Hruaitu tulmi

HRUAITU  KAN TUL MI

By: Hniangsinpa

 

Veikhat cu Tlangleng zungpi ihsin ka tlung zik ih, tlangleng ka to ding mi kha a netabik ding a si, a zan thlang fawn, a totu ding zo cio khal manhlap helhel kan si cio. Dingin a sangsang in kan tlar aw ih, kei kha a hmaisabik ka si. Hngakhlap zet ih kan rak hngah mi tlangleng cu a rung suak lunlo, ka hmaizawn ah a sangka a rung ret ih, a hmaisabik ih ding ti ta fam cu, ka dung lam pawl in nasa zet in in run tul ih, tlangleng sangka hman a ong aw hrih lo, sangka a run on ngaingai cun, manhlap zet le suah man lo phang in tlangleng totu pawl cu an rung suak, kannih a rak hngaktu pawl khal luh man lo phangah kan hnok celcel. Ka dung lam ding pawl in nasa zet ih in tul ruangah, tum lo piin, pacing pa pakhat ra suak ding cu ka hei bah, anih manhlap zet ti cun, ka om ah I lak lok ih, “ziangah in tul?” in ti, kei khal ka mawh ih ka theih lo ruangah, “Na hmu lo maw, ka dung lam pawl in in tul a si kha” tiah thinheng ve zet cun ka rak sawn.

Tlangleng sungih hmeltheih kawm ding neilo ti cu, ka ruahnak ka kawm ih, mitu te ka par ih thil thleng kha ka vawn ruat sal, ‘Ka mawh in ka thei aw lo nan, ka mawh deuh ko’ tiah ka ruat aw. A san cu, ka umnak kha a rak dik tawk lo deuh, a hmaisabik ih ding ding kha ka rak si lo, a dung lam ah din sehla cu, a hmaisabik tuartu ding kha ka si lo, tiah ka ruahnak ka kawm rero laiah, kan Laimi dinhmun cu keivek tuahsuah thei lo khal va si hman nung la ka vawn ruat lo thei lo.

Hotu cu kan tul ko e, hmansehla Hruaitu tha hi ka va tul so. Ka nei lo ka tinak lam cu a si lo nan, Hruaitu a hmaisabik ih feh fohfoh thei, dunglam hruaimi pawl tulnak ruangah mi kawk le hro hman tuar ngam tu, a hmaisabik ih um ngam. Dunglam mipi tulnak ruangih, mi relsiat le simsiat nak khal tuar ngamtu, dunglam mipi tulnak ruangih ngam zet ih pah tlang ngam. Mai hamthatnak ruat lo ih, dunglam mipi pawl harsatnak le tlaksam mi theithiam le tuahsuak thiam tu hi tam sinsin um thei sehla tiah ka ruat.

Veitam zet cu seminar le trainingnak kan nei theu, kan upa pawl in Hruaitu le hotu sinak khal in sim fiang theu ko nan, tlin ngai tuah le tuan suah hi a har zet ko ding nan, cumi hmuahhmuah khal dunglam mipi tulnak ruangah pah tlang ngam tu, hmailam can ruat ih, a tulnak hmun ih, tangdawr nun nei ngam tu, relsiat nak khal phur ngamtu kan tul.

Dunglam mipi pawl ih kan tulmi cu, a parih ka ngan mi vek hruaitu an si, cu mi cu um sehla, an hruainak hnuaiah kannih mipi pawl kan kun ngam, mipi in an hruainak hnuaiih kan kun ngam lonak hruaitu pawl ruangah mipi kan hlo ih, kan cavai ih, thlun ding kan hmuh lo ruangah kan hna ih kan theimi thu tawi tete thawn kan nun ruang ahhin ziamral lam kan pan ih, lungruallonak, duhsakawklonak, rinum theilonak tiangin kan parah a thleng tihi kan hruaitu pawl ih an theih suah ni ahcun, kan par Vanbawi tiang hmanin lungawinak darkhing in tum sak dingih, van mipi hlarem kan sak ban ding ti hi ka ruat.

Comments

comments

Comments

%d bloggers like this: