Hruaitu Thuthang Issue 218

HRUAITU THUTHANGCA

ISSUE 218 NAK

JANUARY 11, 2009

Editorial

Duhdawtnak phun li

Greek pawl cun duhdawtnak hi phun 4 in an simfiang. Pathian duhdawtnak, Pa Pathian in milai in duhdawtnak cu ‘Agape’ ti a si. Hih hi minung le minung kar lakih tahtthim thei lo le milai in Pathian hrangih kan bak ringringmi duhdawtnak cu a si. Nu le pa in induhdawtnak hi ‘Storge’ an ti. Cucu zokhal in kan nei ih, a tam le a mal deuh tiah tahnak felfai zet a um lo. Inn sungsang nuam si ding in ‘Storge’ duhdawtnak hi kan ttul zetmi a si. Bulpak cio nun dan in faate duhdawtnak a bang aw loih, a cen aw lo. Pathumnak cu rualpi le unau kar lakih duhdawtnak ‘Phillos’ a si. Hnattuan khawmnak, pawlkom le kawhhran sung, rualpi le veng hnen pawl parih duhdawtnak, mai’ khawpi duhdawtnak khal a si. Tlangval le fala duhdawt awknak hi ‘Eros’ an ti. Hih hi cu siangpahrang ‘Solomon’ hman in theih thiam har zetmi tiah a sim. Fala tlang duhdawtnak cu khatlam ihsin ‘nunau mipatnak tiang’ fehsual thei, milai pakhat le pakhat thik awknak umter thei a si. Netabik ih kan theih ding cu ram le miphun duhdawtnak ‘Patriotism’ a si. Hih hi ram le miphun hrangih thih ngamnak le nunnak liamih tuar zuamnak tiang a si. Asinan, hih patriotism hi sim awk le zirh awk ttulmi a si ruangah mi hmuahhmuah theihthiam le nunpi mi cu a si lo. Miphun dang ruangih harnak kan tawng tikah a rung lang mi a si tlangpi.

A tlunih kan nganmi duhdawtnak a phunphun khi zoh khawm sehla, ‘Agape’ thinlung nei ban loin Pathian hna kan ttuan ngaingai maw? Mai’ pum cawmnak le hmin tthatnak ding lawng in Pathian hna kan ttuan pang maw? Storge khi zoh in, Faate hrang hnakih mai’ nawmnak lawng tuah ringringtu, zu le sa, midang thawn nunau mipatnak hmang thei rero teh kan si pang maw? Kan fa le hrangah teh thla kan cam dah maw? Phillos vekin rualpi unau sungkhat le hnattuanpi pawl teh kan duhdawt ngaingai maw? Annih cun thilttha ngah lo khal sehla, kei in ka ngah ahcun a tawk.. tiah ruahnak kan nei sual pang maw? Harnak tawng hnu lawngah Phillos hi kan langter dah maw? ‘Eros’ falat tlangvalnak lamah teh ‘Pathian mithmai ah kan mawi maw?” Kan duh ngaingai lo khal kan thlun rero pang maw? Tulai san ‘Nawmnak’ duh ruangih duhdawt aw teh kan si pang maw? Ram le miphun duhdawwtnak ‘Patriotism’ teh kan nei maw? Zirh le sim rero kan ttul lai maw? Hih suhnak pawl hi mah le mah zoh awknak ding ah rak hmang ve aw. Ziangvek dinhmun ah kan um? Lai miphun zumtu kan zate’n duhdawtnak dik le felfai zetin pawl aw thei uh si..!!

Bezai

NEHTU

Van Member

Raal ramih raal nehtu Ral bawi

Boxing, Wrestling ih champion

Bawhlung sit, Bawhlung bengh

Khir le dawp, pet le tlan

Zuam awknak pawlih nehtu

Uktu Bawi, Lal tohkham

Cuh awknak ih nehtu

Thazaang hriamhrei, thilri thawn

Ruahnak thluak, fimnak tongkam thawn..

Hminthatnak laksawng

Taikhap, lukhum, hngawng orh

Lem zuk, hnipuan, ngun sui

Hlawn thil man khung sumpai

Capi cate hminsinnak COTU PAWL

An comi nehnak a hmun lo

Ni khatkhat ah an sung sal thei

Nehtu anmah rori tla an thi thei

Mi hmuahhmuah ih an neh thei lomi

Thihnak NEHTU cu Jesuh a si

A sung sal nawn lo, kumkhua in a neh lan ta

Nehtu Jesuh ih Nehnak cotu

Nehtu ih Nehtu si kan si.

LAIRAM HRANGAH

-C.Ram Lian Uk

Parmawi thatha, thingthei phuntling

Thingcung vaphun, satil sunghnam phunphun

Cerhti thiang le zilthli nemte hrannak

Mifim le miraltha suahnak

LAIRAM ti’h

Kan rel kengkeng theumi

Lairam hnianghnite khi

Mitthlam in cuan ve hman law.

Na lungthin a lo sun ko lo maw . . . ?

Nang laihrin fahniang, tuamhlawm a tul zetmi

Sunghno na nu Lairam te khi,

Kutsih in maw na zoh cuahco hrih ding . . ?

LAIRAM hrangah SALAI le MAI . . . ???

Sermon

Kum Thar Thlacam

– Rev. Run Cung Mang

Jabez cun Israel ih Pathian hnenah thla a cam; “Bawipa, i thluasuah hram aw, ram kaupi i pe aw. Ka hnenah um awla, tuahmawhnak le harsatnak ka ton lonak dingah in humhim aw” a ti. Curuangah Pathian cun a ngenmi vekin a pek.  – 1Sansiarnak 4:10

Thuhmaihruai

Pathian kut cak ih humhim le lamhruainak ruangah Kum Hlun 2008 lan le kaan thei in, Kum Thar 2009 sungah damcak lungawi te’n kan lut thei hi lungawiza ngaingai a si. Innsang le zung ih taarmi Nithlasiar (Calendar) pawl a hlun thlong in a thar thlengh ih taar a si. Nitin hmuhtonmi hminsinnak Diary le Note Book khal a hlun re tahrat in a thar thlengh a si thluh. Mi hrekkhat cun inn sungsang thilri ret daan tiang pianza (design) dangin thlengh le ceimawi ih rem a si. Lungawinak thar, tumtahnak thar, nun daan ziaza thar in hmailam nor a si thlang. Kan zate’n Kum Thar thlacamnak thawn Khrih le Kawhhran hrang thlarau thazaang laak in hmainor cio dingah ka lo sawm. Jabez ih thlacam hi kan Kum Thar thlacam si ve hramseh!

1. Bawipa i thluasuah hram aw.

Mikip ih kan duhbikmi cu thluasuah vanluhnak hi a sibik ko. Tisa daan in siseh, thlarau daan in siseh, Pathian ih thluasuahnak kan ngah ding hi a thupibik hleice. Thlusuah kan ti tikah: Taksa damnak le thlarau damnak, lennak le neihnunnak, hnattuan remcaannak, tumtah le saduhthah hlawhtlinnak ti’n tampi a um. Jabez in, “Bawipa, i thluasuah hram aw” a ti bangin kannih tla Pathian theitu, duhtu, zumhngettu le rinsantu kan si bangin Pathian hnenah thinlung takin “Bawipa i thluasuah hram aw” ti ih thlacam ding kan si. Jabez ih thlacamnak ngaisaktu kan Pathian cun zumnak hngetkhoh le rinsannak taktak a neitu a fahniang pawl ih thlacamnak cu in ngaisak dingih lei thluasuah van thluasuah in pe ding a si.

2. Ram kaupi i pe aw.”

Jabez in ram kaupi i pe aw ti’n thla a cam tikah Pathian in a pe ti kan hmu. Leilung tlun daan ih kan umnak ding, kan hnattuannak ding hrangah leiram kaupi ngah ding khal a thupi ih thlarau nun hrangah Pathian hrangih kan hnattuan theinak ram kaupi dil ding tla kan si. Tuni ah kannih Laimi, kan Falam mi pawl tla ramtin le hmuntin ah kan thleng ih kan leiram hi a kauzet ngaingai thlang ka ti. Cubangin Pathian hrangih kan nun theinak ding, kan miphun hrangih hna tampi kan ttuan theinak ding tla ram kaupi kan nei zo a si. Kan Lairam ih kan umlai hnakin miphun dangdang zum lotu mi tampi hnenah Pathian Thu sim theinak le rundamnak thuthangttha phuan theinak, mission hna ttuan theinak caan ttha tampi kan ngah. Ramleeng kan thlen hi nunnom ceennak le uar awknak, hngalnak men ah hmang sualtu si loin, Pathian rinsan in Khrih le miphun hrangah hnattuan sunglawi tamsin kan ttuan theinak dingah hmang thei dingin thlacam uhsi!

3. Ka hnenah um aw.”

Jabez in Bawipa hnenah, “ka hnenah um aw” ti’n a dil ngenmi hi duh a nung ngaingai. Tulai ah zumtu tampi hi Nipi Ni Biakinn ih khawm caan lawng ah Pathian thawn ton awk le um tlang kan duh ih ni dang le caan dang ahcun mahte lawng tisa duhnak nom ceennak ih um kan duh sawn ttheu a bang. Pathian ih umpit ding hi a ttih sawntu tla an um ding a bang ti’n ka ruat. Bible siar hnakin leitlun thuthang ca dangdang siar kan zuam sawn, Pathian hnenih tthenhra tthenkhat pek hnakin mai’ dangduh ei in le sinfen hrangih sumsaw hman nuam an ti sawn. Pathian biak khawmnak hmun ih feh hnakin it men, to men le TV, Video le zoh nuam le ngai nuam ah tikcu caan hman nuam an ti sawn. Pathian hnenih thlacam hnakin minung le mah le mah rinsan aw ih khawkhan lairel le cangvaih kan hmang. Ttih a nungzet. Pathian rinsan le been in Moses vekin, “Bawipa nang locun” a titu zumtu si zuam cio uhsi! Pathian ih umpinak hi hlawhtlinnak thuthup a si. Joseph le Joshua ih nunnak ihsin fiangzet in kan hmu thei. Jabez vekin, “Bawipa ka hnenah um aw,” ti’n kan sungza ih thlacam tlang uhsi!

4. Harsatnak ka ton lonak dingah i humhim aw.”

Hih leiram cu harsatnak ram a si. Ramtin le hmuntin ah minung pawl hi mah le mah lawng duh aw in, mai’ zawn lawng ruahnak hlir in a khat. Mai’ miatnak le hlawknak ngahnak ding ahcun midang va bum le va tisiat khal poi a ti lotu an tamtuk thlang. Rura rapthlak tak a si. Kan raalrin a ttul. Ahleice in Malaysia ahhin nitin tuahmawhnak le harsatnak a tam cuang ding a bang. Zumtu pawl tla kan thinlung put a thianghlim nawn lo a bang. Mibum le thuphan sim hi poi ah kan sa nawn lo ih mi nekrawk le mi miatca khal hi a daan ah kan   neih men thlang a bang. Kan zumnak kan thlau thlak zik zuakzo tla a bang. U le nau, rual le pi karlak hmanah zum awk ding le rin awk ding a har phah thlang hmang. Hivek ih tlaksiatnak, ttumsuknak sungih kan tlanleen tikah mah le mah humhim awk thei ding hi a har ngaingai ding. Curuangah Jabez vekin, “Bawipa i humhim hram aw” ti’n a sun a zaan in thlacam uhsi!

Thunetnak

Thlarau nun tthanlen pitlinnak tahfung tampi lakah, thlacam nun neih hi thupizet pakhat a si ve. Nitin seken, minit le nazi, ni le zarh-thla-kum tluan kan nunnak fingfing ah, Pathian a theitu, a ttihzahtu, a zumhngettu, a rinsantu le a hnenah bomnak dilngen ih thlacamtu kan si ding a thupi ngaingai. Kan san hi san siava taktak a si. Caan netabik kan thleng ngaingai zo sokhaw. Daithlang le Pathian ziang siar lo le ngaihsak lo men in um aw hlah. Nitin Thlarau Rawl le Bible siar in, thlacam in caan hmang thlang aw. Jabez cun thinlung takin Pathian hnenih thla a cam tikah Pathian in a ngaisak. Cuvekin nang le kei tla thungai thlakin thla kan cam a si ahcun thukam pelh dah lo Pathian in kan aunak aw in ngaisang dingih kan dilngenmi leeng tiangin kan hrangah tthabik in thluasuah malza in sawm ding. Kan tumtahmi le kan lungthlitum saduhthah in hlawhtlinter ding, a dingfelnak vorhlam kutcak in in humhim dingih in kaihruai ding a si

Article

RUAL KAWM DAN

-Salai Kawl Lian

Hi tawngkam 3 hi tawng suakaw (Three things you must say)

Tuitumah Mirang tawng uar deuh nawnin kan hun telh. Zirlai hrekkhat pawlin mallai hlawknak anrak neih thei ve duh ruagnah a si.(Ca lettu)

Mi parih thil pakhat khat tha deuhih na tuah tikah mi na hipin na neh thei sinsin ding. (When you engage people better, you become more persuasive and influential).

1.Nang teh ziangtin na ruat/ruat ve? (How do you fell about that?)

“Keikhal na dinhmunah ding bang sehla na ruat/hmuh dan thiamthiam asi ve ko ding.” Curuangah hi thil hi ziangtin kan ruat tlangin kan relkhawm thei pei ?

“If I were you I would feel the same way.What can we do to address the issue together?”

2. “Kalo hmuhthiam pi zet.. cun..” (“I can see it from your point of view… “and”…) “Kalo lungkim pi”(I agree with you) nati asile na tanhmun(position) khuar miah na caklo tinak asi ding. “Kalo lungkimpi lo”(I’m not agree with you) nati fawn siri asile na theih thiampinak(empathy) na neilo ti asi lala fawn ding. Curuangah “Na tanhmun ihsi na hmuh dan hi kalo hmuh thiam pi zet.” … “asinan” tiih na vun ti hmanah na hnaihnawk tuk cuang lemlo ding. Cuti asile(…”and”…) ti hlirih na hmang asile amah sawn kha na lamah na hip in nan karlakih thinlung lamih ti tengtengih hmuh thiamawklonak na ti dem in a duhdan na tuahsakin a di na tiriam(conciliatory) thei sinsin ding. Cun …”Culo dang teh?” (is there more?) tiih na ti asile midang khalin anlo duhin duhdawtawknak na tuah thei sinsin ding.

3. “Kalo hmuh dan kalo sim ke, na titha zet.”(“I’ll tell you what I think you’re really good at” Thinlung sungril lamih theihthiampi awknak tuah ding a si(to build empathy).Na hna tuanpi na duh aiih na kawm nel theilo le nangmah lo nel tuk hrihlo tu kha a thatnak pakhatkhat kha thinlung takin a rualpi pakhatkhat hnenah rak pawrhaw. Cui a rualpi pawl cun a hnenah an sim leh tengteng ko ding.Cutikah cutivekih na pawrhnakih na tawngmi kha a hna ih a theih leh tikah a lungawi zet ding. Nangmah khal a lo ngaisan phah ding. A netnakah nan pahnih hrangah nelawk sinsin le duhdawtawk sinsin nak a si ding.

(Philip Hesketh ih nganmi kan theihthiam awl dan ding zawngih lehmi a si)

KHA RUH NATNAK

– Biak Chawn

Milai kan taksa ih ruh pakhat le pakhat a peh aw mi hmuahhmuah ah kan hman tambikmi ‘kha ruh natnak’ (Temporo-mandibular disorders) TMD thuhla hi kan ‘kha ruh’ le ‘lu ruh’ a peh awknak fel lo ruangah a si. Ha umnak tlun lam ‘maxilla’ le kharuh ‘mandible’ cu ‘lu ruh’ (skull) ah, hna (ear) hmai zawn ciah ah an peh aw ih, ‘taksa (muscle) le rubber bang tuk (cartilage) in an tuam ruangah kan ttong, kan hni, ka ei thei a si. Hih natnak hi leitlun milai 15% in an nei ih, kum 30 le 50 kar lak ahcun mipa hnakin nunau in an nei tam

Kha ruh natnak ‘TMD’ hi ziangruah ah a um? Kan ttong tam tuk ruangah maw, ha kan tthial ruangah le kau zet zetih kaa kan ang ruangah?! Kha ruh natnak umter theitu tlangpi cu: 1) Lehnak lamih khawng ngah pang ruang ah siseh, sual awknak ih khawngngah ruangah kha ruh peh awknak ah natnak a suak ih, tuah tthat lohli a ttha. 2) Kha ruh peh awknak tuamtu ‘Cartilage’ cu natnak pakhatkhat (bacteria) ruangah a hmaa thei. Nauhak lai ih ‘biang natnak’ khal in a siatsuah thei. 3) Hnattuan bang tuk ruangah zaan ih lai ah pacing pawl khal in ‘ha an rawt aw ter (grinding teeth) ih, kha ruh khal napi’n an cip (clenching jaws) ruangah ‘cartilage’ cu a tlek (tear) thei. 4) Nauhak le fala tlangval tiang in ‘chewing gum (pk)’ an tthial ringring ruangah kha ruh tuamtu ‘cartilage’ cun bang tuk (over work) ruangah natnak a tuah. 5) Ha boh ruangah hapi khatlam lawngih ei ding pakhatkhat tthial a si ih, hih hin kha ruh natnak a tuah thei. 6) Telephone thawn biak awk lai ah cuih telephone cu kutih kai loin liang (shoulder) le hna (ear) ah bet ternak dingah lu le liang hman tam tuk ahcun kha ruh natnak a suak thei. 7) Suahpi hmai ruh um dan fel lo (Congenital deformity of facial bone) ruangah khal TMD a um thei.

Kha ruh natnak theih dan tlangpi cu kaa hun ang zik zawngah ‘awn (click)’ a um ttheu. Asina’n, ‘awn’ a um mi pohpoh cu TMD an si thluh lo. Hna (ear) hmailam ah kha ruh peh awknak a na, hivek natnak hi TMD neitu 50% in an tawngmi a si. Hih hi hrekkhat cun hna natnak vekin an ruat. Hna a nat ahcun a kua le a hnuailam in a thawk ttheu. Raw lei lai ah natnak theih thei a si ih, TMD a neitu 80% cun lunat khal an nei ttheu. Hmai le kha ruh hrawng ah ‘tthawpnak’ a um ringring ih, mithmai a vaang thei lo. Cucu TMD natnak neitu 40% in an tuar. A cancan ahcun kaa ang ding khal a rem lo ih, cip sal khal a harsa. Hrekkhat hrang ahcun hna le hngawng thahri peh awknak a fel lo ruangah Kha ruh tuamtu cartilage cun a rak tuar ve ih, ttul lem lo khal ah kaa hun ang zuakzo a ttul.

Kha ruh peh awknak cu hna (ear) hmailam ciah ah a um ih, na kaa hun ang aw la, a peh awknak cekci cu a khuar ih, cucu kutzung in hun tawk sehla, TMD natnak neih le neih lo a theih thei lohli. TMD natnak na neih ahcun sibawi hnen ah fiangfai zetih thei ding in sut aw. Hrekkhat cun upat hnu ah hih natnak hi an buaipi ih, an kha ruh tiang a tla cingcing ti thei aw. Na kha ruh kilhimnak ding ah ‘thinheng zet in tlawk tam hlah, cucun kha ruh pehnak a tuamtu ‘cartilage’ cu a siatsuah ti thei rinring aw.

(Dr. YLM ih cangan ‘Painful Jaws’ ihsin lakmi a si.) Source: starhealth@thestar. com.my

· * * * * * * * * * * * *

2009 HRANG KA SUNMANG

-Salai Durbun

Thazang timi cu harhdam that lawngih a um theimi thil a si. Harhdam tha ding cun ti le rawl thatha ei a tul. Asinan, cui kan eimi ti le rawl cu vitamin thatha a si a tul ve thung ding. Vitamin A- Z kan ei hnu lawngah thazang thatha kan nei thei ding a si. Himi vitamin pawl hi a thlum, a al, a kha, thingthei rah, thinghnah a phunphun ihsin kan hmu thei. Vawikhat cu ram pakhatih ka hnatuan lai ah hnuhnun (papaya) zelh cia, fridge (vur vawm) ih retdaimi, thlum zurzo kha, a tulzat aiih tamin ka hun ei ciamco ih, a zan cu ek inn lamih tlan rero a tul thlang. Hnuhnun hi a tha zet ko na’n, keimah sawnin a ei dan cin tawk ka theih lo ruangah a si sawn. Cuvekin khi thingtheirah le hnah kan timi pawl khal khi pakhat lawng, tawng eiih kan ei ciamco ih a dang ei hna kan thiam thullo asi ahcun kan taksa harhdamnak hrang a rualremnak um lo in tlaksamnak neiin a um thei.

Nauhak lai ah thilthlum hi a tlangpi thu in ei kan duh cio. Nu le Pa fel pawl cun fale ei tawkten a pek hna an thiam. Asinan, a hrek cun fa le pawl kilkhawihna thiam loin an duh tawktawkin an ei ter haiih a tawpah an ha in a tuar thlang. Culawng siloin an hung upat hnu lam tiang khalin ha na neiin an um ti kan hmu thei. Kan suahsemnak khawte lam ahcun tlangval, nu le pa hrekkhat pawlin thau an duh zet hai. Ziangahtile, pum a hun cek (kiar) deuh cun miin milian (boss) deuhah in neih hai seh ti duh ruangah a si men thei. Asinan, tu ahcun cutivek lamih tan lak a tul loh zia khal an theih fiang ruangah an tuah vivo duh nawn lemlo. Cucu thil tha a si.

Pathian in kan kawhhran hrang hruaitu thar duh um zetzet in pek zo. Ziangahtile kawhhran member bulpak ciarih thlacamih tan laknak ruangah a si. Hi kan hruaitu pawl hi mipi tel loin ziangti hmanin an cangvai thei dah lo ding ti a fiang zet. Milai an si ve ih tlamtlinlonak a phunphun an nei hai ko ding. Cutikah khal mipi lam thotho in duhdawtnak tlamtling thawnin a tulmi tete khihhmuh awk le thinlung thianghlim teih faksel vivo aw thei theu sisehla, a tha zet. Nikum lamih tlamtlinlonak a phunphun kan rak neihmi pawl ihsin a zir dan kan thiam tlang peiih cutin Pathian le miphun hrangah nasa teih tuahsuah kan tum vivo pei .

Kum thar ihsin kawhhran hruaitu ( Upa, Nu, Mino) pawlin Pathian tihzahnak thawn le kan fim le thiamnak neihmi hmuah thawn ruat khawmin ro an rel pei . Cun, mipi lam ihsin khalin a tul dan ih zirin ruahnak thatha an la ringring thei tum ding. Cutin, taksa le thinlung hmunkhat pu in cak sinsin in Pathian le miphun hrangah hna kan tuan khawm thei ding hi a si.

A liam zo mi ih khat le khat hmuh thiamawk lo deuhnak le huat awknak pawl kha tifinriat ah kan hlawn thluh tum pei . Pathian rinsan in kan tumtahmi cu hlawhhling ding rori in kan tlan vivo a tul. Mah le mah duhdawt awk duhnak le bi zetih thinlung kan put theumi pawl khal thurban (pine apple) kan ei duh tik canih a hawng kan zelh ta tengteng vekin kan hlihfai ta thluh a tul. Mipi lam kan zate ih thazang pek awk ka duhmi khal a um. Laimi pawlih kan tlaksam zetmi pakhat cu hruaitu (Pathian ih hrilmi) pawlih thungai hi a si. Hruaitu pawlih kaihhruai dan (Pathian thu thawi a mil aw mi) a tha le a dik asi phawt ahcun an thungai ih thlun hliarhlo men ding a si. A diklomi a um asi lawngah Pathian tihzahnak in duhdawtnak thawn le thiltha a suah vivo theinak dingin hruaitu pawl sim le faksel awk ding cu kan tuah a tha. Culawngah Pathian khalin kan miphun hi tam sinsin in mal in sawm ding a si.

Ku 2009 hrangih tan kan lak khawm dingih ka duh zetmi pawl ka hun tarlang ve hnik pei . 1). Mah le bulpak cio ah thlarau thazang ngah kan tum pei .

2).Bulpak ihsin thawkin Thuthangtha phuan cio kan tum pei .

3).Kan miphun hrangah duhdawt awk dan le a tuan hna kan thiam thlang pei .

4).Calai (cahram a phunphun telnak zarhtin thuthangca le Thuthangtha phuannak ca te (pamphlet, booklet, flyer …tvk.) tuahih kan calai thansoh ter sinsin kan tum pei .

5). Kan kawhhran menber kan tam deuh thlang ruangah Pastor pakhat neih bet tum ding. (hlawh tam tham kan pe theilo asi hmanah volunteer nei thei ding tiangih thlacam ding) 6). Kum thawk lamah le kumcem lamah General meeting (mipi pungkhawmih thu rel khawmnak) tuah ding. A tul asiih hruaitu lamin a tul an ti asile hi ai tam khal neih thei a tha sinsin.

7).Malaysia ram sungih khawpi dangdangah LCF biak inn offically ih neibet thei dingih zuam sinsin kan tum pei .

8).Kan kawhhranih um Pathian hriakthihmi rawngbawltu pawl hi tui hnakin rawngbawlnak lamah kawhhranpi thawn tuan khawm thiam sinsin kan tum pei uh.

9). LCF Kuala Lumpur in office a neih zo mi hi tangkai zetih hman thei kan tum pei . 10).Kawhhran khawm tinte’n (a hleice in zarhpi khawm) music instrument kimte’n hla hruaitu in phur le thatho zet in hruai thei ringring kan tum pei .

The mobile generation

(Tleirawl fanau nei pawl hrang)

-Salai Kawl Lian

Hman thei zat tikcu bikhiah tuah aw(Limit the available minutes)

Kannih Laimi pawl cun postpaid hmang kan mal zetih a zia deuh lai. A tlangpi thu in Prepaid hmang kan si. Kan fale te (tleirawl/fale/ tlangval) zarhkhat/thlakhat ah phone bill ziang hmuah kan hmanter le a tha ding tivekih limit kan tuahsak thei asile’n a thabik. Hrekkhat fale pawl cun nu le pai’ phone hmang khal an um. Cuvek pawl cu nu le pa lamin an rual le pi pawl thawn ziangtluk rei (minutes) an hmang tivekin check sak thei theu sehla a tha bik.

SMS kuat ding zah tuah sakaw – (Limit the number of text messsage(SMS)

A tlun lamih kan sim vek thotho ih na thlun a tha. Fale tleirawl nei hrangah cun na phone/anmai hmanmi phone in vawikhat SMS (text pakhat) kuat asile paisa pia (cent) ziang hmuah a cem timi kha sim tengteng a tha. Cutin an hrang paisa ziang hmuah na fix sak timi khal theihter a tul. Culawngah anmahten ziang hmuah ka hmang thei ti an fiang dingih sum awk hna an thiam mai ko ding.

Download tuah theizat sim ta aw(Make your teen ask before they download)

Na fale pawlin download pakhatkhat (tt.ringtone, wallpapers, screen savers tvk.) an tuah ding tikah dan pakhatkhah tuah sak aw. Cutilo asile’n zumlopi ih paisa tamzet cem thei nak a si. Tleirawl cun zuk (hlasak thiam/lawngfang kheh zuk tvk.) tla download tuah an hrat zet theu hai ti tla kan theih a tha zet.

Theihdahlomi pawl ralrin ding (No strangers)

Tulai ah theih dahlomi pakhatkhat in online in an hmin le an phone number tivek dil an cing zet thlang. Cun, anmah phone sal dingin tla an dilmi khal a um theu. Na fale te pawlin anmah bulpak lawngih an tawn dah zomi le an theihfengmi pawl hnen lawngah phone number pek dingin zirhin sim hai aw. Cutilo ih internet online ihsin an tawnmi pakhatkhat vek hnenih an phone number an pek pang asile nunau mipatnak (sex) lamih cangsualnak le nunnak tiangih can phah thei asi zia tla zirh hai aw. A tlunih kan simawk mi pawl khi thlunih na fale te pawl na simih na zirh tikah a thawk ahcun an lung a awi lemlo men thei na’n hitivek dan tuah thepthi hi an hrangih a that lawng hman siloin paisa ziangmawzah na khawl (safe) phah theinak ding khal a si fawn.

General Knowledges

THEIHKAUHNAK LE RUAH DING TAM

(Compiled by Biak Chawn)

1. Milai pakhat ih ruah hmuahhmuah hi 9 kg hrawng a si. Milai kan ruh hi kum 20 hrawng kan si ihsin a tthang nawn lo. (Ruh kiak pawl pehsak sal an si tik ah, a peh awknak cu malte lawng a tthang sal). Ruh sungih thlik (marrow) hi thisen (red blood cell) tuahtu bik a si ih, nikhat ah 200,000,000 thisen cell thar a tuah. Hnar ruh (nose) le hna lenglam ruh (ear) hi ‘ruh’ si loin ‘rubber’ phunkhat (rubbery material) ‘Cartilage’ a si. Kut (hand) pakhat hi ruh 27 pehkhawm a si.

2. Kum 2007 sungih natnak nei thar hmuahhmuah lakih 88% cu tidai thianghlim lo ruangah a si tiah World Bank thuneitu pawl cun an hminsin. 2008 sungah nauhak 400,000 cu tidai thianghlim lo le ei in thianghlim lo ruangah an thi. (CNN/Daily Mail)

3. Leitlunih kilawng (parrot) tumbik le malbik ‘Kakapo’ cu New Zealand ramih Steward tikulh ah lawng an um. Kakapo kilawng pawl hi apa (male) cu 2.2 kg tiang an kim thei ih, anu (female) cu 1.5 kg an si tlangpi. Apa pawl cun kum 5 an kim lawng ah anu a pawl theiih, anu pawl cu kum 9 a kim lawngah ti (egg) an nei thei. (www.kakapo.org. nz)

4. Kan umnak leilung hi 1998 hnakin 2008 ah 0.74 degree Celsius in a sa (hot) ih, kum khat ah amalbik 0.2 degree in a sa deuhdeuh. Hiti vekih a sat vivo ahcun tuih hnu kum 10 ahcun 1.5 – 2.5 degree tiang a sa sinsin dingih, tuilai ih kan ei ttheu hanghnah hangrah le ramsa 30% cu an hloral ding. (-United Nations Framework Convention on Climate Change 2008)

5. Na thei lai maw? Milai in van boruak sang zetih khual an tlawn ngam hlan ah Russia uite (dog) ‘Laika’ cu 1957 ah an feh ter hmaisa. Laika cun leitlun hi Sputnik II vanzam thawn vei tampi a helsuak. 1961 ah milai van boruakih khualtlawng hmaisabik Russia mi Yuri Gagarin cun Vostok I vanzam thawn nazi 2 sung leitlun a hel. Gagarin ttheh ah nunau khualtlawng hmaisabik Valentina Tereshkova cun 1963 ah leitlun a helsuak ih, thlapi leilung parih ttum suk hmaisabik cu 1969 ah Apollo II vanzam hotu Neil Armstrong a si.

6. Kan umnak leitlung bangtukih arsi (ninu) heltu leilung (planet) hmuahhmuah lakih zam cakbik (fastest) le sa bik (hottest) cu WASP – 12b a si. Kan umnak ninu le a heltu planet pakua (solar system) ihsin 870 light-years in a hlatnak ninu heltu WASP-12b pawl cun an umnakih an helmi ninu (arsi) cu nazi 24 sungah veikhat an helsuak man. Curuangah cuih leilung (planet) pawl cu 2,204 degree Celsius tiangin a sa. (Light-year cu, eng (light) hi second pakhat sungah peng 193,750 hrawng a feh ih, cuih ‘eng’ cu kum khat sung ah second 31,536,000 a um ruangah peng 193,750 û second 31,536,000 cu light year khat tinak a si). Kan umnak solar system sung leilung pakua lakih a daihnak bik cu Neptune leilung heltu thla (moon) a si ih – 170 degree Celsius hrawng a si. Mercury leilung cu Ninu thawn a naih awbik ruangah solar system sungah a sa bik ih, sunlamah 427 degree Celsius a si ih, zaanlam ahcun – 138 degree Celsius hrawng a si lala. A daihnakbik le a satnakbik leilung ti thei a si.

7. Malaysia ram sungih rawl le eiding zuarnak dawr tuahtu company tumbik cu KFC (Kentucky Fried Chicken) a si ih, Malaysia ram sungah dawr 430 an nei. 2008 sungah dawr thar 30 an tuah ih, 2009 sungah khal 30 thotho tuah bet an tum. Dawr pakhat ihsin RM 700,000 hlawk an tum. A pahnihnak cu McDonald’s a si ih, Malaysia ram sungah dawr 185 an nei. Pathumnak Pizza Hut cun dawr 181 an nei ih, palinak Marrybrown cun 74, panganak Kenny Roger’s Roaster cun dawr 54, Domino’s pizza cun 37, A&W in 31 an nei.

8. Leitlun ram pakhat in ramdangih leilung (land) a leinak hmun kauhlam le a leitu acozah pawl hun tarlang sehla: (hectare khat = 10,000 square meters)

1). South Korea cun Tuluk le Russia ah 2,306,000 hec, Mongolia ram ah 270,000 hec, Indonesia ah 25,000 hec, Sudan ah 690,000 hec, Madagascar tikulh ah 1,300,000 hec, Argentina ah 21,000 hec a nei.

2). Tuluk cun Maxico ah 1,050 hec, Cuba ah 5,000 hec, Cameroon ramah 10,000 hec, Russia ah 80,400 hec, Kazakhstan ah 7,000 hec, Uganda ram ah 4,046 hec, Tanzania ram ah 300 hec, Laos ram ah 700,000 hec, Philippine ram ah 1,240,000 hec, Australia ram ah 43,000 hec a nei.

3). Saudi Arabia cun Yemen le Albania ah 1,610,117 hec, Sudan ah 10,117 hec, Indonesia ah 1,600,000 hec a nei.

4). UAE ( United Arab Emirates ) cun Algeria ah 1,500 hec, Sudan ah 378,000 hec, Pakistan ah 900,000 hec, Philippine ah 3,000 hec a nei.

5). Japan cun USA ah 216,862 hec, Brazil ah 100,000 hec, Egypt ah 1,600 hec, New Zealand ah 5,700 hec, Tuluk ramah 100 hec a nei.

6). India cun Paraguay ah 10,000 hec a nei.

(Hminsin: Hih ram le leilung pawl hi acozah lawng si loin company pawl in sumpur

leilawnnak hrangih an lei thawn bet thluh a si.)

Pa le Fa

-Salai Simthli unau

Fanu le fapa hrang ahcun kan kum upat dan in ‘Pa’ kan ruah dan tlangpi cu hitin a si:

Kum 3 – 4

Ka pa in ziangkim a tuah thiam. (Mi cakbik a si)

Kum 5 – 6

Ka pa in thil hmuahhmuah a thei tteh. (Mi hnakin a thei sawn)

Kum 7 – 8

Na pa hnakin ka pa cu a fim deuh thotho. (Ziangkim a thei)

Kum 9 – 10

Ka pa hi theihfiangmi ngaingai khal na nei lo.

Kum 11 – 14

Ka pa, hivek hi cu leitlunih thil thar a si ih, ziangtin na theithiam ding? (Nan san le kan san a bang aw lo sisi.)

Kum 15 – 19

Aih, ziangtin a cang thei ding, Na tar tuk thlang a si hi, zianghman na hminsin thei nawn lo. (Nangmahte’n na tuah thei zik lo)

Kum 20 – 23

Ka pa cu ngaisak duh hlah, san man lo pacang a si kha..

Kum 24 – 30

“Ziangtin ka tuah le’n a ttha ding?” tiin ka pa sut sehla a tthabik ding. (Keimah hnak cun thil a thei ko ding)

Kum 31 – 35

Hih thil hi cu ka pa in a thei ding. Tuih hlan a vah suksohnak le a tuah a ttuannak a si kha! (Ka pa ih rualpi pawl teh zo an si ta kha?)

Kum 36 – 48

Hi pawl hi, ka pa in ziangtin a tawlrel dah kha aw….?

Kum 49 – tlunlam

Aw…Ka pa ih thusim mi kha rak thlun sehla cu… ka nun a nuam zo ding na’n! (Nauhak sal thei si sehla, ka pa ih thu a thlun ding na’n)

Aw…Ka pa, thu kamkhat te’n nun i sim sal aw..

World News

LEITLUN THUTHANG

Malaysia tipi ah Whale kaih a si:

Kan dung kum thar ni ah Penang ih Teluk Bahang tipi kap ihsin peng 10 hrawng a hlatnak tipi sungih nga kaitu (fishermen) pawl cun ‘Whale shark’ (a0vig;) an kai ngah riai. Hih whale hin nga kaitu pawlih sur cu a pah ruangah a taksa cu ni tampi a awk ngah. Nga kaitu pawl cun a thih hnu ah tipi kap ah retin acozah hnen ah an sim. Asinan, a thih tiangih sur ihsin a luat lo ruangah a kaitu pawl cu kuan ter an si ding. An kaihmi whale-shark hi 7 meters ih sau, 2,000 kg a si. Acozah cun leihnuai ah a phum ih, neta ah a ruh pawl cu khawm sal dingin a tawlrel. Whale shark (Phincodon typus) pawl hi tipi sungah a huatsuakbik an si ih, minung hrang ah a tthihnung lo. – The Star

Sri Lanka in LTTE khawpi a lawng sal: Kan dung zarh tlawngkai nili ih an phuan cia vekin Sri Lanka acozah raalkap pawl cun an ram saklamih LTTE (Liberation Tigers of Tamil Eelam) tapung pawl khawpibik Kilochchi cu an lawng thei sal. Acozah cun Kilochchi a lak thei hnu ah a tuah ding pawimawh zet pakhat cu, tipi kap khawpi ‘Mulaithivu’ a si tiah a ti. Hih khua ihsin LTTE pawl cun meithal le bomb a phunphun an phur lut thei ruangah acozah cun Navy raalkap khawl ralring zetin a um ter. Helicopter ihsin zarhkhat sung Mulaithivu kiangkap hrawng ah bomb le cerek thawng tampi an thlak zo ih, Mulaithivu donak cu a thawk zo tiah acozah cun an phuang. Kilonochchi hi kum 1996 ah acozah raalkap in an lawng zo mi a si na’n, 1998 ah LTTE pawl in aoczah kut ihsin a lawng salmi a si. Nehnak puai an tuah lai ah raalkap vanzaam umnak hmunpi ah thihcilh bomb a puak sal ih, pilot 2 an thi, midang 36 in hliam an tuar. -AFP

Philippine ah tilik nasa deuhdeuh: Philippin ram thlanglam Mindanao khua le a kiangkap hrawngih tilik cu a tam deuhdeuh ih, a hlanih tthawn lo dingih an umtermi pawl khal tthawn vivo an si. Pacific tipi thuanthum kiangkap ah hin November ihsin January tiang ruahpi tamzet a sur ttheu ruangah tilik an tuar ttheu. Mindanao khua ih sungkua 5,000 lai cu kan dung zarhpi ni ah an umnak tthawn ter an si. – AFP

Poland in Afghansitan ah raalkap thlah sal: Poland cun 2009 ah Afghanistan ih kilhimnak ttuan ding in a raalkap pawl a thlah sal ding tiah a sim. Hih thu hin Poland cu NATO (North Atlantic Treaty Organization) pawl beiseinak hnak in a timtuahnak a sang sawn ti a fiang tiah US cun a pawrh hai. US le NATO hnattuan tlangnak ruangah Europe raalkap tampi cun Afghanistan ih US pawl hnattuannak a bawm rero lai. Poland cun tuih kum sungah raalkap 2,200 hrawng kuat bet a tum. – AFP/AP

Hlawhhlang pawl tuahmawhtu kaih a si: Hongkong ih hnattuan nei lo le hlawhhlang pawl ihpi nak ihsin eihawl tu Chong Kwack Hung (k 24) cu kan dung zarhpi ni ah kum 9 thawng tla dingin thutthensak a si. Chong hin hlawhhlawng a ihpi pawl cu hridai in a tten bet ih, an neih hmuahhmuah lawng sakin thla tampi a rak vai rero zo. Thutthennak inn sungih a phuan awknak ah Chong cun, “US dollar cahnah tumbik ngah theinak lamzin tthabik cu hlawhhlang pawl tangka dip sungah a si tiah ka ruat’ a ti. Hongkong ramih nunau hlawhhlang pawl hi a burburih an um khawm lo ruangah le bulpak ih zuar aw mi an si ruangah misual kut an tuar ringring. – dpa

Benazir ih fanu in a nui’ thihnak hla in a sak: Leitlun milai ruahnak cu a bang aw lo cio. 2007 December thla ih thihcilh bomb in an thahmi, Pakistan president ttuan tumih vote tu Benazir Bhutto cu a fanu Bakhtawar Bhutto Zardari cun thlahnak hla a phuah sak ih, cucu ‘Rap’ hla a si. Hih hla hi VCD ih tuah a si ih, anu Benazir Bhutto ih damlai zuknung le a thih lai ih zuknung an zuk ngahmi pawl khal a tel. Bakhtawar (k 18) ih hla ahcun miring ttong in, “Kanu cu in thahsak. Kei cun ka ngaithiam lo ding. Thihpi ve ding a si maw? ..” tiah a ngan. Bakhtawar hi Britain ramih Edinburgh University tlawngta a si ih, music lam ah hlaphuah le hla ngan thiam zetmi a sina’n, cuih a thiamnak cu eihawlnak ding tiang hman a tum lo tiah a sim. – Reuters

Israel le Gaza thuhla leitlun ah a khat:

Tuilai Israel in Gaza khawsungih bomb a thlak rero cu leitlun ramkipah rel tambi thuthang a si. Israel ram kiangkap Lebanon , Jordan , Iran lawng si loin leitlunih muslim ram tamsawn cun sandan an piah ih, Israel cu ahnakih ram faate sawn nautat in a cangvai rero ih, zingzahpi ding a si tiah an puhmawh. Asinan, Europe ram le US lam cun Gaza in Israel ramih rocket bomb a thlak rero cu nasa zetin an do ih, Gaza uktu Hamas pawl in an thiltuah an cawlhsan lawngah daihnak a um thei ding tiah an ti. President Bush cun “ Gaza mipi tuarnak hi an hotu pawl in an tawp ter thei ih, cucu Israel dilnak vekih rocket bomb an thlakmi cawlhter lawngah a cang thei ding’ tiah a ti. Bush ih ruahnak ih Obama khal in a pawmpi. Tuih ttumih Israel le Gaza buainak hi kan dung December thlasungah Israel ramsungih Palestinian miphun pawl inn le lo an rak sak ruangah raalkap le miphun duhdawttu mipi pawl cun nasa zetin an dawi tlan ih, mi 229 an kai. Palestinian mi pakhat a thi ih, hliam tuartu khal an um hnuaihni. Cuihsin Gaza lam cun thinheng zetin Israel thlanglam Ashkelon khua le a kiangkap cu rocket bomb in an kap thawk. Israel cun theithiam in, daihnak tuah a tum ih, Palestinian a kaihmi 229 cu an suah sal. Asinan Gaza uktu Hamas pawl cun Palestinian pawl cu bomb cahnak thawi cangvai ringring dingin an forh. Cucu Israel cun tuar thei nawn loin December 27,2008 ihsin raalkap vanzam thawn Gaza ramsung hmunkipih Hamas raalkap umnak pohpoh ah bomb a thlak. Palestinian pawlih rocket cu Israel saklam Lebanon ramri tiang a tla ih, Lebanon ih UN raalkap ( Italy raalkap) pawl cun kilhimnak an tuah rero lai. Gaza khawpibik cu Israel raalkap pawl in kan dung tlawngkai nithum ah tank thawn an kulh ih, helicopter, vanzam, tank le pukpi in nitin zaantin an kap thlang. Palestinian 800 hrawng an thi ih, 3,000 hrawngin hliam an tuar. Israel 12 an thi ih, 100 zikte in hliam an tuar ve. Israel ram hmuahhmuah siatsuah a tumtu Iran ram cun Gaza ih meithal le bomb a phurlut ttheu ti ih an puhmawhnak cu a el ringring ih, zohman in an zum lo. Iran hi Gaza pawl bawmtu le forhtubik cu a si. Iran tlawngta 70,000 lai cun Israel siatsuah ding in thihcilh bomb kengtu si an duh thu president Mahmoud Ahmadinejad hnen ah ‘theihpinak’ an dil na’n president cun thuhla a theihter hrih lo. Israel cun hmai February thla sungah rampi hruaitun hril awknak an neih ding ruangah Hamas pawl cu an dirhthlak tiang hih donak hi fehpi an duh tiah Israel president Ehud Olmert cun a sim. Israel cun thir kut (iron fist) in Hamas pawl cu thosal thei nawn lo khawp in kan tuahmawh ding tiah an Pathian hmin hlamin raal donak thu an phuang. –AP/AFP

(Tulai Israel pawl dinhmun hi Bible ihsin zoh in Pathian ratsalnak thawi ziangtlukin a pehpar aw timi article cu hmaizarh ah kan suah ding. -Ed)

US president pawl rawl eikhawm:

Kan dung tlawngkai nihnih ah US ih president a rak ttuantu pawl (a nunglai) cu tawng aw khawm in rawlei khawmnak an tuah. Himi hlan ah hin president Bush le January 20, 2009 ihsin president a ttuan thawk ding Obama cun White House ah anmah pahnih lawng kawm awknak an nei. (zuk: kehlam ihsin- George H.W.Bush, Barack Obama, George W.Bush, Bill Clinton le Jimmy Carter) -Reuters

ASEAN meeting nak ding tthawn sal: Thailand prime minister Abhisit Vejjajiva cun hmai February 27 – March 1 sungih ASEAN meeting nak ding hmun cu Bangkok ihsin Hua Hin khua ah tthan a si tiah a sim. ASEAN meeting hi kan dung December thla ih tuah ding a sina’n Thailand ram nainganzi harsatnak ruangah a tikcu an tthawn sal a si.

Tapung 32 kap that: Afghansitan nisuahnaklam ah US raalkap hohanak in kan dung tlawngkai nihnih ah Afghan ramih Taliban tapung 32 an kap that tiah Afghan acozah cun a phuang. US raalkap pawl cun Laghman province sungih Taliban pawl in ‘bomb’ an tuahnak hmun ih an feh lai ah, tapung pawl cun inn tlun le lamzin kap ihsin an rak kap ih, nazi 4 sung an do awknak ah tapung 75 ihsin 32 an thi. Bomb tuahnak hmun pawl khal siatsuah thluh a si. – AP

Tuluk le Vietnam ah ar natnak: Kan dung tlawngkai nikhat ihsin Tuluk le Vietnam ram cun ar natnak (bird flu) thhla ah ralrinnak ding thu an suah. Hih hi Tuluk ramah mi 2 an thih ruangah le Vietnam ah 3 an thih ruangah tuih kum ih an hmuhsuah hmaisabik a si ih, a tamsawn cun ‘ar le rampai’ sa ei ruangah si loin, zuatnak ihsin hih natnak ‘H5N1’ virus hi an ngah a si. –Reuters

A neitu LCF, Malaysia

Editor Biak Chawn

Joint Editor Salai Kawl Lian

Zemdarhtu(Circulati on managers)

SalaiLiante

Obed Cungte

Lal Ruat Lian

Khumte

Calai kawmiti

Salai Kawl Lian

Mang Hlei Sang

Biak Chawn

Obed Cungte

Advisor Upa Za Dun

Patron Rev. Run CungMang

Contact

Hruaitu

Bangunan Tan Kim Onm

No. 46-48 2nd Floor

Jalan Sungai Besi

57100 Kuala Lumpur

E-mail : hruaitu@yahoo. com

SMS : 016 3440 672 ( Biak )

016-302 1254 (Kawl)

Pastor 017 – 3880 848

(Visited 89 times, 1 visits today)

Comments

comments

5 Comments

  1. Van Lal Thlan says:

    zangfah nak ten kan ca ngaan rawng(color) kha sen(red) lo hram seh la a tha pei maw?

  2. na k aluh ve theih na ka duh ze

  3. nan cung ah lung lomh nak tam pi ka ngei

  4. Chin today calai hi ka siar duh ve ih,

  5. fim thiam nak cu ca ah aum,

Comments

%d bloggers like this: