HRUAITU THUTHANG ISSUE 217

HRUAITU THUTHANG

ISSUE 217 NAK

December 04,2008

 

 

Editorial

 

                      Kumthar le ruahnak hlun

Gregory calendar a hmangtu hrang ahcun January ni 1 cu kumthar a si ih, hih calendar hmang ve lem lotu hrang ah tla ‘puai nawmnak’ tep duh ruangah a sunglawi ve zet ko. Tikcu le caan hi ziangtin hminsin a si ih, khuitawk ihsin history ah a lang tiah zohman in an thei ban nawn lo. Asinan, leitlun milai umkhawmnak (civilisation) history hlunbik ‘Urnamu’ khawpi thuhla ihsin kan fiang thei. Urnamu le Uruk khawpi cu Babel innsang a siatral hnu ihsin mipum tamnakbik khawpi an rak si ih, a kiangih ‘ Ur ’ khawpi khal Abraham sanlai ah kan hmu. Urnamu khawpi ah hin milai 12,000,000 an umih, sumpur lailawnnak hmunpi a si vekin tikcu le caan khal hminsinnak felfai zet a um thawk ti thei a si. Cuih san ihsin kum khat ah thla 12 siar dan a rak thawk zo ih, thla hmaisabik ‘Nisan’ thla khal Israel pawl in Babylon sal ihsin an suah hnu ah Pathian in a thla siar dan a pekmi thla hmaisabik ‘Abib’ cu ‘Nisan’ ti khal in an rak hmang thawk a si kha.

Leiltun history ih acozah picang hmaisabik cu ‘ Egypt ’ an si. Kan theih dingih pawimawh cu ‘Josef’ san lai ih ‘ Egypt ’ pawl kha ‘ Egypt ’ ram neitu ngaingai a si lo. A ram neitu pawl cu Mosi san ih uktu pawl an si. Cu pawl cun Abraham a suah hlan kum 5,000 BC ihsin hih leitlun ih tikcu le caan hi an rak hminsin zo. Pathian in leitlun a sersiam ni ah ‘Tikcu le caan’ cu Ninu hman a tuah hlan ah ‘Ni khat Ni’ tiah bible in in sim. Cuih hnu ah milai hrangah ‘Nazi 24 sung’ (Ni a suah ihsin a thaizing a suahsal tiang-sun le zaan cem in) cu nikhat tiah hminsin a si. Curuangah Pathian hrang ahcun ‘Nikhat’ cu nazi 24 tinak a si ringring lo. Leilung ihsin van sang 5000 kilometers ah um sehla, sun le zaan a um thei nawn lo. Ziangahtile’n leilung a her ruangah ‘Zinglam le zaanlam’ a rak um ih, cucu tikcu hminsinnak cu a rak si. Cuvekin boruak sang zet hman ah sun le zaan a thleng aw lo ahcun Pathian hrangah ‘Tikcu le caan’ hi a danglam lo ti a fiang. Caan hi a liam ngaingai maw, minung sawn hi kan liam (ziam ral) rero sawn? Kan ruahnak hlun le ttha lo hmuahhmuah kha kan tikcu caan hin inliampi thei sehla, kan nunnak ah a danglam thei lomi Pathian thu cu nitin thar vivo hram seh.

 

 

Bezai

 

          PAI’ DUHDAWTNAK

 

Ni leng e…Van rial ruah e…

Tuana rel bang thiam hlah

Ei ding sin ding thlazam lawn

Tuansuaktu…Pai’ thazaang

 

Zing dai e…Zaan sim ee..

Zo in sim thiam hlah

Fano pawl tual lennak le

Fimthiam zir sang ding in

Ruah saktu…Pai’ dawtnak.

 

Riah sia e…Ning hang e…

Lungsiat ninghan lawng hman ning,

Thatho le lung ngamih fanau hruaitu

Hluan hlah maw…leitlun dawtnak hmuah in

Hnangamter…Pai’ duhdawtnak.

                                   

                                                Salai Simthli unau

 

 

Sermon (Historical)

 

                     A Hlun le A Thar

                                                                        Salai Biak Chawn

Zohman in a hlun cu an zoh lem lo. A thar cu mi pohpoh in an duh. A dik pei maw? Kan thinlung ah kum 2009 kumthar lawng a um men thei. Ziangruangah kumthar lawmhnak kan tuah ih, kumhlun lawmhnak kan tuah dah lo. Hnattuannak thilri, nam, fang ahnak, sohbul, tivek teh a thar hnakin a hlun cu hman a nuam sawn lo maw? Kan hril sawn ttheu lo maw? Hnattuannak ding hnipuan thar lei cu ‘a thar ciocio ah’ hruk ding in a phur um tuk lem lo ding. A thar cun a hamngtu ding hrangah ruahsannak tampi a peek ruangah huham a nei. Mawttaw hlun zet hnak cun a tharih to cu a nuam cuang. Hnipuan khal an si thluh. Kan Bible khal in “Lei thar le Van thar’ ih um ding in thu in ruah a si hi!

Mirang thufim malte kan hlawm aw pei . “Rualpi hlun cu an zumtlak, thing hlun cu a alh duh ih a hman a nuam, cabu hlun cu siar a thaw cuang, rang (horse) upa (hlun) khal to a nuam, zu (wine) upa zet (old) cu a thaw deuh,…curuangah ‘A hlun cu sui vek a si (Old is Gold) tiah an ti. Solomon ih hla ahcun, “Leitlun ah thilthar pakhat hman a um lo” tin in sim riai. Culawng a si lo, leitlun ih a ra um/thleng mi pawl hi a um/thleng cia lawnglawng an si ih, thilthar zianghman ruahsan ding le beisei ding a um lo” ti’n a sim bet. Lennak, fimnak le nawmnak hmuahhmuah nei theitu hman in ‘leitlun ah thil thar beisei ding a um lo’ a ti ahcun kannih pawl hin ziangvek thilthar so kan beisei lai ding?

            Laimi kan thinlung ah hin ‘Thil thar’ uarnak le duhnak tumpi kan nei. Hnipuan thar, thilri thar kan neih ahcun ‘A hlun’ sawn kha kan zoh tuk lem lo ttheu. Handphone a phunphun a ra suakih, a tthazet kan neihmi khal, a thar a ra suah cun, kan neihmi hnakin a thar sawn kha neih sal duhnak kan nei. Nitin kan nun khal hi thil thar duhnak, thuthar theih duhnak, dinhmun danglam le kan tawng/neih/theih dah lomi cohlan kan duh ringring. Kan thutheihnak ‘hna’(ear) le kan hmuhnak ‘mit’ (eye) hi ziangtik khal ah a diriam dah lo. Hih hi kan taksa hiarnak ruangah a si pei maw? Falat tlangval lai ahcun ‘Nupi pasal’ neih kan hiar zet. A nei zo pawl in the ziangvek danglamnak so an theih? An phur a rit deuhdeuh.. Asinan, nupi pasal neih awk cu leitlun dan a si fawn. Thil thar a si loih, hlun ding khal a si lo.

            Bible ih Thukam Thar hi a tthat tuk ruangah ‘Thukam hlun’ hi kan hlon siang ke’m? Zokhal in ‘Nupi pasal’ a hlun le a thar nei hnuaihni sehla, kan san a sau pei maw? Leitlun ah kawhhran thar 20,000 leng a ding zo na’n, a hlun pawl ti dan kan fehsan thluh dah lo. Leitlun ah sii (medicine) hi a phunphun 2,000,000 a um ih, hmin dangdang le hmel dangdang an nei na’n, a hlanih an hmuhsuah ihsin malte te an rawi cawp ih, sii phunphun dangdang an tuahsuak lawng a si. Solomon kha a dik zet lo maw? Lei le van ah element (metal and non-metal) phun 200 hman a um lo tiah scientist pawl cun an hmusuak, asinan, cuih phun 200 hrawng cu thilri hmuh thei le hmuh thei lo, tham thei le tham  thei lo, a phunphun-siar cawk lo an tuah ih, nunnak, zawpralnak, natnak, damnak, sualnak le tthatnak, thihnak… lei le van karlakih thil um hmuahhmuah tuah khawm tu an rak si. Science (tulai fimnak) in ziangtin kan simfiang ding? Sodium le Chlorine a rawi aw mi cu ‘Cite (salt) a si, Sodium le Carbon a rawi aw mi cu ‘Satpia’ (soap) a si, Carbon le Hydrogen a rawi aw mi cu ‘Pha-zawng-taing’ (candle) a si, Hydeogen le Oxygen a rawi aw mi cu tidai (water) a si. Etc… zianghman a tharmi a um lo. Amah a kel le a kel lawng an ben aw khawmih, thilri dangdang ah an tuah aw cawp mai a rak si.

            Leitlun history ihsin kan zoh sal pei . Mipum thihnak (catastrophe) , do awknak (war and battle), natnak (plague), thlisia le linghnin (disaster), paam(famine) , ruahnak a phunphun (philosophy) , biaknak (religious and belief) le nun dan (custom) pawl tla hi a thar ngaingai a um lo. A rak si zo le a rak cang zo pawl ihsin malte a danglam deuh kan rak tawngih, kan tuah vivo lawng a si. Curuangah miring pawl cun ‘History repeats itself’ (Khua hlan lai ih thil cang zo mi cu amah te’n a nolh aw sal ttheu) ti’n thufim an nei.

            Pathian thulam ah hun luhpi sehla. Israel pawl runsuak ding in Pathian in Mosi a hrilsuah lai ah, thilmak a phunphun tuah theinak a pe ti kan thei. Asina’n, Pathian in Mosi hrangah thilri danglam le cangkang zet a pe lo. A pu Jethro ih tuu a kil lai ihi a hmanmi ‘tiang’ (staff) lawng cu thilmak tuahnak ding ah a tuahsak. Mosi hnenih um cia, a kiangih um ringring le a man khung lobik mi cu thluasuah a peek ti kan fiang. Izip ramah thilmak a phunphun a tuah hnuah ‘Tipi sen’ kap ah mangbang in an um lai ah ‘Mosi cun a tiang cu tipi sen catter ding in a hmang. Joshua in Jeriko khawpi a nehnak ding ah ‘pukpi’ a hmang lo, tuu ki (horn of ram) an tum ih, Jeriko khawpi cu a cim thluh. Gideon sanlai ah tla hivek deuh in ‘bel sungah meisa an vangih, cuih bel cu an thawi kuai thluh ih.. raal pawl cu an ttih tukah anmah le anmah an that aw ciamco. David the Pathian in ziangmi in nehnak a coter. Goliath micak neh dingin tuu a khal lai h a thilri hmanmi (tulai ahcun nauhak lehnak ding hman ah an hmang peih nawn lo ding) cun a raal a that riai. Amai neih cia lawng in nehnak a co. Siangpahrang Saul ih raalnam a ttul lo. Pathian khal in thilthar le hmanrua thar thawn a miphun a hruai lem lo. A duh ahcun ‘Ni le Thla’ a dinter sawn. A duh ahcun ‘siangpahrang Hezeki damnak ding ah, a hrang hminsinnak tuah ding in Ni’ hlim khal a kriter a si khal.

            Duhdawtmi unau, kan miphun tthansohnak ding ah le bulpak kan tthansoh theinak ding ah Pathian hin ziangvek thil thar in tuahsak ding tiah na ruat dah maw? Profet maksak zet siseh, mifim turu zet siseh, mi thil ti thei zet in siseh, in runsuak ding le in hruaikhawm thluh ding in kan ruat dah maw? Pathian hin ziangvek in khua in ruah sak ve ding tiah na ruat? Ziang dang  a um lo. Kanmah lak ihsin, kan neihcia mi, kan ban tawkih kan zuam theinak, kan ti thei tawk cio ih kan pumpeknak le kan tuahding ttuanvo kan neihmi a faatebik ihsin a tumbik tiang hlawhtlinter dingih ‘Pathian rinsannak’ lawng in kan saduhthah mi tthansohnak tlamtling cu kan co thei ding. Mi hrekkhat in ‘Zaanvar it loih ca an ngan laiah, nangteh ziang ha na tuah? Mi hrekkhat in rawl ul in Pathian zaanghfahnak an dil lai ah, nangteh midang thawn nan kawk aw pang maw? Miphun le Pathian hrangih hnattuan tunto an um lai ah, nangteh mi lakah miphun mualpho tertu na si pang maw?

            Kan miphun tthatnak ding in, kawl pawl kan sawm ding maw? Kan miphun  in rian ding in ‘Mi rang’ kan sawm ding maw? Thil zianghman kan tuah thei lo khal le’n in sersiamtu Pathian hnen ah dil uh si. Calendar vekin kumthar cu kan hmang cio ko. Thil thar maksak zet le danglam zet beisei ding kan nei maw? Kan thinlung ah ramdang feh ding lawng cu ‘thilthar beisei ding’ a si pang maw? Khrih Jesuh hrang ‘Piangthar’ kan sinak lawng kan hrangah ‘ruahsan ding thar’ si ringring seh. Mi piangthar hrang ahcun thil ziangkim ah thluasuah cu nitin a thar in a co ringring. Leitlun thilri le taksa hiarnak, mit hiarnak diriam ternak ahcun zianghman thilthar a um lo. Pathian thawn nitin caan a hmang lotu hrang ahcun leitlun nun hi umharnak le nin-um zet a si. A thianghlimmi nun thar kan neih theinak dingah Pathian in thluasuah in pek hram seh.

 

 

Article

 

Thansohnak ding thupi pali

                                                                                                -Pa Za Dun

 

Kum hlun cu liamsan in 2009 kumthar in thlenter ruangah damnak in petu Pathian hmin thangthat si ko seh. Kum thar kan thleng vekin kan ke kar dan ah siseh, kan ruahnak khal a thar in ka thawh pei tiah ka lo sawm duh. Community le biaknak lamah hruaitu thar a thleng aw ih, ttuanvo khal kan sawng aw vivo ding a bang. Curuangah, mithar kan rak si khalah siseh, mi hlun cia in ttuanvo thar ka va neih caan ah kumhlun hnak in ziangtin tthansoh dan ding lamzin thar kan ruat ding ti hi a thupi zet. Thil ttha zet kan neih khal hi cu hnakih ttha sawn kan ruah thiam vivo loh ahcun ‘ kan thil ttha neih cia khal in inliam san sal thei ti kan theih a pawimawh. Biaknak lam le community hrang lawng si loin bulpak cio hrang khal ah ka ruah a ttul zet. Cuti ih kan tthansoh theinak ding ah a huailamih a hnuailamih tthansohnak ding thupi pali hi zohtlang, cingkengih nunpi ding ah thiam tawk tei’ ka forh duhmi cu a si.

 

1. Vision (Thinlung mitthlamih suangtuah ruahsannak)

Bible cun “Vision’ um lonak ah mipi an hloral” tiah in zirh. (Thufim 29:18). Kan ruahsanmi kan hmuh thei ahcun cucu ruahsannak ngaingai a si lo ding. Zo so ama’ ruahsannak mitih hmu thei? Rom 8:24 ah “Curuangah kan mitih kan hmuh hrih lomi kan hmailam thil umdan ding pawl thinlung mitthlam ih suangtuah ruahsanmi cu a si” ti kan theih a ttha. Asile’n, kawhhran hruaitu, pawlkom a phunphun hruaitu in vision kan nei cio maw? Nei loin hruaitu kan ttuan maw? Vision kan neih hngetmi cu ‘angan in’ hminsin ding a si.

2. Goal (Hmuitin tumtahnak)

Thinlung mitthlamih suangtuah ruahsannak kan hminsinmi kha khui ri cin kan va hlawhtling thei ding tiah hmuitin mi lamah zuam man laksawng ngah ding in ding zetin kan tlan tiah Paul in insim (Phill 3:14). Bawhlung lektu le tlanzuamnak ih a tlantu khal in hmuitin le tumtahmi cu hlawhtlin kan tum ding a si.

3. Diligent (Zuam, taimaknak)

Kan hmuitin le tumtah kan neih felmi cu zuam le taimak suah ih kan ttuan thiam a ttul. Kan Bible cun taima zetih hnattuan ding in insim ih, mi zaangzel a duh lo thu khal in sim bet. “Na hnattuantu khal ah mi zaangzel la hlah” tiah in zirh. (Thufim 6:6; 10:26; 12:24; 10:4). Curuangah ziangkim kan tuahmi pohpoh ah zuam le taimak suah ih ttuan a ttul.

4. Displine (Cin le Dan neih)

Pawlkom, kawhhran le inn sang ah hin cin le dan um loih nun cu tthansoh a theih lo nasa. Kan sumpai le thilri ziangkim hi cin le dan felfai zetih kan hman thiam a si le’n kan tthasoh pi tengteng ding a si. Cuih hlei ah, kan tuah kan ttuannak ah siseh, nitin kan tlanlen kan cangvaihnak khal ah midang zohtthim tlak si thei dingih ka um a thupi zet. Pawlkom, kawhhran ah hin ‘Cin le dan’ nei loih sumpai hman a si ahcun cuih pawlkom le kawhhran cu a tlaniam deuhdeuh dingih buainak nasa zet khal a suak thei. Kan sumpai le thilri neihmi hmuahhmuah hi ‘Cin le dan’ felfai zet thawn kan hman thiam ringring a ttul zet.

Curuangah, kan pawlkom, kan kawhhran le bulpak kan zate’n kan nunnak ah kan tthansoh theinak ding ah hih tthansohnak ding thupi pali hi cing kengih a thlun theitu si ding in zuam cio uh si tiah ka lo sawm duh a si.

 

World News

 

                     LEITLUN THUTHANG

Israel in Gaza ah bomb thlak: Zarh khat sung Palestinian (Gaza ram) pawl in Israel ram thlanglam Ashkelon cu rocket bomb in vei tampi an kap rero hnu ah, Israel acozah cun ‘thir kut (iron fist)’ in kan do let ding tiah prime minister Ehud Olmert cun a phuang ih, kan dung zarh zahte ni ihsin Israel vanzam cun Palestinian umnak Gaza ramri ah bomb a thlak thawkih nikhatnak ah mi 205 an thi ih, 700 hrawng in hliam an tuar. Hih thihnak hi Israel le Palestinian pawl karih do awknak hmuahhmuah ah kum 60 sungah nikhat ih milai thih tamnakbik a si. Tlawngkai nili ah Hamas (Palestina ram uktu) hruaitu le muslim biaknak lam thawn mi tampi thihcilh bomb thawn Israel ramih siatnak tuahter tu Nizar Rayyan (k 49) cu a umnak inn a thi ih, mitthi 400 lakah a tel ve. Hliam a tuartu an tam deuhdeuh ih, Israel cun vanzam ihsin bomb a thlak cu cawlhsan lohli a tum lo tiah ‘Daihnak tuah dingih a forhtu’ France president Sarkozy cu a sim. US president George Bush cun Israel le Hamas buainak cu “Hamas pawl in rocket bomb an kap rero cu cawlhsan sehla, daihnak lamzin a ong aw thei ding” tiah White House thuphuangtu Gordon Johndroe cun a sim. Hamas pawl rocket ruangah Israel thlanglam Ashdod khua ah milai 4 an thi zo. Israel prime minister cun Gaza bawmnak ei le in phurtu UN mawttaw pawl cu luh a siangih, Gaza ih raalkap hmunpi 40 lenglo parah bomb a thlak zo. Gaza hi leitlun ah muslim pawl hmunkhatih umkhawm tamnak bik a si ih, ram fate zet, Israel ram le Mediterenean tipi karih ram faate ah milai 1,500,000 an um– AP

 

Baghdad ah bomb puak: Kan dung zarhpi ni ah Iraq khawpi Baghdad ah bomb cakzet a puak ih mi 22 an thi ih, 54 in hliam an tuar. Baghdad thlanglam 40 km ah bomb pakhat an puak sal ih, raalkap pakhat le mi 4 an thi. Bomb puak pawl hi sunlai fang ah a si ih, mawttaw sungih an retmi pawl cu ‘puak lo dingih tuah (defuse) an tum lai ah rin lopi in a puak tiah raalkap thuneitu pawl cun an sim. – AP

 

Tuluk ram ah mi 64 thi: Tuluk ram khawpi Beijing ih innsaknak ih lift tuahtu pawl an cangsualih mi 32 an thi. Henan province ih innsaknak hmun ah electric generator a puakih 15 an thi, 9 in hliam an tuar. Hunan province ah lift tuahtu thotho cu an thilri a siat ruangah lift ihsin an tla ih, mi 17 an thi. – Reuters

 

Pakistan in Benazir hngilh lonak tuah: Kan dung December 27 ah Pakistan cun prime minister rak ttuan dahtu Benazir Bhutto hngilh lonak ding ah amah an phumnak hmunah puai an tuah. Bhutto hi Pakistan president Parvez Musharraf in raalkap cahnak thawn thuneihnak a cohlang ihsin ram dangdang ah a relh ih, nainganzi dinhmin a thleng aw ih, rampi in hruaitu hrilnak ding an tuah zik hrawng ah an ramah a tlung sal ih, Pakistan People’s Party hotu si in, hril awk hlanih a khualtlawnnak ah thihcilh bomb puahtu pawl in vei thumnak ah an that ngah. Bhutto ih pasal Asif Ali Zardari cun a aiawh in president hna a ttuan lai. UN secretary-general Ban Ki Moon cun Benazir Bhutto ih thiahnak thuhla zohfiang ding in tawlrel lohli a si ding tiah a phuang. Bhutto a thih lai ah British mithiam pawl cu misual hawl ding in an sawm na’n an kaihmi a tamsawn cu an suah sal. – AP

 

UFO zirnak tlanwng duh lo: University of Hongkong cun kan dung tlawngkai nikhat ah UFO (Unidentified Flying Object, kawl ttong in-yef;uefjym;ys ) thuhla zirnak cu a duh lo ruangah UFO lam zir a duhtu pawl cun sandan an piah. Hongkong University thuneitu pawl cun, “Hivek subject zir ding cun thilri zianghman kan nei loih, a zirhtu ding saya khal an um lo” tiah a ti. UFO thuhla zirnak hi ‘Ufology’ a si. – AFP

North Korea  kutdawh ram: North Korea cun kan dung tlanwgkai nihnih ah leitlun ram dangdang in Nuclear cahnak a tuahmi cawlhsan dingih an forhfialnak cu kutdawhnak in a hmang tiah Yonhap thuthangca cun a sim. North Korea cun ‘Japan’ in zinaan le thil dangdang a tawlrel sak lo ahcun ‘Nuclear tuahnak bohsiat sal a tumnak cu a cawl mai ding’ tiah a phuang. Hih thu hi North Korea mi harsa pawl ei le in lamih a bawm rero tu South Korea cun “Kut dawh cingih nuclear bomb tuah thei” tiah a puhmawh. North Korea ihsin mi tampi cu Thailand le South Korea ah refugee vekin an lut ih, South Korea khal in ‘ei le in’ lamih bawmnak ding ah rampi ‘Budget’ tiang a rak tawlrel dah. –Reuters

 

Tuluk le Russia raalkap rualpi aw ding: Kna dung tlawngkai nikhat ah Tuluk raalkap cun leitlun acozah dangdang thawn an pehtlaih vivo theinak ding ah ‘Military Hotline’ a tuah ih, Russia cun a biak hmaisabik tiah Xinhua News Agency cun a ngan.(Tuluk le Russia hi mah le mah duh aw tawk veve cing in, midang kutih rul kua zen tumtu an si ruangah kan Bible sungih kan hmuh vekin Bawi Jesuh a rat sal hlan te ah Jerusalem tiang do dingih ra pawksuak ding ‘Gog le Mogog’ ram (miphun) pawl kha an si. –Ed)

 

Kawlram in gas zuar vivo ding: Kan dung tlawngkai nikhat ah Kawlram cun  Tuluk tipi kap tluan lamzin ihsin India le South Korea hnen ah ‘Natural Gas’ a zuar ding tiah ‘New Light’ thuthangca cun a sim. Hih Gas hi Rakhain ram ihsin laksuah a si ding ih, cuihsin Tuluk cun pipe tuahnak ding pawl a tumsak thluh dingih, Tuluk thuneihnak hnuai in India le Korea cun gas an rak lei ding. Kawlram hi nainganzi lam buainak ruangah UN cun leitlun sumpur leilawnnak ihsin a zohsan na’n, Tuluk, Thailand le India hnen ihsin sumpai tampi a ngah ttheu ruangah harsatnak nei loin ‘mipi’ a hruai ringring thei. Thinig, lung man khung, Gas tivek ihsin nikum 2007 sungah US$ 270,000,000 a ngah tiah ‘New Light of Myanmar’ cun a ngan. Kum 2006 ah Kawlram sungah ramdangdang ihsin company 13 cu Gas lasuak ding in hmun 33 ah hna an ttuan. Hiti cingin Kawlram cu leitlun ih ram harsabik a si lai. – AFP

 

Nazi 48 sungah tapung khawpi lawngsak tum: Sri Lanka raalkap thuphuangtu Brig. Udaya Nanayakara cun kum 25 sung an do rero mi LTTE (Liberation Tigers of Tamil Eelam) pawl khawpibik Kilonochchi cu nazi 48 sungah kan lawngsak ding tiah kan dung tlawngkai nili ah a sim. Tuih ttumih raalkap pawl in vanzam le helicopter, tank le pukpi thawn an do hi zarh 6 sung ah Kilonochchi kiangkap 2 km tiang an thlengih, khawpi cu fek zet in an kulh. Vanzam bawmnaka thawn tlawngkai nithum ah LTTE raalkap 50 thawn an that ih, acozah raalkap 4 an thi. Sri Lanka president Mahinda Rajapaksa cun 2008 sungah hih LTTE pawl hi kaih khih thluh a rak tum na’n rauhpi a tak tuk ruangah raalkap pawlin hna an ttuan ttha thei lo tiah Udaya cun a sim. Tlawngkai nithum ah acozah raalkap pawl cu Tapung pawl raalnam retnakbik Paranthan ah an lut thei ih, LTTE lam cu dunglam ah an kir deuhdeuh. LTTE hotu Balisingham Nadesan cun, “ Kan thih tiang kan do vivo ding” tiah media ihsin thu a than ve. Kum 25 sung an do awknak ruangah milai 70,000 lai an thi zo.Tamil miphun pawl cun an umnak khua cu independence ding in an dilnak ruangih do aw an si ih, a ram neitu Sinhalese pawl in an siang lo a si. –AP

 

India ah bomb puak: Christmas le kumthar puai hmantu pawlin thilri man awl zetzetih an leinak bik Guwahati (Assam) khawpi sung bazaar ah muslim biaknak atcilhtu pawl cun kan dung tlanwgkai nithum ah bazaar a fehtu pawl siatsuah ding in bomb pathum rori ankam ih, pakhat lawng a puak cing in mi 5 an thi ih, 26 in hliam an tuar. A dang pahnih cu palik pawl in an siatsuah (defused) man. Guwahati hi North East India (Mizoram, Nagaland, Megalaya, Manipur, Tripura) ihsin Khrihfa tampi Christmas le kumthar hrangih an bazaarnak hmunpibik a si ih, miphun dangdang rawi awknak bik khal a si. –Reuters

 

Japan ah thihnak tam sawn: Japan ram cun kum 2008 sungah an ramah nausuak (birth) hnak in mitthi zat (death) an tam sawn tiah an ram thuthangca Kyodo News Agency cun a sim. 2008 sungah naute thar 1,092,000 an suakih, mitthi zat cu 1,143,000 hrawng an si. Naute suak thar hnakin mitthi cu 51,000 hrawng in an tamih, 2007 ah japan nunau pakhat in a san sungah fa 1.34 (Nupi nu pathum in an san sungah fa 4 an nei tihnak) a nei tiah record tuah a si. Japan hi leitlun ram tthangso lak ahcun milai karhnak a malnak bik a si ih, kum 60 ih pension an si ttheu ruangah an ram cun hnattuantu a sam deuhdeuh. Curuangah aoczah cun kum 65 ih pension ding dan thar a tawlrel rero asi. -Reuters.

 

Thailand ah kum thar hmuaktu 60 thi: Thailand khawpi Bangkok ah kan dung tlawngkai nithum zaan ah night club pakhat ihsin meisa kang a suakih, a sungih mi 1,000 hrawng cun suahnak hawlih an nek awknak lamah mi 61 an thi. Hih nightclub sung ah hin meisa ih lekthiam pawl an sawmih, cupawl cun mi 1,000 hmai ah meisa a phun thawn zoh nuammi thiamnak an langter. Asinan, cupawl ih meisa kham thei lo tiangin a kiangkap ih zu le thil dangdang khal a kang vivo ih, minute 10 sungah meisa cun inn pi sung cu a luahkhat thluh. Hrekkhat cu meisa ruangih thi an si ih, hrekkhat cu meikhu hip ruangih thi an si. A tamsawn cu ttihphang zetih lamzin an hawlnak lamah pakhat le pakhat an nek aw ciamco ih, a tlu hmaisa pawl cu an pal ciamco ruangah a si tiah mitih a hmutu pawl cun an sim. Ramdangmi 35 cun hliam an tuarih, Singapore rammi pakhat tla a thi. Hih ‘Santika Club’ hi sawng hnih a si ih, Bangkok khawpi lunnak bikih um a si ruangah prime minister Abhisit Vejjajiva cun a hmun ah a ra zoh ih, hliam a tuartu pawl hnen ah, “Ziangah so meisa thawn nan lek?” tiah a sut hai.

 

Bangladesh in prime minister thar nei: Kan dung tlawngkai nikhat ih rampi hrilawknak a neitu Bagladesh cun prime minister thar ding ah nunau Sheikh Hasina Wajed a nei thar. Patliament seat 300 ihsin 231 rori a ngah. Hih hril awknak ah hin vote firnak a um hnuaihni tiah thuthang a um ko na’n a hlanih prime minister rak ttuantu Khaleda Zia cun Hasina ih nehnak cu a pawm. Khaleda hin seat 27 lawng a ngah. Hasina cun rampi hrangah opposition party pawl thawn kan ttuantlang ding tiah a sim. –AFP

 

Sport News

 

Leitlun lehlan lam (World Sports)

STEVEN GERRARD IN THUHLA BUAI A NEI

(England Football team in suahter a si men thei…)

-Salai Kawl Lian

Liverpool captain Steven Gerrard(kum 28,fate pahnih pa) a football lehpi rualpi pawl thawn kan dung zarhpi zanih New Castle 5-1 ih an neh ruangah tlawngkai nikhat zanah neh lawmnak tuahin  Louge Inn bar ah an nuam zet hai. Himi tumih an lehnakah Gerrard in goal 2 a thun ve ih cumi lungawi tuk um thei lo lawman si bik. Hi zan cu an rualpi za in an in ei nuamin an duh ai ih tam an an in ei deuh a si hmang ding. A tawpah awkam elawknak ihsin kutthlakaw ih sualawknak tiang a hung suak.Hi dawrih part time ih tuan Marcus McGee DJ(kum 34, fanu 2 ih pa)cu Gerrard in music a duh zawng vun thleng sak dingin a fialih a thleng sak duh lo.

Cuisin awkam an elaw hai ih  McGee in a awmah a vun tul. Cucun, Gerrard khalin a thin supaw thei nawnlo in a kiu in a ka zawn cu a vun hngawng hlekhli. A rualpi pahnih khalin  beer dawng in a lu ah a ra vaw ve. Hiti an hun buai taktak hnu ah doorman(sangka kiltu) le mi dang hnatuantu pawl khal khuilamih simaw anrak tlanhlo thluh. An ti buaibai awk can hi minute 10 hman tilo a sinan an tuahmawhawk na man zet. Hi zanah McGee hi thawmhnaw thiangfai zetten a rak hruh.An velh nakah a ha a thlawng, a cal le a hmai ah tuahmawh a siih hospital tiangin fehpit a tul. A lu ah hmun 4 lai thit a si fawn.

Hi dawr tapthlangah thisen le khuathai kuai reirei tivek pawl khal hmuh ding a um.Hiti an buai culci ruangah hi an ei in nak dawr khal hi tlawngkai nikhat in khar a si hngal. A hmunih mitih hmutu pakhat cun “ Hizanah Gerrard hi nuam zetten a umih zu khal a ri tuk lo” tiah a sim ve. Tifinriat kapih um southport khua ih palik pawlin Gerrard le a rualpi 3 hi sualaw ih mi tuahmawh timi case in tlawngkai nikhat ni zinglam nazi 2.30am (GMT0230) ah an kai. Palik pawlin an kai ihsi nazi 24 zik lai cu an hrengtar hai a si. Thuneitu pawl in hitivekih buaibainak an tuah ruangah kum 5 sung thawng in tang ding tiang in thu an rel sak. Asinan, hi ni lala ah amah thawi an kaihmi midang 3 khal cu an tlun thu zianghman rel sak loin an zaten suahsal a si.Asinan, an thuhla cu zoh bet vivo ding ti a si ve thung.

Gerrard cu John Doran (kum 29) le Ian Smith (19) pawl thawn 23 Jan 2009 ni ah court ih va fehsal ding in thu nei tu pawl in an ti. A rualpi an kaihmi pawl hi football lam lek tuk an si lemlo. Gerrard ih nupi Alex Curran khal papi palik kaih tawng cu arak buai ve nasa. Police station ah a va fehih thuthangca ngantu pawlin thuhla na rak sut rero nan ziangti hmanin a let duh lo. Southport umnak hmun hi Gerrad ih umnak ihsi hla tuk lemlo ih um a siih Forby , Merseyside in peng 10 zikte ih hla ah a um. Gerrad hi England rampi aiawhin vawi 70 a rak lek zo. 2005 ah Liverpool club in Champion League ih champion laknakah a rak tel zo. England siangpahrangnu Elizabeth II in Buckingham Palace (Siangpahrang Inn pi) an ramih mi hminsin tlak member pawlah a telh ve zo mi khal a si.

Liverpool manager Rafa Benitez in “ Gerrard hi cu a football lehnak hrangih pum a peknak, training ih a taimaknak pawl hi zohthimtlak hruaitu pakhat cu a si hrimhrim.” tiah a ti. Steven Gerrard hi England football team ih mid- fielder a siih leitlunih mid-fielder lek thiambik a si fawn. FA cun “Hi buaibainak hi ziangruangah a ra cang ti hi zo hmanin faingfelten kan theihlo ruangah le palik lamih thu le hla an suh rero lai ahhin cun ziangti hmanin hrawlhawk  a tum lo” t’in a rak phunag ve.Liverpool club in official in thu a suah. Gerrard hi Liverpool club hrangah kum 10 rinum le tangkai zetin a rak um zo ih curaungah club khalin tuitumih a thuhla buai ah a theitawk suahin a bawm ve ding a si”. Tuitum thuhla vekin 2003 ah Alan Smith cu mipi lamah tidai dawng a hei denih ruangah palik  lamin thilsual tuahah an phuang. Curuangah England team ihsin suahter a si. Hilo mi dangdang khalin zurit ruangah le thil dangdang raugnah thuhla a phunphun an rak neih culci hai. Gerrard  hi England team ihsin cawlhter ve a si pei maw?

 

 

 

CHELSEA STAR DIDIER DROGBA

( Chelsea ihsin a suak thlang men thei!)

                                    -Salai Kawl Lian

Drogba (kum30), Ivory Coast hitman in a liam zomi thla 12 (kumkhat) sungih a rak tuarnatnak hmuahhmuah cu a hnuailam vekin a phuang suakaw thluh a si.Khimi can pawlah khin a umnak club hrangah goal 9 a thun. Cup final tumhnih ah caklo sinakah tel in le Champions League final ah Manchester United thawi lehnakah lek thei lo in a rak um. A tlangpi thu ih a rak buainakbik pawl cu:

June thla ih a pi thih tumah Chelsea club lam ihsin mallai lawng theihthiampinak a um.Thinlung takte ih football leh duh nawnlonak a neihmi cu titawpmai loin a thinlung a fehpi vivo.

Hliamhma a neih hnu ah Club in a parah rinnak nei nawn lo in a thei.

Stamford Bridge ah a rual rak kawmngaih zetzetmi pawl Geremi,William Gallas le Claude Makelele pawlin Chelsea club an suahsan hnu ah a umhar thei zet. Manager Luiz Felipe Scolari in ka lehnak position ih lek dingin ziangruangah paisa tamzet cemin Nicolas Anelka a lei? timi hi theihthiamhar a ti zet. Drogba, zarhkhatih pound sterling 90,000 ngahtu in hiti hin a thinlung sungih a rak paimi thuhla pawl cu a tang suak thuaithi…..

“Tuikum sungih thinsau te ih ka tuar tento dingmi cu football lam a silo.Thildang hmuah aiin i tawnhremtubik cu ka duhdawtzet le ka ngainat zetmi ka Pi thih thuhla a si sawn. Hi thuhla hi keimah te khalin ka sutaw ko. Himi thehhnu hin ziangtin thil ka tuah vivo ding timi a can a kim tikah lawng theih ding a si” a ti.“Himi thuhla  ahhin keimahte’n hiti’n ka tawng suak. Hitivek  thil thathnemnak neilo pawl ka tuah theh hnu ah ziang laksawng hman khal a um lo ding timi khal ka thei ko.Club ihsin in bawmnak le thazang peknak khal a umlo hi a dikmi asina’n cumi ruangah cun zianghman tihphannak ka nei cuang fawnlo. Hivek thil a rak can hnu zarh malte sung ahhin football leh bet duhnak zianghman khal ka nei nawnlo. Asinan kum 2009 ahcun thil pakhat cu a ra thleng lai ko ding. Cumi cu ziang a si tiah kalo sim cih duh lemlo…”  tiah thuthangca tawlreltu pawl hnenah a sim.

Khitivekih “The Sun, London” thuthangca ih a umnak club sawiselnak arak  neih ruangah England paisa pound sterling 100,000 cu kuan dingih a tlun thu relsak a si. Hitivekih a nuncan zilh nakih paisa kuanter asi ahcun a zarhkhat hlawh cu a cem thlang ding tinak a si.

Inter Milan in Owen lei tum: Michael Owen (kum 29), tui’ New Castle ih an rinsanbik pakhat cu Jose Mourinho, Inter Milan boss in lei a duh zetih sterling pound 12 millions tiang pek a ngam thu a phunag. Owen hi tui a leh rero nak club thawi agreement an tuahmi cu June thla lamah a cem ve thlang ding. Himi club in an duh nawnlo asilo hmanah amahin suah a duh thlang asi ahcun anih hrangah cun zianghman lungphannak ding a um lemlo.Serie A hotu leaders Inter Milan lam khalin tuihlan thla tam tel ihsi lei dingih anrak hual cia ringring asi zo ih ruangah a ranglamih Newcastle thuneitu lam pawl dawr an tum thu an phuang a si.

Man U in Tevez zuar suak men thei: Manchester United in Tevez hi kum hnih agreement in transfer man pound sterling 32 million thawi anrak leimi a si. Tu ahcun Man U lamin himi zah paisa cemnakah anih hi a tawk ko maw? ti’n an ruatsal  rero. Real Madrid le Inter Milan lam cun Tevez an zuar suah ding hi an hna an rak thawng nasa.

ENGLISH PREMIER LEAGUE: Liverpool in  Newcastle cu 5-1 rori ih aan neh raungah point 45 in sang bik a si lai hrih. Chelsea in  Fulham cu 2-2 ih a draw raungah a point hmuh ding zatih hmu thei nawnlo in point 42 hmu in duh khalle duhlo khalle Liverpool  dung a thlun. Hi tum 20 an sit veve hnu ih an result a si. Man U cun tum 17 a sit zo ih point 35 a hmu. Arsenal in tum 20 sit zo in point 35 a hmu ve. Tuikum ih champion ngahtu ding hi zo bik an si pei ti cu atheihthiam a har deuh hrih lai.

Hrekkhatin Chelsea rori in champion a ngah ding tiih an ti lai ah hrekkhat vet hung cun Liverpool asilole Man U as I ko ding tiih mai zum dandanih tawng kan um celcel ko. A tikkcu thotho in a dikmi a phuang lai ko ding.

TENNIS:Tuikum French Open trophy cu fala mawite, Ana Ivanovic in Dinara Safina cu a nehih a lak ta riai. Leitlun nunau tennis star, Serbia rammi Jelena Jankovic hi world No.1 a si.

BOXING:Khristian pawlih kan uar zetmmi Evander Holyfield (kum 46) heavy weight vawi 4 lai champion rak ngah dah cu tui kan dung te Dec 20,2008 ih Nikolai Valuev in a neh nakah lungkimlonak mallai a um. Zohdiktu (judge) lamin point rukmi a um ti a si.WBA Championship Committee in zohdiktu lam cu an point siar dan thuhla ah rukmi a um timi hi zoh fiang sal dingin a fial. WBA Championship Committee khalin uartu (fans) lam ngaidan le media (thuthang tawlreltu) pawl upatnakin an zoh fiangsal rero lai a si tin thu a suah.

 

 

2008 thuthang lawrkhawm

 

                2008 LEITLUN THUTHANG LAKKHAWM

January

1st  ah Europe ram pawlkom cun kuak fawh lonak ding daan thar an tuah thawk. Kuala Terangganu khawpi cu Malaysia ih khawpibik 12 nak a sit hawk.

2nd ah  Malaysia Health Minister Chua Soi Lek cu nunau mipatnak lam DVD zuk sungih a rak tel ve ruangah a hnattuannak ihsin a cawl.

4th Leitlunih mitcaw pawl hrang ‘Ni’ (World Braille Day) a si.

11th  Leitlun ih tlang sangbik Everest tlang par a kai hmaisabik tu Edmund Hillary cu New Zealand ram Auckland ah kum 88 si in a thi. Amah hi khuai (bee) zohkiltu a si.

16th Kawlram khawpi Yangon ihsin saklam peng 65 ih Pyinbonegyi ah bus sungah bomb a puak ih, a mawngtu a thi.

22nd Bat Man zuknung netabik ih misual (jocker) a ttuantu Heath Ledger cu New York ih amai’ inn sungah, sii phun thum rawimi a ei ruangah a thi.

27th  Indonesia president hlun Suharto cu natnak phunkip in a thi.

Fenruary

14th Leitlun ah Valentine’s day hman a si. East Timor ram president Ramos Horta cu a umnak inn ah tapung pawl in an kapih, Australia sizungah an fehpi.

27th Singapore le Indonesia ih cangvai ttheu Muslim tapung Jemaah Islamiah hotu pakhat Mas Selamat Kastari cu Singapore thawng inn ih ek inn sung ihsin a tlansuak.

28th  Thailand prime minister hlun Thaksin Shinawatra cu kum khat sung Hongkong ih a relh hnu ah an ramah a kir sal. Rampi tangka eiruknak thubuai ruangah thutthennak inn ah a feh cih.

29th  Iraq ram thutthennak cun Saddam Hussein thluntu Ali Hassan al-Majid cu a thihnak ding in lungkimnak an tuah. Ali hi 1980 ah Kurd miphun pawl thah ciamconak dingih boruak sia a tuah ruangah ‘Chemical Ali’ ti’n leitlun ah a lar. #2005 ih Muslim pawl dodalnak cartoon cu Denmark ram ihsin a ra suak sal.

March

8th  Malaysia ih Barisan Nsional cun rampi hril awknak ah nehnak an co. Opposition party cun state 5 ah nehnak an co ve. 10th ah prime minister Abdullah Ahmad Badawi cun thuneihnak a clhlang sal.

10th Kawlram ih hlasak thiam ‘Sain-Tthi-Saing’ a thi. Germany ih Maria Lanch Abbey Buddhist biakinn a kiltu phungki pakhat hnen ihsin nunau mipatnak lam le mipa le mipa sualpi awknak lam DVD 230 rori palik in an kai. # India ramah naute nunau lu pahnih nei a suak. A lu cu tthen thei lomi a si ih, a mit pali cu veikhat ah an tthep rual thluh. A ka pahnih in pawhte tii a fawp thei.

20th US in Iraq a donak kum 6 a kim. March 2003 ihsin March 2006 sungah US le amah bawmtu raalkap 4000 hrawng an thi ih, Iraq mipi le Saddam Hussein ih raalkap 104,000 ihsin 223,000 tiang an thi. (World Health Organization)

22nd  Taiwan rampi hril awknak ah Kumingtan party hruaitun Ma Ying Jeou cu president ih hril a si.

April

2nd Queen Elizabeth cun kum 82 nak birthday a tuah.

5th 1959 ih tuahmi Benhur film le Moses film ih minta Chalton Heston cu a umnak Beverly Hill ah kum 84 in a thi. Heston hin 1959 ah Oscar a rak dawng. # Pope Benedict XVI cun a hmaisabik hrangah muslim pacang pakhat cu ‘Khrihfa ih lut cuang loin’ Khristian daan vek in ipilnak a tuahsak. Leitlun ih muslim ram tampi cun an dodal.

10th Thaland ih Ranawng ah kawlram mi 54 cu mawttaw sungah thawthawt thei loin an thi. Daan loih lut a si ruangah vur bawm ah mi 101 an retkhawm ih, a thi lo pawl khal an kai thluh. Mon miphun lam an si.

14th Cambodia ramih kut ttial zohthiam ‘Im Borim’ cun tuih kum 2008 hi nunau thinsiat kum a si ding tiah, leitlun in harsatnak a phunphun a tuar ding cu a simlawk.

22nd Zaanlam nazi 8:20 hrawngah Yangon khawpi lamzin kap ah bomb a puak. Minute rei lote hnu ah Trader Hotel kiangah pakhat a puak sal. Thihnak a um lo, mawttaw malte a siatsuah.

25th FHM magazine cun leitlunih casiartu pawl ngaidan lakkhawmnak a tuah ihsin nunau sexy bik cazin a tuah ih, ‘Transformer’ film ih mintami ‘Megan Fox’ cu a hrilsuak. Angelina Jolie cu 12 nak a si ih, Paris Hilton cu 77 nak, Britney Spear cu 100 nak ti’n.

28th  Austria ramih pacang pakhat Josef Fritzl cun amai fanu rori Elisabeth Fritzl cu kum 1984 ihsin innhnuai ah a khum ih, a ihpi reronak ihsin fanu le fapa 7 lai a rak nei tiah palik in an hmusuak ih, an kai. Germany ah muslim pawl huatnak a ra suak. Naute ruak pali kawltu khal kaih a si.

May

2nd  Kawlram ah Cyclone Negris cu nazi pakhat ah kilometers 215 in a hrangih milai 140,000 ihsin 152,000 tiang an thi/hlo.Sri Lanka , India le Bangladesh khal in an tuar. Milai 1,500,000 in harnak nasa zet an tuar.

7th  Russia president thar Dmitry Medvedev cu hrilsuah a si ih, nazi pahnih hnuah Vladimir Putin cu prime minister ding in ttuanvo a pe cih.

12th Tuluk ram ah linghnin nasa zet a thlengih milai 69,000 an thi ih, 374,000 in hliam an tuar. 4,800,000 cun umnak an nei lo.

14th  Israel in  Independence Dimond Jubilee (kum 60 kimnak) puai an tuah.

19th Dr. Mahathir Mohamad cun amah le a nupi Siti Hasmah Mahamad Ali thawn UMNO (United Malaysian National Organization) an suahsan.

27th Kawlram acozah in Aung San Su Kyi cu kumkhat dang hren bet sal.

June

3rd Obama cun an party Democratic aiawh ih president candidate si ding in Clinton a neh.

15th Kawlram raalkap pawl cun Cyclone thlipi a tuartu pawl rak bawmtu ‘The Myanmar Tribune’ thuthangca editor cu amah ttuan bawmtu minung 16 thawn an kai tiah AFP thuthang cun an phuang.

19th Aung San Su Kyi hrang kum 63 kimnak birthday cu Kawlram NLD zung ah an hmang.

20th Leitlun ah ‘World Refugee Day’ hman a si.

22nd Philippine ramah lawngpi a let ih, milai 750 an thi.

27th Leitlun ih Microsoft Corporation hotubik Bill Gate a cawl. (retired)

July

14th Catholic kawhhran cun World Catholic Youth Day cu Sydney , Australia ah an hmang. # Vietnam ramih Miss Universe 2008 hrilnak ah Venezuela ram fala Dayana Mendoza (k 22) cu hril a si.

16th UNHCR card lem kaitu Russia mi 1 le Ukraine mi 2 cu Ampang an kai.

19th Kawlram in Martyr’s Day a hmangih, Aung San Su Kyi cu sawm a si lo.

21st ASEAN meeting 41 nak cu Singapore ah tuah a si ih, Kawlram aiawh Nyan Win cu nasa zetin an kawk. # Nepal ram cun a hmaisabik dingah Ram Baran Yadav cu president ding in an hril ih, siangpahrang uknak a tawp.

25th Leitlunih ‘Test Tube Baby’ (In Vitro Feertilisation-IVF- thlalang sungih naute an tuahmi) suak hmaisabik Louise Joy Brown cun kum 30 kimnak birthday a tuah. Mipa IVF ih suak hmaisabik Alastaire Macdonald (kum 25) cun a hmanpi.

August

1st  Poland khawpi Warsaw cun German (Nazi) acozah uknak hnuai ih an harsatnak kum 64 kimnak an hmang. Poland hi leitlun raalpi 2- ah mipi thih tamnakbik a si.

6th Hiroshima Day kum 63 nak hman a si. #Canada ram bus sungah Weiguang Li cun tlangval pakhat Tim Mclean (k 22) cu san um loin a ihthah lai ah nam in a dawt ih, a taksa khal a ei sak.

7th US president George Bush le a nupi Laura Bush cu, an fanu Barbara Bush thawn Thailand an tlawngih, Laura le Barbara cun Karen raaltlan pawl umnak Mae La Refugee Camp an pal. Russia acozah cun Georgia ram cu raalkap cahnak thawn a do thawk.

8th Tuluk ramah Olympic 2008 onnak puai tuah a si.

11th  Thailand prime minister hlun Thaksin cun a thup te’n an ram a suahsan ih, Britain ramah a relh.Cuih hnu ah refugee sinak a dil.

13th Leitlunih nunau sangbik Sandy Allen a thi. Amah hi 2.31 meters  a si.

15th Mohamad Saiful Bukhari cun muslim biaknak cabu thianghlimbik Quran parah thukam cingin a pu (boss) Datuk Seri Anwar Ibrahim cun a sualpi (mipa le mipa sualpinak hmanpi) tiah thuthang ngantu 30 hmaiah a phuang aw.

18th  Pakistan president Parvez Musharraf cun a cawlh ding thu a phuang.

19th  Malaysia lawngpi MT Bunga Melati Dua cu Somalia tipi gulf of Aden ah misual (pirate) in an.

20th Aung San Su Kyi in UN aiawh ih  tawngtu ding Gambari a tawng duh lo.

29th Canadia  pop singer Avril Lavigne cun Malaysia ah concert a tuah.

September

1st Leitlunih kedam tuahtu company lar zet Bata company neitu Thomas Bata (Czech Republic ih suak) cu a kum 93 nak ah Canada ram ah a thi.

13th Kawlram, Kyak Kyi khua cinema hall ah bomb vei hnih a puak. Mi pahnih an thi.Acozah thiltuah tiah mipi lam cun an puhmawh.

14th Aung San Su Kyi in rawl a ul. A ei ding rawl an peek khal a la lo.

15th  Indonesia ramah 30,000 Rupiah (RM 11) a lakih co dingin mipi an nek awknak ah milai 11 an thi. Biakinn varanda cim ruangah an tlanih 21 an thi bet.

16th japan ram Kyoto khawpi ih leitlun ram neinungbik 8 (G8) tawng awknak ah US secretary-general Ban Ki-Moon cun Kawlram thuhla cu napi ih ruat ding in UN ihi Veto power neitu pawl hnen ah a sim.

22nd  Russia in Nuclear bomb hmangtu lawngpi Venezuela ramah a tlawn ter.

23rd Kawlram acozah in thawngtla 9002 a suah.

24th  Japan prime minister Fukuda aiawh dingah Taro Aso cu hril a si.

25th US in Nuclear bomb hmangtu lawngpi cu Japan ah a tlawn ter ve

27th Kawlram NLD party kum 20 nak an hmang. UN security council in New York ah Kawlram thuhla relkhawm. Ban Ki-Moon in kawlram democracy lamzin cu ‘Thu’ lawng si loin ‘A takin’ lang seh tiah Russia , China le US a sim.

29th  Malaysia lawng Somalia tipi ih an kaihmi cu US$ 2,000,000 in an tlensuak sal ih, Somalia pirate pawl cangvaihnak daihter dingin UN in ttuanvo lak a tum.

October

16th Aung San Su Kyi in kawlram acozah hnen ah mah suah lohli ding in dilnak ca a kuat. 2003 May 30 ah kaih a si ih, kawlram dan cun nainganzi ruangih an mi hren pawl cu kum 5 lawng kaih thei tiah a sim na’n 2008 may 30 hnu khal ah an suah duh lo ruangah, acozah cun ram daan khal a thlun lo a ti.

22nd  India ram in thlapi um dan theifiang ding in satellite (rocket) a thlah.

25th Oscar laksawng ngahtu Jennifer Hudson ih unaupa, a nu le a tunu an pathum in an umnak Chicago ih inn sungah meithal ih kap aw that in hmuh an si.

26th Leitlunih thaubik Manuel Uribe (k 43) cun nupi a nei. 590 kg a si.

November

3rd Kawlram lawng cu Bangladesh pawl tipi sungah lut in zinaan le thil ttha umnak hawl in an vak. Bangladesh in nasa zetin a dodal, palai tla a thlah.

5th  USA president hrilnak ding result a suakih, Obama cun nehnak a co. President 44 nak dingin Jan. 20, 2009 ah thuneihnak a cohlang ding.

7th Taiwan ramih Pastor Tang Tai Shen (k 58) cu kum 2 sungah nunau 13 a rak sualpi ruangah le cuih a sualpi rero lai khal vedio a rak zuk ruangah kum 10 thawng tla ding in thutthensak a si. Amah bawmtu  tla kum 7 thawng thlak an si.

8th British siangpahrang fapa Charles cun kum 60 kimnak birthday a tuah.

11th Europe ram pawlkom cu France ram ah leitlun raalpi vei khatnak a cemnak ni hngilh lonak puai an tuah. Leitlun raalpi kha Nov. 11, 1918 ah a cem a si. #Kawlram raalkap pawl in phungki le tlawngta hruaitu 14 a kai ih, Insein thawng inn ah a kuat. An zate’n kum 65 ciar an taang ding. 1988 generation thuhla ruangah a si tiah AFP cun a sim.

22nd  Malaysia ih muslim biaknak atpitu pawl cun ‘Yoga’ exercise hi ‘haram (prohibited—tuah lo ding) a si tiah an kham.

26th  India ram thlanglam Mumbai khawpi ih hotel pahnih cu muslim tapung pawl in siatsuah an tumih, mi 195 an kap that. Tapung 12 an si ih, 11 cu an kap thar ih, a dang pakhat cu an kai ngah. Raalkap pakhat a thi, hotel kiltu 15 le Ramdangmi 30 hrawng an thi.

December

1st leitlun ah ‘World AIDS Day’ hman a si.

Zimbabwe acozah in tangka cahnah khat ah (note) 5,000,000 s tuah. Leitlun ah man nei lobik tangka a si.

13th  South Africa khawpi Johannesburg ih Miss World 2008 hrilnak ah Russia fala Ksenia Sukhinova cu hril a si.

14th  US president George Bush cu Iraq ramah a tlawngih, thuthang lakhamtu pawl thawn an kawm awknak ah Egypt rammi TV host cun a kedamin a deng.

15th  Israel cun Palestinian thawn rem awknak ding ah thawng tla (Palestinian mi) 229 rori a suah. Israel le Gaza ramri ah Judah miphun atcilhtu pawl cun muslim pawl an dawi ruangah Paliestinian cun Israel ram thlanglam Negev kiangkap hrawng ah rocket bomb an kap thawk.

17th UN secretary-general Ban Ki-Moon cun Kawlram acozah in democracy tawlrelnak lamzin ttha a tuah ngaingai hlan cu, Kawlram sungah ka tlawng lut lo ding ah tiah a phuang sal.

21st Mauritan raalkap acozah in thuneihnak an lawngsakmi an president Sidi Ould Sheikh Abdallahi cu thla 5 sung thawng inn ih a um hnu ah a suak sal.

27th  Israel pawl thinheng in Gaza ih Palestinian pawl umnak ah vanzam in bomb an thlak thawk. Mi 205 an thi, 700 in hliam an tuar. Kum 60 sungah nikhat sungih Israel raalkap in Palestinian pawl an thah tambik a si.

 

 

Thuih zarh hrang thufim

Nu le Pai’ duhdawtnak a thei thiam lotu cun tikcu caan tha a hmang dah lo dingih, midang  hmuhsuamnak khal a tawng vivo lai ding ti thei seh. Allan Rover Jr.

 

 

Lai Christian Fellowship, Malaysia

Deacon Election Tuanvo Zem awknak

(2009)

 

1. Pa Za Dun                            President

2. Pa Thawng Hlei Thang         Vice President

3. Pa Kap Lian Thang                Secretary

4. Pa Len Hlei Thang                 Joint Secretary

5. Pa Kawl Lian                         Treasurer

6. Pa Za Cung Nung                  Assistant Treasurer

7. Pa Lal Ring Lian                   (Nubu Advisor)

8. Pa No San Thang                  ( -do- )

9. Pa Mang Ci Hrin                   ( Mino Advisor)

10. Pa Mang Kip Zul                 ( -do- )

11. Pa Khaw Tin Mang              (C.E. Advisor )

12. Pa Hrin Kam                        ( -do- )

13. Pa Sen Bawi                        ( Mission )

14. Pa Lian Luai                        ( – do – )

15. Pa Lal Hre Lian                   ( – do – )

 

 

 

A neitu                LCF, Malaysia

 

Editor                     Biak Chawn

Joint Editor            Salai Kawl Lian

                                                      

Zemdarhtu(Circulati on managers)

SalaiLiante

                                  Obed Cungte

                                   Lal Ruat Lian

Khumte                 

Calai kawmiti            

                               Salai Kawl Lian

                               Mang Hlei Sang

                               Biak Chawn

                               Obed Cungte

 

Advisor                  Upa Za Dun

Patron                    Rev. Run CungMang

                              

Contact

                                  Hruaitu

                                  Bangunan Tan Kim Onm

                                  No. 46-48 2nd Floor

                                  Jalan Sungai Besi

                                  57100 Kuala Lumpur

         

   E-mail :                  hruaitu@yahoo. com

   SMS   :                   016 3440 672 ( Biak )

                                   016-302 1254 (Kawl)   

     Pastor                    017 – 3880 848

Comments

comments

Comments

%d bloggers like this: