Hruaitu Issue 97

A Sung Thu ( Table of Content )

Editorial  …………… 1
Ziangruangah Biakinn kan feh ding…….. 2
Thlawsuah malza ..nan … 3
Na rualpi pawl ih lungput theih na duh maw?…..4 – 5
Lasi Khawpi le Tan ….6
Ka Duhdawt zet mi Ka Fala ………… 7 – 8
Eco & Sumdawnnak .9
Kanmah Sung thu….. 10 – 11
Myanmar Thuthang …12
Movies ……13
Adverticement ….. 14
Thuthang Lawrkhawm …… 15 – 18
Myanmar Politics Thlirnak …. 19

Editorial
                                                           Hlim hmel
                                                         ( Smiling
Face )

Hlim hmel hmuh hi milai zo ciau khal in nuam kan ti ciau ding.
Keikhal mithmai pante cu zohnuam ka ti zet.  Fala hmel sinpi lemlo
khal in hni siamsi ten in biak ah cun thin a dam ruahro. Asinan
ziangtluk mi mawi khal in ti hmukhmi ih in biak ah cun vawn zohsal
hman ka paih lo.

A mawinak khal ka hmu thei nawn lo.Culawng a si lo. Pulpit par ihsin
thuthangtha in simtu pawl mithmai khal ka rak zoh keukeu theu.
Mithmai panten, duhdawtnak lungthin ngaingai thawn thu sim tu pawl cu
ka uar hlei ce, an thu simmi khal ka thinlung ah a lut cuang.  Jesuh
khal in mipi pawl a kawk lai ah ….mithmai pante in a kawk ka
zum…asancu zo ciau khal in an ngaina ih a kiang ih um an duh theu
ruangah a si.

Awle, Smiling face timi hi milai pakhat le pakhat kan pawlkomawknak
ah, siipuazii kan tuahnak ahle nitin kan tlanlennak ah a thupi tukmi
a si. Cucun kan tuahmi thil ziangkim ah hlawhtlinnak in pe thei ti hi
hngilh dah hrimhrim hlah. A hleice in mipi hmai ih na din tik ah
mithmai pante thawn din zuam aw.  Kan landan hi kan thinlung langsuak
ter tu a si.

                                         Seromns & Articles

Ziangruangah  Biak Inn kan feh ding ?

        Thlarau lamih mi nung le um nasi le hi thu hi a hrangah cun
siar a hiar um zet ding nan,thlarau lam mithi hrangah cun  ih hmu ter
tu a si men ding.Sihamnsehla,Thlarau lamih minung lo, nan thil ruat
pawl nasi le cu ruahsan ding a um lai !

Ziangahruangah Biak inn ah kan feh ding ?Biak inn ih feh tamzet mi
pakhat hin Pastor pakhat hnenah Biak inn feh hin umzia a nei lo asi
hi .. Kum 30 rori Biakin ah ka khawm aw thlang,sermon hi a mal bikah
3,000 ka ngai thlang nan,ka nunnak ding hrangah cun Sermon pakhat
hman ka mang ring ring thei lo,curuangah hin Pastor khal hin a sermon
laka men,kei khal hi kakhawm hi caan ka hmang lak men a si hi?tiah a
ti.

Pastor pa cun a ngaihnak thei lo dingah a neih,nan hi tin a sawn, ?
Kei khal in ka nupi hi kum 32 ka nei thlang,rawl hi a mal bikah
32,000 lai cu rawl in suan sak thlang ding,nan ka nunnak dingah cun
ziangmi bik kha ha asi tiin ka rel sal thei nawn lo.

Nan ka theih mi pakhat cu… ka ei mi hmauh hmuah ka cin ken nawn lo
hmanah,ka ei mi pawl kha in thang so ter tu le nun in pe tu an rak si
ti hi,curuangah rawl kha ka rak ei lo sisehla,mitthi ka si ding
si,curuangah Biak inn ah khal kan nunnak ding silo khal in kan than
soh vivo nak dingah kan feh ve a tul si?tiah a sawn.

Zianghman loih na um le Pathian cu Ziangah khin simaw a rak thang so
ve thung,na cem duah do le Pathian cu a nung sin sin.Zumnak cun hmuh
thei lo mi cu a hmuih,thil cang thei lo ding mi pawl khal a zumnak in
cang thei ding in a zum ih,cang thei lo a um lo ti a thei fiang theu.

Na ruat ve dah maw?
                    By:Cherry
1.Hrintharnak tel siloih Pathian hna tuan.
2.Kum reipi Pathian hna ka tuan ti sih,Thlarau hlo pakhat hman kai lo.
3.’Keimah’ti aw keeng keng siih Kawhhran le miphun hrang thiltha
pakhat hman tuah mi nei lo.
4.Ca bu,bu khat hman siar suak hrih siloih fim ti aw keeng   keeng.
5.Ca thiam zet siih fim silo.
6.Biak inn hman feh paih siloih,Pathian le miphun hrang hna tuan tu.
7.Ngah mi nei lo cun Pathian hna tuan tum lo.

Na rualpi pawl ih lungput theih na duh maw?

Minung tampi ih theih kan duh zet mi cu kan rualpi pawl ih lungput hi
a si. Mi tampi cun kan rualpi, kan boss pawl ih duhzawng; an duhlo
zawng, an huat zawng ti vek hi thei thluh sehla kan cak zet.Kan
kiangkap minung pawl ih lungput hi thei thluh sehla cun mi hlawhtling
zet kan si ding ti ih a ruat tu tla kan um ding.

Ca siar tu pawl hrangah na kiang kap minung pawl kha ziang vek
lungput an nei ti na theih duh asi len hi tin thu sut aw. A hmaisa in
nang mah ka lo sut hmasa ding ih na hmin lem khal na hmang thei.

A hnuai ih question pawl hi felfai ten  rak siar aw la a phi in rakpe
aw. Hmaizarh ah na phit dan le na lungput kan rak ngan ding. Hruaitu
editors hnenah ca in si maw, Phone in si maw Friday hlan ah rak sim
aw la a phi a dik dan cu na thei leh ko ding.

1. Na rilrawn lai fang ah na duhzet mi rawlhmeh Cabuai 1 a hlum
(bial), 2. Kil tum nei, 3.Kil li nei ah rak um sehla khui tawk Cabuai
ah rawl na ei ding.

2. Rawl cu puar zet ih na ei theh hnu ah in leng ah va feh na duh,
sangka tawh cu na nei kan ti ding. Ziangtin sangka na awng ding? Na
awng hnuah ziangtin leng ah na suak ding?

3. Leng na suak, hramlak na thleng ih na ti a hal lutuk. Cu laifang
ah  na kiangah

a. Tiva luang  b. Ti tler ih rung fawr c. Zi kan ah, Ti Phun thum in
um sehla khui tawk ih ta na in ding?

4. Hramlak ih sin inn lam pan ih na tlun laiah lamzin kap ah Sakhi
fate na hmu, Meithal khal na nei. Cui Sakhi fate cu lak na duh tuk,
ziangtin na tuah ding?

Zangfah ten inraksim lohli aw .  .
Karil rawn laifang ah ka duh mi rawl hmeh cu cabuai  kil thum neiah
kaei ding. lengsuah kaduh tikah sangka tawh cu ka vorhlam kutin
kehlamah ka ong ding.Ka ti hal laifangah tiva luang ihta   ka in
ding.Lamzin kara tlun laifangah sakhi fate ka hmuh mi cu kap sianglo
in a nung in ka kai pei cu,

             Salai Mangte

                   Falam
Dear Mangte,
          Ziangkhal a si len nathin heng hlah thu hman cu a hman
vekih kan rel atul si.Mi fel zet na si  ding,Na Nu le Pa ih thu sim
mi khal tha ten na ngai, Na boss pawl ih an lo sim vekin felten an
thu ka ngai ih ka tuah na ti theu ding nan, thil pa khat na tuah theh
hnuah na cheek sal dah lo ding.

Mi ih an lo cheek khal len na thin a heng theu ding.Nan Insang , na U
le Nau hrangah cun vision (tumtahmi ) sang zet zet na nei ko ding nan
ram le miphun hrangah ti in tumtah mi cu na nei lo ding.

Mi thinlung rang zet na siding, Na duh zet mi thil pakhat khat na
ngah thei hmanah a nei tu ih lungkim nak tel lo cun ngah na duh lo
ding. Thuthim nakah fala naduh zet mi in a lo duh lo nan a nu le pa ,
na nu le pa in an lung akim tuk ruangah cui fala cu na co ngah thei
ding nan a mai lungkim nak tel lo cun na duh cuang lo ding.

Thu ka locah duh mi cu Thil pakhat na tuah tikah tha ten zohsal
aw,lei tlunah mi famkim zo hman kan um lo,Na tuah ding mi kha tha ten
ruat hmasa aw.

                                    Lasi khawpi le Tan

Lasi hi kan pu le pa pawl cun vanmi an si ih milai le Pathian karlak
ih hna tuan tu ah anruat.A hleice in ramsa le ti sung nga pawl tlun
ih thu nei tu an ti.
Fala mawi zetah an cang thei ih an duhmi milai tlangval tla an ihpi
theu. Vaphai khawlu ih Tan tlang khi Lasi khawpi an ti.

An khua lalpa cu Lal Cung Nung a si, Lal Cung Nung cun lasi fala
lakah a duhmi a hmulo asi hmang Seipi khua ih fala hmelthahminthang
Chawngtinleri angai zawng. Chawngtinleri cu a nupi ih nei dingin an
vungdil.

Zingkhat cu Chawngtinleri a sum denlai ah lasi pawl cun an vung
ruk,Azakin an pawm ih a suk athlah zawngah Ai ka U ti lawng a au man,
Cu mi thawm a theih veten a u cun a va zoh nan a hmu man nawn lo.

Tan lasi pawl cun an lalpa ih nupi lawm in, mo puai nithumsung an
tuah.Lianche ih mangah lasi pawlin kan lo dil rero nan na va sian lo
nak an ti ih asinan an tiamcia vek in ei le in khal a tlasam dah lo.
Sa khal tampi a kap.

Lianche cu anau angai tukih Tan ah a nau a va tlawng. Anau hnenah
ziangha na tuan theu a ti ih a nau cun Bualnel ah sa ka khal theu a
rakti.Buannel cu Falam peng Hmunluah khawlu ah aum ih kan pu pa pawl
cun ramsa pawl suah keh nak asi, Chawngtinleri in a kil theu anti.

Chawngtinleri cun milai thinlung a keng ringirng ih mi hmeltha deuh
pawl cu a ngai zawng ih sa tampi akap ter theu,   Vaphai khaw
tlangval Thasiam khal a lo feh laiah Tan ih Lasi fala pawlin a suncaw
kenmi an rak ei sak theu.Nikhat cu abawh thupih an sam tukin a kaih
hrem.

Lasi fala pawl cun in thlah aw la mal kanlo sawm ding anti, A neta
lam ah cun lasi fala pawl thaw cun an ngai zawng aw. Nikhat cu Vaphai
kawpawh in hru an  burh ih ngapi sepi tia aum ih kaih tum in an au
celcel.Culai ah Tha Siam cu lasi fala pa hnih in an hrik an zoh rero.

Thasiam cun nga ka vung hual ve ding ati leuh leuh nan lasi fala
pawl cun nang mai ta ding asi tho tho,an ti san men, A tawp ah cun a
vung hual ve ih a kai ngai ngai, cu tik ah a uar aw pangih Keimah
Thasiam cakber, Su khamphei lu ka ni e, ti in a au an ti.

Cu tikah lasi fala pawl an thin aheng tuk ih in phuang aw hlah kan lo
ti ih na duh lo,tung awla na nga na ei thluh veten ,na puan tha ten
sin aw an ti ih cu tawh ihsin Thasiam cu a thi lanta .  Lasi pawl hi
kan pupa thuanthu hmun tampi ah kan hmu thei. Fala mawi zet ih a lang
theu ruangah a si hmang. Tui ni tiang in fala mawi deuh kan hmuh le
Lasi fala bang in kan ti ta.

      By Salai Ram duh

      Thulaknak Source :

        – Lai Nun Phung
                                                            – Mizo Pi
leh Pu leh a thlah te chanchin.

Ka Duhdawt Zetmi Ka Fala
( Pehnak)

A zan ih that ka tum cu a har fualfo nasa,ka ruat lo ding ka ti le,a
hnih zawngih a ha var rual le mawi,a samthlai remte cu,ka mit thlam
ah a thi thei lo! Amah ka hmuh hnu in ka duh nak khal a karh zai sin
sin.Ka zan ihthah tum khal cu a hnawk men !

Itthat thei lo cun ka taal let aw rero,hi tluk ih fala mwi le
duhnung hi Khuanu teh hin a hleice malza a sawm maw si ding ? Ka
hrangah teh a suak ke amw ? Maw ka thinlumg in tina tu men a si lai
ding ti khal ka ruat,midang hrangah cun ka ret siang thei lo… Ka ta
ding nasi tiin keimah le keimah cu ka be aw rero ..

Zing khua a van ngah cun … phak cualci’n ka hmai ka phiah fai ta
ih,ka tawnsal theinak ding sut tum cun,ka inntek pa,tappi ih meihlum
rak ai lai rero cu ka pan phei,a kiangah cun tonak ding cu ka
remve,tisa in rak zeet ih,thu dang rel pi man ka si lo,ka duh bik mi
ka fala Parte cu ziangtinha ka tawn thei ding tiah ka intep pa
cu,ningzah hman dawn lo in ka sut thawk.

A nih khal in in thei thiam nasa,’E.. si ngai,tui sun hi an in ah
Lungawithusimnak an tuah zikih,cunah cun na va tawng thei ding,nan a
man tuk ding ka zum lo,a hmel hmuh men hman na hrang a tawk lo
sawm’tiah in rak ti.

Kei khal cu ziangdanghman rel lo le ka rilrawn khal thei loin,ka
khanah cun ka kir salih,ziangmi aangki ha ka hruh ding ti ruat rero
cun,tak khawlh ding cun ka suak sal,rei ka rial lo,ka angki ka hruh
theh cun,suah nghal mai ka tum nan,ka inntek nu in,’rawl tal ei ta aw?
i ti cun,ka ning zak nasa,fala ruangih,caw bangih rawl ei hman ka
mang lo cuh …nan… in thei thiam hram uh,a mawi nak le a duhnunnak
hi hmu ve uhla,ziangtinha nan um sawm ke ?!!

An inn umnak in sim hnu cun,a hmai zanih ka ihthah thei lo nak,ka
fala mawi le duh nung za te tawng thei ding cun an inn lam cu ka pan
phei ve…Lam zin tluan ka feh lai cuh ! ai ai ai … ka zaang thluh
in ka thei,ziangtin si maw ka um,ka ton ngah ah teh kan be aw thei
ngai pei maw,ka hmel teh kha a hminsin ngai ngai lai pei ?

Aw.. cu tlukih,fala pakhat ruangih,.ka ti tuk deuh lo sawm? Nan ka
mawh lo.. a mawi in a duh nung em si ! An inn hmaiah cun ka
ding,mikhaul ka si nan,ka si nak khal ka thei duh nawnlo,ningzah nak
ruangih ka duh bikmi te ka colo ding cuh.. a cang thei lo.

Khuang awn ka theiih,hrek khat hnihsuah sai phah ih rak to vial vial
ka hei hmu hai,cu pawl lak ah ka tawnglo,ka Parte !!
Nu pakhat ka hmaiah a raih,’Tlangval nang teh, khawi lam in ha ??in
rak ti,’Kei cun,kan khaw hmin cu sal in,Parte ka tawn duh thu cu ka
sim.A ni cun `E cuti asile,ka lo ko sak ding maw’ti phah in a feh cih.

Ra suak sehla teh,ka be thei ngai pei maw ? Ziangtinha thuhmai ka
thawk ding ? Ziang thu hla ka rel pi ding ? A cu ngai in ka hmai ah
cun…. Aw,a hmaizan hnak hman in a mawi sawn !

Hni siamsi phah te in ka lam cu a ra pan,ka milai nu,leilungtlun
pathian te a si mai,mawinak hmuah hmuah amah ah a kawp theh,Zion
tlanglamih si rawng suk mi a si lo ding ka ti ngam lo !!

A feh phah cun a sam mawi le sau siangsi te,a nau bawm khuh tu cu
huih khawm in,a vorhlam liang ah cun a bang liam thlaih,a ke kar
zawng khal,a pheikhai in a cawih mawi tawk tuk,a hmai sawl zoh rem
tak mai cu fiang ten a lang sin sin.

Val ka mualpho sia zik asi hi.A mawinak le a duhnun nak cun in neh
theh,tong ding ka thei lo,a nih khal in mi dang pi zoh khin i zoh
loin ka thei,mi zanlamah tla kan mit a tawngaw tam,ka ti cia kha..a
ra thleng nai vivo,a hnisiam si lai… ziangtin ha ka rak biak ding ?

Keile fala lamih thil thiam lo tuk ka si ka rak pawm cutci men ding
maw si.. a tha lo ding e… ka ruah nak cu a buai cumco ko.
A feh zawngih a ke kar dan ihsi thawk khin rel se thei tu an um pei
maw ? Nu’i thla 9 pai mi cio cio ah cun a khum thei tu an um pei
maw…Zo in so Lasi fala asilo ti thei ding…a hringtu nu hi zo ha
asi ke ? A mawinak ka rel le ka rel khawp thei cuanglo ding.
Rinloparalah, ?Na t.ha ko maw,na hmel ka lo hmu ……….
(pehlai ding).

Eco & Sumdawnnak

China:   China cun tui an cozoh in um 2020 ah cun leilung tlum
pumpiih Car thar tuah suak tam bik an si ding tiah a ti.Germany le le
America hin tuah Car thar truah ah hin 8% le 3% lawng an si.

Kum 2020 ah cun China cun Oil(zenaan) cu 250-270 Million an la lut
dingih cu cun China cu  56% -60% in an oil a ti tamsak ding,cule an
ramih si suak ding mi thung cu 180-200 million ton asi ding.

Cule China cu Leilung tlun ih Car lei tambik le tuahsuak tam bik a si
ter ding.

Sumdawnnak lam

Leilung tlun pumpi Sumdannak thuhla kan zoh tikah tuah hin Western
kan timi ram pawl hin tlak siat lam an naih rero laiah Asia le Europe
cun tansoh lam an pan rero tiin Bejing cun November 1 ah khan a
sim.Hinah hin USA dolar cu Asia ram ah a tumsuk rero tiah a phuang.

Australia,Europe le Singapore cun Hmai kum 2006 ah khin,sumdawnnak
lamzin thar ong ding in thu an ti tlu zo.

Economics ah hin India cun 2007 ah a sang bik si thei dingin tan a la
nasa,Beijing thuphuang tu cun,tu ah hin India cu Leilungtlun Zinaan
(Oil) ah Thangso bik lam an si tiah a ti..Marketting lam khal ah
Western lam hnakin Asia hin hmai a hruai vivo lai.

“N” Nothings is impossible if we trust ourselves”
– Dr. Mahathir

Kanmah Sung thu

Mi damlo

L.C.F ih mi damlo sizung ih um kan neih mi Pa Kolh cu Pathian in lam
ahruai vivo ih tu ah cun biak theih in a um zo. Dam cak zetih ara
suah lohli thei nak dingah thlacam nakin bawm cio uhsi.

       Thawngtla

1.PhunHre            (Mangkheng)

2.  Bawi Lung         (Falam)

3. Sui Nei Thang     (Ram thlo)

4.RamCeu            (Ramthlo)

5.Zai Siam Thang    (Tivar)

6.MangPi               (BungTaw)

7. Za Lian Thang    ( Nat Chawng)

8. UVan Nei Thang (Nat Chawng)

Harsat nak lak ihsin Pathian duhdawt nak an theih fiang ih damnak le
cahnak an hmuh theinak dingah, dam cak zetih kan hnen an ra thlensal
theinak dingah le refugee adil tu pawlin an ngah thei nak dingah
thlacam nakin bawm cio uhsi.

Mi hlo kan hawl

Sadaw khua Pa Nun Sam le Nu Hrang Nei Kil tei fapa upabik Mr. Za Biak
Vung cu 2001 ah Malaysia a rak thleng ve ih; tui ni tiang a thuhla
kan theih lo ruangah a umnak thei pang nan um a si le 016 – 6642318 (
Pa Van Lal Sang, Saya Khup 012 – 9807231 ) ah a rang thei bk in
inrawn theih ter dingah zangfah kan lo dil a si.

Ka Tuarpi Zet

Kan duhdawt zet mi le kan LCF hrangih mi pawimawh zet,kan Unau Aungte
ih unau Muante cun, october ni 28 ,2005, Yangon Hospital ah in tanta
ih kan riahsia in kan tuar pi asi.

Kaleymyo ih um a nu le pa le hmuntin ih a u le nau pawl Pathian in
hnangam daih nak pe in umpi vivo hram seh tiah thla za kan
cam.

Refugee thu

Tulai UNHCR in refugee mithar interview tuah acawl laihrih.Kan dungih
an zung hmaiah vadin tlarin a dil theih anti mikha nikhat hman ah
minung 700 lenglo in interview tuah dingin an hngak.

Cu pawl kha resistor an tuah asi len nikhat ah  minung 100 hman an
tuah man lo ding, Curuangah midang 600 pawl interview an tuah manlo
mipawl in buainak an tuah ding an phang ruangah zohman tuah lo in tu
tiang an um nak asi.

  Tu naite ih Refugee a ngah thar tupawl

  1.  Sum Kau             ( Sunthla)

2.  Thian len Zing     ( Falam )

3.  Dar Lian Mang ( Falam )

Refugee hnatuan tu pawl le Falam mipi in kan lo lungawi pi.  Pathian
in lam lo hruai in hlawhtlin nak lo pe vivo hramseh.
Falam  Refugee hnatuan tu pawl le Falam mipi in kan lo lungawi
pi.Pathian in lam lo hruai in hlawhtlin nak lo pe vivo hramseh.

Office lam ah…

L.C.F. ih sanmi Office hi Laimi hmuahhmuah hrang zalen zet in sangka
on ringring a si. Asinan Office a si vek in duhvek ih tlanlen
hluahhlo lawng te a theih lo, ziangahtile kan leimi solo in kan san
cawp a si ih; kan sannak te’i lungkimlo sawng ih kan um pang le
kanmahte harsatnak tuah aw ah kan cang ding.

Curuangah Pathian in pekmi kan office hi a sung ih tlangleng tu kan
zate ih kan kilkhawi that le a mawi ding ih duhpoh in kan um
le ….kan mahte rank kan niamaw ter tinak a si.

Kan office hi Laimi International level ih in cawisang tu standard in
neihter sinsin tu a si ruahsannak thawn mawi ten kan hmang tlang
hliarhlo pei uh tiah sawmawk kan duh a si…

Zarhte zarhpi Office ih zan riak tu pawl ralrin dingmi

*  Office Sungah zuu ri in lut lo ding.

*  Kuak fawp lo ding.

* Computer Room ah tuanvo neitu lawng luh theih a si.

*  Computer duhduh in tham lo ding.

*  Computer a zir duh tu pawl Rev. S. Ni Luai hnen ah sim ding a si.

*  Varenda le zun inn lam ah hnipuan hruhlo in vah lo ding.
                                       L.C.F. Pastor – Say Ni Luai
                                           Office Zohfeltu Upa pawl

Sawmnak
Hruaitu zartin thuthangca siartu pawl hrang ih hlawmawk duhmi le
forhfial duhmi, ca ngan duhmi le faksel duhmi na neih le Editors pawl
hnen ah rawn contact lohli aw.  Na fimnak le thiamnak kha kan miphun
le Pathian hrang ah hman a cu a ti ve lo maw??? Hruaitu ah ca rak
ngan ciau ding in upatnak thawn kan lo sawm ….

Myanmar Thuthang

Democracy lamzin zawh an tum…?

Kan ram ralkap uktu pawl cun December  ni 5 ah khin Democracy hrang
ih rod-map anmahte an rak  tuahciami bang in luatnak hrang ih tuantu
pawl thawn ( National Convention ) tuah ding thu an phuang.

Tuitum ih convention an phuanmi hi International ih demmi le an pompi
lo mi a si. Ziangahtile 1992 kum ih rampi nehnak cotu NLD pawl
thawngah khum thluh tahrat ih mah vialte lawng rak hrilawk tivek cu a
fair lo.

Hi Convention hi Yangon khawlipi leng; Hmawby township ih
Nyaunghnapin camp ah tuah ding a si tiah convention hruaitu
Lieutenant General Thein Sein cun The New Light of Myanmar a sim.

Hi convention hi Kawlram Democracy ngah nak ding hrang ih zawh ding
lamzin 7 lakah a pakhatnak a si ih; kan dung March 31 ih tuah ding
sawn a si nan…December 5 ah thawn sal a si.

NLD in Convention ah tel tum lo…!

Kawlram hruaitu pawl cun hivek ih rampi biakawknak hi tuah rero khal
sehla; NLD hruaitu Suu Kyi le politics ruang ih thawng tla 1,000
lenglo suah thluh an si hlan cu NLD party cun tel an tum bembem lo.

2002 cemzawng le tu’i ni lak lawng hman ah Kawl ralkap cun kan ram
mipi157,000 rpri ralthuam thawn an do rero ih;  khawte 240 rori an
siat bal theh.
Milai 700,000 lenglo cun nun humhimnak hawl in Thai, Malaysia, India
le Bangladesh ram pawl ah kan tawi kan vak rero a si hi.

Opium hrangah milai 965,000

Kan ram hi leitlun ih bing tuahsuak tambik pahnihnak a si ringring
lai hi cu ningzak za cu a si ko. Central Intelligence Agency web
pakhat in a phuan dan cun Kawlram milai 965,000 rori cu bing ciing ih
pum cawmaw an si a ti.

Cui bing ciing tu pawl cu kilogram khat ah $ 187 ciau cozah in tuan
bang man a pe.  Leitlun ah Afganistan ram hi bing ciing tambik an si
ih Burma hin uangaw nawn in pahnih nak a si kengkeng ringring a si
hi….

Movies

Top 10 Movies

Tulai fang ih Movies thabik pahra cu …..
1.  Saw II
2.  The Legend of Zorro
3.  Prime
4.  Dreamer
5.  Wallace & Gromit : ?THe Curse of the were rabbit?
6.  The Weather Man
7.  Doom
8.  North Country
9. The Fog
10.  Flightplan

Saw II, Film hlawhtling

Serial Killer thuanthu cun North America ah Halloween ( thlahrang )
ih hman an tum lai ah ….box office ah ?The Legend of Zorro?a hleih
riai.  Tui weekend lawng hman ah 30.5million an lalut a si.

Hi film hi October 28 ah phuan zar a si ih dollar 30.5 hi ni thum
sung lawng ih an ticket zuar suah zat a si.

The Leng of Zorro

Zarh hmaisa ih Movie suak thar ?The Leng of Zorro?ah hin Antonio
Banderas le Catherine Zeta- Zones tei pahnih cun nam hman anthiam zia
langter in Calefornia ih rethei pawl cu kum le khua misual pawl lakah
an kilvennak thiam zet in an lang suak ter.

Zorro film hi 1998 kum ah suah a rak si dah zo ih tu hi a part II nak
a si.  Hi film hin tulaifang ah  film thabik pahnihnak co in dollar
16.5million a ngah a si. Hi film ah hin  Zorro ti ih kawhmi Antonio
cu innsang pabik a rak si thlang ih a nupi mawi zet Zeta – Zones
thawn harnak phunphun an tawng a si.
Malaysia khal ah Times Square le Cinima hall dangdang ah Rm. 8 lawng
in zoh theih a si.

Leitlun Thuthang Hrilkhawm

Herbalife International

Kan dung zarh ih kan than awk cia mi bang in hi Herbalife
International hin,Hmai kum 2006 January thlaah khin Malaysia,Kuala
Lumpur ah Company thar a ong ding ih,himi hrangah hin Mi nung tampi
an tul ding.

Kan rel cia bangin,experience a tul lo,qualification khal a tul
lo,nangmai sinak vek vek in an tuan thei ding.  Hnatuan nei na si
khal le,part term in tuan awla,tangka cuangliam na ngah ding.

Cun hi Company ih thil tuah suah mi hi,Asia lawng silo,Leilung tlun
pumpi ih hmin thang le hmin nei asi.
A company khal hi Mirang pawl ih din mi asi.Curuangah hi Company thil
tuah suah mi hi na hmang ve duh maw ?

Tuluk nupi nu pawl,thlakhat thla hnih na hmuh lo sung ih mawi ,nonal
ziarzi teih an um theinak hi,ziiang dang asi lo.
Na tawl tuk si maw,na thau tuk si maw a si khal le,hi Company ih eiin
ding a tuahsuah mi hin a lo bawm ding.

A hnuai ih ca hi malte in phi(answer)hnik awla,
1.Na thitha a kim thei ko maw ?
2. Na rawl ei ka teh a thaw ring ring amw ?
3.Nikhat rawl man ziangzat na cem ?
4.Thau maw tawl na duh ?
5.na vun a no mawi thei ko maw ?
6.Nangmai kum hnak in na lang upa maw?
7.Na san lam pi(feet)ziangzat ha?
8.Tu ih na rih zawng cuai(Kilogram) ziangzat ha ?
9.Kum ziat ha na si?
Hi mi pawl hi zoh awla,na taksa,na vun,na thitha a that sin sin nak
ding na duh a sile,a hnuaiih liksa(address)ah hin rak sut leh
aw.Thusuh men ah zianghman a pawi lo…
Ph: 012-6934355
email: simpson_nawl@…

Lungkimnak hmin ngan

Ram pa nga komkhawm Cambodia, Laos, Myanmar, Thaniland le Vietnam cun
Economics ti thangso le cak sawnih hmai an lak thei nak dingah Nov 3
ah khan sign a tuah.

Halloween Night
timi hi kan thei ciau ding ka zum. A theilo kan um pang le… Mirang
ram ih Kawhhran hrekkhat cun November 1 ni ah mithianghlim pawl
thihnak ihsin an thosal thluh ti an zum ih…Cumi urlawknak ah
October 31 zan cu ?Halloween Night?ti’n an ko a si.
Halloween Night ah cun Bar le Pub tivek ah party tuah in thla
thuamhnaw thawn an laam khawm hluar hlo theu.

Kawlram in UN bum….

Nov 3 ah khan UN cun kawl ram hin in bum asi tiah a ti.
Cuti a rel theinak san cu, ILO(International Labour Organisation)
thu thawn pehpar aw in, kawlram cun a hna tuan tu pawl thawng inn ah
tla a khum theu ih hleiah, Kawlramah Labour pawl in zalennak an nei
lo tiah ati.

Korea (Seoul) ah Accident.

Truck pakhat,ralkap(Air force) hrang ih missile(Bomb) phur tu cu ni 1
November ah khan high way nuaih leihnuai lam dingah a puak.
A driver pawl in an mai nunnak humhim dingih an tlansuah ruangah mina
le hliam an um lo.Hi ti laiah hin Car 50 lai cun a mei khu an hmuih
an tlan suak thei hai.Vei sarih riat lai a zawn in a puak !!

Hnen um Nunau hrang

Singapore cun Hnen um dingih an ram lut pawl cu,training tha te pek
ding tiah a ti.Hi tivek ih training kailo tu pawl cun an ramah kan
kuat kir theh ding tiah a sim bet.Hi pawl hrangah hin Training nak
hmun Indonesia le Philipine ah a um.

Hnen un ding nunau cun,Jakarta (Indonesia)ih  250sq sungah inn
kilkhawi dan(house keeping)le nauhak le upa kilkhawi dan an zir ta a
tul.

Indonesia le Philipine hi Singapore cun hnen um ding mi nung 160,000
in bawm tu an si a ti.Ram dang ih si ra cu India,Sri Lanka,Thailand
an si.

Mizoram in ralring

Mizoram cun Kawlram thawn leihnuai lamzin feh nak cu nasa sawn ih
fimkhur ding in tan an lak,a san cu tu ah hin Kawlram hi Ar ruangih

natnak ah fihlim hrih kahlsehla China thawn an peh awk tuk
ruangah,reirial lo in Kawlram ah a thleng ding tiin an zum.
Thailand ramah Kawlram mi pakhat cu ram harsat ruangah tiin a tlan
ih,police in an kaiih thu suh nak an neih hnuah Construction le
Wiring lam tuan thei nak thu an pek.
Hi mi hin Malaysia in a theiih,Kawlram mi nung Refugee khal siseh,hi
ti vek hlir lawng tuan thei ding in a rel. .

Sharukh Khan…

India ih film lamih hmin thang Sharukh Khan cun a film neta bik cu
American ramih suah a tum,Oscar Award ih nominate (hrilmi)si a tum
ruangah asi.
Hi Oscar Award hin Holywood in flim star si velo,ram dang dang pawl
laksawng pek nak neih a tum.

Malaysia Prime Minister Datuk Seri Abdullah cu,a nupi in  a liamsan
hnu hman ah ram hrang tuan thei ding in a thazaang a ngah sal zo tiin
Works Minister S.Sammy vellu cun a si.Thansohnak thar danglam zet cu
Malay ram le mipi hrang tuah sak ding in tan thar a la ding.Hi mi
thuhla hi Hindu pawlih Dewali(Nov1) sunglawi maksak ih an tuah ni ih
a sim mi asi.

Canada H5 virus timi cu Vate ihsin a hmu suak.

Canada cun  Asia e Europe ram khal ah um in an theiihhi natnak hi a
ti damnak a um lo,minung in ziangti zawng hman in an ti dam thei lo
ding.Hi natnak hi Asia ih Bird flu thawn an bang aw an ti.Ziangvek
natnak ngai ngai asi ti hi an thei thei hrih lo.

Deepawali le Harri Raya…

Ni 1,November ih Malaysia ih Hindu dewali tuah mi cu hmun tin ram tin
a deng suak,India le Malay cun pehawknak tha sin sin tuah an tum thu
khal an rel tlang.
Indian(India  mi) pawl cun a sau thei bk in an kut a ret suak ih,a
kai duhtu pawl hnenah an pek.

Himi thu thawn pehpar aw n,Malaysiacun kan ram lawng hi Leilung tlun
pumpi ih ziang miphun ,hnam le ram khal in zalen tak in an mai puai
(festival) zalen takih an hman thei nak ram asi tiah a ti,cun mi
hmuah hmuah hrnagah zoh thim tlak khal kan si a ti.

Hi puai hin `ssual cu that nak ih neh ding ti sullam a nei.?
Curuangah an inn ciau khal saangka mi hmuah hmuah hrangah an ong theu.

Islamic University

Oct 31 (monday) ah khan,International Islamic University
cointernational student Muslim si ve lo(Non-Muslim) pawl khal an lu
khuh theh ding ih an ti mi thu hla tahwn pehparaw in,Malaysia Student
Leader pawl cun ruat sal ding in an ti.

Muslim silo tiang tiangihLukhuh cu a tul nak an theih pi lo thu an
simih,India minung 12,Cozah hnuaiih tuan silo (Non-Government
Organization) pawl cun,.hi lukhuh khuh ding timi hin,Sakhua zalennak
dan le Ramdan thawn a kalh asi tiin thu Cozah pi hnen ah an thlen.

Cecillia(Hongkong fala) cun Harsatnak topkhak a thleng ve !!

Tuluk fala hmin thang, Flim Actress si fawn cu,a flim can nak ruangah
a taksa in a tuar loih Sizung a thleng !

Hi a Sizung thlennak thawn pehpar aw in thuthar lakhawm tu pawl cun ?
Fa paiih,naute titlak?tum ah an  puh !

ziangruangah tile,phone sungih a re a tongnakah, “Naute kilkhawi a
tul”ti vek ih an rak thei sual ruangah asi.

Cecillia,Hongkong fala hin ?director Wong Jing hnuai ih flim ka can
lai ihsi ka na thawk rero zo,cu le naute ka pai siseh la,hnaka tuan
lo ding,nauhak cu ka duh tuk  si?ati.

A rel bet nak ah cun, ?Hi tivekih thu thang silo tuk ral rel tu pawl
hi,a mah hmang tu Company hin a rang thei bik in an thuhla rak ruat
seh?a ti.

Kawlram Politics Thlir nak
                                            By:    Spn
UNO Envoy Paulo Sergio Pinheira ( Kawlram thuhla phuang tu dingih
thlah mi ) pa cu November 2003 ihsi khan Kawlramih a luh Kawlram
Cozah cun an rak siang nawn lo,ziangruangah tile hi pa hin ?Kawlram
ah cun Human Right in hmun a co lo men silo,a ram mipi reng rengin
zianghman hman an tuah thei  lo?tiin a rak sim dah.

Cun,kan dungzarh ih kan ngan ciami thawn pehpar awin,Havel le Desmond
ih UN hnen ih thuthen zaang dingih an rak ti hnu ah khan,Pinheira cun
Kawlramin mipi le nauta deuh pawl an nek sawr tuk thu le politics
ruangih taang mi 1100 cu suah ter thei dingin UN cu hmai thar la ding
in a nawr,a rel bet mi cu.. ?

Ram thangso rero pawl ih tu then mi hi ruah a tul nasa,hitivek men ih
an um ring ring ah cun,Kawlram cu ziangtikhmanah a tha dah lo ding?a
ti bet.

Kawlram mi fim le hrawkhrawl pawl hin Democracy pek ding hi an ruat
dah lo,tihi vei tampi cu an sim thlang.Kawlram Tlawngkai danin kan
zoh thawk asile,1987 kum ihsi khan,Tlawngta Lungawilo nak ruangah
Ralbuai pi kan rak thawk dah asi kha.Kha mi hlan sung kha cu Tlawng
thuhla khal a tha,phunhra (10) ong pawl khal kha an rak tawk ko,B.A
ong sin sin kha cu,an rak uar um law law,ziangruangahha tuisun niih
buaih(degree)la pawl hi teh…ziangruangah ha,Politics ruangah a si.

A san cu maw,mipi in ca thiamin ca thatha an thiam ah cun,kan ram
siat zia an thei thei ding ih,cu mi cun rem that kan tul zia an hmu
fiang thlang ding…ti hi kan mi hrawkhrawl pawl in an rak hmu fiang
hmai sa ngai ngai.

1987 ih Min Ko Naing,tlawngta tlan rak hoha tu hmaisa,a hnu kum an
kaih khal cu ,Tlawngkai ninga(Oct 28)ah an suah zo.

Su Kyi thawn hmai ton thu relnak an nei sal thei pei maw? Dec 5 ih
Naunghnapi camp,Hmawbi ah Lt.Gen Thein Sein neih ding mi ah teh hi
tei pahnih hi an tel thei pei maw ?

Hinahih an ruah tlan tum mi cu,tui kum March thlaih an ruah cia
mi,Democracy lamzin 7 rel tlan asi ding.

Milai 1000  thawn an rel tlang dingih thlahnih(2 months) a awh ding.
santlai lo nang le kei hman in kan thei thei a si si.

Capo

Tulai Thlacamnak
Bawipa Refugee ngah ding in i bawm aw la….a dang hmuahhmuah cu
kemah te tavuan ka la ve ding…..

Note :  HRUAITU  thuthangca sung ih suakmi pawl hi Editorial hmuhdan
le ngaihdan a si thluh lo; a ngan tu  bulpak pakhat ciar  ih  hmuhdan
nganmi an si.

A NEITU
L.C.F., Malaysia.

MANAGING DIRECTOR
Andrew Thang

CHIEF EDITOR
Richard K. Emmanuel

JOINT EDITORS

VL bawithang
Salai Cung Nawl
Salai Eddy alsawm

SENIOR ADVISORS
Rev. S. Ni Luai
Pa Thomas Thuam

Treasurer
Pa Run Thuan Hre

Auditor
Pa Sang Nei Thang

PEHZAWMNAK

42 – 14, WISMA CITY TOWER, JALAN ALOR
50200 KUALA LUMPUR
MALAYSIA

E – Mail : hruaitu@…
richardemmanuel4u@…

Hmai zarh tu tikcu ah dam ten tawnawk sal kan zuam ke aw !!!….Kan
Lungawi.
A cem vuarvi….

Comments

comments

One Comment

  1. Khaw Tin Tai says:

    thuthang ka thei lo tukih tu cin ah in kuat theu dingah zangfah ka lo dil

Comments

%d bloggers like this: