Hruaitu Issue 96

A SUNG THU
Editorial……..1
Zawi hnen ah Thla kan cam ding ? …. 2
Raldonak…… 3 – 4
TV nih caan tha a lo ruk sak maw? …. 5, 9
Ka ra tlung ding …. 6
Fala Thianghlim Mary …. 7
Ka duhdawt zet mi ka fala ….. 8
L.C.F Upa Runthuanhre Interview ….. 10 – 11
Myanmar Thuthang …. 12 – 13
Kanmah Sung thu …. 14 – 15
Leitlun Thuthang ….. 16 –  19
Sport News ….. 20

                                                 Editorial
Nunnak hi…

Khuahlan lai ihsin milai nunak hi zo ciau khal in an rak upat.
Pathian hrilmi miphun, Israel si ve lo pawl khal in milai nunak hi an
upat ciau, doawknak ih thahawk tilo cu ziang ram khal in milai nunnak
thah awk hi an dawn t.heh.

Rannung pawl khal thih phang ah a rualrual in an tlang ih pakhat le
pakhat an humhim aw t.heu. Cui nunnak cu Pathian in pekmi; Eden hmuan
sung ih milai an um laiah a hnar ih Pathian thaw cu a si. Mai nunnak
hman humhim duhnak lungthin khal nei nawnlo cu; mi kimlo ( abnormal )
deuh, rannung khal tluk lo  kan si ko ding.

Kan sim duhmi cu Laimi pawl Leitlun ih miphun hminthang le miphun
dang ih t.ihzahmi; miih tirhfial rero mi silo ih mi par ih tlangleeng
miphun kan si theinak ding umsun cu…t.an khawm, t.an tlaang,
t.anrual a si.  Pulpit par ah hmuah t.anrual t.hatnak le lungrual
t.hat zia kan kurpi rero fawn….a lenglam ah le t.hent.hekawk pawi
kan ti fawn lo.

Laimi pawl kan buainak le kan umkhawm hliarhlo theilonak san hi ziang
dang a si lo;  ?zawi thurawn ( advice ) pek theihlo milai, ma’i thu,
ma’i ruahnak, ma’i hlawknak, ma’i t.hansonak, ma’i pumpuarnak lawng
ruat tu kan si t.heu ruangah?a si.  Laimi hi t.anrual dan kan thaimlo
ah cun hnamdang phundang pawlin kan nunnak in laksak t.heh ding.
Ramsa pawl hnenah feh tahrat in fim zir kan t.ul nan ti ve lo maw?
Zawng rual hman kan tluk nawnlo a si hi.

Curuangah kan nunnak, kan parmawi nak, kan rim hmuinak…Pathian in
pekmi thlawsuah pawl hi a hman dan thiam in lungrual ten hridai
pakhat kan dir tlang hliarhlo pei uh!!!

Sermons & Articles

Zawi hnen ah Thla kan cam ding?
                                                          By :
Richard Ela
Leitlun milai tamsawn cun kanmah le pathian ciau
hnenah thla kan cam t.heu.  Kannih Krihtian pawl teh…Pa Pathian,
Fapa Pathian le Thiangthlarau Pathian….pathum lakah zawi hnen bik
ah so thla  kan cam t.heu? Ziangtivek ih thla cam ding in so kan
Bible in in zirh?

Bawi Jesuh ( Pathian ) cun leitlun a um lai ih  thlacam in zirh nak
ah, ?van cung ih a um mi kan pa?tiah…Pa Pathian hnenah thlacam
dingin in zirh. Curuangah Pa Pathian hnen ih thlacam ding a si. John
16 : 23…Ka hmin in nan dilmi hmuahhmuah cu ka pa in a lo pe ding.
Efesa 5 : 20….Ziang hmuahhmuah hrangah kan Bawipa Jesuh Krih hmin
in Pa Pathian cu thangthat ringring uh.

A si le, Fapa Pathian, Jesuh hnen ih direct thlacam teh a hman maw?
Dungthluntu pawl cun an thlunmi Jesuh hnenah thla an cam. (
Dungthluntu 1 : 24…Cule thla an cam ih, Bawipa nang cun mi thinlung
sung na thei theh. )  Kawhhran upa Stephen khal in a thih zawng ah
Jesuh hnen ah direct in hi ti’n thla a cam… “Bawipa Jesuh ka
thlarau run la hram aw?( Dungthluntu 7 : 59 ) a ti.  Dungthluntu 9 :
10 – 16 sung ih Ananias a biak tu kha Jesuh a si. Verse 17
ah ….Ananias cun Bawipa Jesuh in a biak thu a phuang.

Thuphuan 22 : 20… “Bawipa Jesuh ra hram aw?  Mithiang Paul khal
Bawi Jesuh hnen rori ah direct in thla a cam ve… ?Voi thum tiang
Bawipai ( Greek tong ih Kyrios – Bawi Jesu ) hnen ah thla ka cam ih,
hi natnak hi hlonhlo dingin ka dil? a ti.  ( II Corinth 12 : 8 ).

A par ih Bible thuanthu kan zoh tikah Fapa Pathian Jesuh hnen ih
direct thlacam le Pa Pathian hnen ih thlacam hi a pahnih in a hman
veve ti fiang ten kan hmu.Thiangthlarau Pathian hnen ah teh direct in
thla kan cam pei maw?

Thiangthlarau cu bawmtu, zirhtu, cahnak in pe tu a si ruangah a hnen
ih direct thla cam khal a sualnak a um cuang lo. Zumtu hmaisa pawl
hla khal ah Thiangthlarau hnen ih bawm dilnak hla tampi kan hmu.
Asinan, Thukham thar cun Thiangthlarau hnen ih direct thlacam cu in
zirhmi a si lo.. Nang teh …Zawi hnen ah thla na cam t.heu ?

                              Ral Donak

BY.. Morrie  Freeman
Ram duhdawt tu (Patriots) pawl cun Leilung  tlun ih thihnak
hmuahhmuah ah `Ral do nak?ih thih nak hi `thihnk sunglawi zet le
riahsiat um bik?a si an ti.

Russia Siangpahrang Stalin cun, Ral do nak ih minung pakhat thih nak
chu Riahsiat um a si ih,minung thawng tampi thih nak cu Statistic
(mithi siar nak cazin tumpi) men a si’a ti. Asinan, mi thi zo cu an
sunglawi zet hmanah minung an thih nak cu rem nak duh ruang ih thih
nak tuar an si.

Leilung tlunah buainak phun tam pi a um..  Buainak hmuahhmuah chu
thinlung ihsin a ra mi an si lo nan, buai nak tum bik suah ter tu cu
thinlung sungril ihsin a thawk mi a si.
Minung tam nak hmun cu minung mal nak hmun hnakin buai nak a tam sawn
ti hi a dik zet.

Curuang ah mifim pawl cun,’Nomen,no problems?minung um loh cun
buainak a um lo) an ti.. Pathian thu, remawknak ding hman hi, a duh
hrangah cun buai nak thu hla tuah theih mi a si.Thil t.ha bik tla hi
a hman dan kan thiam loh cun thil t.ha lo bik ah a cang thei fawn…

Pa tar pawl in Ral do thu an rel cat ih, asinan Raldonak ih a thi mi
pawl cu Mino pawl an si sawn, ziang ram khal hi do aw ciam co
hmansehla, ram dang le ram dang khal si seh, kei cun Ram sung doawknak
(Civil War) ka ti tho2 ding. Ral do nak ih fehtu pawl cu an za ten
unau an si?a ti.

Bible sung ih history hmai sa bik leh duhnung lo bik cu,Lucifer leh
Pathian ralbawi Michael te’i doawknak a si.Cu’i sin sualnak a thawk
ih, minung poh poh par ah cu’i sual nak cun a t.uan thluh… Mirang
ca ngantu N.G.Well cun, “Doawknak hi kan dai ter lo asilen Doawknak
hin kan minung pawl in siatsuah  thluh ding?a ti.. hi thu hi World
War II daih ter ding ih ca ngan mi a si.

Sakhuanak kan zoh ah cun,ziang sakhua hmanin doawknak thu hi an
lungkimpi lo.Asinan, remawknak ding thu thangttha nei ciau2, kan
sakhuanak ruangah doawknak kan suah ter phang fawn lo.A si ah cun,
ziang bik so?tih le,zo so? doawknak daih ter thei tu ding? tih mi hi
thusuhnak poimawh zet a si thlang!!

John Banyan cun,minung thinlung hi khawpui sunglawi zet vek a si
ih,ral pawl cun kan mit le kan hna ih sin cui kan thinlung cu an do
ih, nitin in lawngsak an tum threu?a ti .Japan pawl thufim cun”Letma
pathum lawngih suak thei mi kan Lei ruangah Piiruk ih sau milai a
siatsuah thei?an ti.Hi thu hi a dik zet.Bible sung lam thu ah tla
tampi a um nan, hitawkah hin Pathian thu tam sim ka tum lo.

Doawknak hi a do awtu an mal deuh len siatnak a tam ih, an tam len
thihnak a um.Bawih Jesu rat nak cu Thlarau lam doawknak ih nehtu si
dingin a si.Doawknak cu umlo thei a silo,asinan doawknak ihsin luat
thei nak le, kan do mi neh thei nak sunglawi mankhung kan hawl a
tul.Hi nah hin,siartu hnenah Bawih Jesu neh nak thu kha ngaihtuah
dingin ka lo sim duh..

Rev.Rick Joyner cun Pathian hnen ih Larawknak a hmuh mi a
sim;”Leilung sualnak ram ah doawknak nasa zet a um,cutawkah nehtu
ding lam ih um cu’Nunau le nauhak?an tam sawn.Raldonak thu an phuang
tikah, nehtu lam pawl cun
an va do ding mi an hmu thei lo ih an mang bang zet.An kiangkapih an
unau le pawl cu an Ral ah an neih.An mit cu a fiang thei lo.Anmah le
mah an do aw sual zik theu.Culai fangah,an siat thluh sianglo tu
Vancungmi cu a ra thleng cing ih,nehtu pawl hruk ding puan le
mitkherh a ra keng.Cu puan cu `tuar thei nak?a si ih, cu mitkherh
cu’zaidawhnak?a si tiah a ti.
Tu ni-ah, kan miphun khal si seh, leilung pumpi ih krish thlun hmuah2
hrang ih neh nak cu `Tuar thei nak le Zaidawh nunnem nak’a
si.Nepolean Bonapert cun,”Ralkap cun sunloihnak lukhuh co dingin thi
leh thau thawn  rei zet an do ve a t.ul ta(  A soldier must fight
long and hard to get a bit coloured ribbon)”a ti. Jesuh thu sim thawn
taht.him si sehla,
“Thihnak tuar ding a si hmanah ka hrangah rinsan tlakin um uh la,nan
neh man ah nunnak suilukhum ka lo pe ding?Thuphuan 2:10b.

TV nih na caan tha a lo ruk sak maw?

( TV ) hi kan hrangah thil poimawh pakhat a si ve. Kan hrang ih
thathnemnak a neih bantukin a hman zia thiamlo tu’i hrang ah cun in
siatsuah tu a si fawn. Mithiam pawl cun nauhak kum thum mi hrang ah
TV hi an raal a si an ti.

Himi caan ah nauhak cu an thluak an thahri pawl napin a than lai fang
a si.Mirang ram ih nauhak 1345 pawl thaten an zoh tik ah kumthum kim
hlan ih TV zoh rero nauhak cun an hawile an bang ngaingai theilo ti
an hmu suak. Thil anhminsin thei cuca lo. An thluak thazaang a dawr
deuh.

TV ih a neihmi dat in milai taksa ah DNA le Hormone hnatuannak lam
hnaihnawknak a pe. TV naideuh ih zoh poh ah kan thluak le kan taksa
sung hnatuan nak ( immune system ) dawn kham tu  a si thei.

Nauhak kum nga tlunlam cu nikhat ah nazi 2 tiang cu zoh ter theih a
si ko. TV caan sautuk zoh ruangah zunthlum natnak le thisen sang
natnak tiang neih a awl te. TV le milai thuhla zingzoi tu pawl ih sim
dn ah milai hi kum 70 kan kim ah a tamsawn cun kan TV zohmi
hmuahhmuah belhkhawm kum 7 – 10 tiang tla a si t.heu an ti.

Himi thu na theih zo ruangah TV zoh na ralrin ih na caan felfai ten
na hman a cu thlang. Na caan t.ha cu na taksa hrang harhdamnak a
suahpi tu hnat.uannak ah hmang sawn aw. Ka man poh aw ti ih TV zoh
rero hin milai kan harhdamnak a siatsuah rero ti hi mifim pawl cun an
hmusuaka si.

Ahleice in kannih Laimi pawl cun TV le Computer kan hmuhnak tla a rei
hrih fawn lo…a hman dan le a zoh dan tawk kan thiamlo ding phan a
um zet.  Pathian thlawsuah kan dawnmithilri pawl hi kan nun tawi
tertu le kan hlimnak hlo tertu an si lo nak ding ah ralring ten,
pacang lungput thawn kan TV khal hi a zoh dan tawk kan zir a cu a si.

KA RA TLUNG DING
                                                 By : S p n  Sailung

Kum 1998 hrawngah cun Kalay Myo ih Motor bike nei ding ti cu milian
le thil ti thei hrangih retmi a si. Culaiah,ka pate cun Super Cup a
rak nei.  A neih a har bang in,a mawng khal mi malte lawng an si lai.
Duhdawt zet  le thiangfai zet ih a ret mi a bike cu, saan ka dil. A
san cu fala hmaiih ka t.ong ti tam tu ah ka timi a si. Cule,siang tak
te cu i hlan.

Vansiat le malmakah,ka accident pi lo maw !! Aw,a neih hman a har har
thawn,ka Pate cun ziangtinha i ti ke ? tlun khal ka huam nawn
lo,khuitawkah ha ka tlan hlohsan ke?Thin lung bang le phurrit thawn
zan cu tlung loin,Khampat ah ka riak ta..Ca in mitlung ding hnen ah
thuhla ka hei sim ter.

A thaizing khaw vang cu… ai aia ai..zoha ka zoh ding ti hman ka
thei lo,ka thinlung sung cu ?ka pate in ziangtin ha in ti ke ??ti
lawnglawng in a khat. Ka fala len khal ka tawlrel thei nawn lo,tawng
ding sinsin cu ka thei lo law law.. Cu ngai ngai in,ka thingpi in
laiah,ka hmaiah ka pate cu ka vun hmu..!! Ziang ka rel ding ziang tin
ha ka t.ong ke ? Zawhte meihlum ai bang in cawr ngiaungi ten ka to..

Mangbang za in,  `Inn ah rak tlung aw,na nute in alo pawi tuk,na tel
lo cun a daihaw lo,hi vek tla cu a thar neihnak sawn si. Zianghman a
pawi lo,kan tuah t.ha keiih,na duhtawk in na hmang sal ding?..cui aw
ka thei cu,mak ka ti tuk.

Zawi fa ha in ngaithiam maimai ke ? Mi hmuahhmuah ih neih lo,ka ti
siat sak ihhleiah,tlung ding in i ko lai !!! T.awng ngaih nak khal
theiloih ka to laiah,’na thin a har pang keiih tiin,na nute mizan zan
var a it that man lo,kei le itthat hlah,ka zawngahna tlung ding
maw,Bike kha Work Shop ah ka ret ta ding ?..Aw a cuih ka thin,pacang
ka mitthli a tla,cui ngai thiam nak awle thin sau nak aw cun ka ka
sungah  `Ka ra tlung ding?tiin thu a ret.

                   FALA  THAINGHLIM  MARY !

Kan rualpa in, “kei cu nupi ka neih le Mary vek hawl
ka tum lo?in rak ti dah. Tuihnu ah  ka ruat sal ih,khalai ah cun
hnihsuah um men asinan,tuah cun a tupi nasa thlang.

Fala tlangval kan si hnuah hin,ziangha kan thupit bik mi kan
tile,duhdawtnak kan ti ciau ko ding,cui duhdawtnak cun mipat nunau
nakah in fialih,kan theitawk in (fala) cun khamawk kan tum,cule kan
duhawk rei vivo cun Fala thianghlim Mary vek ka si kan ti ngam lai
pei maw ?  Curuangah panteh,ka rualpa ih a neih tum lo khal khi a
sual lo,hmuh ding an mal tuk ih,neih tum lo hi a fimthlak sawn ding
tiah a ruat.

Curuangah,Laimi ka duhdawt tiih t.ang kan si ngaingai ah cun,tlangval
lai fala ah Laimi neih lo ding ti hman khi a t.ha sawn ding a bang,a
san cu maw,Mary vek kan duh tikah kan tawng lo pang ding.

Hi thu ah hin Mipa maw nunau tu ha mawh tiih leitlun mifim pawl  in
thu rel nak vei tampi an nei,an rak rel cat dah mi cu,   “A mipa a
mawh nan a nunau in a tuar? Curuangah ka unau (nu nau)pawl mi ramah
kan um ih,kan thleng cengceng cu an ram mi vek in,duh duh dan in kan
nung ding ti hi mi in an lo zirh pang le,a lo zirhtu kha tlan san
mai,kei cu ka lai fala te nupi ah ka duh nan,Mary vek fala thianghlim
ka hawl ngam pei maw.

Maw duhdawt mi Lai fala.. in hun sim hnik aw le,na um dan miin an lo
thei,na sinak miin an lo thei,na duh zawng miin an lo thei,Fala
Thianghlim Marry vek tiih lo ko ngam tu an tam kei maw ?

            BY :  S p n

Ka Duhdawt zet mi ….Ka Fala
                                                             – Spn
Sailung
Minung titafam cu,thing nen lo,lung nen lo cu ka thang so vevivo
ih,leitlun nun hmangthiam si ding in ti mi pawl khal ka dai ve rero.

Ka mit hmuh muahhmuah lakih mawi bik,Lasi fala an rel mi hman khum
thei tu,a tak,a ruang leitlun ti buai tham,a vawn hnih bet cun ka ha
rual hmerhmite,a hnih le duhnunnak ih khat thawn thin nuam le mi dang
ngai lo teih kan umlai ah,thiamnak duh ruangah kan t.hen aw ta.

Vei tampi ihkhun parah khuk kheuh phah le hna sik phah in ka ruat
theu nan ka thangharh le nitlang a suah cun tawn ni a um thei ngai
ngai lo.Beidong loin,ka duh thusam fala cu ka mit cun a hawl rero ko.

Mopuai tinkim ka tawt ngah hnu hmanah ka tawng dah fawn lo. Mo
lawmnak khawnglawng an tum tinkim ten ka hrang asi thei dah fawn
lo.Ka nauhak laiih ka tlawngkai pi pawl ka ngah haiih, an nih cun ka
Parte ih umnak in sim… Ah ! tiin khual tlawng ding in ka pawksuak
lohli.

Lamzin tluan ka feh nak ah ziang dang hman ka ruat thei lo,khawdang
khal ka tang man lo.Pengthum lawng ih hla cu nithum lai feh vek ah ka
ruat aw cing cing.Netnak ah ka pan mi khua cu ka thleng,thlennak ding
inn hawl in khua cu ka thim.
Ka thlennak te cu biak khal be lem lo cun,ka nauhak laiih ka fala kha
a thu hla ningzah thei loin ka hei sut hai.Inn tekpa cun,a kuak ci
thintlak phah in,?

E,Parte kha maw,a hung falat ngai ngai cun kan khua ah a tluk tu an
um lo,khual khua hmanin an inn khat in an leng t.heu,amah a nun nem
in a fim fawn,duh tu le a nei tam,leng tu khal a nei tam,nan…
zohman in Parte in induh ti thei tu an um lo !! Culeveten,kei le
manhlap tuk cu,tu khui tawk ah ha a um,ka pan nghal duh,ka leng ding
tiin inntek pa thurel lai cu ka rak bawtcat.

Inntek pa cun’Umhrih ta awla,ka thu rel hman ka theh hrih lo,nuam te
ten na leng leh pam ding,cun…tiin a thu rel cu a pehsal,Parte cu
mivantha asi,tiin kan ti thluh,nauhak upa in a thuhla kan rel khawp
thei lo,mi sawn le a thiam fawn,amah le a mwi tuk fawn?tiin a thurel
cu a cawl ta hrih.a vawn peh la la,”Amah na tawng duh maw??tiah in
sut. (pehlai ding….)

L.C.F. Upa Pa Runthuanhre thawn hmaiton thusuhnak

Pa Runthuanhre hi kan Fellowship Upa a si ih; thla thum sung rori
thawng in tlak san hnu ah a ra suak ih..Hruaitu cun a hnuai lam vek
in thu suhnak a tuah..

Hruaitu : : Na hmin le suahnak khua in sim thei pei maw?
RH :  Falam peng Sun thla ih suak ka si. Ka hmin cu Runthuanhre ka si
ko.

HT :  : Malaysia ziangtik kum ah na rak thleng ih L.C.F. ah ziangvek
in na rak cangvai..?
RH :  6 November, 2003 ah Malaysia ka rak thleng. 2005 kum ah tlinglo
tlaklo te in Upa tuan ding ah in rak hril ih; cui tlun ah Lai Nun
Mawi timi group khalah hruaitu hna ka t.uan lai fang a si.

HT;  Cabu tha neilo ih um nafam cu MLS palik pawl in teh an lo kai
dah maw?
RH  :  A hlan ah cun veikhat hman kaih ka tawng dah lo nan…June 11,
2005 ah hnat.uannak in KL ih L.C.F lam ah khawm ding ka pok cu in rak
kai.

HT :  Thawng tiang na thleng va si khaw, na thawng tlak lai ah
ziangha har na ti bik?
RH :  Minung dinhmun lenglam ah ramsa dinhmun vek ih kan vawn ding hi
thin a na ih; khaw ruahnak thinlung tiang a pit ter.

HT :  Thawng na tlak lai ah teh bawmtu vek teh na nei maw?
  RH : Pathian cu a tha. Sungkhat unau zarhtin veh an coawklo bak ah
thawnginn sung ih ka ei ding tiang, in tawlrel sak thluh.

HT : A lo bwmtu pawl parah sim duhmi na nei maw?
RH :  Sungkhat unau thlacamnak in siseh, sum le pai in siseh, bulpak
in siseh in bawmtu hmuahhmuah parah lungawinak sim cawklo ka nei.
P.T. in thlaw lo suah ciau hram seh.

HT :  Na um lo sung ah hiti vekin hmun hnih ah  kan rak  tthek  aw va
si khaw, thuhla tla na rak thei maw?
RH  :  Thei ko ee. In ra veh tu  nau le pawl in in sim ih; himi
thuhla hi ka thawng tlak hnak in ka thinnat bikmi le KL ra kai sal
ding tiang hman zuamlo khawp ih i tuah tu a si.

HT  :  Falam mi pawl kan thekawk cu ziangtin na hmu?
R H :  Pathian thu le miphun hrang ah tuhnak ih hnat.uan thei sawn
ding dinhmun lamzin an hmu a si le cu a tha ve ko ee. Sihmansehla
miphun t.hathnemnak ding ih an t.uan suah dingmi lamzin cu keimah cun
ka hmu hrimhrim lo.

H T  : Cuti a si le, t.hekawk hi a t.halo na tinak a si maw?
R H :  Tu hman ah ziangtin  kan miphun hrangah hna kan tuan ding ih
ziangtin kan cak thei ding ti ruah rero lai ih hiti vek ih kan hawn
um ta hi cu kanmiphun t.hansonak lam si lo in a niam tertu lamzin
pakhat a si in ka hmu.
Asinan khat le khat hnam t.hendarh zawng ih do aw lo le a silo zawng
ih rel sia aw lo in mah ti thei tawk ciauih Pathian hrang le miphun
hrang ih hnat.uan dan kan thiam a si len cu kan mualphonak lak ihsi
khal in a sung thup te cun kan feh cak rero tinak a si thei.

HT :  Nehhnu lam ah teh kan finkhawm aw sal thei ding na zum maw?
RH  :  A cang thei tawk in lungrual te ih hna t.uan tlang cu kan tum
ciau dingmi cu a si. Minung ti cu mah le mah ka fim ti ih kan ruah
awkmi in thil a siatsuah ti kan theih fiang ciau ah cun kan ral
pakhat ah kan ret ding ih hmunkhat te khal ah kan finkhawm aw sal
thei ding ka zum ko.

HT : Cucu va si khaw, kannih a tanglaimi L.C.F. kaihhruaiawk dan ah
teh ziangtin na hmu? Hmailam ih ke karh dan ding ah forhfialawk duhmi
teh na nei maw?
R H :  A tang laimi unau pawl hrang khal ah mah le mah rinsanaw lo
ten pakhat ciau hi Pathian hrang le miphun hrang hnat.uan ciau kan si
ti kan fiang a si le tu hnak in Pathian in thlawsuah a co thei in
zohthimtlak dinhmun tiang thleng thei ding ih zuam a t.ul.

HT :  Malay thawnginn ihsin kan hnen na ra thleng thei sal cu kan hna
a ngam tuk; hmailam caan ah teh ziangvek in miphun le Kawhhran hrang
hnat.uan na tum?
R H :  Cumi khami ka tumtah timi cu ka lo sim theilo nan Pathian le
miphun hrang hna nan t.uan ciau nak ah a t.ha timi lamzin  ka hmuhnak
poh hi cu a cang thei tawk ih lo bawm cu ka tumdan le ka ruahdan a si.

HT :  Na umlo sungah Pastor thar tla kan rak nei ih; ziangtin na
ruat?
R H :   Kan hrang ih Pathian remruahmi le kanmiphun kaihruai tu ding
ih Pathian ih in pekmi tin ka ruat ko. Ka hna a ngam zet. Tu hnak in
kan t.hangso ding hman tampi ruahnak ka nei.

HT :  Caan tamzet pek in kan thu suhmi hmuahhmuah in let t.heh ih
tampi kan lungawi.
R H :  Keikhal ka lungawi ve.

Myanmar Thuthang

Khyn Nyunt tei sung ziang an bang?

Veikhat lai ih Myanmar ram Prime Minister tiang rak tuan dahtu Khyn
Nyunt le a nupi Khin Win Swe cu Yangon ih an inn ah leng suak theilo
in khumbet an si.  NLD hruaitu Suu Kyi an tuah vek cekci in an tuar
lala. An tuh vek cekci in an aat lala a si ko.
Khyn Nyunt, hi kum 44 thawng tla ding ih phuan zo a si nan; kan dung
July thla ah a mai inn lam ahthawn sal a si.
A fapa pahnih khal thawnginn ihsin an suahih Yangon ih anmai inn ciau
ah kharkhum an si ve.

A fapa nauhak sawn Ye Naing Win cu  kum 51 thawng tla ding ih ti a si
ih; upa sawn Zaw Naing Oo cu kum 68 thawng tla ding ih ti a si.
Asinan, an pahnih in Yangon ih an mai inn veve ah an nupi le veve
thawn ralkap ih kil t.hept.hep in khum taar an si tiah source pakhat
cun a phuang.

Khin Nyunt ih advisor hlun general Tint Swe in Khyin ih tufa pawl cu
a zohkawl ih tlawngkainak tiang a tawlrel sek thluh.
Khyin Nyunt ih fapa Ye Naing Win ih nupi hi Singapore mi a si ih;
Myanmar cozah cun Singapore ih tlung ding in caan tha a pe nan…a
tlung duh ve ce lo. Ye Naing Win hi an kaih hlan ah sumdawnnak tampi
a tuahmi lakah hmin lang zet cu  Bagan Cybertech…Internet Service a
neihmi hi a si.  Cozah  in cui Internet Web cu an lawngsak ih Myanmar
Teleport tiah a hmin thleng tahrat in an service thotho a si.

Kawl ralkap cozah cun Khyin Nyunt ih dung thluntu pawl an kaihmi
Colonels rank hnak ih sang pawl hmuahhmuah cu $ 1,000 ciau bawmnak an
pe sal. Cui tlunah Mawtaw an ting sakmi le Inn le lo an lawnsakmi
pawl an pe kir sal thluh…tiah source pakhat in a phuang. An kaih
ngahlo pawl lawng te hnatuan ding nei cuca lo in an talbuai nasa. Kan
ram hruaitu pawl cu an mah le mah an buai zawk rero a si ko.

Petrol man a let ( 9 ) in sang

Myanmar thuhla siar hi cu ning a zak deuh cu a si bik ko. Kan dung
tlawngkai nithum ni ah kan ram ralkap cozah cun ramsung ah Petrol man
a let ( 9 ) rori ih a kai thu an phuang riai.
Petrol hi kum thawktir ah gallon khat 180kyat ( official rate ) lawng
a si ih tui zarh ihsin gallon khat 1,500kyat rori ah an kaih a si.
Kawlram daan tenau ah Motor nei pawl in thlakhat ah Petrol gallon 60
tiang lawng lei a ngah. Cumi khawplo pawl cun black in a leng ah
gallon khat 3,600kyat in an lei ding a si.
Cozah cun thilman kai ciamco hi paisa thlengnak ruangah a si an ti
ih; kum thawktir ih $1 – 880kyat kha  tu ah cun 1,330kyat rori a si
zo.
Myanmar mipi tlangpi thlahlawh cu thlakhat ah $10 hrawng lawng a si
ih; thilri man kai deuhdeuh thawn cun nun ngaihnak cu a um nawnlo a
si bik.  Leitlun pum ah Gas ka ngahtuk tiih uaraw tuk ram, mi theihlo
phang ih au rero pai ram ah Petrol manhman hizat rori thleng cu
mangbangza a si. Zumtu pawl kan ram hrang napin thlacam kan t.ul a si
lo maw?

Kawlram in rualpi a neih phah ih Tuluk in Tlawr thing a neih tam phah

Global Witness ( GW ) pawl ih phuan dan cun 2004  kum ah Kawlram ih
tlawr suak 95% rori cu a thupte in Tuluk ram Yunnan province ah a lut
thluh ti a si.

Kawl ralkap cozah cun a ram sung ih thingtha, gas le lung mankhung
pawl cu ralthuam leinak le Tuluk, India le ram thangso pawl tlawn nak
ah a hmang theh a si.
2003-04 kum ah tlawr thing cu Kawl ram sumdawnnak tumbik pathumnak a
si ih…US$ 277million rori an la lut. Tui kum sung khal ah $ 427.81
million hrawng an lalut leh zo.

Kanmah Sung Thu

UNHCR in mithar hmin a khum sak zo:
UNHCR in mithar Refugee dil a duh tu, Kawlram mi le Indonisia Aceh
miphun pawl cu community   officer hmang in hmin a khum sak rero zo.
Ahleice in Laimi a burpi deuh ih umnak hmun pohah an feh ih, mithar
hmin khum sak in interview an tuah cih t.heu.

Curuangah kan nih Kawlram mi pawl cu UNHCR zung hmai ih va dintlar
men in refugee a dil theih nawn lo tinak a si. Asinan, bulpak ih
harsatnak ngai ngai tawngih a besia zet mi pawl (bwmtu neilo kum upa
tuk le nauhak tuk, naupai le damlo ngai ngai) hrangah cun, nitin te
zinglam nazi 8:00am ihsin UNHCR zung awn sak ring ring an si ding ih,
officer pawl in interview an tuah thluh hnu ah mi harsa ngai ngai a
si ti ih an pawm mi pawl cu an hmin an khum sak cih ding.

Ramdang mi pawl (Kawlram le Indonisia mi silo) hrang ah cun
tlawngkai ni hnih le ni thum tin ten Zung awn sak an si ding. Thu
theih fiang duh tu pawl cun UNHCR phone  2141 1322 / 2141 1585 ah sut
mai uh.Na ready hlan ah UN pawl nan in an ra leng pang a si  len na
cem riai a si ko. Daithlang men lo in na case ding tawlrel cia aw la
na hrang ah a tha ding.
                                                       By: David Mawia
                                                     Interpreter,
UNHCR
Kan Lungawi pi

Kan L.C.F. Upa Pa Runthuanhre cu kan dung 21 October ( tlawngkai ni
nga ) KL khawmpi a ra thleng sal zo.  Zumtu pawl thlacamnak Pathian
in a ngai ih damcak zet inkan hnen a ra thleng sal, Pathian hmin kan
thangt.hat.

L.C.F. mipi pawl cu kan hna a ngam zet. Pathian in lam hruai vivo
hram seh tiah thla za kan cam sak a si.
Biakinn hrang a hlu

Kan biakinn ih kan t.ul zetmi zial phah ( Kawzaw ) cu L.C.F. Upa Pa
Mang Tin Sawn tei group ( Manzarala ) unau pawl in Biakinn zialphah (
Kawzaw ) Rm. 450 man an rawn hlu.  Salai Ronald Tha Tin Mang in
Biakinn puanzar Rm. 700 man a hlu ih; Pa Ngun Hmung in Pulpit tohkham
Rm. 600 man a rawn hlu bet.
Hivek ih miphun duhdawt tu le Pathian tihzahtu unau pawl parah
lungawinak tampi kan nei ih; Pathian thlawsuah malza  an dawn thei
nak ding thlaza kan cam pi a si.  Kan t.ul laimi Air-con khal kan
Kawhhran  Upa ( private ) hnen ihsin hlu ding thu kan thei ih kan
hnangam nasa.
Kan biakin hi Jesuh lalnak biakinn le misual, mi vakvai le mi
hmuahhmuah hrang Pathian kan biak nak hmun si hram ding ah thla cam
ringring uh si.

Pathian thu zirnak….
Zarpi zing tin te’n, khawm thawk hlan nazi 10 : 00am ihsin L.C.F.
biakinn ah Pathian thu zirnak kan nei ringring thlang ding.  Kan
Pastor Rev. S. Ni Luai in zirhnak in nei ringring ding ih…tikcu
caan khel in Biakinn lam pan kan tum ciau pei uh!

      AMERICA FEH THEI NAKTHU THANGTHA !!!
   ( AMERICAN DV 2007 MESSENGER PROGRAMME )

– Kum khat voi khat a um ttheu mi DV Programme cu Oct.5 ni ah a ra
thleng thlang ding.
– Kan lai mi zate van ttha zet ih American thleng thei mi Chance kan
nei cio ruang ah Programme hi pelh ding hrim hrim asi lo.
– Hi Programme cu mi phun zate’n, biak nak zate’n , nau hak upa tilo
feh thei thluh asi ruang ah kan Laimi pawl hrang ah duh sak nak tam
pi thawn tawl rel mi asi.
– Malaysia um kan Laimi a tuah duh tu unau za hrang ah caan tam pi
rei lo le hmun dang dang feh ttul lo ih hma khat te’n tuah thei ding
ih tawl rel mi asi.
– RM – 10 Lawng ih American na thleng thei nak Chance tumpi a um
ruang ah pelh lo le dai thlang lo te’n ra tuah tengteng ding in duh
sak nak kan nei asi.
– DV 2007 Messenger Programme cu Oct.9 , 2005 ( Zarh pi ni ) ihsin
tuah thei zo asi ruang ah duh dawt mi unau na pelh pang ding phan a
um nasa.
A thei fiang duh tu hrang ah
Tawlrel tu …. PATE  …016 – 973 2401
BOIH(Zuala) – 016 – 3134 038

World News

Malaysia Prime Minister nupi thi…
Malaysia ram Prime minister Abdullah Ahmad Badawi ih nupi, Datin Seri
Endon Mamood, kum 64 cu ni 20, October, 2005 (tlawngkai nili)zing
nazi 7:55 am ah pawhte (breast) cancer in a thi.

Endon Mamood hi PutraJaya (acozah zung pawl an ret thluh nak khawpi
thar) ih Muslim thlanmual ah himi ni lala zanlam nazi 5:30 pm ah vui
liam a si.

A pasal Malaysia PM thawn kum 40 sung an umtlang. Fanu Nori le fapa
Kamaluddin an nei. Malaysia rampum le ramdang mi pawl tam zet in an
riahsait pi in, an ui thu Malaysia ramih suah mi nitin thuthangca
hmuah hmuah ah an tarlang.

A thih zawng ih a thucahmi te, ?Mi hmuahmuah le kan sungkua pawl
thaten rak zoh aw?timi t.ongkam te hin milai tampi thin a tham zet.
Amah hi Leitlun nunau hming lang zet a si ih; a vui ni ah hin
Philippine President Arryo rori khal Malaysia a ra thleng rori.
Leitlun ram hruaitu tampi hnen ihsin tuarpinak ca a dawng tam nasa.

America ah mipi thawng tampi in lamzin zawh
Kan dung zarh ah America ih  African- American pawl, midum rual
thawng tampi in cozah par ih lungawi lo in lamzin an zawh ciamco.
Tuitum ih an aubikmi cu America cozah hin kan dung New Orelands ih
siat tong pawl kha bawmnak a pe mal tuk. Midum kan si ruangah phun
hnam in thliar ti a si bik.
Himi ni ah hin American midum 294,765 rori an suak khawm a si. 2000
kum ah African- American pawl hi 12.9% rori an kim a si.

Saddam ih ni a tawp pei maw?
Veikhat lai ih mi tampi in an rak tih zet mi; duhtu khal tampi nei
lai tu Saddam Hussein ih thuhla cu amai ram Iraq court rori ah
tlawngkai nithum, October 19 ni ah an rel thawk zo. Saddam ih rual ah
a dungthluntu milawk deuhdeuh paruk khal an thuhla rel tel a si ih;
an zate hin thah ding ih an thuhla rel a zum um. Ziangahtile, Saddam
hi 1979 kum ihsin 2003 tiang Iraq ram uktu a si ih, a uk lai ah a
turu zet t.heu.

1988 kum ah Halabja khua ih Kurdish miphun 5,000 pawl a that ih;
1980 – 1988 kum ah Iran thawn an do awk ih milai million khat rori an
thi; 1990 kum ah a ram hnenum Kuwait a do lala…

Milai tamtuk nunnak rak that tu a si ruangah tuit.um hi Court cun
amah that ve ding in an phuan zum ciau a si.
Tlawngkai nihnih ni, Saddam court ih an hruai hmaisakbik niih amah
t.antu Lawyer pasarih lakah pakhat cu tlawngkainili ni  ah an kap
that zo.   Tuit.um ih Iraq court thusuak hin Leitlun thuanthu hminsin
tlak a ngan ding a si.

US ah Malaysia Fala mawi…
Kan dung zarh ah California ih tuahmi Leitlun NRI fala mawi hrilnak
ah Malaysia fala Nanda Kumar in pahnihnak a dawng ih; Malay cozah
khalin an uanawk phah zet.
Leitlun ram 21 ihsin fala mawi suak khawm zuamawknak ah Pakistan fala
( a lai zuk ) in pakhatnak a ngah ih, US fala ( vorh lam zuk ) hin
pathumnak a ngah.

Rambo..a ra kir sal…
Laimi pawl lakah Rambo tiih kan theih lar zet mi Sylvester Stallone
cun kum 59 a si hnu ah Movie leitlun a ra kir sal tiah Metro-Goldwyn-
Mayer cun kan dung tlawngkai nikhat ni ah a phuang.
Stallone cun, ?Tumnak na neih ah cun tlangpar kai ding ah upa tuk ti
a um thei lo?a ti. Tu hi Rocky Balboa timi Boxing champion film an
tuah rero lai. Rambo hi kum 30 liam hnu ah Oscar laksawng tiang rak
ngah dah tu a si.

Pawhte Cancer hrang Fashion Show LA ah…
Tlawngkai nili ni ah  UCLA Breast Center pawl ih hoha nak in Los
Angeles khawpi ah pawhte cancer zohnak ding hrang sum hawlnak Fashion
Show an tuah.  US Actress Jennifer Aniston ( vorh lam ih to) khal in
a va telpi.

Jetli in Explenation a tuah
Tuabite ah Tuluk Kungfu Star Jet Li cun Buddist biaknak lam ah napi
ih feh a duh sawn ruangah movie a tuah tum nawnlo timi thuthang a um
ih; Jet Li cun cui thuthang cu a hmanlomi a si tiah a simfiang. Ka
thei tawp in movies ka tuah hrih lai ding tiah Li cun United Daily
News a sim.

Philippine buainak a karh sinsin

Philippine mipi pawl cun an President Arryo cu hlawn an tum rero lai.
Tlawngkai ninga  ni pheicu…mipi thinheng cun an siangpahrang innpi
tiang rori luhhnawh an tum ih; palik pawl in an rak kham ciamco.
Lungto thawn an deng aw ciamco ih an thawiawknak ah palik officer
pasarih rori hliamhma an tuar.

Arryo cun kn dung hrilawknak ih votes a ruuk ruangah a tling sal a
si ti mipi in an theih sal tikah …voice thawn an hlawn thei nawn
fawn lo thazaang thawn rori an President cu an  hro a si. President
Arryo in le a term ( kum 6 ) a kim hlan cu Siangpahrang inn suahsan a
tum fawn lo. Ziang an bang vivo ding???

Kristian 200 lenglo kai…
tubaite ah Africa ih Eritrea ram ah Kristian 200 lenglo ralkap  ankai
ih ziangruang ih kai ha an si ti khal a fiang hrih lo.
Hi ram hin 2003 kum ah Etheopia ihsin luatnak an ngah ih an ram mipi
in ziang sakhua khal an kai thei  an ti nan..a ngaingai hmuh ding
lawngte a um lemlo. 2002 kum khal ah RCM silo pawl cu an kai ciamco
dah a si.

S.Korea ah Revival hrang thlacam..
Tubaite ah S. Korea kawhhran 45 ihsin mino 5,000 rual in an ram ih
revival a thlen thei nak ding dilin zanvar thla an cam.
1907 kum ah S.Korea ah revival nasa zet in a rak thleng dah ih
tuit.um khalah hin  cui harhtharnak cu dilin mino hizat hi an suak
khawm a si.

Proverbs
“Buainak hmuahhmuah chu thinlung ihsin a ra mi an si lo nan, buai nak
tum bik suah ter tu cu thinlung sungril ihsin a thawk mi a si.”
“Z
“Ziang ram khal hi do aw ciam co hmansehla, ram dang le ram dang khal
si seh, kei cun Ram sung doawknak(Civil War) ka ti tho2 ding. Ral do
nak ih fehtu pawl cu an za ten unau an si?..”
                                                                    –
Abraham Linclon
  “D
“Doawknak hi kan dai ter lo asilen Doawknak hin kan minung pawl in
siatsuah  thluh ding?”

By : N.G.Well

“Milai thuthennak cu na pehheel  thei men; asinan Pathian thuthennak
cu na pehhel theilo ding!”
                                                             – Orin
Phillip Gifford

Capo
Falam pacang thluak ttihhrut tuk!!!

Laitlang pacang pakhat hi a tihhrut zet an ti.A khual tlawn nak khua
ah mithi a um ih, zanah zal-ah a maten a it fawn.Meisa an phit thluh
ruang ah a zun pah cu a tho ngam lo.Meisa van nak ding a hawl rero ih
a hmuthei fawn lo.

Mang bang zetin in tek pa’h kedam sungah a zun a thawh,in tek pa a
thang ih,Meisa a vang tikah.Ziangah so ka kedamah zun na thawh?a
ti.Mikhual pa cun sim ding nei lo in,”Ka pu,na kedamah ka zun hi a
khat cek ci?a ti men.

Na Taw fiu…
Falam tlangval fala len a thiam ve thlang a si hmang..
Tlangval : Mawite nan tidai in sehla ziangtin in ti ding..
Fala :  Na duh lai maw? ka lo ti ding.
Tlangval : Ka lo duh, lo ti seh la teh ziangtin in let ding?
Fala :  Hi… ?Na taw fiu?..hee

A NEITU
LCF
CHIEF EDITOR
RICHARD K. EMMANUEL
JOINT EDITOR
VL BAWITHANG
SENIOR ADVISORS
ANDREW THANG ( PATE )
REV. S. NI LUAI
PEHZAWMNAK
42 – 14, WISMA CITY TOWER, JALAN ALOR
50200 KUALA LUMPUR
MALAYSIA

CONTACT TO :
Phone : 012 – 3645768 ( Ela )

E-MAIL
hruaitu@…
richardemmanuel4u@…
vl_bawithang@…

(Visited 53 times, 1 visits today)

Comments

comments

Comments

%d bloggers like this: