist Church,
Falam, Chin State ah Zingpit Thlacam [Dawn Prayer] ah mitampi kan
tong aw cupco ih lungawi um nasa!

  FCC hohatnak in Khrismas Thuthangttha Phuannak December thlakhat
sung Acozah siannak in FBC Biakinn pi in an nei ringring. Pawl tinkim
ih Pastor tthattha in thuthangttha an phuang. Kei tla rinlopi le
ruahban lopi in tuih zing ( Dec.12) zing 5:30-6:00 a.m. Khrismas
huthangttha “Khrismas Hmangfuhtu” thulu hmang in simphuannak caanttha
ka ngah ve. Pathian ka thangtthat ih hotu Rev. Lian Ci parah ka
lungawizet.

  FBA General Secretary Rev. T. Sui Lian ih duhdawtnak in FBA Jeep
thawn Kalay ka suk. Atu hi Tahan Titsaaoo Internet Cafe ihsin
Khrismas Cibai ka lo buk hngai a si.

  Lungawinak tumpi thawn,
  Saya Run

  Lungleng Khristmas    (Nitin Thlarau rawl )
   Isaiah 53:1-6
              Riahsiatnak le sunralnak tongtu pawl hrangah lunglen
Khrismas khawmnak tuahtu kawhhran an tthang vingvo. Himi nomnak caan
hi lungawinak luangter caan asinan thinlung kek-kuainak tongtu
hrangah riahsiatnak a besiatter sin tawk a um.

      Associated Press thuthang ih nganmi cahram sungah, lunglen
Khrismas thu ah, “Pathian hmai ah ra in riahsiatnak, thinpemnak le
lunglennak Pathian hnenih peeknak caan tha a si.” tiah a sim. Mi
pakhat in a bet, “Tahnak hmun ttha khal a si, zohman, poi an ti lo
ding” tiah a ti.

        Khrismas tikcu ah Isaiah ih sim sungmi Messiah suahnak thu,
Nunau no pakh at in fa a vun dingih fapa a hring ding (Isa.7:14) ih,
Amah cu, “Mangbangza, Remruattu, Acakmi Pathian, Kumkhua ih Pa,
Daihnak Siangpahrang (Isa. 9:6) tiah kawh a si ding timi kan siar
ttheu. Ziang siseh Isai 53 sungih bet ve sehla  a ttha. “Amah cu kan
hmuhsuammi le hnonmi a si…kan zonzaih le natnak tuartu a
si.Hriamhma a putnak cu kan damnak a si”(cc. 3-5). Saam cangantu
in, “[Bawipa] in thinlung kuaimi pawl a damter ih, an hma pawl a
tuamsak”(Saam 147:3) a ti.  Tuih Khrismas ah thinharnak na nei asile
ciing aw. Jesuh cu in ruun dingah, in bawm dingah le in damter dingah
a ra.

   Na nunnak thimnak in a kulh ih,
  Na bei a dong zik tikah;
  Pelh lo Khrih duhdawtnak ciing in,
  Ring aw, Amaih rintlak humhimnak.
  Jesuh in zaangfahnak tikhu a peek,
  riahsiatnak nelrawn sungah.

  FALAM PAWL…JESUH ZIANGTIN KAN HMUAK VE DING?
  Saya Kawl Lian

  December (Christmas) thla asi ruangah a tikcu thawi a milaw bikmi
thuhla ruat khawm sehla tin thu ka satcat. Asile, kha law………
  Piangthar zo pakhatin Missiah kan timi Jesuh hi ziangti ih a hmuah
le a tha pei? Amai lei tisa duh dan le hiarhar danih a hmuah le a tha
pei maw thalo? Jesuh timi hmin sullam theilo ih tlangleng kan tam tuk
lai lo maw?Ziangha a sullam kha? Na thei ko maw?
  Jesuh ih nu Mary cu Pathian a zum zettu le mi thianghlim zet pakhat
asi. Pathian ih tawng le thusuak mi pohpoh za ah za a pawmtu le a zum
ngamtu asi. A pa Josef khal Pathian zumtu mitha zet pakhat asi. Hite
pahnih hi lei tisa lamih Jesuh ih nu le pa si dingin Pathian in
ruahman cia mi asi. Josef lawng Mary neihlo a tum lawkih tlan suah a
tum rero nan a tlan suak thei cuang lo.Pathian in a mangih thu a sim
tikah cumi thu vek zawmlo le tuahlo cu a ngaingam hrimhrim loa si kha.
  Kanni Laimi pawl in Christmas hi a nuam zawngin maw kan hman
tlangpi hai? A nuam zawngih Mirang(khawvel mi) pawl vekih kan hman hi
a tam sawn asi ka zum. A hleice in Lai mino a  tam sawn cu a  rui le
rei lamzawngih can rak khawhral a tamaw duh zet theu.

  Mary cu a thinlung a thian ruangah rundamtu Jesuh pai dingin le
hring dingin Pathian in a hril. Kanni Laimi, falam tawng a hmang pawl
teh hi kan thinlung a thiangfai tawk ko maw? Pakhat le pakhat a
iksikaw na le a hekaw na in kan khawsa ruiri sawn asilo maw?
Thianhlim nak timi hi hnamdang hrangah lawng maw kan ret ding?
Sihlah, Pathian in Laimi pawl in pek mi ah a tel ve. In pek zo mi
asiih a hman ding lawngte kan tuanvo asi.
  Kan Falam mi pawlih nuntu khawsak dan pawl hi ka zoh rero theu.
Keimah le keimah khal ka mangbang zet can a tam zet theu. A cancan cu
ziangruangah kannih pawl hi Pathian in in rak tuah? A hrangah kan
hnawksak sawn lo maw? ti tiangtiangih ka   ruah can tla a um ve.
              Laimi, Falam tawng hmang pawl hi hrinhnam kan tam ko.
Asinan, hitivekih kan buai rero tla hi kan Pathian ih duh zawng tak
teh sihen i tur maw? Ka zum lemlo.Kei Simfa,Zahau, Zangiat,
Ngawn,Tlaisun tvk….ti lam zawngih buai tuk hi thil at thlak asi.
Hitivek lamih kan hnuh caih awk tuk asile Pathian kan zum nak lamah
tla kan thlarau inti cak lo tu ah a tang theu ti teh kan ruat dah hai
maw?Kohhran pakhat ih Pastor pakhat si duh men le mai ei le in hmuh
nak ding duh ruang menih hrin le hnam thil kan tawlrel asi ah cun a
pawi zet ding.Cutivek Pastor Pathian hna ka tuan a titu kha a
ranglamih a puantawm telterih a inn lamih tlunter a tha sawn ding
tiah ka ruat.Khawtlang lamah veng Lal le Hruaitu pakhat khat si duh
ruang menih a hrinhnam zawngih kan puahawk buai asile rei a daih
cuang lo dingih cutivekih a tawlreltu cu Pathian thei taktak lo asi a
zum umih amah le amah a ti mualpho aw rero zo ti a theih awk a tha
zet  ding.

              Kannih Laimi pawl hi Kohhran le Pawlkawm tivekih
hruaitu thlanawk nak ding a hun um ziarzo khal le anih cu kan hruaitu
dingah a tling, a tawk tilam  silo in anih cu kan hrin,kan hnam/kan
khuapi  asi ih kan thlantlin tengteng a tul tivekih boruak kan hai le
kan cawklet theu mi pawl hiteh Messiah ih duh dan a si thei pei maw?
Naute Jesuh hi ziang theilo menah maw na ret ding?A hmin kha…..
Mangbangza Remruattu,Daih nak Siangpahrang, Kumkhaw Pa… ti asi kha!
Na hngilh pangah cun a pawi deuh ke.
   Mipi hrangih daih nak thlentu maw nasi/buai nak suaktertu? Kan
miphun lakih daih nak thlen tertu hicu mi pahnihkhat lawng ansi ding
tiah ka ruat. Buai nak le hnaihnawk nak a phunphun thlentu hi kan si
tlangpi in ka hmu aw. A dik maw dik lo? Ruat hnik law.

  Falam mi u le nau pawl, kan thinlung hi thiangter thlang uhsi. A
tullo mi hrinhnam le suah nak  khua tivekah ri buai nawn hlah uhsi.
Cutin thinlung thiangte in kan rundamtu le kan Pathian JESUH kan
hmuak hlawhtling thei ding asi.

  ZUMTU HARHDAM TAHNAK
  Rev. Lal Tin Hre

  Thlarau-in a khat mi zumtu cu zingti’n an um? A harhdam mi zumtu
teh ziangvek a si?Thlarau mi kan ti mi tehziangvekminung pawl an si?
San duh dan a phunphun a um thei ko ding.

  Mi hrekkhatin Thlarau-in a khat mi pawl cun crusade le camping tuah
an uar zet ding kan ti men thei. A hrekin peknak lamah an cak ding
kan ti thei; a hrek lala-in thlacam an taima ding tiin simaw, lole,
mi duhdaw thiam zet a si ding kan ti men thei. Culo tal le, mission
hnatuannak lamah an cak ding ti khalin kan ti ko ding. Diknak zawn a
um ciar ding nan a dang tel loin pakhat lawng cu a kim thei lo ding.
Hi thu hi Dungthluntu cabu sungah fiangten kan hmu thei.

  Dungthluntu cabu hi Baibal thiam pawl cun kan Baibal sungih cabu
thupi bik pakhat a si an ti. Ziangahtile, zumtu nun feh vivo dan ding
lam sialtu le zohthim ding bik, Kawhhran thuanthu kan neihsun mi a
si. Ziangti’n Kawhhran a rak ding thawk ih ziangti’n a thangso; zumtu
pawlin ziangti’n Krih Thuthang Tha an rak nunpi ti pawl fiang zetin
in sim. Curuangah, Kawhhran le zumtu bulpak nun bihawknak ding
thlalang tha bik cu Dungthluntu cabu hi a si an ti.

   A sim lam khal, a ngan lam khal thiam zet, mithiam Martyn Lloyd
Jones cun, “Dungthluntu cabu hi cabu dang hmuahhmuah lakih ropi bik
le hmual a nei bik mi a si ih a sung thuah hin um hramhram uh tiah ka
lo fawrh; ziangahtile, Thlarau lam nun thuk a um ti fiangten ka thei”
a rak ti.Bung 2 thu kan sair tikah cangantu, Luke in thil pathum a
langter duh mi kan hmu. Cucu a cabu pumpi tawh kaitu bik an si.
Thlarau Thianghlim huham (c.1-13), cui Thlarau-ih cangvaihna (c. 14-
41), le zumtu pawlih nunkhawm dan (c. 42-47). A sullam cu Pentecost
ni-ih zumtu pawl thanso dan kan hmuh mi cu tam lam (quantitative) le
a thatnak lam (qualitative) kawpih thangso an si ti kan hmu. Minung
an tam zutzo ih an phur ciammam menmen  a si lo, an sungmu lam khalah
thatnak lamah an thangso. Phun dangih kan sim le an than dan a
harhdam, Kawhhran harhdam an si kan ti thei. Cuti kan ti theinak, an
nun dan zohthim ding phun 4-in kan hmu thei.

            1. Zir rero nun: Zumtu hmaisa pawl cu an sual an rim ih
Kristian an si veten apostle pawl hnen ihsin nasa zetin an zir, thu
an ngai ih an zir-aw vivo ti kan hmu. Thlarau lamih an hruaitu, kan
Bawipa Jesuhin ni 40 sung lai thu a fah mi pawl kehramah an pe lutaw
thei kha zohthim an tlak zet. Thungai thu zir duhnak lamah an nun an
pe-aw.

  An phur ciamco ih mi dangih theihpi ban lo mi Pathian pawlnak an co
a si hmanah theih bet ding thu lamah an thinlung an pe. Zirnak le
theihnak cu zianghman a si lo an ti ve lo. Thlarau Thianghlimih khat
nun an neih hnu khalah zir bet ding a tam zia an thei deuhdeuh. An
thu theihnak karhzaitertu lawng si loin anmai nun remthatnak ding le
Pathian hna an tuannakah hmual nei sinsin dingin an zir. Curuangah,
Dungthluntu cabu hin thu zirh, thu sim hi thupi zetin a ruat ih a bu
pumpi-ih 25% hrawng cu culam hawi an si. Billy Graham in mi pakhat,
Pastor kum rei nawn tuan zo, mithiam, kum pa lam deuh hnenin cakuat a
ngah. Hitin a ngan, “Kum 3 hrawng tikcu nei lai sehla kum 2 sung cu
zirnakah ka can ka hmang ding ih kum 1 cu Pathian hnatuannakah ka
hmang ding nan!” tiin. Pathian thu zir a tul lo kan ti theu kha cu a
tulzia theih lo thu deuh a rak si.

  Kawhhran/zumtu-in Pathian thu (Bible, thurin, nun dan) zir a
thlahdah a si le a harhdam nawn lo tinak a si. Sam ngantu-in, “Na thu
cu ka ke hrangah mei inn a si ih ka lamzin hrangah tleunak a si” (Sam
119.105). Martin Luther in hitin a sim dah: “Bible cu a nung mi a si
ih ka hnenah thu i sim theu; ke a nei ih ka hmailamah a feh, kut a
nei ih thlah loin i kai ringring” tiin. Thu theihnak lamih zir vivo a
tul vekin nun zir hi a thupi zet; thih lai hlan lo nuncan le zia hi
zir vivo ding a si. Fakim zetih  theihawk ih ziraw nawn lo nun cu nun
duhnung a si thei lo.

  2. Hlawmawk Nun: Zumtu hmaisa pawl nunih duhnung zet pakhat cu
hlawmawk nun (koinonia kha a si. Hi bung cang tawite sungah tu le tu
a ngan lang mi a si.Zumtu harhdam cun Pathianthawi an pehtlaihawknak
lawngin a tawk hrih lo, zumtu dang thawi pehtlaihawknak tha neih hi
thupi zetin a ruat. Cu mi a langnak cu an thil neih mi an hlawmaw,
hmun khat te-ah an ei tlang, an inn lamah siseh, Temple ah siseh
lungrual zetin hlawmawk nun an hmang. Rawl menmen a si khal le
Bawipai Zanriah a si khal le mai ta bul thinlung an nei lo.
Duhdawtnak tirawl a si theh. Ti lo theih lo phun khal a si lo, anmai
duh thuih tuah an si kha.

   John Chrysostom in tawngkam mawi zetin, “Khavek nun kha vancung mi
pawl khawsak dan a rak si, keimai bul ta a si an ti lo; hamtamnak
sual a um lo. Zohmanin an cuhhelh lo, an ham fawn lo, an iksikaw fawn
lo, an hngalpi fawn lo. Rethei zawnzai pawl hrangah ningzahnak a um
lo, mi lian pawl hrangah puarthaunakin hmun a nei fawn lo” a rak
ti.Mi dang thawn a rualrem thei lo mi zumtu, member pakhat le pakhat
a remaw thei lo mi Kawhhran cu a dam lo tinak a si. Lam tang nei
Kawhhran hmuh ding tampi a um ko; kawhhran nuam an si thei dah lo
ding. Mi dang thawn rualremaw thei remrem lo mi piangthar/zumtu a um
thei a si hmanah nun duhnung cu a si lo ding. John Wesley phei
cun, “Mahte peu hmang tuk Kristian tlukih Kristian lo an um zik lo” a
ti men. Mahte lawng nun duhnak (individualism) lungput a karhzai
vivonak ramah ziangtlukin kan tul sinsin.

   3. Pathian Biak paih nun: Minung kan harhdam tikah kan ril a rawng
cingcing; kan nat tikah rawk ei kan cak thei lo. A harhdam mi
Kawhhran cun Pathian biak duhnak a nei ringring. Zumtu Kawhhran
hmaisa mpawl cu ni tin Temple-ah Pathian bia-in an feh ringring.
Pathian cu kan inn  pindan khalah, khui khalah kan be thei ko nan
biak inn cu Amah biaknak dingih serh thianghlim mi a si vekin hmun
khat te-ah biak innah fehin Pathian kan thangthat khawm hi zumtu
hmaisa pawl nun dan a si. Khawm a thlahdahaw mi zumtu kan pungzai
deuhdeuh, ruah that a tul zet. Ram thansonakah rawl ei phah phahin,
mai insungsang ihsin ziangkim zoh a theih tiin Pathian biak khawm an
thlahdah thu vawi tampi kan thei. Mai kathawtnak vekin mai duh danih
biak a theih laiah Kawhhranin a tuah mi biak dan hmangih pathian biak
hi thlahthlam ding a si lo.

  Cun, Pathian biak ti mi hi biak innah fehin zo hnenin simaw,
Thlarau lam thazang ngah ding rori-in kan feh a si le a dik lo ding.
Kan duh vekih thusim thiamin thu a sim lo tikah ka hlawhsam kan ti ko
ding. Biak ti mi cu kanmah tu sawn Pathian hnenah kan hlanaw ih a
duhzawng tuan dingin kan pum kan pe-aw, kanmahin amah kan va be sawn
ti lam khalin ruah a tul. Zumtu/Kawhhran harhdam tahnak pakhat cu
ziangtlukin Pathian thawn an pawlaw ti hi a si.

  4. Fehsuahpi nun: “Vancungah Jesuh a kai ih Thlarau Thainghlim a
rung tum; cule Kawhhran/zumtu a feh suak” an ti theu. Hi thu hin a
fun kim zetin ka thei. Jesuh zarah rundamin kan um ih kan nun
caktertu ding Thlarau Thianghlim kan co; cu mi cu topi men loin
fehsuahpi (evangelism) ding a sizia a lang fiang. An tahthim theu mi,
tidai luang lo cu a thu a nam ti a si. Zumtu nun fehsuak thei lo; sim
le phuannakih hmangaw dah lo cu rawl ei rero, daileng dah lo thawn a
bangaw ding. A harhdam ngaingai thei lo ding. Kan zir, kan theih le
kan co mi (inreach) hmuahhmuah hi fehsuahpi (outreach) ding khi a si.
Cule a sa-sukaw tawk ding.

  Mai nun lawng lungawi tawk, mi dang hlawm venak cang thiam lo zumtu
cu a harhdam ding zatin a harhdam thei lo ding. Amahlawngte, kan feh
suak dan ding cu a phunphunin a um ding. A sim khalin a si thei, a
ngan khalin, a pek khalin a si thei, missionary thlah khalin a si
thei. Mahih tuah mi lawng thupi bikah retin mi dang tuah dan parih
lungkim thei lo tivek lawngte  thinlung bit hna le Pathian covo pek
kauhzia theih lo thu a si thei. Curuangah, mai tithei mimi hmangih
fehsuah ding a si bik. Cutivek nun an neih ruangah “Ni tinten Bawipa
in an pawlah rundam mi dang a bet vivo” (c.47).

  A netnak: Tawi teten zumtu harhdam tahnak 4 te kan hun tarlang ih
hi mi lo khal tampi a um lai ko ding. Tui sun Pathian thu
hlawmawknakih a tel/siartu kan zaten hi thil 4 hi kan nun bihawknakih
kan hmanah cun a thahnem zet ding ti’n ka ruat. Malsawmnak cu Pathian
kutah a um ih Amai hrangih nung le a harhdam mi zumtu si cio dingin
kan zate hrangah malza in sawm sak seh. Amen

Comments

comments

Comments

%d bloggers like this: