Hruaitu Issue 93

Editorial
Nan ruat ve ciau ko ding?
Malaysia  Falam mi pawl in kan tomi thil hi nan ruat ciau ko ding ka
zum.  Ziangruangah LCF timi Falam pawlkom ihsin FCC timi Falam
pawlkom a suh bet thei?  LCF timi tehcun ziang tluk in so thazang a
neih ih ziangvek hna so Laimi pawl hrangah a tuan suah?  Ziangruangah
so hiti can kan can ih kan mit hman retnak kan theih lo.
A hrekin Pathian remruat a si an ti lai ah Laimi hrekkhat in Sehtan
hnatuan a si an ti fawn.  Ziangbik so a hman? Ziangbik so Pathian duh
zawng?  Ziangruagah so mi ih relsiat luilo ih kan um? Ziangruangah so
than lam hnak in buai lam kan pan vivo? Ziangruangah so  u le nai
rual le pi hmuahhmuah kan zoh awk duk do.
Nan ruat ve ciau a si ah cun, a phi nan hmuhsuahmi pohpoh kan
thuthangca ah in ra hlawm ve hram uh.  Kan sungah natnak a um a sile
kan dam ter hlan ah cun…paisa nei silo neituk vek ih um a ngahlo
vek in  thuphan rori thungai tuk vekin um ringring a ngah lo. Thu
hman le thutak cu thup kumkhua theih a si lo.  Milai khal kan thanso
ih kan damcak theinak ding cun kan natnak kan theih ih sii  thatha
thawn damding rori ih kan tuah a tul.  Ziangruangah hiti can kan
cang, tu ah teh ziang dinhmun ah kan ding timi pawl hi a ruat dah tu
nan um ve a si ahcun…nan ruahnak ciau in rawn sim ve hram uh tiah ?
HRUAITU?cun a lo sawm a si.

Bawipa’i Tuu
                                                                By :
Rev S. Ni Luai
Keicu tuukhal tha ka si. ka pa in i theiih kei khalin kapa cu ka
theih vekin ka tuu pawl cu ka thei ih annih khalin inthei ve. Cule an
hrangah ka nunnak tiangin ka pe siang a si. ( John 10 : 15 )
Leilung le Van
hmuahhmuah a uktu
Jesuh cun milai pawl hi ka tuu in ti. Pathian hmin thangthat si ko
seh.
Tuu tiah Jesuh in in kawhnak san hi tampi a um. Tuu le zumtu kan
bangawknak phun 14 lai sim ding a um nan, phun 8 lawng tuitum ah
tarlan kan tum ding.
1. Tuu cun kaih 75 ( kawltong) lawng an hmu thei. Curuangah lamzin an
hloh lo nakding le rualpi pawl thawn hmunkhat te ah lungrual ten an
tlan khawm thei nakding ruatin Tuu khaltu cu an zoh ringring. Cuvekin
zumtu pawl cun in khaltu Jesuh lawng kan zoh ringring a tul. Zirhnak
diklo, thihnak lam ih in hruaitu pawl lakah, tukforhnak ih kan tluk
lanta lo nak dingah kan tuukhal tha Jesuh lawng kan zoh ringring ding.
2.  Tuu cun hruaitu an tul. Tuu cu saram dang vekin dunglam ihsin
khalh pawl an si lo, tuukhal cun hmai ah hruai ta hrat in rawl
thatnak hmun ah a hruai theu. Curuangah zumtu pawl khal hin uktu silo
in hruaitu kan tul ringring. Tuu cu duh poh in vorhlam le keh lam ah
an pial lo. A hruaitu in a hruainak hmun ah daiten an thlun. In
khaltu, in hruaitu Jesuh hruainak vek ih thlun ding hi zumtu pawl ih
tuanvo cu a si.
3.  A hna a thlep. Tuu cu saram dang vek ih hna a tungmi an si lo. An
hna a thlep ringring. Curuangah thawmvang tampi an thei lo. Aw tampi
an thei lo. A khaltu aw lawng an ngai ringring. Jesuh in ?Ka tuu cun
ka aw an thei, keikhal in an aw ka thei?a ti. Leitlun ah sum le pai,
thilri le ngaiding tampi a um ko nan, zumtu cun Jesuh ih awkam
lawnglawng kan ngai ding le kan theih ding umsun a si.
4.  Tampi an rak an kio lo. Mee cun a tul lo nak ah
be..heh..be..heh tiah an rak ringring, an kio ringring. Asinan tuu
cun bawm an tul caan te lawngah, khur ih an tlak maw, an bah pang
tivek lawngah an pu ko in an ai. Zumtu khal hi a tul lo nak  ih tlawk
tamtuk le tong tamtuk ding kan si lo. Zumtu cun awka nem kan hmang
ding. Mee cang vek ih tong duh poh tong zutzo ding kan si lo. James
cun awka thlum a neimi cun a hmelma khal a rualpi ah a tuah thei a ti.
Kan Laimi lak hmanah kan sim theumi cu Halkha tong mina vehnak, Falam
tong leiba cawhnak,Thantlang tong capo sainak tiah kan sim theu. Cumi
hmanah kannih Flam cun a sebik, ?leiba cawhnak?lawng kan co ngah lai.
Tampi kan awkam, kan tong dan kan thleng a tul. Halkha peng lamah
rawng ka bawl laiah Maleria in ka na ih pitar pathum in inra veh. Thu
in ra ruah ciamco ih an awkam a thlum tuk ruangah ka lung a leng
ciamco ih ka tap rori. Simduhmi cu, zumtu hin harnak kan tawn tikah
milai pawl henih sim rero le kio rero hnak in inkhaltu Jesuh sim a
tha deuh. Cathianhlim cun nunak a duhtu cun a lei khilkhawi tha seh a
ti. Zumtu hi tlawk tamtuk ding kan si lo.
5.  Tuu cu a mei a khup.  Uico cun a ngam zawng a hmuh le a mei a pir
ter ih Ngir..Ngir..tiah a hro theu. Asinan tuu cun ziangtiklai khalah
a mei a pir ter dah lo. Cucun tangdornak a hmuhsak. Zumtu cun kan
tuah theimi umsun le hlawhtlinnak kan ngah lai khalah uico vekih
puarthau ding kan si lo, tuu vek in daiziar ten mei khup ringring
ding kan si. Milian le mifarah lak ih kan tlanlen khalah normal te in
kan um ringring a thupi.
6.  An khuk a caak ringring.  Tuu cun an thawh le an bawh zawng ah
direct in an tho an bawk men lo. An khukte an bil ta theu. Cucun
thlacam nun in zirh. Zumtu khuk caak hrihlo cun ruahding tampi kan
nei lai. Thlacam nun neilo zumtu a um theihlo. Zumtu pawl ih khuk cu
ral donak G-3 vek a si. Thlacam nun neilo cun riitte hman kan tluk
theilo. Kan ral nehnak thabik cu  Jesuh hmaiah khukbil ringring hi a
si ko. Tulai ah cun khuk bil dahlo Pastor tla kan um ih a poi zet.
Cuvek milai cu kuli hlawh vek kan si. Lahkha pek lo le tuan nawnlo,
lungkimlo le tuan nawnlo men..kuli hlawh pawl zia a si.
7.  Tuu cun hmul an nei. Tuu cu hlul mehmi phun an si. A zuattu
khalin a hmul duhah a zuat. Tuu hmul meh dahlomi cu a thang theilo, a
harhdam theilo, a san a tawi, fa khal a nei thei lo. Tuu zuattu cun
tuu hmul cu an pum cawmnak ah an hmang.
Zumtu pawl in kan hmul cu, Pathian hnen ihsin kan dawnmi thlawsuah
pawl hi an si.  Cui thlawsuah pawl cu kan Pathian hrangah, kan
tuukhal Jesuh hrangah kan thlawng ngam maw? Kan thlawng siang maw?
Tuu cu a hmul an meh tikah a phunzai lo, daiten a pu’i hmaiah a ding
khiaukhi theu. Ziangahtile, hmulmeh cu a thatnak ding ti a theih
ruangah a si. Cuvekin Pathian hnenih kan ngahmi thlawsuah hi Pathian
hrang kan hman tik ah, Jesuh hrang kan pek tikah kan thatnak ding a
si ti hi kan fiang a tul.  Curuangah Paul cun Pathian hnen ih thil pe
tu cun uilo le siang zet in pek uh a ti nak a si.  Kan tuukhal
hrangah kan hmul a thlawng tam deuhdeuh le kan harhdam deuhdeuh ding,
kan tuansuak thei deuhdeuh ding, Pathian thlawsuah kan dawng deuhdeuh
ding tinak a si.
8.  Tuu cu bal hnuaihni ih ummi a si lo. Vok le Nacang cun
tithianghlim hnakin cenbek ih bual an duh sawn. Tuu cu cuvek a si lo.
A bah pang khal le  vuk tin a tho ih, thingkung bul ah a nawt faiaw
hlohhlo, a thingaw pherhpho ih a rualpi pawl man sal thei dingin a
dawi theu.
Zumtu, piangthar nagingai pawl cu an tluk hmanah an itlanta dah lo.
An sualak bal ihsin an tho loli ih an rualpi pawl ban ding in an tlan
theu. Zumtu ka si ti ih bal hnuaihni, mi ih sawisel ding ih um
ringring, zuk le hmawm, zuu le riit theih sii khal tham phahphah
ringring pawl cun Pathian tuu kan si kan ti aw ngam pei maw? Thaten
kan ruat pei uh! Zumlo tu cun Night Clubs le Bar tivek hlawhhlang inn
le Concerts tivek ah an nuam theu. Cuvek hmun ih nuam ti tuk na si
laiah cun Jesuh ih khalhmi tuu maw na si Sehtan ih khalhmi mee sawn
ti thaten check-aw sal aw.
Zumtu cun nuam a ti nakding hmun cu Biakinn le zumtu pawl umkhawmnak
hmun ah a si. Khawitawk ah zumtu pawl an tawngaw khawm theu ih khawi
tawkah zumtu pawl in thlarau rawl an ei khawm theu ti an hawl theu.
Cucu an nawmnak a si. Vok vek ih cenbeek ah nuam ti pawl an si lo.
Tulai zumtu cu kan zuatmi vok  vek zumtu kan tam. Vok hman tluk
nawnlo khal kan tam tuk zo. Vok cun rawl a petu a pi/pu tla a thei.
Asinan kannih cu mai duhpoh in kan in, kan nuam kan tawl. Ka
piangthar kan ti khal le Vok vek, mai bualnak ceenbek kelte ih bual
leh sal cingcing zumtu kan tam tuk thlang ee. A poi tuk. Vok cu kan
vulh tikah zuar ding le thah ding menah kan vulh. Rawl kan pe, kan
cawm thau ih…a netnak ah kan that theu. Sehtan hin tulai minung,
zumtu a ti aw tu pawl tampi hi vok vulh in in vulh hmang ka ti. A
netnak ah cun vok thah in in that lai ding.
Zumtu unau, aat caan a si nawn lo. Sehtan bumnak sal sung ihsin
tuukhal tha Jesuh in insuah zo ih, ?kan suak ve thlang lo ding maw??
Kan pu in insuah hnu khalah cui sal sungah cun kan taang ringring lai
ding maw? Baal hnuaihni cun kan um nawnlo pei uh. Kan biakmi kan
Pathian, in khaltu cu a thianghlim bangtukin  kan nitin nunah Jesuh
ih tuurual kan sinak kan langter vivo hram pei uh!

Fang Er
                                                          By :
Ronald Tha Tin Mang
Hminsin: “Fanger, sa tuah, thawi lak thla pawl ah vawk thau thawn
mual rai thawi a si.?
Thlacam: “Pa Thang ee, Nu Ngen ee, thlua ngul hmul tek, zu pi kal nga
thawk ka lo pek. Kan mual pi ah Sa pi, Sa te tlung aw, sal nu sal pa
tlung aw.  Ka fai ceu kulh sung ah cawr le nat um hlah seh, rawl rel
hawl thing hlah, ka siang san in ka tluang in, tlang rel hawl thing
hla seh.
Kan pu pa san ah cun kum khat sung ah khaw tlang puai, `Fang Er` le
Sa tuah  an rak nei theu nan. Tu lai sanah cun Fang Er puai lawng kan
nei theu a si.
Fang Er
    Far Er ti mi cu kum tha ti a si. Kum hlun ih tlang rai nak nak um
nawn hlah seh ti nak khat a si. Fang le vai nim an lat zah in an tua
theu.
Ni hmai sak ah Pacang pawl in mualrawn ah vok an that ?mual tlang sun?
an ti. A zanah in tinah sang an suang ih sang an  suang ih sang khar
zan an ti. Sang cu an pianzia phun hnih in an tuah, kil li nei le a
pum sawl in an tuah. A pum sawl cu nauhak pawlin an pai theu. A cui
zan cu nauhak kum 5 ihsin tlangval hmuahhmuah in  fala umnak hmunah
leng zu an pu ih zan an meng suak theu. Nauhak pawlin sang thlai an
dawh i an nuam zet ve.
A thai sun cu nipi ni an ti. Hi mi niah mithi thlarau pawl tla an
hung tiin an ruat ruangah nu hmei pawl in mithi zung an retsak ih
pacang pawl thawn mithi hla an rak sak. Nipi zan cu khua a thim ve
ten in tin zaute ah thingtek hlamphei  an ret mi ah  meisa  an tik.
A hmasa bik ah far an vang, insung hmuah2 ihsin in leng lam tiang far
an nawr vivo. “Tlangrai?”Rirai? suak law, kumthar ah nan um thei nawn
lo ti in?an au ih khuang le dar an tum phah, meithal tla an kap ciam
co. Meithal neilo pawl khal a nei pawl ta an sang vivo. Nauhak pawl
khal in “Ri rai  ee suak uh law, na nui zin zawh law, na pai zin zawh
law?tiah an au ve ciam co. A zan cu fala in ah zan an meng.
A thai sun cu “Ni len sun?a si ih, tlangval fala le patung zan meng
suak hmuahhmuah in a cui an mensuak nak fala inn ah rawl an ei.
Ni li sun cu “Ar thing sun?a si ih fala in le nuhmei in ah zu an in
lai tho tho a si.
Lai mi hmuah hmuah in kumtin te hi vek in puai an tuah ciau a si.
Asinan kan hmin sak mi cu a dang dang ciau.
Kan Lai thla hmin pawl le thlatin thawi dan pawl cu hivek a si:
*  Fang Er ( October ) Vok thau in mual raithawi a si.
*  Tharcar Thla ( November ) Zuu lawngin thawi a si.
* Nim Kut Thla ( December ) Zuu lawngin thawi a si.
*  Mei Sen Thla ( January ) Vok nu rial in thawi a si.
*  Vaau Thla ( February ) Zuu lawngin thawi a si.
*  Fang No Dawi Thla ( April ) Vok nurial in thawi a si.
*  Sa Tuah Thla ( March ) Vok thau in thawi a si.
*  Thawi Lak Thla ( May )  Vok Thau in thawi a si.
*  Tual Bawm Thla ( June )  Zuu lawngin thawi a si.
*  Tan Thla ( July )  Zuu lawngin thawi a si.
*  Fur Kut ( Augaust )  Zuu Lawngin thawi a si.
*  Van Sar Thla ( September )  Zuu lawngin mual rai thawi a si.
Lung duh
A rual te ih,
Kan len lai ah
Zan khaw deih tiang
Co nak bia thu
Kutkai aw in
Kan rak tiam,
Tulnak ruang ah
Tluang za dan tiang
Thleng hman ning law
Nang bang
Ka tawng thei lo
Lung duh nunnem
Leng dang tawnah
Na val ka si
Ka hlan bia thu
Khua nu ruat ning
Nang le kei
Tawng sal nak can
Her hram seh.
  Salai Eddy

Worship Kan timi hi?
Worship kan timi cu Pathian biak tinak a si ko. Worship timi cun
khawm service ih hlasak, thlacam le Pthian thu ngai timi lawng hi a
huap lo. Worship timi cu Life Style, kan nun zia a si.
Biakinn kan feh ih Pathian kan biak vekin kan hnatuannak hmun,
khawlak kan lennak le thil ziangkim kan tuahnak ih Pathian biak
ringring hi worship ngaingai cu a si.  Tulai zumtu pawl cun cawlni ah
biak inn feh ih Pathian biak, cawlh ni lo hmuahhmauh ah Wire le mai
taksa lam hna tuan tivek in Pathian biak timi hi kan ruat. Cucu zumtu
pawl in kan palhmi ngaingai a si.
Pathian hmin ih thiltha na tuami, Pathian hmin ih mi na va bawm tete
le na hnatuannak, na umnak kip ih thatnak na tuahmi pawl khal kha ?
worship?timi Pathian biaknak pitling an si theh.
Music leng lam ih Pathian biak
Pathian biak kan ti tikah, Praise & Worship tiih kan theih lar zetmi
Khawm thawk zawng ih hlasak tla khi kan sawh duh theu. Hrekkhat cun
thangthatnak cu music parah a thumaw ti na maw, Tuini kan khawm cu
kan nuam awk tuk ti na maw, tui ni kan khawm cu kan tam deuh ih hna a
ngam nasa ti na maw. Pathian kan bia kan timi hi milai lungawinak
lawng hawl tla kan bang theu. Kan Pathian hi   Luhmuhzii men ih biak
a duhtu khal a si lo.
Music ngaingai cu thinlung sung aha um. Awn thlengthlo lawng hi
music, Pathian ih ngai duhmi a si lo.  Praise & worship kan ti khal
hi music lenglam ah a um. Pathian biak nun neitui hrangah cun biakinn
ah mipum 50 an khawm khal le thinlung ten Pathian an bia, hlim zet in
Pathian an bia, milai 200 an khawm khal le thinlung ten Pathian an
bia.
Milai lawng zoh pawl cun an duh vek ih a tlamtling lo tik ah an
pathian biak khal a nuam thei nawnlo. Zumtu, Pathian biak tu kan si
ngaingai ahcun thaten kan ruat sal pei uh.  Worship timi cu biakinn
ih khawm lawng silo in nunram sawn a si ti cu kan sim duh bikmi a si.

Na rualpi pawl lungput theih na duh maw?
Minung tampi ih theih kan duh zet mi cu kan rualpi pawl ih lungput hi
a si. Mi tampi cun kan rualpi, kan boss pawl ih duhzawng; an duhlo
zawng, an huat zawng ti vek hi thei thluh sehla kan cak zet. Kan
kiangkap pawl minung ih lungput hi thei thluh sehla cun mi hlawhtling
zet kan si ding ti ih a ruat tu tla kan um ding.
Cu ti a si len “Hruai Tu?ca siar tu pawl hrangah na kiang ih minung
pawl kha ziang vek lungput nei an si ti na theih duh len hi tin thu
sut aw. A hmaisa in nang mah ka lo sut hmasa ding ih na hmin lem khal
na hmang thei.
A hnuai ih question pawl hi felfai ten  rak siar aw la a phi in pek
aw. Hmaizarh ah na phit dan le na lungput kan rak ngan ding. Hruaitu
editor hnenah le keimai hnenah ca in si maw, Phone in si maw Friday
hlan ah rak sim aw la a phi a dik dan cu na thei leh ko ding.
1. Na rilrawn lai fang ah na duhzet mi rawlhmeh Cabuai 1 a hlum
(bial), 2. Kil tum nei, 3.Kil li nei ah rak um sehla khui tawk Cabuai
ah rawl na ei ding.
2. Rawl cu puar zet ih na ei theh hnu ah in leng ah va feh na duh,
sangka tawh cu na nei kan ti ding. Ziangtin sangka na awng ding? Na
awng hnuah ziangtin leng ah na suak ding?
3. Leng na suak, hramlak na thleng ih na ti a hal lutuk. Cu laifang
ah  na kiangah 1. Tiva luang 2. Ti tler ih rung fawr 3. Zi kan ah, Ti
Phun thum in um sehla khui tawk ih ta na in ding?
4. Hramlak ih sin inn lam pan ih na tlun laiah lamzin kap ah Sakhi
fate na hmu, Meithal khal na nei. Cui Sakhi fate cu lak na duh tuk,
ziangtin na tuah ding?

                  Salai Eddy

Thuthan
October 16, 2005 khawm  can hmang tu ding pawl
Can kai tu…………..   Pa Mang Mang
Zapi hrang thlacam…….  Rev. S Ni Luai
Thuthangtha sim………….  Rev. S Ni Luai
Thawhhlawm ap………….  Nu Zing Zing
Solo…………..    Salai Dar Lian Mang
Awn Mawi tumtu …………  Salai Biak Hre
Hlarem………    Zion veng
Praise & Worship…………..  Pa Mangmang & Dar Lian Mang
Kan dungzarh thawn pehpar aw in
Khawm can   Khawmtu Thawhhlawm
   Zarhpi ni         54            92
    Zarhte zan        30             28

Thenhra thenkhat
(1) Lal Ni Sum Rm-130 (2) Pa Thuam & Zuali Rm-200 (3)Pau Khaw Lian Rm-
200 (4) Mawipi Rm-60
2005 hrang siatni peh zawmnak
111. Pa Tiam ( Ram Thlo) 112. Sui Nei Ceu ( Ram Thlo)   113. Bawi
Lung ( Ram Thlo)

Klang : LCF Crusade hlawhtling
Kan dung October 3, tlawngkai nikhat ni ihsin kan LCF Pastor Rev. S.
Ni Luai cun Klang ih kan unau Michael Vanthang le Saymah Rang Khin
Hniang te’i inn ah home crusade a tuah ih October 8, 05?Inrin ni ah
KL lam a ra tlung kir sal.
Crusade sun tin milai 10 lenglo, zantin 20 lenglo in Pathian thu an
zir thei ringring ih; thuzirtu pawl ka ihsin Thlarau thazang an ngah
zia thu le kan sayapa Pathian in a hman zia cu Klang lam unau pawl
cun an sim nasa. Tlawngkai ninga zan ih Pathian thu zirnak ah, thu
zirtu milai 20 rori in Pastor le Pathian hmai ah thilhthiam in an
damsung zuu le rittheihthil dang pawl tham lo dingin nun hlanawknak
an neih mi khan ziangtluk in Klang Crusade a hlawhtling ter ti cu a
fiang ter a si.A hleice in Inntek Pa Michael Van Thang le Sayamah
Rang Rang khalin Thlarau thazang an ngahzia thu an sim ning thei lo.
LCF ah hivek saya Pathian in inpe hi kan Pathian a tha tuk ee..tilo
cu simding dang an nei lo.
Kan Pastor hin Klang ih zumtu pawl cu riahhnawh rori in Pathian thu
a sim ih hlei ah Klang Hospital siizungpi lam tiang ah rawng bawl nak
a nei vivo.  Lumbang khua Nuam Nuam le Tahan khua Lal Tanpui tei
pahnih cu va veh in Pathian thu in hnemnak le thlacamsak nak tla a va
neih sak a si. Kan sayapa hi Pathian in thlawsuah vivo hram seh la,
Klang zumtu unau pawl khal Pathian thu ah an pitlin vivo thei nak
ding, ram, miphun le Pathian hrang hmantlak an si vivo thei nak ding
cu LCF khalin kan thlacamnak bik a si.
Malaysia ih hnatuan duhtu pawl hrang:
Malaysia ih hnatuan neilo, mangbang zet  ih a um tu pawl, Kawlram
tlung ta lo ih Malaysia ihsin work permit tuah duh tu pawl, Malaysia
ih sin Kawlram a tlung duh pawl le Kawlram ih sin nan unau pawl work
permit (or) free calling thawn a ra duh nan um a si len, hi mi number
012.6858 104/ 016.9660 823 (Malaysia),00951 710579 (Yangon) ah rak
contact mei aw. Mi dang hnak ih man awl, zamrang le na duhthu sam in
kan lo tuah sak ding.

Thuthang Hrilkhawm
India Nauhak phir maksak!
Saba ( kehlam sawn) le Farah hi India ih State rethei Bihar ih piang
an si ih; an suahpek ihsin an lu a zawmaw. Tu hi kum 10 mi an si zo.
Muslim an si ih, a remcang hmaisabik ah an lu hi khuaisak an si
ding.  Hi phir tei pahnih hi damte ih khuai thei ding cun US pacang
Benjamin Carson le a team siibawi 20 rual cun an ready zo a si.
Carson hi hivek phir khuai lam ah thiamzet a si ih vei tam nawn a
khuai hlawhtling zo. Asinan 2003 kumah Iran ram ih phir a khuai
lawngte a hlawhtling lo. Tuitum teh ziang a bang pei maw? Hi phir tei
pahnih hin an thluak khal an tawmaw. Pakhat tu hin kal a neilo ih
pakhat tu hin  kal pahnih a nei fawn. An khuai tikah  an  khal thin (
tran plant ) a tul ding.

Miss Asia, Asia Fala mawi an hrilsuak ngah zo.
Kan dung tlawngkai nihnih ni ah Hong Kong khawpi ah Asia fala mawibik
hrilnak an tuah ih Asia ram pumpuluk ihsin fala mawi 18 in an zuam.
Kitty Wang ( a lai zuk ) Tuluk fala in pakhat nak a ngah ih, South
Korea fala Hong In Young ( kehlam zuk ) le Anna Zhai  timi Tuluk fala
in an dawt a si.

Pakistan ah Ling hnin ah milai 2,000 lenglo thi
Mizan simlam 3:50pm October 8, Inrin ni ah Pakistan le India ramri
Kashmir ah ling a hnin ciammam ih innpi cim le lei cim in milai 2,100
hrawng a nen that thu Pakistan Official cun an phuang.
Hi inncim mithi lakah hin nunau tlawngnauhak 250 pawl khal an tel. An
tlawng a cim ih an thu thluh a si. Hi linghnin hi Linghnin tahnak
7.6magnitude tha ih cak a si. Kum tampi kap awk rero mi India rori
khalin Pakistan cu a tuarpinak a kuat hngal. Tuitum ling hninnak
Kashmir India-Pakistan ramri ah hin 1947 ah British kut sungih
luatnak an ngah hnu tum thum rori doawknak a suak thlang. Nitin te
that aw an um ringring.
Asinan hivek siatnak in rampi a nuai tikah cun India Prime Minister
Manmohan khalin Pakistan President Musharaaf- ih hnenah nan tul mi
hmuahhmuah lo bawm dingin India cu ready kan si a ti. Lungrualnak tla
a suahpi thei men.
Kashmir lawng ahhin milai 1000 hrawng an thi tiah cozah hruaitu lu
Anuar cun a sim. Tlawngnauhak 500 hrawng khalin hliam an tuar ih
mithi zat khal hi thang a thang vivo zum a si. Pakistan khawpi bik
Islambad khal ah linghnin hin inpi a cimter ih milai 1000 hrawng cu
an thi ve. Kashmir le Islambad hi naihaw te a si. Hi linghnin hin inn
200 lenglo a siat bal theh. Linghnin hi second 30 hrawng lawng a rei
nan hitluk milai nunnak hi a liampi man a si.

Central America tilian ruangah thi tam
Guatamala, Mexico cu thlipi le ruahpi in a nuai ciamco ih miali 1,502
rori an thih thu Guatemala Official in kan dung Inrin niah thu an
suah.
Stan timi thlipi hin Mexico khalah inn 37 rori a siatbal theh. Tulai
fang cu Central America hrawngah thlipi le ruahpi ruanga ih inn le lo
tantu tampi an um a si.

October 19 ni ah Saddam Hussein thuhla an rel pei maw?
British cun Iraq President hlun Saddam cu October 19 ni ah a thuhla
rel hrihlo in thuhla felfai sawn ih rel thei nak dingah caan lak hrih
an duh thu an phuan laiah, Iraq cozah dinglai cun October 19 cu phuan
zo mi a si vekin, himi ni ahhin Saddam ih thuhla cu rel thotho an tum
hrih lai tiah AFP thuthang ngantu pawl cun an phuang.

The Myth : Jackie Chan Film thar na zoh zo maw?
Asia ih movies star hming nei zet Jackie Chan ih film netabik The
Myth timi film teh na rak zoh ve zo maw?  S. Korea ah cun milai
million tampi in an zoh vutvo lai. Malaysia khalah cinima Hall tum
deuhdeuh ah cun suah rero a si ih…a zoh pawl cun relding an thei
tam zet theu. Hi film ah hin Korea fala mawi le India fala mawi thawn
naihaw nawn in an cangvai ih rak zoh ve ciau hnik uh.

Bird Flu tlanglam ram a karh vivo
Asia ihsin a suakmi arpul hri cun Europe le a thangso zomi ram pawl
khal a buai ter vivo. Mizan sun ah turkey khal in an ram a theln thu
an report ih ar khal 2,000 rori an thah zo thu an phuang. Romania le
Europe ram hrekkhat khalin repot an pe vivo thang.
US khalah hi natnak hin milai 1.9 million nunnak tiang a liampi thei
thu sii thiam pawl cun an phuang.

Myanmar Thuthang Tawi

Raltha Laksawng
  USA ram Newyork khua ih um Northcote Parkinson Fund pawlin 2005
hrang lei tlun miral tha ah 1988 kawlram buailai tlawngtla rak ho tu
Min Ko Naing cu an hril. Amah hi rampi buai hnu 1989 march thla
ihsih   kan dung november tiang kum 16 sung ralkap cazah pawl ih ti
duh nak a phunphun tuarin thawng in sungah aum.
     Hi laksawng hi kum 2000 ihsin thawkin lei tlun pum huapih an
hril mi asi. Tui thla ni 11 ih laksawng an pek nakding puai USA ah
amah rori  feh a duh nan cozah lam in harsat nak aphunphun aum thu
Min KO Naing in asim. Tui tum thawn MIn Ko Naing hin Ramtin ihsin
hminthat nak le Upat nak lah sawng vei 6 a dawng thlang ding.

Amah hi 1988 buailai ih kawlram pumpi tlawngta rak ho ha tu bik asi
ih lei tlun political thiam pawl ih theih ban mi le kawl ram hrangih
an zoh bik mi pakhat asi ve.

Karen Refugge
Thailand ram, Me Haung Saung khua kiangih Kaern refugge Camp minung
20,000 umnak ah UNHCR pawl an va feh.  HImi Camp ah hin ram thumnak
ih feh ding pawl milai 600 an hril.  Ahmisa ah minug 500 kha Finland
le Swetzerland ah veikhat fehih feh ding in UNHCR Officers pawlin an
sim.
Refugees camp ih an President PohPoh in Karen mino pawl ramdang ih
an feh hi fimthiamnak an va zir bet ahcun a thanan Kawlram cozah  do
ding ah kan thazang a mal sinsin ding ruangah a tha cuanglo ti’n a
sim.  Karen mipi tamasawn cun a ram thumnak ih va feh hi an duh lo.
Kanmah ram kan nei kan ram ah zalen zet in kan um thei nak dingah kan
zuam ding. Kan ram le kan miphun thawn a hlat nak hmun ih va feh cu
kan duh lo an timi hi UNHCR pawl cun an ngaisang ih an uar zet.

New Zealand in Kawlram mi Refugee 750 ko ding
New Zealand ram cun tui zarh ihsin kan hmai kum July thla karlak ah
Burma Refugees 750 rori an ram sungah an kawh ding thu an than.
Thuthag lungawi um ngaingai a si ih, tu hnak ih tam sinsin in ram
thumnak lam pan ih kan feh suah theih khal zumnak tampi  a um.
Thailand le ram dangdang ih a tlan mi pawl cu bawm dingin New Zealad
cun anlungkim zo a si.

Malaysia Falam mi lak ihsin Refugee Ngah thar pawl
1.  Khaw Lian Thang
      ( Lo Cawm )
2.  Mang Hrin Kulh
        ( Hngal Ti )
3.  Lal Din Thar
          ( Hmun Tha )
4.  Ni Lian Mang
         (  Hmun Tha )
5.  Aa Shwe
    ( Falam )
6. Suh Khan Thang
      ( Taung Phila )
7.  Pa Fung
         ( Tlau Hmun )
8. Hawl Sui Eng
           ( Cer Hmun )
Ramtin ihsin miphun a duhdawt tu kan Lai upa pawl le Malaysia um kan
upa pawl ih tawlrelnak le tanlaknak ruangah Malaysia ihsin minung
2000 lenglo in Refugees kan ngahih milai 850 hrawng an cun ram
thumnak in feh san zo.  Kan Falam mi khal hi tuhlan vek cu kan si
nawn lo. Catbanglo in Refugees ngah thar kan um thei ve ringring ih,
hihi Pathian thlawsuahnak liauliau a si.Hi ti ih UN upa pawlih
duhsaknak tumpi an neih lai ah kanmah le mah rem aw theilo le feh
dudan bangaw lo ih kan mah le mah kan doawk rero hi riah siat za
ngaingai a si. Hmailam ah thinlung hmunkhat te ih kan Laimi pawl
lungrual zet ih kan feh tlang thei nak dingah thla napin cam ciau uh
si.

Note : HRUAITU  thuthangca sung ih suakmi pawl hi Editorial hmuhdan
le ngaihdan a si thluh lo; a ngan tu  bulpak pakhat ciar  ih  hmuhdan
nganmi an si.

A NEITU
LCF
CHIEF EDITOR
RICHARD K. EMMANUEL
JOINT EDITOR
VL BAWITHANG
SENIOR ADVISORS
ANDREW THANG ( PATE )
REV. S. NI LUAI
PEHZAWMNAK
42 – 14, WISMA CITY TOWER, JALAN ALOR
50200 KUALA LUMPUR
MALAYSIA
CONTACT TO :

E-MAIL
hruaitu@…
richardemmanuel4u@…
vl_bawithang@…

Comments

comments

Comments

%d bloggers like this: