Hruaitu Issue 94

A SUNG THU
Editorial……..1
Milai nun cu kum 120 lawng a si….2
Nobel Prize Thawhkehnak….3 – 5
Nu-Nauhak Missionary Maktak…..6 – 7
Pathian Lungawi zawng thil panga….8 – 10
Thlarau Rah…..11
Virus Pakhat……12
Kanmah sung thu…14 – 15
Myanmar Thuthang….16- 17
Leitlun Thuthang Hrilkhawm…18 – 19
General Knowledges…20

                            Editorial
Zumtlak Nun :
Bible tlawng kan rak kai laiah ka rualpa pakhat in.. ?Keicu zo hman
ka zum thei nawn lo, ziangvek minung khal ka zum thei lo?tiah in sim.
Ka ruat rero ih ka riah a sia zet. Cumi t.ong tu pai nun ah ka hmuh
suahmi cu ?zohman in cupa cu an zum ve lo, ziang cuca ah an siar ve
lo?ti hi a si.

Sim duhmi cu mifir cun mi hmuahhmuah mifir dingah a ruat ih a zum
thei lo, tualthat hmang khal in mi hmuahhmah an ringhlel, thil diklo
tuah tu khal in an mahte an nun an phuhrung aw. An mit in mifel a hmu
thei nawnlo ih thilt.ha khal a ruat thei nawn lo. Kan Laimi lak
khalah cuvek milai cu kan um pang a si ah cun a poi zet ding. Mai
Pastor le Saya khal zum thei nawn lo, mai kaihhruaimi le zopoh khal
zum cuang lo, mah le mah khal zum aw thei cuca lo cun ziangtik hman
ah hlawhtlinnak ngaingai kan hmu thei dah lo ding.

Mirang in Self-confidence an timi, mah le mah rinsanawk nak hi zo
ciau khal in kan nei theh ko nan, cucu midang ziangah va siarlo le
zohman va zum lo ding tinak a si lo. Athupi bikmi cu zohman mifel kan
umlo tiah kan tong rero rualrual in zumtlak ih nun kan zuam ciau ding
hi a thupi zet ti’n ka ruat. Zawi in hmuh lo lai khalah zumtlak ih
nungtu cun a tuahmi thil tinkim ah ralthatnak a nei ih midang, rualpi
dang khal amah vek ih hmantlak le mifel ah a hmu theu. Cucu kan Laimi
pawl in kan tul zetmi a si.

Zumtlak ih a nungtu pa’i hrangah nahsiknak le mai zawn lawng ruahnak
tivek hmuh ding a um dah lo. Zo poh khal in a kiang ih um nuam an
ti ; zo poh khal in an rinsan ih zo poh khal in kawm an duh.  Na
rualpi kawm t.heu pawl hman in ti hrekhri ih an lo zoh le an lo biak
paih nawn mumal lo ah cun..midang lawnglawng mawh va phurh hlah…na
nundan thuthp hmuahhmuah kha zo aw sawn aw. Zumtlak in na nung maw?
Lai thisen kengtu pawl kan Kawhhran, miphun le ram damter sal dingah
nang le kei hi rualpi le peng dang pawl khal ih zumtla ding rori ih
nun kan zuam a tul a si lo maw??

                        Sermon le Articles

Milai nun cu kum 120 lawng a si!

By : Ela Khiangte
Kan Bible hi History cabu thabik kan ti khal le kan
sual tamlo ding. Ziangahtile milai thawhkehnak le khuahlan ih milai
pawl cumtu dan hmuahhmuah kan hmuh thei ruangah a si.
Leitlun ih milai damrei bik khal kan Bible cun a rak recorded.
Methuselah a si ih kum 969 rori a rak dam. In thlah tu Adam tei san
lai ah milai cu kum 500 hnak ih tam tla an rak dam fawn, ziangruangah
tulaiah miai hi kum 100 hrawng lawng kan dam ti tla hi kan ruat dah
maw? Hi thusuhnak hi tulai santhar tampi cun kan suh theumi Q a
si.  “Thilmak a simi cu Milai pawl ih thusuhnak (Q ) hmuahhmuah hi
kan Bible ah a rak um thluh hi a si.?
Noah san hmailam ah Leitlun ah ruahpi a sur kan thei dah lo. Asinan
Pathian in Leilung milai pawl cu van daifim in a cawm ih, an thil
ciinmi pawl khal van daifim ringin an nung.  Cutik san lai ih milai
nun saunak san cu :

1. Oxygen ruangah..

Scientists pawlin Dinosour rannung tum pipi pawl thuanthu an zir rero
tik ah Noah sanlai ih tilik hnu ah Leitlun ah an nung thei nawlo ti’n
an hmu suak. Cuvek rannung pawl cu veikhat thaw an thawk tikah Oxygen
malte men ih nung thei an si lo. Curuangah Archelology zirtu  pawl
in tulai ah Dinosour ruh a rualrual in tipi kap ih an hmusuak ih; cu
pawl cu Noah san lai tilik in Leitlun ih Oxygen tamtuk a liampi
ruangah ti an hmusuak.
Cuvek thotho in milai pawl khal kum 500 leng nung dingin kan nunnak
hrang boruak tha, Oxygen Leilung tlun ah a um nawn lo tiah Scientist
pawl cun an hmu suak.

2.  Pathian Tongkam ruangah a si.

Ziangruangah kan nun a tawi ti cu Pathian tongkam ruangah a si ih;
hihi Pathian tongkam kim tertu a si.  Seemternak 6 : 3.. ?A tu thok
ihsin kum 120 hnak ih tam an nung lo pei?tiah a ti.  Noah san lai ah
Leitlun milai pawl an sual tuk ruangah ih Pathian tongkam a si.  Saam
caa ngantu cun milai nun cu 70..80 hrawng lawng a si thu a rawn
nemhnget bet.
Curuangah Leitlun ih Oxygen le thil ziangkim umtu dan control tu
Pathian cun milai hi kan sual tuk ruangah kum saupi Leitlun ih nun in
sianglo ti a fiang. Scientist pawl khalih an hmuhsuahmi cu kan Bible
tongkam ( tilik thu ) ti hman tu ah a rawng cang.

Nobel Prizes Thawhkehnak
                                                               By :
Za Sang Cinzah
Alfred Nobel thuhla hi caa ih kan zir bang tuk in General Knowledges
tivek ah mi tampi ih suh duh zetmi a si. Alfred Novel ih thuanthu hin
zumnak, duhawtnak, teimaknak le lungsaunak thupit zia a langter ih,
hivek milai hi Leitlun ah mi upat tlak an si nak khal fiangten a
langter. Alfred Nobel hi science lam thiamnak in dynamite ( power )
rak hmusuak tu a si ih Literature lam khal a rak thiam cih tupa a si.
Dynamite tuahnak Laboratory hi Europe ram sungah companies tampi a
nei ih Europe ram hmuahhmuah lakah amah hi milian bik (
Millionaire )  a si.

A thih ihsin tuini tiang khal Leitlun ah a hmin a hlo thei lo.  Amah
hi milian zet a si ko nan a thih tiang nupi veikhat hman a nei lo. A
neihmi sumsaw hmuahhmuah cu Letlun ah remnak, t.hansonak le Leitlun
ih remdaihnak tuahtu pawl hrang upat peknak ah a hmang.

Innsungsang Background
alfred Nobel hi Immanuel le Caroline tei fa pathumnak a si ih,
October 21, 1833 kum ah Stokholm, Sweden ah a suak. A pa Immanuel hi
engineering a si ih, paisa ngah tam deuh beisei in  1842, Alfred kum
9 a kim ah Russia, St Perterburg ah a innsang cu a rak vaih pi.
Russia an thlen tikah Alfred tei unau za cu a pa in caa le
fimthiamnak pawl thungai thlak in a rak zirh ruangah Alfred khal a pa
vekin  German, French, English le Russia tong cu felfai ten a thiam
theh.

Kum 16 a kim cun Chemist lam thiamnak a rak nei thawk.  Immanuel cun
Russia ah Mechanical lam workshop hi a rak tuah ih, meithal, le
hriamnam military equipment lam hi a rak tuah t.heu.  Russia a um
sung 1853 in 1856 tiang kum thum sung hi Crimean war timi Russia le
Turkey cun thungaithlak in an rak do aw ih; cunah Immanuel ih meithal
tuahmi deuh lawnglawng hi Russia cun an hman ruangah Alfred ih pa
hrang ahcun sipuaizii a t.hat phah zet.

Vansiat ah 1859 kum ah  a workshop cu misual pawl in an suam sak
ruangah a umnak kel Sweden ah an kir sal. Alfred cun Chemist lam
thiamnak a nei ti a theih tikah a pa in 1850 kum ah French ram
khawpibik Paris ah caa zir dingin a rak thlah. Private Chemist
laboratory professor T.J Pelouze hnenah  kum khat hna a tuan. Cui hnu
ah US ah a feh ih John Ericsson kut hnuaiah kum 4 hna a va tuan bet.
Kum 4 a um hnu ah Russia, St. Peterburg ah a kir ih thungaithlak in a
sung le hnat.uan a bawm.

Sweden ah an kir hnu 1863 ihsin Alfred cun Chemistry laboratory fate
in research thungaithlak in a tuah thawk ih  1865 cun hlawhtlinak
tumpi a rawn hmu.   Apuak theimi zeen tivek tham ringring a si tikah
a kut tang ih hna t.uantu pawl lakah thi tla an um  phahphah.

1864 kum ah hin an tuahnak sehinn Factory pi cu an rak puah ter sual
ih a nau Email cun a thih phah ih midang tampi khalin hliam an tuar.
Curuangah Sweden cozah cun Stockholam City ahcun tests tuanak ramri
an rak tuahsak dah a si. Asinan, Alfred cun beidong lo te in a zom
vivo ih  ziangtinha hi thil hi tlamtling ten ka tuah suak theiding
timi ruahsannak thawn a rak zuam t.ent.o. 1967 ah tlamtling ten
Dynamite timi bomb hi a rak tuah suak thei.

Dinamite ti hi  Greek word ihsin lakmi a si ih ?Power?tinak a si.
1857 ah mirang cozah cun a mahte rori ih a tuahsuahmi a si ruangah
tuah siannak License an rak pek ih 1867 kum ah US khal in an pek ve.
Hi Dynamite power a rak tuah suakmi ruangah Alfred cu Leitlun pum ah
hmin a rawng nei ih, tlangleng zin tuahnak le tlang tumpipi phohnak
tivek ah cui bomb cu an rawn hmang vivo. Europe ram ram 20 ah company
80 a rak din ih Europe ram ah milianbik a rawng si.

Asinan, The Will Alfred Nobel in a rak tuahmi bomb pawlcu lamzin
tuaht.hatnak, tlaang le lungpi pawl puahnak, milai pawl hrang ih
t.hatnak tuah suaktu dingih tuah an si nan…milai thahnak le milai
siatralnak ih hman a si tikah Alfred cu a riah a sia zet.  Alfred cu
a riah a sia tuk ih, ?keimah hi suahsan neilo milai ka si, rak suaklo
ningla ka hrang a t.ha deuh ding?ti tiangin a rak t.ap dah.

Alfred cun a thih zawng ?November 27,1895 ah a diary ih a rak nganmi
cu, ?ka thih tikah ka thilri ka neihmi hmuahmuah cu hi tin nan rak
hmang ding. Ka paisa neihmi hram hi cu thamlo te in executor nih a
rak umter ringring ding ih a miat ( a pung ) kha Leitlun ah rualpi
hnakih thiamnak a neimi le hna a t.uan tu pawl laksawng ( prize )
peknak ah hman a si ding.

Cuvek laksawng pek ding pawl cu phun nga in a rak t.hen : (1 ).
Physics lam in rualpi hnak ih a thiam mi ( 2 ). Chemistry lam in
rualpi hnak ih a thiam mi ( 3 ).  Physiology or Medicien lam in
rualpi hnak in a thiam mi ( 4 ).  Literature lam in rualpi hnak in a
thiam mi ( 5 ). Ram le miphun hrangah remdaihnak lamah rualpi hnak ih
hna tuan tam hleice pawl pek an si ding.?

Cun Physics le Chemistry hi  Sweden Academy of Science in laksawng an
pek ding. Medical laksawng hi Coroline Institute, Stockholm in an pek
ding ih, Literature hi Academy Stockholm nih an pek ding ih, Peace
lam ih hna a t.uantu laksawng hi cu Norwegian Parliment nih minung
panga an hril ding ih cupawl cun an pek ding. Hi laksawng co tu ding
pawl hi ziang rammi an si khal le dawng tlak an si ah cun pek ding an
si tiah Paris a um laiah a ngan ih; December 10, 1896 kum ah Italy ih
a inn ah a thi.

Nobel Prizes Pek dan
1. Nobel Comittee nih Leitlun ramkip ah a ra dingmi kum hrangah zosi
Nobel Prize dawng tlak ti thu suhnak ding hrang Scholar le Scientist
pawl hnen ah  ( invitation ) an kuat thluh ding.
2.  January 2 ni ah tawnawk khawm ih laksawng dawng tlak pawl cu
thuhla felfai ten theihternak kuat cih thluh ding.
3.  Nobel Prize comittee zate komaw in zosi laksawng dong tlak ti
kha ruah khawm ding.
4.  October ( or ) November  ah Nobel Prize a hmu tu ding hmin kha
phuansuah ( announce ) a si ding.
5.  Nobel Peace Prize cu December 10, Oslo University ah pek a si
ding ih a dang Ceremony cu Stockholm, Sweden ah tuah a si ding.
Kum khat ah phun nga ciar ih pek ding a si ih;  Prize pakhat ah SEK
10million, euro. 1.1million or US$ 1.3million a si. Nobel peace prize
cu Alfred Nobel ih duhnak bangtuk in Norwaygian Parliment nih an
hrilmi mi panga pawl cun  December 10, 1910 ah Jean Henry Dunant
Founder of the International Comittee of the Red Cross, Geneva
Switzerland le Frederic Passy Founder an President of first French
peace society cu a hmaisabik peace laksasawng cu an rak pe.

2004 Nobel Peace prize cu Dr. Wangari Maathai africa ni hi pek a si
zo. Ziangruangah Alfred  hin a dang laksawng hmuahhmuah cu Sweden
ihsin pek ding a duh laiah Nobel Peace laksawng hi Norway ram
kherkher ihsin pek ding a ti hi thieh a har zet.
                Thu laaknak : Dingdi Mekazin,vol.1,05?pp. 97 – 99

Nu- Nauhak Missionary Maktak
                                                                By :
S. Hrang Kap Hnin

Foster timi pa a um, tlawng a kai lo ruangah hmin ngan thiam fangfang
a si. Asinan, mi law zet a si ruangah hnat.uan a duh ngaingai, lo
kaupi a nei ih bawmtu a neihlo ruangah t.haten a fingkhawi thei lo.
Voi khat ah Foster cu Kristian pakhat in Pathian thu tla a sim,
Pathian in a duhdawt zia le rundamtu ih thuhla tla a sim; asinan
Foster cun thupi ah a ruat lemlo, a sim reromi khal ziangah a siar
sak lo.

Foster cu kum 70 a si thlang, t.hal nipi ni  a si ih, a fanu kum 7 mi
le a tu le tla a hnenah an ra. Nunau nute ih hmin cu Marthi a si.
Marthi cun a pu ih inn cu mawi a ti ngaingai ih a zoh rero ( zoh nuam
a ti ngaingai ), a inn khan sung ih piano le par ih nazi tumpi a
tlaimi sep piakpo pawl tla a zoh hliah rero, hivek inn t.ha le thil
t.hat.ha ka pu in a neih cu a va mak em a ti ih; a pu a duhnak cu a
nasa sinsin, a pui kiangah a to ih a pu ih khabe hmul tla a zut sak
rero.

Zing khat cu Marthi a buai ngaingai. A pu cun Marthi na hna a va hnok
so! Ziang na tuah? tiah a sut. Marthi cun, “hi cabu tumpi hi Pathian
thu a si ka zum ih siar dingah laak ka zuam rero, ka pu i bawm aw,?a
ti. A pu in cabu cu a laak ih cabuai parah a ret. ?Ka pu tlawng ah
casiar ka zir ruangah ka thiam, himi thu hi t.haten rak ngai aw maw??
a pu khal in ?nute rak siar hnik he t.haten rak ngai keeng?a ti.
Cuveten Marthi cu a pu kiangah cun a hung to ih caa cu an zoh tlang.

Marthi in nuamte’n a hun siar. John 1 : 1 in a thok, ?a hramthok ah
thu a um, thu cu Pathian hnenah a um ih thu cu Pathian a si,…a siar
vivo, A miphun pawl hnenah a ra nan, ama’i mi pawl in an rak duh fawn
lo timi le amah a zumtu pawlin thilti theinak an nei ding, Pathian fa
ti ih kawh an si ding timi a hun siar cun Foster cu a khawruah a har
ngaingai, a mitthli cu a rualrual in a biangah an liam
thluahthlo…..Marthi, a tawk zo…tuisun hrangah cun hihmuah si seh
tiah a pu cun a ti. Pathian in a rak duhdawt zia, a um tu pawl
hmuahhmuah tla Pathian fa an si zia a ruah tikah a khawruah a har
ngaingai.

Cuihnu reinawn hnu ah Foster in a tuunu te Marthi cu a ko ih  Bible
caa cu siar sak hrih ding in a fial. Marthi cun a hun siarsak sal, ?
Pathian in leilung a duhdawt tuk ruangah a neihsun a fapa cu a pek,
zokhal a zumtu hmuahhmuah cu hlo ral lo ih kumkhua nunnak an neih
thei nak ding ah Pathian in a fapa cu leilung ah a thlah a si sawn?
timi a vun siar cun a lung sungah phundannak tumpi a um, tuihlan a
nunzia pawl a hmuhawk sal tikah a ning a zak ngaingai, cuti a si ko
nan Pathian in a duhdawt thotho zia a vun theih cun a biangah mitthli
hi a luang thluahthlo ko, a sualnak pawl tla Pathian hnenah phuangin
ngaidam a dil ih Jesuh Krih ta a si zia fiangte in a thei aw a si. (
Unau nang le kei hi Pathian ih thlahmi palai kan si tikha theih
hngilh hlah uh si. )

Nauhak tete Runnak thut.ha simtu an si thei ding;
In tlennak le a thinglamtah thu an sim thei ding;
a hlatnak ah um mi tla an thinlung nuam ter ding;
Pathian thuthangt.ha hmuntin ramkip ah an kuat ding;
Nauhak tete nunnak thu simtu an si thei;
Runtu Bawipa’i ?duhdawtnak?
Nauhak tete Ruunnak thu simtu an si thei;
Nang Ziangti’n! !!!!

Thufim Hrilkhawm
*  Tukforhnak hi midang le lenglam ihsin rawng ding ih kan ruah laiah
kan mah sung ihsin a rawng suak t.heu.

* Kan nunak ah Pathian thiltum kan theih tluk ih thupi a um lo.
                                                            By : Rick
Warrent

* Pathian ina lo taansan vekih na theihawk lai khlah ah na zumnak cu
fek ter sinsin aw.  Ziangahtile, Pathian cu a thukam parah a hmanhlap
dahlo ih a tlai dah fawn lo.

*  Jesuh thawn nan pawlawk tam deuhdeuh le a mah na bang deuhdeuh
ding. Simduhmi cu a duhzawng na duh deuhdeuh ding ih a huat zawng na
hua ve deuhdeuh ding.
                                                         By  :  Rick
Warrent

*  Pathian sunlawihnak hrangaih nun hi milai in kan damsung ah kan
tuah theimi thil hlubik a si.
                                                             By :
Rick Warrent

*   Pathian in Leitlun ah thleng seh a timi a thlen kim thei nak
dingah milai hin thil phun kim kan tuar t.heu.

By :  Rick Warrent

*   Na thlaraulam sungkua pawl hi na taksa lam sungkua pawl hnakin an
thupi sawn, ziangahtile cu pawl cu kumkhua daih ding an
si.

By : Rick Warrent

*   Pathian sunlawinak ih na hman lo ah cun Pathian in fimnak,
thiamnak, talents le experiences a lo pek dah lo ding.

By : Rick Warrent

*  Pathian sal ngaingai cun an duhzawng in Pathian hman an tum dah
lo, Pathian cun a duhzawng ih a hman dingah an nun an aap aw sawn
t.heu.

By : Rick Warrent

*  Pathaian in thil ziangkim hi umzia nei in a tuah.  Curuangah thil
ziangkim hin santlaihnak pakhat ciau an nei.
                                                                 By :
Rick Warrent

Pathian Lungawi Zawng Thil panga!

“Sikhalsela Noah parah cun Bawipa cu a lung a awi”( Seem 6 : 8 )
Kan Leitlun hi sualnak lawngte in a khat t.heh zo. Bible
sim cia bang in Noah sanlai bangtuk in milai pawl hi kan si t.heh
zo. Ahleice in Noah sanlai ih Pathian thin tawktu bik sualnak
pakhatnak cu sexual- sualnak a si. Tulai san khalah cumi thotho cu
leitlun tibal tu bik a si ko ee.

Noah san laiah Pathian in milai a rak tuah cu a siraw ih milai
hmuahhmuah thah duhnak lungthin tiang a rak nei. Asinan, cutluk a
sualmi milai lakah cun Pathian lungawitertu milai pakhat a rak
um..cucu Noah a si. Bible cun ?Noah parah cun Bawipa cu a lung a awi?
a ti.

Ziangruangah so Bawipa cu Noah parah a lungawi? Noah cu ziangvek
milai ha a si? Ziangvek in so Noah cu Bawipa hmaiah a nun? ti cu mal
lai kan zoh tlang hnik pei uh.

1. Pathian thawn a um tlang mi a si ( Sem 6 : 10 ).

Milai hmuahhmuah in anmai nomnak le siipuazi lawngte an ruat ih, an
duh poh in an ei, an in, an laam, an nuam, an ceen, duhpoh in an
ittlang,  duh poh in an pawlhcawk aw. Cuti lai ah Noah timi pa
lawnglawng Pathian ngaihsak le Pathian hawl a um. Bible cun Noah cu
Pathian thawn umtlang t.heumi a si a ti.

Tulai kan san khalah Noah vek ih Pathian thawn umtlang theumi hi
Bawipa in a hawl. Cuvek milai cu Pathian in mifel a ti. A umzia cu
Pathian thawn Fellowship a nei ringringmi tinak a si ko. Pathian
thawn pawlkom aw ding cun thildang  hmuahhmuah hnak in amah Pathian
kan duhdawt  kan hril ringring a t.ul.

2.  Noah cu mi t.hazet a si ( v. 10 )

Bible in Noah cu  mit.hazet a si a ti.  Duhhamnak ih a khatmi Leitlun
ah hin mit.ha zet si cu thil awl a si lo. Mi par ih t.hatnak lanter
hnak in mi harsa le bawm t.ul zetmi kanlak ih kan hmuh keukheu khal
le mitsin san le hnaset tun men a awl te. Tulai zumtu pawl cu, ?nan
harnak kan lo theihpi zet?ti fang lawng kan thiam ih, bawmawk lam cu
hnaset kan tunaw men t.heu a poi zet. Cuvek milai cu kan Bible in
mit.ha a ti dah lo.  Noah cu suahsualnak phunza kip lakah a tlangleng
nan ziang sualnak hman a tuah lo. Cucu Pathian in mit.ha tiah a ko.

3.  Zumnak in a nung

Pathian in Noah hnenah lawng tuah ding ih a fial tikah Noah tei sung
kha tipi thuanthum ihsin peng 100 lai a hlatnak ih um an si.
Cuitlunah, ruahpi vanawn sur tivek hrimhrim an hmu dah fawn lo,
Pathian cun tlang par kherkher ah lawng tuah ding in a fial fawn.
Noah hrang ah cun zum a har zet ko ding.
Asinan, milai ruahnak ih thil cangtheilomi si hmansehla Noah cun ?
Bawipa ziangruangah so? Ziangtin so? Ziangtikah so??timi thusuhnak (
Q ) pawl a sut riai lo. Pathian t.ongkam par ah a zum ih, cui zumnak
cun ke a karh ngam a si. Zumtu cun Pathian t.ongkam hmuahhmuah hi kan
mit in hmu hrihlo khalsehla a thleng kim ding a si ti zumnak ih ke
karh ding kan si. Noah cun kum 120 sung rori lawng a tuah ih; a
phunciar ti kan hmu lo. Midang pawl mithmuh ah cun mi aa an ti lo
ding maw?
Asinan, kan Pathian cu a thukammi parah thuphan a per dah lo. Kan
Bible ah in tiammi pawl hi zum ih ke karh ding kan si.  Cuvek milai
cu Pathian in mifel tiah a ko. Cuvek lungput nei tu cu Pathian in
milai lak ah a hawl. Noah sanlai ah milai thawng tampi an um nan
Pathian in Noah pakhat lawng mifel a ti. ( v. 8 )

4.  Pathian ih simmi vek cekci in Noah cun a tuah ( v. 22 )

Pathian in Noah hnenah Lawng tuah ding ih a fial tikah… “Noah,
lawng tumpi in tuah aw, tii ka lik ter ding tiah a fial men lo? Lawng
tuah ding ih a fial tikah a sau lam, a san lam, a kauh lam le a sung
ih a luh ding rannung vialte khal a cipciar in a sim t.heh. Bible
cun, ?Pathian ih simmi vek cekci in Noah cun a tuah?a ti. Cucu thuawi
nun a si.
Pathia in hnat.uan ding ih in fial tikah mai duhdan le mai ruahnak
men ih t.uan theih a si lo. Kan Pathian hin milai hnenah hnat.uan in
fial tikah a mai duhdan vek cekci ih t.uan dingin in fial. Pathian
fial vek le Pathian duhdan ih t.uan pawl parah Pathian a lungawi. Kan
miphun, kan Kawhhran le kan pawlkom, kanmah bulpak par hrimhrim
khalah Pathian lungawi zawng ih um kan duh a si ah cun Pathan thu vek
cekci ih kan thlun le Pathian duhnak kan hawl t.ent.o a t.ul. Noah
cun lawng a tuah ih Pathian in, rannung pawl lawng sungah a luh sak
t.heh ti Bible ah kan hmu lo. “Pathian simmi vek cekci in Noah cun a
tuah?ti kan hmu.  Cucun Pathian thu hi atheih lawng silo in a tuah ih
tuah ding a si ti a lang ter.  Cuvek minung parah Pathian a lungawi.

5. Noah cun Thangthatnak a pek ringring

Noah cun Pathian ih sim vek in Leitlun ah thil ziangkim a then tikah
raithawinak a tuah ih Pathian lung awi sal ti kan hmu. Cui
raithawinak cu lungawithu simnak thawn a bangaw.
Noah cun thil sia le t.ha a tawn lai khalah Pathian hnen ih
lungawithu sim duhnak lungput a nei. Cucu Pathian lungawi zawng a si.
Zumtu tampi cun Pathian hnen ih kan dilmi kan ngah tik le Pathian
thlawsuah kan dawn tikah in petu Pathian kan hngilh t.heu ih; a
thlawsuah in pekmi cu kan duh poh ih hmang in Patian donak lam thil
kan tuah t.heu. Cuvek milai par ah Pathian a lungawi dah lo.
Kan Pathian cu Noah vek ih lungawithu sim ringring mi pawl hnen ah a
lungawi ih cuvek milai cu mifel   ti’n a ko. Pathian kan par ih a
lungawilo ah cun milai cu thih thluh ding le t.iak darh thluh ding
lawng kan covo a si. Pathian kan par ih a lungawi ringring thei nak
ding cun Noah vek ih Pathian thawn pawlkomawk ringring mi, thtnak,
zumnak, thuawinak Pathian hnenah lungawi thu sim raithawinak hlan a
thiam tu miphun le innsang kan si a tul a si.

  By : Richard Ela

                      Thlarau Rah
                                         By : Rev. Tan Sri Dr. Lim
Cheng Ean
                                                       Bishop of west
Malaysia

Bawi Jesuh cu na rundamtu le Bawi ih na pom tikah Thiangthlarau cun a
lo umpi. Amai lam ih na thinlung hmuahhmuah na pek tikah
Thiangthlarau cun na nunnak a luahkhat ih Thlarau Baptisma tla na co.
Cumi rualrual cun Thlarau cun laksawng pakhat lole pahnih thum tla a
lo pek men ding. T.awngdang, Zumnak, mi dam ter theinak, fimnak,
midang zirh thiamnak le pastor hna tiangin na co thei men.
Thiangthlarau cun hi thilpek pawl hi zumtu pawl pumkhat awknak le
pakhat le pakhat rawng kan bawl sak tawnawk thei nak ding ah in pekm
an si. Mah le mah uarawk ih pawl t.hennak le mi eel-nak, rualpi le
zumtu dang pawl zuamnak hrang ah in pekmi an si lo.

Thlarau laksawng kan dawnmi hi kanmai hlawknak ding le kanmai
sunlawinak ding hrang a si lo. Thlarau thilpek a dawngtu pawl, “cui
thilpek hmangsuak tu pawl hrangah cun pitlin a t.ul lo.  Cuhnak ih an
t.ulsawnmi cu midang thawn an tlanlennak ah rualrem zet ih an um thei
nak ding balancing nun an neih a thupi sawn?

Kawhhran hi, thlarau laksawng ka dawng a tiawtu, rualpi pawl thawn
remaw derhdo te ih feh thiamlo tu pawl ruangah a buai t.heu ih a
harhdam thei lo.  Cuvek zumtu pawl cu tuu dang vek in duhaw tuk le
mah le mah uaraw tuk lo ih an nun theinak dingah t.hanso an tul.

Paul cun, “Thlarau in nunak in pek zo ruangah kan nunnak khal hi
Thlarau in in uk ding  a si”( Gal 5 : 25 ) a ti. Thlarau dawn hnak in
Thlarau ih ukmi si hi tampi a har deuh. Kan nun ah Thlarau rah a
rahsuah thei nak ding cun; cu’i Thlarau hnenah kan nunak pum aapawk
ringring a t.ul a si.  Cui Thlarau rah pawl cu Krih kan bang deuhdeuh
thei nak ding ih lam in hruaitu khal an si. Na pianken ah thin tawimi
na si khalle, Thlarau in na nunnak a lo ukhnu cun lungsau ten khua na
ruat thlang ding, mi in na silonak ah sual ih an lo puh khal le
lehrul ve men lawn ngaidam duhnak nun na nei ding. Ziangahtile
Thlarau rah a simi “supawk theinak” na nun ah a lang ruangah a si.
Tu lai santhar le nonawn pawl in na nun hrimhrim ah zoht.himding
thazaang an hmuh le Kawhhran a mawi ding ih Kawhhran a dam ding.
Thlarau rak kan nun ih lang suak vivo ding ah cun ?Thlarauthianghlim
ih ukmi zumtu kan si a t.ul a si?

                          ” Virus Pakhat ”
                                                            By : Lai
Thang ( Cherry )
Laitlang ah ka piang lo nan Laimi ka si.Lairawl ka ei tam lo nan ka
ngaina emem mai.Mivek in Degree ka nei lo phunhar te cu ka rak ong
hnianghni.Ka suahnakah Khrihtian an mal nan Ka Nu leh Ka Pa in
Pathian thu in sim.Lait.ong in in biak.Lai thuanthu in sim.Ka nauhak
laiih Laimi ka theih mi cu ( Aung San Thura ngah tu Major Thai Sawn )
a si. Laimi ti mi cu kan huai,Mi kut tang um duh lo leh “Lal sung
kua ” ti hi ka rak uar emem mi a rak si hmang.

Mizoram leh Kawlram hmun dangdang ah rethei ruangih pumcawmnak hawl
in ka vah lai ah ” Laimi ” Thuanthu hi thuk deuh kau deuh in ka thei
vivo.Ka Pu in liam san hlan ah thu in cah ta mi cu “Khrihtian si a ol
nan Khrihtian nun nei ding a har” tin leh ” Na t.uan suahmi Laimi
hrang si seh ” ti’n in cah mi te ka mang  sal t.heu. Lai thisen hi a
caan le a mak zet t.heu.” Saikio fimzir kan bang tuk maw aw ? ”

Voikhat cu Gandi ih a ton mi ah “Biak Inn ah khawm ding in a feh ih
Caa taar mi a hmuh tik ah a thin a khawih ngaingai.Cumicu {
Nigaro,Indian leh Uico pawl lut theih lo } ti Caa tarmi asi.A thin a
naa tukih ziang tik hmanah Khrihtian ka lut lo ding. Asinan Pathian
nan ti mi cu ka zum a nung mi asi a ti.
Kan  Khrihtian nun ti mi hi a rak mak tuk t.heu. Hla in maw, Thu in
maw, Mawinak in maw,A dangdang in tla kan t.hangso zet ko. Kan zalen
zet ko nan a caan le zumlotu ih hmai ah nungtlaak dingin ka um thei
lo maw si? Kan Khrihtian ram sung ah ” Donak ” a tam sawn si lo maw?
Pathian hi kan nun ah a hlo t.heu. Leilung pi sung ah  ” Asiaram,
Asiaram sung ih Myanmar,Myanmar ram sungih ” Chin ” “Lairam” ti fa te
tak sung ih” Falam khua “timi sung ah Pathian thu hnak in kan buai
deuh mi cu “Kohhran din tu ” si hi kan uar zawng a si hmang.

Ram dang leh hmun dang rel lo in a nai bik Rangon ah hman ” Laimi ”
mi pum siar ah ( 0.5 % ) hman a ti lo nan kan  Kohhran  cu kan mi pum
ai in a tam deuh. Laimi mi pum malte sung ah Kohhran ( 130 over ) um
hi cu t.ha ten ruatt.hat a t.ul nasa in ka zum.
Cuticun Malaysia lam ah ka rawn thlengih ( LCF ) ti’n kan Falam t.ong
te ih Pathian thangt.hatnak a um ti’n ka theihnak a rei zo.Ka
thinlung te cun hnamdang Ramdang lakah hi ti vekih Bawipa cawimawi tu
ding Laimi kan um ve hi a va sung lawi em! ti’n ka fak nasa nan,a rei
man lo nasa. ( LCF ) ti mi lawng kan tawk lo si hmang in ka thei. A
thar ( FCC ) ti mi Kohhran thar a um leh ta mai aw.

A cuih kathin ti’n kalung a zuur nasa. Ziang ah si kan Laimi sung ih
( Falam ) ti mi in hmun khat te ah Pathian kan cawimawi thei lo nak
san. Ziang ah so a thar kan ti cingcing nak. Kan Dr. pawl, Master
pawl, Degree pawl leh a dangdang pawl fimnak kan zirih a sang pi ah
kan thlen cun Lairam ti mawi tertu si sawn lo ih ” Kohhran ” ta rori
ah kan buai hi cu ka thin a naa nasa.Kawlram Laimi sung ah “Virus”  a
lut tam vek in Ramdang Malaysia ah tla cu mi “Virus” fa te pakhat cu
a run thleng ta mai a si cu.

Pathian hnakin  ” Kohhran ” thu pi ah kan ret ih lungrual hnakin ”
Lal ” si hi kan cuh aw t.heu si lo maw? “Kan  thuanthu mawi timi
ziang so? ti’n ka lo sut duh. Thangthar hrang ah ziang tin thu na
zirh tum.Na Upat ih Degree na ngah le’n ” Kohhran ” thar pakhat din
aw ti’n thu na zrih ding maw ?Thangthar hrangah ei a va har awm em?
Maw ! Bawipa ka Computer sungah  ” Kohhran Virus ” a lut tam tuk zo ”
Technician ” pakhat tla rawn thlah aw tin thla ka cam duh.

             Kanmah Sung Thu

Mi naa Besia kan nei!

Kan dung Sunday 9 October, 05?zan ah Malaysia, Saihpuizii lam ih
hnat.uan kan unau Pa Kawlh cu KL khawpi laili…LCF biakinn kiang,
Jalan Alor ah Motor- cycle in a pah ih besezet in Kualalumpur
Hospital  siizungpi a thleng.
A bahnak ah a luu a khawng na deuh ih a thluak ah thisen a lut, a
thluak thahri khal tamnawn a cat tiah siibawi pawl in an sim.
Zianghman theilo in tui ni tiang siizung ah a it ih….kan theitawk
ciauin Pathian hnenah thlacamnak thawn bawm ciau uh si.
Amah hi Falam khua ih um a si ih Palik bokhat a si, cun Refugee sioh
dingin Malaysia a ra mi a si hmang. Thlacamnak thawn kan bawm pei uh
tiah hmuntin ramtin ih Laimi unau hmuahhmuah kan lo sawm a si.

In rawn Phone lohli mei aw!

Malaysia ih hnat.uan nei lo, mangbang zet ih a um tu pawl, Kawlram
tlung ta lo ih Malaysia ihsin permit tuah duh tu pawl, Malaysia ihsin
Kawlram a tlung duh tu pawl, Kawlram ihsin nan unau pawl work permit
( or ) Free calling thawn a ko duh tu pawl, Malaysia ihsin Kawlram le
Leitlun ram dangdang ah thilri kuat duhtu pawl nan um a si le, himi
phone number 012, 6858104/ 016, 9660823 ( Malaysia ), 00951-710579 (
Yangon ) ah rak contact lohli mei aw.
Man awl, zamrang le na duhthusam rori in kan lo tawlrel sak ding.
                                                            c/o.,
Salai Vumpi

A pan duh hrang…

Thlacamsak a duh tu, Innsang ah buainak a tawng tu le damlo,
harsatnak tawng kan LCF sungah kan um a si le Kan Pastor Rev. S. Ni
Luai rak ko lohli uh.
In bawm ding le thla in cam sak ding ih Ready ringring a si ih…a ra
pan thei cun kan Office khal ah pan theih ringring a si.  Pathian thu
counciling neih a duh tu hrang khal ah in bawm ding in kan Sayapa hi
a man cia ringring.

Biak inn thar lam ah…

October 15, Inrin ni ah LCF Pastor Rev. S. Ni Luai ih hohanak in
biak inn thar kan sanmi cu hnatlang in kan tuan, thilri hmuahhmauh
thiar in a tulmi hmuahhmuah kan rem ih milai 26 rori kan suak khawm
thei.
Mai hlawknak lawng silo miphun hrang ih tlawmngai tu unau nan zate
parah Pathian thlawsuah thleng hram seh.
Pa Ngun Hmung in kan za ten rawl in do ih ….a par khalah lungawinak
tumpi kan nei.  Bulpak in zalen zet ih khawmnak kan neih lo lai le
kan vahvaih rero lai ah in rak bawm tu, inn in san sak tu Tv. Vula
tei par khalah Kawhhran hmin in lungawi thu kan sim duh.
Rawngbawlnak kau sawn kan neih thei beisei in Biak inn thar hi zumnak
ih san a si ih; LCF member kan zaten tan kan lak khawm vialvo a t.ul
a si.  Hnaihnawk tu le buainak phunphun karlak ah Pathianin Kawhhran
pakhat in pekmi LCF ah thinlung hmunkhst ten  kan t.uan tlang t.ent.o
pei uh!
                                                             David
thang, Secretary

                        Myanmar Thuthang

Southeast Asia pawlin UN cu Myanmar par ih Action la ding duh…
Kan dung tlawngkai nikhat ni ah Southeast Asia ram aiawh palai
tawngaw khawm cun; UN cu Myanmar ram sungah Democratic reform tuah
lohli ding an duh thu an phuang.
Thailand, Singapore le Malaysia daan tuahtu pawl cun; Asian ram 10
pawl hin Myanmar ralkap uknak thleng ding cun thazaang an neihlo thu
le ram leng lam cangvaih rori a t.ul thu an phuang. US, European
Union, Japan, China, India, Russia le Asian pawl tangkhawm tahrat ih
Myanmar ralkap cozah cu lung thin ding ih kan biak tik lawnglawng ah
Myanmar ram sungah reform a ngah ding tiah an phuang bet.

Asian daan tuahtu pawl tawngaw khawm cun, Myanmar reform hrang ah
hruaitu t.habik ding ih an ruah cu UN Secretary Kofi Annan a si ih,
Annan-ih kut tang hnat.uan tu Ibrahim Gambari khal an tawng zo. ?Hi
basic programme ih kan lungrual tlan thei ah cun Myanmar ram sungah
politic thlengaw cu kan hmu thei ko ding?tiah Malaysia Parlimentarian
Zaid Ibrahim, Asean Inter-parliamentary t.uanlai cun a phuang.
Ibrahim cun, Myanmar politic thlengawk nak ding ih lamzin t.habik
cu  ?UN Security Council ah hi thu hi lak luh ding a si?a ti.

Kan dung June thla ah US cun Myanmar thuhla hi UN security Council ah
hnuh lut a tum zo nan, Russia, China le Algeria ram pawl in an
remtilo ruangah reltel lo in a rak um.
Myanmar ram thuhla ah tuit.um ih ASIAN ram hruaitu pawl au aw cu; ram
cak sawn US le EU pawl an cangvaih rori a t.ul. Russia, China, Japan
le India khal an thupi zet. Asia lawng cun ziangtin hman kan tawk
thei lo an ti rori.

US le EU pawl cun Myanmar  parah sumdawnnak phunphun an phit zo nan
Asia ram pawl cun cuvek tiangtiang an tuah hrihlo asan cu Southeast
Asia hnenum ram pawlah Refugees an lut tamtuk an phan ruangah a
si..tiah  Ugphakorn, Singapore Parlimen aiawh tu cun a sim.

Myanmar hi 1962 kum ihsin ralkap uknak ih uk a si ih..1990 kum ah Suu
Kyi hruainak in NLD party in rampi hrilawknak ah nehnak an co nan
tuini tiang ralkap cozah cun uknak an pek duh lo. Myanmar hi Brunei,
Cambodia, Indonesia, Laos, Malaysia, Philippines, Singapore, Thailand
le Vietnam ram pawl lakah ASIAN member pakhat a si ve.
                                                               Thu
laknak : REUTER

Myanmar ah Bird Flu natnak…?

Tulai ah Leilung tlun in an buaipi vutvomi arpul hri ( bird flu ) hi
Myanmar ram sungah a um le umlo hi thusuhnak tumpi a um? Hi natnak hi
2003 ah Southeast Asia ihsin a suak ih, aar million tampi in an thih
phah zo, Asia ram lawng hmanah milai tampi a that zo; tu ah EU le US
lam tiang a karh vivo.  Cu lai lak ah Asia ram pakhat a simi Myanmar
in a ram sungah bird-flu a umlo a timi hi Leitlun ram tampi cun an
zum hrimhrim lo.

An phanpi mi cu ?hi natnak t.ihnung hi zawi buaipi lo in Myanmar mipi
pawl rawt thattu a si pang ding?ti an phang a si. Myanmar ramri a
simi Tuluk, Vietnam, Thailand le Laos ram pawl cun Official rori in
an ramah H5N1 natnak hi a um zia an phuan laiah Myanmar cun himdam in
a phuangaw.

Zum a har zet. Hi natnak hri ruangah hmaizarh sungah US hardamnak lam
Secretary Michael Leavitt cun Laos, Cambodia, Vietnam le Thailand a
tlawng tum nan Myanmar lawngte a lut tum lo.
Myanmar cu Leitlun pumpuluk in Human right daan bawhpelh tuk le uknak
diklo tuk ih an hmuh thluh ruangah hivek bawm t.ul lam thil cu a
hmaan cekci ih a phuan duh khal zohman in an zum lo a si.

NLD in India cu Myanmar Gas leilo dingin dil..!
Myanmar Democracy ngah nak ding hrang hnatuantu NLD pawl cun kan dung
tlawngkai nili ni ah India cozah cu Myanmar ralkap cozah thawn
siipuaizii tuah tlang lo ding le Arakhan region ih gas le oil pawl
lei lo ding in an dil. Kawl ram ihsin gas nan lei ah cun ralkap cozah
nan lian ter menmen a si an ti.
India hin Myanmar ram sung ih gas lei dan ding le a ram sung ih pipe
thawn lakluh danding a tawlrel rero ih; a hlawhtlin cun ralkap cozah
cun kumtin $ 655million rori a miat an ngah ding a si.
India hin Arakhain region ih natural gas cu Kaladan tiva ihsin
Mizoram state lamah..Mizoram state ihsin Brahmanberia, Bangladesh
pipe thawn laak a tum a si. Cumi tumtahnak ruangah, Pipe phum nakding
hmun tuah in  Kawl ralkap cun Mon pi ne ih khawte tamtuk  an dawi hlo
rero lai ih…Mon pawl tampi  cu Bangladesh le Thailand lam ah an
tlan zo.

      Leitlun Thuthang Hrilkhawm

Arpul hri karh sinsin!
Kan dung thla ah Leilung tlun siibawi thiam bikbik tawngaw khawm cun
arpul hri hi milai pawl  suat tu t.ihnungbik a si thei thu le milai
pawl hin humhimawknak sii t.ha kan neih manlo an phan thu Leitlun
pumpuluk ah an than zo.

Tui zarh khalah Australia cun Indonesi cozah cu A$ 10milliom rori hi
natnak lak ih kilvennak hrang a bawm tum thu a suah. Indonesia ram
hmanah milai 5 in hi natnak hi an vei zo. Pa thum an thi ih pahnih cu
siizung an to lai.   Turkey khal in an ram ah hi H5N1 natnak hi a
thlen thlang thu an nemhnget. Hi hri leeng hin kan Leilungpi cu a
buai ter nasa. US le EU lam tiang in an buai t.heh zo. Mifim le
mithiam pohpoh an lung a phang; ram kip in ralrinnak an tuah
t.hept.hep zo.

Hollywood fala mawi cun..
Hollywood fala mawi Charlize Theron cu kum 30 a kim zo nan pasal neih
lam cu a ruat ban hrihlo a si cu.  Kan dung zarh ah thuthang suahtu
pawl in Interview an tuah ih, ?pasal neih cu ka ti zawng a si lo?hni
siamsi ten a ti thei lai. Hi fala mawi hin 2003 kum ih Monster timi
film a can nakah Oscar laksawng a rak ngah dah a si.

Pakistan Linghnin ah mithi karh vivo….
Kan dung zarh ih Pakistan le India ramri ih linghnin ah mithi zat an
pung vivo. October 14 tiang ih mithi zat an siar theimi cu Pakistan
ah milai 35,000 an kim zo ih..an ramri India control-nak ah milai
1,350…milai 50,000 zikte cu an thi zo tinak a si.
Kan dung Tsunami laiah milai 10,000 lenglo an thi zo ih, tuitum  khal
hi ziangzat in an thihphah ding ticu zawi rel ban a si lo.  India
Movie Actor Sanjay cun, Tsunami lai ah Pakistan Actors pawl in fund
tampi in hawl sak vekin; tuitum linghnin tuar pawl bawmnak ding hrang
fund kan hawl sak ve pei uh tiah India Stars pawl a huaihawt rero lai
ih, India milai billion khat hnak ih tam pawl hnenah Rs. 1 ciar tal
thawh dingin ka dil ding a ti bet.
  Pakistan President Musharraf cun Leitlun pumpuluk ah bawmnak dil in
a au ih; ram 30 cun paisa, siibawi, blanket le sii phunphun thawn an
bawm zo. Hi linghnin milai million 4 hrawng a buai ter ih million 2
hrawng cu inn neilo in a tuah.

Caalai Nobel ( Literature ) 2005 Ngah tu pa..

October 13, tlawngkai nili ni ah Leitlun Caalai laksawng ( Nobel-
Literature ) cu British pacang Harlod Pinter ( zuk ) hin a ngah riai.
Pinter hi kum 75 a kim zo ih a caa nganmi hminthang deuh pawl cu The
Room, The Birthday party, The Dump Waiter, The Caretaker ti pawl an
si ih; cabu tete khal hminsin cawklo a ngan zo. 1901 kum ih caalai
Nobel an peksuah ihsin Pinter hi British milai himi laksawng ngah
hmaisabik tu khal a si. Kum  75 mi British  putar cun hi Nobel
laksawng hi Stockholm, Sweden ah a va la a si.

Tuluk pawl Vansang boruak kai zo
Tuluk cozah thangso vivo cun kan dung tlawngkai nihnih ni ah vansang
boruak ah milai an thlah suak thei ve zo.  Milai pahnih an thlah ih
Nie ( hnaibik zuk ) hin a kum 41 suahcam cu arsi pawl thawn naiaw
nawn in a va lawm a si. Tuluk pawl cun tuitum ih an hlawhtlinnak
ruangah hin an hmai a uang zet.

                       General Knowledges

Hlamhmai Tumbik cu!
Kan dung tlawngkai nikhat ni ah  Noonbay, California, USA ah hlamhmai
rah tumbik zuamawknak  tuah a si ih; Holland mi Joel cun pakhatnak a
ngah rori.
Joel ih hlamhmai ( zuk ) hi 557kg ih rit, 1m ih sang a si ih; Joel
hin US$ 6,145 rori laksawng a ngah  a si. Hlamhmai par ih kai tum nu
te hi  Maddison Harder a si ih kum thum mi a si.

Piano ziangtikah an tuahsuak?
Bartholomew Cristofori timipa hi Italy miphun a si ih; 1709 kum ah
Piano hi a rak tuahsuak a si.  May 4, 1655 kum ah Venice ah a piang
ih January 27, 1731 kum ah Florence, Italy ah a thi.

Malaysia Twin Tower khi ziangtluk a sang ti nan mang lai maw?
Lamzinpi ihsin 451.9m ( 1,482ft 8in ) ih sang a si ih 1997 kumah an
rak sak t.heh. Hi innsang hi tuini tiang Leitlun ih Office building
sangbik a si ringring lai. Malaysia thleng thei cin cun vei hnih khat
tal cu va zoh a tlak rori.

Malaysia ih Tipi kulh khua umsun..( Sabah )
Malaysia ih tipi kulh khua umsun cu Sabah ih Pulau Sipadan timi khua
( kehlam zuk ) khi a si. Sipadan khua hi tipithuanthum in a kulh theh
ih; tlawng tu khal an tam thei zet. 4h area ih kau a si.

                                              Capo

LCF le LCYF debate an nei a si hmang :

LCYF :  U pa LCF,  kumpi linglet zianghna nan t.uan t.heu?

LCF :  Siat ni kan tawn caan ah tavuan kan la thluh pan teh.

LCYF : A si maw…Siat ni bawh tla nan bang ual.hi..hi..hi..

Zawpi Fahruai

LCF tlangval pakhat cun ti vovo in Jalan Alor ah a feh hngohhngo…
PP :  Karual khawi na feh ding?
TT : Tulai cu kawh kawhhran  vulhmi zawhte in fa panga rori a nei
ih…
PP : Khawiah nan ret ding?
TT :  Ka thei ve lo, zawhpi in a hruai nak hmun pohpoh ah kan t.hawn
vivo men pei cu ka ti…
PP : Awi haaaaaaaa…..

Bal te…Bal te…

Singpahrang David ih san lai ah  Nabal timipa a rak um. David ih
bawmnak ruangah milian zet ah a rawng cang.

Nikhat cu David ral a do ih a rilrawng tuk, a bang tuk ruangah Nabal
hnen ah sang le eiding va dil uh tiah a ralkap pawl a fial. Nabalcu a
rak lian tuk zo ruangah a puarthau ciammam ih, “David le vid lo khal
ka thei lo”  tiah a rak pek duh lo. Cuveten David ih thin thawk cun
that dingin a ralkap pawl a fial.
Cunah Nabal cun a rualpi pawl a sawm ih..thaisun ah David nih in that
thlang ding..ra uh zuu kan in ding, kan nuam ding! tiah a sawm ih
zanvar rii tlektlek in an nuam.

Nabal nupi nih David hnen ah ngaidam a dil ruangah David nih Nabal cu
ka that sal lo ding a ti ih; Nabal lungawi tuk cun a rualpi pawl a
sawm lala… “ra  uh David nih in that sal lo ding..kan nuam awk pei
uh!?..zanvar zuu rii thlekthlek in an in ih an nuam lala. Beidon khal
le inthotho…lungawi khal le in thotho.
“Nabal cu zuu a in tamtuk ruangah a thi rori.Tulai Malaysia ih
Laimi, zumtu a ti aw pawl  khal hi Nabal vek kan tam tuk lawmmam
ih…Bal te…Bal te..Bal te…tiah kan hmin vuah thluh
ding…Hi…hi..hi..Bal te..”

Kawhhran Upa pakhat

Tivar khua ah kawhhran pakhat a ding thar an ti. Member cun Upa
pakhat hnenah..
Member : Zakiah theipi kung par ih a kainak kha ziang thing ha?
Upa :  Ka va thei mei lo ve..ka Bible ka rak zoh ta ding…

A Cem Vuarvi hrih aw.,,,,,,,,

A NEITU
LCF
CHIEF EDITOR
RICHARD K. EMMANUEL
JOINT EDITOR
VL BAWITHANG
SENIOR ADVISORS
ANDREW THANG ( PATE )
REV. S. NI LUAI
PEHZAWMNAK
42 – 14, WISMA CITY TOWER, JALAN ALOR
50200 KUALA LUMPUR
MALAYSIA

E-MAIL
hruaitu@…
richardemmanuel4u@…
vl_bawithang@…

Comments

comments

Comments

%d bloggers like this: