Hruaitu Issue 91

A SUNG IH THU
Editorial….1
Pastors/ Upa/ Deacons ..2 – 4
Kawhhran Thuthan…. 5
Laimi Thisen…..6
Duhdawt tu taktak….7 – 8
Maw LCF……9
K.P. Yohannan timipa hi zo a si?…..10
Myanmar Thuthang….11 – 13
LCF Sungtuan David Thang thawn hmaiton thusuhnak…14 – 15
Leitlun Thuthang Hrilkhawm…16 – 20
Capo….A kawm dunglam

EDITORIAL
Kan thuthangca hi!
Malaysia Laimi pawl in Pathian thlawsuah kan dawnmi lakah kan zarhtin
thuthangca khal hi siar tello a theih lo. Ziangahtile, ram dangdang
le Kan Lai ram tiang khal va hawl awla, Falam tong rori ih suahmi
zarhtin thuthangca timi hi hmuh ding a tamlo tuk. Kumpi linglet rori
Pathian lam hruainak in kan suah thei ve tento hi a lungawi um tuk.
Malaysia Laimi lakah cun kan theih tawk ah Seihnam, Hruaitu, Chin
Land Post, Zo Kawtchhuah le Seino ti’n zarhtin thuthangca panga lai
regular in kan suah thei hi kan Pathian duhdawtnak langter tu a si.

Asinan, kan thuthangca hi a suak thei poh ti in kan duhtawk men lo
pei uh.  A siartu lawnglawng si tumlo sehla, a ngantu lam khal si
duhnak lungput nei ciau seh la ziangtluk kan thuthangca hi a mawi
sinsin ding tiah ka ruat theu. Miphun hrang le Pathian hrang hnatuan
duhnak lungput neitu hrangah cun …hlawknak pakhat hman a suahpi lo
lai khalah thazang suah ih tan a tul a si. Thuthangca ih na
fimthiamnak na ra suah ter ruangah na kut sungah a hlawknak ngahlo
hman aw la, ziangtluk kan miphun hrang le kan milaipi pawl hrangah
hlawknak a tlung thei ti cu hngilh hrimhrim hlah. Leitlun ah sum le
pai lawng hi hlawhtlinnak le lennak a si lo.

Tuluk ram hitluk an thangso ih; Comunist ram rori hi tluk ih an than
zutzo nak hi an caalai ruangah so khaw a si. Fimthiamnak le caalai an
uar tuk ruangah Information sanpi hman hruai theitu miphun an rawng
si theinak tla hi. Pathian le thianlo hman fiang cuca lo pawl hman
hitluk an thanso ahcun Pathian nung a biatu kannih zumtu pawl teh
ziang tin kan biak Pathian hrangah, Kan miphun le hnam tong hrangah
tan kan la ve ding. Na theih tawk in caalai lam ih tan rawn la ve
ding ah HRUAITU cun a lo sawm a si.

Pastors/Kawhhran Upa le Deacons
(Pastors/ Elders And Deacons)
                                    By : Richard K. Emmanuel
Thukham thar Kawhhran
hruai hmaisabik tu cu ?Apostles?pawl an si. Bawi Jesuh thawhsal hnu
ah mit rori ih hmutu le Bawi Jesuh amah rori ih fialnak(
commentioned) a co tu pawl lawng Apostles tiah kawh an si.
Apostles san a rawng liam ih Elders ( Pastor/Overseer/Bishop ) pawl
le Deacons pawl in Kawhhran cu an rawn hruai.
1.  Pastors
Thukham thar cun Elders ( Kawhhran Upa), Pastors, Overseers, le
Bishop hi bangaw rep in a hmang. Hi tongkam a hmannak pohpoh ah
Plural lawngte in a hmang bet. Curuangh Pastors pawl asilole Upa pawl
ti lawngte in Bible cun a ngan tinak a si. Pastors timi hi kan Bible
sung ah veikhat te lawng kan hmu thei. Cucu Efesa 4 : 11 ah a si. ?A
hrekcu Pastors an si ih a hrek cu Zirhtu an si?tiah Paul in veikhat
te a hmang.
Greek tong cun Pastors hi ( poimen ) tiah ngan a si. Efesa 4 : 11 hi
a hrek cu Pastors an si, a hrekcu zirhtu an si timi khal hi “a hrekcu
Pastor-Zirhtu an si ( word khat )?ti ih lehlin sawn ding a si tiah
Bible thiam hrekkhat cun an sim. Kan Bible  ah Pastors ( Poimen) ti
cu hmun khat lawng ah a lang nan, Greek Verb ( Poimaino ) timi;
tuukhaltu ( Shepherd ) timi tongfang hi Pastors tinak aiawh ih
hmannak kan hmu hnuai hni( I Pet 5 : 2 – 5, Dungthluntu 20 : 28zoh
aw ).
2. Kawhhran Upa
Kan Lai tong cun Upa ti tongfang lawng kan nei. Laimi thinlung ah cun
Pastors hnuai ah Upa pawl an um ti hi kan ruahnak a si. Laimi pawl in
Upa tiah kan kawhmi pawl hi kan Bible ih  Elders ( Greek Noun-
Poimen) timi pawl an silo. Deacons pawl an si sawn. Cui Deacons cu
Laitong in kan neihlo ruangah Upa ti’n kan ko theu. Curuangah Upa
tiah kan Bible in a kawhmi cu tuisan ih Pastors/Bishop/ Overseers
tiih kan hman mi pawl hi an si.
Apostles pawl cun Khawkip ah Upa ( Pastors/Bishop/ Overseers ) pawl
an ruat vivo ih cupawl cu Bawipa’i tuurual pawl khaal ding in
thlacamnak thawn Pathian hnenah an aap theu. ( Dungthluntu 14 : 23,
20 : 17,Titus 1 : 5, Dungthluntu 20 : 28, Heb 13 : 17, I Peter 5 : 2 –
3 ). Hi Bible thu pawl hin Upa pawl cu Pathian in a pekmi tuurual
pawl khal tu ding an tuanvo a si thu fiangten a lang ter.
Thukham thar in Upa timi tongfang hi Overseers/ Bishop tiah a hmanmi
a um lala. Greek tong cun ?episkopos ( Overseers )?tiah hman a si.
Cucu Upa tiah Lai tong cun lehlin thotho a si. ?Efesa khua Kawhhran
upa pawl in amah rak tawng dingin thu a cah?(Dungthluntu 20: 17).
Hitawk Bible cang ih Upa timi hi Greek tong ih ?Poimen silo in
Episkopos ( Mirang- Overseers)?sawn hman a si.
Cun, I Timote 3 : 1 – 4 ah ?Mi pakhat khat in Kawhhran hruaitu si a
duh ahcun hnatuan tha duhtu a si?timi, “Kawhhran hruaitu?ti hi Mirang
cun “Bishop?ti’n an let. Timote hnenah Paul in ca a kuat laiah Timote
hi Efesa khua ih a umlai ti kan nghilh lo pei uh ( I Timo 1 : 3 zoh
aw ). Curuangah Paul hin Timote cakuat a nganlai ahhin Efesa khua ah
Kawhhran Upa pawl in Kawhhran an hruai ti cu a thei zo ( Dungthluntu
20 : 17 – 38 zoh aw ). Cumi thei cingin Kawhhran hruaitu si a duhtu
timi Paulin a ngan tikah, “Kawhhran Upa si a duhtu?a tinak a si.
Curuangah Bishops/Elders/Overseers/Pastors timi hi Thukham thar cun
hmunkhat, hna pakhat, tuanvo bangaw in inzirh ti fiangten  kan hmu
thei.
3.  Deacons
Deacon timi hi Greek tong ?diakonos?ti ihsin lakmi a si. A sullam cu
siahhlawh ?Servant?tinak a si. A hleice in Deacon cu Kawhhran hruaitu
Elders/Pastors/Bishop/Overseers pawl ih hnatuan bawmtu tinak a si.
Deacons timi tongfang hi (Filipi 1 : 1) thu ah fiangten Paul in a
hmang. ?Nan Kawhhran sung ih Saza le Upa ( deacons ) pawl hnen ah ca
kan lo kuat?  Kan Lai Bible ah cun hi  Bible caang ih “Deacons?timi
hi “Upa?ti’n a let ih, Bishops timi hi “Saza?ti’n a let.  Lai tong
cun Deacons timi le Upa timi tongfang hi bangaw rep in kan hman
ruangah”Kawhhran kaihhruaiawknak ah buai a awl te? Deacons cun
Kawhhran sungah Pastors/ Upa pawl/ Bishops/ Overseers pawl vekin
Kawhhran hruainak hna an kai dahlo. Asinan sumpai lam le Management
lam an kai theu.
Deacons  tuanding ih tlinnak pawl hi Paul  cun I Timote 3 : 8 – 13 ah
tampi a ngan ih; Lai tong cun Kawhhran Upa tiah lehlin thotho a si.
Himi Bible caang hi Tulai Lai Christians pawl lakah cun Upa tiih kan
kawhmi pawl hi an si.
Dungthluntu 6 : 1 – 6 thu kan zoh tikah Upa 7 hrilnak thu kan hmu. Hi
Upa 7 ah hril laiah hin deacons timi tongfang hi a rak suak hrihlo
nan Upa pasarih pawl kha deacons an si kan ti thei. Ziangahtile, an
thuanthu kan zoh tikah Apostles pawl cun, “Tangka thuhla tawlrel
nakah Pathian thuathangtha sim kan daithlang a siahcun a thaloding?an
tiih….nitin rawl eiding zemtu ding le Kawhhran mipi pawl sumpai lam
tawlrel sak tuding Upa ( deacons ) pasarih hrilsuah an si. A caang
hnihnak ah hin “Greek verb – “diakoneo?Mirang tong ?to serve?timi kan
hmu.( It is not right that we should give up preaching the word of
God to serve ( diakoneo) tables ).
Hi Bible thuanthu kan zoh tikah Apostle pawl ih tantami hna,
rawngbawlnak cu Deacons  hna a si ti  fiangten a lang. A sullam cu,
Pastors/Elders/Bishops/Overseers pawl ih hna cu Thlacamnak le Pathian
thuthangtha phuan vivo a si ih Church Deacons pawl ih hna cu Kawhhran
mipi nitin tulhaimi hrang hnatuan le sumpai lam kilkhawi a si.
Bible ah Decons pawl cu Upa ( Elders ) pawl vek ih Pathianthu zirhtu
le Kawhhran hruaitu si dingih a ngannak kan hmulo; Deacons pawl cu
Kawhhran ah Administrative tuanvo kaitu, Pastors pawl bawmtu an si.
Deacons hna tuantu ding cu ?Christian?Krih  lawng  thupibik ih a
rettu, Krih zumnak ruangih rundamnak cotu lak ihmi a si tengteng a
tul. Deacons hna hi duh poh ih tuan theih a si lo. Asancu, Apostle
pawlin Dungthluntu bung ruk sung ih Deacons an hril laiah ?Kristian?a
simi zumtu pawl lak ihsin an hril ter. ?Nanmah lakah
Thlarauthianghlim le fimnak in a khatmi, mi pasarih hril uhla?(
Dungthluntu 6 : 3 ).Deacons cu “Kawhhran mipi hmuahhmuah  lungkimnak
thawn hrilmi an si?ih Pastors/Elders/ Bishops/Overseers bawmtu ding
an si ( Dungthluntu 6 : 3, 1 : 15,23, 15 : 22, 25; II Corin 8 : 19
zoh aw ).
Sourse : Grudem, Wayne A. Systematic Theology. Grand Rapids :
Michigan, 1994.

Sawmnak
Kan ral tlannak ram ih Laitong te ih siar theihmi thuthangca kan
neihsun,
?HRUAITU?ah kan ruahnak, hmuhtawnmi, Sermons, Fimthiamnak, Capo le
thu thatha kan thawh khawm ciau pei uh!  Cuti ih kan tankhawm vialvo
le kan caalai siar a tlak sinsin ding ih a mawi sinsin ding.  Pathian
in fimthiamnak in pekmi tete pawl hi mai hlawknak hrang lawngah hmang
lawn, kan miphunpi, kan milaipi pawl hrang kan hmang harm pei uh!

Kawhhran Thuthan
October 1, 2005 khawm  can hmang tu ding pawl:
Can kai tu   :  Pa Sang Nei Thang
Zapi hrang thlacam : Pa Cung Thawng
Thuthangtha sim:  Rev. S Ni Luai
Thawhhlawm ap:  Samuel Nu
Solo:    Saslai Ro Vel Thang
Awn Mawi tumtu :  Salai Biak Hre
Hlarem  :  Zion veng
Praise & Worship : Ela & Ronald

Kan dungzarh thawn pehpar aw in
Khawm can   Khawmtu Thawhhlawm        Mithar
Zarhpi zing          113         90.70                4
Zarhpi zan   –       –
Zarhte zan             43        48
Tlawngkai ni thum
zan                        18        40
Rawl ul thlacam     17

Pangpar hlu
Mai Zami in a suah cam ( Birth day) lawmnak hrangah pulpit pangpar a
rak hlu. Bawipa kan Pathian in hmailam a nunnak ah damnak cahnak pek
in lam thlawsuah pe hramseh.

Thlacam sak dingmi pawl
1.L C F kan zapi thlarau thazang  kan neih sinsin theinak ding hrang
le Pathian thu ih kan pitlin vivo theinak ding hrang.
2. Laimi hnatuan nei lo le ei in ding harsa pawl hrang
3. LCF ih thlah mi Mission hnatuan tu Saya Hrang Tiam hrang.
4. BTS Libary  tlamtling ten 2005 ah kan sak suak theinak ding hrang.
5. Malaysia um cabu tha ( permit lo ih um pawl ) nei lo pawl hrang.
6. Kan Unau Malaysia thawng Inn ih um pawl hrang.

Mission hnatuan nak hrangah
(1) Pa Khaw Tin Pum Rm- 20  (2) Je Thun Rm- 20  (3) Lal Hlei Ceu Rm-
20  (4) Mang Hrin Kulh Rm- 50 (5)  No San Thawng Rm-20 ( 6) Ca ik
sung in ngah mi Rm-140

Laimi thisen?¡¨
Na lu pawng leh na bial kaih mi thawn,
Khawi lam na pan tum?
Nang mah hminsinnak ah cun,
Vapual lem cu na cuang ter sap bai!
Fimthiamnak leh thansonak cu hmaiah retin,
Ram ka duh dawt na ti fawn,
Caan liam cia vun cuan hnik,
Nang! Ziang mi lamzin na zawh  theu.
Laithi,Laimi ti’n hnam dang lakah
Aa taktak in na thlang fawn,
Duhdawtnak ka nei na tiih,
Na hngawng ah cun turuu tak thawn,
Nang mah si lo maw Laimi ti mualpho ter tu!
Na thinlung pawnte ah cun duhawtnak cu;
Na thlaih ih,Nang mah cu Laithisen na ti lai.
Laithi hi ziang a si ti’n ka lo sut duh ?

       “RRuat tha aw!?
Zil thli nem ten a hrang nak kan “Lairam¡¨
Duhdawtnak le zalennak par engmawi thawn,
Hlan Pupa pawl ih luruh mual an liam nak ram.
Harsatnak cu khuai tizu bang,
Nauhniang kaa ah kan barh ngam ding maw?
Hhling nei sawkhleipar maw na si?
Hlim no an cerh,Santhar thli a hong hrang,
Thang sin seh maw “Lai ram¡¨ tin,
Zirsang eiangnei an zuam ee.
Nang le kei lawng
“Laimi¡¨ kan si,
Hlei ce zuam in luang tii bang maw,
Dung tun siang hlah kan “Lai ram?
Lairam in “Nangmah¨a lo hngak ringring.
                         By : Laithlang Cherry
                                  ( S.N.N )

Duhdawtu taktak
                                         By : Joseph Ngun Lian
“A “Nu ngaingai a si mi nu nau nu cun, a fapa hrang ih duhdawtnaka
neih ruangah, siangpahrang hnenah, ?Maw Siangpahrangbawipa, naute cu
that hram hlah hlah aw.Hi nu hnen ah pe sawn aw?a ti.”A sinan a dang
nu cun zo hnen hmanah in pe hlah.Then hnih ahcun then aw,a ti.”
(1Siang.3:26)

Kan Bible kan zoh tikah
nauhak thawn pehtlaih in harnak an tawnnak thu hi kan hmu hnuaihni,
a tumbikmi pahnih an um. Pakhatnak cu Syria ralkap in Samaria khua an
kulh laiah a sa an eimi naute thuhla a si. ( 2 Siang 7 ). Pahnihnak
cu a tu kan siar dingmi hi a si.
Paul cun duhdawtnak thu thawn pehtlaihaw in Corinth khua mi pawl
hnenah tampi a ngan ih; ?Degree cu rello, van tong le zumnak tampi
neih khalah duhdawtnak locun a si theilo?zia le; zumnak, duhdawtnak
le ruahsannak lak khalah duhdawtnak hi a tumbikmi a si thu a langter
bet ( 1 Cor 13 : 1 – 13 ). Duhdawtnak timi hi Greek tong cun tampi in
an then thei ko nan, a tu ih ngan ka duhmi cu Laimi in kan fiang
theibik dingmi Lai Theology hmang in ngan kan tum ding.
Krih cun Pathian in minung ziangtluk induhdawt timi cu Nu nih
ziangtluk fa a duhdawt timi thawn a tahthim. Curuangah Pathian
duhdawtnak tilo ahcun Nu nih fa an duhdawtnak hi milai ihsin suakmi
duhdawtnak tumbik tinak a si ko. Solomon henah thu thending ih a rami
pawl lakah hin naute a cuhawmi nu pahnih khal an tel.
Cu’i nunau pahnih cu Khaan khat ih umtlang an si ih; zan ah pakhat nu
ih nau cu a thi ih, a thupten a raulnu ih nau cu a lawnsak.

Nauthar cun a nu le pa ngaingai khal a theih ve lo ruangah mifimpa
Solomon hnen an thleg. Solomon cun nu tak a theih fiang thei nak
dingah nam a la ih tan hnih ih tan a tum. Culaiah naute nu silo sawn
cun, ?zosawn hman in pe hlah, thenhnih ah thek ko aw?a ti. Asinan
nutak sawn cun, ?a tih a sianglo ih, ka fapate a thih hnakcun amah tu
kha pe ko aw?a ti.

Hi nu pahnih thu simmi ahhin, ?zosawn hman in pe hlah, thi ko seh?a
titu khal hin naute cu midang kut ih a thlen a sianglo ruangah a
simmi a si ih a duhdawt tuk ve ko. Asinan, nau thih ding a sian
ruangah a duhdawt ngaingai lo. Asan cu a ma’i fa ngaingai a silo
ruangah a si. Asinan, a nu ngaingai cun thih ding cu a siang hrimhrim
lo ih ?Ka hnen ih  a umlo hman ah mi kut ih a nun thei ahcun ka
lungawi ko?ti hi a lungput a si. A sullam cu, mai sungsuak cu thah a
sianglo, hmunhnih ih phel khal a sianglo tinak a si.

Duhdawtmi unau pawl, tuini kan Laimi lakah khua vawn tang sehla
thenawknak phunphun a um, Leitlun thil le Pathian biaknak lam thil
khalah..thiltha a suahpi ko ahcun a poi lo. Asinan thatnak a suahpi
hnailo ahcun a poi tukmi a si. Solomon cun an lungput a thei le veten
thih sianglo nu kha naute ih nu ngaingai a si, naute cu pek uh a ti.
Eg. Naute pakhat cu mawite ih an cei ahcun, mi zakip ih lawm le cawi
a hlawh konan, a vawn tah ih zun le ek a vawn thlau ahcun…nu le pa
tak silo cun an tuamhlawm paih dahlo. Heh…nannau lak uh, zun a
thlau, a ek le a thu tuk tiah naute nu le pa an pek sal theu vek hi a
si. Naute nu le pa lawnglawng in ziangtluk a thut hmanah nau ek le
zun cu an khawlhfai theu.
Cuvek cekci in kan Kawhhran ee, Kan Laimi ee, Ka duhdawt ee, ka nun
ka pek ee, cu ee, kha ee, etc…ti ih kan au rero khal hi thaten ruat
a tul thlang. A tu khalah CRC,ACR,LCF pahnih ciauih kan thenawk
khalah duhdawtnak ngaingai a neilo tu cun, ?A poi lo?kan ti men ding.

CRC le ACR tlacu zo sawn hman in colo in UN kut sung a thleng ko.
Zawi kut hman a thlenglo ruangih lungawi tu cun Laimi duhdawtnak
ngaingai a neilo ti a fiang. Kan LCF a kuai  ruang ih lungawi pawl cu
kan Laimi duhdawttu ngaingai an si dahlo ding.
Moses cu Pathian in, na mipi pawl in pathian dang an biak ka that
thluh ding a ti laiah, Moses cun ?ka mipi pawl na thah thluh hnakcun
van ih ka hmin na nganmi kha rak phiat sawn aw?a ti. Cuvek hruaitu
tha cu kan Laimi nih kan tulmi a si. Ma’i hrang lawng ruat ih miphun
thek darh khal poiti lo hruaitu cu hruaitu tha ti ih kawh an har zet.
Naute nutak cun thih hnak cun mi kut ih a thlen khal a poi lo ti
tiang a tong ngam. Nang, miphun le kawhhran ka duhdawt tiah au rero
tu. Na miphun le na kawhhran lungrual derdo te ih tlanlen khawmnak
ding hrangah nangmai hlawknak sun teh na ngam ve maw? Asilole, zo
hman ih co veve lo ding maw na duh?  Hi thu hin zohman bulpak ih sawh
duhmi a neilo, kan zaten in sawh/sim duh  a si.
Laimi ka duhawt ee, cu e, kha e, thih ka ngam e kan ti maw? “miphun,
ram le Pathian hrang ih thih ngam hnakin nun ngam hi a har sawn? Kan
nun ciau kan check-aw sal hnik pei uh!

Maw LCF
                By : Francis Lal Uk
LCF cu bawm tu hawl in a tawi!
A duhdawt mi pawl in an dung tun,
A rinsan mi pawl in an phat san!
A hlan ah cun a rah an ei, a par antlan nan at.ek an khiah sak,
Thlisia a hrang ih a buuk a siat,
um nak ding neilo in.

A fano pawl cu rilrawng in an tap,
Nu neilo ar fano bangin
Zan khua a tlai, tlun nak ding inn an neilo!
Ningt.ih le thlaphang in an vak, kiosa hrang lak ah!

LCF cu bomnak dilin a au,
A aw anthei nan an hnih san men!
Mitthli for cing in atawi ko mi phun dang lakah;
A ban tha a cem,A khuk a thia,A ke a kal thei nawn lo,

Culaifang ah khatlam ralin awthawng a thang
“Maw LCF na harnak ka hmu ih na au aw khal ka thei,
  Kei mah lawng i rian awla ka thu ngaiaw.
  Ka lo tung ding sal dingih,na hlo ral dah lo ding
  Sunloihnak na co sal dingih mi ih porh mi na si ding!
  Na miphun in na par an tlan sal ding ih, na daihnem ah mi tampi
  an cawl ding.Ka thu na ngai asile keimah in kalo uk dingih,
  thlaw suah ka lo pe ding” ati.

Lai pacangtha
Kan pupa sanah,
Mirang pawl kut sungah Lai pacang kan rak duai;
Kawl, vairang cun
Laimi an dem ngam lo ee,
An rak duai lo an ziaza:
Mirang mifim in
Lai pacang tha hnenah
Hitin a sim ta,
“Na no laiah na fim zet nan;
Na lung rang tuk ee
Thinsau ten aw!?
                By : Salai M.

K.P. Yohannan timipa hi zo a si?
                                                      By : Richard
K.P. vawti tikah ei theih thil hmin tla a bang zet. Asinan, a si lo.
K.P. Yohannan timi hi Karela, India ih seilian a si ih; Pathian in
thlaw a suah ih Leitlun pum level ih Mission hna tuantu a si. Dr.
K.P. hi Gospel For Asia ( Asia hrangah Thuthangtha ) timi
rawngbawlnak dingsuaktu a si ih, US ah office thar awng in Asia hrang
ah nsazet ih thlarau hlo hawltu a si.
Kum ruk a si lai ah Pathian hnenah napin a rak aap aw zo ih, a nu
khal in zarh khat veikhat rawlul thlacam in ?Pathian, ka fa  le 6
lakah pakhat tal cu na rawngbawltu ah hmang hram aw?tiah thla a cam
ringring. A nu’i thlacamnak thawngin K.P cun 1966, kum 16 a si lai
ihsin Pathian hna a rak tuan thawk. 1974 – 1979 karlak Dallas, Texas
ih Criswell Bible College ah a rak kai. Cunah Pathian thu lam ah B.A.
Degree a rak ngah. Cui hnu ah Madras, India ih Hinduhtan Bible
College in Divinity degree an pek.
Dallas ih a tlawng kai lai ah Pastor hna a tuan phah ih; Pathian in
Asia mipi pawl hrang ih a kawhnak a theih tikah a Pastor hna cawlhsan
in a nupi Gisela ( German miphun ) thawn 1978 kum ah ?Gospel For Asia?
timi hi an rak din thawk a si. Pathian inan rawngbawlnak thlaw a suah
ih tuisun ah cun Asia ih rawngbawlnak cakbik ah an rawng cang.
Nepal, Myanmar, India le Asia ram pawl ah rawngbawlnak a karh vivo.
Bible College tlawng 54 a awng zo ih, Church planters 8,000 rori a
nei. Leitlun mipi million tampi in Dr. K.P. ih sermon hi Radio ah
nitin an ngai ringring.
K.P. hin India ram ah cabu 200 hrawng a rak ngan zo ih, Us ah cabu
panga a ngan zo. A cabu nganmi lak ih larzet pawl cu, ?Revolution in
World Mission? ?The Road to reality? `Why the World wait?timi
le `Reflecting the Image?timi pawl an si. Dr. K.P. hin fapa Daniel le
fanu Sarah a nei ih a nupi  thawn Dallas, US ah an um.
Gospel For Asia ih tumtah bikmi cu Asia ram sungah Missionary 100,000
thlah thei ding a si. Pathian bawmnak in tu ah 10,400 an thlah thei
zo. Bible tlawng nauhak khal 8,000 rori Pathian thu zir in ?Gospel
For Asia Bible College?ah nitin caan an hmang ringring. Dr. K.P. ih
rawngbawlnak Pathian in thlaw a suah ih Myanmar hmanah ?Gospel For
Asia Bible College?cu tlawng nauhak tambik tlawng ah a rawng cang.
Kum tin tlawng nauhak 200-300 in Pathian thu an zir ih Mission ary
khal 500 lenglo Pathian in a pe zo a si.

LCF Sungtuan David Thang thawn hmaitawn thusuhnak
Hruaitu : Na hmin hi David Thang ti rori maw a si ko?
David :  David Thang rori ka si ko, bet ding dang um nawn lo.

HT    : Na nu le pa hmin, khua unau paziat ti pawl in si thei kem?
Dvt : Pa Hrang Kip Thang le Nu Hlem Tial an si. Unau pariat kan um.
Mipa 7 le nunau 1 kan um ih kei hi upa lam in 5 nak ka  si. Kan khua
cu Bomba a si. Mihrek khat cun Do Khar lole Than Zam khua tin tla an
ko.

HT     : Malaysia ziangtikah na thleng  ? Ziangmi hna na tuan?
Dvt : 27 January, 2000 ah ka thleng. Electrical lam ah ka tuan
ringring.

HT     : LCF ah ziangmi tuanvo na kai?
Dvt : LCF kan dintir 2003 kum ah sungtuan bawmtu  ka si ih  2004-2005
ah sungtuan hna ka tuan.

HT   : LCF nan rak dintir Putrajaya ram hnuai ah kawhhran thu thawn
pehpar in harsa na tawn  mi in sim aw?
Dvt : Hramlak um kan si vekin le kosong kan si vekin; kawhhran paisa
ka kut ah a um fawn leilung ah ka phum theu ih hlabu pawl khal
leihnuai ah kan phum. Cuvek tikcu thlaphag le van sang ih um ringring
a si tikah zan khat thil thu ah kaih tawng pang sehla ka phurrit ding
ka thei tuk ih cui thin phannak cu har ka ti bik.

HT    : Cutluk in harsatnak phunkim tuar in LCF hrangah na tikcu caan
narak pek ih  tuini ah then awknak a thleng mi parah ziangtin na
hmu/ruat?
Dvt  : Harsatnak buupi pahtlangin Pathian in lam in hruai ih kan
Laimi kan tam vivo ih ka lungawi zet. Tuihlan ih kan harsatnak
hmuah2  kan hgilh ti’n kan ruah lai fangah Teek tlak bangih hitivek
dinhmun kan rawng thlen cu ka manglam vekah ka neih. Ka ningna, ka
riahsia ti lo bak cu sim ding ka thei lo.

HT   : A ziang bik ha na riahsiat?
Dvt   : Kan Pastor kawh a silai ah kan miphun in finhlawm tu ding le
tlarau lam ah in kaihruaitu ding tiah a si. Asinan a mai thuten in
suahsan ih Falam mi hmun hnih ah in then mi hi cu, ningnat lo theih
khal a si lo.

HT    :  Rev. Za Thelh Lo in  “Malaysia  ra dingih in kawh laiah LCF
le F lo  ka thei lo Falam pawl lawng ka thei?ti ih a tawng mi kha
ziangtin na  ruat?
Dvt   : Lai Christian Fellowship ah Pastor tuan dingih kawh mi a si
ko. LCF cu Falam mi um khawm kan si. Asinan LCF ih um lo mi Falam
midang, a dang te ih pawlkom  tivek cu ka rak thei dah lo. Mah ko tu
hman thei lo cu “Laimi kan cem riai.?

HT     : Falam mi hmuahhmuah hrangah ka ra ti ko ih; Falam mipi LCF
thu thennak a thlun lo mi teh hi ziangtin na ruat?
Dvt   : Miphun duhdawtnak le thlarau lainak nak ngaingai a nei lo a
si bik keicu.

HT    : LCF tlansan tu  pawl hiteh ziangtin na hmu?
Dvt   : Mipi pawl cu an mawh lo thu a phunphun ruangah a si.

HT    : Ziangmiha thu na ti mi pawl cu?
Dvt   : Member an siizung nakah a dik lo zawng, Phunhnam tiangin an
va  sal ih; hihi tihnung zet  le mawi lo zet mi khal a si.

HT    : LCF ahcun phunhnam thlei dannak a um mawsi?
Dvt    : A um cun ka thei dah lo. Hruaitu hril awk khal ah mipi vote
in hril  mi a si ko. Hmailam khal ah phunhnam zawng cun thu tawlrel
lo sehla lungrualten hna kan tuan tlang thei bik ding ka zum.

HT   : Mah inn sungsang thuhla miphun dang hnen ih va zuarthlai pawl
hi  ziangtin?
Dvt   :  Miphun dang hnen ah zianghman kan si lo ti va phuang rero
vek  a  si  ko.

HT    : LCF hmailam ke karnak ah fawrhfial duh mi na nei maw?
Dvt   : Kan miphunpi zaten Pathian thu ah nungih Pathian tihzah le
zumnak ah Pacangtha si kan tul. Culawngah hmailam ah lungrualten kan
fehtlang thei ding.

HT   : LCF le FCC hi hmailam ah hmunkhat ten kom aw in kan khawm
tlangthei dingah na zum maw?
Dvt  : Kan miphunpi hum in hnuaidawr zet ih Pathian hnen ah kan hlan
awk ahcun khawm tlang thei dinhmun khal kan si ko.

HT   : Hnatuan bang zet cing in kan lo suhmi pawl thinsau ten in sim
mi parah kan lungawi.
Dvt   : Kei khal ka lungawi ve.
                                   Interviewed By :
                                 Thomas Thuam
                                    President, LCF

MYANMAR THUTHANG HRILKHAWM

Myanmar Leicim ah milai 20 lenglo thi
Tulaifang cu Yangon hrawng ah ruah a sur tam zet. Ruahpi cun  hmun
tampi ah Leilung a cim ter  ih Lilawn pawl khal a siar ter hnuaihni.
Kan dung September 19, tlawngkai nihnih ni ah ruah tamtuk ruangah
Palaw kiang ih Kyaukka  khuaah lei a cim ih; Primary tlawngnauhak 12
le upa 15 rori Leicim cun a nen that. Hi khua ahhin hmun thum ah
leilung a cim ih phungki tlawng le Primary tlawng inn that hnih cun a
hleice in an tuar. Leicim ruangih hliamhma tuartu khal an um hnuaihni
tiah Red Cross pawl cun thu an than.
Magway Division khalah ruahpi hin thil a siatsuah tamzet tiah Kawlram
nitin thuthangca ?Kyemon?cun an suah.

Tilian in  Lilawn siatbal
Tuitum ruah tamtuk ruangah Yangon kiangkap khua hrawngah Lilawn siat
le lamzin khar tla a tam hnuaihni.  September 19, tlawngkai nikhat ni
ah; Kyaukhtu – Htilin karlak  Highway ih Steel lilawn pi-200 ih sau
khal tilian in a siat bal. Cun Aung Lan khalah Moekaung Lilawn pakhat
a siat ih lamzin an khar. Aung Lan Phungki tlawg inn phar khal a siat
suah. Cun Aung Lan ihsin penghnih a hlatnak ih Yangon – Pagan
tlangleng zin ah lilawn pakhat khal tilian cun a liampi.Yango
khawsung rori khal ah ruahpi hin buainak tampi a suahter a si.

Nobel Ngahtu in Burma hrang auaw suah!
Kan dung tlawngkai nihnih ni ah Nobel Peace laksawng ngahtu Vaclav
Havel le Arch Bishop Desmond Tutu cun Myanmar ram ah humanrights
humhimnak tuah lohli sing in UN security council hnenah an ausuak.
Vaclav,Czech President hlun le Cape Town Arch Bishop cun Aung San Suu
Kyi suah din le Burma ram daihnak hrang an dil. Hi Upa pahnih in
Myanmar ramsung ih Civil war,Human right ziangah siarlonak,Refugees
suak tamtuk, Drugs suak tamtuk le AIDS karh ter tuk tiah an puh.
Hi hruaitu pahnih hin Kawlram cu Leitlun ih ram buai pasarih, Haiti,
Afghanistan le Rwanda tel in an khaikhin ih Myanmar hi a zualkaibik a
si tiah an phuang. UN security in kan dung kum ih rem ding an
hrilsuahmi ram pawl hnakin Burma hi a luar deuh tiah an phuang bet.
Hi hruaitu pahnih hin UN cu Myanmar ralkap uknak thleng sak lohli
dingin an dil ih Leitlun ah Nobel Peace laksawng ngahtu kum 15
thawngthlak cu Myanmar ram khat lawng hi a um tiah tu tiang UN cu
Myanmar ih a cangvaih dan tawk an tilo thu UN Security Council ah an
phuang a si.

Bush le Thai PM- in Suu Kyi suah dil
Tubaite ah Thai Prime inister   Thaksin le Bush cu US inn raang (
White House) ah an tawngaw ih Myanmar thuhla tampi rel tlannak an
neih hnu ah suu Kyi suah dingin ralkap cozah hnenah an dil hngal.
US thuthentu rual pawl cun Myanmar cu ?Chief Champion of Military
Dictatorship in Burma?.tiah kan ram ah Milaipakhat lawng ih uknak a
thatlo zia an tarlang ve.
Bush le Thaksin cun Myanmar  ah parties hmuahhmuah lungrual ten thu
an rel khawm sal thei nakding ih thupibik step cu Suu Kyi le
Political thawng tla pawl suah hi a si an ti.  Thailand hi Myanmar
ralkap uknak tan zet tu a rak si dah ih; Asian members ih lakluh a
rawt tu khal Thailand a si. Asinan, tuitum ah hin US cun Thai cu
ralkap uknak ram tuahthatnak ah napi ih hmai nawr ding in a forh a si.

Myanmar ralkap cozah in UN daan kalh ih a cangvaih nak …5 points
1.  Leitlun ih riththeih thil ( heroin) ciing suak tambik an si ih
hleiah International level rori in an zuar suak.

2.  Herion ciing suak tambik an si vekin HIV an suakter tamtuk. An
ram hnenum ram pawl khal ah hi natnak hi an karh ter vivo. Ahleice in
riit sii dawhnak thimte ruangah HIV hi hnenum ram ah an karh ter
vivo. Cui tlun ah TB le Malaria, HIV hrang ih Global bawmnak rori
khal an rak phit ih Interna tional thawn hna an tuan tlang duh lo.

3. Myanmar cozah hin a mipi pawl hrangah thlan a lai ciamco. Myanmar
ah milai pawlin ziang rights hman annei lo. Myanmar ralkap cozah cun
1996 kum ihsin khawte 2,700 rori an nawkkang/ siatsuah zo. Ralkap
pawl in miphun tenau pawl an sualpi ( rape ), thawng tampi hna hram
an tuan ter hrim ih; nauhak kum kimlo 70,000 rori ralkap ah an tuan
ter.
“Kawlram ralkap ah nauhak kum kimlo hruailut thei pohpoh cun ks.
5,000 ciar an ngah thu, a fapa ralkap in an hruaisakmi pa ( hmin
phuanlo ) in HRUAITU thuthangca Editor a sim. Asinan, ralkap hin an
hmun sungah tlawng lawngte thaten an kai ter phah tiah a sim bet.?

4.  Himi buainak pawl ruangah Myanmar ihsin milai 700,000 rori
Refugees an suak zo.

5. A netabik point cu; 1990 kum ih rampi hrilawknak ah NLD pawl an
tling nan Ralkap cozah in power an pek duh lo.
Hi point 5 pawl hi UN in Myanmar par ih actions a lak theimi
langsarbik an si.  Leitlun cun UN hi Myanmar par ah action la thlang
ding in a nawr rero.

September 18…Myanmar ram hrang mithi pawl hngillohnak Leitlun
ramkip ah tuah..
Kan dung September 18 ni ah Leitlun ram kip ih Myanmar raltlan pawl
cun, Kawlram ralkap cozah in a ram mipi a thawng teltel ih a tha cam,
a vei 17th nak cu an umnak ram kip ah an tuah ciau.
18 September, 1988 kum ah tu ih kawlram uktu pawl thotho, ralkap
hruaitu pawl in Myanmar mipi thawng tel kapthat an rak si.  Cui rampi
hrang ih martar pawl hngilhlonak ah Thailand ih Myanmar embassy
hmaiah milai 65 lai an pungkhawm ih Suu Kyi le thawngtla pawl
hmuahhmuah suah ding in an au. Thai Security pawl cun Minute 10 lawng
aunak caan an pe.
India khawpi New Delhi khalah tawngfang an pungkhawm ih; Tokyo le
Nagoya, Japan ram khalah thahnem tawk an pung khawm ih voice an nei.
Norway khalah an suak khawm ih, US ah cun ni 17 rori New York ih UN
zungpi hmai ah rawl hman zohlo in  sunnak an lanter. London khalah
Burmese embassy hmaiah September 19 ni ah an suak khawm ve.
    Sourse : M.T.D, N.L.M,M.N.N.

LEITLUN THUTHANG HRILKHAWM

Tuluk ram ah mah le mah thataw tam sinsin!
Tuluk miphun pawl hi khawruahhar ngaingai cu an si. An thangso tuk
kan ti rualrual ah kumtin Tuluk milai 287,000 rori cun mahte an that
aw.
Zuk ih kan hmuhmi hi Xian khua ah Tuluk pa AIDS vei ruangih beidong
in a mah le mah thhawk a tum lai zuk a si. Hi pai zuan nak hi 27m ih
sang tower a si.  Tuluk ih mah le mah thataw zat hi, US ih mah le mah
thataw zat a let 10 hrawng in an tam.

New Delhi Hotel ah….
Kan dung zarh tlawngkai niruk zan ah New Delhi ih Hotel hminthang zet
pakhat cu palik in an luhhnawh ih; India Bolly wood fala  Movie
actress pakhat, TV actress pakhat le college fala pahnih cu mai taksa
zuar tiah an kai ngah tiah Times of India thuthangca cun a report. An
hmin le thuhla fiang cu phuan a si hrih lo. Mi ngaisan zet pawl khal
hlawhhlang innpi lam ah kaih an si ko ee!

Aceh ihsin Indon ralkap tam sinsin suak..
September 20 ah Indosesia cozah cun Aceh ih a ralkap 2,600 rori a
lakir bet. Kan dung zarhpi ni ah ralkap 800 cu an suak zo ih;
September 25, zarhpi ni tiang ah ralkap 6,000 rori cun Aceh an
suahsan ding thu Indonesia Army thu phuangtu Erie Soetiko cun a
phuang.
Indonesia hin ralkap 30,000 hnak ih tam a nei ih Aceh reagion ah hin
15,000 lai khat thepthep in a ret a si. August 15 ah Aceh pawl cun
cozahpi hnenah ralthuamthlak rori in an lut sal ih; curuangah Indon
cun a ralkap pawl hi a ko kir rero.
1976 ihsin GAM tiih kawhmi Aceh luatnak hrang ih ding pawl le Indon
cocah cu an kap aw thawk ih milai 15,000 hrawng an thi zo. Civil deuh
lawng te an thi. Tuitum ih lungrualnak an tuahmi hin mipi 4million
umnak reagon hi a damter sal a zum um zet.

Salman Khan Court ah…
Bollywood tlangval hmeltha, Salman Khan ( zuk )cu Inn neilo pakhat pa
ih thihnak thuhla ah telve ih puh a si. A thuhla hi kan hmai
tlawngkai nili ni ah public hmai ih rel ding a si tiah a Lawyer
Dipesh Mehta cun kan dung tlawngkai nihnih ni ah a phuang.

Bird Flu a karh vivo!
Kan dung zarh ah UN kut tang ih um World Helth Organization ( WGO )
cun Leitlun ih Bird Flu natnak karh vivo ruangah meeting annei ih ram
100 ihsin siibawi palai pawl an suak khawm.  Cunah an phuansuahmi cu
Leitlun ram pawl hin hi natnak hi kan ngaihsaklo a siahcun million
tampi kan thi thei ti a si.
Hi natnat hi South Korea ah 2003 kum ah hmuhsuah hmaisak bik a si ih,
tu ahcun ram 11 rori in an tuar zo ih South East Asia sungah milai 63
in an thih phah zo.
Thailand ah 17 in an vei ih 12 an thi zo, Cambodia ah 4 in an vei ih
an pali in anthi zo, Vietnam ah 87 in an vei ih 43 rori in an thihpi
zo, Indonesia ah 6 in an vei ih 4 an thi zo.UN ih lutmi ram 192 sung
ah ram 40 lawng in ralrinnak thaten an tuah lai. Hi natnak hin 1918
kum ah Spanish ram ih hrirai suakmi in milai million tamtuk a that
vek in a cang theimi a si tiah WHO pawl cun an lungphan thu an rel
uar zet.

Nauhak Sex ruangah kaih tawng..
Padang Besar, Malaysia ih mipa nauhak jum 13 mi cun a nu le unau pawl
umlo caan, zanlam 3 – 6pm lak ah nauhak pawl an inn ah hruai tahrat
in Sex flim pawl a zohpi theu. Hi nauhak hi September 21 ah palik in
an kai.
Cui nauhak pa ih a hruaimi pawl lak ih kum 12 mite khal in a pa’i blu
film VCD a rawn keng theu ih cucu an zoh khawm theu a si hmang. An
zoh lawng silo in sualnak tla an tuah theu tiah thehsuah a si.

Nauhak kum 10 nute in nau a nei lala
Mak ve tak a si. Cameroon, Switzerland ah nunau nauhak kum 10 mi rori
in fate a hring tiah Justice thuneitu pawl in kan dung September 21
ah an than.
A hrin nak cu thlakhat lai a sizo ih naute pa zo a si ding ti an hawl
rero lai ti a si. Hi nauhak hi a nu in Cameroon ihain Swetzerland ah
a vaihpi mi a si ih, Valais reagon ih khawsa an si.

Leitlun Naute zaangbik!
Illinois ih Indain nu’i fanu  hrinmi cu 244grams lawng ih rit a si.
Cocacola tanbu khat thawn a bangaw hrawng tinak a si cu. Hi naute hi
Leitlun ih naute zaangbik a si tiah Guiness World Record cabu ah ngan
luh hngal a si. Hi naute hin kan dung zarh ah kumkhat kimnak birth
day a lawm bet lai.

Kate Moss, a ding sal ding
Kate Moss hi British Super Model tohkham sangbik cotu a si. Hi model
hi kan dung baite ah rittheih thil tham a thamlai zum thuthangca ah
suah a si. Asinan, hi model hin a thil tuahmi parah a sirawk tuk
ruangah a mah ngaisangtu pawl cun an ngaidam thei tento. Cawngia ih
hmangtu F&M Fashion Strore khal in an ningzahpi zet. Kum 31 mi, Super
Model hin Channel, Burbery le Dior company khalah contract a nei ih;
kan hmai November 10 ah khin a rualnu Stella Macretny ih design mi
hruk in H&M advertising campign ah mipi hmai ah a lang sal ding a si.

NASA : 2018 ah Thlapi par kaisal tum
North America Spae agency ( NASA ) pawl cun 2018 ah cun Mars ah milai
duhtawk ih kuat hluahhlo thei dingin timtuahnak an thawk sal zo.
Kan dung ah Washington ih conference an neihnak ah Nasa administrator
Michael Griffin cun veikhat kuat ah milai pali to theinak shuttle
programme an thawk zo thu a phuang.
Hi project hi US$ 104billion ( RM 390bil ) cem ding ih ralrin a si ih
kum 13 sung project a si.
Hi project hi kumkhat ah veihnih thlapi leilung pal thei ding ih
umtah a si ih, veikhat kahsuah ah milai pali to theih ding a si.
Thlapi Leilung ah cun ni 7 tiang an va caam thei ding ih tuah a si
ding ih thlapi leilung rori ah Oxygen le Hydrogen khal  tam sinsin
tuah suak thei an tum thu khal Griffin hin a sim bet.

China : Vanzam thar lei ding
Hainan Airlines cun Boeing 787 vanzam thar lei ding in kan dung
tlawngkai nikhat ni ah lungkimnak ca an ngan thu Airline president
Chen Feng cun  People Daily thuthangca a sim.  Tuluk Airline panga
pawl cun Airline 50 rori an lei zo tiah a phuang bet.

Malacca : 1,959 …HIV vei cingin thawng inn sungah…?
Deputy Internal Security Minister Datuk Noh Omar cun Malacca hi
thawng tla milai 39,000 lakah 1,959 pawl cun HIV natnak hrik an pai a
ti. January le August thla karlak lawng hmanah AIDS vei  214 thawng
an thleng ih cupawl lakah 113 cu thawnginn sungah an thi zo. Kan dung
kum khalah AIDS vei thawngtla 300 lak ah 187 cu an thi ve.
Thawng tla milai 18,998 pawl cu sii ruang ih thawng tla an si thu
khal Noh cun a phuang bet. Zohman in HIV natnak nei pawl cu thawnginn
khalah an tuamhlawm duhlo ih, cozah in thaten nan ruat sak a tul ding
tiah Noh cun a phuang ih; thawngtla kiltu Officer 22 rori in TB
natnak thawng tla pawl hnen ihsin an kai zo a ti.

Malaysia Fala mawi Fasha Sandha cu
Hi Malay Actress ( a par zuk )  hin 2003 ihsin Film a rak tuah ve
rero zonan a rak serious tuk dahlo. Ziangah tile director pawl in a
hman dan an rak thiam tuklo ruangah a si hmang. Tulai fang hi ?
Cicakman?timi film a tuah laifang a si ih, a film dang hnak in a that
sawn ding thu tla hi fala hin a sim uar zet.
Fasha hi Anak Mami ( RM 3.2million )timi film, Mami Jarum  ( RM
3.1million) le Mami Jarum Junior ( RM 3.2million ) timi film pawl ah
hlawhtling zet in a rak tel dah zotu fala  a si. Malay fala ahcun a
mawi pam ti uh maw.

Minute -10 Bible Thar a suak zo!
Kan dung September 22 ah England ih Anglican saya Rev.Michael Hinton
cun nazi pahnih sung ih siar suah theih dingmi Bible thar a tuah suak
zo. Hi Bible hi a mai duhvek cekci in designmi a si ih; angki zaal ih
san theih ding size ih tuah a si. Copies 10,000 lenglo an rial suak
ih Kawhhran le tlawng ih zem ding a si. Hi Bible tuahnak ah Hinton
cun kum hnih sung rori a rei ih Bible ih bu 66 cu size fate ah nazi 1
le minute 40 sung ih siar suah thluh thei ding in a tuah suak riai.

Tuluk Miss an hril ngah zo
Kan dung tlawngkai nihnih ni ah Tuluk rampi cun an ram sungih fala
mawibik ( Miss ) cu an hril suak zo.
Beijing fala Zhao Tingting timi nute ( a lai zuk ) hin pakhatnak a
ngah riai. Tingting hin kan hmai December thla ih Miss World
zuamawknak ah Tuluk rampi aiawh in atel ding a si.

New Zealand : Labour Party in nehnak co
New Zealand ah cozah thar hrilawknak cu theh fel a si zo ih Labour
party cu an tling a si. An nehawkdan hi a thlauaw lo zet. Labour
party hin seat 50 ngah in an sangbik ah an ding ih; National Party hi
seat 49 hmu in pahnihnak an kai ban.
Tuitum hrilawknak ah Labour party cu tling khalsehla ukawknak tuah
thei ding ih seat hmuh ding zat an hmuh lo ih; curuangah Clark cun
party fate sawn pawl cu uknak kai thei ding ih bawm a tum thu a
phuang. Kandung tlawngkai niruk ih New Zealand rampi hrilawknak cu
buaibainak umlo te in theh fel a si ih; 2002 ih hrilawk lai hnak in
votes thlak tu khal an tam sawn. An hrilawknak result cu hivek a si:
Labour Party : 41% (seats 50) National Party : 40% ( seats 49 )
N Zealand First :  6% ( seat 7 )
Greens   : 5 % ( seats 6 )
United Future : 3%  ( seats 3 )
Maori  : 2%  ( seats  4 )
Act   :  1.5%   ( seats 2 )

Afghan ah hrilawknak an thawk zo!
Tui zarh cu rambuai, Afghan ah hrilawknak an thawk ve zo. Hrilawk
laifang cuh in Muslim pirpak pawl khal an caanvai nasa.
Hi hrilawknak hi Parliment le States dangdang hrilawknak a si ih
votes thlak thei cin milai 12.4million hrawng in Candidate 6,000
hrawng lak ihsin an duhzawng an hril ding a si. Ralkap pawl khal in
buaibainak umlo ih an hrilawk thei nak ding ah kilvennak hna lam tan
an la nasa. Bomb le milai tamnawn khal an kai zo.
Hrilawknak Station dangdang ah ralkap 100,000 le ramdang ralkap
30,000 an duty ringring. An khawpi Kabul ih mawtaw lut hmuahmuah khal
thaten an check ih lamzin ih vaak rero pawl tiangin checking thluh an
si.Afghan hin kum 30 sung rori daan le duun mumal khal nei theilo in
doawknak le thahawknak  a rak tuar. Tuitum hi Afghan hrangah cun ni
tleu an hmuhnak ding hramthawk khal a si.

CAPO
A lal ngah riai
Falam tlangval pakhat cun nupi a thi ve an ti. Pabik ti nafam cu an
innsang ah a lal tuk lawmmam ih…veikhat cua nupi hnenah…Duat
zianglo kha rawn la aw! tiah ring nawn hin a fial.
A nupi : U..zianglo cu ziang sawm a si?
Pasal : Zianglo la ti le cu sahdah ti thei hngal ta he!
A thaisun ah a pasal ziing tho pek cun ..zianglo kha rawn la aw tiah
a fial lala.

Nupi : Heh..ka u na sahdah.
Pasal : Zianglo cu a bangaw ciaulo pi, tuisun ih
zianglo katimi cu ?sobul?a si ual. Zianglo ka ti cun sobul ti na
theilo maw? tiah aw hrang nawn cun a kawk lala.
A nupi cun a mahte khua a ruat rero ih ?ka pasal hin in duh ngaingai
lo a si hi tiah a mahten a suak? Cu tei nupa cu, ?zianglo?ruangah an
thenaw riai.

Kuttial zoh thiam tuk
Tivar tlangval pakhat cu kuttial zoh a thiam zet a si hmang. Mizoram
a tlawng ih, Bazarpi rori ah kuttial zoh in sum a hawl. Mi phunkim
fala, tlangval, tar le nauhak tiang in an pan hluah hlo.
Nikhat cu Fala mawite, ngo hiarhiar hin a kut tial zoh a rawn fial ve
a si hmang:
Fala : Ka kut tial in zohsak thei pei maw?
Tlangval : Thei tuk lawlaw panteh..a zoh rero ih, a kut lawng ah fala
nu’i hmailam caan pawl a lang thluhtheilo a si hmang. Nute, na ke
tial ka lo zohsak lawlaw pei cu fiang deuh seh ti phah in Fala nu’i’i
hni cu a kau dundo..an ti.

Fala : Khami ah ziangsi na hmuh?

Tlangval :  Nn innsang um tu dan hmuahmuah ka hmu!!! Hui..ha, hei
ha…..

HRUAITU CAH DUH HRANG
Hruaitu zarhtin thuthang hi KL ih ra khawm theilo unau pawl hrang
zawnruahnak thawn kuat suah ringring a si. Na cah duh le na Address
le contact numbers Editors hnen ( Hruaitu contact, Inside Front
Cover ) ah rawn kuat lohli aw.  Na hnatuannak hmun ah kan Lai tong
rori ih nganmi thuthangca a ra thleng ringring ding.

com
vl_bawithang@…
A NEITU
LCF
CHIEF EDITOR
RICHARD K. EMMANUEL
JOINT EDITOR
VL BAWITHANG
SENIOR ADVISORS
ANDREW THANG ( PATE )
REV. S. NI LUAI
PEHZAWMNAK
42 – 14, WISMA CITY TOWER, JALAN ALOR
50200 KUALA LUMPUR
MALAYSIA
CONTACT TO :

PHONE
012 – 6402232 ( ELA )
E-MAIL
hruaitu@…
richardemmanuel4u@…

(Visited 76 times, 1 visits today)

Comments

comments

Comments

%d bloggers like this: